STƆDI ATIKUL 7
SIŊ 15 Prez Jiova in Fɔs Pikin!
Wetin Jiova in Fɔgivnɛs Min fɔ Yu?
“Na yu de fɔgiv tru tru wan.”—SAM 130:4.
MEN PƆYNT
Wi go tɔk bɔt sɔm ɛgzampul dɛn na di Baybul we de sho aw Jiova de fɔgiv wi, ɛn dat go ɛp wi fɔ gladi mɔ ɛn mɔ ɛn sho se wi gɛt tɛnki bikɔs ɔf di kayn we aw Jiova de fɔgiv wi.
1. Wetin mek bɔku tɛm i nɔ kin izi fɔ ɔndastand di we aw mɔtalman de fɔgiv?
“A DƆN FƆGIV YU.” Dɛn wɔd dɛn de kin rili mek wi fil fayn mɔ if wi no se wi dɔn tɔk ɔ du sɔntin we mek pɔsin fil bad! Bɔt wetin di wɔd dɛn “A dɔn fɔgiv yu rili min?” Fɔ se di pɔsin we yu du bad de tɔk se una kin bi padi bak jɔs lɛk aw una bin de? Ɔ fɔ se i jɔs min se i nɔ want mek una tɔk bɔt di prɔblɛm igen? Di we aw mɔtalman de fɔgiv kin at fɔ ɔndastand.
2. Aw di Baybul tɔk bɔt di we aw Jiova de fɔgiv? (Luk bak di futnot.)
2 Di we aw Jiova de fɔgiv wi as mɔtalman dɛn we nɔ pafɛkt rili difrɛn frɔm di we aw wi de fɔgiv wi kɔmpin dɛn. Di we aw Jiova de fɔgiv wi rili spɛshal. Wan pan di man dɛn we rayt di sam buk bin tɔk bɔt Jiova se: “Na yu de fɔgiv tru tru wan, so dat wi go kɔle ɛn rɛspɛkt yu.” a (Sam 130:4) Fɔ tru, na Jiova nɔmɔ de “fɔgiv tru tru wan.” Na in de sho wi wetin i min fɔ rili fɔgiv pɔsin. Di wan dɛn we rayt di Baybul yuz wan Ibru wɔd fɔ fɔgivnɛs na sɔm vas dɛn we dɛn nɔ ɛva yuz fɔ tɔk bɔt di we aw mɔtalman de fɔgiv.
3. Aw di we aw Jiova de fɔgiv difrɛn frɔm di we aw wi de fɔgiv? (Ayzaya 55:6, 7)
3 We Jiova fɔgiv pɔsin, i de wep di pɔsin in sin kɔmɔt. Di padi biznɛs we bin dɔn pwɛl go de bak lɛk aw i bin de. Jiova de fɔgiv wi wit ɔl in at ɛn i nɔ de taya fɔ fɔgiv wi.—Rid Ayzaya 55:6, 7.
4. Aw Jiova de ɛp wi fɔ ɔndastand wetin i rili min fɔ fɔgiv?
4 If di we aw Jiova de fɔgiv difrɛn frɔm di we aw wi de fɔgiv, aw wi as mɔtalman dɛn we nɔ pafɛkt go ebul fɔ ɔndastand wetin i rili min fɔ fɔgiv? Jiova yuz fayn ɛgzampul dɛn fɔ ɛp wi fɔ ɔndastand aw i de fɔgiv. Wi go tɔk bɔt sɔm pan dɛn insay dis atikul. Dɛn go sho wi aw Jiova de pul sin ɛn mek di padi biznɛs we wi bin gɛt wit am we pwɛl bikɔs ɔf sin, de bak lɛk aw i bin de. As wi de tɔk bɔt dɛn ɛgzampul dɛn ya, dɛn go ɛp wi fɔ rili valyu di we aw wi Papa we lɛk wi ɛn we gɛt sɔri-at de fɔgiv wi difrɛn we dɛn.
