1. Wetin na wan rizin we mek Jiova mek mared?

 JIOVA na “Gɔd we gladi,” ɛn i want wisɛf fɔ gladi. (1 Tim. 1:11) I dɔn gi wi bɔku gift dɛn fɔ mek wi go ɛnjɔy wi layf. (Jems 1:17) Wan pan dɛn gift dɛn de na mared. We man ɛn uman mared, dɛn kin prɔmis fɔ lɛk dɛnsɛf, rɛspɛkt dɛnsɛf, ɛn valyu dɛnsɛf. We dɛn kɔntinyu fɔ lɛk dɛnsɛf, dɛn go gɛt tru tru gladi-at.—Prɔv. 5:18.

2. Wetin de apin na bɔku mared-os dɛn tide?

² I sɔri fɔ no se bɔku maredman ɛn mareduman dɛn na di wɔl tide kin fɔgɛt di prɔmis we dɛn mek di de we dɛn mared. Bikɔs ɔf dat, dɛn nɔ gɛt gladi-at. Wan ripɔt dɛn biɛn tɛm ya frɔm World Health Organization sho se bɔku maredman dɛn kin bit dɛn wɛf, kɔs am, ɛn trit am bad. Sɔntɛm maredman we kin trit in wɛf dis kayn we kin rɛspɛkt in wɛf we dɛn de wit ɔda pipul dɛn, bɔt we dɛn de na os, i kin trit am bad. Wan ɔda tin we mek gladi-at nɔ de na bɔku mared-os dɛn na bikɔs di man de wach rud rud pikchɔ ɔ fim dɛn.

3. Wetin na di rizin dɛn we kin mek sɔm maredman dɛn nɔ trit dɛn wɛf fayn?

³ Wetin kin mek sɔm maredman dɛn trit dɛn wɛf bad? Sɔntɛm, dɛn papa bin de bit dɛn mama, so dɛnsɛf tink se na nɔmal tin fɔ trit uman bad. Ɔda man dɛn de trit dɛn wɛf bad bikɔs di say we dɛn mɛn, pipul dɛn tink se “rial man” fɔ trit in wɛf ash we fɔ sho se na in na di bɔs. Ɔda man dɛn nɔ no aw fɔ kɔntrol di we aw dɛn de fil, ɛn aw fɔ kɔntrol dɛnsɛf we dɛn vɛks. Sɔm man dɛn de si uman dɛn ɛn mami ɛn dadi biznɛs di rɔng we bikɔs dɛn de wach rud rud pikchɔ ɔ fim dɛn ɔltɛm. Pantap dat, ripɔt dɛn dɔn sho se di COVID-19 pandɛmik dɔn mek dɛn prɔblɛm dɛn ya wɔs. As wi ɔl no, nɔn pan dɛn rizin dɛn ya nɔ fɔ mek maredman trit in wɛf bad.

4. Wetin maredman dɛn we na Kristian fɔ tek tɛm wit? Wetin mek?

 ⁴ Maredman dɛn we na Kristian fɔ tek tɛm mek di rɔng we aw pipul dɛn de si uman dɛn na di wɔl nɔ afɛkt dɛn. a Wetin mek? Wan rizin na bikɔs bɔku tɛm di we aw pɔsin de tink kin afɛkt di tin dɛn we i de du. Apɔsul Pɔl bin wɔn anɔyntɛd Kristian dɛn na Rom fɔ “lɛf fɔ alaw di we aw tin dɛn de apin naw fɔ shep [dɛn].” (Rom. 12:​1, 2) Di tɛm we Pɔl bin rayt to di Kristian dɛn na Rom, di wan dɛn we bin de na di kɔngrigeshɔn bin dɔn bi Kristian fɔ sɔm tɛm. Bɔt di wɔd dɛn we Pɔl tɔk sho se sɔm pipul dɛn na di kɔngrigeshɔn bin stil de alaw di kɔstɔm dɛn ɛn di we aw pipul dɛn na di wɔl de tink fɔ afɛkt dɛn. Na dat mek i bin ɛnkɔrej dɛn fɔ chenj di we aw dɛn bin de tink ɛn biev. Da advays de aplay bak to maredman dɛn we na Kristian tide. I sɔri fɔ no se sɔm maredman dɛn dɔn alaw di we aw pipul dɛn na di wɔl de tink fɔ afɛkt dɛn, ɛn dɛn nɔ kin trit dɛn wɛf fayn. b Aw Jiova de ɛkspɛkt maredman fɔ trit in wɛf? Di tim skripchɔ fɔ dis atikul ansa da kwɛstyɔn de.

