1. Lɛk Kiŋ Devid, us kwɛstyɔn we sɔm pan wi kin aks Jiova?

WI ƆL want fɔ gɛt kolat ɛn pis. Nɔbɔdi nɔ lɛk fɔ wɔri. Bɔt sɔntɛnde, wi kin wɔri pasmak. Infakt, sɔm pan Jiova in savant dɛn kin aks di sem kwɛstyɔn we Kiŋ Devid bin aks Jiova. I bin se: “Aw lɔŋ a nɔ go de slip bɔt sidɔm nɔmɔ fɔ tɔn tiŋs ova na mi maynd?”—Sam 13:​2.

2. Wetin wi go tɔk bɔt insay dis atikul?

² Pan ɔl we tɛm kin kam we wi kin wɔri, tin dɛn de we wi kin ebul du fɔ lɛ wi nɔ wɔri pasmak. Insay dis atikul, wi go tɔk fɔs bɔt sɔm tin dɛn we kin mek wi wɔri. Dɔn wi go tɔk bɔt siks tin dɛn we wi kin du fɔ lɛ wi nɔ wɔri we wi gɛt prɔblɛm.

3. Wetin na sɔm tin dɛn we kin mek wi wɔri? Wi go ebul stɔp dɛn tin dɛn de fɔ apin?

³ Bɔku tin dɛn kin mek wi wɔri, ɛn wi nɔ kin ebul stɔp sɔm pan dɛn tin dɛn de fɔ apin. Fɔ ɛgzampul, wi nɔ ebul mek di prayz fɔ it, klos, ɛn os nɔ kɔntinyu fɔ go ɔp ɛni ia. Ɛn wi nɔ ebul kɔntrol di we aw wi wokmet ɔ skulmet dɛn go tray fɔ tɛmt wi fɔ lɛ wi nɔ ɔnɛs ɔ fɔ du mami ɛn dadi biznɛs di we aw Gɔd nɔ want. Dɔn bak, wi nɔ ebul mek pipul dɛn stɔp fɔ kɔmit kraym na wi eria. Wi kin gɛt dɛn prɔblɛm dɛn ya bikɔs wi de na wɔl usay bɔku pipul dɛn nɔ de fala Baybul prinsipul dɛn. Setan, we na di gɔd fɔ dis wɔl no se sɔm pipul dɛn go alaw “di wɔri  wɔri we de naw” fɔ stɔp dɛn fɔ sav Jiova. (Mat. 13:​22; 1 Jɔn 5:​19) Na dat mek wi nɔ sɔprayz we di wɔl ful-ɔp wit prɔblɛm dɛn we de mek pipul dɛn wɔri pasmak.

4. Wetin kin apin if wi de wɔri tumɔs bɔt wi prɔblɛm dɛn?

⁴ Wi kin so wɔri bɔt sɔm prɔblɛm dɛn dat wi nɔ kin ebul fɔ tink bɔt ɛni ɔda tin igen. Fɔ ɛgzampul, sɔntɛm wi go wɔri se wi nɔ go ebul fɔ gɛt mɔni fɔ bay di tin dɛn we wi nid, ɔ sɔntɛm wi go wɔri se wi go sik ɛn wi nɔ go ebul fɔ go wok, ɔ wi go ivin lɔs wi wok. Ɔ sɔntɛm wi go wɔri bak se wi nɔ go kɔntinyu fɔ fetful to Jiova if dɛn tɛmt wi fɔ du bad tin. Di tɛm nɔ de fa igen fɔ lɛ Setan mek di wan dɛn we i de kɔntrol atak Gɔd in pipul dɛn, so sɔntɛm wi go de wɔri bɔt wetin wi go du we dɛn atak wi. Wi go de tink to wisɛf se, ‘I bad fɔ mek a wɔri bɔt dɛn kayn tin dɛn ya?’