JIOVA DE PUL SIN
5. Wetin kin apin we Jiova fɔgiv wi sin dɛn?
5 Bɔku tɛm, di Baybul kin kɔmpia sin to ɛvi lod. We Kiŋ Devid bin de tɔk bɔt in sin dɛn i tɔk se: “Mi sin dɛn dɔn bɔku pasmak; dɛn tan lɛk ɛvi lod, a nɔ ebul fɔ bia dɛn ɔl.” (Sam 38:4) Bɔt Jiova de fɔgiv pipul dɛn we dɔn sin we dɛn ripɛnt. (Sam 25:18; 32:5) Di Ibru wɔd we dɛn yuz fɔ translet di wɔd fɔgiv min fɔ “es sɔntin” ɔ fɔ “kɛr sɔntin go.” Sɔntɛm wi go tink bɔt Jiova as strɔng man we de es di ɛvi lod we wi gɛt we na sin kɔmɔt na wi sholda ɛn kɛr am go.
“Fɔgiv” (Sam 32:5)
6. We Jiova tek wi sin dɛn, aw fa i kin kɛr dɛn go?
6 Di Baybul yuz ɔda ɛgzampul fɔ sho se Jiova de kɛr wi sin dɛn go fa frɔm wi. Sam 103:12 tɛl wi se: “Jɔs lɛk aw di say we di san de kɔmɔt de fa frɔm di say we di san de go dɔŋ, na so i dɔn put wi sin dɛn fa frɔm wi.” Di distans frɔm ist to wɛst fa pas nɔt ɛn sawt. Ist ɛn wɛst nɔ de ɛva mitɔp. Dis min se Jiova de kɛr wi sin go di say we wi de imajin se fa pas ɔl. Dis mek wi biliv tranga wan se Jiova de fɔgiv wi wit ɔl in at!
“Jɔs lɛk aw di say we di san de kɔmɔt de fa frɔm di say we di san de go dɔŋ” (Sam 103:12)
7. Wetin di Baybul tɔk bɔt wetin Jiova kin du wit wi sin dɛn? (Mayka 7:18, 19)
7 Pan ɔl we i tan lɛk se Jiova de pul wi sin dɛn nia wi ɛn go wit dɛn fa fa say, fɔ se i de kɔntinyu fɔ kip dɛn na in at? Nɔ. Kiŋ Ɛzikaya bin tɔk bɔt Jiova se: “Yu trowe ɔl mi sin dɛn biɛn yu bak.” Ɔ lɛk aw di futnot se, “Yu pul ɔl mi sin dɛn bifo yu.” (Ayz. 38:9, 17; futnot) Dis min se Jiova de trowe di wan dɛn we dɔn ripɛnt dɛn sin fa frɔm am ɛn i nɔ de si am igen. Dɛn kin translet dɛn wɔd dɛn ya bak dis we: “Yu dɔn mek i tan lɛk se a nɔ ivin sin.” Di Baybul yuz ɔda ɛgzampul bak fɔ tɔk mɔ bɔt aw Jiova de fɔgiv na Mayka 7:18, 19. (Rid.) Dɛn vas dɛn de tɔk se Jiova de trowe ɔl wi sin dɛn na di dip say na di si. Trade trade, i nɔ bin pɔsibul fɔ mek pɔsin gɛt sɔntin we dɛn dɔn trowe na di dip say na di si.
“Yu trowe ɔl mi sin dɛn biɛn yu bak” (Ayz. 38:17)
“I go trowe ɔl dɛn sin dɛn na di dip say na di si” (Mayk. 7:19)
8. Wetin wi dɔn lan?
8 Di ɛgzampul dɛn we di Baybul yuz dɔn ɛp wi fɔ no se we Jiova de fɔgiv wi, i de pul di ɛvi lod we sin de put pan wi. Fɔ tru, jɔs lɛk aw Devid se, “di wan dɛn we Gɔd dɔn sɔri fɔ, fɔ di bad tin dɛn we dɛn du, ɛn di wan dɛn we Gɔd dɔn fɔgiv fɔ dɛn sin, gɛt gladi-at. Di wan we Jiova nɔ de mɛmba in sin dɛn atɔl, gɛt gladi-at.” (Rom. 4:7, 8) Dis na tru tru fɔgivnɛs!
