1-2. (a) Wetin mek i nɔ kin izi fɔ bɔku pipul dɛn tide fɔ biliv di wan dɛn we gɛt pawa? (b) Wetin wi go tɔk bɔt insay dis atikul?

 TIDE, i nɔ kin izi fɔ mek bɔku pipul dɛn biliv di wan dɛn we gɛt pawa. Dɛn dɔn kam fɔ si se di lɔ ɛn di gɔvmɛnt de protɛkt di wan dɛn we gɛt mɔni ɛn di wan dɛn we gɛt pawa, bɔt dɛn nɔ de trit di po wan dɛn fia wan. Di Baybul se: “Pipul we gɛt pawa de sɔprɛs di wan we i gɛt pawa pas te dɛn ambɔg dɛnsɛf.” (Ɛkli. 8:​9) Pantap dat, sɔm pan di wan dɛn we de bifo pan Gɔd biznɛs kin du bad bad tin dɛn, ɛn dat dɔn mek sɔm pipul dɛn nɔ biliv Gɔd igen. So we wi de stɔdi pɔsin di Baybul, wi gɛt di wok fɔ ɛp am fɔ biliv Jiova ɛn di wan dɛn we I dɔn pik na di wɔl.

² Nɔto wi Baybul studɛnt dɛn nɔmɔ nid fɔ lan fɔ biliv Jiova ɛn in ɔganayzeshɔn. Ivin wi we dɔn de na di trut fɔ lɔng tɛm naw fɔ tray tranga wan fɔ mɛmba se di we aw Jiova de du tin na di bɛst we ɔltɛm. Sɔntɛnde, sɔntin kin apin we kin mek i nɔ izi fɔ lɛ wi biliv se di we aw Jiova de du tin kin rayt ɔltɛm. Insay dis atikul, wi go tɔk bɔt tri eria dɛn we go tɛst wi fet: (1) we wi rid sɔm Baybul akawnt dɛn, (2) we Jiova in ɔganayzeshɔn tɛl wi fɔ du sɔntin, ɛn (3) we prɔblɛm dɛn go mit wi tumara bambay.

3. Aw sɔm Baybul akawnt dɛn kin tɛst di biliv we wi biliv Jiova?

 ³ As wi de rid Gɔd in Wɔd, sɔntɛm wi go gɛt sɔm kwɛstyɔn dɛn bɔt di we aw Jiova bin trit sɔm pipul dɛn ɛn bɔt sɔm tin dɛn we Jiova bin disayd fɔ du. Fɔ ɛgzampul, insay di Baybul buk we nem Di Nɔmba Dɛm, wi bin rid se Jiova bin se dɛn fɔ kil wan Izrɛlayt bikɔs  i go gɛda wud di Sabat de. Insay Sɛkɛn Samiɛl, wi lan se afta lɔng tɛm, Jiova bin fɔgiv Kiŋ Devid fɔ we i du mami ɛn dadi biznɛs di we aw Gɔd nɔ want ɛn fɔ di kil we i kil. (Nɔm. 15:​32, 35; 2 Sam. 12:​9, 13) Sɔntɛm wi go de wɔnda, ‘Wetin mek Jiova fɔgiv Devid fɔ di kil we i kil ɛn di mami ɛn dadi biznɛs we i du, bɔt I se mek dɛn kil di ɔda man we in sin nɔ luk siriɔs lɛk Devid in yon?’ Fɔ ansa dis kwɛstyɔn, lɛ wi tɔk bɔt tri tin dɛn we wi fɔ mɛmba we wi de rid di Baybul.

