STƆDI ATIKUL 3
SIŊ 35 Go De Du di Tin dɛn we Rili Impɔtant
Mek Jiova Gladi bay di Tin dɛn we Yu De Disayd fɔ Du
“Fɔ fred Jiova na di fɔs tin we pɔsin fɔ du fɔ gɛt sɛns, ɛn fɔ no di Wan We Oli pas Ɔl de mek pɔsin ɔndastand.”—PRƆV. 9:10.
MEN PƆYNT
Aw wi go disayd fɔ du di rayt tin dɛn we wi no bɔt sɔntin, gɛt ɔndastandin, ɛn ebul fɔ tink di rayt we.
1. Wetin nɔ kin izi fɔ wi ɔl?
WI NID fɔ disayd wetin fɔ du ɛvride. I kin izi fɔ disayd fɔ du sɔm tin dɛn, lɛk wetin fɔ it na mɔnin ɔ ustɛm fɔ slip. Ɔda tin dɛn de we nɔ kin izi fɔ disayd. Dɛn tin dɛn de we wi kin disayd kin afɛkt wi wɛlbɔdi, wi gladi-at, di wan dɛn we wi lɛk, ɔ wi padi biznɛs wit Jiova. Wi want mek di tin dɛn we wi de disayd fɔ du bɛnifit wi ɛn wi famili. Di tin we impɔtant pas ɔl na dat, wi want mek di tin dɛn we wi de disayd fɔ du mek Jiova gladi.—Rom. 12:1, 2.
2. Wetin-ɛn-wetin yu go du we go ɛp yu fɔ disayd fɔ du di rayt tin dɛn?
2 I pɔsibul fɔ mek yu disayd fɔ du di rayt tin if yu (1) tray fɔ no ɔltin bɔt wetin yu want fɔ disayd, (2) tink bɔt aw Jiova de fil bɔt wetin yu want fɔ disayd, ɛn (3) tek tɛm tink bɔt di difrɛn tin dɛn we yu go du. Dis atikul go tɔk bɔt dɛn tin dɛn ya, ɛn i go ɛp wi bak fɔ si aw wi go ebul fɔ tren wi maynd fɔ tink di rayt we.—Prɔv. 2:11.
TRAY FƆ NO ƆLTIN BƆT WETIN YU WANT FƆ DISAYD
3. Gi wan ɛgzampul we de sho wetin mek yu nid fɔ no ɔltin bɔt wetin yu want fɔ disayd bifo yu disayd wetin fɔ du.
3 Di fɔs tin we go ɛp yu fɔ disayd fɔ du di rayt tin na we yu no ɔltin bɔt wetin yu want fɔ disayd. Wetin mek dis impɔtant? Imajin se pɔsin we gɛt siriɔs wɛlbɔdi prɔblɛm go to dɔktɔ. Yu tink se di dɔktɔ go disayd uskayn tritmɛnt fɔ gi di pɔsin if i nɔ chɛk fɔs fɔ no wetin du am ɛn aks am kwɛstyɔn dɛn? Wan dawt nɔ de se i nɔ go du dat. Yusɛf go ebul fɔ disayd fɔ du di rayt tin dɛn if yu tek tɛm tink fɔs bɔt ɔl di tin dɛn we gɛt fɔ du wit wetin yu want fɔ disayd. Aw yu go ebul du dat?
4. Akɔdin to Prɔvabs 18:13, aw yu go ebul mek shɔ se yu no ɔltin bɔt wetin yu want fɔ disayd? (Luk bak di pikchɔ.)
4 Bɔku tɛm, yu go ebul no ɔltin bɔt wetin yu want fɔ disayd we yu aks kwɛstyɔn dɛn. Lɛ wi se dɛn invayt yu pan wan pati. Yu fɔ atɛnd? If yu nɔ sabi di pɔsin we de mek di pati ɔ yu nɔ no wetin i dɔn plan fɔ du, yu go nid fɔ aks kwɛstyɔn dɛn lɛk: “Usay ɛn ustɛm i go mek di pati? Ɔmɔs pipul dɛn go atɛnd? Udat go de oba di program fɔ mek shɔ se ɔltin kɔmɔt fayn? Udat dɛn go atɛnd? Wetin-ɛn-wetin i plan fɔ lɛ pipul dɛn du pan di pati? Dɛn go sav rɔm?” Di ansa to dɛn kwɛstyɔn dɛn ya go ɛp yu fɔ disayd fɔ du di rayt tin.—Rid Prɔvabs 18:13.
Tray fɔ no ɔltin bɔt wetin yu want fɔ disayd bay we yu de aks kwɛstyɔn dɛn (Luk na paregraf 4) a
5. Wetin yu fɔ du afta yu dɔn no ɔltin bɔt wetin yu want fɔ disayd?
5 Dɔn, afta yu dɔn no ɔltin bɔt wetin yu want fɔ disayd, tek tɛm tink bɔt ɔltin. Fɔ ɛgzampul, wetin yu go du if yu kam fɔ no se sɔm pan di pipul dɛn we go atɛnd di pati nɔ gɛt wan rɛspɛkt fɔ Baybul prinsipul dɛn ɔ dɛn go sav rɔm ɛn nɔbɔdi nɔ go de fɔ mek shɔ se pipul dɛn nɔ drink pasmak? Yu tink se i pɔsibul fɔ mek dis pati tɔn to wayl pati? (1 Pit. 4:3) Dɔn bak, wetin yu go du if di tɛm we dɛn go mek di pati na di sem tɛm fɔ yu mitin ɔ fil savis? We yu dɔn tek tɛm tink bɔt ɔltin, i go izi fɔ mek yu disayd fɔ du di rayt tin. Bɔt ɔda tin de bak we yu nid fɔ du. Yu no aw yu de fil bɔt di tin we yu want fɔ disayd, bɔt aw Jiova de fil bɔt am?—Prɔv. 2:6.
