STƆDI ATIKUL 6
SIŊ 18 Wi Gladi fɔ Jizɔs in Day Wan
Wetin Mek Wi Gladi we Jiova De Fɔgiv Wi?
“Gɔd rili lɛk di wɔl, na dat mek i gi in wangren Pikin we insɛf sɛf mek.”—JƆN 3:16.
MEN PƆYNT
Wi want fɔ sho se wi rili gladi fɔ di fɔgiv we Jiova de fɔgiv wi sin dɛn. Fɔ du dat, wi go lan bɔt wetin Jiova bin du fɔ mek i fɔgiv wi sin dɛn.
1-2. Aw di tin we apin to mɔtalman fiba di tin we apin to di yɔŋman we paregraf 1 tɔk bɔt?
IMAJIN wan yɔŋman we in mama ɛn papa jɛntri. Wan de, bad bad tin apin. In mama ɛn papa day pan aksidɛnt. In at rili pwɛl we i yɛri di nyuz. Bɔt ɔda bad nyuz de we dis yɔŋman nɔ yɛri yet. I kam fɔ no se in mama ɛn papa bin west di mɔni we di famili bin gɛt ɛn dɛn bin gɛt bɔku dɛt fɔ pe. Naw imajin dis, bifo i gɛt di jɛntri we in mama ɛn papa bin fɔ lɛf fɔ am, na bɔku bɔku dɛt i gɛt, ɛn di wan dɛn we in mama ɛn papa fɔ pe de mɔna am fɔ mek i pe dɛn. I nɔ go ɛva ebul fɔ pe ɔl da dɛt de.
2 Di tin we apin to mɔtalman fiba wetin apin to dis yɔŋman. Wi fɔs mama ɛn papa, we na Adam ɛn Iv bin pafɛkt ɛn dɛn bin de na paradays we fayn. (Jɛn. 1:27; 2:7-9) Dɛn bin gɛt di chans fɔ ɛnjɔy layf sote go. Bɔt ɔltin bin chenj. Dɛn bin lɔs di chans fɔ de na Paradays ɛn fɔ de sote go. Wetin dɛn go lɛf fɔ dɛn pikin dɛn? Di Baybul tɛl wi se: “Wan man [Adam] mek sin kam na di wɔl ɛn sin briŋ day, ɛn ɔlman de day bikɔs dɛn ɔl dɔn sin.” (Rom. 5:12) Di prɔpati we Adam lɛf fɔ wi na sin, ɛn sin de mek wi day. Dis sin we wi gɛt frɔm dɛn tan lɛk bɔku bɔku dɛt we wi nɔn nɔ go ebul fɔ pe.—Sam 49:8.
3. Wetin mek wi go kɔmpia wi sin dɛn to “dɛt”?
3 Jizɔs bin kɔmpia sin to “dɛt.” (Mat. 6:12, futnot; Lyuk 11:4) We wi sin, i tan lɛk se wi dɔn trɔs to Jiova. Wi fɔ pe di prayz fɔ da sin de. If dɛn nɔ bin pe dis dɛt, na day nɔmɔ go fri wi frɔm da dɛt de.—Rom. 6:7, 23.
4. (a) Wetin bin fɔ dɔn apin to ɔl sina dɛn if pɔsin nɔ bin de fɔ ɛp dɛn? (Sam 49:7-9) (b) Wetin di wɔd “sin” min na di Baybul? (Luk di bɔks we gɛt di taytul “ Sin.”)
4 Yu tink se i pɔsibul fɔ mek wi gɛt bak ɔl wetin Adam ɛn Iv bin lɔs? I nɔ pɔsibul fɔ mek wi gɛt dɛn bay wisɛf. (Rid Sam 49:7-9.) Wi nɔ bin fɔ gɛt op fɔ gɛt layf tumara bambay ɔ fɔ gɛt layf bak if pɔsin nɔ bin de fɔ ɛp wi. Infakt, wi bin fɔ day ɛn nɔ gɛt op fɔ gɛt layf bak jɔs lɛk animal dɛn.—Ɛkli. 3:19; 2 Pit. 2:12.
