1. Wetin bin apin to Devid we nɔ bin izi?

DEVID bin de rɔn fɔ in layf. Sɔl na bin pawaful kiŋ na Izrɛl we bin want fɔ kil am. We Devid bin nid tin fɔ it, i bin pas na wan siti we nem Nɔb, usay i bin beg Aimilɛk fɔ gi am fayv bred nɔmɔ. (1 Sam. 21:​1, 3) Leta, in ɛn in man dɛn bin go de na wan kev. (1 Sam. 22:​1) Wetin mek dis bin apin to Devid?

2. Us bad bad tin dɛn Sɔl bin du? (Fɔs Samiɛl 23:​16, 17)

² Sɔl bin de jɛlɔs Devid bad bad wan bikɔs pipul dɛn bin lɛk Devid, ɛn dɛn bin de prez am bikɔs i dɔn win bɔku fɛt dɛn. Sɔl bin no bak se Jiova nɔ bin want am igen fɔ kɔntinyu fɔ bi kiŋ bikɔs i nɔ bin de obe Am, ɛn Jiova bin dɔn pik Devid fɔ bi kiŋ. (Rid Fɔs Samiɛl 23:​16, 17.) Bɔt Sɔl na bin di kiŋ na Izrɛl stil, ɛn i bin gɛt bɔku sojaman dɛn ɛn bɔku pipul dɛn we bin de sɔpɔt am, so Devid bin gɛt fɔ rɔnawe fɔ in layf. Fɔ se Sɔl rili tink se i go ebul fɔ stɔp Gɔd fɔ lɛ i nɔ mek Devid kiŋ? (Ayz. 55:​11) Di Baybul nɔ se dat, bɔt wi shɔ bɔt wan tin: Sɔl bin de put insɛf pan denja. Di wan dɛn we kin de agens Gɔd nɔ kin ɛva win!

3. Aw Devid bin de fil pan ɔl we i bin gɛt prɔblɛm dɛn?

³ Devid na man we bin ɔmbul. I nɔ bin pik insɛf fɔ bi di kiŋ na Izrɛl. Na Jiova bin pik am fɔ bi kiŋ. (1 Sam. 16:​1, 12, 13) Sɔl bin de si Devid as in ɛnimi. Bɔt Devid nɔ bin blem Jiova we in layf bin de pan denja, ɛn i nɔ bin kɔmplen we i nɔ bin gɛt bɛtɛ tin fɔ it ɛn we  i bin de ayd na kev. Bɔt, sɔntɛm i go bi se na we i bin de ayd na da kev de i bin rayt di fayn siŋ fɔ prez Jiova, we gɛt sɔm wɔd dɛn we de na di tim tɛks we se: “Di wan dɛn we de luk fɔ Jiova go gɛt ɔl wetin dɛn nid.”—Sam 34:​10, NWT.

4. Us kwɛstyɔn dɛn wi go tɔk bɔt? Wetin mek dɛn impɔtant?

⁴ Tide, bɔku pan Jiova in savant dɛn nɔ kin gɛt bɛtɛ tin fɔ it ɔ ɔda tin dɛn we dɛn nid fɔ liv. * Dis dɔn apin to bɔku pan Jiova in savant dɛn, mɔ insay di tɛm we di pandɛmik de. Ɛn tin dɛn gɛt fɔ tranga mɔ we wi de nia di tɛm fɔ da “big big trɔbul.” (Mat. 24:​21) As wi de tink bɔt dat, lɛ wi ansa 4 kwɛstyɔn dɛn: Aw Devid bin ‘gɛt ɔl wetin i nid’? Wetin mek wi fɔ lan fɔ satisfay wit wetin wi gɛt? Wetin mek wi fɔ gɛt kɔnfidɛns se Jiova go kia fɔ wi? Ɛn aw wi go rɛdi naw fɔ di bambay?

5-6. Aw Sam 23:​1-6 ɛp wi fɔ ɔndastand wetin Devid min we i se Gɔd in savant dɛn “go gɛt ɔl wetin dɛn nid”?

