1. Ustɛm ɔl di anɔyntɛd dɛn go go na ɛvin?

 TRADE, Jiova in pipul dɛn bin de wɔnda, ‘Ustɛm di las anɔyntɛd Kristian dɛn go go na ɛvin?’ Wi bin de tink se sɔntɛm sɔm pan di anɔyntɛd dɛn go kɔntinyu fɔ de na Paradays na dis wɔl fɔ sɔm tɛm afta Amagɛdɔn. Bɔt insay di Julay 15, 2013 Wachtawa, wi lan se ɔl di anɔyntɛd dɛn we stil de na di wɔl go go na ɛvin bifo Amagɛdɔn.​—Mat. 24:31.

2. Us kwɛstyɔn wi go aks? Wetin wi go tɔk bɔt insay dis atikul?

² Bɔt sɔntɛm sɔm pan wi go aks dis kwɛstyɔn: Wetin go apin to Krays in “ɔda ship dɛn” we go de sav Jiova fetful wan na dis wɔl insay di tɛm fɔ da “big big trɔbul”? (Jɔn 10:16; Mat. 24:21) Sɔm pan di ɔda ship dɛn go de wɔri se dɛn nɔ go no wetin fɔ du we dɛn anɔyntɛd brɔda ɛn sista dɛn we dɛn rili lɛk go dɔn go na ɛvin. Lɛ wi tɔk bɔt tu akawnt dɛn na di Baybul we go mek dɛn tink da we de. Dɔn, wi go tɔk bɔt rizin dɛn we mek wi nɔ nid fɔ wɔri.

WETIN NƆ GO APIN?

3-4. Wetin sɔm pipul dɛn go tink? Wetin mek?

³ Sɔntɛm sɔm go de wɔri se di ɔda ship dɛn go stɔp fɔ sav Jiova we di anɔyntɛd brɔda dɛn we de na di Gɔvnin Bɔdi nɔ go de igen fɔ gayd dɛn. Sɔntɛm dɛn go fil dis we bikɔs ɔf sɔm stori dɛn we de na di Baybul. Lɛ wi tɔk bɔt tu ɛgzampul dɛn. Di fɔs ɛgzampul na bɔt Ay Prist Jɛoayda. I bin de sav Gɔd fetful wan. In ɛn in wɛf Jɛoshabiat bin protɛkt wan yɔŋ bɔbɔ we nem Jɛoash ɛn ɛp am fɔ bi kiŋ we gud ɛn fetful. We Jɛoayda bin de alayv, Jɛoash bin de wɔship Jiova ɛn du gud tin dɛn. Bɔt afta Jɛoayda  day, Jɛoash bin bigin fɔ du bad tin dɛn. I bin lisin to wikɛd prins dɛn ɛn lɛf Jiova.​—2 Kro. 24:2, 15-19.

⁴ Di ɔda ɛgzampul na bɔt di Kristian dɛn we bin de afta di apɔsul dɛn tɛm. Jɔn na bin di las apɔsul we day. We Jɔn bin de alayv, i bin ɛp bɔku Kristian dɛn fɔ kɔntinyu fɔ fetful to Jiova. (3 Jɔn 4) Jɔs lɛk Jizɔs in ɔda fetful apɔsul dɛn, Jɔn bin de wok tranga wan fɔ protɛkt di kɔngrigeshɔn dɛn frɔm di lay lay tin dɛn we apɔstet dɛn bin de tich. (1 Jɔn 2:18; luk di stɔdi not dɛn fɔ 2 Tɛs. 2:7.) Bɔt afta Jɔn day, lay lay tichin bigin fɔ prɛd lɛk faya. Afta sɔm tɛm, apɔstet dɛn bin de tich bɔku lay lay tin dɛn ɛn alaw pipul dɛn fɔ du tin dɛn we nɔ rayt na ɔl di kɔngrigeshɔn dɛn.

5. Frɔm di tu ɛgzampul dɛn we wi tɔk bɔt, wetin wi nɔ fɔ tink se go apin?

⁵ Fɔ se dɛn tu Baybul ɛgzampul dɛn ya sho se afta di anɔyntɛd dɛn go dɔn go na ɛvin, Krays in ɔda ship dɛn go bigin fɔ du bad tin dɛn jɔs lɛk aw Jɛoash bin du? Ɔ fɔ se dɛn go bi apɔstet dɛn lɛk aw bɔku pipul dɛn bin du afta di apɔsul dɛn day? Di ansa na nɔ! Wi shɔ se we di anɔyntɛd dɛn go dɔn go na ɛvin, di ɔda ship dɛn go kɔntinyu fɔ wɔship Jiova di rayt we, ɛn i go kɔntinyu fɔ kia fɔ dɛn. Wetin mek wi gɛt da kɔnfidɛns de?

