STƆDI ATIKUL 5
Wi Want fɔ Go wit Yu
“Wi want fɔ go wit yu, bikɔs wi dɔn yɛri se Gɔd de wit una.”—ZƐK. 8:23, NWT.
SIŊ 26 Yu Du Am to Mi
WETIN WI GO LAN? *
Di ɔda ship dɛn (“tɛn man dɛn”) gɛt big big ɔnɔ fɔ wɔship Jiova wit di anɔyntɛd dɛn (“Ju”) (Luk na paregraf 1 ɛn 2)
1. Wetin Jiova bin dɔn tɔk se go apin insay wi tɛm?
JIOVA bin dɔn tɔk se insay wi tɛm: “Tɛn man dɛn frɔm ɔl di langwej dɛn na di wɔl go ol wan Ju in klos, ɛn tɛl am se: ‘Wi want fɔ go wit yu, bikɔs wi dɔn yɛri se Gɔd de wit una.’” (Zɛk. 8:23, NWT) Insay dis vas, di “Ju” tinap fɔ di wan dɛn we Gɔd dɔn anɔynt wit in oli spirit. Dɛn de kɔl dɛn bak “di Izrɛl we na Gɔd in yon.” (Gal. 6:16, NWT) Di “tɛn man dɛn” tinap fɔ di wan dɛn we gɛt op fɔ de na dis wɔl sote go. Dɛn no se Jiova dɔn blɛs di anɔyntɛd wan dɛn ɛn dɛn de si am se na big big ɔnɔ dɛn gɛt fɔ wɔship Jiova wit dɛn.
2. Aw “tɛn man” dɛn go “go wit” di anɔyntɛd dɛn?
2 Pan ɔl we i nɔ pɔsibul fɔ no ɔl di anɔyntɛd Kristian dɛn we de na dis wɔl dɛn nem dɛn wan bay wan, * di wan dɛn we gɛt di op fɔ de na dis wɔl kin “go wit” di anɔyntɛd dɛn. Aw? Di Baybul se dɛn “tɛn man” dɛn ya go “ol wan Ju in klos, ɛn tɛl am se: ‘Wi want fɔ go wit yu, bikɔs wi dɔn yɛri se Gɔd de wit una.’” Dis Baybul vas tɔk bɔt wan Ju. Bɔt “yu” ɛn “una” nɔ jɔs min wan pɔsin insay dis vas. Dis min se dis Ju nɔto jɔs wan pɔsin bɔt i tinap fɔ ɔl di anɔyntɛd Kristian dɛn. Di wan dɛn we nɔto anɔyntɛd de sav Jiova togɛda wit di anɔyntɛd dɛn. Bɔt dɛn nɔ de si di anɔyntɛd Kristian dɛn as dɛn lida dɛn, bikɔs dɛn no se na Jizɔs na dɛn Lida.—Mat. 23:10.
3. Us kwɛstyɔn dɛn wi go ansa na dis atikul?
3 Bikɔs wi stil gɛt sɔm anɔyntɛd Kristian dɛn tide na dis wɔl, sɔm pipul dɛn go de wɔnda se: (1) Aw anɔyntɛd Kristian dɛn fɔ de si dɛnsɛf? (2) Aw wi fɔ trit di wan dɛn we de it di bred ɛn drink di wayn na di Mɛmorial? (3) Wi fɔ wɔri if di wan dɛn we de it di bred ɛn drink di wayn de bɔku mɔ ɛn mɔ? Dis atikul go ansa dɛn kwɛstyɔn dɛn de.
AW ANƆYNTƐD KRISTIAN DƐN FƆ DE SI DƐNSƐF?
4. Us wɔnin we de na Fɔs Lɛta Fɔ Kɔrint 11:27-29 we anɔyntɛd Kristian dɛn fɔ tink siriɔs wan bɔt? Wetin mek?
4 Anɔyntɛd Kristian dɛn fɔ tink siriɔs wan bɔt di wɔnin we de na Fɔs Lɛta Fɔ Kɔrint 11:27-29. (Rid.) Aw anɔyntɛd Kristian go it di bred ɛn drink di wayn “lɛkɛ se dɛn nɔ min natin” na di Mɛmorial? I go du dat if i de it di bred ɛn drink di wayn bɔt i nɔ de du wetin Jiova want. (Ibru. 6:4-6; 10:26-29, NWT) Anɔyntɛd Kristian dɛn no se dɛn fɔ kɔntinyu fɔ du wetin Jiova want if dɛn want fɔ gɛt “di prayz we Gɔd de gi; dat na layf na ɛvin we go de sote go we Gɔd kɔl wi fɔ gɛt wɛn wi gɛt wanwɔd wit Jizɔs Krays.”—Fil. 3:13-16.
