1-2. (a) Wetin Jiova de si we bɔku bɔku pipul dɛn de kam di Mɛmorial? (Luk di pikchɔ na di frɔnt pej.) (b) Wetin wi go tɔk bɔt na dis atikul?

IMAJIN wetin Jiova de si we bɔku bɔku pipul dɛn ɔlsay na di wɔl de kam togɛda fɔ di Mɛmorial. I nɔ jɔs de si di bɔku bɔku pipul dɛn we gɛda; bɔt i de notis wi ɔl we de de wan bay wan. Fɔ ɛgzampul, i de si di fetful wan dɛn we de atɛnd di Mɛmorial ɛvri ia. Dɔn, i de si di wan dɛn bak we de atɛnd di Mɛmorial pan ɔl we dɛn de mek dɛn sɔfa fɔ wetin dɛn biliv. Ɔda pipul dɛn nɔ kin atɛnd di mitin dɛn ɔltɛm, bɔt dɛn si se fɔ atɛnd di Mɛmorial na sɔntin we rili impɔtant. Dɔn bak, Jiova de si di wan dɛn we go atɛnd di Mɛmorial fɔ di fɔstɛm, sɔntɛm bikɔs dɛn want fɔ no bɔt di Mɛmorial.

² Fɔ tru, Jiova rili gladi fɔ si bɔku bɔku pipul dɛn de atɛnd di Mɛmorial. (Lyuk 22:​19, NW) Bɔt nɔto di bɔku bɔku pipul dɛn Jiova bisin bɔt mɔ. I bisin mɔ bɔt di rizin we mek dɛn kam ɛn na dat impɔtant to am. Insay dis atikul, wi go ansa wan impɔtant kwɛstyɔn: Wetin mek wi nɔ jɔs de atɛnd di Mɛmorial we wi kin gɛt wan tɛm insay di ia, bɔt wi de atɛnd bak di mitin dɛn we wi kin gɛt insay di wik we Jiova dɔn mek fɔ di wan dɛn we lɛk am?

3-4. (a) Wetin mek wi de atɛnd di mitin dɛn? (b) We wi de atɛnd di mitin dɛn, wetin dat de sho bɔt wi? (c) Frɔm wetin de na Fɔs Lɛta fɔ Kɔrint 11:​23-26 (NW), wetin mek wi nɔ fɔ mis di Mɛmorial?

³ Di men rizin we mek wi de atɛnd wi mitin dɛn na bikɔs na pat pan wi wɔship. Wi de atɛnd di mitin dɛn bak bikɔs na de wi de lan bɔt Jiova. Prawd pipul dɛn nɔ biliv se dɛn nid fɔ tich dɛn bɔt ɛnitin. (3 Jɔn 9, NW) Bɔt wi rili  want fɔ lɛ Jiova ɛn di ɔganayzeshɔn we i de yuz tich wi.—Ayz. 30:​20; Jɔn 6:​45.

⁴ We wi de atɛnd di mitin dɛn, dat de sho se wi ɔmbul, wi rɛdi ɛn wi rili want fɔ lɛ dɛn tich wi. Di nɛt fɔ di Mɛmorial fɔ mɛmba Jizɔs in day, wi go atɛnd dis program nɔto jɔs bikɔs wi fɔ atɛnd bɔt na bikɔs wi ɔmbul ɛn wi de obe wetin Jizɔs bin tɛl wi we i se: “Una go de du dis fɔ mɛmba mi.” (Rid Fɔs Lɛta fɔ Kɔrint 11:​23-26, NW.) Da program de de mek wi gɛt op mɔ ɛn mɔ fɔ tumara bambay ɛn i de mɛmba wi bak bɔt aw Jiova lɛk wi. Bɔt Jiova no se nɔto jɔs wan tɛm insay di ia wi go nid pɔsin fɔ ɛnkɔrej wi ɛn gi wi trɛnk. So na dat mek i mek di mitin dɛn fɔ wi ɛni wik ɛn i de ɛnkɔrej wi fɔ atɛnd. We wi ɔmbul dat de ɛp wi fɔ obe. Wi de spɛn bɔku tɛm ɛni wik fɔ pripia fɔ dɛn mitin dɛn ya ɛn fɔ atɛnd.