JIOVA DE WEP SIN KƆMƆT
9. Us ɛgzampul dɛn Jiova yuz fɔ ɛksplen aw i de fɔgiv wit ɔl in at?
9 Jiova yuz ɔda ɛgzampul dɛn fɔ ɛp wi fɔ gladi fɔ di we aw i de yuz Jizɔs in sakrifays fɔ wep pipul dɛn sin dɛn we dɛn ripɛnt. Di Baybul tɔk se Jiova de was ɛn pul sin dɛn kɔmɔt. Dis go mek di pɔsin we sin klin. (Sam 51:7; Ayz 4:4; Jɛr. 33:8) Jiova insɛf tɔk bɔt wetin go apin we i du dat. I se: “Pan ɔl we una sin dɛn tan lɛk brayt rɛd, dɛn go wayt lɛk sno; pan ɔl we dɛn tan lɛk dip rɛd matirial, dɛn go tan lɛk wul.” (Ayz. 1:18) I rili at fɔ pul sten we na brayt rɛd ɔ dip rɛd pan klos. Bɔt Jiova yuz dis ɛgzampul fɔ mek wi no se i go was wi sin dɛn di kayn we we go mek i nɔ si dɛn igen.
“Pan ɔl we una sin dɛn tan lɛk brayt rɛd, dɛn go wayt lɛk sno” (Ayz. 1:18)
10. Us ɔda ɛgzampul Jiova yuz fɔ sho aw i rili rɛdi fɔ fɔgiv?
10 Insay di atikul bifo dis wan, wi bin kɔmpia sin to “dɛt.” (Mat. 18:32-35) So ɛnitɛm wi sin agens Jiova, i tan lɛk se wi de ad pan wi dɛt. Wi gɛt bɔku dɛt fɔ pe am! Bɔt we Jiova fɔgiv wi, i tan lɛk se i de mek wi nɔ pe di dɛt we wi fɔ pe am. I nɔ de aks wi fɔ pe fɔ sin dɛn we i dɔn fɔgiv. Dis na fayn ɛgzampul we de sho di kayn gladi-at we wi de gɛt we Jiova fɔgiv wi!
“Fɔgiv wi fɔ wi sin dɛn” (Mat. 6:12)
11. Wetin di Baybul min we i se Jiova dɔn “wep” wi sin dɛn kɔmɔt? (Akt 3:19)
11 Jiova nɔ jɔs de mek wi nɔ pe fɔ wi dɛt ɔ sin dɛn; i de wep dɛn kɔmɔt. (Rid Akt 3:19.) We pɔsin se mek wi nɔ pe wi dɛt igen, sɔntɛm wi go imajin se i dɔn drɔ big layn pan di dɛt we wi fɔ pe. Bɔt pipul dɛn go stil ebul fɔ si di nɔmba dɛn we de ɔnda di layn. Bɔt fɔ wep sɔntin kɔmɔt difrɛn. Fɔ ɛp wi fɔ ɔndastand dis ɛgzampul, wi fɔ mɛmba se trade trade na kabɔn, gɔm, ɛn wata, dɛn bin de yuz fɔ mek di ink we dɛn bin de yuz fɔ rayt. Pɔsin kin tek sok spɔnj ɛn wep di raytin kɔmɔt. So we dɛn “wep” dɛt kɔmɔt, pɔsin nɔ de si am igen. Dat min se pɔsin nɔ de ebul si wetin dɛn bin rayt. I tan lɛk se di pɔsin nɔ bin ɛva gɛt dɛt. Wi rili gladi fɔ no se Jiova nɔ jɔs de fɔgiv wi sin dɛn, bɔt i de wep dɛn kɔmɔt ɛn mek i tan lɛk se wi nɔ ɛva sin!—Sam 51:9.
