1-2. Wetin wan brɔda lan bɔt fɔ gi advays?

 TRADE, tu ɛlda dɛn bin go fɛn wan sista we bin dɔn de mis mitin fɔ sɔm tɛm. Wan pan di ɛlda dɛn bin sho di sista sɔm skripchɔ dɛn we de tɔk bɔt fɔ atɛnd mitin. I bin tink se dɛn bin ebul fɔ ɛnkɔrej di sista, bɔt we in ɛn di ɔda ɛlda de go, di sista bin tɔk se, “Una nɔ ɔndastand natin bɔt mi prɔblɛm.” We di brɔda dɛn bin de advays di sista, dɛn nɔ bin tray fɔ no bɔt di prɔblɛm dɛn we di sista gɛt. So dat bin mek di sista nɔ bin fil se di advays we dɛn gi am bin ɛp am.

² Di ɛlda we bin sho di sista di skripchɔ dɛn tɔk se: “Da patikyula tɛm de, a bin tink se di sista nɔ gɛt wan rɛspɛkt. Bɔt a bin tek tɛm tink bɔt am, ɛn a kam fɔ si se a bin sho am di rayt skripchɔ dɛn, bɔt a nɔ bin aks am di rayt kwɛstyɔn dɛn, lɛk ‘Wetin dɔn de apin na yu layf?’ ‘Aw a go ɛp yu?’” Di ɛlda bin lan impɔtant lɛsin frɔm da ɛkspiriɛns de. Tide, in na shɛpad we gɛt sɔri-at ɛn we de ɛp di ship dɛn.

3. Udat dɛn na di kɔngrigeshɔn kin gi advays?

 ³ As shɛpad dɛn, ɛlda dɛn gɛt di wok fɔ gi advays di tɛm we nid de. Bɔt, tɛm dɛn de we ɔda brɔda ɛn sista dɛn na di kɔngrigeshɔn go nid fɔ gi advays. Fɔ ɛgzampul, wan brɔda ɔ sista go yuz di Baybul fɔ advays in padi. (Sam 141:​5; Prɔv. 25:​12) Ɔ wan ol sista go “advays di yɔŋuman dɛn” bɔt di tin dɛn we Taytɔs 2:​3-5 tɔk bɔt. Ɛn as wi ɔl no, sɔntɛnde mama ɛn  papa dɛn nid fɔ advays ɛn kɔrɛkt dɛn pikin dɛn. Pan ɔl we dis atikul de mɔ fɔ di ɛlda dɛn, wi ɔl go bɛnifit bay we wi tink bɔt di we dɛn we wi de gi advays we go mek sɛns ɛn we go muv di pɔsin ɛn we go “mek pɔsin in at gladi.”—Prɔv. 27:​9, NWT.

4. Wetin wi go tɔk bɔt insay dis atikul?

⁴ Insay dis atikul, wi go tɔk bɔt 4 kwɛstyɔn dɛn bɔt fɔ gi advays: (1) Wetin na di rayt rizin we fɔ mek yu gi advays? (2) Yu rili nid fɔ gi di advays? (3) Udat fɔ gi di advays? (4) Aw yu go gi advays we go ɛp?

5. Wetin mek i izi mɔ fɔ mek pipul dɛn tek di advays we ɛlda dɛn de gi, if dɛn du am wit lɔv? (1 Kɔrintians 13:​4, 7)

⁵ Di ɛlda dɛn lɛk dɛn brɔda ɛn sista dɛn. Sɔntɛnde, dɛn kin sho se dɛn lɛk dɛn brɔda ɛn sista dɛn bay we dɛn de advays pɔsin we want fɔ mek big mistek. (Gal. 6:​1) Bɔt bifo ɛlda tɔk to di pɔsin, i gud fɔ mek i tink bɔt sɔm pan di tin dɛn we Pɔl bin se bɔt lɔv. I bin se: “Lɔv de mek pɔsin peshɛnt ɛn du gud. . . . I de mek pɔsin nɔ giv-ɔp ilɛk wetin apin, i de mek pɔsin biliv ɔltin, i de mek pɔsin op fɔ ɔltin, i de mek pɔsin bia ɔltin.” (Rid 1 Kɔrintians 13:​4, 7.) We ɛlda tink gud wan bɔt dɛn Baybul vas dɛn de, i go ɛp am fɔ mek shɔ se i gi di advays di we we de sho se i lɛk di pɔblisha. If di pɔsin we i de advays si se di ɛlda bisin bɔt am, i go mɔs gri fɔ tek di advays.—Rom. 12:​10.

