1. Wetin mek wi kin fred sɔntɛnde?

 SƆNTƐNDE, wi ɔl kin fred. Bɔt bikɔs wi no wetin di Baybul de tich, dat dɔn mek wi nɔ de fred dayman, di dimɔn dɛn, ɛn wetin go apin tumara bambay. Bɔt wi stil de liv insay tɛm we “fiaful tin dɛn” de apin, so sɔntɛnde wi kin fred bikɔs bad bad tin dɛn lɛk wɔ, kraym, ɛn siknɛs stil de. (Lyuk 21:11) Sɔntɛnde wi kin fred bak mɔtalman, lɛk di wan dɛn we de na pawa we de sɔprɛs wi ɔ wi fambul dɛn we de agens wi wɔship. Sɔm pipul dɛn kin wɔri se dɛn nɔ go ebul fɔ bia di prɔblɛm we de mit dɛn naw ɔ sɔntɛm di prɔblɛm we go mit dɛn tumara bambay.

2. Tɔk bɔt wetin apin to Devid we i bin de na Gat.

² Tɛm dɛn bin de we Devid bin de fred. Fɔ ɛgzampul, we Kiŋ Sɔl bin de rɔnafta Devid fɔ kil am, Devid bin disayd fɔ rɔnawe go na di Filistin dɛn siti we na Gat. I nɔ te, di kiŋ na Gat, we nem Ekish, bin kam fɔ no se Devid na bin di pawaful fɛtman we dɛn bin de siŋ bɔt se, i kil “tɛn tawzin” Filistin dɛn. Dis mek Devid “bin rili fred.” (1 Sam. 21:​10-12) I bin de wɔri bɔt wetin Ekish go du to am. Wetin bin ɛp Devid fɔ lɛf fɔ fred?

3. Akɔdin to Sam 56:​1-3, 11, wetin bin ɛp Devid fɔ lɛf fɔ fred?

³ Insay Sam 56, Devid tɔk bɔt aw i bin de fil di tɛm we i bin de na Gat. Insay da sam de, Devid ɛksplen klia wan wetin mek i bin de fred, bɔt i bin sho bak wetin bin ɛp am  fɔ lɛf fɔ fred. We Devid bin de fred, i bin abop pan Jiova. (Rid Sam 56:​1-3, 11.) Devid bin gɛt gud rizin dɛn fɔ abop pan Jiova. Jiova bin ɛp Devid fɔ disayd fɔ du sɔntin we luk strenj. I mek lɛk i kres, ɛn in plan bin wok! Dis bin mek bifo Ekish si Devid as pɔsin we i fɔ kil, i bin si am as pɔsin we de ambɔg am. So Devid bin ebul fɔ ɛskep.​—1 Sam. 21:13–22:1.

4. Wetin wi go du fɔ mek wi abop pan Jiova mɔ ɛn mɔ? Gi wan ɛgzampul.

⁴ Wisɛf kin lɛf fɔ fred we wi abop pan Jiova. Bɔt aw wi go rili abop pan Jiova, mɔ di tɛm dɛn we wi de fred? Tink bɔt dis ɛgzampul. If yu kam fɔ no se yu gɛt wan sik, fɔs yu go fred. Bɔt, yu at go kam dɔŋ if yu biliv di dɔktɔ. Sɔntɛm i go dɔn mɛn bɔku pipul dɛn we bin gɛt di sem sik. I tek tɛm lisin to yu we yu de ɛksplen to am di tin dɛn we de mek yu fred, ɛn yu si se i bisin bɔt yu. Dɔn i tɛl yu bɔt tritmɛnt we dɔn ɛp ɔda pipul dɛn. Semweso, wi go abop pan Jiova mɔ bay we wi tek tɛm tink bɔt wetin i dɔn ɔlrɛdi du fɔ wi, wetin i de du naw, ɛn wetin i gɛt fɔ du fɔ wi tumara bambay. Na dat Devid bin du. As wi de tek tɛm tɔk bɔt in wɔd dɛn we de na Sam 56, tink bɔt aw yusɛf go ebul abop pan Jiova mɔ ɛn nɔ wɔri pasmak we yu de fred.

WETIN JIOVA DƆN ƆLRƐDI DU?

