1. Aw wan tɔk we Brɔda Rutafɔd bin gi na wan kɔnvɛnshɔn insay 1935 bin afɛkt wan yɔŋman?

WAN famili bin de we na bin Baybul Studɛnt dɛn. Na da nem de dɛn bin de kɔl Jiova Witnɛs dɛn trade. Di mama ɛn papa bin gɛt tri bɔypikin ɛn tu galpikin dɛn, ɛn dɛn bin tich dɛn fɔ sav Jiova Gɔd ɛn falamakata Jizɔs Krays. Wan pan dɛn bɔypikin dɛn bin ol 18 ia we i bin baptayz insay 1926. Jɔs lɛk ɔl di ɔda Baybul Studɛnt dɛn we bin de da tɛm de, dis yɔŋman bin de it di bred ɛn drink di wayn ɛni ia we i atɛnd di Masta in Ivintɛm It. Bɔt wan impɔtant tɔk we bin gɛt di taytul, “The Great Multitude,” bin mek in op chenj. Na Brɔda J. F. Rutafɔd bin gi da tɔk de insay 1935 na wan kɔnvɛnshɔn insay Washington, D.C., na Amɛrika. Wetin di Baybul Studɛnt dɛn bin lan na da kɔnvɛnshɔn de?

2. Us fayn tin we Brɔda Rutafɔd bin ɛksplen na in tɔk?

² Insay di tɔk we Brɔda Rutafɔd bin gi, i bin ɛksplen udat dɛn na di “bɔku bɔku pipul dɛn” we Rɛvɛleshɔn 7:​9 tɔk bɔt. Bifo da de de, di Baybul Studɛnt dɛn bin fil se di bɔku bɔku pipul dɛn na sɔm mɔtalman dɛn we go go na ɛvin, bɔt we nɔ fetful rich di anɔyntɛd Kristian dɛn. Brɔda Rutafɔd bin yuz di Baybul fɔ ɛksplen se Gɔd  nɔ pik dɛn bɔku bɔku pipul dɛn de fɔ go de na ɛvin, bɔt dɛn na Krays in ɔda ship dɛn * we nɔ go day insay “di big big trɔbul,” ɛn dɛn go de na dis wɔl sote go. (Rɛv. 7:​14) Jizɔs bin se: “A gɛt ɔda ship dɛn we nɔ de na dis grup; a go briŋ dɛnsɛf kam, ɛn dɛn go lisin to mi vɔys. Dɛn ɔl go bi wan grup ɛn gɛt wan shɛpad.” (Jɔn 10:​16) Dɛn ɔda ship dɛn ya na Jiova in fetful savant dɛn we gɛt di op fɔ de na Paradays na dis wɔl sote go. (Mat. 25:​31-33, 46) Lɛ wi si aw dis nyu tin we di Baybul Studɛnt dɛn bin lan bin chenj bɔku pan dɛn layf, ivin da 18 ia ol brɔda.—Sam 97:​11; Prɔv. 4:​18.

3-4. Insay di 1935 kɔnvɛnshɔn, wetin bɔku brɔda ɛn sista dɛn bin kam fɔ no bɔt di op we dɛn gɛt? Wetin mek?

³ Wan fayn tin we bin apin na da kɔnvɛnshɔn de na we Brɔda Rutafɔd bin tɛl di ɔdiɛns se: “Duya, ɔl di wan dɛn we gɛt di op fɔ de na dis wɔl sote go, una tinap.” Wan brɔda we bin atɛnd da kɔnvɛnshɔn de se na lɛk 20,000 pipul dɛn bin de de, ɛn i pas 10,000 we bin tinap. Na de Brɔda Rutafɔd se: “Una luk! Na dɛn wan dɛn ya na di bɔku bɔku pipul dɛn!” We i tɔk dat, ɔlman na di ɔdiɛns bigin ala wit gladi-at. Di wan dɛn we bin tinap bin dɔn ɔndastand se Jiova nɔ pik dɛn fɔ go de na ɛvin. Dɛn bin no se Gɔd nɔ anɔynt dɛn wit in oli spirit. Di nɛks de na di kɔnvɛnshɔn, 840 pipul dɛn bin baptayz, ɛn bɔku pan dɛn bin de pat ɔf di ɔda ship dɛn.