4. Aw Jɛnɛsis 18:​20, 21 ɛn Ditarɔnɔmi 10:​17 ɛp wi fɔ gɛt strɔng kɔnfidɛns pan di we aw Jiova de jɔj?

⁴ Nɔto ɔltin di Baybul de tɛl wi bɔt sɔntin we apin. Fɔ ɛgzampul, wi no se Devid bin rili ripɛnt fɔ di tin dɛn we i bin du. (Sam 51:​2-4) Bɔt uskayn pɔsin di man we brok di lɔ bɔt di Sabat bin bi? Yu tink se i bin rili sɔri fɔ wetin i bin du? Fɔ se i nɔ bin de obe Jiova in lɔ dɛn trade? Ɔ i nɔ bin de lisin to di wɔnin dɛn we i bin de gɛt? Di Baybul nɔ tɔk so. Bɔt wi shɔ se Jiova “nɔ gɛt wan bɛn bɛn.” (Dit. 32:​4) I nɔ de disayd fɔ du sɔntin bikɔs ɔf wetin ɔda pipul dɛn se, ɔ bikɔs i de tek wan pɔsin bɛtɛ pas ɔda pɔsin, ɔ bikɔs ɔf ɛni ɔda tin we go mek mɔtalman nɔ ɔndastand wetin apin di kɔrɛkt we; i de disayd fɔ du sɔntin di rayt we. (Rid Jɛnɛsis 18:​20, 21; Ditarɔnɔmi 10:​17.) Di mɔ wi de lan bɔt Jiova ɛn di we aw i de du tin, na di mɔ wi go biliv pan di we aw i de jɔj. Ivin if wi rid di Baybul ɛn gɛt kwɛstyɔn we wi nɔ ebul fɔ ansa naw, di bɔku bɔku tin dɛn we wi no bɔt wi Gɔd mek wi biliv tranga wan se i “nɔ miks pan bɛnbɛn.”—Sam 145:​17.

5. Aw di pafɛkt we wi nɔ pafɛkt de afɛkt di we aw wi de jɔj? (Rid bak di bɔks we gɛt di taytul, “ Di Pafɛkt we Wi Nɔ Pafɛkt De Mek Wi Nɔ De Si Tin di Kɔrɛkt We.”)

⁵ Wi nɔ kin ebul fɔ jɔj di kɔrɛkt we ɔltɛm bikɔs wi nɔ pafɛkt. Gɔd mek wi lɛk aw insɛf tan, so wi kin rili want fɔ si we dɛn de trit pipul dɛn fia wan. (Jɛn. 1:​26) Bɔt bikɔs wi nɔ pafɛkt, wi nɔ kin jɔj sɔntin di kɔrɛkt we, ivin we wi tink se wi sabi ɔltin bɔt am. Fɔ ɛgzampul, mɛmba aw Jona  bin vɛks we Jiova bin disayd fɔ fɔgiv di pipul dɛn na Ninivɛ. (Jona 3:​10–4:​1) Bɔt tink bɔt wetin bin apin bikɔs Jiova bin sho dɛn sɔri-at. I pas 120,000 pipul dɛn na Ninivɛ we bin sev bikɔs dɛn bin ripɛnt! Afta ɔl, na Jona nɔ bin jɔj di pipul dɛn di rayt we, nɔto Jiova.

6. Wetin mek Jiova nɔ nid fɔ ɛksplen to wi wetin mek i disayd fɔ du sɔntin?

⁶ Jiova nɔ nid fɔ ɛksplen to mɔtalman di rizin dɛn we mek i de disayd fɔ du sɔntin. Na tru se trade Jiova bin de alaw in savant dɛn fɔ tɔk bɔt aw dɛn fil bɔt sɔm tin dɛn we i bin disayd fɔ du ɔ we i want fɔ du. (Jɛn. 18:​25; Jona 4:​2, 3) Ɛn wan wantɛm, i bin de ɛksplen wetin mek i disayd fɔ du sɔntin. (Jona 4:​10, 11) Bɔt Jiova nɔ nid fɔ ɛksplen to wi di rizin we mek i disayd fɔ du sɔntin. Bikɔs na in mek wi, i nɔ nid wi fɔ gri wit wetin i want fɔ du bifo ɔ afta i du am.—Ayz. 40:​13, 14; 55:​9.