5. Wetin Jizɔs bin min we i se: “Una lɛf fɔ wɔri”?

⁵ Wi no se Jizɔs bin tɛl in disaypul dɛn se: “Una lɛf fɔ wɔri.” (Mat. 6:​25) Fɔ se Jizɔs bin de tray fɔ se wi nɔ fɔ wɔri bɔt ɛnitin? Nɔ, nɔto dat i min. Infakt, sɔm pan Jiova in fetful savant dɛn we bin de trade bin de wɔri bɔt sɔm tin dɛn, bɔt Jiova bin stil gladi wit dɛn. * (1 Kiŋ 19:​4; Sam 6:​3) Jizɔs bin de tray fɔ kɔrej wi. I nɔ bin want fɔ lɛ wi de wɔri pasmak bɔt di tin dɛn we wi nid te wi nɔ kɔntinyu fɔ pe atɛnshɔn pan wi savis to Jiova. So wetin wi go du we wi de wɔri?—Luk di bɔks we se “ Wetin Wi Go Du?”

6. Akɔdin to Filipians 4:​6, 7, wetin go ɛp wi fɔ lɛ wi nɔ wɔri?

⁶ (1) Pre ɔltɛm. Ɛnitɛm we yu de wɔri bɔt yu prɔblɛm, pre to Jiova fɔ lɛ i ɛp yu. (1 Pit. 5:​7) Jiova go ansa yu prea bay we i go gi yu “di pis we Gɔd de gi we mɔtalman nɔ ebul ɔndastand.” (Rid Filipians 4:​6, 7.) Jiova go yuz in pawaful oli spirit fɔ gi yu di pis we go mek yu nɔ wɔri igen.—Gal. 5:​22.

7. Wetin wi fɔ mɛmba we wi de pre to Gɔd?

⁷ We yu de pre to Jiova, tɛl am ɔltin we de na yu at. Tɛl am bɔt di patikyula prɔblɛm we de mɔna yu, ɛn ɛksplen aw di prɔblɛm de mek yu fil. If i go pɔsibul fɔ lɛ yu du sɔntin fɔ sɔlv yu prɔblɛm, aks am fɔ lɛ i gi yu di sɛns ɛn trɛnk we yu nid fɔ du am. If yu nɔ go ebul fɔ sɔlv yu prɔblɛm, pre to Jiova fɔ lɛ i ɛp yu lɛ yu nɔ wɔri bɔt am pasmak. We yu pre to Jiova bɔt di patikyula tin dɛn we de mɔna yu, tɛm go kam we yu go ebul fɔ si se i dɔn ansa yu prea dɛn. If Jiova nɔ ansa yu prea wantɛm wantɛm, nɔ stɔp fɔ pre. Jiova nɔ jɔs want fɔ mek yu tɛl am bɔt di patikyula tin we de mɔna yu, bɔt i want mek yu kɔntinyu fɔ pre.—Lyuk 11:​8-10.

8. Wetin wi fɔ ad pan wi prea dɛn?

⁸ We yu de pre to Jiova bɔt wetin de mek yu wɔri, nɔ fɔgɛt fɔ de tɛl am tɛnki bak. I fayn fɔ lɛ wi tink bɔt ɔl di gud tin dɛn we wi gɛt, pan ɔl we wi go gɛt bɔku prɔblɛm dɛn we de mɔna wi. If i bi se yu nɔ rili no wetin fɔ tɛl Jiova, mɛmba se Jiova kin ansa wi prea dɛn ilɛksɛf wi jɔs tɛl am se, ‘Duya ɛp mi!’—2 Kro. 18:​31; Rom. 8:​26.

9. Wetin wi fɔ du we wi de fred?

 ⁹ (2) Abop pan Jiova in sɛns, nɔto yu yon. Insay prɔfɛt Ayzaya in tɛm, di pipul dɛn na Juda bin de fred se i Asirian dɛn go atak dɛn. So bikɔs dɛn nɔ bin want fɔ de ɔnda di Asirian dɛn, dɛn bin aks di Ijipshian dɛn fɔ ɛp dɛn. (Ayz. 30:​1, 2) Jiova bin tɛl dɛn se da tin de we dɛn du go mek prɔblɛm mit dɛn. (Ayz. 30:​7, 12, 13) Jiova bin yuz Ayzaya fɔ tɛl di pipul dɛn bɔt wetin dɛn go du fɔ mek dɛn nɔ fred. I bin se: “Una go gɛt trɛnk we una nɔ wɔri ɛn we una abop pan” Jiova.—Ayz. 30:​15b, NWT.