⁴ Afta da tɔk de, di yɔŋman we wi bin dɔn tɔk bɔt ɛn bɔku ɔda brɔda ɛn sista dɛn bin lɛf fɔ it di bred ɛn drink di wayn we dɛn bin de atɛnd di Mɛmorial. Bɔku pan dɛn bin fil lɛk wan ɔmbul brɔda we bin se: “Na di Mɛmorial we wi bin gɛt insay 1935 na di las Mɛmorial we a it di bred ɛn drink di wayn. A bin dɔn kam fɔ no se Jiova nɔ bin dɔn yuz in oli spirit fɔ gi mi di op fɔ de na ɛvin. Bifo dat, a bin gɛt di op fɔ de na dis wɔl ɛn ɛp fɔ mek am Paradays.” (Rom. 8:​16, 17; 2 Kɔr. 1:​21, 22) Frɔm da tɛm de, di wan dɛn we na di bɔku bɔku pipul dɛn dɔn ad, ɛn dɛn de wok wit di anɔyntɛd Kristian dɛn we dɔn lɛf na dis wɔl.

5. Aw Jiova de si di wan dɛn we dɔn stɔp fɔ it di bred ɛn drink di wayn na di Mɛmorial?

⁵ Aw Jiova de si di wan dɛn we stɔp fɔ it di bred ɛn drink di wayn na di Mɛmorial afta 1935? Ɛn aw Jiova de si ɛnibɔdi we dɔn baptayz we de it di bred ɛn drink di wayn na di Mɛmorial bɔt we ɔndastand leta se in nɔto anɔyntɛd? (1 Kɔr. 11:​28) Sɔm brɔda ɛn sista dɛn dɔn it di bred ɛn drink di wayn bikɔs dɛn bin fil se dɛn gɛt di op fɔ de na ɛvin. Bɔt if dɛn gri se dɛn mek mistek, dɛn lɛf fɔ it di bred ɛn drink di wayn, ɛn dɛn kɔntinyu fɔ sav Jiova fetful wan, i go stil si dɛn as pat ɔf di ɔda ship dɛn. Pan ɔl we dɛn nɔ de it di bred ɛn drink di wayn igen, dɛn kin stil atɛnd di Mɛmorial bikɔs dɛn rili gladi fɔ wetin Jiova ɛn Jizɔs dɔn du fɔ dɛn.

6. Wetin Jizɔs dɔn tɛl di enjɛl dɛn fɔ du?

⁶ Na smɔl tɛm dɔn lɛf fɔ lɛ di big big trɔbul kam, so i go fayn fɔ lɛ wi tɔk bɔt wetin Rɛvɛleshɔn chapta 7 tɔk bɔt di anɔyntɛd Kristian dɛn ɛn di bɔku bɔku pipul dɛn we de pat ɔf di ɔda ship dɛn. Jizɔs tɛl di enjɛl dɛn lɛ dɛn kɔntinyu fɔ ol di 4 briz dɛn so dat no briz nɔ go blo na di wɔl. Dɛn nɔ fɔ lɛf dɛn 4 briz dɛn de fɔ blo na di wɔl pas te ɔl di anɔyntɛd Kristian dɛn dɔn gɛt dɛn stamp, we min se Jiova dɔn disayd se dɛn fetful. (Rɛv. 7:​1-4) Bikɔs Krays dɛn in anɔyntɛd brɔda dɛn ya go dɔn sho se dɛn fetful, dɛn go bi kiŋ ɛn prist wit am na ɛvin. (Rɛv. 20:​6) Ɔl di wan dɛn we de na Jiova in famili ɔp na ɛvin go rili gladi fɔ si we di 144,000 anɔyntɛd dɛn go jɔyn dɛn na ɛvin.

7. Akɔdin to Rɛvɛleshɔn 7:​9, 10, udat dɛn Jɔn si na in vishɔn, ɛn wetin dɛn bin de du? (Luk di pikchɔ na di frɔnt pej.)

⁷ Afta we Jɔn bin tɔk bɔt dɛn 144,000 kiŋ ɛn prist dɛn ya, i bin si sɔntin we mek i gladi, dat na di “bɔku bɔku pipul dɛn” we nɔ day insay Amagɛdɔn. Dis sɛkɔn grup we i si nɔ tan lɛk di fɔs grup. Di wan dɛn we de na di sɛkɔn grup bɔku, ɛn nɔbɔdi nɔ ebul fɔ kɔnt dɛn. (Rid Rɛvɛleshɔn 7:​9, 10.) Dɛn “wɛr lɔng wayt klos” we min se dɛn “nɔ gɛt wan sten” frɔm Setan in wɔl, ɛn dɛn dɔn kɔntinyu fɔ de biɛn Gɔd ɛn Krays. (Jems 1:​27) Dɛn de ala se Jiova ɛn Jizɔs we na Gɔd in Yɔŋ Ship dɔn sev dɛn. Dɔn bak, dɛn ol pam tik branch dɛn we sho se dɛn gladi fɔ we Jiova pik Jizɔs fɔ bi Kiŋ.—Luk Jɔn 12:​12, 13.