7. Wetin nɔ go izi fɔ wi? Wetin mek?

⁷ Wi nɔ gɛt wan dawt se Jiova de du wetin rayt ɔltɛm. Bɔt sɔntɛm, di prɔblɛm fɔ wi na fɔ lɛ wi biliv di man dɛn we Jiova dɔn pik fɔ de oba wi. I go bi se wi go de wɔnda if di wan dɛn we Jiova dɔn pik fɔ de oba wi insay in ɔganayzeshɔn de rili du tin lɛk aw Jiova se ɔ na jɔs aw dɛn fil. Na so sɔm pan di pipul dɛn we bin de di tɛm we dɛn rayt di Baybul, go dɔn de tink. Tink bɔt di ɛgzampul dɛn we wi tɔk bɔt na  paregraf 3. Sɔntɛm, pɔsin we na fambul to di man we bin brok di lɔ bɔt di Sabat go dɔn wɔnda if Mozis bin rili tɔk to Jiova bifo i se lɛ dɛn kil di man. Ɛn sɔntɛm, Yuraya we na Itayt, we Devid bin du mami ɛn dadi biznɛs wit in wɛf, in padi go dɔn de tink se Devid bin yuz in pawa as kiŋ fɔ mek dɛn nɔ gi am di pɔnishmɛnt we i fit fɔ gɛt. Jiova biliv di man dɛn we i pik fɔ de bifo na di ɔganayzeshɔn ɛn di kɔngrigeshɔn. So if wi nɔ biliv dɛn man dɛn ya, wi nɔ go se wi biliv Jiova.

8. Aw di tin dɛn we Akt 16:​4, 5 tɔk bɔt fiba wetin de apin na di Kristian kɔngrigeshɔn tide?

⁸ Tide, Jiova de yuz “di slev we fetful ɛn gɛt sɛns” fɔ de bifo na di pat pan in ɔganayzeshɔn we de na dis wɔl. (Mat. 24:​45) Lɛk di gɔvnin bɔdi we bin de insay di fɔstɛm Kristian dɛn tɛm, dis slev de kia fɔ Gɔd in pipul dɛn ɔlsay na di wɔl ɛn tɛl kɔngrigeshɔn ɛlda dɛn wetin fɔ du. (Rid Akt 16:​4, 5.) Dɔn di ɛlda dɛn de mek shɔ se dɛn fala wetin di fetful slev tɛl dɛn. Wi de sho se wi biliv di we aw Jiova de du tin bay we wi obe wetin di ɔganayzeshɔn ɛn di ɛlda dɛn de tɛl wi.

9. Ustɛm i nɔ kin izi fɔ mek wi fala di tin dɛn we di ɛlda dɛn disayd fɔ du? Wetin mek?

⁹ Sɔntɛnde, i nɔ kin izi fɔ lɛ wi fala di tin dɛn we di ɛlda dɛn kin disayd fɔ du. Fɔ ɛgzampul, dis biɛn tɛm, dɛn dɔn mek sɔm ajɔstmɛnt dɛn insay bɔku kɔngrigeshɔn ɛn sakit dɛn. Na sɔm say dɛn, di ɛlda dɛn bin aks sɔm pɔblisha dɛn fɔ jɔyn difrɛn kɔngrigeshɔn so dat dɛn go gɛt mɔ pɔblisha dɛn na dɛn kɔngrigeshɔn dɛn de. If dɛn tɛl wi fɔ jɔyn nyu kɔngrigeshɔn, sɔntɛm i nɔ go izi fɔ lɛ wi lɛf wi fambul ɛn padi dɛn biɛn. Fɔ se na Jiova kin tɛl di ɛlda dɛn usay dɛn fɔ sɛn ɛni pɔblisha? Nɔ-o. So  bikɔs ɔf dat, sɔntɛm i nɔ go izi fɔ fala di tin dɛn we di ɛlda dɛn de tɛl wi fɔ du. Bɔt Jiova biliv di ɛlda dɛn fɔ disayd dɛn tin dɛn ya, ɛn wisɛf nid fɔ biliv dɛn. *

10. Akɔdin to Ibruz 13:​17, wetin mek wi fɔ fala wetin di ɛlda dɛn disayd?

¹⁰ Wetin mek wi fɔ fala ɛn sɔpɔt wetin di ɛlda dɛn disayd pan ɔl we di tin we dɛn disayd nɔto sɔntin we wi want? Na bikɔs we wi du dat, wi de ɛp fɔ mek pis ɛn wanwɔd kɔntinyu fɔ de na di kɔngrigeshɔn. (Ɛfi. 4:​2, 3) Di kɔngrigeshɔn dɛn go go bifo we wi ɔl put wisɛf dɔŋ ɛn rɛdi fɔ obe di tin dɛn we di ɛlda dɛn disayd fɔ du. (Rid Ibruz 13:​17.) Di tin we impɔtant mɔ na dat wi de sho Jiova se wi biliv am bay we wi de fala wetin di wan dɛn we i put bifo fɔ kia fɔ wi de disayd.—Akt 20:​28.