5. Akɔdin to 1 Pita 3:​7, aw maredman fɔ trit in wɛf?

⁵ Rid 1 Pita 3:7. Jiova kɔmand maredman dɛn fɔ ɔnɔ dɛn wɛf. Di wɔd ɔnɔ de tɔk bɔt aw wi de trit pɔsin we wi gɛt rɛspɛkt fɔ. Maredman we de ɔnɔ in wɛf go trit am fayn ɛn sho se i lɛk am. Insay dis atikul, wi go tɔk bɔt aw maredman go ɔnɔ in wɛf. Bɔt fɔs, lɛ wi tɔk bɔt di tin dɛn we maredman dɛn de du we de sho se dɛn nɔ de ɔnɔ dɛn wɛf.

AVƆYD FƆ DU TIN DƐN WE DE SHO SE YU NƆ DE ƆNƆ YU WƐF

6. Aw Jiova de fil bɔt maredman dɛn we de bit dɛn wɛf? (Koloshians 3:19)

⁶ Maredman nɔ fɔ bit in wɛf. Jiova et ɛnibɔdi we lɛk fɛt-fɛt. (Sam 11:5) I et we maredman de bit in wɛf. (Mal. 2:16; rid Koloshians 3:19.) Akɔdin to wi tim skripchɔ we na 1 Pita 3:​7, if maredman nɔ trit in wɛf fayn i go ambɔg in padi biznɛs wit Jiova. Sɔntɛm, Jiova nɔ go ivin lisin to in prea.

7. Akɔdin to Ɛfishians 4:​31, 32, uskayn wɔd dɛn maredman fɔ avɔyd? (Luk bak “Wɔd we Dɛn Ɛksplen.”)

⁷ Maredman nɔ fɔ tɛl in wɛf bad wɔd dɛn. Sɔm maredman dɛn kin vɛks we dɛn de tɔk to dɛn wɛf ɛn dɛn kin tɔk tin dɛn we de mek dɛn wɛf in at pwɛl. Bɔt Jiova et “wamat, vɛksteshɔn, ala-ala, [ɛn] kɔs.” c (Rid Ɛfishians 4:​31, 32.) I de yɛri ɔltin. Jiova bisin bɔt di we aw maredman de tɔk to in wɛf ivin we na dɛn tu nɔmɔ de na os. Maredman we de tɔk ash we to in wɛf nɔ jɔs de ambɔg in mared, bɔt i de ambɔg bak in padi biznɛs wit Gɔd.—Jems 1:26.

8. Aw Jiova de fil bɔt rud rud pikchɔ ɔ fim dɛn? Wetin mek?

⁸ Maredman nɔ fɔ wach rud rud pikchɔ ɔ fim dɛn. Aw Jiova de fil bɔt rud rud pikchɔ ɔ fim dɛn? I et dɛn. So maredman we de wach rud rud pikchɔ ɔ fim dɛn de ambɔg in padi biznɛs wit Jiova ɛn i de sho se i nɔ gɛt wan rɛspɛkt fɔ in wɛf. d Jiova de  ɛkspɛkt se maredman fɔ fetful to in wɛf bay di tin dɛn we i de du ɛn di tin dɛn we i de tink bɔt. Jizɔs bin tɔk se, man we de luk ɔda uman te i fil fɔ am dɔn ɔlrɛdi du mami ɛn dadi biznɛs wit am “na in at.” e—Mat. 5:​28, 29.