5. Aw wi Papa we lɛk wi dɔn ɛp fɔ pe fɔ di sin we Adam lɛf gi wi? (Luk di pikchɔ na di frɔnt pej.)
5 Tink bak bɔt di yɔŋman we wi tɔk bɔt na paregraf 1; aw yu tink se i go fil if wan jɛntriman disayd fɔ pe ɔl in dɛt dɛn? Wan dawt nɔ de se di yɔŋman go rili gladi ɛn i go gri fɔ mek dis man ɛp am. Semweso, Jiova we na wi Papa we lɛk wi dɔn gi wi wan gift we dɔn pe fɔ di sin we Adam lɛf gi wi. Jizɔs bin ɛksplen am dis we: “Gɔd rili lɛk di wɔl, na dat mek i gi in wangren Pikin we insɛf sɛf mek, so dat ɛnibɔdi we sho se i gɛt fet pan am Gɔd nɔ go dɔnawe wit am, bɔt i go gɛt layf we go de sote go.” (Jɔn 3:16) Pantap dat, dis sem gift dɔn mek wi ebul gɛt tayt padi biznɛs wit Jiova.
Jizɔs bin prich bɔt di fɔgiv we Jiova de fɔgiv wi sin dɛn bikɔs ɔf di prayz we i pe fɔ fri wi. (Jɔn 3:16) Jizɔs bin rɛdi fɔ gi in layf so dat i go pe di prayz fɔ fri wi (Luk na paregraf 5)
6. Us wɔd dɛn we de na di Baybul wi go tɔk bɔt insay dis atikul? Wetin mek?
6 Aw wi go ebul bɛnifit frɔm dis wɔndaful gift ɛn mek Jiova fɔgiv wi sin dɛn? Di ansa fɔ da kwɛstyɔn de, de na di wɔd dɛn we di Baybul yuz. Dɛn wɔd dɛn de na, fɔ mek pis, fɔ fɔgiv sin, fɔ gɛt pis, fɔ pe di prayz, fɔ sev, ɛn fɔ bi pipul dɛn we de du wetin rayt. Insay dis atikul, wi go tɔk bɔt wetin dɛn wɔd dɛn ya min. As wi de tink gud gud wan bɔt wetin Jiova dɔn du fɔ fɔgiv wi, wi go gladi mɔ fɔ wetin i du fɔ wi.
DI GOL: FƆ MEK PIS
7. (a) Wetin bak Adam ɛn Iv bin lɔs? (b) As Adam ɛn Iv dɛn pikin dɛn, wetin wi rili nid? (Romans 5:10, 11)
7 Apat frɔm di chans we Adam ɛn Iv lɔs fɔ de sote go, dɛn bin lɔs bak dɛn padi biznɛs we bin rili valyu wit dɛn Papa Jiova. Bifo Adam ɛn Iv sin, dɛn bin de pat pan Gɔd in famili. (Lyuk 3:38) Bɔt we dɛn nɔ obe Jiova, i bin drɛb dɛn kɔmɔt na in famili bifo dɛn stat fɔ bɔn pikin dɛn. (Jɛn. 3:23, 24; 4:1) So bikɔs wi na dɛn pikin dɛn, wi nid fɔ mek pis wit Jiova. (Rid Romans 5:10, 11.) Dis min se wi nid fɔ gɛt tayt padi biznɛs wit am. Wan buk bin se, di Grik wɔd we dɛn yuz na ya fɔ “mek pis” kin min fɔ “mek padi wit pɔsin we na yu ɛnimi.” I rili wɔndaful fɔ no se na Jiova fɔs du sɔntin fɔ mek dis pɔsibul. Aw?
DI ARENJMƐNT: FƆ FƆGIV SIN
8. Wetin i min (a) fɔ fɔgiv sin? (b) fɔ gɛt pis wit Jiova?
8 Fɔ fɔgiv sin na di arenjmɛnt we Jiova dɔn mek fɔ lɛ mɔtalman we na sina gɛt tayt padi biznɛs bak wit am. Dis arenjmɛnt bin mek wi gɛt wetin Adam bin lɔs bay we Jiova gi sɔntin we gɛt di sem valyu we di tin we Adam bin lɔs gɛt. Di Grik Skripchɔ dɛn yuz di wɔd dɛn gɛt pis wit Am we fiba di wɔd dɛn “fɔ fɔgiv sin.” (Rom. 3:25) Di wɔd dɛn gɛt pis wit Am min di tin we pɔsin go du fɔ mek i gɛt pis ɛn tayt padi biznɛs wit Gɔd.
