1-2. Us prɔblɛm dɛn kin mit Jiova in fetful savant dɛn?

 IF BAD tin apin to wi, dat kin mek wi layf chenj kwik kwik wan ɛn tin nɔ kin ɛva bi di sem igen. Fɔ ɛgzampul, wan fetful brɔda we nem Luis a bin kam fɔ no se i gɛt kansa. Di dɔktɔ bin tɛl am se i nɔ gɛt bɛtɛ tɛm fɔ liv. Monika ɛn in man bin bizi de wok fɔ Jiova. Dɔn wan de, Monika kam fɔ no se in man we na ɛlda dɔn de sin sikrit wan fɔ lɔng tɛm. Olivia, we na wan sista we nɔ mared, bin gɛt fɔ rɔnawe kɔmɔt na in os bikɔs big big briz bin de kam. We i kam bak, i si se di big big briz dɔn pwɛl in os. Insay shɔt tɛm, ɔltin bɔt dɛn pipul dɛn ya bin chenj. Dis sem kayn tin dɔn apin to yu? Prɔblɛm dɔn mit yu we mek kwik kwik wan tin chenj fɔ yu?

² Pan ɔl we wi na Jiova in fetful savant dɛn, wi kin stil gɛt prɔblɛm dɛn, ɛn wi kin sik jɔs lɛk ɔda pipul dɛn. Dɔn bak, di wan dɛn we et Gɔd in pipul dɛn go de agens wi ɔ dɛn go mek wi sɔfa. Pan ɔl we Jiova nɔ de protɛkt wi frɔm dɛn prɔblɛm dɛn de, i prɔmis se i go ɛp wi. (Ayz. 41:10) Wit Jiova in ɛp, wi go kɔntinyu fɔ gɛt gladi-at, disayd fɔ du di rayt tin dɛn, ɛn kɔntinyu fɔ de biɛn am  ilɛk aw tin tranga fɔ wi. Insay dis atikul, wi go tɔk bɔt 4 we dɛn we Jiova de ɛp wi di tɛm dɛn we wi gɛt prɔblɛm. Wi go tɔk bak bɔt wetin wi nid fɔ du fɔ mek wi go bɛnifit frɔm di ɛp we i de ɛp wi.

JIOVA GO GAYD YU

3. We wi gɛt siriɔs prɔblɛm, wetin nɔ kin izi fɔ du?

³ Di tin we nɔ kin izi. We bad tin apin to wi, i nɔ kin izi fɔ mek wi tink di rayt we ɛn disayd wetin fɔ du. Wetin mek? Na bikɔs wi at kin rili pwɛl. Wi kin kɔnfyuz ɛn nɔ no wetin fɔ du. Wi kin fil lɛk se wi de waka insay tik tik dyu, ɛn wi nɔ no usay fɔ go. Notis aw di tu sista dɛn we wi bin dɔn tɔk bɔt bin fil di tɛm we dɛn bin gɛt prɔblɛm. Olivia tɔk se: “Afta di big big briz pwɛl mi os, a nɔ bin no wetin fɔ du, mi at bin rili pwɛl, ɛn a bin wɔri. Monika we in man bin kɔmɔt biɛn am tɔk se: “A nɔ bin jɔs fil se i disapɔynt mi. I bin tan lɛk se pɔsin dɔn chuk mi. A nɔ bin ebul du di tin dɛn we a bin dɔn yus fɔ du. A nɔ bin ɛva tink se dis kayn tin go apin to mi.” Aw Jiova prɔmis fɔ ɛp wi we wi at rili pwɛl?

4. Akɔdin to Filipians 4:​6, 7, wetin Jiova prɔmis fɔ gi wi?

⁴ Wetin Jiova de du? I prɔmis fɔ gi wi wetin di Baybul kɔl “di pis we Gɔd de gi.” (Rid Filipians 4:​6, 7.) Dis min di kolat we wi kin gɛt bikɔs wi gɛt tayt padi biznɛs wit am. Dis pis we “mɔtalman nɔ ebul ɔndastand” wɔndaful pas ɛnitin we wi ebul fɔ imajin. Fɔ ɛgzampul, yu dɔn ɛva pre tranga wan to Jiova, ɛn afta yu dɔn fɔ pre yu sɔprayz bikɔs yu at rili kol? Yu bin fil da we de bikɔs yu bin gɛt “di pis we Gɔd de gi.”