9. Wetin mek Jiova et we maredman de fos in wɛf fɔ du sɔntin we i nɔ want we dɛn de du mami ɛn dadi biznɛs?

⁹ Maredman nɔ fɔ fos in wɛf fɔ du sɔntin we i nɔ want we dɛn de du mami ɛn dadi biznɛs. Sɔm maredman dɛn kin fos dɛn wɛf fɔ du mami ɛn dadi biznɛs sɔm we dɛn we nɔ de sho wan rɛspɛkt, we de mek dɛn wɛf fil bad bɔt insɛf, ɔ fil se dɛn nɔ lɛk am. Jiova et da kayn we de we sɔm man dɛn de biev we de sho se dɛn jɔs bisin bɔt dɛnsɛf ɛn nɔ want fɔ no aw dɛn wɛf de fil. I de ɛkspɛkt se maredman fɔ lɛk ɛn valyu in wɛf ɛn sho se i bisin bɔt aw i de fil. (Ɛfi. 5:​28, 29) Wetin maredman we na Kristian fɔ du if i nɔ de sho wan rɛspɛkt fɔ in wɛf, ɔ i de trit am bad, ɔ i de wach rud rud pikchɔ ɔ fim dɛn? Aw i go chenj di we aw i de tink ɛn du tin?

AW MAREDMAN GO AVƆYD FƆ DU TIN DƐN WE DE SHO SE I NƆ DE ƆNƆ IN WƐF?

10. Aw maredman dɛn go bɛnifit frɔm Jizɔs in ɛgzampul?

¹⁰ Wetin go ɛp maredman fɔ lɛf fɔ trit in wɛf bad ɛn avɔyd fɔ du tin dɛn we de sho se i nɔ gɛt wan rɛspɛkt fɔ in wɛf? I kin tray tranga wan fɔ falamakata Jizɔs. Pan ɔl we Jizɔs nɔ ɛva mared, di we aw i bin de trit in disaypul dɛn na fayn ɛgzampul we de sho aw maredman fɔ trit in wɛf. (Ɛfi. 5:25) Fɔ ɛgzampul, lɛ wi tɔk bɔt wetin maredman dɛn go lan frɔm di we aw Jizɔs bin de trit in apɔsul dɛn ɛn aw i bin de tɔk to dɛn.

11. Aw Jizɔs bin trit in apɔsul dɛn?

¹¹ Jizɔs bin de rɛspɛkt in apɔsul dɛn ɛn trit dɛn fayn. I nɔ bin de biev ash we to dɛn ɔ fos dɛn fɔ du wetin dɛn nɔ want. Pan ɔl we Jizɔs na bin dɛn Masta, i nɔ bin yuz in pawa fɔ sho se i pas dɛn. Bifo dat, i bin put insɛf dɔŋ ɛn wok fɔ dɛn. (Jɔn 13:​12-17) I bin tɛl in disaypul dɛn se: “[Una] lan frɔm mi, bikɔs a de tek tɛm du tin ɛn a ɔmbul ɛn una go fil fayn.” (Mat. 11:​28-30) Notis se, Jizɔs bin de tek tɛm du tin. Pɔsin we de tek tɛm du tin nɔto pɔsin we wik. Bɔt na pɔsin we ebul fɔ kɔntrol insɛf. We dɛn du sɔntin we fɔ mek i vɛks, i nɔ de vɛks ɛn i de kɔntrol di we aw i de fil.

