1. Aw wi go spɛn tɛm wit Jiova?

WI KIN lɛk fɔ spɛn tɛm wit pipul dɛn we wi bisin bɔt. Maredman ɛn mareduman kin ɛnjɔy fɔ spɛn tɛm togɛda. Yɔŋ pipul dɛn kin ɛnjɔy fɔ spɛn tɛm togɛda wit dɛn tayt padi dɛn. Ɛn wi ɔl valyu di tɛm we wi kin spɛn wit wi brɔda ɛn sista dɛn. Bɔt di wan we impɔtant pas ɔl na dat, wi kin lɛk fɔ spɛn tɛm wit wi Gɔd. Wi kin du dis bay we wi de pre to am, rid in Wɔd, ɛn tink gud wan bɔt di tin dɛn we i dɔn prɔmis ɛn in fayn fayn kwaliti dɛn. Fɔ tru, wi rili valyu di tɛm we wi kin spɛn wit Jiova!—Sam 139:​17.

2. Wetin nɔ kin izi fɔ du?

² Pan ɔl we wi kin ɛnjɔy fɔ pre ɛn stɔdi di Baybul, sɔntɛnde i nɔ kin izi. Wi kin rili bizi, ɛn dat kin mek i nɔ kin izi fɔ mek wi spɛn tɛm fɔ wɔship Jiova. Wi wok, wi famili, ɛn ɔda tin dɛn we wi fɔ du kin tek bɔku pan wi tɛm, ɛn dat kin mek wi fil se wi tu bizi fɔ pre, stɔdi, ɔ tink gud gud wan.

3. Us ɔda tin kin tek wi tɛm?

³ Ɔda tin de bak we kin tek wi tɛm. If wi nɔ tek tɛm, wi go alaw tin dɛn we nɔ bad fɔ tek bɔku pan di tɛm we wi fɔ yuz fɔ kam nia Jiova mɔ ɛn mɔ. Fɔ ɛgzampul, lɛ wi tɔk bɔt tin dɛn we wi kin du fɔ ɛnjɔy wisɛf. Wi ɔl  kin bɛnifit we wi kin fɛn tɛm fɔ rilaks. I go bi se di tin dɛn we wi kin du fɔ ɛnjɔy wisɛf nɔ kin bad, bɔt if wi de spɛn bɔku tɛm fɔ du dɛn, wi nɔ go gɛt bɛtɛ tɛm fɔ du tin dɛn we go ɛp wi fɔ gɛt tayt padi biznɛs wit Jiova. Wi nid fɔ mɛmba se fɔ ɛnjɔy wisɛf nɔto di tin we impɔtant pas ɔl na wi layf.—Prɔv. 25:​27; 1 Tim. 4:​8.

4. Wetin wi de kam tɔk bɔt?

⁴ Insay dis atikul, wi go tɔk bɔt wetin mek wi nid fɔ disayd wetin impɔtant to wi pas ɔl. Wi go tɔk bak bɔt aw wi go yuz wi tɛm wit Jiova di bɛst we ɛn aw wi go bɛnifit we wi yuz wi tɛm da we de.

5. We yɔŋ pɔsin tink bɔt di advays na Ɛfishians 5:​15-17, aw dat go ɛp am fɔ pik di bɛst we fɔ liv in layf?

⁵ Pik di bɛst we fɔ liv yu layf. Yɔŋ pipul dɛn kin bisin mɔ bɔt di bɛst we fɔ liv dɛn layf. Dɛn ticha dɛn ɛn famili dɛn we nɔto Jiova Witnɛs kin ɛnkɔrej dɛn fɔ go kɔlɛj so dat dɛn go gɛt gud wok ɛn mek bɔku mɔni. Dis kayn buk lanin kin tek bɔku pan dɛn tɛm. Bɔt sɔntɛm, dɛn mama ɛn papa dɛn ɛn dɛn padi dɛn na di kɔngrigeshɔn go ɛnkɔrej dɛn fɔ yuz dɛn layf fɔ sav Jiova. Wetin go ɛp yɔŋ pɔsin we lɛk Jiova fɔ disayd fɔ du di bɛst tin? I go bɛnifit we i rid Ɛfishians 5:​15-17 ɛn tink gud wan bɔt am. (Rid.) Afta yɔŋ pɔsin dɔn rid dɛn vas dɛn ya, i go aks insɛf se: ‘Wetin “Jiova want”? Wetin a go disayd we go mek i gladi? Wetin a go disayd we go ɛp mi fɔ yuz mi tɛm di bɛst we?’ Mɛmba se “di tɛm we wi de insay rili bad,” ɛn dis wɔl we Setan de rul go dɔn jisnɔ. I go mek sɛns fɔ mek wi yuz wi layf fɔ du tin dɛn we go mek Jiova gladi.