JIOVA IN PIPUL DƐN GO KƆNTINYU FƆ WƆSHIP AM DI WE AW I WANT ƆLTƐM

6. Us tri difrɛn tɛm dɛn wi go tɔk smɔl bɔt?

⁶ Wetin mek wi fɔ gɛt kɔnfidɛns se Jiova in pipul dɛn go kɔntinyu fɔ wɔship am di we aw i want ivin we tin nɔ go izi? Na bikɔs di Baybul ɛksplen se di tɛm we wi de naw rili difrɛn frɔm di Izrɛlayt dɛn tɛm ɛn di tɛm afta di apɔsul dɛn day. So lɛ wi tɔk bɔt dɛn tri tɛm dɛn ya: (1) Di Izrɛlayt dɛn tɛm, (2) di tɛm afta di apɔsul dɛn day, ɛn (3) wi tɛm we “ɔltin kam bak lɛk aw dɛn bin de.”—Akt 3:21.

7. Insay di Izrɛlayt dɛn tɛm, wetin mek fetful pipul dɛn nɔ bin pwɛlat we di neshɔn ɛn di kiŋ dɛn bin disayd fɔ du tin dɛn we bad na Jiova in yay?

⁷ Di Izrɛlayt dɛn tɛm. Jɔs bifo Mozis day, i bin tɛl di Izrɛlayt dɛn se: ‘A no gud gud wan se afta a day, una go du bad bad tin dɛn ɛn una nɔ go fala wetin a tich una.’ (Dit. 31:29) Mozis bin wɔn di Izrɛlayt dɛn bak se if dɛn tɔn dɛn bak pan Gɔd, dɛn go kɛr dɛn go ɛgzayl. (Dit. 28:35, 36) Fɔ se dɛn wɔd dɛn de bin kam tru? Yɛs. Afta sɔm tɛm, bɔku kiŋ dɛn bigin du tin dɛn we bad na Jiova in yay ɛn di pipul dɛn bin de fala dɛn fɔ wɔship lay lay gɔd dɛn. Dis bin mek Jiova pɔnish di wikɛd pipul dɛn na Izrɛl, ɛn i nɔ bin alaw Izrɛlayt kiŋ dɛn fɔ rul in pipul dɛn igen. (Izi. 21:25-27) Bɔt we di Izrɛlayt dɛn we bin fetful si se wetin Gɔd bin dɔn tɔk kam tru, dat bin kɔrej dɛn.​—Ayz. 55:10, 11.

8. Fɔ se wi fɔ sɔprayz we di Kristian kɔngrigeshɔn bigin fɔ wɔship Gɔd di rɔng we afta di apɔsul dɛn day? Ɛksplen.

⁸ Di tɛm afta di apɔsul dɛn day. Fɔ se wi fɔ sɔprayz we di Kristian kɔngrigeshɔn bigin fɔ wɔship Gɔd di rɔng we afta di apɔsul dɛn day? Nɔ. Jizɔs bin dɔn tɔk se pipul dɛn go tich bɔku lay lay tin dɛn. (Mat. 7:21-23; 13:24-30, 36-43) Apɔsul Pɔl, Pita, ɛn Jɔn bin si se wetin Jizɔs tɔk bin dɔn ɔlrɛdi bigin fɔ apin insay di fɔstɛm Kristian dɛn tɛm. (2 Tɛs. 2:3, 7; 2 Pit. 2:1-3, 17-19; 1 Jɔn 2:18) Jɔs afta di las apɔsul day, lay lay Kristian dɛn jɔyn Babilɔn di Gret, we na ɔl di lay lay  rilijɔn dɛn. Wetin Jizɔs bin tɔk bin de kam tru.