5. Wetin Devid bin de tink bɔt we bin ɛp am fɔ lɛf fɔ fred? (Sam 56:​12, 13)

⁵ Pan ɔl we Devid in layf bin de pan denja, i bin kɔntinyu fɔ tink bɔt di gud tin dɛn we Jiova bin dɔn ɔlrɛdi du fɔ am. (Rid Sam 56:​12, 13.) Dis na sɔntin we Devid bin de du ɔltɛm. Sɔntɛnde, i bin de tink bɔt di tin dɛn we Jiova dɔn mek, dis bin ɛp am fɔ mɛmba se Jiova pawaful ɛn i rili lɛk mɔtalman. (Sam 65:​6-9) Devid bin de tink gud gud wan bak bɔt wetin Jiova dɔn du fɔ ɔda pipul dɛn. (Sam 31:19; 37:​25, 26) Ɛn i bin de tink gud gud wan mɔ bɔt wetin Jiova dɔn ɔlrɛdi du fɔ am. Jiova dɔn sɔpɔt ɛn kia fɔ am frɔm we i bin smɔl. (Sam 22:​9, 10) Wan dawt nɔ de se we Devid bin de tink  bɔt dɛn tin dɛn ya, dat bin ɛp am fɔ abop pan Jiova mɔ ɛn mɔ.

6. We wi de fred, wetin go ɛp wi fɔ abop pan Jiova?

⁶ Ɛnitɛm yu bigin fɔ fred, aks yusɛf, ‘Wetin Jiova dɔn ɔlrɛdi du?’ Tink bɔt di tin dɛn we i dɔn mek. Fɔ ɛgzampul, we wi “tek tɛm wach” aw Jiova de kia fɔ di bɔd ɛn flawa dɛn, pan ɔl we i nɔ mek dɛn lɛk aw i tan, ɛn pan ɔl we dɛn nɔ ebul fɔ wɔship am, dat de mek wi biliv se i go ebul kia fɔ wi. (Mat. 6:​25-32) Tink bak bɔt wetin Jiova dɔn du fɔ in savant dɛn. Yu kin stɔdi bɔt pɔsin na di Baybul we sho se i bin rili gɛt fet, ɔ yu kin rid ɛkspiriɛns bɔt wan pan Jiova in savant dɛn tide. a Dɔn bak, tink gud gud wan bɔt aw Jiova dɔn ɔlrɛdi sho se i bisin bɔt yu. Aw i bin ɛp yu fɔ kam na di trut? (Jɔn 6:44) Aw i dɔn ansa yu prea dɛn? (1 Jɔn 5:14) Aw yu de bɛnifit ɛvride frɔm di sakrifays we in Bɔypikin we i rili lɛk bin mek?​—Ɛfi. 1:7; Ibru. 4:​14-16.

7. Aw prɔfɛt Daniɛl in ɛkspiriɛns bin ɛp Vanɛsa fɔ lɛf fɔ fred?

⁷ Wan sista we nem Vanɛsa b we de na Eti, bin gɛt wan prɔblɛm we mek i rili fred. Wan man na in eria bin de kɔl am ɛn sɛn mɛsej to am ɛvride, i bin de mɔna am fɔ mek lɛ dɛn ɔl tu de. Vanɛsa bin mek i no klia wan se i nɔ want am. Bɔt di man kɔntinyu fɔ mɔna am mɔ ɛn mɔ ɛn ivin trɛtin fɔ du am bad. Vanɛsa tɔk se: “Dis bin mek a rili fred.” Wetin Vanɛsa bin du fɔ lɛf fɔ fred? I bin du sɔm tin dɛn fɔ protɛkt insɛf. Wan ɛlda bin ɛp am fɔ tɔk to di polis dɛn. Bɔt i bin pe atɛnshɔn bak pan aw Jiova bin dɔn protɛkt in savant dɛn trade. Vanɛsa tɔk se: “Di fɔs pɔsin we a tink bɔt na prɔfɛt Daniɛl. Dɛn bin ib Daniɛl na ol usay layɔn dɛn we angri bin de, pan ɔl we i nɔ bin du natin. Bɔt Jiova bin ɛp am. A pre to Jiova fɔ lɛ i mek di man lɛf fɔ tink bɔt mi, ɛn mek i sɔlv di prɔblɛm fɔ mi bikɔs a nɔ go ebul du ɛni ɔda tin. Afta dat, a lɛf fɔ fred.”​—Dan. 6:​12-22.

WETIN JIOVA DE DU NAW?

