1-3. (a) Wetin mek Jiova bin lɛk Sɔlɔmɔn? Us blɛsin dɛn Sɔlɔmɔn bin gɛt? (b) Us kwɛstyɔn dɛn wi go ansa insay dis atikul?

SƆLƆMƆN bin bi kiŋ na Izrɛl di tɛm we in na bin yɔŋman. We i jɔs bigin fɔ rul, Jiova bin “tɔk to am na drim se lɛ i aks am fɔ ɛnitin we i want, in go gi am.” Sɔlɔmɔn bin ansa se: “Mi na smɔl pikin ɛn a nɔ sabi aw fɔ du di wok. . . . Gi mi sɛns ɛn di kayn at [“at we de obe,” NW] fɔ rul yu pipul dɛn.” (1 Kiŋ 3:​5-10) Fɔ aks fɔ “at we de obe,” de sho se Sɔlɔmɔn bin rili ɔmbul! No wɔnda Jiova bin lɛk Sɔlɔmɔn! (2 Sam. 12:​24) Wi Gɔd bin rili gladi fɔ di ansa we di yɔŋ kiŋ bin gi, ɛn dat bin mek i tɛl Sɔlɔmɔn se “a go mek yu gɛt sɛns ɛn no wetin rayt ɛn wetin rɔŋ.”—1 Kiŋ 3:​12.

² Wans Sɔlɔmɔn kɔntinyu fɔ fetful to Jiova, i go ɛnjɔy bɔku bɔku blɛsin dɛn. I bin gɛt di ɔnɔ fɔ bil di tɛmpul fɔ Jiova in nem we na “Izrɛl dɛn PAPA GƆD.” (1 Kiŋ 8:​20) Ɔlman bin sabi am fɔ di sɛns we Gɔd bin gi am. Ɛn di tin dɛn we Gɔd in spirit bin mek i tɔk de insay tri buk dɛn na di Baybul. Wan pan dɛn na Prɔvabs.

³ Insay di Baybul buk we nem Prɔvabs, dɛn yuz di wɔd at lɛk ɔndrɛd tɛm so na di New World Translation. Fɔ ɛgzampul, na Prɔvabs 4:​23 (NW), wi rid se: “Pan ɔl di tin dɛn we yu fɔ protɛkt, na yu at mɔ yu fɔ protɛkt.” Wetin di wɔd “at” min insay dis vas? Wi go ansa da kwɛstyɔn de insay dis atikul. Wi go tɔk bak bɔt di ansa to tu ɔda kwɛstyɔn dɛn: Aw Setan de tray fɔ kɔrɔpt wi at? Wetin wi go du fɔ protɛkt wi  at? Fɔ kɔntinyu fɔ fetful to Gɔd, wi nid fɔ ɔndastand di ansa to dɛn impɔtant kwɛstyɔn dɛn ya.

4-5. (a) Aw Sam 51:​6, (NW) ɛp wi fɔ ɔndastand wetin di wɔd “at” min? (b) We wi de kia fɔ wi wɛlbɔdi, aw dat ɛp wi fɔ no se wi rili nid fɔ kia fɔ wi at?

⁴ Na Prɔvabs 4:​23 (NW), dɛn yuz di wɔd “at” fɔ min wetin wi bi insay. (Rid Sam 51:​6, NW ɛn futnot.) Di wɔd “at” kin min bak di tin dɛn we wi de tink bɔt, di we aw wi de fil, wetin mek wi kin du tin, ɛn wetin wi want. Na wetin wi rili bi insay nɔtɔ jɔs udat wi luk lɛk.

