STƆDI ATIKUL 4
Wetin Mek Wi De Atɛnd di Mɛmorial?
“Una go de du dis fɔ mɛmba mi.”—LYUK 22:19.
SIŊ 20 Yu Gi Wi Yu Bɔy Pikin
WETIN WI GO LAN? *
1-2. (a) Ustɛm mɔ wi kin mɛmba pɔsin we wi lɛk we dɔn day? (b) Wetin Jizɔs bin du di nɛt bifo i day?
ILƐKSƐF i dɔn te we pipul dɛn we wi lɛk dɔn day, wi stil kin mɛmba dɛn. Wi kin tink bɔt dɛn mɔ di det we dɛn day.
2 Ɛni ia, wi de jɔyn bɔku bɔku pipul dɛn ɔlsay na di wɔl we de gɛda fɔ mɛmba di day we Jizɔs Krays we wi rili lɛk bin day. (1 Pit. 1:8) Wi kin gɛda fɔ mɛmba di wan we bin gi in layf as sakrifays fɔ sev wi frɔm sin ɛn day. (Mat. 20:28) Infakt, Jizɔs bin want di wan dɛn we de fala am fɔ mɛmba in day. Di nɛt bifo i day, i bin bigin wan spɛshal ivintɛm it ɛn tɛl in disaypul dɛn se: “Una go de du dis fɔ mɛmba mi.”—Lyuk 22:19.
3. Wetin wi go tɔk bɔt insay dis atikul?
3 Di wan dɛn we gɛt di op fɔ go de na ɛvin we de atɛnd di Mɛmorial fɔ mɛmba Krays in day, nɔ bɔku. Bɔt bɔku bɔku pipul dɛn we gɛt di op fɔ de na dis wɔl dɛnsɛf de atɛnd. Insay dis atikul, wi go tɔk bɔt rizin dɛn we mek di wan dɛn we gɛt di op fɔ go na ɛvin ɛn di wan dɛn we gɛt di op fɔ de na dis wɔl gladi fɔ atɛnd di Mɛmorial ɛni ia. Wi go tɔk bak bɔt aw wi go bɛnifit we wi atɛnd. Lɛ wi stat bay we wi go tɔk bɔt sɔm rizin dɛn we mek di anɔyntɛd dɛn de atɛnd.
WETIN MEK ANƆYNTƐD KRISTIAN DƐN KIN ATƐND?
4. Wetin mek anɔyntɛd Kristian dɛn de it di bred ɛn drink di wayn na di Mɛmorial?
4 Ɛni ia, anɔyntɛd Kristian dɛn we de atɛnd di Mɛmorial kin it di bred ɛn drink di wayn. Wetin mek i fayn fɔ mek dɛn it di bred ɛn drink di wayn? Fɔ ansa da kwɛstyɔn de, lɛ wi tɔk bɔt wetin bin apin di las nɛt we Jizɔs bin de na di wɔl. Afta di Pasova it, Jizɔs bin bigin wetin wi de kɔl naw di Masta in Ivintɛm It. I bin pas di bred ɛn di wayn to in 11 fetful apɔsul dɛn ɛn tɛl dɛn fɔ it ɛn drink. Jizɔs bin tɔk to dɛn bɔt tu agrimɛnt dɛn, dat na di nyu agrimɛnt ɛn di Kiŋdɔm agrimɛnt. * (Lyuk 22:19, 20, 28-30) Dɛn agrimɛnt dɛn de bin mek am pɔsibul fɔ lɛ dɛn apɔsul dɛn de ɛn ɔda disaypul dɛn we nɔ bɔku, bi kiŋ ɛn prist dɛn na ɛvin. (Rɛv. 5:10; 14:1) Na di anɔyntɛd dɛn we dɔn lɛf na di wɔl nɔmɔ, we de pat pan dɛn tu agrimɛnt dɛn ya go it di bred ɛn drink di wayn na di Mɛmorial.