“So dat una sin dɛn go wep kɔmɔt” (Akt 3:19)
12. Wetin di ɛgzampul bɔt tik klawd min fɔ wi?
12 Jiova yuz ɔda ɛgzampul fɔ sho aw i de pul wi sin dɛn kɔmɔt. I tɔk se: “A go wep yu sin dɛn lɛk se a kɔba am wit klawd, ɛn a go pul yu sin dɛn lɛk se a kɔba am wit tik klawd.” (Ayz. 44:22) We Jiova de fɔgiv, i tan lɛk se i de yuz tik klawd fɔ ayd wi sin dɛn fɔ mek wi ɛn Jiova nɔ si dɛn igen.
“A go wep yu sin dɛn lɛk se a kɔba am wit klawd” (Ayz. 44:22)
13. Aw wi de fil we Jiova fɔgiv wi sin dɛn?
13 Wetin dis min fɔ wi? We Jiova fɔgiv wi sin dɛn, wi nɔ fɔ kɔntinyu fɔ fil bad bɔt dɛn. Jizɔs in sakrifays dɔn pe fɔ ɔl wi sin dɛn. We Jiova de fɔgiv wi, i kin tan lɛk se wi nɔ ɛva sin. Na so Jiova de fɔgiv wi sin dɛn we wi ripɛnt.
JIOVA DE MEK WI BI IN PADI BAK
Di fɔgiv we wi Papa we de na ɛvin de fɔgiv wi de mek wi gɛt tayt padi biznɛs wit am (Luk na paregraf 14)
14. Wetin mek wi fɔ biliv se Jiova de fɔgiv wi wit ɔl in at? (Luk bak di pikchɔ dɛn.)
14 Di fɔgiv we Jiova de fɔgiv tru tru wan de mek wi gɛt tayt padi biznɛs wit am. I de mek wi nɔ kɔntinyu fɔ fil bad fɔ di sin we wi kɔmit. Wi nɔ nid fɔ fred se Jiova de kip grɔj na in at sikrit wan ɛn i de luk fɔ we fɔ pɔnish wi. I nɔ go ɛva du dat. Wetin mek wi fɔ biliv Jiova we i se i dɔn fɔgiv wi? Jiova bin tɛl prɔfɛt Jɛrimaya se: “A go fɔgiv dɛn mistek, ɛn a nɔ go mɛmba dɛn sin igen.” (Jɛr. 31:34) Apɔsul Pɔl sɛf bin tɔk dɛn sem wɔd dɛn de. (Ibru. 8:12) Bɔt wetin dat rili min?
“A nɔ go mɛmba dɛn sin igen” (Jɛr. 31:34)
15. Wetin di Baybul min we i se Jiova nɔ de mɛmba wi sin dɛn?
15 Insay di Baybul, di wɔd “mɛmba” nɔ kin min ɔltɛm fɔ tink bɔt sɔntin we bin dɔn apin. Bɔt i kin min bak fɔ mek pɔsin du sɔntin. Di kriminal we bin ɛng nia Jizɔs bin beg am se: “Jizɔs, mɛmba mi we yu go na yu Kiŋdɔm.” (Lyuk 23:42, 43) I nɔ bin jɔs de tɛl Jizɔs fɔ tink bɔt am da tɛm de. Ɛn di ansa we Jizɔs gi am sho se i go du sɔntin fɔ gi dis kriminal layf bak. So, we Jiova se i nɔ go mɛmba wi sin dɛn igen, i min se i nɔ go du sɔntin fɔ pɔnish wi. I nɔ go pɔnish wi leta fɔ di sin dɛn we i dɔn fɔgiv wi fɔ.