8. Wetin Rɛvɛleshɔn 7:​11, 12 tɛl wi bɔt Jiova in famili we de ɔp na ɛvin?

⁸ Rid Rɛvɛleshɔn 7:​11, 12. Wetin bin apin we di wan dɛn we de na ɛvin si di bɔku bɔku pipul dɛn? Jɔn bin si se ɔl di wan dɛn we de na Jiova in famili ɔp ɛvin bin gladi, ɛn dɛn prez Gɔd we dɛn si di wan dɛn we na di bɔku bɔku pipul dɛn. Di wan dɛn we de na Jiova in famili ɔp ɛvin go gladi we dis vishɔn go kam tru, we di bɔku bɔku pipul dɛn nɔ go day insay di big big trɔbul.

9. Akɔdin to Rɛvɛleshɔn 7:​13-15, wetin di bɔku bɔku pipul dɛn de du naw?

⁹ Rid Rɛvɛleshɔn 7:​13-15. Jɔn rayt se di bɔku bɔku pipul dɛn dɔn “was dɛn lɔng klos insay di Yɔŋ Ship in blɔd ɛn mek dɛn wayt.” Dis min se dɛn gɛt klin kɔnshɛns ɛn dɛn de du tin dɛn we de mek Jiova gladi. (Ayz. 1:​18) Dɛn dɔn gi dɛn layf to Jiova ɛn baptayz. Dɔn bak, dɛn dɔn sho se dɛn gɛt strɔng fet pan Jizɔs in sakrifays ɛn dɛn gɛt tayt padi biznɛs wit Jiova. (Jɔn 3:​36; 1 Pit. 3:​21) So dɛn fit fɔ tinap bifo Gɔd in tron ɛn “wɔship am de ɛn nɛt” na dis wɔl. Rayt naw, dɛn gɛt zil ɛn na dɛn mɔ de prich bɔt di Kiŋdɔm ɛn mek disaypul, bikɔs na Gɔd in Kiŋdɔm impɔtant to dɛn pas ɛni ɔda tin.—Mat. 6:​33; 24:​14; 28:​19, 20.

10. Wetin di bɔku bɔku pipul dɛn shɔ se go apin? Us prɔmis dɛn de wet fɔ si?

¹⁰ Di bɔku bɔku pipul dɛn we nɔ go day insay di big big trɔbul shɔ se Gɔd go kɔntinyu fɔ kia fɔ dɛn bikɔs “di Wan we sidɔm na di tron go put in tɛnt oba dɛn.” Di prɔmis fɔ se, “[Gɔd] go wep ɔl di kray wata na dɛn yay, ɛn day nɔ go de igen, pwɛlat ɛn pen nɔ go de igen, ɛn  dɛn nɔ go kray igen bikɔs dɛn at pwɛl,” go kam tru.—Rɛv. 21:​3, 4.

11-12. (a) Us blɛsin dɛn we Rɛvɛleshɔn 7:​16, 17, se di bɔku bɔku pipul dɛn go gɛt tumara bambay? (b) Wetin di ɔda ship dɛn ebul fɔ du na di Mɛmorial? Wetin mek dɛn de du dat?

¹¹ Rid Rɛvɛleshɔn 7:​16, 17. Rayt naw, sɔm pan Jiova in savant dɛn de sɔfa bikɔs dɛn angri, ɛn dɛn nɔ gɛt bɛtɛ mɔni fɔ bay tin fɔ it. Ɔ sɔm pan dɛn de gɛt prɔblɛm bikɔs dɛn de na say dɛn usay pipul dɛn de fɛt wɔ. Ɔda wan dɛn de na prizin bikɔs ɔf dɛn fet. Bɔt dɛn bɔku bɔku pipul dɛn de gladi pasmak bikɔs dɛn no se afta we Gɔd go dɔn dɔnawe wit dis wikɛd wɔl, dɛn go gɛt bɔku bɔku tin fɔ it ɔltɛm, ɛn dɛn go kɔntinyu fɔ lan bɔt Jiova. We Jiova go de dɔnawe wit Setan dis in wikɛd wɔl, i go mek shɔ se in vɛksteshɔn we tan lɛk “it” nɔ rich di bɔku bɔku pipul dɛn. Afta we di big big trɔbul go dɔn dɔn, Jizɔs go gayd di wan dɛn we nɔ day to “wata dɛn we de gi layf [we go de sote go].” Jɔs tink bɔt dat: Di bɔku bɔku pipul dɛn gɛt wɔndaful op. Pan ɔl di bɔku bɔku pipul dɛn we dɔn ɛva liv, i go bi se dɛn nɔ go ɛva day.—Jɔn 11:​26.