5. Aw anɔyntɛd Kristian dɛn fɔ de si dɛnsɛf?
5 Jiova in oli spirit de ɛp in savant dɛn fɔ ɔmbul, i nɔ de mek dɛn prawd. (Ɛfi. 4:1-3; Kol. 3:10, 12) So anɔyntɛd Kristian dɛn nɔ de fil se dɛn bɛtɛ pas ɔda pipul dɛn. Dɛn no se Jiova nɔ de gi mɔ oli spirit to anɔyntɛd Kristian dɛn pas in ɔda savant dɛn. Dɛn nɔ de fil se dɛn ɔndastand di tru tin dɛn we de na di Baybul pas ɔda pipul dɛn. Ɛn dɛn nɔ go ɛva tɛl ɔda pɔsin se insɛf na anɔyntɛd ɛn i fɔ bigin it di bred ɛn drink di wayn na di Mɛmorial. Bifo dat, dɛn de put dɛnsɛf dɔŋ ɛn no se na Jiova nɔmɔ de kɔl pipul dɛn fɔ go de na ɛvin.
6. Frɔm wetin de na Fɔs Lɛta Fɔ Kɔrint 4:7, 8, aw anɔyntɛd Kristian dɛn fɔ biev?
6 Pan ɔl we anɔyntɛd Kristian dɛn fil se na big big ɔnɔ dɛn gɛt fɔ lɛ Gɔd kɔl dɛn fɔ go na ɛvin, dɛn nɔ de tink se pipul dɛn fɔ trit dɛn spɛshal we. (Fil. 2:2, 3) Dɛn no bak se we Jiova anɔynt dɛn, i nɔ mek ɛni ɔda pɔsin no bɔt dat. So anɔyntɛd Kristian nɔ kin sɔprays if sɔm pipul dɛn nɔ biliv wantɛm wantɛm se Gɔd dɔn anɔynt am. I no se di Baybul dɔn tɛl wi se wi nɔ fɔ kwik fɔ biliv ɛnibɔdi we se Gɔd dɔn gi am spɛshal wok fɔ du. (Rɛv. 2:2) Anɔyntɛd Kristian nɔ go tɛl di wan dɛn we i de mit fɔ di fɔstɛm se in na anɔyntɛd, bikɔs i nɔ go want fɔ mek dɛn pe atɛnshɔn pan am. Ɛn i nɔ go bost bɔt dat to ɔda pipul dɛn.—Rid Fɔs Lɛta Fɔ Kɔrint 4:7, 8.
7. Wetin anɔyntɛd Kristian dɛn go avɔyd fɔ du? Wetin mek?
7 Anɔyntɛd Kristian dɛn nɔ de fil se dɛn fɔ jɔs spɛn tɛm wit dɛn kɔmpin anɔyntɛd dɛn lɛk se dɛn ɔl de na wan klɔb. Dɛn nɔ de fɛn fɛn ɔda anɔyntɛd dɛn, so dat dɛn go tɔk bɔt di anɔynt we Gɔd dɔn anɔynt dɛn, ɔ fɔ mek grup fɔ stɔdi di Baybul. (Gal. 1:15-17) If anɔyntɛd Kristian dɛn du dɛn tin dɛn de, di kɔngrigeshɔn nɔ go gɛt wanwɔd. Dɛn go de du tin agens di oli spirit, ɛn na di oli spirit de ɛp Gɔd in pipul dɛn fɔ gɛt pis ɛn wanwɔd.—Rom 16:17, 18.
AW WI FƆ TRIT ANƆYNTƐD KRISTIAN DƐN?
