1. Wetin kin mek wi gɛt advays, ɛn wetin mek wi ɔl nid am?

 WI ƆL nid advays wan wantɛm. Sɔntɛnde, wi kin go aks pɔsin we wi rɛspɛkt fɔ gi wi advays. Ɔda tɛm dɛn, brɔda we bisin bɔt wi go kam to wi fɔ gi wi advays we i si se wi de go “di rɔng say,” dat na, we wi de du sɔntin we wi go rigrɛt. (Gal. 6:​1) Ɔ wi kin gɛt advays we dɛn kin kɔrɛkt wi afta wi dɔn mek siriɔs mistek. Ilɛk aw di advays kam, wi fɔ tek am. Wi go bɛnifit we wi du dis, ɛn i kin ivin sev wi layf.—Prɔv. 6:​23.

2. Akɔdin to wetin Prɔvabs 12:​15 se, wetin mek wi fɔ lisin to advays?

² Wi tim skripchɔ de ɛnkɔrej wi fɔ “lisin fayn to gud advays.” (Prɔv. 22:​17) No mɔtalman nɔ de we sabi ɔltin; pɔsin kin de ɔltɛm we sabi mɔ bɔt sɔntin ɔ gɛt mɔ ɛkspiriɛns pas wi. (Rid Prɔvabs 12:​15.) So we wi lisin to advays, wi de sho se wi de put wisɛf dɔŋ. Wi de sho se wi no se nɔto ɔltin wi ebul fɔ du. Dɔn bak, wi no se wi nid pipul dɛn fɔ ɛp wi fɔ rich wi gol dɛn. Jiova bin mek Kiŋ Sɔlɔmɔn we gɛt sɛns rayt se: “If yu gɛt bɔku advays, bɛtɛ go fala yu.”—Prɔv. 15:​22.

3. Us we dɛn wi kin gɛt advays?

³ Sɔntɛm wi go gɛt dayrɛkt advays ɔ advays we nɔ dayrɛkt. Wetin na advays we nɔ dayrɛkt? Sɔntɛm wi go rid sɔntin na di Baybul ɔ wan pan wi pɔblikeshɔn dɛn we go mek wi stɔp ɛn tink bɔt wetin wi de du, ɛn di tin we wi rid go mek wi chenj di we aw wi de tink ɛn du tin. (Ibru. 4:​12) Wi go se dat na advays we nɔ dayrɛkt. Wetin na dayrɛkt advays? I go bi se wan ɛlda ɔ wan ɔda machɔ brɔda go sho wi sɔntin we wi nid fɔ ajɔst. Wi go se dat na dayrɛkt advays. If pɔsin gi wi advays frɔm di Baybul  bikɔs i lɛk wi, wi fɔ sho am se wi gladi bay we wi lisin to wetin i tɛl wi ɛn tray fɔ aplay am.

4. Akɔdin to Ɛkliziastis 7:​9, wetin wi fɔ avɔyd we dɛn gi wi advays?

⁴ Fɔ tɔk tru, sɔntɛnde, i nɔ kin izi fɔ tek dayrɛkt advays. Sɔntɛm wi go ivin vɛks. Wetin mek? Pan ɔl we wi kin gri se wi nɔ pafɛkt, sɔntɛnde i nɔ kin izi fɔ tek advays we pɔsin tɛl wi bɔt wan patikyula mistek we wi dɔn mek. (Rid Ɛkliziastis 7:​9.) Wi kin ivin mek ɛkskyuz. Sɔntɛm wi go dawt wetin mek di pɔsin disayd fɔ advays wi ɔ wi go vɛks bikɔs ɔf di we aw i advays wi. Wi go ivin fɛn fɔlt pan di wan we advays wi ɛn tink se: ‘Wetin mek i fil se i fit fɔ advays mi? Insɛf kin mek mistek!’ Ɛn if wi nɔ lɛk di advays we dɛn gi wi, sɔntɛm wi nɔ go lisin to am, ɔ wi go go luk fɔ advays we wi want fɔ yɛri.

