1-2. (a) Aw di mɛsej we de na Ayzaya 41:​10 (NW) afɛkt wan sista we nem Yushiko? (b) Udat dɛn go bɛnifit frɔm di mɛsej we Jiova bin mek dɛn rayt na Ayzaya 41:​10 (NW)?

WAN fetful sista we nem Yushiko bin yɛri bad nyuz. In dɔktɔ bin tɛl am se i jɔs gɛt sɔm mɔnt fɔ liv. Wetin i bin du? Yushiko bin mɛmba wan Baybul vas we i rili lɛk, dat na Ayzaya 41:​10, NW. (Rid.) Yushiko bin tɛl in dɔktɔ se i nɔ de fred, bikɔs Jiova ol in an tayt. * Di mɛsej we de na da vas we de ɛnkɔrej pɔsin bin ɛp wi sista fɔ abop pan Jiova. Da sem vas de go ɛp wi nɔ fɔ wɔri we wi gɛt siriɔs prɔblɛm dɛn. Fɔ ɛp wi fɔ ɔndastand aw dat go bi, fɔs lɛ wi tɔk bɔt wetin mek Gɔd bin gi dis mɛsej to Ayzaya.

² Fɔs, Jiova bin mek Ayzaya rayt dɛn wɔd dɛn ya fɔ ɛnkɔrej di Ju dɛn we dɛn bin gɛt fɔ kɛr go na Babilɔn as slev. Bɔt Jiova bin mek dɛn kip dis mɛsej fɔ bɛnifit ɔl in pipul dɛn ivin wi we de naw nɔto jɔs fɔ di Ju dɛn we bin de da tɛm de. (Ayz. 40:​8; Rom 15:​4) Tide, wi de na tɛm we tin rili “traŋa,” so na naw wi nid di wɔd dɛn we Ayzaya bin tɔk we go ɛnkɔrej wi.—2 Tim. 3:​1.

3. (a) Us prɔmis de na Ayzaya 41:​10 (NW), we na di iatɛks fɔ 2019? (b) Wetin mek wi nid dɛn prɔmis dɛn ya?

³ Insay dis atikul, wi go tɔk bɔt tri pan Jiova in prɔmis dɛn we de na Ayzaya 41:​10 (NW) we go mek wi gɛt fet mɔ ɛn mɔ. Dɛn prɔmis dɛn ya na: (1) Jiova go de wit wi,  (2) in na wi Gɔd, ɛn (3) i go ɛp wi. Wi nid dɛn prɔmis dɛn * ya bikɔs jɔs lɛk Yushiko, prɔblɛm dɛn kin mit wi. Wi kin gɛt prɔblɛm dɛn bikɔs bad tin dɛn de apin na di wɔl. Sɔm pan wi de ivin bia we pawaful gɔvmɛnt dɛn de mek wi sɔfa. Lɛ wi tɔk bɔt di tri prɔmis dɛn wan bay wan.

4. (a) Wetin na di fɔs prɔmis we wi go tɔk bɔt? (Luk bak di futnot.) (b) Us we dɛn Jiova de sho aw i de fil bɔt wi? (c) Aw di tin dɛn we Gɔd tɔk de afɛkt yu?

⁴ Di fɔs tin we Jiova tɔk fɔ ɛnkɔrej wi na: “Nɔ fred, bikɔs a de wit yu.” * Jiova de sho se i de wit wi bay we i de pe atɛnshɔn to wi ɛn i de sho se i lɛk wi. Notis aw Jiova sho se i rili lɛk wi. I tɔk se: “Yu spɛshal na mi ya, ɛn yu gɛt ɔna, ɛn a lɛk yu.” (Ayz. 43:​4) Natin nɔ de na di wan ol wɔl we go mek i stɔp fɔ lɛk di wan dɛn we de sav am; i nɔ go ɛva kɔmɔt biɛn wi. (Ayz. 54:​10) Di we aw Jiova lɛk wi ɛn di padi biznɛs we wi gɛt wit am kin rili mek wi gɛt kɔrej. I go protɛkt wi tide, jɔs lɛk aw i bin protɛkt Ebram (Ebraam) we na bin in padi. Jiova bin tɛl am se: “Nɔ fred, Ebram. A go kɔba yu.”—Jɛn. 15:​1.

5-6. (a) Aw wi no se Jiova want fɔ ɛp wi wit wi prɔblɛm dɛn? (b) Us lɛsin wi lan frɔm Yushiko in ɛgzampul?