9. Us arenjmɛnt Jiova mek we bin de fɔ shɔt tɛm fɔ mek i go fɔgiv di Izrɛlayt dɛn sin dɛn?
9 Fɔ mek di Izrɛlayt dɛn go ebul gɛt tayt padi biznɛs wit Jiova, i bin mek wan arenjmɛnt we bin de fɔ shɔt tɛm fɔ fɔgiv dɛn sin dɛn. Insay di Izrɛlayt dɛn tɛm, dɛn bin de gɛt di De fɔ Fɔgiv Sin wantɛm insay di ia. Da de de, di ay prist kin sakrifays animal dɛn fɔ di pipul dɛn. As wi ɔl no, animal sakrifays nɔ go ebul fɔ pe fɔ ɛnibɔdi in sin kɔmplit wan, bikɔs mɔtalman valyu pas animal. Bɔt wans di Izrɛlayt dɛn we dɔn ripɛnt mek di sakrifays dɛn we Jiova se dɛn fɔ mek, Jiova bin rɛdi fɔ fɔgiv dɛn sin dɛn. (Ibru. 10:1-4) Dɔn bak, da arenjmɛnt de ɛn di sakrifays dɛn we dɛn bin de mek ɔltɛm, bin ɛp di Izrɛlayt dɛn fɔ no se dɛn na sina dɛn ɛn dɛn rili nid sɔntin we go ebul fɔ kɔba dɛn sin dɛn sote go.
10. Us arenjmɛnt Jiova bin mek we go de sote go fɔ fɔgiv sin?
10 Jiova bin mek wan arenjmɛnt we go de sote go fɔ fɔgiv wi sin dɛn. I bin mek in Bɔypikin we i rili lɛk “gi insɛf wan tɛm nɔmɔ fɔ tek bɔku pipul dɛn sin dɛn.” (Ibru. 9:28) Jizɔs bin gi “in layf as prayz fɔ fri bɔku pipul dɛn.” (Mat. 20:28) Wetin na di prayz?
DI PRAYZ: JIZƆS IN SAKRIFAYS
11. (a) Akɔdin to di Baybul, wetin mek pɔsin bin nid fɔ pe di prayz fɔ fri wi? (b) Udat na di wangren pɔsin we go ebul fɔ pe di prayz?
11 Akɔdin to di Baybul, Jiova bin disayd se pɔsin fɔ pe di ɛgzakt prayz fɔ mek i go fɔgiv wi sin dɛn ɛn mek wi bi in padi dɛn bak. Wetin na bin di ɛgzakt prayz we dɛn bin nid fɔ pe fɔ mek mɔtalman go gɛt wetin Adam bin lɔs bak? Mɛmba se Adam ɛn Iv bin lɔs dɛn pafɛkt layf ɛn di chans fɔ de sote go. So di prayz we dɛn go pe nid fɔ gɛt di sem valyu lɛk di wan we bin lɔs. (1 Tim. 2:6) Di pɔsin we go ebul pe dis prayz fɔ bi pɔsin we (1) bin pafɛkt; (2) bin gɛt di chans fɔ de sote go na dis wɔl; ɛn (3) bin rɛdi fɔ giv-ɔp, ɔ sakrifays da layf de fɔ wi. Na da we de nɔmɔ da pɔsin in layf go ebul pe fɔ di wan we Adam bin lɔs.