Wi nɔ fɔ trit anɔyntɛd Kristian dɛn ɛn ɔda pipul dɛn we de tek di lid lɛk se dɛn na sɛlibriti dɛn (Luk na paregraf 8) *
8. Wetin mek wi nid fɔ tek tɛm trit di wan dɛn we de it di bred ɛn drink di wayn na di Mɛmorial? (Luk bak di futnot.)
8 Aw wi fɔ trit brɔda ɛn sista dɛn we na anɔyntɛd? I bad fɔ kɔle pɔsin pasmak ilɛksɛf in na Krays in anɔyntɛd brɔda. (Mat. 23:8-12) We di Baybul de tɔk bɔt di ɛlda dɛn, i de ɛnkɔrej wi fɔ “falamakata dɛn fet,” bɔt i nɔ tɛl wi se wi fɔ mek ɛni mɔtalman wi lida. (Ibru. 13:7, NWT) Na tru se di Baybul tɔk se wi fɔ “rili ɔnɔ” di ɛlda dɛn. Bɔt wi de du dat bikɔs dɛn de “wok fayn wan” ɛn dɛn de “wok tranga wan we i kam pan di we aw dɛn de tɔk ɛn tich,” nɔto bikɔs dɛn na anɔyntɛd dɛn. (1 Tim. 5:17, NWT) If wi de prez anɔyntɛd Kristian pasmak ɛn gi dɛn tumɔs atɛnshɔn, wi go mek dɛn shem. * Ɔ di wɔs tin we go apin na dat wi go mek dɛn bigin fil prawd. (Rom 12:3) Wi nɔn nɔ go want fɔ du ɛnitin we go mek wan pan Krays in anɔyntɛd brɔda dɛn mek siriɔs mistek!—Lyuk 17:2.
9. Aw wi go sho se wi rɛspɛkt anɔyntɛd Kristian dɛn?
9 Aw wi go sho se wi rɛspɛkt di wan dɛn we Jiova dɔn anɔynt? Wi go du dat bay we wi nɔ de aks dɛn aw dɛn kam fɔ bi anɔyntɛd. Dat na dɛn yon biznɛs, so wi nɔ gɛt di rayt fɔ no. (1 Tɛs. 4:11; 2 Tɛs. 3:11) Ɛn wi nɔ fɔ tink se dɛn man ɔ dɛn wɛf, dɛn mama ɛn papa dɛn, ɔ dɛn ɔda fambul dɛn bak na anɔyntɛd dɛn. Pɔsin nɔ de gɛt in op fɔ go na ɛvin frɔm in famili. I de gɛt am frɔm Gɔd. (1 Tɛs. 2:12) Wi fɔ avɔyd bak fɔ de aks kwɛstyɔn dɛn we go mek ɔda pipul dɛn fil bad. Fɔ ɛgzampul, wi nɔ fɔ aks di anɔyntɛd brɔda in wɛf bɔt aw i go fil fɔ de na dis wɔl sote go we in man nɔ gɛt fɔ de nia am. Wi biliv tranga wan se insay di nyu wɔl, Jiova go “satisfay” ɔltin we gɛt layf.—Sam 145:16.
10. Aw wi go protɛkt wisɛf if wi avɔyd fɔ kɔle anɔyntɛd Kristian dɛn tumɔs?
10 Wi go protɛkt wisɛf bak, if wi nɔ de trit anɔyntɛd Kristian dɛn lɛk se dɛn impɔtant pas ɔda pipul dɛn. Aw? Di Baybul tɛl wi se sɔntɛm sɔm anɔyntɛd Kristian dɛn nɔ go kɔntinyu fɔ sav Jiova fetful wan. (Mat. 25:10-12; 2 Pit. 2:20, 21) Bɔt if wi avɔyd fɔ kɔle dɛn tumɔs, wi nɔ go ɛva fala ɔda pipul dɛn, ivin di wan dɛn we na anɔyntɛd Kristian dɛn ɔ di wan dɛn we bɔku pipul dɛn sabi ɔ di wan dɛn we dɔn sav Jiova fɔ lɔng tɛm. (Jud 16) Dɔn, if dɛn nɔ fetful to Jiova ɔ lɛf di kɔngrigeshɔn, wi nɔ go stɔp fɔ gɛt fet pan Jiova ɔ stɔp fɔ sav am.
WI NID FƆ WƆRI BƆT DI NƆMBA FƆ DI WAN DƐN WE DE IT DI BRED ƐN DRINK DI WAYN?