6. Wetin Meri bin disayd fɔ du? Wetin mek dat na bin fayn tin?

⁶ Put di tin dɛn we impɔtant fɔs. Fɔ mek wi go yuz wi tɛm di bɛst we, sɔntɛnde wi go nid fɔ disayd bitwin tu tin dɛn we nɔ bad fɔ du. Wi kin si dis frɔm wetin bin apin we Jizɔs bin go fɛn Meri ɛn Mata. Mata bin so gladi we Jizɔs bin kam fɛn dɛn dat i bin de kuk bɔku tin dɛn fɔ am. Bɔt Meri bin sidɔm nia in Masta de lisin to wetin i bin de se. Nɔto bad tin Mata bin de du, bɔt Jizɔs bin se Meri “pik di bɛst pat.” (Lyuk 10:​38-42, futnot) Leta, i go bi se Meri bin fɔgɛt wetin dɛn it da de de, bɔt wi shɔ se i nɔ ɛva fɔgɛt wetin i bin lan frɔm Jizɔs. Jɔs lɛk aw Meri bin valyu da tɛm de we i bin spɛn wit Jizɔs, na so wisɛf valyu di tɛm we wi kin spɛn wit Jiova. Aw wi go yuz da tɛm de di bɛst we?

7. Wetin mek i rili impɔtant fɔ pre, stɔdi, ɛn tink gud gud wan bɔt wetin wi de lan?

⁷ Mɛmba se fɔ pre, stɔdi, ɛn fɔ tink gud gud wan na pat pan wi wɔship. We wi de pre, wi de tɔk to wi Papa we de na ɛvin, we rili lɛk wi. (Sam 5:​7) We wi de stɔdi di Baybul, wi de “no bɔt PAPA GƆD” we gɛt sɛns pas ɔlman. (Prɔv. 2:​1-5) We wi tink gud wan bɔt di tin dɛn we wi dɔn lan bɔt Jiova, wi de  tink bɔt in fayn kwaliti dɛn ɛn mɛmba di wɔndaful tin dɛn we i want fɔ du fɔ wi ɛn ɔl mɔtalman. Dis na di bɛst we aw wi go yuz wi tɛm. Bɔt wetin go ɛp wi fɔ du dis?

8. Us lɛsin wi lan frɔm aw Jizɔs bin yuz in tɛm na di wildanɛs?

⁸ If i pɔsibul, na fɔ fɛn say we kwayɛt. Tink bɔt Jizɔs in ɛgzampul. Bifo i stat in prichin wok na dis wɔl, i bin spɛn 40 dez na di wildanɛs. (Lyuk 4:​1, 2) We Jizɔs bin de na da kwayɛt ples de, i bin ebul fɔ pre ɛn tink gud gud wan bɔt wetin in Papa want am fɔ du. We Jizɔs bin du dat, i bin mek i rɛdi fɔ di tɛst dɛn we go mit am. Aw yu go bɛnifit frɔm Jizɔs in ɛgzampul? If una bɔku na una famili, sɔntɛm i nɔ kin pɔsibul ɔltɛm fɔ fɛn kwayɛt say na di os. If na so i bi, sɔntɛm yu go ebul fɔ luk fɔ kwayɛt say na do. Na dat Juli kin du we i kin want fɔ pre to Jiova. In ɛn in man de na wan smɔl apatmɛnt na Frans, ɛn i nɔ izi fɔ mek i de in wan we pɔsin nɔ de ambɔg am. Juli ɛksplen se: “So a kin go waka na di pak ɛvride. A kin de de mi wan, ɛn a kin ebul fɔ pe atɛnshɔn, ɛn rili tɔk to Jiova.”