¹² Di ɔda ship dɛn gɛt wɔndaful op we dɛn de tɛl Jiova ɛn Jizɔs tɛnki fɔ. Pan ɔl we Jiova nɔ pik dɛn fɔ go de na ɛvin, i lɛk dɛn jɔs lɛk aw i lɛk di anɔyntɛd dɛn. Di ɔda ship dɛn ɛn di anɔyntɛd dɛn ebul fɔ prez Gɔd ɛn Krays. Wan we aw dɛn de du dat na we dɛn de atɛnd di Masta in Ivintɛm It.

13-14. Wetin mek ɔlman fɔ atɛnd di Mɛmorial fɔ Krays in day?

¹³ Dis biɛn tɛm, we yu kɔnt 1,000 pipul dɛn we kin atɛnd di Mɛmorial, na lɛk 1 pɔsin kin it di bred ɛn drink di wayn. Bɔku kɔngrigeshɔn dɛn nɔ kin gɛt ɛnibɔdi we de it di bred ɛn drink di wayn. Bɔku pan di pipul dɛn we kin atɛnd di Mɛmorial gɛt di op fɔ de na dis wɔl. So wetin mek dɛn de atɛnd di Mɛmorial? Dɛn kin atɛnd fɔ di sem rizin we kin mek pipul dɛn atɛnd dɛn padi in mared. Pipul dɛn kin atɛnd dɛn padi  dɛn mared bikɔs dɛn want fɔ sho se dɛn lɛk dɛn, ɛn dɛn de sɔpɔt dɛn. So di ɔda ship dɛn kin atɛnd di Mɛmorial bikɔs dɛn want fɔ sho se dɛn lɛk Krays ɛn di anɔyntɛd dɛn, ɛn dɛn de sɔpɔt dɛn. Di ɔda ship dɛn kin atɛnd bak fɔ sho se dɛn gladi fɔ Jizɔs in sakrifays, bikɔs na da sakrifays de dɔn mek am pɔsibul fɔ lɛ dɛn go gɛt layf na dis wɔl sote go.

¹⁴ Wan ɔda impɔtant rizin we mek di ɔda ship dɛn de atɛnd di Mɛmorial na fɔ obe Jizɔs in kɔmand. Di fɔs tɛm we Jizɔs bin it da spɛshal it de wit in fetful apɔsul dɛn, i bin tɛl dɛn se: “Una go de du dis fɔ mɛmba mi.” (1 Kɔr. 11:​23-26) So di ɔda ship dɛn go kɔntinyu fɔ atɛnd di Mɛmorial wans sɔm anɔyntɛd Kristian dɛn stil de alayv na dis wɔl. Infakt, di ɔda ship dɛn kin invayt ɔlman fɔ atɛnd di Mɛmorial wit dɛn.

15. Aw wi go prez Gɔd ɛn Krays na di Mɛmorial?

¹⁵ We wi kin atɛnd di Mɛmorial, wi kin gɛt di big big ɔnɔ fɔ prez Gɔd ɛn Krays we wi de siŋ ɛn pre togɛda. Di taytul fɔ di tɔk we dɛn go gi dis ia na “Sho Se Yu Gladi fɔ Wetin Gɔd ɛn Krays Dɔn Du fɔ Yu!” Dis tɔk go ɛp wi fɔ gladi mɔ fɔ wetin Jiova ɛn Krays dɔn du. So we wi gɛt fɔ pas di bred ɛn di wayn, wi go gɛt di chans fɔ tink bɔt wetin dɛn tinap fɔ, dat na Jizɔs in bɔdi ɛn in blɔd. Wi go mɛmba se Jiova bin alaw in Pikin fɔ day fɔ wi so dat wi go gɛt layf. (Mat. 20:​28) Ɔlman we lɛk wi Papa we de na ɛvin ɛn in Pikin go want fɔ atɛnd di Mɛmorial.