⁵ Tink bɔt aw wi wɛlbɔdi de sho udat wi rili bi insay. Fɔs, fɔ lɛ wi gɛt wɛlbɔdi, wi fɔ it gud it, ɛn wi nid fɔ de ɛksasayz ɔltɛm. Semweso, fɔ mek wi go kɔntinyu fɔ sav Jiova di rayt we, wi nid fɔ de rid di Baybul, wi buk ɛn magazin dɛn ɔltɛm ɛn fɔ sho se wi gɛt fet pan Jiova ɔltɛm. Wi go sho se wi gɛt fet pan Jiova bay we wi de du wetin wi de lan ɛn tɔk to ɔda pipul dɛn bɔt wetin wi biliv. (Rom 10:​8-10; Jems 2:​26) Sɛkɔn, di we aw wi luk lɛk go mek wi bigin fɔ tink se wi gɛt wɛlbɔdi pan ɔl we i go bi se wi gɛt sik insay wi bɔdi. Semweso, di tin dɛn we wi de du fɔ sav Jiova go mek wi tink se wi fet strɔng, bɔt wi go de tink bɔt bad tin dɛn na wi at. (1 Kɔr. 10:​12; Jems 1:​14, 15) Wi fɔ mɛmba se Setan go want fɔ kɔrɔpt di we aw wi de tink. Us patikyula we i go tray fɔ du dat? Ɛn aw wi go protɛkt wisɛf?

6. Wetin Setan want? Aw i de tray fɔ lɛ wi du wetin i want?

⁶ Setan want wi fɔ tan lɛk am, dat na fɔ lɛ wi tɔn wi bak agens di tin dɛn we Jiova want wi fɔ du ɛn fɔ jɔs bisin bɔt wisɛf nɔmɔ. Setan nɔ ebul fos wi fɔ tink lɛk aw i de tink ɛn du wetin i de du. So i de yuz ɔda we dɛn fɔ du wetin i want. Fɔ ɛgzampul, i de mek wi de arawnd pipul dɛn we i dɔn kɔrɔpt. (1 Jɔn 5:​19) Setan de op se wi go gri fɔ spɛn tɛm wit dɛn pan ɔl we i no se dɛn na bad padi  dɛn we go “pwɛl” ɔ kɔrɔpt di we aw wi de tink ɛn du tin. (1 Kɔr. 15:​33) Da trik de bin wok pan Kiŋ Sɔlɔmɔn. I bin mared bɔku uman dɛn we de wɔship lay lay gɔd dɛn, ɛn smɔl smɔl dɛn uman dɛn de bin ɛnd-ɔp fɔ “lid am astre” frɔm Jiova.—1 Kiŋ 11:​3.

7. Wetin bak Setan de yuz fɔ sho ɔlman di we aw i de tink? Wetin mek wi fɔ tek tɛm?

⁷ Setan de yuz fim dɛn ɛn tɛlivishɔn program dɛn fɔ sho ɔlman di we aw i de tink. I no se stori dɛn nɔ jɔs de mek wi gladi, bɔt dɛn de tich wi aw fɔ tink, fil, ɛn du tin. Jizɔs bin de yuz stori fɔ tich, ɛn i bin de yuz dɛn fayn fɔ tich lɛsin dɛn. Fɔ ɛgzampul, tink bɔt in stori dɛn bɔt di Samɛritan ɛn di bɔypikin we bin kɔmɔt na os ɛn west ɔl di prɔpati we in papa gi am. (Mat. 13:​34; Lyuk 10:​29-37; 15:​11-32) Di wan dɛn we Setan dɔn kɔrɔpt di we aw dɛn de tink kin yuz stori fɔ kɔrɔpt wi bak. Wi nid fɔ tink di rayt we. Fim ɛn tɛlivishɔn program dɛn kin tich wi, ɛn dɛn kin mek wi ɛnjɔy ɛn nɔ kɔrɔpt di we aw wi de tink. Bɔt wi fɔ rili tek tɛm. We wi de pik tin fɔ ɛnjɔy wisɛf, i go fayn fɔ lɛ wi aks wisɛf dis kwɛstyɔn, ‘Fɔ se dis fim ɔ TV program de tich mi se i fayn fɔ du di tin dɛn we mi bɔdi want mi fɔ du?’ (Gal. 5:​19-21; Ɛfi. 2:​1-3) Wetin yu go du if yu si se di program de ɛp fɔ sho di we aw Setan de tink? Na fɔ avɔyd am jɔs lɛk aw yu go avɔyd bad sik we de prɛd!