9. Aw di tɛm we wi de naw difrɛn frɔm di Izrɛlayt dɛn tɛm ɛn di tɛm afta di apɔsul dɛn day?

⁹ Di tɛm we “ɔltin kam bak lɛk aw dɛn bin de.” Di tɛm we wi de naw difrɛn frɔm di Izrɛlayt dɛn tɛm ɛn di tɛm we pipul dɛn bin de tich bɔku lay lay tin dɛn afta di apɔsul dɛn day. Aw dɛn de kɔl di tɛm we wi de naw? Wi kin kɔl di tɛm we wi de naw “di las dez” we bad tin dɛn de apin. (2 Tim. 3:1) Bɔt di Baybul sho se ɔda tɛm we impɔtant ɛn lɔng pas di las dez bin bigin di sem tɛm we di las dez bigin. I go kɔntinyu te Gɔd in Kiŋdɔm we Krays de rul mek mɔtalman dɛn pafɛkt bak ɛn mek di wɔl bi Paradays. Dɛn kɔl dis tɛm, di tɛm we “ɔltin kam bak lɛk aw dɛn bin de.” (Akt 3:21) Dis tɛm ya bin bigin insay 1914. Wetin na di tin dɛn we Jiova bin mek bak lɛk aw dɛn bin de? Wɛl, Jizɔs bin bi Kiŋ na ɛvin. So Jiova bin gɛt pɔsin bak we I pik fɔ rul we kɔmɔt na Kiŋ Devid, we na bin fetful kiŋ, in famili layn. Bɔt nɔto dat nɔmɔ Jiova bin du. Jɔs afta dat, pipul dɛn bigin fɔ wɔship am di rayt we bak! (Ayz. 2:2-4; Izi. 11:17-20) Fɔ se pipul dɛn go wɔship Gɔd di rɔng we bak?

10. (a) Wetin di Baybul bin dɔn tɔk bɔt fɔ wɔship Gɔd di rayt we insay wi tɛm? (Ayzaya 54:17) (b) Wetin mek dɛn prɔfɛsi dɛn de, de ɛnkɔrej wi?

¹⁰ Rid Ayzaya 54:17. Tink bɔt da prɔfɛsi de: “Ɛni wɛpɔn we dɛn mek agens yu nɔ go wok”! Dɛn wɔd dɛn de we Gɔd bin mek dɛn rayt de kam tru tide. Di fayn wɔd dɛn we de afta dɛn wɔd dɛn ya gɛt sɔntin bak fɔ du wit wi yon tɛm: ‘Jiova go tich ɔl yu bɔypikin dɛn, ɛn yu bɔypikin dɛn go rili gɛt pis. Yu go waka tret na Papa Gɔd in yay, yu go tinap tranga wan. . . . Yu nɔ go fred natin; ɛn bad bad tin we go mek yu trimbul ɛn fred, nɔ go kam nia yu.’ (Ayz. 54:13, 14) Ivin Setan insɛf sɛf we na “di gɔd insay dis tɛm” nɔ gɛt pawa fɔ stɔp di wok we Jiova in pipul dɛn de du fɔ tich ɔda pipul dɛn. (2 Kɔr. 4:4) Pipul dɛn dɔn bigin fɔ wɔship Gɔd di rayt we bak, ɛn dɛn go kɔntinyu fɔ wɔship am di rayt we. Pipul dɛn go wɔship Gɔd di rayt we sote go. Ɛni wɛpɔn we dɛn mek agens wi nɔ go wok!

WETIN GO APIN?

11. Wetin mek wi biliv se Jiova nɔ go lɛf di bɔku bɔku pipul dɛn we di anɔyntɛd dɛn go na ɛvin?

¹¹ Wetin go apin we di anɔyntɛd dɛn go dɔn go na ɛvin? Mɛmba se na Jizɔs na wi  Shɛpad. Na in de oba di Kristian kɔngrigeshɔn. Jizɔs tɔk klia wan se: “Na wangren Lida una gɛt, we na Krays.” (Mat. 23:10) Wi Kiŋ we de rul na ɛvin go du in wok ɔltɛm. Bikɔs na Krays de rul, di wan dɛn we de fala am na di wɔl nɔ gɛt natin fɔ fred. Fɔ tru, wi nɔ no ɔltin bɔt aw Krays go lid in pipul dɛn da tɛm de. So lɛ wi tɔk bɔt sɔm Baybul ɛgzampul dɛn we go ɛnkɔrej wi.