6. Us fayn ɛgzampul apɔsul Pɔl bin sɛt?

⁶ Apɔsul Pɔl bin sɛt fayn ɛgzampul as ɛlda. Fɔ ɛgzampul, Pɔl bin advays di brɔda dɛn na Tɛsalonayka di tɛm we dɛn bin nid am. Bɔt insay in lɛta we i rayt to dɛn, Pɔl bin tɛl dɛn tɛnki fɔs fɔ di wok we dɛn de du bikɔs dɛn gɛt fet ɛn lɔv, ɛn di bia we dɛn de bia. I bin tink bak bɔt dɛn layf ɛn tɛl dɛn se i no se tin nɔ izi fɔ dɛn, ɛn dɛn de bia di sɔfa we dɛn de mek dɛn sɔfa. (1 Tɛs. 1:​3; 2 Tɛs. 1:​4) I bin ivin tɛl dɛn brɔda dɛn de se dɛn de sɛt fayn ɛgzampul fɔ ɔda Kristian dɛn. (1 Tɛs. 1:​8, 9) Dɛn brɔda dɛn de bin rili gladi we Pɔl bin tɛl dɛn tɛnki. Wan dawt nɔ de se Pɔl bin rili lɛk in brɔda dɛn. Na dat mek i bin ebul fɔ gi dɛn fayn advays insay di tu lɛta dɛn we i bin rayt to di Kristian dɛn na Tɛsalonayka.—1 Tɛs. 4:​1, 3-5, 11; 2 Tɛs. 3:​11, 12.

7. Wetin go mek pɔsin nɔ gri fɔ tek advays?

⁷ Wetin go apin if wi nɔ gi advays di rayt we? Wan ɛlda we gɛt ɛkspiriɛns tɔk se, “Di rizin we kin mek sɔm nɔ kin gri fɔ tek advays na bikɔs dɛn nɔ gi di advays wit lɔv, nɔto bikɔs sɔntin rɔng wit di advays.” Wetin wi go lan frɔm dis? I izi fɔ mek pɔsin tek advays we yu gi am wit lɔv, nɔto we yu vɛks.

8. Wetin ɛlda fɔ aks insɛf we i de disayd if i fɔ advays pɔsin?

⁸ Ɛlda dɛn nɔ fɔ rɔsh fɔ gi advays. Bifo ɛlda de gi advays, i fɔ aks insɛf dɛn kwɛstyɔn dɛn ya: ‘A rili nid fɔ se sɔntin? A shɔ se wetin di ɔda pɔsin de du rɔng? Di Baybul de agens wetin  i de du? Ɔ fɔ se wetin i de du jɔs difrɛn frɔm wetin mi go du?’ Ɛlda dɛn de tek tɛm mek dɛn nɔ “tɔk bifo [dɛn] tink.” (Prɔv. 29:​20) If di ɛlda nɔ shɔ se i nid fɔ advays pɔsin, i kin aks ɔda ɛlda if insɛf tink se di brɔda de du sɔntin we de agens wetin di Baybul se ɛn nid advays.—2 Tim. 3:​16, 17.

9. Wetin wi lan frɔm Pɔl bɔt aw fɔ gi advays we i kam to aw pɔsin fɔ drɛs ɛn kia fɔ insɛf? (1 Timoti 2:​9, 10)

⁹ Tink bɔt dis ɛgzampul. Lɛ wi se wan ɛlda tink se in kɔmpin Kristian nɔ de drɛs ɔ kia fɔ insɛf fayn. Di ɛlda fɔ aks insɛf, ‘Rizin de frɔm di Baybul we fɔ mek a se sɔntin?’ Bikɔs di ɛlda nɔ want fɔ gi advays frɔm wetin in tink, i kin aks ɔda ɛlda ɔ machɔ pɔblisha fɔ no wetin dɛn tink. In ɛn di ɔda ɛlda ɔ pɔblisha kin tɔk bɔt Pɔl in advays bɔt aw pɔsin fɔ drɛs ɛn kia fɔ insɛf. (Rid 1 Timoti 2:​9, 10.) Pɔl in advays tɔk bɔt jɛnɛral prinsipul dɛn we sho se Kristian dɛn fɔ drɛs di rayt we, dɛn nɔ fɔ du tin pasmak wan, ɛn dɛn fɔ du tin wit sɛns. Bɔt Pɔl nɔ bin mek lɔ bɔt wetin pɔsin fɔ wɛr ɔ wetin i nɔ fɔ wɛr. I no se di brɔda ɛn sista dɛn kin wɛr wetin dɛn want, wans i nɔ de agens wetin di Baybul se. So if ɛlda dɛn de tink if dɛn nid fɔ advays pɔsin, dɛn fɔ tink if wetin di pɔsin disayd fɔ wɛr de sho se i nɔ de du tin pasmak ɛn i de du tin wit sɛns.