⁵ Wetin Devid bin min we i se Jiova in savant dɛn “go gɛt ɔl wetin dɛn nid”? Wi go ebul fɔ ɔndastand wetin Devid min bay we wi tink bɔt di wɔd dɛn we i rayt na Sam 23 we fiba dɛn wɔd dɛn de. (Rid Sam 23:​1-6.) Devid bin bigin da sam de wit di wɔd dɛn we se: “Mi PAPA GƆD [“Jiova,” NWT] na lɛkɛ man we de mɛn ship. Natin nɔ de we a nid, we a nɔ go gɛt.” Insay di balans wɔd dɛn we Devid bin tɔk na di sam, i bin tɔk bɔt tin dɛn we rili impɔtant, lɛk di gud tin dɛn we Jiova bin gi am bikɔs i bin gri fɔ mek Jiova bi in Shɛpad. Jiova bin de sho am aw fɔ “waka tret na layf,” ɛn I bin de biɛn Devid fɔ sɔpɔt am di tɛm we tin bin fayn ɛn di tɛm we tin bin bad. Devid bin no se prɔblɛm go  mɔs mit am, pan ɔl we Jiova go kɛr am go usay i “nɔ go yagba fɔ natin.” Sɔntɛnde, in at go pwɛl, ɛn i se dat go tan lɛk we i ‘de pan trɔbul we kin mek i skayd,’ ɛn i go gɛt ɛnimi dɛn. Bɔt bikɔs Jiova na in Shɛpad, Devid “nɔ go fred” natin.

⁶ So dis na di ansa to wi kwɛstyɔn: Aw Devid bin ‘gɛt ɔl wetin i nid’? I bin gɛt ɔl wetin i nid fɔ kɔntinyu fɔ de nia Jiova. I nɔ bin nid fɔ gɛt bɔku prɔpati fɔ mek i gladi. Devid bin satisfay wit di tin dɛn we Jiova bin de gi am. Wetin bin impɔtant to am mɔ na we in Gɔd bin de blɛs ɛn protɛkt am.

7. Akɔdin to Lyuk 21:​20-24, us prɔblɛm dɛn di Kristian dɛn na Judia bin gɛt?

⁷ Frɔm di tin dɛn we Devid bin tɔk, wi si se i rili impɔtant fɔ mek wi nɔ alaw prɔpati fɔ impɔtant to wi pas ɔl ɔda tin. Fɔ tru, wi go ɛnjɔy ɛni prɔpati we wi gɛt, bɔt wi nɔ fɔ alaw dɛn fɔ bi di tin we impɔtant pas ɔl ɔda tin na wi layf. Dat na bin wan tru tin we di fɔstɛm Kristian dɛn na Judia bin kam fɔ ɔndastand. (Rid Lyuk 21:​20-24.) Jizɔs bin dɔn wɔn dɛn se tɛm go kam we “sojaman dɛn [go] de rawnd Jerusɛlɛm.” We dat apin, dɛn bin nid fɔ “bigin rɔn go na di mawntin dɛn.” If dɛn rɔnawe kɔmɔt na di siti, dɛn go kɔntinyu fɔ liv, bɔt dɛn go lɛf bɔku tin dɛn biɛn. Wan Wachtawa bin se: “Dɛn bin lɛf dɛn fam ɛn os dɛn, dɛn nɔ bin ivin gɛda dɛn prɔpati na dɛn os dɛn. Bikɔs dɛn bin gɛt kɔnfidɛns se Jiova go protɛkt ɛn sɔpɔt dɛn, dɛn bin put dɛn wɔship bifo ɛni ɔda tin we bin luk impɔtant.”