9. Pan ɔl we Jizɔs bin bizi, aw i bin sho se i valyu in padi biznɛs wit Jiova?

⁹ Jizɔs na pɔsin we bin rili bizi. We i bin de du in prichin wok na dis wɔl, bɔku pipul dɛn bin de fala am we i bin de go difrɛn ples dɛn, ɛn dɛn ɔl bin want fɔ mek i spɛn tɛm wit dɛn. Wantɛm, “ɔl di pipul dɛn na di siti bin gɛda na di domɔt” fɔ si am. Bɔt stil, Jizɔs bin de mek shɔ se i pre to Jiova ɔltɛm. Bifo do klin, i bin fɛn “wan ples we pipul dɛn nɔ de” so dat i go spɛn tɛm wit in Papa.—Mak 1:​32-35.

10-11. Akɔdin to Matyu 26:​40, 41, wetin Jizɔs bin ɛnkɔrej in disaypul dɛn fɔ du, bɔt wetin bin apin?

¹⁰ Di las nɛt bifo Jizɔs day, we in prichin wok bin de dɔn, i bin fɛn kwayɛt ples bak usay i go ebul fɔ tink gud wan ɛn pre. I bin fɛn da ples de na di gadin na Gɛtsimani. (Mat. 26:​36) We i bin de de, i bin tɛl in disaypul dɛn sɔntin bɔt prea we rili impɔtant.

¹¹ Tink bɔt wetin bin apin. We dɛn bin rich na di gadin na Gɛtsimani, tɛm bin dɔn let, sɔntɛm i bin dɔn pas twɛlv oklɔk nɛt. Jizɔs bin ɛnkɔrej in apɔsul dɛn fɔ de “wach,” ɛn i bin go pre. (Mat. 26:​37-39) Bɔt we i bin de pre, in apɔsul dɛn bin de slip. We  Jizɔs bin kam mit dɛn de slip, i ɛnkɔrej dɛn bak fɔ “go de wach ɛn pre ɔltɛm.” (Rid Matyu 26:​40, 41.) I bin no se dɛn bin rili strɛs ɛn dɛn bin taya. Jizɔs bin sɔri fɔ dɛn, i bin no se dɛn “bɔdi wik.” Bɔt stil, tu tɛm bak we Jizɔs bin go pre, i kam mit dɛn de slip, dɛn nɔ bin de pre.—Mat. 26:​42-45.

12. Wetin wi go du if sɔntɛnde wi fil se wi tu strɛs ɔ taya fɔ pre?

¹² Pik di rayt tɛm. Sɔntɛnde, wi kin fil se wi tu strɛs ɔ tu taya fɔ pre. If dat dɔn ɛva apin to yu, mɛmba se bɔku ɔda pipul dɛn kin fil da we de bak. Wetin yu go du? Sɔm pipul dɛn we bin dɔn yus fɔ pre to Jiova let na nɛt dɔn kam fɔ si se i bɛtɛ fɔ pre ivintɛm we i nɔ tu let yet ɛn we dɛn nɔ kin dɔn taya pasmak. Ɔda wan dɛn dɔn kam fɔ si se di we aw dɛn kin de we dɛn de pre kin ɛp dɛn bak. Bɔt wetin yu go du if yu de wɔri pasmak ɔ yu at rili pwɛl fɔ pre? Tɛl Jiova aw yu de fil. Wan dawt nɔ de se wi Papa we gɛt sɔri-at go ɔndastand.—Sam 139:​4.