11. Wetin dɔn de apin to di nɔmba fɔ di wan dɛn we de it di bred ɛn drink di wayn na di Mɛmorial?
11 Fɔ lɔng tɛm, di nɔmba fɔ di wan dɛn we bin de it di bred ɛn drink di wayn bin dɔn de go dɔŋ. Bɔt dɛn biɛn tɛm ya, di nɔmba de go ɔp ɛvri ia. Yu tink se wi nid fɔ wɔri bɔt dis? Nɔ-o. Lɛ wi tɔk bɔt sɔm impɔtant tin dɛn we wi fɔ de mɛmba.
12. Wetin mek wi nɔ fɔ wɔri bɔt di nɔmba fɔ di wan dɛn we de it di bred ɛn drink di wayn na di Mɛmorial?
12 Jiova “sabi di wan dɛn we nain yon.” (2 Tim. 2:19) I no di wan dɛn we na anɔyntɛd, bɔt di brɔda dɛn we de kɔnt di wan dɛn we de it di bred ɛn drink di wayn na di Mɛmorial nɔ no udat rili na anɔyntɛd. So dɛn kin kɔnt di wan dɛn we tink se dɛn na anɔyntɛd bɔt we rili dɛn nɔ to anɔyntɛd dɛn. Fɔ ɛgzampul, sɔm pan di wan dɛn we bin de it di bred ɛn drink di wayn dɔn stɔp. Ɔda wan dɛn kin gɛt smɔl ed prɔblɛm, we kin mek dɛn nɔ de tink stret ɔ dɛn at kin pwɛl pasmak, so dɛn kin fil se dɛn gɛt fɔ rul wit Krays na ɛvin. Dis dɔn sho klia wan se wi nɔ rili no ɔmɔs anɔyntɛd Kristian dɛn dɔn lɛf na dis wɔl.
13. Di Baybul tɛl wi ɔmɔs anɔyntɛd Kristian dɛn go de na dis wɔl di tɛm we di big big trɔbul go bigin?
13 Anɔyntɛd Kristian dɛn go de na bɔku say dɛn na di wɔl we Jizɔs go kam fɔ kɛr dɛn go na ɛvin. (Mat. 24:31) Di Baybul tɔk se insay di las dez, na smɔl anɔyntɛd wan dɛn go lɛf na dis wɔl. (Rɛv. 12:17) Bɔt i nɔ tɛl wi ɔmɔs anɔyntɛd Kristian dɛn go lɛf na dis wɔl di tɛm we di big big trɔbul go bigin.
Aw wi fɔ biev if sɔmbɔdi de it di bred ɛn drink di wayn na di Mɛmorial? (Luk na paregraf 14)
14. Frɔm wetin de na Lɛta Fɔ Rom 9:11, 16, wetin wi nid fɔ ɔndastand bɔt di we aw Jiova de pik di anɔyntɛd Kristian dɛn?
14 Na Jiova de disayd ustɛm i go pik anɔyntɛd Kristian dɛn. (Rom. 8:28-30) Jiova bin stat fɔ pik anɔyntɛd Kristian dɛn jɔs afta we Jizɔs gɛt layf bak. I tan lɛk se insay di apɔsul dɛn tɛm, ɔlman we na tru Kristian na bin anɔyntɛd. Fɔ lɔng tɛm afta dat, bɔku pan di wan dɛn we se dɛn na Kristian dɛn nɔ bin de rili fala Krays. Bɔt pan ɔl dat, insay dɛn tɛm dɛn de, Jiova bin stil de anɔynt di wan-wan pipul dɛn we na bin tru Kristian dɛn. Dɛn bin tan lɛk di wit we Jizɔs bin tɔk se go gro midul di gras. (Mat. 13:24-30) Insay di las dez, Jiova dɔn kɔntinyu fɔ pik pipul dɛn we go jɔyn di 144,000. * So if Gɔd disayd fɔ pik sɔm pipul dɛn we go go na ɛvin jɔs bifo di ɛnd kam, wi nɔ fɔ dawt di kayn sɛns we i gɛt. (Rid Lɛta Fɔ Rom 9:11, 16.) * Wi fɔ tek tɛm mek wi nɔ biev lɛk di wokman dɛn we Jizɔs bin tɔk bɔt na wan pan in stori dɛn. Dɛn bin kɔmplen bɔt di we aw dɛn masta bin trit di wan dɛn we bigin fɔ wok insay di las awa.—Mat. 20:8-15.
