1. Wetin sho se lɔv nɔ de insay bɔku famili dɛn tide?

DI BAYBUL bin dɔn tɔk se insay di las dez, pipul dɛn nɔ go “lɛk dɛn kɔmpin mɔtalman.” (2 Tim. 3:​1, 3) Wi de si se dis de apin na di wɔl tide. Fɔ ɛgzampul, bɔku bɔku famili dɛn dɔn skata bikɔs ɔf dayvɔs, ɛn dat dɔn mek di mama ɛn papa dɛn kin vɛks pan dɛnsɛf, ɛn di pikin dɛn kin fil se dɛn mama ɛn papa dɛn nɔ lɛk dɛn. Ivin famili dɛn we kin de togɛda na di sem os kin fiba lɛk dɛn na strenja dɛn. Wan famili kanselɔ bin se: “Di mama, di papa, ɛn di pikin dɛn ɔl kin de na di sem os bɔt dɛn nɔ de tɔk to dɛnsɛf ɛn dɛn nɔ kin spɛn tɛm togɛda bikɔs dɛn kin de yuz dɛn kɔmpyuta, tablɛt dɛn, fon dɛn, ɔ de ple vidio gem. So pan ɔl we dɛn de na di sem os, dɛn nɔ rili sabi dɛnsɛf.”

2-3. (a) Akɔdin to Romans 12:​10, udat dɛn wi fɔ sho se wi lɛk? (b) Wetin wi go tɔk bɔt insay dis atikul?

² Wi fɔ tek tɛm lɛ wi nɔ biev lɛk pipul dɛn na di wɔl we de sho se dɛn nɔ lɛk dɛn kɔmpin dɛn. (Rom. 12:​2) Bɔt wi nid fɔ lan fɔ lɛk pipul dɛn we de na wi famili ɛn wi brɔda ɛn sista dɛn we wi ɔl de na di kɔngrigeshɔn mɔ ɛn mɔ. (Rid Romans 12:​10.) Dis lɔv we wi de tɔk bɔt na di kayn lɔv we pɔsin kin fil fɔ pipul dɛn we de na in famili, ɛn na da kayn lɔv de wi fɔ gɛt fɔ wi Kristian brɔda ɛn sista dɛn. We wi sho lɔv dis kayn we, i de ɛp wi fɔ gɛt di wanwɔd we wi nid fɔ sav Jiova.—Mayk. 2:​12.

³ Fɔ lɛ wi lan fɔ sho dis kayn lɔv, lɛ wi si wetin wi go lan frɔm sɔm Baybul ɛgzampul dɛn.

4. Aw Jems 5:​11 de ɛp wi fɔ no aw Jiova de fil bɔt wi?

⁴ Di Baybul mek wi no Jiova in fayn fayn kwaliti dɛn. Fɔ ɛgzampul, i se “Gɔd na lɔv.” (1 Jɔn 4:​8) Dis fayn we aw di Baybul tɔk bɔt Jiova de mek wi want fɔ bi in padi. Bɔt di Baybul tɔk bak se Jiova “rili lɛk wi.” (Rid Jems 5:​11.) Dis de rili sho di we aw Jiova de fil bɔt wi.

5. Aw Jiova de sho sɔri-at? Aw wi go falamakata am?

⁵ Notis se Jems 5:​11 tɔk se Jiova rili lɛk wi ɛn i gɛt sɔri-at. Dis ɔda kwaliti de mek wi rili want fɔ kam nia Jiova. (Ɛks. 34:​6) Wan we we Jiova de sho sɔri-at na bay we i de fɔgiv wi fɔ di mistek dɛn we wi de mek. (Sam 51:​1) Insay di Baybul, fɔ sho sɔri-at nɔ jɔs min fɔ fɔgiv pɔsin we du yu bad. Bɔt i min bak fɔ fil sɔri fɔ pɔsin we de sɔfa ɛn yu du sɔntin fɔ ɛp am. Jiova se di we aw i want fɔ ɛp wi pas di we aw kombra kin want fɔ ɛp in pikin. (Ayz. 49:​15) We wi gɛt prɔblɛm, Jiova in sɔri-at kin mek i ɛp wi. (Sam 37:​39; 1 Kɔr. 10:​13) Wi kin sho sɔri-at to wi brɔda ɛn sista dɛn bay we wi de fɔgiv dɛn ɛn nɔ kip grɔj agens dɛn we dɛn du wi bad. (Ɛfi. 4:​32) Bɔt wan ɔda impɔtant we we wi go sho sɔri-at na bay we wi go sɔpɔt wi brɔda dɛn we dɛn gɛt prɔblɛm ɔ we tin tranga fɔ dɛn. We lɔv muv wi fɔ sho sɔri-at, wi de sho se wi de falamakata Jiova we dɔn sɛt di bɛst ɛgzampul fɔ sho se i rili lɛk pipul dɛn.—Ɛfi. 5:​1.