12. Aw Jiova bin kia fɔ in pipul dɛn (a) afta Mozis day? (b) afta Ilayja gɛt ɔda asaynmɛnt? (Luk bak di pikchɔ.)

¹² Mozis bin day bifo di Izrɛlayt dɛn go na di Prɔmis Land. Wetin bin apin to Gɔd in pipul dɛn? Fɔ se Jiova bin stɔp fɔ ɛp in pipul dɛn afta dis fetful man day? Nɔ. Wans dɛn fetful, Jiova bin kɔntinyu fɔ gi dɛn wetin dɛn nid. Bifo Mozis day, Jiova bin tɛl am fɔ pik Jɔshwa fɔ lid di pipul dɛn. Mozis bin dɔn de tren Jɔshwa fɔ lɔng tɛm. (Ɛks. 33:11; Dit. 34:9) Dɔn bak, bɔku ɔda man dɛn bin de we bin ebul fɔ lid di Izrɛlayt dɛn. Dɛn na bin lida dɛn fɔ wan tawzin, wan ɔndrɛd, fifti, ɛn ivin tɛn. (Dit. 1:15) Dɛn bin kia fɔ Gɔd in pipul dɛn fayn fayn wan. Ilayja sɛf bin du di sem tin. I bin wok tranga wan fɔ lɔng tɛm fɔ ɛp di Izrɛlayt dɛn fɔ wɔship Jiova. Bɔt tɛm bin kam we Jiova gi am nyu asaynmɛnt na Juda. (2 Kiŋ 2:1; 2 Kro. 21:12) Fɔ se Jiova bin lɛf di fetful pipul dɛn we bin de na di tɛn trayb kiŋdɔm na Izrɛl? Nɔ. Ilayja bin dɔn de tren Ilaysha fɔ lɔng tɛm. Di “prɔfɛt dɛn,” bɔypikin dɛn bak bin de we dɛn bin tren. (2 Kiŋ 2:7) So, bɔku fetful man dɛn bin de we go ɛp fɔ de oba Gɔd in pipul dɛn. Jiova bin kɔntinyu fɔ du wetin i want ɛn kia fɔ in savant dɛn we bin de wɔship am fetful wan.

13. Wetin Jiova dɔn prɔmis wi insay Ibruz 13:5b? (Luk bak di pikchɔ.)

¹³ As wi de tink bɔt dɛn ɛgzampul dɛn de, wetin yu tink se go apin we di las anɔyntɛd dɛn go dɔn go na ɛvin? Wi nɔ nid fɔ wɔnda. Di Baybul tɛl wi di tru tin we go apin. I se: Jiova nɔ go ɛva lɛf in pipul dɛn na dis wɔl. (Rid Ibruz 13:5b.) Jɔs lɛk Mozis ɛn Ilayja, di anɔyntɛd Kristian dɛn we nɔ bɔku, we de bifo tide, ɔndastand se i impɔtant fɔ tren ɔda pipul dɛn. Fɔ lɔng tɛm, di brɔda dɛn na di Gɔvnin Bɔdi dɔn de tren man dɛn we de pat pan di ɔda ship dɛn fɔ de bifo. Fɔ ɛgzampul, dɛn dɔn ɔganayz  bɔku skul dɛn fɔ tren ɛlda dɛn, sakit ovasia dɛn, Branch Kɔmiti mɛmba dɛn, ovasia dɛn na Bɛtɛl, ɛn ɔda wan dɛn. Di Gɔvnin Bɔdi dɛnsɛf sɛf dɔn de tren pipul dɛn we de ɛp dɛn na di difrɛn kɔmiti dɛn we dɛn gɛt. Dɛn pipul dɛn ya we de ɛp di Gɔvnin Bɔdi de du bɔku wok dɛn rayt naw na di ɔganayzeshɔn fetful wan. Dɛn dɔn rɛdi fɔ kɔntinyu di wok fɔ kia fɔ Krays in ship dɛn.

14. Wetin na di men pɔynt we wi de tɔk bɔt?

¹⁴ Dis na di men pɔynt: We di las anɔyntɛd dɛn go go na ɛvin di tɛm we da big big trɔbul go de dɔn, Jiova in pipul dɛn na di wɔl go kɔntinyu fɔ wɔship am fetful wan. Bikɔs na Jizɔs Krays go de oba Gɔd in pipul dɛn, dɛn nɔ go mis natin, ivin af sɛf. Fɔ tru, wi no se da tɛm de, di neshɔn dɛn we go kam togɛda, we di Baybul kɔl Gɔg we de na Megɔg go atak Gɔd in pipul dɛn. (Izi. 38:18-20) Bɔt da atak we dɛn go atak wi fɔ shɔt tɛm go fel, ɛn i nɔ go stɔp Gɔd in pipul dɛn fɔ wɔship Jiova. I go mɔs sev dɛn! Insay wan vishɔn, apɔsul Jɔn bin si “bɔku bɔku pipul dɛn” we na Krays in ɔda ship dɛn. Dɛn bin tɛl Jɔn se dis na di “bɔku bɔku pipul dɛn” we “kɔmɔt pan di big big trɔbul.” (Rɛv. 7:9, 14) So wi nɔ gɛt wan dawt se Jiova go sev dɛn!