5. Aw di pis we Gɔd de gi de gayd wi maynd ɛn at?

⁵ Filipians 4:7 tɔk bak se di pis we Gɔd de gi go “gayd” ɔ protɛkt, wi “at ɛn maynd.” Di orijinal wɔd fɔ “gayd” na wɔd we dɛn kin yuz fɔ tɔk bɔt sojaman dɛn we de gayd siti ɛn we de protɛkt di siti fɔ mek dɛn nɔ atak am. Pipul dɛn we de na siti we dɛn de gayd kin fil sef, bikɔs dɛn no se sojaman dɛn de we de protɛkt dɛn. Semweso, we di pis we Gɔd de gi de gayd wi at ɛn maynd, wi at kin kol bikɔs wi no se wi sef. (Sam 4:8) Jɔs lɛk Ana, ilɛksɛf wi prɔblɛm nɔ sɔlv wantɛm wantɛm, wi kin stil gɛt kolat. (1 Sam. 1:​16-18) Ɛn we wi gɛt kolat, bɔku tɛm i kin izi fɔ mek wi tink di rayt we ɛn disayd fɔ du di rayt tin dɛn.

6. Wetin wi go du fɔ bɛnifit frɔm di pis we Gɔd de gi? (Luk bak di pikchɔ.)

⁶ Wetin wi nid fɔ du? We yu gɛt  prɔblɛm, jɔs lɛk aw pipul dɛn we de na siti go kɔl gaydman fɔ protɛkt dɛn, na so wisɛf fɔ pre to Jiova fɔ protɛkt wi. Aw? Pre te yu gɛt di pis we Gɔd de gi. (Lyuk 11:9; 1 Tɛs. 5:17) Luis we wi bin dɔn tɔk bɔt, ɛksplen aw in ɛn in wɛf, Ana, bin ebul fɔ bia we dɛn kam fɔ no se i nɔ gɛt bɛtɛ tɛm igen fɔ liv. I tɔk se: “We tin lɛk dis apin, i nɔ kin rili izi fɔ disayd fɔ du di rayt tin bɔt yu wɛlbɔdi ɛn ɔda tin dɛn. Bɔt wi bin ebul fɔ gɛt kolat insay dis tɛm we tin nɔ bin rili izi bikɔs wi bin de pre.” Luis ɛn in wɛf tɔk se dɛn bin de rili pre, ɛn dɛn bin de pre ɔltɛm fɔ mek Jiova gi dɛn kolat, fɔ lɛ dɛn nɔ wɔri, ɛn fɔ mek i gi dɛn di sɛns we dɛn nid fɔ disayd fɔ du di rayt tin dɛn. Ɛn dɛn si se Jiova bin ɛp dɛn. If yu gɛt prɔblɛm, nɔ taya fɔ pre, ɛn Jiova go gi yu pis we go gayd yu at ɛn maynd.​—Rom. 12:12.

JIOVA GO ƐP YU FƆ DE SEF WAN

7. Aw wi kin fil we wi gɛt prɔblɛm?

⁷ Di tin we nɔ kin izi. We wi gɛt prɔblɛm, di we aw wi kin fil, tink, ɛn du tin kin difrɛn frɔm aw wi dɔn yus fɔ de du. Jɔs lɛk aw ship nɔ kin stɛdi na si we big big briz de blo, na so di we aw wi kin fil kin afɛkt wi. Ana we wi bin tɔk bɔt, tɔk se i bin de fil difrɛn we dɛn afta Luis day. I bin tɔk se: “Sɔntɛnde, mi at kin rili pwɛl, ɛn a kin bigin sɔri fɔ misɛf. A kin vɛks bak bikɔs i dɔn day.” Ɔda tɛm dɛn de we Ana bin fil se na in wangren de ɛn i nɔ bin gladi fɔ du di tin dɛn we Luis bin de du fayn fayn wan. Sɔntɛnde, i bin de fil lɛk se i de na si ɛn big big briz de blo. Aw Jiova de ɛp wi we wi nɔ ebul fɔ kɔntrol di we aw wi de fil?