5. Wetin di wan dɛn we ɔmbul de du we Jiova invayt dɛn?

⁵ Ɛni ia, Jiova de invayt pipul dɛn fɔ kam fɔ lɛ i tich dɛn, ɛn bɔku ɔmbul wan dɛn de kam fɔ lɛ i tich dɛn. (Ayz. 50:​4) Dɛn kin gladi fɔ atɛnd di Mɛmorial, ɛn dɛn kin stat fɔ atɛnd di ɔda mitin dɛn bak. (Zɛk. 8:​20-23) Wi ɛn dɛn gladi fɔ lɛ Jiova tich wi ɛn gayd wi, ɛn Jiova na ‘di wan we de pul wi pan trɔbul ɛn ɛp wi.’ (Sam 40:​17) Wetin de we rili impɔtant ɔ we wi de ɛnjɔy mɔ pas di gri we wi de gri fɔ lɛ Jiova ɛn Jizɔs we na in Pikin we i rili lɛk tich wi?—Mat. 17:​5; 18:​20, NW; 28:​20.

6. We wan man bin sho se i ɔmbul, aw dat bin ɛp am fɔ atɛnd di Mɛmorial?

⁶ Ɛni ia, wi de tray tranga wan fɔ invayt bɔku pipul dɛn fɔ atɛnd di Mɛmorial fɔ mɛmba Jizɔs in day. Bɔku pipul dɛn we ɔmbul dɔn bɛnifit we dɛn kam di Mɛmorial. Lɛ wi tɔk bɔt wan ɛgzampul. Trade trade, wan brɔda bin invayt wan man fɔ di Mɛmorial, bɔt di man bin tɛl di brɔda se i nɔ go atɛnd. Bɔt di nɛt fɔ di Mɛmorial, di brɔda bin sɔprayz fɔ si di man kam na di Kiŋdɔm Ɔl. Dis man bin rili gladi fɔ di kayn we aw di brɔda dɛn bin grit am, ɛn dat bin mek i bigin fɔ atɛnd di mitin dɛn we wi kin gɛt insay di wik. Infakt, insay di wanol ia na tri tɛm nɔmɔ i mis mitin. Wetin bin ɛp dis man fɔ disayd fɔ atɛnd ɔl di mitin dɛn? I bin ɔmbul ɛn dat ɛp am fɔ chenj in maynd. Di brɔda we bin invayt am bin leta tɔk se, “Dis man rili ɔmbul.” Jiova bin drɔ dis man kam nia Am, ɛn tide in na baptayz brɔda.—2 Sam. 22:​28; Jɔn 6:​44.

7. Aw di tin dɛn we wi de lan na di mitin ɛn di tin dɛn we wi de rid na di Baybul go ɛp wi fɔ bi pɔsin we ɔmbul?

⁷ Di tin dɛn we wi de lan na mitin ɛn di tin dɛn we wi de rid na di Baybul de ɛp wi fɔ bi ɔmbul pɔsin. Bɔku tɛm insay di wik bifo di Mɛmorial, na wi mitin dɛn, wi kin tɔk mɔ bɔt Jizɔs in ɛgzampul ɛn di we aw i sho se i ɔmbul bay we i gi in layf fɔ sev wi frɔm sin ɛn day. Ɛn di tɛm fɔ di Mɛmorial, i go fayn fɔ lɛ wi rid di stori dɛn we de na di Baybul we de tɔk bɔt di tin dɛn we bin apin di tɛm we Jizɔs day ɛn we i gɛt layf bak. Di tin dɛn we wi de lan na dɛn mitin dɛn ya, ɛn di stori dɛn we wi de rid na di Baybul bɔt Jizɔs go mek wi gladi mɔ ɛn mɔ fɔ di sakrifays we i mek fɔ wi. Dis go ɛp wi fɔ falamakata Jizɔs fɔ bi ɔmbul pɔsin ɛn fɔ du wetin Jiova want pan ɔl we i nɔ izi fɔ wi.—Lyuk 22:​41, 42.

8. Aw Jizɔs bin sho se i gɛt maynd?

⁸ Wi kin tray bak fɔ falamakata Jizɔs fɔ gɛt maynd. Tink bɔt aw i sho se i gɛt maynd sɔm dez bifo i day. I bin no klia wan se i nɔ go te igen in ɛnimi dɛn go disgres am, bit am, ɛn kil am. (Mat. 20:​17-19, NW) Stil i bin rɛdi fɔ day. We di tɛm rich, i bin tɛl in fetful apɔsul dɛn we bin de wit am na Gɛtsimani se: “Una grap, lɛ wi go. Una luk di pɔsin we go sɛl mi, de kam naw!” (Mat. 26:​36, 46) We di krawd we bin gɛt wɛpɔn bin kam fɔ arɛst am, i bin go tinap bifo dɛn, tɛl dɛn udat i bi, ɛn tɛl di sojaman dɛn fɔ alaw in apɔsul dɛn fɔ go. (Jɔn 18:​3-8) Imajin di kayn maynd we Jizɔs bin sho! Tide, di anɔyntɛd Kristian dɛn ɛn di ɔda ship de falamakata Jizɔs fɔ gɛt maynd. Aw?