11. Wetin go ɛp wi fɔ abop mɔ pan di tin dɛn we di ɛlda dɛn tɛl wi fɔ du?

¹¹ Wi go abop mɔ pan di tin dɛn we di ɛlda dɛn tɛl wi fɔ du bay we wi mɛmba se dɛn de pre to Jiova fɔ oli spirit we dɛn de tɔk bɔt tin dɛn we gɛt fɔ du wit di kɔngrigeshɔn. Dɔn bak, dɛn de tink gud gud wan bɔt Baybul prinsipul dɛn we gɛt fɔ du wit wetin dɛn want fɔ disayd ɛn chɛk di tin dɛn we Jiova in ɔganayzeshɔn dɔn gi wi. Dɛn rili want fɔ mek Jiova gladi ɛn kia fɔ in pipul dɛn di bɛst we aw dɛn ebul. Dɛn fetful man dɛn ya no se dɛn gɛt fɔ ansa to Gɔd fɔ di we aw dɛn de kia fɔ in pipul dɛn. (1 Pit. 5:​2, 3) Tink bɔt dis: Pan ɔl we pipul dɛn na di wɔl nɔ gɛt wanwɔd bikɔs ɔf dɛn kɔlɔ, dɛn rilijɔn, ɛn pɔlitiks, Jiova in pipul dɛn de wɔship di wangren tru Gɔd wit wanwɔd. Na bikɔs ɔf Jiova in blɛsin nɔmɔ mek dis de apin na in ɔganayzeshɔn.

12. Wetin ɛlda dɛn fɔ tek tɛm tink bɔt fɔ no if pɔsin dɔn ripɛnt?

¹² Jiova dɔn gi di ɛlda dɛn impɔtant wok fɔ kip di kɔngrigeshɔn klin. If pɔsin kɔmit siriɔs sin, Jiova de ɛkspɛkt di ɛlda dɛn fɔ disayd if da pɔsin de fɔ kɔntinyu fɔ de insay di kɔngrigeshɔn. Wan pan di tin dɛn we dɛn nid fɔ du na fɔ tray fɔ no if di pɔsin rili fil sɔri fɔ wetin i du. Sɔntɛm i go se i dɔn ripɛnt, bɔt i rili et wetin i bin du? I dɔn mekɔp in maynd nɔ fɔ kɔmit di sem sin igen? If na bad padi dɛn mek i sin siriɔs wan so, i rɛdi fɔ mek in ɛn dɛn pipul dɛn de nɔ bi padi igen? Di ɛlda dɛn de pre to Jiova, tek tɛm tink bɔt wetin rili apin ɛn wetin di Baybul tɔk bɔt dis, ɛn dɛn de rili tink bɔt aw di pɔsin we sin siriɔs wan fil bɔt di tin we i du. Dɔn dɛn kin disayd if di pɔsin we sin siriɔs wan fɔ kɔntinyu fɔ de na di kɔngrigeshɔn. Sɔntɛnde, dɛn fɔ disfɛloship am.—1 Kɔr. 5:​11-13.

13. Wetin wi go tink bɔt if wi padi ɔ wi fambul disfɛloship?

¹³ Sɔntɛm, wetin go apin we go tɛst di biliv we wi biliv di ɛlda dɛn? If di pɔsin we disfɛloship nɔto wi tayt padi ɔ fambul, sɔntɛm i go izi fɔ mek wi gri wit wetin di ɛlda dɛn disayd. Bɔt if di pɔsin na wi tayt padi ɔ fambul, sɔntɛm wi go wɔri se di ɛlda dɛn nɔ tek dɛn tɛm fɔ no ɔl wetin apin, ɔ sɔntɛm wi go de wɔnda if dɛn rili jɔj di kes di we aw Jiova fɔ bin dɔn jɔj am. Wetin go ɛp wi fɔ kɔntinyu fɔ tink di rayt we bɔt wetin di ɛlda dɛn disayd?