6. Aw Jonɛthan ɛn Devid bin sho se dɛn rili lɛk dɛnsɛf?

⁶ Di Baybul gɛt stori dɛn bɔt pipul dɛn we nɔ bin pafɛkt we bin sho se dɛn rili lɛk dɛn kɔmpin. Lɛ wi tɔk bɔt Jonɛthan ɛn Devid dɛn ɛgzampul. Di Baybul se: “Jonɛthan jɛs lɛk Devid in biznɛs ɛn  in at tek am.” (1 Sam. 18:​1) Jiova bin dɔn pik Devid fɔ bi kiŋ afta Sɔl. Sɔl bin jɛlɔs Devid fɔ dat, ɛn i bin tray fɔ kil am. Bɔt Jonɛthan nɔ bin sɔpɔt in papa Sɔl, we i bin de tray fɔ kil Devid. Jonɛthan ɛn Devid bin prɔmis dɛnsɛf se dɛn go kɔntinyu fɔ bi padi, ɛn dɛn nɔ go ɛva kɔmɔt biɛn dɛnsɛf.—1 Sam. 20:​42.

7. Wetin na wan tin we fɔ bin dɔn mek Jonɛthan ɛn Devid nɔ bi padi?

⁷ Di kayn padi biznɛs we bin de bitwin Jonɛthan ɛn Devid go mek pɔsin sɔprayz bikɔs bɔku tin dɛn bin de we fɔ dɔn mek dɛn nɔ bi tayt padi. Fɔ ɛgzampul, Jonɛthan bin big pas Devid fɔ lɛk 30 ia so. Jonɛthan fɔ bin dɔn tink se i nɔ go ebul bi padi to Devid bikɔs i big pas Devid fa fawe, ɛn Devid nɔ gɛt bɛtɛ ɛkspiriɛns. Bɔt stil, Jonɛthan nɔ bin tink bɔt Devid da we de, bifo dat i bin rili rɛspɛkt am.

8. Wetin mek yu tink se Jonɛthan na bin gud padi to Devid?

⁸ Jonɛthan fɔ bin dɔn jɛlɔs Devid. As Kiŋ Sɔl in pikin, i fɔ bin dɔn se paopa na in fɔ bi di nɛks kiŋ afta in papa. (1 Sam. 20:​31) Bɔt Jonɛthan bin ɔmbul, ɛn i bin kɔntinyu fɔ de biɛn Jiova. So i bin sɔpɔt Devid we Jiova dɔn pik fɔ bi di nɛks kiŋ. I nɔ bin kɔmɔt biɛn Devid bak pan ɔl we dat bin mek in papa vɛks pan am.—1 Sam. 20:​32-34.

9. Jonɛthan bin de jɛlɔs Devid? Ɛksplen.

⁹ Jonɛthan bin rili lɛk Devid, so i nɔ bin de jɛlɔs am. Jonɛthan bin gɛt maynd, i bin dɔn fɛt bɔku wɔ dɛn, ɛn i bin rili sabi yuz bo ɛn aro. Pipul dɛn bin sabi in ɛn in papa fɔ bi pipul dɛn we “fast lɛk laytin ɛn trɔŋ lɛk babu bon.” (2 Sam. 1:​22, 23) So Jonɛthan fɔ bin dɔn blɔf bɔt ɔl di tin dɛn we i bin dɔn du we sho se i gɛt maynd. Bɔt i nɔ bin tray fɔ jɛlɔs Devid ɔ mek kɔmpitishɔn wit am. Bifo dat, Jonɛthan bin de kɔle Devid bikɔs i gɛt maynd ɛn i abop pan Jiova. Infakt, na afta we Devid bin kil Golayath na da tɛm de Jonɛthan bin bigin fɔ lɛk am. Aw wi go sho se wi rili lɛk wi brɔda ɛn sista dɛn dis kayn we?