16. Aw di Baybul tɔk bɔt di fridɔm we wi de gɛt we Jiova fɔgiv wi?
16 Di Baybul yuz wan ɔda ɛgzampul fɔ ɛp wi fɔ ɔndastand di fridɔm we wi de gɛt we Jiova fɔgiv wi. Bikɔs wi nɔ pafɛkt, wi tan lɛk “sin in slev dɛn.” Bɔt we Jiova fɔgiv wi, wi tan lɛk slev dɛn “we Gɔd pul . . . pan sin.” (Rom. 6:17, 18; Rɛv. 1:5) Fɔ tru, di fɔgiv we Jiova de fɔgiv wi de mek wi fil fayn bikɔs wi nɔto slev to sin igen.
“Gɔd pul una pan sin” (Rom. 6:18)
17. Aw fɔgivnɛs de mɛn wi? (Ayzaya 53:5)
17 Rid Ayzaya 53:5. Di las ɛgzampul we wi de kam tɔk bɔt kɔmpia wi to pipul dɛn we gɛt bad bad sik. Bikɔs Jiova mek in Bɔypikin sakrifays in layf fɔ fri wi, dat dɔn mek Jiova mɛn wi. (1 Pit. 2:24) We wi sin, wi padi biznɛs wit Jiova de pwɛl, bɔt bikɔs ɔf Jizɔs in sakrifays fɔ fri wi, Jiova de fɔgiv wi ɛn mek wi gɛt tayt padi biznɛs wit am bak. Jɔs lɛk aw pɔsin we bin sik siriɔs wan go gladi pasmak we i wɛl, na so wisɛf de gladi we wi gɛt padi biznɛs wit Jiova bak bikɔs i dɔn fɔgiv wi sin.
“Wi wɛl bikɔs ɔf in wund dɛn” (Ayz. 53:5)
WETIN JIOVA IN FƆGIVNƐS MIN FƆ WI?
18. Wetin wi dɔn lan we wi tɔk bɔt di difrɛn ɛgzampul dɛn we di Baybul yuz fɔ tɔk bɔt aw Jiova de fɔgiv? (Luk di bɔks we gɛt di taytul “Aw Jiova De Fɔgiv Wi?”)
18 Wetin wi dɔn lan we wi tɔk bɔt di difrɛn ɛgzampul dɛn we di Baybul yuz fɔ tɔk bɔt aw Jiova de fɔgiv? We Jiova de fɔgiv wi, i de fɔgiv wit ɔl in at ɛn i nɔ go pɔnish wi leta fɔ wi sin. Dis de mek wi gɛt tayt padi biznɛs wit wi Papa we de na ɛvin. Bɔt stil, wi de mɛmba se tru tru fɔgivnɛs na gift. Wi de gɛt dis gift bikɔs ɔf Jiova in lɔv ɛn in spɛshal gudnɛs we i de sho to mɔtalman we de sin. Nɔto sɔntin we mɔtalman fit fɔ gɛt.—Rom. 3:24.
19. (a) Wetin wi fɔ gladi fɔ? (Romans 4:8) (b) Wetin wi go tɔk bɔt insay di nɛks atikul?
19 Rid Romans 4:8. Wi rili gladi bikɔs Jiova na Gɔd we de fɔgiv “tru tru wan”! (Sam 130:4) Bɔt fɔ mek Jiova fɔgiv wi, wi nid fɔ du wan impɔtant tin. Jizɔs bin se: “If una nɔ fɔgiv pipul dɛn fɔ di bad tin dɛn we dɛn du, una Papa nɔ go fɔgiv una.” (Mat. 6:14, 15) Dis sho klia wan se i impɔtant fɔ mek wi falamakata Jiova fɔ fɔgiv. Bɔt aw wi go ebul fɔ du dat? Di nɛks atikul go sho wi aw wi go ebul fɔ du dat.
SIŊ 46 Jiova Tɛnki
a Di orijinal Ibru tɛks yuz di wɔd dɛn “di fɔgivnɛs” we min se pan ɔl we ɔda kayn fɔgivnɛs dɛn de, dis na di tru tru wan. Bɔku Baybul transleshɔn dɛn mis dis impɔtant difrɛns, bɔt di New World Translation of the Holy Scriptures nɔ mis am, we mek i difrɛn frɔm di we aw ɔda Baybul dɛn translet Sam 130:4.