5. Wetin di anɔyntɛd dɛn no bɔt di op we dɛn gɛt?
5 Lɛ wi tɔk bɔt wan ɔda rizin we mek anɔyntɛd Kristian dɛn kin gladi fɔ atɛnd di Mɛmorial: Di Mɛmorial kin gi dɛn chans fɔ tink bɔt dɛn op. Jiova dɔn gi dɛn wɔndaful op, we na fɔ ɛnjɔy layf na ɛvin wit bɔdi we nɔ de rɔtin ɛn we nɔ de day, fɔ rul wit Jizɔs Krays we bin dɔn gɛt layf bak ɛn di balans 144,000, ɛn pantap dat, fɔ de usay Jiova Gɔd de. (1 Kɔr. 15:51-53; 1 Jɔn 3:2) Di anɔyntɛd dɛn no se dɛn dɔn invayt dɛn fɔ ɛnjɔy dɛn wɔndaful blɛsin dɛn ya na ɛvin. Bɔt fɔ mek dɛn go go na ɛvin, dɛn fɔ kɔntinyu fɔ fetful te dɛn day. (2 Tim. 4:7, 8) Di anɔyntɛd Kristian dɛn kin rili gladi we dɛn kin tink bɔt dɛn op fɔ go na ɛvin. (Tay. 2:13) We di “ɔda ship dɛn”? (Jɔn 10:16) Wetin na sɔm rizin dɛn we mek dɛn de atɛnd di Mɛmorial?
WETIN MEK DI ƆDA SHIP DƐN KIN ATƐND?
6. Wetin mek di ɔda ship dɛn kin gladi fɔ atɛnd di Mɛmorial ɛni ia?
6 We di ɔda ship dɛn kin atɛnd di Mɛmorial, dɛn nɔ de it di bred ɛn drink di wayn, bɔt dɛn kin stil gladi fɔ si wetin de apin na di program. Na insay 1938 dɛn bin invayt di wan dɛn we gɛt op fɔ de na dis wɔl fɔ atɛnd di Mɛmorial fɔ di fɔs tɛm. Di Wachtawa fɔ Mach 1, 1938, bin se: “I rili fayn fɔ mek di [ɔda ship dɛn] go atɛnd da kayn mitin de ɛn si wetin de apin na di program. . . . Na tɛm we dɛnsɛf fɔ gladi.” Lɛk aw pipul dɛn we dɛn invayt pan mared kin gladi fɔ si wetin de apin, na so di ɔda ship dɛn gladi fɔ si wetin de apin na di Mɛmorial.
7. Wetin mek di ɔda ship dɛn kin gladi fɔ lisin to di Mɛmorial tɔk?
7 Di ɔda ship dɛn bak kin tink bɔt dɛn op. Dɛn gladi fɔ yɛri di Mɛmorial tɔk we go ɛksplen mɔ bɔt wetin Krays ɛn di 144,000 go du fɔ fetful mɔtalman dɛn insay di Wan Tawzin Ia we Krays go de rul. Ɔnda Jizɔs Krays we na dɛn Kiŋ ɛn Lida, dɛn wan dɛn de we go rul na ɛvin go ɛp fɔ mek di wɔl bi Paradays ɛn ɛp mɔtalman dɛn we de obe Gɔd fɔ pafɛkt. I rili wɔndaful fɔ di bɔku bɔku pipul dɛn we kin atɛnd di Mɛmorial fɔ imajin aw di Baybul in prɔfɛsi dɛn go kam tru tumara bambay; lɛk di prɔfɛsi dɛn we de na Ayzaya 35:5, 6; 65:21-23; ɛn Rɛvɛleshɔn 21:3, 4. We dɛn de imajin dɛnsɛf ɛn di wan dɛn we dɛn lɛk na da nyu wɔl de, dɛn op fɔ tumara bambay de strɔng mɔ ɛn mɔ, ɛn dɛn de mekɔp dɛn maynd fɔ kɔntinyu fɔ sav Jiova.—Mat. 24:13; Gal. 6:9.
8. Wetin na wan ɔda rizin we mek di ɔda ship dɛn kin atɛnd di Mɛmorial?
8 Lɛ wi tɔk bɔt wan ɔda rizin we mek di ɔda ship dɛn kin atɛnd di Mɛmorial. Dɛn want fɔ sho se dɛn lɛk di anɔyntɛd dɛn, ɛn dɛn de sɔpɔt dɛn. Gɔd in Wɔd bin dɔn tɔk se tayt padi biznɛs go de bitwin di anɔyntɛd dɛn ɛn di wan dɛn we gɛt op fɔ de na dis wɔl. Aw dat go apin? Lɛ wi tɔk bɔt sɔm ɛgzampul dɛn.