10. Wetin i min fɔ “rili lɛk [wi] kɔmpin dɛn wit ɔl [wi] at”?

¹⁰ Di Baybul se wi fɔ “rili lɛk [wi] kɔmpin dɛn wit ɔl [wi] at.” (1 Pit. 1:​22) Jiova dɔn sɛt di ɛgzampul fɔ wi. I so lɛk wi dat if wi nɔ kɔmɔt biɛn am, natin nɔ go mek i lɛf fɔ lɛk wi. (Rom. 8:​38, 39) Di Grik wɔd we dɛn yuz fɔ “rili” na da vas de min se wi fɔ strɛch ɔ ivin stren wisɛf. Sɔntɛnde, wi kin rili nid fɔ “strɛch” ɔ “stren” wisɛf fɔ sho se wi rili lɛk wi brɔda ɛn sista dɛn. If ɔda pipul dɛn du sɔntin we mek wi vɛks, wi fɔ alaw lɔv fɔ mek wi bia wi kɔmpin dɛn. ‘Wi fɔ tray tranga wan fɔ mek di wanwɔd we di spirit dɔn mek wi gɛt kɔntinyu bay we wi gɛt pis wit wi kɔmpin dɛn.’ (Ɛfi. 4:​1-3) If wi tray tranga wan fɔ gɛt “pis” wit wi brɔda ɛn sista dɛn, wi nɔ go de pe atɛnshɔn to dɛn mistek dɛn. Bifo dat, wi go tray tranga wan fɔ si dɛn di we aw Jiova de si dɛn.—1 Sam. 16:​7; Sam 130:​3.

11. Wetin kin mek sɔntɛnde i nɔ izi fɔ mek wi sho se wi rili lɛk wi brɔda ɛn sista dɛn?

¹¹ I nɔ kin izi ɔltɛm fɔ sho se wi rili lɛk wi brɔda ɛn sista dɛn, mɔ we wi no bɔt dɛn mistek dɛn. Dis kayn tin bin de apin insay di fɔstɛm Kristian dɛn tɛm. Fɔ  ɛgzampul, i go bi se Yuodia ɛn Sintiki nɔ bin gɛt prɔblɛm fɔ “wok tranga wan wit [Pɔl] fɔ di gud nyuz.” Bɔt fɔ sɔm rizin we wi nɔ no, dɛn nɔ bin de pul. So Pɔl bin ɛnkɔrej dɛn se lɛ dɛn “tink di sem we we dɛn de sav di Masta.”—Fil. 4:​2, 3.

12. Aw wi go sho se wi rili lɛk wi brɔda ɛn sista dɛn?

¹² Aw wi go sho se wi rili lɛk wi brɔda ɛn sista dɛn tide? We wi tray fɔ sabi wi brɔda ɛn sista dɛn gud gud wan, sɔntɛm i go izi fɔ mek wi ɔndastand dɛn ɛn sho se wi rili lɛk dɛn. Wi kin bi dɛn padi ilɛksɛf wi ɛn dɛn nɔ gɛt di sem ej ɔ dɛn kɔmɔt difrɛn say. Mɛmba se Jonɛthan bin big pas Devid fɔ lɛk 30 ia, bɔt stil Devid na bin in tayt padi. Pɔsin de na yu kɔngrigeshɔn we yu big pas ɔ we big pas yu we yu ɛn in go bi padi? If yu bi padi to dɛn kayn pipul dɛn de, yu de sho se yu lɛk “ɔl [wi] brɔda dɛn.”—1 Pit. 2:​17.

13. Wetin mek wi nɔ go bi tayt padi to ɔlman na di kɔngrigeshɔn?

¹³ Fɔ se we wi rili lɛk wi brɔda ɛn sista dɛn dat min se wi go bi tayt padi to ɔlman na di kɔngrigeshɔn? Nɔ, dat nɔ go pɔsibul. I nɔmal fɔ mek wi bi tayt padi to sɔm pipul dɛn pas ɔda wan dɛn, bikɔs wi ɛn dɛn pipul dɛn de lɛk di sem tin. Jizɔs bin kɔl ɔl in apɔsul dɛn in “padi dɛn,” bɔt i bin rili lɛk Jɔn. (Jɔn 13:​23; 15:​15; 20:​2) Bɔt Jizɔs nɔ bin de trit Jɔn lɛk se i bɛtɛ pas di ɔda apɔsul dɛn. Fɔ ɛgzampul, we Jɔn ɛn in brɔda Jems bin aks Jizɔs fɔ gi dɛn ay pozishɔn na Gɔd in Kiŋdɔm, Jizɔs bin tɛl dɛn se: “Nɔto mi gɛt di sidɔmples na mi raytan ɛn lɛftan we fɔ mek a gi una.” (Mak 10:​35-40) Fɔ sho se wi de falamakata Jizɔs, wisɛf nɔ fɔ trit wi tayt padi lɛk se dɛn bɛtɛ pas ɔda brɔda ɛn sista dɛn na di kɔngrigeshɔn. (Jems 2:​3, 4) If wi du dat, i go mek wanwɔd nɔ de na di Kristian kɔngrigeshɔn.—Jud 17-19.

