WAN ston de na di Bible Lands Museum insay Jerusɛlɛm usay dɛn bin rayt sɔm tin dɛn arawnd di ia 700 ɛn 600 bifo Krays. Dɛn bin fɛn da ston de na wan kev usay dɛn bin de bɛr pipul dɛn we nɔ de fa frɔm Ɛbrɔn na Izrɛl. Dɛn bin rayt na di ston se: “Lɛ Yawɛ Sabaɔt swɛ Agaf we na Agav in bɔypikin.” Aw dis tin we dɛn rayt na di ston de sɔpɔt di Baybul? Trade trade, dɛn bin de spɛl Gɔd in nem Jiova wit Ibru lɛta dɛn we na YHWH. Dis tin we dɛn rayt na di ston de sho se bɔku pipul dɛn bin sabi dis nem, ɛn dɛn bin de yuz am di tɛm we dɛn bin de rayt di Baybul. Infakt, ɔda raytin dɛn we dɛn bin si na di kev dɛn de sho se di pipul dɛn we bin de go mit ɛn ayd na dɛn kev dɛn de bin de rayt Gɔd in nem bɔku tɛm na di wɔl dɛn. Ɛn dɛn bin de rayt ɔda nem dɛn we fiba Gɔd in nem.

We Dɔktɔ Rechɛl Nabulsi we de wok na di University of Georgia bin de tɔk bɔt dɛn tin dɛn ya we dɛn rayt, i bin se: “We dɛn bin de yuz di nem YHWH bɔku tɛm, dat de tich wi impɔtant tin. . . . Dɛn raytin dɛn ya de sho se Jiova bin rili impɔtant to di pipul dɛn na Izrɛl ɛn Juda.” Dis sɔpɔt di Baybul we gɛt Gɔd in nem we dɛn rayt as YHWH wit Ibru lɛta dɛn bɔku bɔku tɛm. Jiova in nem bin de pat ɔf bɔku pipul dɛn nem dɛn trade.

Di wɔd dɛn “Yawɛ Sabaɔt,” we dɛn rayt na di ston, min “Jiova we gɛt bɔku bɔku sojaman dɛn.” So i tan lɛk se di pipul dɛn we bin de insay di tɛm we dɛn bin de rayt di Baybul bin de yuz Gɔd in nem ɛn di wɔd dɛn “Jiova we gɛt bɔku bɔku sojaman dɛn,” bɔku tɛm. Dis sɔpɔt di Baybul bak we gɛt di wɔd dɛn “Jiova we gɛt bɔku bɔku sojaman dɛn,” 283 tɛm na di Ibru Skripchɔ dɛn. Ɛn i de mɔ insay di buk dɛn we Ayzaya, Jɛrimaya, ɛn Zɛkaraya rayt.