5. Wetin wi go tɔk bɔt insay dis atikul?

⁵ Insay dis atikul, wi go tɔk bɔt ɛgzampul dɛn na di Baybul bɔt pipul dɛn we nɔ bin gri fɔ tek advays ɛn di wan dɛn we bin gri fɔ tek am. Wi go tɔk bak bɔt wetin go ɛp wi fɔ tek advays ɛn aw dat go bɛnifit wi.

6. Wetin wi lan frɔm wetin Kiŋ Rɛoboam bin du we dɛn gi am advays?

⁶ Lɛ wi tɔk bɔt Rɛoboam in ɛgzampul. We i bi kiŋ na Izrɛl, in pipul dɛn bin kam to am fɔ aks am fɔ sɔntin. Dɛn aks am fɔ ridyus pan di tin dɛn we in papa, Sɔlɔmɔn, bin de mek dɛn du. Rɛoboam bin du di rayt tin bay we i aks di bigman dɛn na Izrɛl fɔ tɛl am wetin i fɔ tɛl di pipul dɛn. Di bigman dɛn bin advays di kiŋ se if i du wetin di pipul dɛn aks am fɔ du, dɛn go sɔpɔt am ɔltɛm. (1 Kiŋ 12:​3-7) Bɔt di advays we di bigman dɛn bin gi Rɛoboam nɔ bin du fɔ am, so i aks di wan dɛn we na in ej grup fɔ gi am advays. Dɛn man dɛn de bin ol lɛk 40 ia, so i go bi se dɛn bin gɛt sɔm ɛkspiriɛns na layf. (2 Kro. 12:​13) Bɔt dis tɛm, dɛn bin gi Rɛoboam bad advays. Dɛn advays am fɔ ad pan di tin dɛn we di pipul dɛn bin de du. (1 Kiŋ 12:​8-11) Bikɔs Rɛoboam bin gɛt tu difrɛn advays dɛn, i fɔ bin dɔn pre to Jiova fɔ aks Am us advays fɔ tek. Bifo dat, i bin disayd fɔ tek di advays we in kɔmpin dɛn bin gi am, bikɔs na dat i bin want. Dis tin we Rɛoboam bin du bin briŋ prɔblɛm fɔ in ɛn di pipul dɛn na Izrɛl. Fɔ wi, sɔntɛm di advays we wi go gɛt nɔ go bi di advays we wi kin want fɔ yɛri ɔltɛm. Bɔt pan ɔl dat, if na Gɔd in Wɔd i kɔmɔt, wi fɔ tek am.

7. Wetin Kiŋ Uzaya in ɛgzampul tich wi?

⁷ Kiŋ Uzaya nɔ bin gri fɔ tek advays. I bin go na di say na Jiova in tɛmpul usay no ɔda pɔsin nɔ fɔ go pas di prist dɛn, ɛn i tray fɔ bɔn insɛns. Jiova in prist dɛn bin tɛl am se: “Nɔto yu Uzaya fɔ bɔn insɛns to PAPA GƆD [“Jiova,” NWT]. Na di man dɛn we de mek sakrifays fɔ pipul sin.” Wetin Uzaya bin du? If i bin put insɛf dɔŋ, tek di advays ɛn kɔmɔt na di tɛmpul wantɛm wantɛm, sɔntɛm Jiova fɔ dɔn fɔgiv am. Bifo dat, ‘Uzaya bin vɛks.’ Wetin mek i nɔ bin gri fɔ tek di advays? I go dɔn fil se bikɔs in na kiŋ, i gɛt rayt fɔ du ɛnitin we i want. Bɔt Jiova nɔ bin si tin da we de. Bikɔs Uzaya bin du tin we i nɔ gɛt rayt fɔ du, Jiova bin mek  i gɛt lɛprɔsi, ɛn i kɔntinyu fɔ bi “lɛpa te i day.” (2 Kro. 26:​16-21) Uzaya in ɛgzampul tich wi se, ilɛk udat wi bi, if wi nɔ gri fɔ tek di advays we de kɔmɔt na di Baybul, Jiova nɔ go gladi fɔ wi.