9. Wetin di prɔfɛsi we de na Zɛkaraya 8:23 (NWT) tɔk bɔt aw di ɔda ship dɛn de fil bɔt di anɔyntɛd dɛn?
9 Rid Zɛkaraya 8:23, NWT. Dis prɔfɛsi tɔk fayn tin bɔt aw di ɔda ship dɛn de fil bɔt dɛn anɔyntɛd brɔda ɛn sista dɛn. Di wɔd dɛn “wan Ju” ɛn “una” min di sem grup, dat na di anɔyntɛd Kristian dɛn we dɔn lɛf na di wɔl. (Rom. 2:28, 29) Di “tɛn man dɛn na ɔl di langwej dɛn na di neshɔn dɛn” tinap fɔ di ɔda ship dɛn. Dɛn “ol” di anɔyntɛd dɛn “tayt wan,” ɛn jɔyn dɛn fɔ wɔship Gɔd di rayt we. So di nɛt fɔ di Mɛmorial, di ɔda ship dɛn de sho se dɛn gɛt tayt padi biznɛs wit di anɔyntɛd dɛn bay we dɛn de na di program wit dɛn.
10. Wetin Jiova dɔn du fɔ mek di prɔfɛsi we de na Izikɛl 37:15-19, 24, 25, kam tru?
10 Rid Izikɛl 37:15-19, 24, 25. Jiova bin mek dis prɔfɛsi kam tru bay we i mek di anɔyntɛd Kristian dɛn ɛn di ɔda ship dɛn de wok togɛda tigi tigi wan wit wanwɔd. Di prɔfɛsi tɔk bɔt tu tik dɛn. Di wan dɛn we gɛt di op fɔ go na ɛvin tan lɛk di tik we na “fɔ Juda” (di trayb usay dɛn bin de pik di kiŋ dɛn fɔ Izrɛl), ɛn di wan dɛn we gɛt di op fɔ de na dis wɔl tan lɛk di “Ifrem tik.” * Jiova go mek dɛn tu grup dɛn ya so gɛt wanwɔd so dat dɛn go bi “wan tik.” Dis min se dɛn de wok togɛda wit wanwɔd ɔnda dɛn wan Kiŋ, we na Krays Jizɔs. Ɛni ia, we di anɔyntɛd dɛn ɛn di ɔda ship dɛn de atɛnd di Mɛmorial, dɛn nɔ de atɛnd as tu difrɛn grup, bɔt as “wan grup” ɔnda “wan shɛpad.”—Jɔn 10:16.
11. Us men we “di ship dɛn” we Matyu 25:31-36, 40 tɔk bɔt, de sɔpɔt Krays in brɔda dɛn?
11 Rid Matyu 25:31-36, 40. “Di ship dɛn” na dis parebul tinap fɔ di wan dɛn we de du wetin rayt insay di las dez, we gɛt op fɔ de na dis wɔl, dat na di ɔda ship dɛn. Dɛn de kɔntinyu fɔ sɔpɔt Krays in anɔyntɛd brɔda dɛn we dɔn lɛf na dis wɔl. Di men we aw dɛn de sɔpɔt dɛn, na we dɛn de du di prichin wok ɔlsay na di wɔl ɛn mek disaypul dɛn.—Mat. 24:14; 28:19, 20.
12-13. Us ɔda we dɛn di ɔda ship dɛn de sho se dɛn de sɔpɔt Krays in brɔda dɛn?
