STƆDI ATIKUL 4
Jiova De Blɛs Wi we Wi Atɛnd di Mɛmorial
“Una go de du dis fɔ mɛmba mi.”—LYUK 22:19.
SIŊ 19 Di Ivintɛm It fɔ Mɛmba di Masta
WETIN WI GO LAN? a
1-2. Wetin mek wi de atɛnd di Mɛmorial ɛni ia?
NA LƐK 2,000 ia dɔn pas so we Jizɔs bin gi in layf fɔ wi. I mek am pɔsibul fɔ mek wi gɛt layf we go de sote go. Di nɛt bifo Jizɔs day, i kɔmand in disaypul dɛn fɔ mɛmba dis fayn tin we i du bay we i yuz bred ɛn wayn fɔ mek wan simpul sɛrimɔni.—1 Kɔr. 11:23-26.
2 Wi de obe Jizɔs in kɔmand bikɔs wi rili lɛk am. (Jɔn 14:15) Ɛni ia insay di tɛm fɔ di Mɛmorial, wi kin sho se wi gladi fɔ wetin Jizɔs dɔn du fɔ wi bay we wi tek tɛm tink gud wan ɛn pre bɔt wetin in day min fɔ mɔtalman. Wi kin gladi bak fɔ du mɔ na di prichin wok ɛn ɛnkɔrej bɔku pipul dɛn fɔ jɔyn wi fɔ atɛnd dis spɛshal program. Ɛn wi dɔn mekɔp wi maynd nɔ fɔ alaw ɛnitin fɔ stɔp wi fɔ atɛnd di Mɛmorial.
3. Wetin wi go tɔk bɔt insay dis atikul?
3 Insay dis atikul, wi go tɔk bɔt tri we dɛn we Jiova in pipul dɛn dɔn du dɛn bɛst fɔ mɛmba Jizɔs in day: (1) we wi bigin bak fɔ du di Mɛmorial lɛk aw Jizɔs bin du am, (2) we wi invayt ɔda pipul dɛn fɔ atɛnd di Mɛmorial, ɛn (3) we wi atɛnd di Mɛmorial ilɛk tin nɔ izi fɔ wi.
WI BIGIN DI MƐMORIAL BAK LƐK AW JIZƆS BIN DU AM
4. Us kwɛstyɔn dɛn wi kin ansa ɛni ia na di Mɛmorial? Wetin mek wi fɔ biliv di ansa dɛn ɛn tek dɛn siriɔs? (Lyuk 22:19, 20)
4 Ɛni ia na di Mɛmorial, wi de lisin to tɔk frɔm di Baybul we de gi klia ansa dɛn to bɔku kwɛstyɔn dɛn. Wi kin lan wetin mek mɔtalman nid pɔsin fɔ day fɔ dɛn ɛn aw wan man in day go pe fɔ bɔku bɔku pipul dɛn sin dɛn. Dɛn kin mɛmba wi bak bɔt wetin di bred ɛn di wayn tinap fɔ ɛn udat dɛn fɔ it di bred ɛn drink di wayn. (Rid Lyuk 22:19, 20.) Ɛn wi kin tink bak bɔt di wɔndaful blɛsin dɛn we de fɔ di wan dɛn we gɛt di op fɔ de na dis wɔl sote go. (Ayz. 35:5, 6; 65:17, 21-23) Wi fɔ biliv dɛn tru tin dɛn ya ɛn tek dɛn siriɔs. Bɔku bɔku pipul dɛn nɔ ɔndastand dɛn, ɛn dɛn nɔ ivin no aw Jizɔs in sakrifays rili impɔtant. Dɔn bak, dɛn nɔ de du di Mɛmorial fɔ Jizɔs in day akɔdin to aw i bin du am. Wetin mek?