8. Aw mama ɛn papa dɛn go ɛp dɛn pikin dɛn fɔ protɛkt dɛn at?

⁸ Mama ɛn papa dɛn, una gɛt spɛshal wok fɔ protɛkt una pikin dɛn fɔ lɛ Setan nɔ kɔrɔpt dɛn at. Yu go mɔs du ɔl wetin yu ebul fɔ protɛkt yu pikin dɛn frɔm sik dɛn. Yu go mek di os klin, ɛn yu go trowe ɛnitin we go mek yu ɛn yu pikin dɛn gɛt sik. Semweso, yu nid fɔ protɛkt yu pikin dɛn frɔm fim dɛn, TV  program dɛn, ilɛktronik gem dɛn, ɛn wɛbsayt dɛn we go mek dɛn bigin fɔ tink lɛk aw Setan de tink. Jiova dɔn gi yu di wok fɔ ɛp yu pikin dɛn fɔ bi in padi dɛn. (Prɔv. 1:​8; Ɛfi. 6:​1, 4) So nɔ fred fɔ mek lɔ dɛn we gɛt fɔ du wit wetin di Baybul se fɔ yu famili. Tɛl yu pikin dɛn wetin dɛn fɔ wach ɛn wetin dɛn nɔ fɔ wach, ɛn ɛp dɛn fɔ ɔndastand di rizin we mek yu de du dat. (Mat. 5:​37) As yu pikin dɛn de big, tren dɛn fɔ lan fɔ no wetin rayt ɛn wetin rɔŋ lɛk aw Jiova want wi fɔ du. (Ibru 5:​14) Ɛn mɛmba se yu pikin dɛn go lan mɔ frɔm wetin yu de du pas wetin yu de tɛl dɛn.—Dit. 6:​6, 7; Rom 2:​21.

9. Wetin na wan pan di we dɛn we Setan de mek pipul dɛn tink? Wetin mek i bad?

⁹ Setan de tray bak fɔ kɔrɔpt wi at bay we i de mek wi abop pan mɔtalman sɛns ɛn nɔ abop pan wetin Jiova de tink. (Kɔl. 2:​8) Tink bɔt wan we aw Setan de du dis. Setan de mek pipul dɛn tink se fɔ gɛt jɛntri na di tin we impɔtant pas ɔl na wi layf. Di wan dɛn we de tink dis we kin jɛntri ɔ nɔ jɛntri. Ɛni aw i bi, dɛn de pan denja. Wetin mek? Na bikɔs dɛn kin pe atɛnshɔn mɔ fɔ gɛt mɔni ɛn dat kin mek dɛn sakrifays dɛn wɛlbɔdi, dɛn famili, ɛn ivin dɛn padi biznɛs wit Gɔd jɔs fɔ gɛt wetin dɛn want. (1 Tim. 6:​10) Wi fɔ gladi we wi Papa na ɛvin de ɛp wi fɔ tink di rayt we bɔt mɔni.—Ɛkli. 7:​12; Lyuk 12:​15.

10-11. (a) Wetin wi fɔ du fɔ protɛkt wisɛf? (b) Wetin wachman dɛn bin de du trade trade? Aw wi kɔnshɛns tan lɛk wachman?

¹⁰ Fɔ lɛ wi ebul fɔ protɛkt wi at, wi fɔ ebul fɔ no di tin dɛn we bad ɛn du tin wantɛm wantɛm fɔ protɛkt wisɛf. Di wɔd “protɛkt” we dɛn translet na Prɔvabs 4:​23, (NW) de mek wi tink bɔt di wok we wachman kin du. Insay Kiŋ Sɔlɔmɔn in tɛm, wachman dɛn bin de tinap pantap di wɔl dɛn na di siti fɔ gayd di siti ɛn fɔ anawns to di pipul dɛn we dɛn si dɛn ɛnimi dɛn de kam. We wi imajin dis, dat go ɛp wi fɔ ɔndastand wetin wi fɔ du fɔ stɔp Setan fɔ lɛ i nɔ kɔrɔpt di we aw wi de tink.