15-16. Akɔdin to Rɛvɛleshɔn 17:14, wetin Krays in anɔyntɛd brɔda dɛn go de du di tɛm we dɛn de fɛt di wɔ we na Amagɛdɔn? Wetin mek dat de ɛnkɔrej wi?

¹⁵ Bɔt sɔntɛm, sɔm pipul dɛn go stil de wɔnda: ‘Wetin di anɔyntɛd dɛn go du we dɛn go na ɛvin?’ Di Baybul ansa da kwɛstyɔn de klia wan. I tɔk se di gɔvmɛnt dɛn na dis wɔl go “fɛt di Yɔŋ Ship,” bɔt dɛn nɔ go win. Di Baybul mek wi no se: Di Yɔŋ Ship “go win dɛn.” Bɔt udat go ɛp am? Di vas tɔk se na di wan dɛn we dɛn dɔn “kɔl,” “pik,” ɛn “we fetful.” (Rid Rɛvɛleshɔn 17:14.) Udat na dɛn pipul dɛn ya? Na di anɔyntɛd dɛn we go dɔn gɛt layf bak. So we di las anɔyntɛd dɛn we de na dis wɔl go dɔn go na ɛvin di tɛm we da big big trɔbul go want fɔ dɔn,  wan pan di fɔs wok we dɛn go du na fɔ fɛt. Dis wok ya rili spɛshal! Sɔm pan di anɔyntɛd Kristian dɛn na bin fɛtman dɛn bifo dɛn kam fɔ bi Jiova Witnɛs. Sɔm bin ivin bi sojaman dɛn we dɛn bin de na dis wɔl. Bɔt leta dɛn kam fɔ bi tru Kristian dɛn ɛn lan aw fɔ liv pisful wan wit ɔda pipul dɛn. (Gal. 5:22; 2 Tɛs. 3:16) Dɛn bin lɛf fɔ put an pan wɔ. Bɔt afta dɛn go dɔn go na ɛvin, dɛn go jɔyn Krays ɛn in oli enjɛl dɛn fɔ fɛt di las wɔ agens Gɔd in ɛnimi dɛn.

¹⁶ Tink bɔt dis! Sɔm pan di anɔyntɛd Kristian dɛn we de na dis wɔl dɔn ol ɛn sɔm ivin wik. Bɔt afta dɛn go dɔn gɛt layf bak ɛn go na ɛvin, dɛn go bi pawaful spirit pipul dɛn we nɔ de day, ɛn dɛn go jɔyn Jizɔs Krays we na di Kiŋ fɔ fɛt Gɔd in ɛnimi dɛn. Afta dɛn go dɔn fɛt di wɔ we na Amagɛdɔn, dɛn go wok wit Jizɔs fɔ mek mɔtalman dɛn pafɛkt. Wan dawt nɔ de se, we dɛn de na ɛvin, dɛn go ebul fɔ ɛp dɛn brɔda ɛn sista dɛn we dɛn rili lɛk pas di tɛm we dɛn bin de na dis wɔl as mɔtalman dɛn we nɔ pafɛkt!

17. Aw wi no se ɔl di wan dɛn we na Gɔd in savant dɛn go de sef wan di tɛm fɔ Amagɛdɔn?

¹⁷ Yu na wan pan di ɔda ship dɛn? If na so i bi, wetin yu go nid fɔ du we dis impɔtant wɔ we na Amagɛdɔn bigin? Na dis simpul tin yu nid fɔ du: Abop pan Jiova ɛn fala di dayrɛkshɔn we i de gi. Wetin dat go min? Di Baybul tɔk dɛn wɔd ya fɔ ɛnkɔrej wi. I se: “Una go insay una rum dɛn we de insay insay ɛn lɔk una domɔt dɛn. Una ayd fɔ shɔt tɛm te mi vɛksteshɔn pas.” (Ayz. 26:20) Ɔl di wan dɛn we na Gɔd in fetful savant dɛn we de na ɛvin ɛn na dis wɔl go de sef wan insay da tɛm de. Jɔs lɛk apɔsul Pɔl, wisɛf biliv tranga wan se di “gɔvmɛnt dɛn, tin dɛn we de ya naw, tin dɛn we gɛt fɔ kam . . . nɔ ebul mek Gɔd lɛf fɔ lɛk wi.” (Rom. 8:38, 39) Mɛmba ɔltɛm se: Jiova rili lɛk yu, ɛn i nɔ go ɛva lɛf fɔ ɛp yu!