5. Afta bɔku pan di apɔsul dɛn day, aw pipul dɛn bigin fɔ mɛmba Jizɔs in day?
5 Jɔs afta bɔku pan Jizɔs in apɔsul dɛn day, lay lay Kristian dɛn bin jɔyn di kɔngrigeshɔn. (Mat. 13:24-27, 37-39) Dɛn bin de tɔk “bɛnbɛn tin dɛn fɔ mek di disaypul dɛn fala dɛn.” (Akt 20:29, 30) Wan pan di “bɛnbɛn tin dɛn” we di lay lay Kristian dɛn bigin fɔ tich na dat Jizɔs nɔ bin gi in bɔdi “wan tɛm nɔmɔ fɔ tek bɔku pipul dɛn sin dɛn” lɛk aw di Baybul se, bɔt dɛn fɔ de ripit in sakrifays ɔltɛm. (Ibru. 9:27, 28) Tide bɔku pipul dɛn biliv da lay lay tichin de. Dɛn de go chɔch ɛni wik, ɛn sɔntɛnde ɛni de, fɔ mɛmba Jizɔs in sakrifays, we di Katolik rilijɔn de kɔl “the Sacrifice of the Mass.” b Ɔda rilijɔn dɛn nɔ de mɛmba Jizɔs in day ɛni wik ɔ ɛni de, bɔt bɔku pan dɛn mɛmba dɛn nɔ rili ɔndastand wetin Jizɔs in sakrifays rili min. Sɔm pipul dɛn go de wɔnda, ‘Fɔ se Jizɔs in day rili min se Gɔd go fɔgiv mi sin dɛn?’ Wetin mek dɛn kin aks da kwɛstyɔn de? Fɔ sɔm pipul dɛn, na bikɔs dɛn biliv pipul dɛn we de tɔk se Jizɔs in day nɔ du fɔ mek Gɔd fɔgiv wi sin dɛn. Aw Jizɔs in tru tru disaypul dɛn dɔn ɛp pipul dɛn we i kam pan dis tɔpik?
6. Bay di ia 1872, wetin di Baybul studɛnt dɛn kam fɔ ɔndastand?
6 Insay di ia 1870, Chals Tez Rɔsɛl ɛn sɔm Baybul studɛnt dɛn bigin fɔ stɔdi di Skripchɔ dɛn gud gud wan. Dɛn bin want fɔ no di tru bɔt wetin Jizɔs in sakrifays rili min ɛn aw wi fɔ mɛmba in day. Bay 1872, dɛn kam fɔ ɔndastand se fɔ tru, Jizɔs bin day fɔ pe di prayz fɔ fri ɔl mɔtalman. Dɛn nɔ bin kip wetin dɛn lan to dɛnsɛf. Bifo dat, dɛn yuz buk dɛn, nyuzpepa dɛn, ɛn magazin dɛn fɔ mek ɔlman no bɔt wetin dɛn bin de lan. Ɛn shɔt tɛm afta dat, fɔ mek dɛn falamakata di fɔstɛm Kristian dɛn, dɛn bigin fɔ mit wan tɛm insay di ia fɔ mɛmba Jizɔs in day.
7. Aw wi de bɛnifit frɔm di tin dɛn we di Baybul studɛnt dɛn we bin de trade bin dɔn stɔdi?
7 Tide, wi de bɛnifit frɔm wetin dɛn Kristian man dɛn ya bin dɔn stɔdi trade. Aw? Jiova dɔn ɛp wi fɔ ɔndastand wetin Jizɔs in sakrifays min ɛn wetin i go du fɔ wi ɛn ɔl mɔtalman. (1 Jɔn 2:1, 2) Wi dɔn lan bak se di Baybul tɔk bɔt tu blɛsin dɛn fɔ mɔtalman dɛn we de du wetin Gɔd want; dat na, fɔ sɔm, dɛn go ɛnjɔy layf na ɛvin wit bɔdi we nɔ de day ɛn fɔ bɔku ɔda mɔtalman dɛn, dɛn go gɛt layf na dis wɔl sote go. Wi go kam nia Jiova mɔ ɛn mɔ as wi de tink bɔt aw Jiova lɛk wi ɛn aw wi de bɛnifit frɔm Jizɔs in sakrifays. (1 Pit. 3:18; 1 Jɔn 4:9) So lɛk wi brɔda dɛn trade we bin sho se dɛn gɛt fet, wisɛf de invayt ɔda pipul dɛn fɔ jɔyn wi fɔ atɛnd di Mɛmorial akɔdin to di we aw Jizɔs bin tich in disaypul dɛn fɔ du am.