14. Wetin go ɛp wi if di ɛlda dɛn disayd se wan pan wi padi dɛn ɔ fambul dɛn fɔ disfɛloship?

 ¹⁴ I go fayn fɔ mek wi mɛmba se fɔ disfɛloship pɔsin na Jiova in arenjmɛnt. I de bɛnifit di kɔngrigeshɔn, ɛn sɔntɛm i go bɛnifit di pɔsin we kɔmit di sin. If pɔsin nɔ ripɛnt fɔ di siriɔs sin we i kɔmit, ɛn i kɔntinyu fɔ de na di kɔngrigeshɔn, i go afɛkt ɔda pipul dɛn ɛn mek dɛn kɔmit sin. (Gal. 5:​9) Dɔn bak, sɔntɛm i nɔ go no aw di sin we i kɔmit rili siriɔs, ɛn i nɔ go de tray in bɛst fɔ ajɔst di we aw i de tink ɛn du tin so dat i go gɛt Jiova in blɛsin bak. (Ɛkli. 8:​11) Wi shɔ se we di ɛlda dɛn de disayd if pɔsin fɔ disfɛloship, dɛn de tek dɛn wok as sɔntin we rili siriɔs. Dɛn no se jɔs lɛk di jɔj dɛn insay di Izrɛlayt dɛn tɛm, “nɔto fɔ mɔtalman [dɛn] de jɔj, bɔt na fɔ PAPA GƆD [“Jiova,” NWT].”—2 Kro. 19:​6, 7.

15. Wetin mek wi nid fɔ biliv di we aw Jiova de dayrɛkt naw pas ɛni ɔda tɛm?

¹⁵ As di tɛm fɔ mek dis wɔl dɔn, dɔn de nia, wi nid fɔ biliv di we aw Jiova de du tin pas ɛni ɔda tɛm. Wetin mek? Na bikɔs insay di tɛm fɔ da big big trɔbul, sɔntɛm dɛn go tɛl wi fɔ du tin dɛn we go luk strenj, we nɔ mek sɛns, ɔ we at fɔ obe. As wi no, Jiova nɔ go kam mit wi fɔ tɔk to wi. I go bi se i go yuz di wan dɛn we i dɔn pik fɔ de bifo na in ɔganayzeshɔn fɔ tɛl wi wetin fɔ du. Dat nɔ go bi di tɛm we wi go dawt wetin dɛn tɛl wi fɔ du ɔ bigin wɔnda, ‘Fɔ se wetin dɛn de tɛl wi fɔ du na frɔm Jiova, ɔ na jɔs wetin dɛn fil fɔ tɛl wi?’ Yu go biliv Jiova ɛn in ɔganayzeshɔn da impɔtant tɛm de? Di we aw yu de tink bɔt wetin di wan dɛn we Gɔd dɔn pik fɔ de bifo na in ɔganayzeshɔn de tɛl yu naw go ɛp yu fɔ no di ansa to da kwɛstyɔn de. If yu biliv di tin dɛn we dɛn de tɛl wi tide ɛn rɛdi fɔ obe, i go bi se yu go du di sem tin insay di tɛm fɔ da big big trɔbul.—Lyuk 16:​10.