12. Aw Jizɔs bin de tɔk to ɔda pipul dɛn?

¹² Di wɔd dɛn we Jizɔs bin de tɔk bin de ɛnkɔrej pipul dɛn ɛn mek dɛn fil fayn. I nɔ bin de tɔk ash we to in disaypul dɛn. (Lyuk 8:​47, 48) Ivin we di wan dɛn we de agens am bin de tɛl am bad wɔd dɛn ɛn du tin dɛn fɔ mek i vɛks, “insɛf nɔ yuz bad wɔd.” (1 Pit. 2:​21-23) Sɔntɛnde, bifo Jizɔs tɔk ash we, i bin de disayd nɔ fɔ tɔk natin. (Mat. 27:​12-14) Dis na fayn ɛgzampul fɔ maredman dɛn we na Kristian!

13. Akɔdin to Matyu 19:​4-6, wetin i min fɔ mek maredman “de wit in wɛf”? (Luk bak di pikchɔ.)

¹³ Jizɔs bin tɛl maredman dɛn fɔ kɔntinyu fɔ fetful to dɛn wɛf. I bin kot di wɔd dɛn we in Papa bin tɔk we i se maredman fɔ “de wit in wɛf.” (Rid Matyu 19:​4-6.) Di Grik vab we dɛn yuz fɔ di wɔd “de,” min fɔ fasin tayt tayt wan lɛk se na “wit glu.” So di lɔv we maredman ɛn mareduman fɔ gɛt fɔ dɛnsɛf fɔ so strɔng dat i tan lɛk se dɛn yuz glu fɔ fasin dɛn  togɛda. If wan pan dɛn du sɔntin we nɔ fayn to di ɔda pɔsin, dɛn ɔl tu go sɔfa. Maredman we lɛk in wɛf da kayn we de, go avɔyd fɔ wach ɔlkayn rud rud pikchɔ ɔ fim dɛn. I nɔ go westɛm fɔ avɔyd fɔ “wach tin dɛn we nɔ gɛt wan yus.” (Sam 119:37) Jɔs lɛk Job, i dɔn mek-ɔp in maynd nɔ fɔ luk ɛni ɔda uman te i fil fɔ du mami ɛn dadi biznɛs wit am.—Job 31:1.

14. Wetin na di tin dɛn we maredman we nɔ de trit in wɛf fayn fɔ du fɔ mek in padi biznɛs wit Jiova ɛn in wɛf tayt bak?

¹⁴ Maredman we de bit in wɛf ɔ we de tɛl in wɛf bad wɔd fɔ du ɔda tin dɛn fɔ mek in padi biznɛs wit Jiova ɛn in wɛf tayt bak. Wetin na di tin dɛn we i fɔ du? Fɔs, i fɔ gri se i gɛt siriɔs prɔblɛm. Natin nɔ de we Jiova nɔ de si. (Sam 44:21; Ɛkli. 12:14; Ibru. 4:13) Sɛkɔn, i fɔ lɛf fɔ trit in wɛf bad ɛn chenj di we aw i de biev. (Prɔv. 28:13) Tɔd, i fɔ se sɔri to in wɛf ɛn Jiova ɛn beg fɔ mek dɛn fɔgiv am. (Akt 3:19) I fɔ beg Jiova bak fɔ mek i want fɔ chenj ɛn fɔ ɛp am fɔ kɔntrol di we aw i de tink, di tin dɛn we i de tɔk, ɛn di tin dɛn we i de du. (Sam 51:​10-12; 2 Kɔr. 10:5; Fil. 2:13) Nɔmba 4, i fɔ du tin dɛn we gri wit in prea bay we i tray fɔ et ɔlkayn fɛt-fɛt ɛn bad wɔd dɛn. (Sam 97:10) Nɔmba fayv, i nɔ fɔ westɛm fɔ tɔk to di ɛlda dɛn na di kɔngrigeshɔn fɔ ɛp am. (Jems 5:​14-16) Nɔmba siks, i fɔ mek plan we go ɛp am fɔ mek i nɔ du dɛn bad tin dɛn de igen. Na dɛn sem tin dɛn ya maredman we de wach rud rud pikchɔ ɔ fim dɛn fɔ du. Jiova go blɛs di tray we i de tray tranga wan fɔ chenj di we aw i de biev. (Sam 37:5) Bɔt i nɔ jɔs du fɔ mek maredman avɔyd tin dɛn we de sho se i nɔ de ɔnɔ in wɛf. I fɔ lan bak fɔ ɔnɔ in wɛf. Aw i go du dat?