WI DE INVAYT ƆDA PIPUL DƐN FƆ KAM DI MƐMORIAL
Wetin yu go du fɔ mek yu ebul prich mɔ di tɛm fɔ di Mɛmorial kampen? (Luk na paregraf 8 to 10) e
8. Wetin Jiova in pipul dɛn dɔn du fɔ invayt ɔda pipul dɛn fɔ kam di Mɛmorial? (Luk di pikchɔ.)
8 Fɔ lɔng tɛm naw, Jiova in pipul dɛn dɔn de invayt ɔda pipul dɛn fɔ atɛnd di Mɛmorial. Frɔm 1881, dɛn bin de invayt brɔda ɛn sista dɛn na Amɛrika fɔ mit togɛda na wan brɔda in os na Aligani, Pɛnsilvenia, fɔ da spɛshal program de. Leta, ɔl di kɔngrigeshɔn dɛn bin de ol dɛn yon Mɛmorial fɔ dɛnsɛf. Insay Mach 1940, dɛn tɛl di pɔblisha dɛn se dɛn kin invayt ɛnibɔdi na dɛn tɛritri we sho se i want fɔ no mɔ. Insay 1960, fɔ di fɔs tɛm, Bɛtɛl bin print inviteshɔn dɛn ɛn gi di kɔngrigeshɔn dɛn. Frɔm da tɛm de, wi dɔn de sheb bɔku bɔku Mɛmorial inviteshɔn dɛn. Wetin mek wi de yuz bɔku tɛm ɛn ɛfɔt fɔ invayt ɔda pipul dɛn?
9-10. Udat dɛn de bɛnifit we wi invayt ɔda pipul dɛn fɔ kam di Mɛmorial? (Jɔn 3:16)
9 Wan rizin we mek wi de invayt ɔda pipul dɛn fɔ atɛnd di Mɛmorial wit wi na bikɔs wi want di wan dɛn we de atɛnd di Mɛmorial fɔ di fɔs tɛm fɔ lan di tru tin bɔt wetin Jiova ɛn Jizɔs dɔn du fɔ wi ɔl. (Rid Jɔn 3:16.) Wi op se wetin dɛn go si ɛn yɛri na di Mɛmorial go muv dɛn fɔ lan mɔ ɛn ɛp dɛn fɔ bi wan pan Jiova in savant dɛn. Bɔt ɔda pipul dɛn kin bɛnifit bak.
10 Wi kin invayt di wan dɛn bak we dɔn stɔp fɔ sav Jiova. Wi kin du dat fɔ mɛmba dɛn se Gɔd stil lɛk dɛn. Bɔku pan dɛn kin kam di Mɛmorial, ɛn wi kin rili gladi fɔ si dɛn. We dɛn atɛnd di Mɛmorial, dat de mɛmba dɛn bɔt aw dɛn bin de ɛnjɔy we dɛn bin de wɔship Jiova trade. Lɛ wi tɔk bɔt Mɔnika in ɛgzampul. c Dɛn bin ɛp am fɔ bi pɔblisha bak insay di COVID-19 pandɛmik. Afta i atɛnd di Mɛmorial insay 2021, i tɔk se: “Dis Mɛmorial rili spɛshal fɔ mi. Fɔ di fɔs tɛm insay 20 ia, a bin ebul fɔ prich to pipul dɛn ɛn invayt dɛn fɔ kam di Mɛmorial. A bin rili du ɔl wetin a ebul fɔ invayt ɔda pipul dɛn bikɔs a rili gladi fɔ wetin Jiova ɛn Jizɔs dɔn du fɔ mi.” (Sam 103:1-4) Ilɛksɛf pipul dɛn atɛnd di Mɛmorial ɔ dɛn nɔ atɛnd, wi de du wi bɛst fɔ invayt ɔda pipul dɛn fɔ kam na di Mɛmorial bikɔs wi no se Jiova de gladi fɔ wi ɛfɔt.