⁵ Wi no se Jiova rili want fɔ ɛp wi we wi gɛt prɔblɛm dɛn bikɔs i prɔmis in pipul dɛn se: “We yu de pas na wata, a go de wit yu; ɛn we yu de pas na dɛn riva, yu nɔ go drawn; we yu waka insay faya, yu nɔ go bɔn ɛn di flem nɔ go kil yu.” (Ayz. 43:​2) Wetin dɛn wɔd dɛn ya min?

⁶ Jiova nɔ prɔmis fɔ pul ɔl di prɔblɛm dɛn we de mek layf nɔ izi fɔ wi, bɔt i nɔ go alaw di prɔblɛm dɛn we tan lɛk “riva” fɔ mek wi drawn ɔ di prɔblɛm dɛn we tan lɛk “flem” fɔ ambɔg wi sote go. I mek wi no klia wan se i go de wit  wi, ɛn ɛp wi fɔ bia wit wi prɔblɛm dɛn. Wetin Jiova go du? I go ɛp wi nɔ fɔ wɔri wit wi prɔblɛm dɛn so dat wi go kɔntinyu fɔ sav am ilɛksɛf we de day. (Ayz. 41:​13) Yushiko we wi bin tɔk bɔt fɔs, bin si se dis na tru. In galpikin bin tɔk se: “Wi rili kɔle di we aw Mama nɔ bin de wɔri. Wi si fɔ tru tru se Jiova gi am kolat. Te di de we Mama day, i bin de tɔk to di nɔs ɛn peshɛnt dɛn bɔt Jiova ɛn di prɔmis dɛn we i dɔn mek.” Wetin wi lan frɔm Yushiko in ɛgzampul? We wi abop pan Gɔd in prɔmis we se “a de wit yu,” wi bak go gɛt maynd ɛn trɛnk fɔ bia wit wi prɔblɛm dɛn.

7-8. (a) Wetin na di sɛkɔn prɔmis we wi go tɔk bɔt? Wetin i min? (b) Wetin mek Jiova bin tɛl di pipul dɛn na Babilɔn se: “Nɔ wɔri”? (c) Us wɔd dɛn we de na Ayzaya 46:​3, 4, (NW) we go dɔn ɛp Gɔd in pipul dɛn nɔ fɔ fred?

⁷ Notis di sɛkɔn prɔmis we Ayzaya bin rayt, we i se: “Nɔ wɔri, bikɔs mi na yu Gɔd.” Wetin dɛn wɔd dɛn ya min? Insay dis vas, di orijinal wɔd fɔ “wɔri,” kin min fɔ luk biɛn bikɔs yu de fred se sɔntin ɔ sɔmbɔdi go du bad tin to yu.

⁸ Wetin mek Jiova bin tɛl di Ju dɛn we dɛn bin kɛr go na Babilɔn nɔ fɔ “wɔri”? Na bikɔs i bin no se di pipul dɛn go fred. Wetin go mek dɛn fred? We di tɛm bin nia fɔ lɛ di 70 ia dɔn frɔm we dɛn kɛr di Ju dɛn na Babilɔn, di pawaful sojaman dɛn na Mɛdo-Pashia go atak Babilɔn. Jiova go yuz dɛn sojaman dɛn ya fɔ fri in pipul dɛn na Babilɔn. (Ayz. 41:​2-4) We di pipul dɛn na Babilɔn ɛn di pipul dɛn na ɔda neshɔn dɛn we bin de da tɛm de bin no se dɛn ɛnimi dɛn de kam, dɛn bin tray fɔ gɛt maynd bay we dɛn bin de tɛl dɛnsɛf se: “Bɔk ɔp!” Dɛn bin mek mɔ lay lay gɔd dɛn ɛn op se dɛn gɔd dɛn ya go protɛkt dɛn. (Ayz. 41:​5-7) Bɔt Jiova bin mek di Ju dɛn nɔ wɔri bay we i bin tɛl dɛn se: “Yu Izrɛl . . . na mi wokman” [nɔto yu neba dɛn], dɔn i tɔk se “nɔ wɔri, bikɔs mi na yu Gɔd.” (Ayz. 41:​8, 9, 10, NW) Notis se Jiova bin tɔk se: “Mi na yu Gɔd.” Jiova bin yuz dɛn wɔd dɛn ya fɔ ɛp in fetful savant dɛn fɔ mek dɛn stɔp fɔ wɔri, i bin mek dɛn no se i nɔ fɔgɛt dɛn; in na bin dɛn Gɔd, ɛn dɛn na in pipul dɛn stil. Jiova bin tɛl dɛn se: “A go gɛt una ɛn sev una.” Dɛn prɔmis dɛn ya go dɔn gi trɛnk to di Ju dɛn we bin de na Babilɔn.—Rid Ayzaya 46:​3, 4, NW.