8. Wetin Devid bin biliv? (Sam 56:8)

⁸ Pan ɔl we Devid in layf bin de pan denja we i bin de na Gat, i nɔ bin pe atɛnshɔn pan di tin dɛn we bin de mek i fred. Bifo dat, i bin disayd fɔ tink bɔt wetin Jiova bin de du fɔ am da tɛm de. Devid bin no se Jiova de gayd ɛn protɛkt am, ɛn Jiova no aw i de fil. (Rid Sam 56:8.) Devid bin gɛt bak gud padi dɛn, lɛk Jonɛtan, ɛn Ay Prist Aimilɛk, we bin ɛnkɔrej am ɛn ɛp am. (1 Sam. 20:​41, 42; 21:​6, 8, 9) Ɛn Devid bin ebul fɔ rɔnawe pan ɔl we Kiŋ Sɔl bin want fɔ kil am. I bin biliv se Jiova no gud gud wan wetin de apin to am ɛn aw i bin de fil.

9. Wetin Jiova no bɔt ɛniwan pan wi?

⁹ We yu gɛt prɔblɛm we de mek yu fred, mɛmba se Jiova de si di prɔblɛm ɛn i no aw da prɔblɛm de de mek yu fil. Fɔ ɛgzampul, Jiova nɔ bin jɔs no bɔt di bad we we dɛn bin de trit di Izrɛlayt dɛn na Ijipt, bɔt i bin no bak bɔt aw “dɛn [bin] de sɔfa.” (Ɛks. 3:7) Devid bin siŋ se Jiova bin si in “trɔbul” ɛn di ‘sɔfa we i bin de sɔfa.’ (Sam 31:7) Ɛn pan ɔl we Gɔd in pipul dɛn bin de sɔfa bikɔs ɔf di rɔng tin dɛn we dɛn bin disayd fɔ du, Jiova  bin “fil am” fɔ dɛn. (Ayz. 63:9) We yu de fred, Jiova ɔndastand aw yu de fil, ɛn i rili want fɔ ɛp yu fɔ lɛf fɔ fred.

10. Wetin mek yu biliv se Jiova de si wetin de apin to yu, ɛn i go ɛp yu fɔ bia wit ɛni prɔblɛm we yu gɛt?

¹⁰ Bɔt sɔntɛm yu go de wɔnda aw Jiova de sɔpɔt yu we yu gɛt prɔblɛm we de mek yu fred. Pre to am fɔ mek i ɛp yu fɔ si di we aw i de sɔpɔt yu. (2 Kiŋ 6:​15-17) Tink bɔt dis: Fɔ se wan tɔk ɔ kɔmɛnt we dɛn gi na mitin dɔn ɛnkɔrej yu? Wan pan wi pɔblikeshɔn dɛn, vidio, ɔ orijinal siŋ dɔn ɛnkɔrej yu? Sɔmbɔdi dɔn tɔk sɔntin ɔ rid wan skripchɔ na di Baybul we mek yu fil fayn? Sɔntɛm wi go fɔgɛt bɔt di lɛk we wi brɔda ɛn sista dɛn lɛk wi ɛn aw di ɛnkɔrejmɛnt we wi de gɛt frɔm Gɔd in Wɔd dɔn ɛp wi. Bɔt, ɔl dis na wɔndaful gift dɛn we Jiova dɔn gi wi. (Ayz. 65:13; Mak 10:​29, 30) Dɛn de sho se Jiova bisin bɔt yu. (Ayz. 49:​14-16) Ɛn dɛn de sho se Jiova fit fɔ mek yu abop pan am.

11. Wetin bin ɛp Ayda fɔ lɛf fɔ fred?

¹¹ Ayda we de na Sɛnigal, bin pe atɛnshɔn to di we aw Jiova bin sɔpɔt am we i bin gɛt wan prɔblɛm. Bikɔs na in na di big wan, in mama ɛn papa bin de ɛkspɛkt se i fɔ wok so dat i go gɛt mɔni fɔ kia fɔ dɛn ɛn insɛf. Bɔt bikɔs Ayda bin disayd fɔ liv simpul layf so dat i go ebul fɔ payɔnia, dat bin mek i gɛt mɔni prɔblɛm. Dis mek in famili vɛks ɛn tɔk bad bɔt am. I tɔk se: “A bin de wɔri se a nɔ go ebul ɛp mi mama ɛn papa. Ɛn a bin de fred se ɔlman go tɔn dɛn bak pan mi. A bin de ivin blem Jiova fɔ we i alaw tin fɔ bad-ɔf dis kayn we.” Dɔn Ayda bin lisin to wan tɔk na mitin. Ayda tɔk se: “Di brɔda bin mɛmba wi se ilɛk aw wi de wɔri ɔ fred, Jiova no wetin de apin to wi. Bikɔs ɔf di advays we di ɛlda dɛn ɛn ɔda pipul dɛn bin de gi mi, smɔl smɔl, a kam fɔ biliv bak se Jiova lɛk mi. A stat fɔ pre to Jiova wit kɔnfidɛns, ɛn we a si se Jiova de ansa mi prea dɛn, dat bin mek a gɛt kolat.” As tɛm de go, Ayda bin gɛt wok we nɔ bin jɔs ɛp am fɔ sɔpɔt insɛf as i de payɔnia, bɔt i bin ɛp am bak fɔ sɔpɔt in mama ɛn papa ɛn ɔda pipul dɛn. I tɔk se: “A dɔn lan fɔ  abop pan Jiova wit ɔl mi at. Naw, a kin lɛf fɔ fred afta a dɔn pre.”

