WƐNSDE, Janwari 18, 2023, dɛn bin mek wan spɛshal anawnsmɛnt na jw.org fɔ se dɛn dɔn apɔynt Brɔda Gej Fligul ɛn Brɔda Jɛfri Winda as mɛmba dɛn na di Gɔvnin Bɔdi fɔ Jiova Witnɛs dɛn. Dɛn tu brɔda dɛn ya dɔn sav Jiova fetful wan fɔ lɔng tɛm.

Brɔda Fligul bin mɛn na di wɛst pat na Pɛnsilvenia, insay Amɛrika, ɛn in mama ɛn papa bin mɛn am na di trut. We in na bin tineja, in famili bin muf go na wan smɔl tɔŋ usay dɛn bin nid mɔ pipul dɛn fɔ prich. Shɔt tɛm afta dat, i baptayz insay Novɛmba 20, 1988.

Brɔda Fligul in mama ɛn papa bin de ɛnkɔrej am fɔ yuz ɔl in tɛm fɔ sav Jiova. Bɔku tɛm dɛn bin de invayt sakit ovasia dɛn ɛn Bɛtɛlayt dɛn na dɛn os, ɛn Brɔda Fligul bin si se dɛn brɔda ɛn sista dɛn ya bin rili gladi. Jɔs afta i baptayz, i bigin fɔ rɛgyula payɔnia insay Sɛptɛmba 1, 1989. Afta tu ia, i bin ebul fɔ rich in gol we i bin sɛt we i bin ol 12 ia, we na fɔ wok na Bɛtɛl. I bigin fɔ wok na Bruklin Bɛtɛl insay Ɔktoba 1991.

Na Bɛtɛl, Brɔda Fligul bin wok na di Bayndri (usay dɛn bin de put put pepa dɛn togɛda fɔ mek buk fɔ print) fɔ et ia. Afta dat, dɛn bin asayn am fɔ wok na di Savis Dipatmɛnt. Insay da tɛm de, i bin sav na wan Rɔshian langwej kɔngrigeshɔn fɔ sɔm tɛm. Insay 2006, i bin mared in wɛf, Nadia, we bin jɔyn am fɔ wok na Bɛtɛl. Dɛn ɔl tu bin sav na di Pɔtyugiz kɔngrigeshɔn, ɛn dɛn bin sav pas 10 ia na di Spanish kɔngrigeshɔn. Afta Brɔda Fligul dɔn sav na di Savis Dipatmɛnt fɔ lɔng tɛm, dɛn bin asayn am fɔ wok na di Tichin Kɔmiti Ɔfis ɛn leta na di Savis Kɔmiti Ɔfis. Insay Mach 22, dɛn bin apɔynt am as pɔsin we de ɛp na di Savis Kɔmiti fɔ di Gɔvnin Bɔdi.

 Brɔda Winda bin mɛn na Mɔriɛta, Kalifonia, insay Amɛrika. In mama ɛn papa bin mɛn am na di trut, ɛn i baptayz insay Mach 29, 1986. Jɔs insay di ɔda mɔnt, i disayd fɔ ɔgzilari payɔnia. I bin rili ɛnjɔy fɔ ɔgzilari payɔnia, ɛn i bin want fɔ kɔntinyu. Afta i dɔn ɔgzilari payɔnia fɔ sɔm mɔnt, i bigin fɔ rɛgyula payɔnia insay Ɔktoba 1, 1986.

We Brɔda Winda na bin tineja, i bin go fɛn tu pan in big brɔda dɛn we bin de wok na Bɛtɛl da tɛm de. Dat bin mek i gɛt zil fɔ aplay fɔ wok na Bɛtɛl we i big. Ɛn insay Me 1990, dɛn bin invayt am fɔ wok na Bɛtɛl na Wɔlkil.

Brɔda Winda bin wok na bɔku dipatmɛnt dɛn na Bɛtɛl, lɛk di Klinin Dipatmɛnt, di Fam Dipatmɛnt, ɛn di Bɛtɛl Ɔfis. I bin mared in wɛf, Anjɛla, insay 1997, ɛn frɔm da tɛm de, dɛn dɔn de wok na Bɛtɛl. Insay 2014, dɛn bin transfa na Wɔwik, usay Brɔda Winda bin ɛp fɔ bil di wɔl ɛdkwata. Insay 2016, dɛn bin go na di Watchtower Educational Center na Patasin, usay Brɔda Winda bin wok na di Odio/Vidio Savis. Afta 4 ia, dɛn bin go bak na Wɔwik, ɛn dɛn bin asayn Brɔda Winda fɔ wok na di Pasɔnɛl Kɔmiti Ɔfis. Insay Mach 2022, dɛn bin apɔynt am as pɔsin we de ɛp na di Pasɔnɛl Kɔmiti fɔ di Gɔvnin Bɔdi.

Wi de pre mek Jiova blɛs dɛn “man dɛn” ya we na “gift” as dɛn de kɔntinyu fɔ wok tranga wan fɔ mek di Kiŋdɔm wok go bifo.​—Ɛfi. 4:8.