9. (a) Wetin mek wi nid fɔ gɛt maynd fɔ atɛnd di mitin dɛn ɔltɛm? (b) Aw wi ɛgzampul kin afɛkt wi brɔda dɛn we de na jel fɔ wetin dɛn biliv?

⁹ Wi nid fɔ sho se wi gɛt maynd fɔ atɛnd mitin ɔltɛm, pan ɔl we wi de gɛt prɔblɛm dɛn. Sɔm pan wi brɔda ɛn sista dɛn de atɛnd mitin pan ɔl we dɛn at pwɛl, dɛn gɛt wɛlbɔdi prɔblɛm, ɔ pɔsin we dɛn lɛk dɔn day. Ɔda pipul dɛn de sho se dɛn gɛt maynd fɔ atɛnd mitin pan ɔl we dɛn fambul dɛn ɔ di gɔvmɛnt de mek dɛn sɔfa. Tek smɔl tɛm fɔ tink bɔt aw wi ɛgzampul de afɛkt wi brɔda ɛn sista dɛn we de na jel fɔ wetin dɛn biliv. (Ibru 13:​3) We dɛn kin yɛri se wi de kɔntinyu fɔ sav Jiova pan ɔl we wi gɛt prɔblɛm dɛn, dis kin mek dɛn gɛt fet mɔ ɛn mɔ, gɛt maynd, ɛn kɔntinyu fɔ fetful to Jiova. Dis sem kayn tin bin apin to di apɔsul Pɔl. We i bin de na jel na Rom, i bin de gladi ɛnitɛm i yɛri se in brɔda dɛn de sav Gɔd fetful wan. (Fil. 1:​3-5, 12-14) Pɔl bin rayt in lɛta to di Ibru Kristian dɛn jɔs bifo dɛn pul am na jel ɔ shɔt tɛm afta dat. Insay da lɛta de, Pɔl bin ɛnkɔrej di fetful Kristian dɛn fɔ kɔntinyu fɔ “lɛk” dɛn brɔda dɛn ɛn nɔ fɔ ɛva stɔp fɔ go mitin.—Ibru 10:​24, 25; 13:​1.

10-11. (a) Udat dɛn wi go invayt fɔ go di Mɛmorial? (b) Us rizin Lɛta fɔ Ɛfisɔs 1:​7 (NW) gi wi?

¹⁰ Wi kin sho se wi gɛt maynd we wi invayt wi fambul dɛn, wi wokmet dɛn, ɛn wi neba dɛn fɔ go di Mɛmorial. Wetin mek wi de invayt dɛn pipul dɛn de? Na bikɔs wi rili gladi fɔ wetin Jiova ɛn Jizɔs dɔn du fɔ wi. Wi want dɛn fɔ lan aw dɛnsɛf go bɛnifit frɔm di we aw Jiova sho se i “lɛk wi di kayn we we wi nɔ fit fɔ gɛt,” we i mek Jizɔs day fɔ fri wi frɔm sin ɛn day.—Rid Lɛta fɔ Ɛfisɔs 1:​7, NW; Rɛv. 22:​17.

¹¹ We wi sho se wi gɛt maynd bay we wi de go mitin, wi de sho wan ɔda impɔtant kwaliti we Gɔd ɛn in Pikin dɛnsɛf de sho difrɛn we dɛn.

12. (a) Aw wi mitin dɛn de ɛp wi fɔ lɛk Jiova ɛn Jizɔs mɔ ɛn mɔ? (b) Wetin Sɛkɛn Lɛta Fɔ Kɔrint 5:​14, 15 ɛnkɔrej wi fɔ du so dat wi go falamakata Jizɔs?

¹² Di lɛk we wi lɛk Jiova ɛn Jizɔs go mek wi want fɔ atɛnd mitin. Dɔn, wetin wi de lan na di mitin de mek wi lɛk Jiova ɛn in Pikin mɔ ɛn mɔ. We wi de na di mitin dɛn, dɛn kin mɛmba wi ɔltɛm bɔt wetin Jiova ɛn Jizɔs dɔn du fɔ wi. (Rom 5:​8) Di Mɛmorial de mɛmba wi bɔt aw Jiova ɛn Jizɔs rili lɛk mɔtalman, ivin di wan dɛn we nɔ ɔndastand yet se di day we Jizɔs day fɔ wi rili impɔtant. Bikɔs wi rili gladi fɔ wetin Jizɔs du, wi de tray fɔ falamakata am bay di we aw wi de liv wi layf ɛnide. (Rid Sɛkɛn Lɛta Fɔ Kɔrint 5:​14, 15.) Apat frɔm dat, wi at kin mek wi prez Jiova fɔ we i mek Jizɔs kam day fɔ fri wi frɔm sin ɛn day. Wan we we wi go prez am na bay we wi gi fayn kɔmɛnt frɔm wi at we wi de na mitin.