WETIN JIOVA GƐT FƆ DU TUMARA BAMBAY?

12. Akɔdin to Sam 56:​9, wetin Devid bin biliv?

¹² Rid Sam 56:9. Dis vas tɔk bɔt ɔda tin we bin ɛp Devid fɔ lɛf fɔ fred. Pan ɔl we Devid in layf bin stil de pan denja, i bin tink gud gud wan bɔt wetin Jiova gɛt fɔ du fɔ am. Devid bin no se Jiova go sev am di rayt tɛm. Jiova bin dɔn tɔk se na Devid go bi di nɛks kiŋ na Izrɛl. (1 Sam. 16:​1, 13) To Devid, ɛnitin we Jiova dɔn prɔmis, i tan lɛk se i dɔn ɔlrɛdi apin.

13. Us kɔnfidɛns wi fɔ gɛt pan Jiova?

¹³ Wetin Jiova dɔn prɔmis fɔ du fɔ yu? Wi nɔ de ɛkspɛkt se i go protɛkt wi frɔm ɔl di prɔblɛm dɛn we de tide. c Bɔt stil, mɛmba se ɛnikayn prɔblɛm we go mit yu, Jiova go pul da prɔblɛm de na di nyu wɔl tumara bambay. (Ayz. 25:​7-9) Wan dawt nɔ de se di Wan we mek wi, gɛt di pawa fɔ mek dayman dɛn gɛt layf bak, fɔ pul ɔlkayn sik, ɛn fɔ mek ɔl di wan dɛn we de agens wi nɔ de igen.—1 Jɔn 4:4.

14. Wetin wi go ebul tink gud gud wan bɔt?

¹⁴ Ɛnitɛm yu bigin fɔ fred, tink gud gud wan bɔt wetin Jiova go du tumara bambay. Tink bɔt aw yu go fil we Setan nɔ go de igen, we dɛn go dɔnawe wit wikɛd pipul dɛn, we na pipul dɛn nɔmɔ we de du wetin rayt go de, ɛn we wi go de pafɛkt smɔl smɔl. Wan dɛmɔnstreshɔn na di 2014 kɔnvɛnshɔn program tɔk bɔt aw wi kin tink gud gud wan bɔt wi op. Wan papa bin ɛksplen to in famili aw di wɔd dɛn na 2 Timoti 3:​1-5 go difrɛn if dɛn vas dɛn ya bin de tɔk bɔt aw layf go tan lɛk na Paradays. I bin se: “Insay di nyu wɔl, gladi-at go de ɔlsay. Pipul dɛn go lɛk dɛn kɔmpin dɛn, dɛn go lɛk di trut, dɛn nɔ go de du tin pasmak, dɛn go put dɛnsɛf dɔŋ, dɛn go de prez Gɔd, dɛn go de obe dɛn mama ɛn papa dɛn, dɛn go gɛt tɛnki, dɛn nɔ go de kɔmɔt biɛn dɛn kɔmpin dɛn, dɛn go [rili] lɛk dɛn famili, dɛn go de gri wit ɔda pipul dɛn, dɛn nɔ go de pwɛl pɔsin in nem, dɛn go ebul kɔntrol dɛnsɛf, dɛn nɔ go wayl, dɛn go lɛk fɔ du gud, dɛn go bi pipul dɛn we ɔda pipul dɛn kin abop pan, dɛn nɔ go trangayes, dɛn nɔ go prawd, dɛn nɔ go lɛk ɛnjɔymɛnt bɔt dɛn go lɛk Gɔd, dɛn go de sav Gɔd ɛn liv dɛn layf di we aw i want; miks wit dɛn kayn pipul dɛn de.” Yu kin tɔk bɔt aw layf go tan lɛk na di nyu wɔl wit yu famili ɔ kɔmpin Kristian dɛn?