10. Wetin wi fɔ mɛmba bɔt di tin dɛn we ɔda pipul dɛn kin disayd fɔ dɛnsɛf?

¹⁰ I impɔtant fɔ mɛmba se tu brɔda dɛn we na machɔ Kristian dɛn go disayd fɔ du difrɛn tin dɛn, bɔt dat nɔ min se di wan rayt ɛn di ɔda wan rɔng. Wi nɔ fɔ tray fɔ fos wi brɔda dɛn fɔ du wetin wi tink se rayt.—Rom. 14:​10.

11-12. If nid de fɔ gi advays, us kwɛstyɔn dɛn ɛlda fɔ aks insɛf? Wetin mek?

¹¹ If i klia se sɔm advays dɛn de we dɛn nid fɔ gi, di nɛks kwɛstyɔn na, Udat fɔ gi di advays? Bifo ɛlda advays sista we mared ɔ smɔl pikin, i fɔ tɔk fɔs wit di wan we de oba di famili, sɔntɛm insɛf sɛf go want fɔ gi di advays. * Ɔ sɔntɛm di wan we de oba di famili go tɛl di ɛlda se i want fɔ de we di ɛlda de gi di advays. Ɛn, lɛk aw wi bin tɔk na  paregraf 3, tɛm dɛn kin de we i bɛtɛ fɔ mek ol sista advays yɔŋ sista.

 ¹² Ɔda tin de bak we di ɛlda fɔ tink bɔt. Ɛlda fɔ aks insɛf dis kwɛstyɔn, ‘Na mi na di bɛst pɔsin fɔ gi dis advays, ɔ i go bɛtɛ if ɔda pɔsin gi am?’ Fɔ ɛgzampul, i go izi fɔ pɔsin we de fil se i nɔ impɔtant fɔ lisin to ɛlda we insɛf bin de fil da we de. Sɔntɛm ɛlda we bin de fil da we de go ɔndastand di pɔsin mɔ ɛn se tin dɛn di we we go mek di pɔsin gri fɔ tek di advays. Bɔt ɔl di ɛlda dɛn gɛt di wok fɔ ɛnkɔrej ɛn du sɔntin we go muv dɛn brɔda ɛn sista dɛn fɔ mek ɛni ajɔstmɛnt we di Baybul want wi fɔ mek. So we nid de fɔ gi advays, wetin impɔtant pas ɔl na fɔ gi di advays.

13-14. Wetin mek i impɔtant fɔ mek ɛlda lisin?

¹³ Rɛdi fɔ lisin. We ɛlda de pripia fɔ gi advays, i fɔ aks insɛf: ‘Wetin a no bɔt di tin dɛn we de apin to mi brɔda? Wetin de apin na in layf? I gɛt prɔblɛm dɛn we a nɔ no bɔt? Wetin i rili nid rayt naw?’

¹⁴ Di prinsipul we de na Jems 1:​19 de bak fɔ di wan dɛn we de gi advays. Jems bin rayt se: “Ɔlman fɔ kwik fɔ lisin, slo fɔ tɔk, ɛn slo fɔ vɛks.” Sɔntɛm ɛlda go tink se i no ɔl wetin de apin, bɔt i rili no ɔltin? Prɔvabs 18:​13 mɛmba wi se: “If yu ansa bifo yu yɛri wetin dɛn de tɔk, yu jɛs de sho se yu na fulman.” Di bɛst tin fɔ du na fɔ no ɔl wetin apin frɔm di pɔsin insɛf sɛf. So ɛlda fɔ lisin bifo i tɔk. Mɛmba di lɛsin we di ɛlda we wi tɔk bɔt na paregraf 1 ɛn 2 bin lan. I bin kam fɔ no se bifo i bigin di shɛpadin visit wit wetin i dɔn pripia, i bin fɔ aks di sista kwɛstyɔn dɛn lɛk: “Wetin dɔn de apin na yu layf?” “Aw a go ɛp yu?” If ɛlda dɛn tek tɛm fɔ no wetin rili apin, dɛn go ebul fɔ ɛp ɛn ɛnkɔrej dɛn brɔda ɛn sista dɛn.

15. Aw ɛlda dɛn go aplay di prinsipul we de na Prɔvabs 27:​23?

¹⁵ Tray fɔ no di ship dɛn. As wi dɔn lan frɔm di biginin, fɔ gi advays we go ɛp nɔ min fɔ jɔs rid sɔm skripchɔ dɛn ɔ gi yu yon aydia. Wi brɔda ɛn sista dɛn nid fɔ no se wi bisin bɔt dɛn, wi ɔndastand dɛn, ɛn wi want fɔ ɛp dɛn. (Rid Prɔvabs 27:​23.) Ɛlda dɛn fɔ du dɛn bɛst fɔ gɛt tayt padi biznɛs wit dɛn brɔda ɛn sista dɛn.