9-10. Wetin mek nid nɔ de fɔ mek wi fred? Gi ɛgzampul.

⁹ Pipul dɛn we de arawnd wi de wɔri pas aw dɛn bin de wɔri trade bikɔs di bad tin dɛn we de apin na di wɔl de wɔs mɔ ɛn mɔ. Fɔ tru, dɛn sem prɔblɛm dɛn ya de afɛkt wi bak. Bɔt nid nɔ de fɔ mek wi fred. Jiova tɛl wi se: “Mi na yu Gɔd.” Wetin mek dɛn wɔd dɛn ya na gud rizin fɔ mek wi nɔ wɔri?

¹⁰ Tink bɔt dis ɛgzampul: Tu pasenja dɛn, Jim ɛn Bɛn, de insay bɔs we de shek shek bikɔs di rod rili bad. As di bɔs de shek shek, dɛn yɛri di drayva tɔk lawd wan se: “Una sidɔm saful ya. Wi go de na dis bad rod fɔ sɔm tɛm.” Jim bigin fɔ fred pasmak. Bɔt di drayva tɔk bak se: “Una nɔ wɔri. Na una drayva de tɔk.” Jim shek in ed ɛn se, “Uskayn prɔmis dis?” Bɔt i notis se Bɛn nɔ de  fred atɔl. Jim aks am se: “Wetin mek yu nɔ de fred?” Bɛn smayl ɛn tɔk se: “Bikɔs a sabi dis drayva gud gud wan. Na mi papa!” Dɔn Bɛn tɔk se: “Lɛ a tɛl yu bɔt mi papa. A shɔ se we yu sabi am ɛn aw i sabi drayv motoka, yusɛf nɔ go fred.”

11. Us lɛsin wi lan frɔm di ɛgzampul bɔt di tu pasenja dɛn?

¹¹ Us lɛsin dɛn wi lan frɔm dis ɛgzampul? Jɔs lɛk Bɛn, wi nɔ de wɔri bikɔs wi sabi wi Papa we de na ɛvin gud gud wan. Wi no se i go ɛp wi fɔ bia ɛnikayn prɔblɛm we go mit wi insay dis las dez. (Ayz. 35:​4) Wi abop pan Jiova, so wi nɔ kin wɔri, lɛk aw ɔlman na di wɔl de fred pasmak. (Ayz. 30:​15) Jɔs lɛk Bɛn, wi bak kin tɛl wi neba dɛn di tin dɛn we mek wi abop pan Gɔd, so dat dɛnsɛf go biliv se ilɛk us prɔblɛm dɛn gɛt Jiova go sɔpɔt dɛn.

12. (a) Wetin na di tɔd prɔmis we wi go tɔk bɔt? (b) We Ayzaya bin tɔk bɔt Jiova in “an,” wetin dat de mek wi mɛmba?

¹² Tink bɔt di tɔd prɔmis we Ayzaya bin rayt, we i se: “A go gi yu trɛnk, a go ɛp yu.” Ayzaya bin dɔn ɛksplen aw Jiova go gi trɛnk to in pipul dɛn bay we i tɛl dɛn se: “Papa Gɔd we na Gɔd de kam wit pawa, ɛn nain an de rul fɔ am.” (Ayz. 40:​10) Dis de mɛmba wi se Jiova na pawaful Kiŋ. I bin yuz in trɛnk fɔ sɔpɔt in savant dɛn we bin de trade, ɛn tide i de kɔntinyu fɔ gi di wan dɛn we abop pan am trɛnk ɛn i de protɛkt dɛn.—Dit. 1:​30, 31; Ayz. 43:​10.

13. (a) Ustɛm mɔ Jiova de kip in prɔmis fɔ gi wi trɛnk? (b) Us prɔmis de mek wi gɛt trɛnk ɛn kɔnfidɛns?

¹³ Jiova de du wetin i dɔn prɔmis we i se: “A go gi yu trɛnk,” mɔ we wi ɛnimi  dɛn de mek wi sɔfa. Na sɔm pat dɛn na di wɔl tide, wi ɛnimi dɛn de tray tranga wan fɔ stɔp wi prichin wok ɔ ban wi ɔganayzeshɔn. Pan ɔl we dis de bi, wi nɔ kin wɔri tumɔs. Jiova in prɔmis de mek wi gɛt trɛnk ɛn kɔnfidɛns. I prɔmis wi se: “Nɔn wɛpɔn we dɛn mek fɔ kil yu, nɔ go wok.” (Ayz. 54:​17) Dɛn wɔd dɛn ya mek wi mɛmba tri impɔtant tin dɛn.