12 Ɛni ia, insay di wik dɛn bifo di Mɛmorial, di ɔda ship dɛn de sho se dɛn sɔpɔt Krays in brɔda dɛn bay we dɛn de jɔyn fɔ du kampen ɔlsay na di wɔl fɔ invayt pipul dɛn na di Mɛmorial. (Rid di bɔks we gɛt di taytul “ Yu De Plan Bifo Tɛm fɔ di Mɛmorial Sizin?”) Dɔn bak, dɛn de mek shɔ se dɛn rɛdi ɔltin fɔ di Mɛmorial, ilɛksɛf dɛn nɔ gɛt ɛnibɔdi na di kɔngrigeshɔn we na anɔyntɛd. Di ɔda ship dɛn kin gladi fɔ sɔpɔt Krays in brɔda dɛn, dɛn we ya. Dɛn ship dɛn ya no se Jizɔs de si wetin dɛn de du fɔ in anɔyntɛd brɔda dɛn lɛk se na insɛf sɛf dɛn de du am fɔ.—Mat. 25:37-40.
13 Us ɔda rizin dɛn we mek wi ɔl kin atɛnd di Mɛmorial, ilɛk us op wi gɛt?
WETIN MEK WI ƆL KIN ATƐND?
14. Aw Jiova ɛn Jizɔs dɔn sho se dɛn rili lɛk wi?
14 Wi gladi fɔ di we aw Jiova ɛn Jizɔs dɔn sho se dɛn lɛk wi. Jiova dɔn sho se i lɛk wi bɔku we dɛn. Bɔt di bɛst we aw i dɔn sho se i lɛk wi, na we i sɛn in Pikin we i rili lɛk fɔ sɔfa ɛn day fɔ wi. (Jɔn 3:16) Wi no bak se Jizɔs insɛf dɔn sho se i rili lɛk wi bay we i bin rɛdi fɔ gi in layf fɔ wi. (Jɔn 15:13) Wi nɔ go ɛva ebul fɔ pe Jiova ɛn Jizɔs fɔ di we aw dɛn dɔn sho se dɛn lɛk wi. Bɔt wi go sho se wi gɛt tɛnki bay di we aw wi de liv wi layf ɛvride. (Kol. 3:15) Ɛn wi de atɛnd di Mɛmorial bikɔs wi want fɔ tink bɔt aw dɛn lɛk wi ɛn fɔ sho se wi lɛk dɛn.
15. Wetin mek di anɔyntɛd ɛn di ɔda ship dɛn rili valyu Jizɔs in sakrifays?
15 Wi rili valyu Jizɔs in sakrifays. (Mat. 20:28) Di anɔyntɛd dɛn valyu Jizɔs in sakrifays we mek am pɔsibul fɔ mek dɛn gɛt wɔndaful op. Bikɔs dɛn gɛt fet pan Krays in sakrifays, Jiova dɔn si dɛn as pipul dɛn we de du wetin rayt, ɛn i dɔn adɔpt dɛn as in pikin dɛn. (Rom. 5:1; 8:15-17, 23) Di ɔda ship dɛnsɛf gladi fɔ Jizɔs in sakrifays. Bikɔs dɛn gɛt fet pan Jizɔs in sakrifays, dɛn klin na Gɔd in yay, dɛn de wɔship Gɔd, ɛn dɛn gɛt op fɔ sev di tɛm fɔ da “big big trɔbul.” (Rɛv. 7:13-15) Wan we aw di anɔyntɛd ɛn di ɔda ship dɛn de sho se dɛn rili gladi fɔ Jizɔs in sakrifays, na we dɛn de atɛnd di Mɛmorial ɛni ia.
16. Us ɔda rizin mek wi de atɛnd di Mɛmorial?
16 Wan ɔda rizin we mek wi kin atɛnd di Mɛmorial na bikɔs wi want fɔ obe Jizɔs. Ilɛk us op wi gɛt fɔ tumara bambay, wi ɔl want fɔ obe di lɔ we Jizɔs bin gi di nɛt we i bigin di Mɛmorial. I bin se: “Una go de du dis fɔ mɛmba mi.”—1 Kɔr. 11:23, 24.
AW WI ƆL GO BƐNIFIT WE WI ATƐND?
17. Aw di Mɛmorial de ɛp wi fɔ kam nia Jiova mɔ ɛn mɔ?
17 Wi go kam nia Jiova mɔ ɛn mɔ. (Jems 4:8) Wi dɔn lan se di Mɛmorial de gi wi ɔl chans fɔ tink bɔt di op we Jiova dɔn gi wi ɛn fɔ tink gud wan bɔt di we aw i dɔn sho se i rili lɛk wi. (Jɛr. 29:11; 1 Jɔn 4:8-10) We wi tink bɔt di op we wi gɛt fɔ tumara bambay ɛn di lɔv we nɔ de ɛva fel we Gɔd de sho wi, i de mek wi lɛk am mɔ ɛn mɔ ɛn gɛt tayt padi biznɛs wit am.—Rom. 8:38, 39.