15. Pan ɔl we Tanya bin de fred, wetin bin ɛp am fɔ lɛf fɔ fred?

¹⁵ Wan sista we de na Nɔt Masidonia we nem Tanya lɛf fɔ fred bay we i bin de tink gud gud wan bɔt di blɛsin dɛn we i go gɛt tumara bambay. In mama ɛn papa bin rili de agens di stɔdi we i bin de stɔdi di Baybul. I tɔk se: “Sɔm pan di tin dɛn we a bin de fred se go apin bin apin. Mi mama bin de bit mi ɛnitɛm a kɔmɔt mitin. Mi mama ɛn papa bin trɛtin fɔ kil mi if a bi Jiova Witnɛs.” Faynali, Tanya in mama ɛn papa bin drɛb am kɔmɔt na os. Wetin i bin du? I tɔk se: “A bin pe atɛnshɔn pan aw a go gladi sote go fɔ we a disayd nɔ fɔ kɔmɔt biɛn Jiova. A bin tink bak bɔt aw Jiova go blɛs mi insay di nyu wɔl fɔ ɛnitin we a lɔs na dis wɔl, ɛn aw a go fɔgɛt bɔt ɔl di bad tin dɛn we de  apin.” Tanya kɔntinyu fɔ de biɛn Jiova. Ɛn Jiova bin ɛp am fɔ gɛt ples fɔ de. Naw, Tanya dɔn mared to wan fetful brɔda, ɛn dɛn ɔl tu de yuz ɔl dɛn tɛm fɔ sav Jiova wit gladi-at.

TRAY FƆ ABOP PAN JIOVA MƆ ƐN MƆ

16. Wetin go ɛp wi fɔ gɛt maynd we wi si di tin dɛn we Lyuk 21:​26-28 tɔk bɔt de kam tru?

¹⁶ Insay di tɛm fɔ da big big trɔbul, pipul dɛn go “fent bikɔs dɛn de fred.” Bɔt Gɔd in pipul dɛn go kɔntinyu fɔ tinap tranga wan ɛn gɛt maynd. (Rid Lyuk 21:​26-28.) Wetin mek wi nɔ go fred? Na bikɔs wi go dɔn ɔlrɛdi lan fɔ abop pan Jiova. Tanya we wi bin dɔn tɔk bɔt bin tɔk se, di tin dɛn we bin apin to am de ɛp am fɔ bia wit di prɔblɛm dɛn we nɔ kin izi fɔ am. I tɔk se: “A dɔn lan se Jiova ebul fɔ ɛp wi fɔ bia ɛni prɔblɛm we wi gɛt, ɛn i de blɛs wi. Sɔntɛnde, i kin tan lɛk se na ɔda pipul dɛn de kɔntrol di tin dɛn we de apin. Bɔt di tru na dat, Jiova gɛt pawa pas dɛn. Ɛn pan ɔl we i nɔ go izi fɔ bia di prɔblɛm, i go dɔn.”

17. Aw wi iatɛks fɔ 2024 go ɛp wi? (Luk di pikchɔ na di frɔnt pej.)

¹⁷ Tide, bɔku tin dɛn de apin we kin mek wi fred. Bɔt jɔs lɛk Devid, wi nɔ want fɔ alaw di fred we wi de fred fɔ kɔntrol wi. Wi iatɛks fɔ 2024 na prea we Devid bin pre to Jiova. I bin se: “We a de fred, na pan yu a de abop.” (Sam 56:3) Wan masta sabi bukman we stɔdi di Baybul bin rayt sɔntin bɔt dis vas. I bin se: “Devid nɔ bin de kɔntinyu fɔ tink bɔt in prɔblɛm ɔ di tin dɛn we bin de mek i fred. Bɔt i bin abop pan di Wan we go sev am.” Tink bɔt wi iatɛks insay di mɔnt dɛn we gɛt fɔ kam, mɔ di tɛm dɛn we yu de bia prɔblɛm dɛn we de mek yu fred. Tek tɛm tink bɔt wetin Jiova dɔn du trade, wetin i de du naw, ɛn wetin i go du tumara bambay. Dɔn lɛk Devid, yusɛf go ebul tɔk se: “A abop pan Gɔd; a nɔ de fred.”​—Sam 56:4.