14. Akɔdin to Filipians 2:​3, wetin go ɛp wi fɔ lɛ wi nɔ mek kɔmpitishɔn wit wi brɔda ɛn sista dɛn?

 ¹⁴ We wi sho se wi rili lɛk wi brɔda ɛn sista dɛn, wi de mek kɔmpitishɔn nɔ de insay di kɔngrigeshɔn. Mɛmba se Jonɛthan nɔ bin mek kɔmpitishɔn wit Devid, ɛn i nɔ bin jɛlɔs am bikɔs na in bin fɔ bi di nɛks kiŋ. Wi ɔl kin falamakata Jonɛthan in ɛgzampul. Wi nɔ fɔ jɛlɔs wi brɔda ɛn sista dɛn bikɔs ɔf wetin dɛn ebul fɔ du, ‘bɔt wi fɔ put wisɛf dɔŋ ɛn tink se ɔda pipul dɛn bɛtɛ pas wi.’ (Rid Filipians 2:​3.) Wi fɔ mɛmba se ɔlman gɛt sɔntin we i de du fɔ ɛp di kɔngrigeshɔn fɔ go bifo. We wi put wisɛf dɔŋ, wi de ebul fɔ si di gud kwaliti dɛn we wi brɔda ɛn sista dɛn gɛt ɛn wi kin bɛnifit frɔm dɛn fetful ɛgzampul.—1 Kɔr. 12:​21-25.

15. Wetin yu lan frɔm wetin bin apin to Tanya ɛn in famili?

¹⁵ We bad tin apin to wi, Jiova kin sho se i rili lɛk wi bay we i de yuz wi brɔda ɛn sista dɛn fɔ ɛnkɔrej wi ɛn gi wi di tin dɛn we wi nid. Lɛ wi tɔk bɔt wetin bin apin to wan famili we gɛt tri pikin dɛn afta we dɛn atɛnd di Satide program na wan pan wi “Lɔv Nɔ De Ɛva Fel!” Intanashɔnal Kɔnvɛnshɔn dɛn na Amɛrika. Di mama we nem Tanya bin se: “We wi bin de drayv bak fɔ go na wi otɛl, wan ɔda motoka bin lɔs kɔntrol ɛn kam bang wi. Nɔbɔdi nɔ bin wund, bɔt wi bin shɔk so wi kɔmɔt insay di motoka ɛn kam tinap na rod. Wan wi ɔda brɔda we bin jɔs kɔmɔt na di kɔnvɛnshɔn bin de na di ɔda len de mek sayn to wi fɔ lɛ wi kam  na in motoka. Ɛn nɔto in nɔmɔ bin stɔp. Fayv ɔda brɔda ɛn sista dɛn frɔm Swidin dɛnsɛf bin stɔp. Di sista dɛn ɔg mi ɛn mi galpikin, ɛn na dat wi bin rili nid. A tɛl dɛn se wi oke natin nɔ du wi, bɔt dɛn bin stil de wit wi. Dɛn bin kɔntinyu fɔ de wit wi ivin afta we di ambyulans pipul dɛn kam, ɛn dɛn mek shɔ se wi bin gɛt ɔl wetin wi nid. Wi bin rili si se Jiova de wit wi. Dis tin we apin to wi mek wi lɛk Jiova ɛn wi brɔda ɛn sista dɛn mɔ ɛn mɔ.” Yu mɛmba ɛnitɛm we yu bin nid ɛp ɛn yu brɔda ɔ sista du sɔntin fɔ sho se i rili lɛk yu?

16. Us rizin dɛn fɔ mek wi sho se wi rili lɛk wi kɔmpin dɛn?

¹⁶ Tink bɔt di gud tin dɛn we kin apin we wi sho se wi rili lɛk wi kɔmpin. Wi de kɔrej wi brɔda ɛn sista dɛn we dɛn gɛt prɔblɛm. Wi de ɛp wi brɔda ɛn sista dɛn fɔ gladi we dɛn de sav Jiova. Wi de sho se wi na Jizɔs in disaypul dɛn, ɛn dis de mek pipul dɛn we rili want fɔ no di tru de jɔyn wi fɔ sav Jiova di rayt we. Bɔt apat frɔm ɔl dat, wi de ɔnɔ Jiova we na “di Papa we rili gɛt sɔri-at ɛn di Gɔd we de kɔrej pɔsin pan ɔltin.” (2 Kɔr. 1:​3) Lɛ wi ɔl mekɔp wi maynd fɔ kɔntinyu fɔ sho se wi rili lɛk wi brɔda ɛn sista dɛn!