8. Wetin Job bin du we dɛn bin advays am?

⁸ Di Baybul tɔk bɔt gud ɛgzampul dɛn bɔt pipul dɛn we Jiova bin blɛs bikɔs dɛn gri fɔ tek advays. Dɛn bin difrɛn frɔm di ɔda ɛgzampul dɛn we wi jɔs tɔk bɔt. Tink bɔt Job. Pan ɔl we i bin lɛk Gɔd ɛn i bin want fɔ mek Gɔd gladi, i nɔ bin pafɛkt. We tin nɔ bin rili izi fɔ am, i bin tɔk sɔm tin dɛn we sho se i nɔ bin de tink di rayt we. So dat bin mek i bin gɛt dayrɛkt advays frɔm Ilayu ɛn Jiova. Wetin Job bin du? I bin put insɛf dɔŋ ɛn tek di advays. I bin se: “A tɔk bɔt tin dɛn we a nɔ no natin bɔt . . . dat mek a dɔn shem, so a de rɔb dɔst ɛn ashis beg yu, lɛ yu sɔri fɔ mi.” Jiova bin blɛs Job fɔ we i bin put insɛf dɔŋ.—Job 42:​3-6, 12-17.

9. Wetin Mozis bin du we Jiova bin advays am, ɛn wetin mek in na gud ɛgzampul?

⁹ Mozis na gud ɛgzampul bɔt pɔsin we bin gri fɔ tek kɔrɛkshɔn afta i bin mek siriɔs mistek. Wan tɛm, i bin vɛks ɛn i nɔ bin ɔnɔ Jiova. Bikɔs ɔf dis, Mozis bin lɔs di chans fɔ ɛnta di Prɔmis Land. (Nɔm. 20:​1-13) We Mozis bin tɔk bɔt di bad we aw i bin fil bikɔs ɔf wetin Jiova bin disayd, Jiova bin tɛl am se: “Nɔ tɔk bɔt dat igen.” (Dit. 3:​23-27) Mozis nɔ bin vɛks, bɔt i bin gri wit wetin Jiova disayd, ɛn Jiova bin kɔntinyu fɔ yuz am fɔ lid di Izrɛlayt dɛn. (Dit. 4:​1) Job ɛn Mozis bin gri fɔ tek advays, ɛn dɛn na gud ɛgzampul dɛn we wi fɔ falamakata. Job bin chenj di we aw i bin de tink; i nɔ bin mek ɛkskyuz. Mozis bin sho se i bin gri fɔ tek Jiova in advays bay we i bin kɔntinyu fɔ fetful ivin afta i dɔn lɔs di chans fɔ si di Prɔmis Land.

10. (a) Wetin Prɔvabs 4:​10-13 tɔk bɔt di bɛnifit dɛn we wi go gɛt we wi gri fɔ tek advays? (b) Wetin na di gud tin dɛn we sɔm brɔda ɛn sista dɛn dɔn du we dɛn advays dɛn?

¹⁰ Wi go bɛnifit we wi falamakata di ɛgzampul we fetful man dɛn lɛk Job ɛn Mozis bin sɛt. (Rid Prɔvabs 4:​10-13.) Bɔku pan wi brɔda ɛn sista dɛn dɔn falamakata dɛn ɛgzampul ɛn gri fɔ tek advays. Notis wetin wan brɔda we nem Imanwɛl, we de na Kongo, tɔk bɔt wan advays we dɛn bin gi am. I se: “Machɔ brɔda dɛn na mi kɔngrigeshɔn bin si se a bin de du tin dɛn we go ambɔg mi padi biznɛs wit Jiova, ɛn dɛn bin tray fɔ ɛp mi. A bin fala dɛn advays, ɛn dat bin ɛp mi fɔ avɔyd bɔku prɔblɛm dɛn.” * Wan payɔnia sista we nem Mɛgan, we de na Kanada, tɔk bɔt di advays dɛn we dɛn bin gi am. I se: “Di advays dɛn we dɛn bin gi mi nɔto di advays dɛn we a bin want fɔ de yɛri ɔltɛm, bɔt na wetin a bin nid fɔ yɛri.” Ɛn wan brɔda we de na Kroeshia, we nem Mako, tɔk se: “A bin lɔs di chans we a bin gɛt fɔ du sɔm wok dɛn na di kɔngrigeshɔn, bɔt we a tink bɔt wetin a bin du, a kam fɔ no se di advays we dɛn bin gi mi bin ɛp mi fɔ gɛt tayt padi biznɛs wit Jiova bak.”