10. Wetin na sɔm tin dɛn we go apin we wi go nid fɔ sho se wi abop pan Jiova?

¹⁰ Ustɛm wi go sho se wi abop pan Jiova? Lɛ wi tɔk bɔt sɔm ɛgzampul dɛn. Wetin yu go du if dɛn gi yu wok we go mek yu gɛt mɔ mɔni, bɔt we go mek yu yuz bɔku pan yu tɛm ɛn nɔ alaw yu fɔ sav Jiova lɛk aw yu de du rayt naw? Ɔ wetin yu go du if yu wokmet we nɔ de sav Jiova tɛl yu se i want yu? Ɔ imajin se yu fambul we yu lɛk tɛl yu fɔ pik bitwin in ɛn Jiova. If ɛni wan pan dɛn tin dɛn ya de apin to yu, i nɔ go izi fɔ lɛ yu no wetin fɔ disayd, bɔt mɛmba se Jiova go sho yu wetin yu nid fɔ du. (Mat. 6:​33; 10:​37; 1 Kɔr. 7:​39) Di kwɛstyɔn we yu fɔ aks yusɛf na, Yu go abop pan Jiova ɛn du wetin i tɛl yu fɔ du?

11. Us stori dɛn de na di Baybul we go ɛp wi fɔ lɛ wi nɔ wɔri we ɔda pipul dɛn de mek wi sɔfa?

¹¹ (3) Lan frɔm gud ɛn bad ɛgzampul dɛn. Di Baybul gɛt bɔku stori dɛn we de sho se i rili impɔtant fɔ lɛ wi nɔ wɔri ɛn lɛ wi abop pan Jiova. As yu de stɔdi dɛn stori dɛn ya, tink bɔt wetin bin ɛp Gɔd in savant dɛn fɔ lɛ dɛn nɔ wɔri we ɔda pipul dɛn bin mek dɛn rili sɔfa. Fɔ ɛgzampul, we di pipul dɛn na di Sanɛndrin bin tɛl di apɔsul dɛn lɛ dɛn lɛf fɔ prich, dɛn nɔ bin fred. Bifo dat, di apɔsul dɛn bin tɛl dɛn se: “Na Gɔd wi fɔ obe as rula, nɔto mɔtalman.” (Akt 5:​29) Ɛn di apɔsul dɛn nɔ bin fred ivin we dɛn bit dɛn. Wetin mek? Na bikɔs dɛn bin no se Jiova de sɔpɔt dɛn. I bin gladi fɔ wetin dɛn de du. So dɛn bin kɔntinyu fɔ prich di gud nyuz. (Akt 5:​40-42) Dɔn bak, we dɛn bin want fɔ kil Stivin, i nɔ bin wɔri atɔl. Infakt, in fes bin “tan lɛk enjɛl fes.” (Akt 6:​12-15) Wetin mek? Na bikɔs i bin shɔ se i dɔn mek Jiova gladi.