8. Us impɔtant lɛsin wi lan frɔm wetin bin apin to di fɔstɛm Kristian dɛn na Judia?

⁸ Us impɔtant lɛsin wi kin lan frɔm wetin bin apin to di fɔstɛm Kristian dɛn na Judia? Di Wachtawa we wi jɔs tɔk bɔt bin se: “Sɔntɛm tumara bambay, wi go gɛt tɛst dɛn we go sho aw wi de tink bɔt prɔpati. Fɔ se na fɔ gɛt prɔpati impɔtant to wi pas ɔl, ɔ na di sev we Gɔd gɛt fɔ sev di wan dɛn we de sɔpɔt am? As di ɛnd de kam, wi go gɛt fɔ bia bɔku prɔblɛm dɛn ɛn mek bɔku sakrifays dɛn. Wi gɛt fɔ rɛdi fɔ du ɛnitin we wi nid fɔ du, lɛk di Kristian dɛn we bin rɔnawe kɔmɔt na Judia.” *

9. Aw di advays we Pɔl bin gi di Ibru Kristian dɛn de ɛnkɔrej yu?

⁹ Yu ebul imajin aw i nɔ bin izi fɔ dɛn Kristian dɛn de fɔ lɛf ɔlmost ɔl wetin dɛn gɛt ɛn go stat nyu layf na nyu ples? Dɛn bin nid fɔ gɛt fet fɔ abop se Jiova go ɛp dɛn fɔ gɛt di tin dɛn we dɛn nid. Bɔt sɔntin bin de we go ɛp dɛn. Fayv ia bifo di Roman sojaman dɛn bin sɔrawnd Jerusɛlɛm, apɔsul Pɔl bin gi di Ibru Kristian dɛn wan impɔtant advays we se: “Lɛ di we aw una de liv una layf sho se una nɔ lɛk mɔni, ɛn una satisfay wit di tin dɛn we de naw. Bikɔs i dɔn tɔk se: ‘A nɔ go ɛva lɛf yu, ɛn a nɔ go ɛva lɛf fɔ ɛp yu.’ So dat wi go gɛt maynd ɛn tɔk se: ‘Na Jiova de ɛp mi; a nɔ go fred. Wetin mɔtalman ebul du mi?’” (Ibru. 13:​5, 6) I bin izi fɔ mek di wan dɛn we bin lisin to Pɔl in advays satisfay wit di simpul layf we dɛn bin de liv na di nyu ples we dɛn go. Dɛn bin shɔ se Jiova go kia fɔ di tin dɛn we  dɛn nid fɔ liv. Di wɔd dɛn we Pɔl bin tɔk sho se wisɛf kin gɛt kɔnfidɛns se Jiova go gi wi di tin dɛn we wi nid.

10. Us “sikrit” Pɔl tɛl wi?

¹⁰ Pɔl bin gi dis sem advays to Timoti, ɛn da advays de, de bak fɔ wi tide. I bin rayt se: “So we wi gɛt tin fɔ it ɛn klos, wi go satisfay wit dɛn tin ya.” (1 Tim. 6:​8) Fɔ se dis min se wi nɔ go ɛnjɔy swit it dɛn, gɛt fayn ples fɔ de, ɔ bay nyu klos dɛn frɔm tɛm to tɛm? Nɔto dat Pɔl bin de tray fɔ se. Pɔl bin de se wi fɔ satisfay wit ɛnitin we wi gɛt. (Fil. 4:​12) Na dat na bin Pɔl in “sikrit.” Di tin we fɔ rili impɔtant to wi na wi padi biznɛs wit wi Gɔd, nɔto di prɔpati we wi gɛt.—Aba. 3:​17, 18.

11. Us lɛsin wi lan bɔt fɔ satisfay wit di tin dɛn we wi gɛt frɔm wetin Mozis bin tɛl di Izrɛlayt dɛn?

¹¹ Wetin wi kin tink se wi nid kin difrɛn frɔm wetin Jiova no se wi nid. Lɛ wi tɔk bɔt wetin Mozis bin tɛl di Izrɛlayt dɛn afta dɛn dɔn waka fɔ lɛk 40 ia na di wildanɛs. “Mozis mɛmba dɛn se PAPA GƆD [“Jiova,” NWT] bin de blɛs ɔltin we dɛn bin de du ɛn ɔl di fɔti ia we dɛn de waka, dɛn nɔ slip aŋri wande; I bin de du ɔltin fɔ dɛn we dɛn bin de na di [wildanɛs].” (Dit. 2:​7) Insay da 40 ia de, Jiova bin de gi di Izrɛlayt dɛn mana fɔ it. Jiova bin de mek shɔ se dɛn klos dɛn nɔ  pwɛl. So dɛn go stil kɔntinyu fɔ yuz di klos we dɛn bin gɛt we dɛn kɔmɔt na Ijipt. (Dit. 8:​3, 4) Pan ɔl we sɔm pan di Izrɛlayt dɛn go dɔn tink se dɛn tin dɛn de nɔ du fɔ dɛn, Mozis bin mɛmba dɛn se dɛn gɛt ɔl wetin dɛn nid. Jiova go gladi if wi lan fɔ satisfay wit di tin dɛn we wi gɛt. I want fɔ mek wi sho tɛnki fɔ ivin di simpul tin dɛn we i dɔn gi wi ɛn fɔ ɔndastand se na gift frɔm am.