8. Akɔdin to Ayzaya 33:​6, wetin Jiova prɔmis wi?

⁸ Wetin Jiova de du? I prɔmis fɔ ɛp wi fɔ de sef wan. (Rid Ayzaya 33:6.) We big big briz de blo na si, i kin mek ship nɔ de stɛdi. Fɔ mek di ship go stɛdi, i nid fɔ gɛt spɛshal padul dɛn na ɔl tu di sayd dɛn ɔnda di wata. Dɛn padul dɛn de go ɛp di ship fɔ mek i nɔ shek shek bɛtɛ, ɛn mek di pipul dɛn na di ship travul sef wan. Bɔt, bɔku pan dɛn padul dɛn de kin wok fayn fayn wan we di ship de muv go bifo. Semweso, Jiova go ɛp wi fɔ de sef wan as wi de kɔntinyu fɔ sav am fetful wan di tɛm dɛn we wi gɛt prɔblɛm.

9. Aw wi risach tul dɛn go ɛp wi fɔ kɔntinyu fɔ tinap tranga wan? (Luk bak di pikchɔ.)

⁹ Wetin wi nid fɔ du? We yu at rili pwɛl, du yu bɛst fɔ kɔntinyu fɔ de pre, atɛnd di mitin dɛn, ɛn fɔ de prich. Fɔ tru, yu nɔ go ebul fɔ du di bɔku wok dɛn we yu bin  de du trade, bɔt mɛmba se Jiova nɔ de ɛkspɛkt wi fɔ du pas wetin wi ebul fɔ du. (Luk bak Lyuk 21:​1-4.) Dɔn bak, sɛt tɛm fɔ du pasɔnal stɔdi ɛn fɔ de tink gud gud wan. Wetin mek? Jiova dɔn yuz in ɔganayzeshɔn fɔ gi wi fayn fayn atikul ɛn vidio dɛn we go ɛp wi fɔ kɔntinyu fɔ tinap tranga wan di tɛm dɛn we wi gɛt prɔblɛm. Fɔ mek yu go ebul fɛn wetin yu nid, yu kin yuz di risach tul dɛn we de insay yu langwej, lɛk di JW Laybri ap, Watch Tower Publications Index, ɛn di Buk we De Ɛp Jiova Witnɛs dɛn fɔ No bɔt Sɔntin. Mɔnika, we wi bin dɔn tɔk bɔt, tɔk se i kin yuz dɛn risach tul dɛn ya ɛnitɛm i bigin fil pen na in at. Fɔ ɛgzampul, i bin sach fɔ di wɔd “vɛks.” Ɛn ɔda tɛm dɛn, i bin sach fɔ di wɔd dɛn “kɔntinyu fɔ de biɛn pɔsin.” Dɔn i go rid te i fil fayn. I tɔk se: “We a bigin fɔ du mi risach, a bin rili wɔri. Bɔt as a de kɔntinyu fɔ rid, a kin fil lɛk se Jiova de ɔg mi tayt wan. We a bin de rid, a kam fɔ no se Jiova ɔndastand ɔl di difrɛn we dɛn aw a de fil, ɛn i bin de ɛp mi.” Da kayn ɛp de we Jiova de gi go ɛp yu bak fɔ kɔntinyu fɔ tinap tranga wan te yu at rili kol.​—Sam 119:​143, 144.