15. Na ɔl di anɔyntɛd Kristian dɛn na di “slev we fetful ɛn gɛt sɛns” we Matyu 24:45-47 (NWT) tɔk bɔt? Ɛksplen.
15 Nɔto ɔl di wan dɛn we gɛt di op fɔ de na ɛvin na “di slev we fetful ɛn gɛt sɛns.” (Rid Matyu 24:45-47, NWT.) Jɔs lɛk insay di fɔstɛm Kristian dɛn tɛm, tide, Jiova ɛn Jizɔs de yuz jɔs smɔl pan di anɔyntɛd brɔda dɛn fɔ fid ɛn tich bɔku bɔku pipul dɛn. Insay di fɔstɛm Kristian dɛn tɛm, na jɔs smɔl pan di anɔyntɛd Kristian dɛn Jiova bin yuz fɔ rayt di Kristian Grik Skripchɔ dɛn. Tide, na jɔs smɔl pan di anɔyntɛd Kristian dɛn Gɔd dɔn gi di wok fɔ gi in pipul dɛn “it di rayt tɛm.”
16. Wetin yu dɔn lan frɔm dis atikul?
16 Wetin wi dɔn lan insay dis atikul? Jiova dɔn disayd fɔ gi bɔku bɔku pipul dɛn layf we go de sote go na dis wɔl. Ɛn i go gi layf we go de sote go na ɛvin to jɔs smɔl pipul dɛn we go rul wit Jizɔs. Jiova de blɛs ɔl in savant dɛn, ɛn i want dɛn ɔl fɔ obe di sem lɔ dɛn ɛn kɔntinyu fɔ sav am fetful wan, ilɛksɛf na “Ju” ɔ di “tɛn man dɛn.” Dɛn ɔl fɔ kɔntinyu fɔ put dɛnsɛf dɔŋ. Dɛn ɔl fɔ sav am togɛda ɛn dɛn fɔ gɛt wanwɔd. Ɛn dɛn ɔl fɔ tray tranga wan fɔ mek pis de insay di kɔngrigeshɔn. As wi de nia di tɛm fɔ lɛ dis wɔl dɔn, lɛ wi ɔl kɔntinyu fɔ sav Jiova ɛn fala Krays as “wan grup.”—Jɔn 10:16, NWT.
^ par. 5 Dis ia, wi go gɛt di Mɛmorial fɔ mɛmba Krays in day wan Tyusde Epril 7. Aw wi fɔ si di wan dɛn we de it di bred ɛn drink di wayn na di Mɛmorial? Wi fɔ wɔri if di wan dɛn we de it di bred ɛn drink di wayn de bɔku mɔ ɛn mɔ? Wi go gɛt di ansa to dɛn kwɛstyɔn dɛn ya insay dis atikul we gɛt sɔntin fɔ du wit wan atikul we de insay di Janwari 2016 Wachtawa.
^ par. 2 Frɔm wetin de na Sam 87:5, 6, sɔntɛm tumara bambay, Gɔd go mek wi no ɔl di wan dɛn we go rul wit Jizɔs na ɛvin dɛn nem dɛn.—Rom 8:19.
^ par. 8 Luk di bɔks we se “Lɔv Nɔ Go Mek Wi Du Tin we Go Mek Pipul dɛn Nɔ Rɛspɛkt Wi” insay di Janwari 2016 Wachtawa.
^ par. 14 Pan ɔl we Di Apɔsul Dɛn Wok [Akt] 2:33 sho se na Jizɔs Jiova de yuz fɔ put in oli spirit pan di wan dɛn we i dɔn pik, na Jiova de kɔl ɛni wan pan dɛn.
^ par. 14 Fɔ no mɔ, rid “Questions From Readers” insay di Me 1, 2007, Wachtawa.
SIŊ 34 A Want Kɔntinyu fɔ Du Wetin Gɔd Want
^ par. 56 SMƆL TIN BƆT DI PIKCHƆ: Imajin if wan ɛdkwata rɛprizɛntetiv ɛn in wɛf go sɔnsay, dɔn pipul dɛn gɛda pan dɛn de tek dɛn pikchɔ dɛn. Dat nɔ sho wan rɛspɛkt!