16. Wetin go ɛp ɛlda dɛn fɔ gi advays we go ɛp?

¹⁶ Ɛlda dɛn nɔ want fɔ mek dɛn brɔda dɛn tink se di wangren tin we kin mek dɛn tɔk to dɛn na we dɛn de gi dɛn advays. Bifo dat, dɛn kin tɔk wit dɛn brɔda ɛn sista dɛn ɔltɛm ɛn  sho se dɛn bisin bɔt dɛn we dɛn gɛt prɔblɛm. Wan ɛlda we gɛt ɛkspiriɛns se: “If yu du dat, yu go bi dɛn padi. Dɔn we yu nid fɔ gi advays, i go izi fɔ lɛ yu du dat.” Ɛn i go izi fɔ mek di pɔsin we yu de advays gri fɔ tek yu advays.

17. Ustɛm mɔ ɛlda nid fɔ bi pɔsin we peshɛnt ɛn gud?

¹⁷ Bi pɔsin we peshɛnt ɛn gud. I kin rili impɔtant fɔ peshɛnt mɔ we pɔsin nɔ kin want fɔ fala wetin di Baybul se. Ɛlda nɔ fɔ vɛks if di brɔda ɔ sista we i de advays nɔ gri fɔ tek di advays. Di Baybul tɔk bɔt Jizɔs se: “I nɔ go mas ɛni gras we dɔn lɛf smɔl fɔ wida, ɛn i nɔ go ɔt ɛni wik we dɔn lɛf smɔl fɔ ɔt.” (Mat. 12:​20) So we di ɛlda in wan de pre, i kin aks Jiova fɔ ɛp di pɔsin we nid di advays ɛn ɛp am fɔ ɔndastand di rizin we mek i nid di advays, ɛn lɛ i fala am. Sɔntɛm di brɔda we di ɛlda advays go nid tɛm fɔ tink bɔt wetin di ɛlda tɛl am. If di ɛlda na pɔsin we peshɛnt ɛn gud, di wan we i de ɛp nɔ go pe atɛnshɔn to di we aw i gi di advays, bɔt i go ebul fɔ pe atɛnshɔn to di advays. Fɔ tru, dɛn fɔ yuz Gɔd in Wɔd ɔltɛm fɔ gi advays.

18. (a) We wi de gi advays, wetin wi fɔ mɛmba? (b) Insay di pikchɔ we de na di bɔks, wetin di mama ɛn papa de tɔk bɔt?

¹⁸ Lan frɔm yu mistek dɛn. Bikɔs wi nɔ pafɛkt, wi nɔ go ebul fɔ aplay ɔl wetin dɛn dɔn tɛl wi insay dis atikul pafɛkt wan. (Jems 3:​2) Wi go mek mistek dɛn, bɔt we wi mek mistek, wi fɔ tray fɔ lan frɔm dɛn. If wi brɔda ɛn sista dɛn si se wi lɛk dɛn, i go izi fɔ mek dɛn fɔgiv wi we wi ɔfɛn dɛn bay wetin wi se ɔ du.—Rid bak di bɔks we gɛt di taytul, “ Sɔntin fɔ Mama ɛn Papa Dɛn.”

19. Aw wi go mek wi brɔda ɛn sista dɛn at gladi?

¹⁹ As wi dɔn si, i nɔ izi fɔ gi advays  we go ɛp. Wi nɔ pafɛkt, ɛn di wan dɛn sɛf we wi de gi advays nɔ pafɛkt. Mɛmba di prinsipul dɛn we wi dɔn tɔk bɔt insay dis atikul. Mek shɔ se yu gi advays fɔ di rayt rizin. Dɔn bak, mek shɔ se di advays na advays we yu rili nid fɔ gi ɛn yu na di rayt pɔsin fɔ gi am. Bifo yu advays pɔsin, aks kwɛstyɔn dɛn ɛn tek tɛm lisin so dat yu go ɔndastand di prɔblɛm we di pɔsin gɛt. Tray fɔ si tin dɛn di we aw di pɔsin de si am. Bi pɔsin we nays ɛn gɛt tayt padi biznɛs wit yu brɔda ɛn sista dɛn. Mɛmba di gol: Wi nɔ jɔs want wi advays fɔ bi advays we ɔda pɔsin go gri fɔ tek, bɔt wi want mek wi advays “mek pɔsin in at gladi.”—Prɔv. 27:​9, NWT.