11. Wetin Brɔda Kal Klayn bin se bɔt fɔ tek advays?

¹¹ Wan ɔda ɛgzampul bɔt pɔsin we bin bɛnifit bikɔs i bin gri fɔ tek advays na Brɔda Kal Klayn, we bin de sav as  mɛmba na di Gɔvnin Bɔdi. I tɔk insay in layf stori se wan tɛm, Brɔda Josɛf F. Rutafɔd we na bin in tayt padi, bin gi am strɔng advays. Brɔda Klayn bin tɔk se dat bin mek i bin vɛks fɔs. I bin se: “Di nɛks tɛm we [Brɔda Rutafɔd] si mi, i bin gladi ɛn se, ‘Mɔnin Kal!’ Bɔt bikɔs a bin stil vɛks, a ansa na mi trot. Brɔda Rutafɔd bin se, ‘Kal, tek tɛm! Setan dɔn sɛt trap fɔ yu!’ A bin shem ɛn tɔk se, ‘A nɔ vɛks pan yu Brɔda Rutafɔd.’ Bɔt i bin no se a vɛks, so i jɔs wɔn mi bak se, ‘I oke. Jɔs tek tɛm. Setan dɔn sɛt trap fɔ yu.’ Dat na bin tru! We wi kip grɔj na wi at fɔ wi brɔda, mɔ we i bi se i tɔk sɔntin we i gɛt rayt fɔ tɔk . . . , wi de gi Setan chans fɔ ebul wi. * (Ɛfi. 4:​25-27) Brɔda Klayn bin gri fɔ tek di advays we Brɔda Rutafɔd bin gi am, ɛn dɛn bin kɔntinyu fɔ gɛt tayt padi biznɛs.

12. We wi put wisɛf dɔŋ, aw dat go ɛp wi fɔ gri fɔ tek advays? (Sam 141:​5)

¹² Wetin go ɛp wi fɔ gri fɔ tek advays? Wi nid fɔ put wisɛf dɔŋ ɛn mɛmba se wi nɔ pafɛkt, ɛn sɔntɛnde wi kin du tin dɛn we nɔ mek sɛns atɔl. As wi bin dɔn tɔk, Job bin de tink di rɔng we. Bɔt leta, i ajɔst di we aw i de tink, ɛn Jiova bin blɛs am fɔ dat. Wetin mek? Na bikɔs Job bin put insɛf dɔŋ. I bin sho se i put insɛf dɔŋ bay we i bin gri fɔ tek di advays we Ilayu bin gi am, pan ɔl we i bin big pas Ilayu. (Job 32:​6, 7) We wi put wisɛf dɔŋ, dat go ɛp wi bak fɔ fala advays pan ɔl we wi go fil se wi nɔ fit fɔ gɛt da advays de, ɔ pan ɔl we wi go big pas di pɔsin we gi wi di advays. Wan ɛlda we de na Kanada tɔk se, “Bikɔs wi nɔ de si wisɛf lɛk aw ɔda pipul dɛn de si wi, aw wi go go bifo if nɔbɔdi nɔ advays wi?” Udat pan wi nɔ nid fɔ gɛt di kwaliti dɛn we di spirit de gi mɔ ɛn mɔ ɛn fɔ sabi fɔ prich ɛn tich di gud nyuz gud gud wan?—Rid Sam 141:​5.

13. Aw wi fɔ si di advays we dɛn de gi wi?

¹³ Si advays as we we Gɔd de sho se i lɛk yu. Jiova want di bɛst fɔ wi. (Prɔv. 4:​20-22) We i yuz in Wɔd, di pɔblikeshɔn dɛn we de tɔk bɔt di Baybul, ɔ machɔ Kristian dɛn fɔ advays wi, i de sho se i lɛk wi. Ibruz 12:​9, 10 se “Gɔd de du so fɔ wi yon bɛnifit.”