JIOVA GO SƆPƆT YU

10. Aw wi kin fil we bad tin apin to wi?

¹⁰ Di tin we nɔ kin izi. If sɔntin apin to wi we mek wi at rili pwɛl, tɛm dɛn go de we wi go fil wik ɛn nɔ ebul fɔ du ɛnitin. Wi go fil lɛk spɔtman we bin yus fɔ de rɔn fast bɔt we dɔn wund ɔ skrap. Ɛn naw i de bɛn we i de waka. I nɔ go izi fɔ lɛ wi du di tin dɛn we bin izi fɔ du, ɔ sɔntɛm wi nɔ go ivin want fɔ du di tin dɛn we wi bin de ɛnjɔy fɔ du. Jɔs lɛk Ilayja, wi go fil se i nɔ izi fɔ grap. Wi go jɔs want fɔ slip. (1 Kiŋ 19:​5-7) Wetin Jiova prɔmis fɔ du we wi fil wik?

11. Us ɔda we Jiova de ɛp wi? (Sam 94:18)

¹¹ Wetin Jiova de du? I prɔmis fɔ sɔpɔt wi. (Rid Sam 94:18.) Jɔs lɛk aw spɔtman nid pɔsin fɔ sɔpɔt am fɔ muv we i wund ɔ skrap, na so wisɛf nid ɛp fɔ kɔntinyu fɔ sav Jiova. Dɛn tɛm dɛn de, Jiova dɔn prɔmis wi se: “Mi na Jiova we na una Gɔd, a de ol una rayt an, na mi na di wan we de tɛl una se, ‘una nɔ fred. A go ɛp una.’” (Ayz. 41:13) Jiova bin ɛp Kiŋ Devid dis kayn we. We Devid bin gɛt prɔblɛm ɛn ɛnimi dɛn, i tɛl Jiova se: “Yu raytan de  sɔpɔt mi.” (Sam 18:35) Bɔt aw Jiova de sɔpɔt wi?

12. Udat Jiova kin yuz fɔ ɛp wi di tɛm dɛn we wi kin fil wik?

¹² Bɔku tɛm, Jiova kin sɔpɔt wi bay we i de mek ɔda pipul dɛn ɛp wi. Fɔ ɛgzampul, wantɛm we Devid bin fil wik, in padi Jonɛtan bin go fɛn am ɛn tɔk to am fɔ ɛnkɔrej am. (1 Sam. 23:​16, 17) Semweso, Jiova bin pik Ilaysha fɔ ɛp Ilayja. (1 Kiŋ 19:​16, 21; 2 Kiŋ 2:2) Tide, Jiova de yuz wi famili, wi padi dɛn, ɔ di ɛlda dɛn fɔ sɔpɔt wi. Bɔt we wi at kin pwɛl, sɔntɛm wi nɔ go want fɔ de nia pipul dɛn. Wi jɔs want fɔ de wi wangren. Dat na nɔmal tin. Wetin wi go du fɔ mek Jiova sɔpɔt wi?

13. Wetin wi nid fɔ du fɔ mek wi go bɛnifit frɔm Jiova in sɔpɔt? (Luk bak di pikchɔ.)

¹³ Wetin wi nid fɔ du? Tray tranga wan fɔ lɛ yu nɔ de yu wangren. We wi nɔ de nia pipul dɛn, na wisɛf ɛn wi prɔblɛm dɛn nɔmɔ wi go de tink bɔt. Ɛn bikɔs ɔf dat, wi nɔ go ebul fɔ disayd fɔ du di rayt tin. (Prɔv. 18:1) As wi ɔl no, tɛm dɛn de we wi kin nid fɔ de wi wangren, mɔ we bad tin apin to wi. Bɔt if i tek lɔng tɛm wi nɔ kam nia pipul dɛn, i go tan lɛk se wi de tɔn wi bak pan di pipul dɛn we Jiova de yuz fɔ sɔpɔt wi. So pan ɔl we i nɔ go izi fɔ yu di tɛm we yu gɛt prɔblɛm, gri fɔ mek yu famili, yu padi dɛn, ɛn di ɛlda dɛn ɛp yu. Si dɛn as pipul dɛn we Jiova de yuz fɔ sɔpɔt yu.​—Prɔv. 17:17; Ayz. 32:​1, 2.