12. Wetin sho se na Jiova Devid bin abop pan, nɔto insɛf?

¹² Devid bin no se Jiova nɔ de kɔmɔt biɛn in savant dɛn we lɛk Am, ɛn I rili bisin bɔt dɛn. Pan ɔl we Devid in layf bin de pan denja we i bin de rayt Sam 34, i bin gɛt strɔng fet pan Jiova we bin mek i shɔ se “PAPA GƆD [“Jiova,” NWT] in enjɛl de rawnd” am. (Sam 34:​7) Sɔntɛm Devid bin de kɔmpia Jiova in enjɛl to sojaman we kamp na fil, we ɔltɛm i de wach fɔ si if ɛnimi dɛn de kam. Devid na bin sojaman we gɛt maynd, ɛn Jiova bin dɔn prɔmis am se i go bi kiŋ, bɔt Devid nɔ bin abop pan insɛf bikɔs i bin sabi aw fɔ sɛn ston ɔ aw fɔ yuz sɔd fɔ win in ɛnimi dɛn pan fɛt. (1 Sam. 16:​13; 24:​12) Devid bin abop pan Gɔd ɛn gɛt kɔnfidɛns se Jiova in enjɛl de ‘sev di wan dɛn we de fred Am.’ Fɔ tru, wi nɔ de ɛkspɛkt se Jiova go yuz mirekul tide fɔ protɛkt wi. Bɔt wi no se ɔl di wan dɛn we de abop pan Jiova go gɛt layf we go de sote go, ilɛksɛf dɛn day naw.

13. We Gɔg we de na Megɔg go atak Gɔd in pipul dɛn, wetin mek dɛn go tink se wi wik? Wetin mek wi nɔ fɔ fred? (Luk di pikchɔ na di frɔnt pej.)

¹³ I nɔ go te igen, sɔntin go tɛst wi fet we go sho if wi de abop pan Jiova. We Gɔg we de na Megɔg, dat na ɔl di neshɔn dɛn, go kam togɛda fɔ atak Gɔd in pipul dɛn, sɔntɛm wi go tink se dɛn go kil wi. Wi go nid fɔ biliv tranga wan se Jiova ebul fɔ sev wi, ɛn i go sev wi. To di neshɔn dɛn, wi go tan lɛk ship dɛn we nɔ gɛt shɛpad fɔ protɛkt wi. (Izi. 38:​10-12) Wi nɔ go gɛt wɛpɔn dɛn, ɛn wi nɔ go tren fɔ fɛt. Di neshɔn dɛn go tink se i go izi fɔ mek dɛn dɔnawe wit wi. Dɛn nɔ no se Jiova in enjɛl dɛn rɛdi fɔ fɛt fɔ wi. Bɔt wi no dis bikɔs wi gɛt fet. Di neshɔn dɛn nɔ go si dɛn bikɔs dɛn nɔ gɛt fet pan Gɔd. Dɛn go rili sɔprayz we Jiova in ami go fɛt fɔ wi.—Rɛv. 19:​11, 14, 15.