11. Aw Jiova dɔn blɛs di ɛfɔt we wi de mek fɔ invayt pipul dɛn fɔ kam di Mɛmorial? (Egay 2:7)
11 Jiova dɔn rili blɛs wi ɛfɔt fɔ invayt pipul dɛn fɔ kam di Mɛmorial. Insay 2021, pan ɔl we wi nɔ bin ebul fɔ du bɔku tin dɛn bikɔs ɔf di COVID-19 pandɛmik, wi bin gɛt 21,367,603 pipul dɛn we atɛnd di Mɛmorial. Dis nɔmba bɔku fa fawe pas ɔl di Jiova Witnɛs dɛn we de na di wɔl. Jiova nɔ jɔs bisin bɔt ɔmɔs pipul dɛn atɛnd di Mɛmorial, bɔt na di pipul dɛnsɛf sɛf i bisin bɔt. (Lyuk 15:7; 1 Tim. 2:3, 4) Wi biliv se we wi de yuz di inviteshɔn, Jiova de ɛp wi fɔ fɛn di wan dɛn we rili want fɔ no mɔ bɔt am.—Rid Egay 2:7.
WI DE ATƐND DI MƐMORIAL ILƐK TIN NƆ IZI FƆ WI
Jiova de blɛs wi ɛfɔt fɔ atɛnd di Mɛmorial (Luk na paregraf 12) f
12. Wetin-ɛn-wetin kin mek i nɔ izi fɔ wi fɔ atɛnd di Mɛmorial? (Luk di pikchɔ.)
12 Jizɔs bin tɔk se insay di las dez, wi go gɛt bɔku prɔblɛm dɛn we nɔ izi fɔ wi; wi famili go de agens wi, pipul dɛn go de mek wi sɔfa, wɔ go de, sik dɛn we de prɛd go de, ɛn bɔku ɔda tin dɛn. (Mat. 10:36; Mak 13:9; Lyuk 21:10, 11) Sɔntɛnde, dɛn prɔblɛm dɛn de kin mek i nɔ izi fɔ wi fɔ mɛmba Jizɔs in day. Wetin wi brɔda ɛn sista dɛn dɔn du fɔ bia dɛn prɔblɛm dɛn ya, ɛn aw Jiova dɔn ɛp dɛn?
13. Aw Jiova bin blɛs Atyam we i mek maynd fɔ ol di Mɛmorial we i de na prizin?
13 We dɛn put wi na prizin. Wi brɔda dɛn we dɛn kin put na prizin bikɔs ɔf wetin dɛn biliv kin du wetin dɛn ebul fɔ mɛmba Jizɔs in day. Lɛ wi tɔk bɔt Atyam in ɛgzampul. Di tɛm fɔ di 2020 Mɛmorial, i bin de na wan 17 skwaya mita ɔ 183 skwaya fit sɛl we bin du fɔ jɔs fayv prizina dɛn. Pan ɔl we i bin de na prizin, i bin ebul fɔ gɛt sɔm tin dɛn fɔ yuz as bred ɛn wayn fɔ di Mɛmorial, ɛn i bin plan fɔ gi di Mɛmorial tɔk fɔ lɛ i bɛnifit. Bɔt in kɔmpin dɛn we dɛn ɔl bin de na di sɛl bin de smok ɛn kɔs pasmak. Wetin i du? I beg dɛn fɔ mek dɛn nɔ kɔs ɔ smok fɔ jɔs wan awa. Atyam bin sɔprayz we in kɔmpin dɛn we dɛn ɔl bin de na di sɛl bin gri se dɛn nɔ go smok ɔ kɔs di tɛm fɔ di Mɛmorial. Atyam tɔk se, “A tɛl dɛn se a go want fɔ tɛl dɛn mɔ bɔt di Mɛmorial.” Pan ɔl we dɛn nɔ bin want fɔ yɛri bɔt di program, afta we dɛn si ɛn yɛri we Atyam bin ol di Mɛmorial, dɛn bigin fɔ aks am kwɛstyɔn dɛn bɔt di program.
14. Wetin-ɛn-wetin Jiova in pipul dɛn bin du fɔ ol di Mɛmorial insay di COVID-19 pandɛmik?
14 COVID-19 pandɛmik. Bikɔs ɔf dis pandɛmik, Jiova in pipul dɛn nɔ bin ebul fɔ atɛnd di Mɛmorial na Kiŋdɔm Ɔl. Bɔt dat nɔ bin stɔp dɛn fɔ mek dɛn nɔ ol di Mɛmorial. d Kɔngrigeshɔn dɛn we gɛt Intanɛt bin ol di Mɛmorial bay vidio kɔnfrɛns. Bɔt we di ɔda bɔku bɔku pipul dɛn we nɔ gɛt Intanɛt? Na sɔm kɔntri dɛn, dɛn bin mek arenjmɛnt fɔ lɛ dɛn gi di tɔk na tɛlivishɔn ɔ na rɛdio. Apat frɔm dat, difrɛn difrɛn branch dɛn bin rɛkɔd di Mɛmorial tɔk insay pas 500 langwej dɛn, so dat ɔda pipul dɛn go ebul bɛnifit frɔm di Mɛmorial. Ɛn fetful brɔda dɛn bin kɛr dɛn rɛkɔdin dɛn ya to di wan dɛn we bin nid am.