JIOVA GO KƆREJ YU

14. Us prɔblɛm go mit wi we go mek wi fred?

¹⁴ Di tin we nɔ kin izi. Tɛm dɛn go de we wi go fred bikɔs ɔf di tin dɛn we de apin to wi. Insay di Baybul, Gɔd in fetful savant dɛn bin tɔk bɔt tɛm dɛn we dɛn at bin rili pwɛl ɛn we dɛn bin de trimbul bikɔs dɛn ɛnimi ɔ ɔda tin dɛn bin de prɛzhɔ dɛn. (Sam 18:4; 55:​1, 5) Semweso, pipul dɛn go de agens wi na skul, wokples, na wi famili, ɔ ivin di gɔvmɛnt go de agens wi. Sɔntɛm wi go fred se wi go day bikɔs ɔf wɛlbɔdi prɔblɛm. Dɛn tɛm dɛn de, sɔntɛm wi go fil se wi nɔ ebul fɔ du natin jɔs lɛk smɔl pikin. Aw Jiova de ɛp wi dɛn tɛm dɛn de?

15. Akɔdin to Sam 94:​19, wetin Jiova go du fɔ wi?

¹⁵ Wetin Jiova de du? I de ɛnkɔrej wi ɛn mek wi fil fayn. (Rid Sam 94:19.) Dis sam ya go mek wi tink bɔt wan smɔl titi  we de fred ɛn we nɔ ebul fɔ slip bikɔs big big tɛnda de krak. Wi go ebul imajin we di papa de go to am, es am, ɛn ol am tayt wan te i slip. Pan ɔl we di tɛnda stil de krak, di kayn ɔg we in papa ɔg am fɔ kɔrej am mek i fil sef. We wi gɛt prɔblɛm dɛn we de mek wi fred, wi go nid wi Papa we de na ɛvin fɔ ol wi jɔs lɛk da papa de te wi lɛf fɔ fred. Aw Jiova go kɔrej wi da we de?

16. Wetin wi go du fɔ bɛnifit frɔm di kɔrej we Jiova de kɔrej wi? (Luk bak di pikchɔ.)

¹⁶ Wetin wi nid fɔ du? Tray ɔltɛm fɔ de spɛn tɛm wit Jiova bay we yu de pre to am ɛn rid in Wɔd. (Sam 77:​1, 12-14) Dat go mek ɛnitɛm we yu strɛs, di fɔs tin we yu go du, na fɔ pre to yu Papa we de na ɛvin. Tɛl Jiova wetin mek yu de fred ɛn wetin mek yu de wɔri. Dɔn, lisin to am bay we yu de rid in Wɔd, ɛn yu go si aw i de kɔrej yu. (Sam 119:28) Yu go si se patikyula say dɛn de na di Baybul we go rili kɔrej yu we yu de fred. Fɔ ɛgzampul, sɔntɛm yu go gɛt ɛnkɔrejmɛnt we yu rid Baybul buk dɛn lɛk Job, Sam, ɛn Prɔvabs, ɛn di wɔd dɛn we Jizɔs bin tɔk we de insay Matyu chapta 6. As yu de pre to Jiova ɛn rid in Wɔd, yu go gɛt kɔrej.

17. Us kɔnfidɛns wi gɛt?

¹⁷ Wi gɛt kɔnfidɛns se Jiova go ɛp wi ɔltɛm we bad tin dɛn apin to wi. Wi nɔ go ɛva de wi wangren. (Sam 23:4; 94:14) Jiova prɔmis fɔ gayd wi, fɔ ɛp wi fɔ de sef wan, fɔ sɔpɔt wi, ɛn kɔrej wi. Ayzaya 26:3 tɔk bɔt Jiova se: “Yu go protɛkt di wan dɛn we abop pan yu wit ɔl dɛn at; yu go mek dɛn gɛt pis ɔltɛm, bikɔs dɛn abop pan yu.” So abop pan Jiova, ɛn du ɔl wetin yu ebul so dat yu go bɛnifit frɔm di ɛp we Jiova de gi yu. If yu du dat, yu go ebul fɔ gɛt trɛnk ivin di tɛm dɛn we yu gɛt prɔblɛm.