14. Wetin mek wi nɔ sɔprayz we Gɔd in ɛnimi dɛn de atak wi?

¹⁴ Fɔs, bikɔs wi na Krays in disaypul dɛn, wi no se pipul dɛn go et wi. (Mat. 10:​22) Jizɔs bin tɔk se pipul dɛn go mek in disaypul dɛn sɔfa insay dis las dez. (Mat. 24:​9; Jɔn 15:​20) Sɛkɔn, Ayzaya bin dɔn wɔn wi bifo tɛm se wi ɛnimi dɛn nɔ go jɔs et wi bɔt dɛn go yuz difrɛn wɛpɔn dɛn fɔ fɛt wi. Dɛn wɛpɔn dɛn de na lɛk kɔni kɔni we dɛn fɔ ful pɔsin, bad bad lay, ɛn dɛn de du bad bad tin dɛn fɔ mek wi sɔfa. (Mat. 5:​11) Jiova nɔ go stɔp wi ɛnimi dɛn fɔ mek dɛn nɔ yuz dɛn wɛpɔn dɛn ya fɔ fɛt wi. (Ɛfi. 6:​12; Rɛv. 12:​17) Bɔt wi nɔ nid fɔ fred. Wetin mek?

15-16. (a) Wetin na di tɔd tin we wi nid fɔ mɛmba? Aw Ayzaya 25:​4, 5 sɔpɔt dis? (b) Wetin Ayzaya 41:​11, 12 se go apin to di wan dɛn we de fɛt wi?

¹⁵ Tink bɔt di tɔd tin we wi nid fɔ mɛmba. Jiova bin tɔk se “nɔn wɛpɔn” we dɛn go yuz agens wi “nɔ go wok.” Jɔs lɛk aw fɛns de protɛkt wi frɔm ebi ɛbi ren ɛn briz, na so Jiova go protɛkt wi frɔm “dɛn wan we de du bad ɛn nɔ luk biɛn.” (Rid Ayzaya 25:​4, 5.) Wi ɛnimi dɛn nɔ go ɛva mek wi sɔfa sote go.—Ayz. 65:​17, NW.

¹⁶ Jiova de mek wi gɛt mɔ trɛnk fɔ abop pan am bay we i tɔk klia wan bɔt wetin go apin to di wan dɛn ‘we vɛks pan una bad bad wan.’ (Rid Ayzaya 41:​11, 12.) Ilɛk aw wi ɛnimi dɛn fɛt wi ɔ aw di fɛt nɔ izi fɔ wi, na di sem tin go apin:  Ɔl di wan dɛn we et Gɔd in pipul dɛn go “day.”

17-18. (a) Aw wi go abop pan Gɔd mɔ ɛn mɔ we wi de rid di Baybul? Gi wan ɛgzampul. (b) We wi tek tɛm tink gud gud wan bɔt di iatɛks fɔ 2019, aw dat go ɛp wi?

¹⁷ Wi go abop pan Jiova mɔ ɛn mɔ bay we wi de lan bɔt am gud gud wan. Ɛn di wangren we we wi go lan bɔt Gɔd na bay we wi de tek tɛm rid di Baybul, ɛn tink gud gud wan bɔt wetin wi rid. Di Baybul tɔk tru tin dɛn bɔt aw Jiova bin de protɛkt in pipul dɛn trade. Na dat mek wi biliv tranga wan se Jiova go kia fɔ wi naw.

¹⁸ Tink bɔt di fayn fayn wɔd dɛn we Ayzaya bin yuz fɔ sho aw Jiova de protɛkt wi. I bin se Jiova tan lɛk shɛpad ɛn Gɔd in savant dɛn tan lɛk ship dɛn. Ayzaya bin tɔk bɔt Jiova se: “I go gɛda di ship pikin dɛn nain an, i go bɔn [“kɛr,” NW] dɛm nain buzɔm.” (Ayz. 40:​11) We wi fil Jiova in strɔng an arawnd wi, dat de mek wi fil sef ɛn wi nɔ de wɔri. Fɔ ɛp wi fɔ mek wi nɔ wɔri pan ɔl we prɔblɛm dɛn de mit wi, di slev we fetful ɛn gɛt sɛns dɔn pik Ayzaya 41:​10, (NW) fɔ bi di iatɛks fɔ 2019. I se “Nɔ wɔri, bikɔs mi na yu Gɔd.” Tink gud gud wan bɔt dɛn wɔd ya. Dɛn go gi yu trɛnk fɔ bia di prɔblɛm dɛn we go mit yu tumara bambay.