12. Akɔdin to 1 Pita 3:​14 ɛn 4:​14, wetin mek wi fɔ gladi we pipul dɛn de mek wi sɔfa?

¹² Di apɔsul dɛn bin gɛt klia pruf fɔ se Jiova bin de wit dɛn. I bin dɔn gi dɛn di pawa fɔ pafɔm mirekul dɛn. (Akt 5:​12-16; 6:​8) Bɔt wi nɔ de pafɔm mirekul dɛn tide. Stil, Jiova de yuz in Wɔd fɔ mek wi no se we pipul dɛn de mek wi sɔfa bikɔs wi de du wetin rayt, wi de mek i gladi ɛn in spirit de wit wi. (Rid 1 Pita 3:​14; 4:​14.) So bifo wi de wɔri bɔt wetin wi go du if pipul dɛn mek wi sɔfa tumara bambay, wi nid fɔ pe atɛnshɔn pan wetin wi go du naw fɔ mek wi gɛt mɔ kɔnfidɛns se Jiova go ebul fɔ sɔpɔt ɛn sev wi. Jɔs lɛk di disaypul dɛn we bin de trade, wi fɔ abop pan Jizɔs in prɔmis we i se: “A go tɛl una wetin fɔ tɔk ɛn gi una sɛns we go mek ɔl di wan dɛn we de agens una nɔ go ebul fɔ agyu ɔ tɔk ɛnitin.” Jizɔs bin prɔmis wi se: “We una  bia, una go sev una layf.” (Lyuk 21:​12-19) Ɛn lɛ wi nɔ ɛva fɔgɛt se Jiova kin mɛmba ɔltin bɔt in fetful savant dɛn we dɔn day. I go yuz dɛn tin dɛn de we i de mɛmba bɔt dɛn, fɔ gi dɛn layf bak.

13. We wi stɔdi bɔt di wan dɛn we bin de wɔri ɛn we nɔ bin abop pan Jiova, aw dat go bɛnifit wi?

¹³ Wi kin lan bak frɔm di wan dɛn we bin de wɔri ɛn we nɔ bin abop pan Jiova. We wi lan bɔt dɛn bad ɛgzampul, dat go ɛp wi fɔ lɛ wi nɔ mek di sem mistek we dɛn bin mek. Fɔ ɛgzampul, Esa bin abop pan Jiova we bɔku bɔku Itiopian sojaman dɛn bin atak am, ɛn Jiova bin blɛs am bay we I mek i win dɛn. (2 Kro. 14:​9-12) Leta, Kiŋ Beasha na Izrɛl we nɔ bin gɛt bɔku sojaman dɛn bin atak Esa. Bɔt dis tɛm, Esa nɔ bin abop pan Jiova fɔ sev am lɛk aw i bin dɔn du di ɔda tɛm. Bɔt i bin pe di Sirian dɛn fɔ ɛp am. (2 Kro. 16:​1-3) Ɛn we di tɛm bin de kam nia fɔ lɛ i day, i bin sik siriɔs wan. Bɔt i nɔ bin abop pan Jiova fɔ ɛp am.—2 Kro. 16:​12.

14. Wetin wi kin lan frɔm Esa in mistek dɛn?

¹⁴ We Esa bin jɔs bi kiŋ, i bin de abop pan Jiova fɔ ɛp am we i gɛt prɔblɛm. Bɔt i nɔ bin kɔntinyu fɔ abop pan Jiova, bifo dat i bin de tray fɔ sɔlv in prɔblɛm dɛn fɔ insɛf. Fɔs, i bin tan lɛk se Esa in plan fɔ aks di Sirian dɛn mek dɛn ɛp am bin luk mek sɛns. Bɔt di pis we i bin gɛt nɔ bin las. Jiova bin yuz in prɔfɛt fɔ tɛl am se: “Bikɔs yu abop pan di Kiŋ na Siria, ɛn yu nɔ bin abop pan PAPA GƆD [“Jiova,” NWT] we na yu Gɔd, di kiŋ na Siria in ami dɔn kɔmɔt biɛn yu.” (2 Kro. 16:​7) Wi fɔ tek tɛm lɛ wi nɔ fil se wi go ebul sɔlv wi prɔblɛm dɛn fɔ wisɛf ɛn nɔ abop pan Jiova fɔ yuz in Wɔd fɔ gayd wi. Ilɛksɛf na smɔl tɛm wi gɛt fɔ disayd bɔt sɔntin, wi fɔ abop pan Jiova ɛn nɔ wɔri, i go ɛp wi fɔ disayd fɔ du di rayt tin.