16. Aw di anɔyntɛd ɛn di ɔda ship dɛn fiba?

¹⁶ Di anɔyntɛd ɛn di ɔda ship dɛn ɔl impɔtant to Gɔd. I gɛt di sem lɔv fɔ dɛn tu grup dɛn ya. Wi no dis bikɔs na di sem prayz Jiova pe fɔ bay di anɔyntɛd ɛn di ɔda ship dɛn, dat na in Pikin in layf. Di difrɛns we de bitwin dɛn tu grup dɛn ya na di difrɛn op dɛn we dɛn gɛt. Bɔt dɛn ɔl tu fɔ kɔntinyu fɔ de biɛn Gɔd ɛn Krays. (Sam 31:​23) Ɛn mɛmba se Gɔd in spirit de wok pan wi ɔl di sem we. So dis min se Jiova de gi in spirit to pɔsin akɔdin to wetin di pɔsin nid, ilɛk in na anɔyntɛd ɔ ɔda ship.

17. Wetin di anɔyntɛd Kristian dɛn we stil de na dis wɔl de wet fɔ?

¹⁷ Anɔyntɛd Kristian dɛn nɔ bɔn wit di op fɔ go de na ɛvin. Na Gɔd put da op de na dɛn at. Dɛn de tink bɔt dɛn op, pre bɔt am, ɛn dɛn de wet fɔ di tɛm we dɛn gɛt fɔ go de na ɛvin. Dɛn nɔ ivin ebul imajin aw dɛn bɔdi go tan lɛk ɔp ɛvin. (Fil. 3:​20, 21; 1 Jɔn 3:​2) Bɔt  stil, dɛn de gladi fɔ di tɛm we dɛn go si Jiova, Jizɔs, di enjɛl dɛn, ɛn di ɔda anɔyntɛd dɛn. Dɛn de wet fɔ di tɛm we dɛn go jɔyn dɛn na di Kiŋdɔm ɔp ɛvin.

18. Wetin di ɔda ship dɛn de wet fɔ?

¹⁸ Di ɔda ship dɛn gɛt di op fɔ de na dis wɔl sote go. Dis na op we ɔl mɔtalman gɛt. (Ɛkli. 3:​11, NWT) Dɛn de wet fɔ di tɛm we dɛn go ɛp fɔ mek dis wɔl bi Paradays. Dɛn de wet fɔ di tɛm we dɛn go bil dɛn yon os dɛn, plant dɛn gadin, ɛn ɛnjɔy pafɛkt wɛlbɔdi wit dɛn pikin dɛn. (Ayz. 65:​21-23) Dɛn de wet bak fɔ di tɛm we dɛn go de go na bɔku say dɛn na di wɔl fɔ go si di mawntin dɛn, di fɔrɛst dɛn, di si dɛn, ɛn fɔ stɔdi bɔt ɔl di tin dɛn we Jiova dɔn mek. Bɔt di tin we go mek dɛn gladi mɔ na we dɛn go si se dɛn padi biznɛs wit Jiova de kɔntinyu fɔ gro.

19. Wetin di Mɛmorial de gi wi ɔl chans fɔ du? Ustɛm wi go gɛt di Mɛmorial dis ia?

¹⁹ Jiova dɔn gi ɔl in fetful savant dɛn wɔndaful op fɔ tumara bambay. (Jɛr. 29:​11) Di Mɛmorial fɔ Krays in day de gi wi ɔl chans fɔ prez Gɔd ɛn Krays fɔ wetin dɛn dɔn du fɔ wi so dat wi go ɛnjɔy layf we go de sote go. Di Mɛmorial na di mitin we impɔtant pas ɔl di ɔda mitin dɛn we tru Kristian dɛn kin gɛt ɛni ia. Dis ia, wi go gɛt am Satide, Mach 27, 2021 we di san dɔn go dɔŋ. Bɔku pan wi de na say dɛn usay wi gɛt fridɔm fɔ atɛnd dis impɔtant mitin. Sɔm go atɛnd dis mitin pan ɔl we pipul dɛn go mek dɛn sɔfa fɔ dat. Ɔda wan dɛn go atɛnd dis mitin na prizin. As Jiova, Jizɔs, ɛn di ɔda wan dɛn we de na Gɔd in famili ɔp ɛvin go de luk wi, lɛ ɔl di kɔngrigeshɔn dɛn, grup dɛn, ɛn ilɛk na yu wan, ɛnjɔy di Mɛmorial!