16. Wetin go apin tumara bambay we go tɛst di biliv we wi biliv di we aw Jiova de jɔj?

¹⁶ Wi fɔ tek tɛm tink bak bɔt aw wi go si Jiova in jɔjmɛnt we dis wikɛd wɔl go dɔn. Rayt naw, wi de op se bɔku pan di wan dɛn we nɔ de sav Jiova, ivin wi fambul dɛn we nɔto Jiova Witnɛs, go disayd fɔ sav Jiova bifo di ɛnd kam. Bɔt di tɛm fɔ Amagɛdɔn, Jiova go yuz Jizɔs fɔ disayd wetin go faynali apin to dɛn tumara bambay. (Mat. 25:​31-33; 2 Tɛs. 1:​7-9) Nɔto wi go disayd udat  Jiova go sɔri fɔ ɔ udat i nɔ go sɔri fɔ. (Mat. 25:​34, 41, 46) Fɔ se wi go ebul fɔ biliv di we aw Jiova de jɔj, ɔ wi go stɔp fɔ sav Jiova bikɔs wi nɔ gri wit wetin i disayd fɔ du? I klia, wi nid fɔ du tin dɛn naw we go mek wi biliv Jiova mɔ ɛn mɔ, so dat wi go biliv am wit ɔl wi at tumara bambay.

17. Aw wi go bɛnifit frɔm di we aw Jiova de jɔj di tɛm we dis wikɛd wɔl go dɔn?

¹⁷ Imajin aw wi go fil insay Gɔd in nyu wɔl we wi go si wetin dɔn apin bikɔs ɔf di we aw Jiova de jɔj. Lay lay rilijɔn nɔ go de igen, ɛn gridi biznɛsman dɛn ɔ gɔvmɛnt dɛn we dɔn trit pipul dɛn bad ɛn mek dɛn sɔfa ɔl di tɛm dɛn we dɔn pas te to dis tɛm, nɔ go de igen. Wɛlbɔdi prɔblɛm, ol ej, ɛn di day we di wan dɛn we wi lɛk de day nɔ go de igen. Jiova go lɔk Setan ɛn in dimɔn dɛn fɔ wan tawzin ia. Ɔl di bad tin dɛn we dɔn apin bikɔs dɛn bin tɔn dɛn bak pan Jiova, nɔ go de apin igen. (Rɛv. 20:​2, 3) Wi go rili gladi da tɛm de bikɔs wi bin biliv di we aw Jiova de du tin.

18. Akɔdin to Di Nɔmba Dɛm 11:​4-6 ɛn 21:​5, us lɛsin dɛn wi go lan frɔm di Izrɛlayt dɛn ɛgzampul?

¹⁸ Fɔ se layf insay Gɔd in nyu wɔl go gɛt sɔm chalenj dɛn we go mek i nɔ izi fɔ lɛ wi biliv di we aw Jiova de du tin? Fɔ ɛgzampul, tink bɔt wetin bin apin jɔs afta di Izrɛlayt dɛn bin fri frɔm slev layf na Ijipt. Sɔm bin bigin fɔ kɔmplen bikɔs dɛn bin de mis di frɛsh fud we dɛn bin de ɛnjɔy na Ijipt, ɛn dɛn nɔ bin de trit di mana we Jiova bin gi dɛn, wit rɛspɛkt. (Rid Di Nɔmba Dɛm 11:​4-6; 21:​5.) Fɔ se wisɛf go tink da sem we de afta di big big trɔbul go dɔn? Wi nɔ no di wok dɛn we wi go du fɔ klin di wɔl ɛn smɔl smɔl mek di wan ol wɔl bi Paradays. I go bi se bɔku wok go de fɔ du ɛn sɔntɛm layf nɔ go izi we wi bigin. Wi go kɔmplen bɔt wetin Jiova de gi wi da tɛm de? Wan tin we wi shɔ bɔt na dat, di mɔ wi gladi fɔ di tin dɛn we Jiova de gi wi naw, na di mɔ wi go gladi tumara bambay fɔ wetin i go gi wi.

19. Aw yu go ɛksplen shɔt wan di men pɔynt dɛn na dis atikul?

¹⁹ Jiova in we fɔ du tin rayt ɔltɛm. Wi nid fɔ biliv dat tranga wan. Wi nid bak fɔ gɛt kɔnfidɛns pan di wan dɛn we Jiova biliv fɔ tɛl wi wetin fɔ du. Nɔ ɛva fɔgɛt di wɔd dɛn we Jiova bin yuz prɔfɛt Ayzaya fɔ tɔk. I bin se: “Una go gɛt trɛnk we una nɔ wɔri ɛn we una abop pan mi.”—Ayz. 30:​15, NWT.