¹¹ Trade trade, wachman dɛn bin de wok togɛda wit di getman dɛn. (2 Sam. 18:​24-26) Dɛn ɔl bin de ɛp fɔ protɛkt di siti bay we dɛn bin de mek shɔ se di get dɛn lɔk ɛnitɛm we ɛnimi de kam nia dɛn siti. (Nɛi. 7:​1-3) Wi kɔnshɛns we di Baybul dɔn tren * kin tan lɛk wachman ɛn wɔn wi ɛnitɛm we Setan de tray fɔ kɔrɔpt wi at. Dat min se Setan de tray fɔ kɔrɔpt di we aw wi de tink, fil, wetin mek wi kin du tin, ɔ wetin wi want. Ɛnitɛm we wi kɔnshɛns wɔn wi bɔt bad tin, wi nid fɔ lisin ɛn du ɔl wetin wi ebul fɔ avɔyd di bad tin.

12-13. Wetin wi go want fɔ du? Bɔt wetin wi fɔ du?

¹² Tink bɔt aw wi go protɛkt wisɛf fɔ lɛ Setan nɔ kɔrɔpt di we aw wi de tink. Jiova dɔn tich wi se wi nɔ fɔ “liv fri layf,” ɔ wi nɔ fɔ du “wetin nɔ rayt.” I tɔk bak se “I nɔ gud sɛf fɔ mek una de tɔk bɔt dɛn tin ya to una kɔmpin.” (Ɛfi. 5:​3) Bɔt wetin wi go du if wi wokmet ɔ wi skulmet dɛn stat fɔ tɔk bɔt mami ɛn  dadi biznɛs di we aw Gɔd nɔ want? Wi no se wi fɔ “lɛf fɔ liv lɛkɛ pipul we nɔ no am, wi fɔ lɛf dɛn bad tin we wi want du na di wɔl.” (Tay. 2:​12) Di wachman, we na wi kɔnshɛns, go wɔn wi bɔt bad tin. (Rom 2:​15) Bɔt wi go lisin to wi kɔnshɛns? Sɔntɛm wi go want fɔ lisin to wi kɔmpin dɛn ɔ fɔ luk di pikchɔ dɛn we dɛn de sheb to dɛnsɛf. Bɔt na da tɛm de wi nid fɔ avɔyd bad tin, bay we wi chenj di tɔk ɔ kɔmɔt de.

¹³ Wi nid fɔ gɛt maynd fɔ tinap tranga wan we wi kɔmpin dɛn want wi fɔ du bad, fɔ avɔyd fɔ tink bɔt ɔ fɔ du tin dɛn we nɔ rayt. Wi shɔ se Jiova de si di tray we wi de tray, ɛn i go gi wi di trɛnk ɛn sɛns we wi nid fɔ avɔyd fɔ de tink lɛk aw Setan de tink. (2 Kro. 16:​9; Ayz. 40:​29; Jems 1:​5) Wetin bak wi go du fɔ protɛkt wi at?

14-15. (a) Wetin wi fɔ opin wi at fɔ? Aw wi go du dat? (b) Aw Prɔvabs 4:​20-22 ɛp wi fɔ bɛnifit mɔ frɔm wi Baybul ridin? (Luk bak di bɔks we gɛt di taytul “ Aw fɔ Tink Gud Wan.”)

¹⁴ Fɔ protɛkt wi at, wi nɔ fɔ jɔs avɔyd tin dɛn we go kɔrɔpt wi at bɔt wi fɔ gri bak fɔ du tin dɛn we go protɛkt wi at. Tink bak bɔt di ɛgzampul bɔt di wɔl na di siti. Di getman bin de lɔk di get na di siti fɔ stɔp di ɛnimi dɛn fɔ mek dɛn nɔ ɛnta, bɔt i kin opin di get fɔ alaw it ɛn ɔda tin dɛn fɔ kam insay di siti. If di get nɔ de opin, di pipul dɛn na di siti go day wit angri. Semweso, wi nid fɔ opin wi at ɔltɛm fɔ alaw wisɛf fɔ de tink lɛk aw Gɔd de tink.