18. We wi tink gud wan bɔt Jizɔs in ɛgzampul, wetin dat de mek wi want fɔ du?
18 Wi go want fɔ falamakata Jizɔs in ɛgzampul. (1 Pit. 2:21) Insay di de dɛn bifo di Mɛmorial, wi kin pe atɛnshɔn to sɔm Baybul akawnt dɛn bɔt di las wik we Jizɔs bin de na dis wɔl, di we aw i day, ɛn aw i gɛt layf bak. Dɔn, di ivintɛm fɔ di Mɛmorial, di tɔk kin mɛmba wi bɔt di we aw Jizɔs sho se i lɛk wi. (Ɛfi. 5:2; 1 Jɔn 3:16) As wi de rid bɔt di we aw Jizɔs sho se i nɔ jɔs bisin bɔt insɛf ɛn tink gud wan bɔt am, i de mek wi want fɔ “kɔntinyu fɔ waka jɔs lɛk aw da wan de bin waka.”—1 Jɔn 2:6.
19. Aw wi go kɔntinyu fɔ mek Gɔd lɛk wi?
19 Wi go mekɔp wi maynd mɔ fɔ kɔntinyu fɔ mek Gɔd lɛk wi. (Jud 20, 21) Wi go kɔntinyu fɔ mek Gɔd lɛk wi bay we wi de du ɔl wetin wi ebul fɔ obe am, tek in nem as sɔntin we oli, ɛn mek i gladi. (Prɔv. 27:11; Mat. 6:9; 1 Jɔn 5:3) Di Mɛmorial de mek wi rili mekɔp wi maynd fɔ liv wi layf ɛvride lɛk se wi de tɛl Jiova se, ‘A want fɔ mek yu kɔntinyu fɔ lɛk mi sote go!’
20. Us gud rizin dɛn wi gɛt fɔ atɛnd di Mɛmorial?
20 Ilɛk wi op na fɔ go na ɛvin ɔ fɔ de na dis wɔl sote go, wi gɛt gud rizin dɛn fɔ atɛnd di Mɛmorial. Ɛni ia we wi gɛda togɛda da det de, wi de mɛmba di day we Jizɔs Krays we wi rili lɛk bin day fɔ wi. Ɛn di tin we pas ɔl na dat, wi de mɛmba di bɛst we aw Jiova dɔn sho se i lɛk wi bay we i sɛn in Pikin fɔ kam day fɔ wi. Dis ia, wi go ol di Mɛmorial ivintɛm Frayde, Epril 15, 2022. Wi lɛk Jiova ɛn in Bɔypikin, so we di det we Jizɔs day kin rich, natin nɔ go de we impɔtant to wi pas fɔ atɛnd di Mɛmorial.
SIŊ 16 Prez Gɔd fɔ In Pikin we I Anɔynt
^ par. 5 Ilɛksɛf wi gɛt di op fɔ go de na ɛvin ɔ fɔ de na Paradays na dis wɔl, wi ɔl de gladi fɔ atɛnd di Mɛmorial ɛni ia. Dis atikul go tɔk bɔt gud rizin dɛn frɔm di Baybul we de tɔk bɔt wetin mek wi de atɛnd, ɛn aw wi de bɛnifit we wi de atɛnd.
^ par. 4 Fɔ no mɔ bɔt di nyu agrimɛnt ɛn di Kiŋdɔm agrimɛnt, rid di atikul we nem “Una Go Mekɔp wan Kiŋdɔm Usay Una Go Bi Kiŋ ɛn Prist,” we de na di Ɔktoba 15, 2014, Wachtawa, pej 15 to 17.
^ par. 10 Fɔ no mɔ bɔt di prɔfɛsi bɔt di tu tik dɛn we de na Izikɛl chapta 37, rid di buk we nem Pure Worship of Jehovah—Restored At Last!, pej 130 to 135, paregraf 3 to 17.