12. Wetin mek Jizɔs bin ebul fɔ pe di prayz we wi nid fɔ pe fɔ fri wi?
12 Lɛ wi tɔk bɔt tri rizin dɛn we mek Jizɔs bin ebul fɔ pe di prayz fɔ fri wi. (1) I bin pafɛkt, we min se “i nɔ wande sin.” (1 Pit. 2:22) (2) Bikɔs ɔf dat, i bin gɛt di chans fɔ de sote go na dis wɔl. (3) I bin rɛdi fɔ day ɛn giv-ɔp da layf de fɔ wi. (Ibru. 10:9, 10) Jɔs lɛk aw Adam bin pafɛkt bifo i sin, na so Jizɔs insɛf bin pafɛkt. (1 Kɔr. 15:45) So we Jizɔs day, i bin ebul fɔ pe fɔ Adam in sin, dat na, fɔ gɛt bak wetin Adam bin lɔs. (Rom. 5:19) So Jizɔs bin bi “di las Adam.” Nid nɔ de igen fɔ mek ɔda pafɛkt pɔsin kam ɛn pe fɔ wetin Adam bin lɔs. Jizɔs bin day “wan tɛm nɔmɔ.”—Ibru. 7:27; 10:12.
13. Wetin na di difrɛns bitwin di arenjmɛnt we Jiova bin mek fɔ fɔgiv pipul dɛn sin ɛn di prayz we Jizɔs bin pe fɔ fri mɔtalman frɔm sin?
13 So wetin na di difrɛns bitwin di arenjmɛnt we Jiova bin mek fɔ fɔgiv pipul dɛn sin ɛn di prayz we Jizɔs bin pe fɔ fri mɔtalman frɔm sin? Di arenjmɛnt fɔ fɔgiv pipul dɛn sin na sɔntin we Gɔd du fɔ mek i go gɛt tayt padi biznɛs wit mɔtalman bak. Di day we Jizɔs bin day na di prayz we i pe fɔ mek i go pɔsibul fɔ lɛ Gɔd fɔgiv mɔtalman dɛn sin. Dis prayz tinap fɔ Jizɔs in blɔd we valyu we i bin sakrifays fɔ wi sek.—Ɛfi. 1:7; Ibru. 9:14.
DI BƐNIFIT DƐN: JIOVA SEV WI ƐN TƆK SE WI NA PIPUL DƐN WE DE DU WETIN RAYT
14. Wetin wi de kam tɔk bɔt naw? Wetin mek?
14 Us bɛnifit dɛn di arenjmɛnt fɔ fɔgiv sin bin gɛt? Di Baybul yuz bɔku wɔd dɛn fɔ tɔk bɔt di bɛnifit dɛn. Pan ɔl we dɛn wɔd dɛn ya min di sem tin, ɛniwan pan dɛn tɔk mɔ bɔt wan patikyula tin bɔt di arenjmɛnt fɔ fɔgiv sin we Jiova bin mek, we opin di we fɔ mek i fɔgiv pipul dɛn. As wi de tɔk bɔt dɛn wɔd dɛn ya, wi go si bak aw dɛn de afɛkt wi wan bay wan.
15-16. (a) Insay di Baybul, wetin di wɔd “sev” min? (b) Aw dis de afɛkt wi?
15 Insay di Baybul, di wɔd sev min di fri we wi dɔn fri frɔm sin ɛn day bikɔs Jizɔs day fɔ pe di prayz fɔ fri wi. Apɔsul Pita tɔk bɔt am dis we: “Una no se nɔto wit tin dɛn we de pwɛl, wit silva ɔ gold, Gɔd tek fɔ pul [insay Grik, “fri”] una pan di layf we una bin de liv we nɔ gɛt wan minin ɛn we una gret gret granpa dɛn lɛf gi una. Bɔt na wit Krays in blɔd we gɛt valyu, we tan lɛk di blɔd we yɔŋ ship we nɔ gɛt wan bɔt ɔ sten, gɛt.”—1 Pit. 1:18, 19; futnot.
16 Bikɔs ɔf di day we Jizɔs day fɔ pe fɔ wi sin, wi go fri frɔm sin ɛn day we de mek wi rili sɔfa. (Rom. 5:21) Fɔ tru, wi gɛt gud rizin fɔ sho se wi rili gɛt tɛnki fɔ wetin Jiova ɛn Jizɔs du fɔ sev wi, ɛn na Jizɔs in blɔd we gɛt valyu dɛn yuz fɔ du dat.—1 Kɔr. 15:22.
17-18. (a) We Gɔd tɔk se pɔsin de du wetin rayt, wetin dat min? (b) Aw dis de afɛkt wi?