15. Wetin yu lan frɔm wan Baybul studɛnt we nem Su in ɛgzampul?
15 We wi famili de agens wi. Fɔ sɔm pipul dɛn, wan men prɔblɛm we kin mek i nɔ izi fɔ mek dɛn atɛnd di Mɛmorial na we dɛn famili de agens dɛn. Lɛ wi tɔk bɔt wan Baybul studɛnt we nem Su. Insay 2021, di de bifo di Mɛmorial, Su bin tɛl in Baybul ticha se i nɔ go ebul fɔ atɛnd di Mɛmorial bikɔs in famili de agens am. In Baybul ticha bin rid Lyuk 22:44. Dɔn i ɛksplen to am se we wi gɛt prɔblɛm dɛn, wi fɔ fala Jizɔs in ɛgzampul bay we wi de pre to Jiova ɛn abop pan Am wit ɔl wi at. Di nɛks de, Su bin rɛdi di bred ɛn di wayn, ɛn i wach di spɛshal Mɔnin Wɔship program na jw.org. Dɔn ivintɛm, we in wangren bin de na in rum, i yuz in fon fɔ lisin to di Mɛmorial. Afta di Mɛmorial, Su bin rayt to in Baybul ticha ɛn tɛl am se: “Yu rili ɛnkɔrej mi yɛstade. A du ɔl wetin a ebul fɔ atɛnd di Mɛmorial, ɛn Jiova bin rili ɛp mi. A rili gladi ɛn a tɛl am tɛnki!” Yu tink se Jiova go ɛp yu if yu gɛt dɛn kayn prɔblɛm dɛn de?
16. Wetin mek wi shɔ se Jiova go blɛs wi ɛfɔt fɔ atɛnd di Mɛmorial? (Romans 8:31, 32)
16 Jiova rili valyu di ɛfɔt we wi de mek fɔ mɛmba Jizɔs in day. Wi shɔ se i go blɛs wi we wi sho tɛnki fɔ wetin i dɔn du fɔ wi. (Rid Romans 8:31, 32.) So lɛ wi mekɔp wi maynd fɔ atɛnd di Mɛmorial dis ia ɛn du ɔl wetin wi ebul fɔ du mɔ na di prichin wok insay di tɛm fɔ di Mɛmorial.
SIŊ 18 Wi Gladi fɔ Jizɔs in Day Wan
a Tyusde Epril 4, 2023, bɔku bɔku pipul dɛn ɔlsay na di wɔl go gɛda fɔ mɛmba di day we Krays bin day. Fɔ bɔku pipul dɛn, dis go bi di fɔs tɛm we dɛn go atɛnd dis program. Ɔda pipul dɛn we bin dɔn stɔp fɔ sav Jiova ɛn we nɔ bin de atɛnd di Mɛmorial fɔ lɔng tɛm dɛnsɛf go atɛnd di program. Fɔ sɔm ɔda pipul dɛn, sɔm tin dɛn go apin to dɛn we go mek i nɔ izi fɔ mek dɛn atɛnd di Mɛmorial, bɔt dɛn go stil tray tranga wan fɔ atɛnd. Ilɛk wetin de apin to yu, wi shɔ se Jiova go gladi we yu tray tranga wan fɔ atɛnd di Mɛmorial.
b Di wan dɛn we de atɛnd biliv se di bred ɛn di wayn kin chenj to Jizɔs in tru tru bɔdi ɛn blɔd. Dɛn de tink se ɛnitɛm we ɛnibɔdi tek pat pan dis sɛrimɔni, Jizɔs de sakrifays in bɔdi ɛn in blɔd.
c Dɛn dɔn chenj sɔm nem dɛn na dis atikul.
d Go na jw.org ɛn rid di atikul we gɛt di taytul “2021 Memorial Commemoration.”