15. Wetin na sɔm tin dɛn we i go fayn fɔ du we wi de rid di Baybul?

¹⁵ (4) Kram sɔm skripchɔ dɛn. We yu si skripchɔ dɛn we de sho se i rili impɔtant fɔ lɛ wi nɔ wɔri ɛn lɛ wi abop pan Jiova, i go fayn fɔ kram dɛn skripchɔ dɛn de. Sɔntɛm i go fayn fɔ mek yu rid di skripchɔ dɛn lawd wan ɔ rayt dɛn sɔnsay ɛn tray fɔ de go ova dɛn bak ɔltɛm. Jiova bin tɛl Jɔshwa fɔ de rid di buk usay di Lɔ de ɔltɛm so dat i go du tin wit sɛns. Di tin dɛn we i bin de rid na di Lɔ bin fɔ ɛp am fɔ lɛ i nɔ fred, bɔt lɛ i gɛt maynd fɔ lid Gɔd in pipul dɛn. (Jɔs. 1:​8, 9) Bɔku skripchɔ dɛn we de na di Baybul go ɛp yu fɔ lɛ yu nɔ wɔri ivin we di tin dɛn we de apin to yu fɔ mek yu wɔri ɔ fred.—Sam 27:​1-3; Prɔv. 3:​25, 26.

16. Aw Jiova kin yuz di kɔngrigeshɔn fɔ ɛp wi fɔ lɛ wi nɔ wɔri ɛn fɔ lɛ wi abop pan am?

¹⁶ (5) Spɛn tɛm wit Gɔd in pipul dɛn. Jiova de yuz wi brɔda ɛn sista dɛn fɔ ɛp wi lɛ wi nɔ wɔri ɛn lɛ wi abop pan am. We wi kin go mitin, wi kin bɛnifit frɔm di tɔk dɛn we wi kin lisin, di kɔmɛnt dɛn we wi brɔda ɛn sista dɛn kin gi, ɛn we dɛn kin tɔk fayn to wi fɔ ɛnkɔrej wi. (Ibru. 10:​24, 25) Wi tayt padi dɛn na di kɔngrigeshɔn kin ɛnkɔrej wi bak we wi tɛl dɛn bɔt di tin dɛn we de mek wi wɔri. Di gud wɔd we wi padi dɛn kin tɛl wi kin ɛp wi fɔ lɛ wi nɔ de wɔri pasmak.—Prɔv. 12:​25..

17. Akɔdin to Ibruz 6:​19, aw wi Kiŋdɔm op go ɛp wi fɔ lɛ wi nɔ wɔri we wi gɛt prɔblɛm?

 ¹⁷ (6) Nɔ fɔgɛt bɔt di op we yu gɛt. Wi Kiŋdɔm op “tan lɛk ankɔ fɔ wi layf,” we de ɛp wi fɔ lɛ wi nɔ wɔri we wi gɛt prɔblɛm. (Rid Ibruz 6:​19.) Tink gud wan bɔt wetin Jiova dɔn prɔmis wi fɔ tumara bambay. Da tɛm de, nɔbɔdi nɔ go de wɔri bɔt ɛnitin igen. (Ayz. 65:​17) Imajin se yu de na Paradays, usay no bad tin nɔ gɛt fɔ de apin. (Mayk. 4:​4) We yu tɛl ɔda pipul dɛn bɔt di nyu wɔl, dat go ɛp yu fɔ gɛt mɔ fet pan di op we yu gɛt. Du yu bɛst fɔ prich ɛn mek disaypul. If yu du dat, yu “go gɛt op ɛn nɔ gɛt wan dawt te di ɛnd.”—Ibru. 6:​11.

18. Wetin wi de ɛkspɛkt fɔ apin tumara bambay, bɔt wetin go ɛp wi?

¹⁸ As wi de nia di tɛm fɔ mek di wɔl dɔn, wi go gɛt mɔ prɔblɛm dɛn we go mek wi wɔri. Wi iatɛks fɔ 2021 go ɛp wi fɔ lɛ wi bia dɛn prɔblɛm dɛn de ɛn lɛ wi nɔ wɔri. Wi nɔ go ebul fɔ du dat bay wisɛf, bɔt Jiova go ɛp wi if wi abop pan am. Insay dis ia, lɛ di tin dɛn we wi de du sho se wi gɛt fet pan Jiova in prɔmis we se: “Una go gɛt trɛnk we una nɔ wɔri ɛn we una abop pan mi.”—Ayz. 30:​15.