Meri ɛn in man Jɔn a de na say usay dɛn ebul fɔ prich di gud nyuz to bɔku pipul dɛn we kɔmɔt na di Filipins fɔ kam wok. Insay di tɛm fɔ di COVID-19 pandɛmik, Meri bin ebul fɔ stat bɔku Baybul stɔdi dɛn usay i de ɛn ɔda say dɛn na di wɔl. Aw i bin ebul fɔ du dat?

Meri kin aks in Baybul studɛnt dɛn se,“Yu sabi ɛni ɔda pɔsin we go want fɔ stɔdi di Baybul?” If dɛn se yɛs, i kin tɛl dɛn fɔ mek i tɔk to di pɔsin. Bɔku tɛm, dis simpul kwɛstyɔn we i kin aks kin mek i gɛt gud rizɔlt. Wetin mek? Na bikɔs bɔku tɛm, pipul dɛn we lɛk Gɔd in Wɔd kin want fɔ tɛl dɛn fambul ɛn padi dɛn we dɛn bisin bɔt, wetin dɛn dɔn lan. Wetin kin apin we Meri aks dis kwɛstyɔn?

Meri in Baybul studɛnt we nem Jasmin bin mek Meri tɔk to 4 ɔda pipul dɛn we bin want fɔ stɔdi di Baybul. Bikɔs wan pan di studɛnt dɛn we nem Kristin bin rili lɛk di Baybul stɔdi, i bin tɛl Meri fɔ de stɔdi am tu tɛm insay di wik. We Meri bin aks am if i sabi ɛnibɔdi we go want fɔ stɔdi di Baybul, Kristin bin tɔk se, “Yɛs, a go mek yu ɛn mi padi dɛn tɔk.” Insay shɔt tɛm, Kristin bin mek Meri tɔk to 4 pan in padi dɛn we bin want fɔ stɔdi di Baybul. Leta, Kristin bin mek Meri tɔk bak to in ɔda padi dɛn ɛn dɛn padi dɛn de bak bin mek Meri tɔk wit dɛn yon padi dɛn.

Kristin bin want bak mek in fambul dɛn we de na di Filipins lan bɔt di Baybul. So i bin tɔk to in galpikin we nem Andria. Fɔs, Andria bin tink se, ‘Jiova Witnɛs dɛn na kɔlt, dɛn nɔ biliv Jizɔs, ɛn na di Ol Tɛstamɛnt nɔmɔ dɛn de yuz.’ Bɔt afta i jɔs stɔdi wan tɛm, i kam fɔ si se wetin i bin biliv bɔt Jiova Witnɛs dɛn nɔto tru. We dɛn kin stɔdi i kin tɔk se, “Wans na so di Baybul se, na tru!”

As tɛm de go, Andria bin mek Meri tɔk to tu pan in padi dɛn ɛn in wokmet, ɛn dɛnsɛf bin stat fɔ stɔdi. Andria in anti we nem Anjɛla bin de lisin we dɛn de stɔdi, bɔt Meri nɔ bin no. Dɔn wan de, Anjɛla tɛl Andria se i want fɔ tɔk to Meri ɛn i tɛl Meri se i want fɔ stɔdi. Anjɛla bin lɛk wetin i de lan. Insay wan mɔnt, i bin ebul fɔ kram bɔku skripchɔ dɛn ɛn i bin want fɔ stɔdi 4 tɛm insay di wik! Andria bin de ɛp am fɔ atɛnd di mitin dɛn ɔltɛm tru vidiokɔnfrɛns.

We Meri no se Kristin in man Jɔshwa kin de arawnd we dɛn de stɔdi, Meri bin aks Jɔshwa if i go lɛk fɔ jɔyn dɛn. Jɔshwa bin  tɔk se, “A go jɔs lisin, bɔt nɔ aks mi ɛni kwɛstyɔn, if yu aks mi kwɛstyɔn, a go kɔmɔt pan di stɔdi.” Insay di fɔs fayv minit we dɛn stat di stɔdi, Jɔshwa aks bɔku kwɛstyɔn dɛn pas Kristin ɛn i bin want fɔ kɔntinyu fɔ stɔdi di Baybul.

Di simpul kwɛstyɔn we Meri bin de aks mek bɔku pipul dɛn stat fɔ stɔdi di Baybul. I bin mek arenjmɛnt fɔ mek ɔda Jiova Witnɛs dɛn stɔdi bɔku pan dɛn. Meri bin stat 28 Baybul stɔdi dɛn na 4 difrɛn kɔntri dɛn.

Jasmin, we na di fɔs studɛnt we wi tɔk bɔt na dis ɛkspiriɛns bin baytayz insay Epril 2021. Kristin bin baptayz insay Me 2022 ɛn i dɔn go bak na di Filipins fɔ go de wit in famili. Tu ɔda pipul dɛn bak we Kristin bin mek Meri stat fɔ stɔdi, dɛnsɛf dɔn baptayz. Anjɛla bin baptayz afta sɔm mɔnt ɛn naw in na rɛgyula payɔnia. Kristin in man Jɔshwa ɛn dɛn galpikin Andria ɛn ɔda Baybul studɛnt dɛn de go bifo pan dɛn stɔdi.

Insay di fɔstɛm Kristian dɛn tɛm, di gud nyuz bin de prɛd kwik kwik wan bikɔs pipul dɛn bin de tɛl dɛn fambul ɛn padi dɛn wetin dɛn dɔn lan. (Jɔn 1:​41, 42a; Akt 10:​24, 27, 48; 16:​25-33) Yu nɔ tink se i go fayn fɔ lɛ yu aks yu Baybul studɛnt dɛn ɛn ɔda pipul dɛn we want fɔ lan mɔ bɔt di Baybul dis kwɛstyɔn, “Yu sabi ɛnibɔdi we go want fɔ stɔdi di Baybul?” Sɔntɛm bɔku pipul dɛn go want fɔ stɔdi di Baybul if yu aks dɛn dis simpul kwɛstyɔn?