17 We Gɔd tɔk se wi na pipul dɛn we de du wetin rayt, dat min se i dɔn wep ɔl wi sin dɛn ɛn wi nɔ nid fɔ pe fɔ dɛn igen. We Jiova du dis, i nɔ min se i dɔn go agens in lɔ dɛn fɔ du tin tret. I nɔ tɔk se wi na pipul dɛn we de du wetin rayt bikɔs ɔf wetin wi de du, ɔ bikɔs i de ovaluk wi sin dɛn. Bɔt na bikɔs wi gɛt fet pan di arenjmɛnt we Jiova mek fɔ fɔgiv sin ɛn di prayz we Jizɔs pe fɔ fri wi frɔm sin ɛn day; na dat mek Jiova gɛt rizin fɔ fɔgiv wi sin dɛn.—Rom. 3:24; Gal. 2:16.
18 Wetin dis min fɔ ɛniwan pan wi? Gɔd dɔn ɔlrɛdi tɔk se di wan dɛn we i dɔn pik fɔ rul wit Jizɔs na ɛvin de du wetin rayt as in pikin dɛn. (Tay. 3:7; 1 Jɔn 3:1) Gɔd dɔn fɔgiv dɛn sin dɛn. I tan lɛk se dɛn nɔ wande sin, so dɛn kwalifay fɔ de na di Kiŋdɔm. (Rom. 8:1, 2, 30) Gɔd dɔn tɔk se di wan dɛn we gɛt op fɔ de na dis wɔl dɛnsɛf de du wetin rayt as in padi dɛn ɛn i dɔn fɔgiv dɛn sin dɛn. (Jems 2:21-23) Di bɔku bɔku pipul dɛn we go sev di tɛm fɔ Amagɛdɔn, nɔ go ɛva day. (Jɔn 11:26) “Di wan dɛn we du wetin rayt” ɛn “di wan dɛn we nɔ du wetin rayt” we dɔn day go gɛt layf bak. (Akt 24:15; Jɔn 5:28, 29) As tɛm de go, ɔl Jiova in savant dɛn we de obe am we de na dis wɔl go “gɛt di wɔndaful fridɔm as Gɔd in pikin dɛn.” (Rom. 8:21) Dis na wɔndaful blɛsin frɔm di arenjmɛnt we Gɔd dɔn mek fɔ fɔgiv wi sin. Wi go gɛt tru tru pis wit wi Papa Jiova!
19. Aw tin dɔn bɛtɛ fɔ wi bikɔs ɔf wetin Jiova ɛn Jizɔs du fɔ wi? (Luk bak di bɔks we gɛt di taytul “ Wetin I Min fɔ Wi?”)
19 Fɔ tru, wetin apin to wi fiba wetin apin to di yɔŋman we wi bin tɔk bɔt na paregraf 1 we bin lɔs ɔltin, ɛn we in mama ɛn papa lɛf bɔku dɛt we i nɔ go ɛva ebul fɔ pe. Bɔt wi tɛl Jiova tɛnki fɔ we i ɛp wi. Tin dɔn chenj fɔ wi bikɔs ɔf di arenjmɛnt we Jiova bin mek fɔ fɔgiv sin ɛn di prayz we Jizɔs pe fɔ wi sin dɛn. Di fet we wi gɛt pan Jizɔs Krays dɔn mek wi fri frɔm sin ɛn day. We Jiova fɔgiv wi sin dɛn, i tan lɛk se wi nɔ wande sin. Bɔt di tin we impɔtant mɔ na dat, wi ebul fɔ gɛt tayt padi biznɛs wit Jiova wi Papa we de na ɛvin we rili lɛk wi.
20. Wetin wi go tɔk bɔt insay di nɛks atikul?
20 As wi de tink gud gud wan bɔt wetin Jiova ɛn Jizɔs dɔn du fɔ wi, dat de mek wi rili gladi ɛn gɛt tɛnki. (2 Kɔr. 5:15) If dɛn nɔ bin ɛp wi, wi nɔ bin fɔ gɛt op atɔl! Bɔt wetin Jiova in fɔgivnɛs rili min fɔ wi wan bay wan? Na dat wi go tɔk bɔt insay di nɛks atikul.
SIŊ 10 Prez Wi Gɔd, Jiova!