¹⁵ Di Baybul sho wi aw Jiova de tink, so ɛnitɛm we wi rid am, wi de alaw di we aw Jiova de tink fɔ afɛkt di we aw wi de tink, fil, ɛn du tin. Aw wi go bɛnifit mɔ frɔm wi Baybul ridin? Fɔ pre na impɔtant tin. Wan Kristian sista tɔk se: “Bifo a rid di Baybul, a kin pre to Jiova fɔ mek i ɛp mi fɔ ‘ɔndastand ɔl di wɔndaful tin dɛn’ we de insay in Wɔd.” (Sam 119:​18) Wi nid bak fɔ tek tɛm tink gud wan bɔt wetin wi dɔn rid. We wi de pre, rid, ɛn tek tɛm tink gud wan, Gɔd in Wɔd go rili tɔch wi at, ɛn wi go kam fɔ lɛk di we aw Jiova de tink.—Rid Prɔvabs 4:​20-22; Sam 119:​97.

16. Aw bɔku pipul dɛn dɔn bɛnifit we dɛn de wach di program dɛn na JW TV?

¹⁶ Wan ɔda we we wi go alaw wisɛf fɔ tink lɛk aw Gɔd de tink na bay we wi de wach di tin dɛn we de na JW TV. Wan man ɛn in wɛf tɔk se: “Di program dɛn we wi kin gɛt ɛni mɔnt dɔn rili ansa wi prea dɛn! Dɛn program dɛn ya dɔn gi wi trɛnk ɛn ɛnkɔrej wi ɛnitɛm we wi at pwɛl ɔ fil se na wi wangren de. Ɛn wi kin ple di orijinal siŋ dɛn ɔltɛm na wi os. Wi kin ple dɛn we wi de kuk, klin, ɔ we wi de drink ti.” Dɛn program dɛn ya de ɛp fɔ protɛkt wi at. Dɛn de tich wi fɔ tink di we aw Jiova de tink ɛn fɔ tinap tranga wan fɔ lɛ wi nɔ tink di we aw Setan de tink.

17-18. (a) Wetin go apin if wi du wetin wi de lan frɔm Jiova jɔs lɛk wetin de na Fɔs Kiŋ 8:​61? (b) Wetin wi lan frɔm Kiŋ Ɛzikaya in ɛgzampul? (c) Frɔm Devid in prea we de na Sam 139:​23, 24, wetin wi de pre fɔ?

¹⁷ Ɛnitɛm wi bɛnifit bikɔs wi du wetin rayt, dat de mek wi gɛt fet mɔ ɛn mɔ. (Jems 1:​2, 3) Wi kin fil gud bikɔs wi dɔn mek Jiova gladi fɔ kɔl wi in pikin dɛn, ɛn na di mɔ wi go want fɔ du tin we go  mek i gladi. (Prɔv. 27:​11) Ɛni tɛst we wi gɛt de gi wi chans fɔ sho se wi rili want fɔ sav wi Papa we bisin bɔt wi. (Sam 119:​113) Wi go pruv se wi lɛk Jiova wit ɔl wi at, dat min se wi rili rɛdi fɔ obe in lɔ dɛn ɛn fɔ du wetin i want.—Rid 1 Kiŋ 8:​61.

¹⁸ Yu tink se wi go de mek mistek? Yɛs, wi nɔ pafɛkt. If wi mek mistek, lɛ wi mɛmba Kiŋ Ɛzikaya in ɛgzampul. Insɛf bin mek mistek dɛn. Bɔt i bin ripɛnt, ɛn kɔntinyu fɔ sav Jiova ‘wit ɔl in at.’ (Ayz. 38:​3-6; 2 Kro. 29:​1, 2; 32:​25, 26) So lɛ wi nɔ alaw Setan fɔ kɔrɔpt di we aw wi de tink. Lɛ wi pre so dat wi go gɛt at we de obe. (1 Kiŋ 3:​9; rid Sam 139:​23, 24.) Wi go kɔntinyu fɔ fetful to Jiova if wi protɛkt wi at pas ɛni ɔda tin.