13. Aw wi go sho se wi rili lɛk Jiova ɛn in Pikin? Ɛksplen.

¹³ Wi go sho se wi rili lɛk Jiova ɛn in Pikin bay we wi rɛdi fɔ lɛf ɛnitin biɛn fɔseka dɛn. Bɔku tɛm, wi kin du dis so dat wi go ebul fɔ atɛnd mitin. Bɔku kɔngrigeshɔn dɛn kin gɛt mitin wan ivintɛm insay di wik, ɛn bɔku tɛm wi kin taya. Wi kin gɛt ɔda mitin wikɛnd we ɔda pipul dɛn de rɛst. Yu fil se Jiova kin notis we wi de atɛnd mitin pan ɔl we wi taya? Yɛs, wi shɔ se i kin notis! Infakt, di mɔ we wi de tray tranga wan, na di mɔ Jiova de gladi fɔ di we aw wi de sho se wi lɛk am.—Mak 12:​41-44.

14. Aw Jizɔs bin sɛt di bɛst ɛgzampul fɔ wi fɔ lɛk ɔda pipul dɛn wit ɔl wi at?

¹⁴ Jizɔs bin sɛt di ɛgzampul fɔ wi bay we i de sho se i lɛk ɔda pipul dɛn wit ɔl in at. I bin rɛdi fɔ day fɔ in disaypul dɛn ɛn fɔ du ɔltin fɔ sho se i bisin bɔt dɛn pas aw i bisin bɔt insɛf. Fɔ ɛgzampul, i bin gɛt mitin wit in disaypul dɛn pan ɔl we i bin taya ɔ in at bin rili pwɛl. (Lyuk 22:​39-46) Ɛn i pe atɛnshɔn pan wetin i go gi ɔda pipul dɛn, nɔto pan wetin dɛn go gi am. (Mat. 20:​28) We wi gɛt strɔng lɔv fɔ Jiova ɛn wi brɔda ɛn sista dɛn, dat go mek wi du ɔl wetin wi ebul fɔ atɛnd di Mɛmorial ɛn ɔl di ɔda mitin dɛn.

15. Udat dɛn mɔ wi want fɔ ɛp?

 ¹⁵ Wi de na di wangren tru Kristian ɔganayzeshɔn, ɛn wi de ɛnjɔy fɔ yuz bɔku pan wi tɛm fɔ invayt nyu wan dɛn fɔ jɔyn wi. Bɔt wi want fɔ ɛp mɔ di wan dɛn we na wi “kɔmpin Kristiɛn dɛn” we dɔn stɔp fɔ prich ɔ fɔ atɛnd di mitin dɛn. (Gal. 6:​10) Wi de sho se wi lɛk dɛn bay we wi de ɛnkɔrej dɛn fɔ atɛnd wi mitin dɛn, mɔ di Mɛmorial. Jɔs lɛk Jiova ɛn Jizɔs, wi rili gladi we di wan dɛn we bin dɔn stɔp fɔ prich ɛn fɔ atɛnd di mitin dɛn kam bak to Jiova, we na wi Papa ɛn Shɛpad we lɛk wi.—Mat. 18:​14.

16. (a) Aw wi go ɛnkɔrej wisɛf? Wetin wi mitin dɛn go du fɔ wi? (b) Wetin mek dis na fayn tɛm insay di ia fɔ mɛmba Jizɔs in wɔd dɛn we de na Jɔn 3:​16?

¹⁶ Insay di wik dɛn we de kam, wi want fɔ invayt bɔku bɔku pipul dɛn fɔ atɛnd di Mɛmorial Frayde, Epril 19, 2019, ivintɛm. (Luk di bɔks we gɛt di taytul “ Yu Go Invayt Dɛn?”) Wi want fɔ kɔntinyu fɔ du ɔl wetin wi ebul fɔ ɛnkɔrej wi kɔmpin Kristian dɛn bay we wi de atɛnd ɔl di mitin dɛn we Jiova de mek fɔ wi. As wi de nia di tɛm fɔ lɛ dis wɔl dɔn, wi mitin dɛn go ɛp wi fɔ kɔntinyu fɔ bi pɔsin we ɔmbul, gɛt maynd, ɛn we de sho lɔv. (1 Tɛs. 5:​8-11) Wi want fɔ sho wit ɔl wi at aw wi fil bɔt Jiova ɛn in Pikin fɔ di we aw dɛn de sho se dɛn rili lɛk wi!—Rid Jɔn 3:​16.