13. Aw ilɛktronik tin dɛn kin ambɔg wi tɛm wit Jiova?

¹³ Nɔ alaw ɔda tin dɛn fɔ tek yu atɛnshɔn we yu de stɔdi. Nɔto prea nɔmɔ kin ɛp wi fɔ gɛt tayt padi biznɛs wit Jiova. Di ɔda tin dɛn we kin ɛp wi fɔ kam nia Gɔd mɔ ɛn mɔ na we wi de stɔdi Gɔd in Wɔd ɛn atɛnd di mitin dɛn. Yu go ebul du ɛni ɔda tin fɔ mek yu yuz di tɛm we yu de spɛn fɔ stɔdi ɛn di tɛm we yu de spɛn na mitin di bɛst we? Aks yusɛf dis kwɛstyɔn, ‘Wetin kin tek mi atɛnshɔn we a de na mitin ɔ we a de tray fɔ stɔdi?’ Fɔ se na di kɔl dɛn, imel, ɔ tɛks mɛsej dɛn we kin kam na yu fon ɔ ɔda ilɛktronik tin dɛn we yu gɛt? Tide, bɔku bɔku pipul dɛn gɛt dɛn ilɛktronik tin dɛn ya. Sɔm masta sabi bukman dɛn se we wi kin tray fɔ pe atɛnshɔn pan sɔntin, wans wi fon de nia wi, dat kin tek wi atɛnshɔn. Wan ɔda masta sabi bukman tɔk se: “Yu nɔ de ebul fɔ pe atɛnshɔn pan wetin yu de du. Yu maynd kin de ɔdasay.”  Bifo asɛmbli ɛn kɔnvɛnshɔn kin stat, bɔku tɛm, dɛn kin tɛl wi fɔ ajɔst wi ilɛktronik tin dɛn di we aw i nɔ go ambɔg ɔda pipul dɛn. Fɔ se wi go ebul du di sem tin we wi wan de so dat wi ilɛktronik tin dɛn nɔ go ambɔg wi ɛn wi tɛm wit Jiova?

14. Akɔdin to Filipians 4:​6, 7, aw Jiova go ɛp wi fɔ pe atɛnshɔn pan wetin wi de du?

¹⁴ Beg Jiova lɛ i ɛp yu fɔ pe atɛnshɔn pan wetin yu de du. Ɛnitɛm we yu notis se yu dɔn stat fɔ tink bɔt ɔda tin we yu de stɔdi ɔ we yu de na mitin, beg Jiova lɛ i ɛp yu. If yu de wɔri, sɔntɛm i nɔ go izi fɔ lɛ yu put wetin yu de wɔri bɔt na kɔna ɛn pe atɛnshɔn pan Gɔd in Wɔd, bɔt i rili impɔtant fɔ lɛ yu du dat. Pre fɔ di pis we go gayd yu at ɛn yu “maynd.”—Rid Filipians 4:​6, 7.

15. Wetin na wan bɛnifit we wi go gɛt we wi de spɛn tɛm wit Jiova?

¹⁵ If yu de mek tɛm fɔ tɔk to Jiova, lisin to am, ɛn tink bɔt am, yu go rili bɛnifit. Aw? Fɔs, yu go ebul fɔ disayd fɔ du di rayt tin dɛn. Di Baybul se, “udat de rakpala [waka] wit pipul we gɛt sɛns de gɛt sɛns.” (Prɔv. 13:​20) So as yu de spɛn tɛm wit Jiova we gɛt sɛns pas ɔlman, yusɛf go gɛt sɛns mɔ ɛn mɔ. Yu go kam fɔ ɔndastand aw yu go mek i gladi ɛn aw yu go avɔyd fɔ du tin dɛn we go mek in at pwɛl.

16. We wi de spɛn tɛm wit Jiova, aw dat de ɛp wi fɔ tich fayn?

¹⁶ Sɛkɔn, yu go bi gud ticha. We wi de stɔdi di Baybul wit pɔsin, wan pan di men tin dɛn we wi kin want fɔ ɛp am fɔ du na fɔ kam nia Jiova. Di mɔ we wi de pre to Jiova ɛn lan bɔt am, na di mɔ wi go lɛk am, ɛn na di mɔ wi go ebul tich wi studɛnt fɔ lɛk am. Tink bɔt Jizɔs in ɛgzampul. Bikɔs i bin de rili tɔk fayn we bɔt in Papa, dat bin ɛp in disaypul dɛn fɔ lɛk Jiova.—Jɔn 17:​25, 26.