14. Wetin wi fɔ pe atɛnshɔn to we dɛn advays wi?

¹⁴ Pe atɛnshɔn to di advays, nɔ pe atɛnshɔn pan di we aw dɛn tɔk am. Sɔntɛnde, wi go fil se di we aw dɛn gi wi di advays nɔto di bɛst we. As wi ɔl no,  ɛnibɔdi we de gi advays fɔ tray fɔ mek i izi fɔ lɛ di pɔsin we i de advays gri fɔ tek am. * (Gal. 6:​1) Bɔt if na wi dɛn de advays, wi go du wɛl we wi pe atɛnshɔn to di mɛsej, ivin if wi fil se di pɔsin we gi wi di advays nɔ tɔk fayn. Sɔntɛm wi kin aks wisɛf: ‘Ivin if a nɔ lɛk di we aw dɛn gi mi di advays, sɔntin de we a go lan frɔm am? A go tray nɔ fɔ pe atɛnshɔn pan di pɔsin we gi mi di advays in fɔlt ɛn lan frɔm di advays?’ I go rili fayn if wi luk fɔ we aw wi go bɛnifit frɔm ɛni advays we dɛn gi wi.—Prɔv. 15:​31.

15. Wetin mek wi fɔ aks fɔ advays?

¹⁵ Di Baybul de ɛnkɔrej wi fɔ aks fɔ advays. Prɔvabs 13:​10 (NWT) se: “Di wan dɛn we gɛt sɛns de luk fɔ advays.” Dat na tru! Di wan dɛn we de aks fɔ advays, bifo dɛn wet te pɔsin kam mit dɛn ɛn advays dɛn kin go bifo pas di wan dɛn we nɔ de aks fɔ advays. So go de aks fɔ advays.

16. Us tɛm dɛn wi kin aks fɔ advays?

¹⁶ Ustɛm wi fɔ aks wi kɔmpin Kristian dɛn fɔ advays? Lɛ wi tɔk bɔt sɔm ɛgzampul dɛn. (1) Wan sista aks wan ɛkspiriɛns pɔblisha fɔ jɔyn am fɔ kɔndɔkt stɔdi, dɔn leta i aks am fɔ advays bɔt wetin go ɛp am fɔ sabi tich fayn. (2) Wan sista we nɔ mared go lɛk fɔ bay sɔm klos dɛn, so i aks wan machɔ sista fɔ mek i tɛl am wetin i tink bɔt di klos dɛn we i pik. (3) Wan brɔda gɛt asaynmɛnt fɔ gi in fɔs pɔblik tɔk. I aks wan ɛkspiriɛns spika fɔ tek tɛm lisin to in tɔk ɛn gi am sɔm advays dɛn bɔt aw i fɔ bi gud spika. I go fayn fɔ mek ivin brɔda dɛn we dɔn de gi tɔk fɔ lɔng tɛm aks fɔ advays frɔm ɛkspiriɛns spika dɛn ɛn fala di advays we dɛn gi am.

17. Wetin wi go du fɔ bɛnifit frɔm advays?

¹⁷ Insay di wik ɔ mɔnt dɛn we de kam, wi ɔl go gɛt advays. Dɛn go gi wi dayrɛkt advays ɔ advays we nɔ dayrɛkt. We dat apin, mɛmba di lɛsin dɛn we wi jɔs dɔn tɔk bɔt. Kɔntinyu fɔ put yusɛf dɔŋ. Pe atɛnshɔn to di advays, nɔ pe atɛnshɔn pan di we aw dɛn tɔk am. Ɛn fala di advays we dɛn gi yu. Nɔbɔdi nɔ bɔn wit sɛns. Bɔt we wi “tek advays ɛn rɛdi fɔ lan,” Gɔd in Wɔd prɔmis se wi go “gɛt sɛns.”—Prɔv. 19:​20.