AW FƆ ƆNƆ YU WƐF?

15. Aw maredman go sho se i lɛk in wɛf?

¹⁵ Sho se yu lɛk yu wɛf. Sɔm brɔda dɛn we gɛt gladi-at na dɛn mared-os kin du sɔntin ɛvride fɔ sho se dɛn rili lɛk dɛn wɛf. (1 Jɔn 3:18) Smɔl smɔl tin dɛn de we maredman kin du fɔ sho se i lɛk in wɛf, lɛk fɔ ol in an ɔ fɔ ɔg am. I kin sɛn tɛks mɛsej to am ɛn tɛl am se, “A mis yu,” ɔ i  kin aks am se, “Aw yu de de go?” Wan wan tɛm i kin sho se i lɛk am bay we i de rayt fayn wɔd dɛn na kad. We maredman de du dɛn tin dɛn ya, i de ɔnɔ in wɛf ɛn dat go mek dɛn mared strɔng mɔ ɛn mɔ.

16. Wetin mek maredman fɔ prez in wɛf?

¹⁶ Tɛl am se yu valyu am. Maredman we de ɔnɔ in wɛf go mek i no di rizin we mek i valyu am ɛn mek i fil gud bɔt insɛf. Wan we aw i go du dat na we i de mɛmba fɔ tɛl in wɛf tɛnki fɔ ɔl di tin dɛn we i de du fɔ sɔpɔt am. (Kol. 3:15) We maredman de prez in wɛf wit ɔl in at, i de mek in wɛf fil fayn. I go fil sef, fil se i lɛk am, ɛn i de ɔnɔ am.—Prɔv. 31:28.

17. Aw maredman go sho se i gɛt rɛspɛkt fɔ in wɛf?

¹⁷ Trit yu wɛf fayn ɛn sho se yu gɛt rɛspɛkt fɔ am. Maredman we lɛk in wɛf de sho se i rili valyu am. I de si am as gift we rili valyu we kɔmɔt frɔm Jiova. (Prɔv. 18:22; 31:10) Bikɔs i de si am da we de, i de trit am fayn ɛn sho se i rɛspɛkt am ivin we dɛn de du mami ɛn dadi biznɛs. We dɛn de du mami ɛn dadi biznɛs, i nɔ go fos in wɛf fɔ du tin dɛn we go mek i nɔ fil fayn, we go sho se i nɔ rɛspɛkt am, ɔ we go ambɔg in kɔnshɛns. f Insɛf go tray fɔ gɛt klin kɔnshɛns bifo Jiova.—Akt 24:16.

18. Wetin maredman dɛn fɔ mek-ɔp dɛn maynd fɔ du? (Luk bak di bɔks we gɛt di taytul, “ 4 We dɛn we Maredman dɛn Go Sho se Dɛn Rɛspɛkt Dɛn Wɛf.”)

¹⁸ Maredman dɛn, una biliv tranga wan se Jiova de si ɛn gladi fɔ di tray we una de tray fɔ ɔnɔ una wɛf pan ɔl wetin una de se ɛn du. Mek-ɔp yu maynd fɔ ɔnɔ yu wɛf bay we yu de avɔyd fɔ du tin dɛn we nɔ de sho wan rɛspɛkt, ɛn trit am fayn, sho se yu rɛspɛkt am, ɛn sho se yu lɛk am. We yu de du dat, yu de sho am se yu lɛk ɛn valyu am. We yu de ɔnɔ yu wɛf, yu go protɛkt yu padi biznɛs we impɔtant pas ɔl, we na yu padi biznɛs wit Jiova Gɔd.—Sam 25:14.