17. Wetin mek prea ɛn stɔdi de ɛp fɔ mek wi fet strɔng mɔ ɛn mɔ?

¹⁷ Tɔd, yu fet go strɔng mɔ ɛn mɔ. Tink bɔt wetin kin apin we yu kin beg Gɔd fɔ gayd yu, kɔrej yu, ɔ sɔpɔt yu. Ɛnitɛm we Jiova kin ansa dɛn yu prea dɛn de, yu kin gɛt fet pan am mɔ ɛn mɔ. (1 Jɔn 5:​15) Wetin bak go ɛp yu fɔ gɛt strɔng fet? Na pasɔnal stɔdi. Mɛmba se, “pɔsin de gɛt fet afta i yɛri sɔntin.” (Rom. 10:​17) Bɔt fɔ mek wi  gɛt strɔng fet, wi nɔ fɔ jɔs de lan bɔt tin dɛn. Wetin bak wi nid fɔ du?

18. Gi wan ɛgzampul we de sho wetin mek wi nid fɔ tink gud gud wan.

¹⁸ Wi nid fɔ tink gud wan bɔt wetin wi de lan. Tink bɔt wetin bin apin to di man we rayt Sam 77. In at bin pwɛl bikɔs i bin fil se Jiova nɔ gladi wit in ɛn in kɔmpin Izrɛlayt dɛn igen. I nɔ bin de ebul slip na nɛt bikɔs i bin de wɔri bɔt dat. (Vas 2-8) Wetin i bin du? I bin tɛl Jiova se: “A de tink bɔt ɔl dɛn tin [dɛn] we yu bin dɔn du ɛn wɔnda pan di wok we yu de du.” (Vas 12) Di man we rayt dis sam bin rili no bɔt di tin dɛn we Jiova bin dɔn du fɔ In pipul dɛn trade, bɔt i bin stil de wɔri ɛn tink se: “Fɔ se PAPA GƆD nɔ gɛt klin at fɔ wi igen? I so vɛks pan wi dat i nɔ de sɔri fɔ wi sɛf?” (Vas 9) Di man we rayt dis sam bin de tink gud wan bɔt di tin dɛn we Jiova bin de du ɛn di we aw i bin dɔn sho sɔri-at to dɛn trade. (Vas 11) Wetin bin apin we i du dat? I bin kam fɔ biliv gud gud wan se Jiova nɔ go lɛf In pipul dɛn. (Vas 15) Semweso, yu fet go strɔng mɔ ɛn mɔ we yu tink gud wan bɔt wetin Jiova dɔn ɔlrɛdi du fɔ in pipul dɛn ɛn wetin i dɔn du fɔ yu.

19. Us ɔda bɛnifit wi go gɛt we wi spɛn tɛm wit Jiova?

¹⁹ Di nɔmba 4 bɛnifit we impɔtant pas ɔl di ɔda wan dɛn na dat, yu go lɛk Jiova mɔ ɛn mɔ. Lɔv na di men kwaliti we go mek yu obe Jiova, mek sakrifays dɛn fɔ mek i gladi, ɛn bia ɛni prɔblɛm. (Mat. 22:​37-39; 1 Kɔr. 13:​4, 7; 1 Jɔn 5:​3) No ɔda tin nɔ de we gɛt valyu pas fɔ gɛt tayt padi biznɛs wit Jiova!—Sam 63:​1-8.

20. Aw yu plan fɔ mek shɔ se yu spɛn tɛm wit Jiova?

²⁰ Mɛmba se fɔ pre, stɔdi, ɛn tink gud wan bɔt wetin wi de lan na pat pan wi wɔship. Lɛk Jizɔs, fɛn kwayɛt ples usay yu go ebul spɛn tɛm wit Jiova. Avɔyd tin dɛn we go tek yu atɛnshɔn. Beg Jiova mek i ɛp yu fɔ pe atɛnshɔn we yu de du tin dɛn we go ɛp yu fɔ gɛt tayt padi biznɛs wit am. If yu yuz yu tɛm di bɛst we naw, Jiova go blɛs yu wit layf we go de sote go na Gɔd in nyu wɔl.—Mak 4:​24.