14. Wetin wi go du naw fɔ rɛdi fɔ tumara bambay?

¹⁴ Wetin wi go du naw fɔ rɛdi wisɛf fɔ tumara bambay? Fɔs, wi nid fɔ tink di rayt we bɔt prɔpati, bikɔs wan de, wi gɛt fɔ lɛf dɛn biɛn. Wi nid fɔ satisfay bak wit wetin wi gɛt, ɛn wi fɔ rili gladi bikɔs wi gɛt padi biznɛs wit Jiova. Di mɔ we wi no wi Gɔd, na di mɔ wi go gɛt kɔnfidɛns se i ebul fɔ protɛkt wi we Gɔg we de na Megɔg go atak.

15. We Devid bin yɔŋ, wetin bin apin to am we tich am se Jiova nɔ go ɛva disapɔynt am?

¹⁵ Tink bɔt wetin bak bin ɛp Devid ɛn we go ɛp wi fɔ rɛdi fɔ ɛni tɛst. Devid bin se: “Kam si fɔ yusɛf se PAPA GƆD [“Jiova,” NWT] na gud PAPA GƆD; I fayn fɔ di man, we de aks am fɔ  kɔba am.” (Sam 34:​8) Dɛn wɔd dɛn de sho wetin mek Devid bin no se i fɔ abop pan di sɔpɔt we Jiova de gi. Bɔku tɛm, Devid bin de abop pan Jiova, ɛn in Gɔd nɔ bin ɛva disapɔynt am. We Devid bin yɔŋ, i bin fɛt di Filistin dɛn jayant we nem Golayath, ɛn i bin tɛl da pawaful fɛtman de se: “Da de de PAPA GƆD [“Jiova,” NWT] go mek i ib am dɔŋ.” (1 Sam. 17:​46) Leta, we Devid bin de wok fɔ Sɔl, Sɔl bin tray bɔku tɛm fɔ kil am. Bɔt ‘Jiova bin de wit’ Devid. (1 Sam. 18:​12) Bikɔs Devid bin dɔn de si aw Jiova de ɛp am di tɛm dɛn we dɔn pas, i bin gɛt kɔnfidɛns se Jiova go ɛp am wit di prɔblɛm dɛn we i gɛt naw.

16. Us we dɛn wi go ‘si fɔ wisɛf’ se Jiova gud?

¹⁶ Di mɔ we wi de abop pan Jiova fɔ protɛkt wi naw, na di mɔ wi go gɛt kɔnfidɛns se i go ebul fɔ sev wi tumara bambay. Wi nid fɔ gɛt fet ɛn fɔ rɛdi fɔ abop pan Jiova fɔ tek ɛkskyuz to wi bɔsman so dat wi go ebul fɔ atɛnd asɛmbli ɔ kɔnvɛnshɔn, ɔ fɔ aks am fɔ ajɔst wi wok shɛdul so dat wi go ebul fɔ atɛnd ɔl wi mitin dɛn ɛn spɛn mɔ tɛm na di prichin wok. Bɔt wetin wi go du if wi bɔsman nɔ gri ɛn wi lɔs wi wok? Wi go gɛt fet se Jiova nɔ go ɛva lɛf wi ɔ lɛf fɔ ɛp wi, ɛn i go gi wi wetin wi nid ɔltɛm? (Ibru. 13:​5) Bɔku pan wi brɔda ɛn sista dɛn we de ful-taym savis go ebul tɔk bɔt ɛkspiriɛns bɔt aw Jiova dɔn ɛp dɛn di tɛm we dɛn bin rili nid am. Jiova fetful.

17. Wetin na di iatɛks fɔ 2022? Wetin mek da skripchɔ de rili fayn?

¹⁷ Bikɔs Jiova de wit wi, wi nɔ gɛt ɛni rizin fɔ fred wetin go apin tumara bambay. Wi Gɔd nɔ go ɛva lɛf wi wans wi kɔntinyu fɔ put in Kiŋdɔm fɔs na wi layf. Fɔ mɛmba wi se wi nid fɔ rɛdi naw fɔ di tin dɛn we go apin tumara bambay ɛn fɔ abop se Jiova nɔ go ɛva lɛf wi, di Gɔvnin Bɔdi dɔn pik Sam 34:10 (NWT) as wi iatɛks fɔ 2022, we se: “Di wan dɛn we de luk fɔ Jiova go gɛt ɔl wetin dɛn nid.”