TINK BƆT AW JIOVA DE FIL BƆT WETIN YU WANT FƆ DISAYD
6. Akɔdin to Jems 1:5, wetin mek wi fɔ pre fɔ lɛ Jiova ɛp wi?
6 Pre to Jiova fɔ lɛ i ɛp yu fɔ ɔndastand aw i de tink. Jiova prɔmis fɔ gi wi di sɛns we go ɛp wi fɔ ɔndastand if wetin wi want fɔ disayd go mek i gladi. I de gi da kayn sɛns de “bɔku bɔku wan to ɔlman ɛn i nɔ de fɛn fɔlt.”—Rid Jems 1:5.
7. Aw yu go ebul no aw Jiova de tink? Gi ɛgzampul.
7 Afta yu dɔn pre to Jiova fɔ mek i ɛp yu, tek tɛm pe atɛnshɔn to aw i de ansa yu prea. Fɔ ɛgzampul, if yu de go sɔnsay dɔn yu lɔs, sɔntɛm yu go aks pɔsin we de na da eria de fɔ ɛp yu. Bɔt yu go jɔs waka go bifo di pɔsin ansa yu? Nɔ, yu nɔ go du dat. Yu go tek tɛm lisin to wetin i de se. Semweso, afta yu dɔn pre to Jiova fɔ gi yu sɛns, tray fɔ ɔndastand in ansa bay we yu luk fɔ lɔ ɛn prinsipul dɛn na di Baybul we gɛt sɔntin fɔ du wit wetin yu want fɔ disayd. Fɔ ɛgzampul, we yu de disayd if yu fɔ atɛnd di pati we wi bin dɔn tɔk bɔt, yu kin tink bɔt wetin di Baybul se bɔt wayl pati dɛn, bad padi dɛn, ɛn wetin mek i impɔtant fɔ put di Kiŋdɔm fɔs bifo wetin yu want.—Mat. 6:33; Rom. 13:13; 1 Kɔr. 15:33.
8. Wetin yu go du if yu nid ɛp fɔ fɛn di infɔmeshɔn we yu nid? (Luk bak di pikchɔ.)
8 Bɔt sɔntɛnde, yu go nid ɛp fɔ fɛn di infɔmeshɔn we yu de luk fɔ. Sɔntɛm yu go gɛt advays frɔm brɔda ɔ sista we gɛt ɛkspiriɛns. Bɔt yu go bɛnifit bak we yu du risach fɔ yusɛf. Bɔku infɔmeshɔn de na wi stɔdi tul dɛn lɛk di Risach Gayd fɔ Jiova Witnɛs dɛn ɛn di buk we nem Skripchɔ dɛn bɔt Aw Kristian Fɔ Liv. Mɛmba se yu gol na fɔ disayd fɔ du sɔntin we go mek Jiova gladi.
Tink bɔt aw Jiova de fil bɔt wetin yu want fɔ disayd (Luk na paregraf 8) b
9. Aw wi go mek shɔ se di tin we wi disayd fɔ du go mek Jiova gladi? (Ɛfishians 5:17)
9 Aw wi go mek shɔ se di tin we wi disayd fɔ du go mek Jiova gladi? Fɔs, wi nid fɔ no am gud gud wan. Di Baybul se “fɔ no di Wan We Oli pas Ɔl de mek pɔsin ɔndastand.” (Prɔv. 9:10) Fɔ tru, wi go gɛt tru tru ɔndastandin we wi no Jiova in kwaliti dɛn, wetin i want, ɛn di tin dɛn we i lɛk ɔ et. Aks yusɛf dis kwɛstyɔn, ‘Bikɔs ɔf wetin a no bɔt Jiova, wetin a go disayd fɔ du we go mek i gladi?’—Rid Ɛfishians 5:17.
10. Wetin mek Baybul prinsipul dɛn impɔtant pas famili tradishɔn ɔ di kɔlchɔ usay yu de?
10 Fɔ lɛ wi mek Jiova gladi, sɔntɛnde wi go du sɔntin we go mɔs disapɔynt di wan dɛn we wi lɛk. Fɔ ɛgzampul, sɔntɛm mama ɛn papa we want gud tin fɔ dɛn galpikin go fos am fɔ mared to man we gɛt bɔku mɔni ɔ man we go pe bɔku mɔni fɔ mared am pan ɔl we di man nɔ gɛt tayt padi biznɛs wit Jiova. Na tru se dɛn want pɔsin we go ebul kia fɔ dɛn galpikin, bɔt udat go ɛp am fɔ gɛt tayt padi biznɛs wit Jiova? Aw Jiova de si dat? Wi go fɛn di ansa na Matyu 6:33. Insay da skripchɔ de, di Baybul ɛnkɔrej Kristian dɛn fɔ kɔntinyu fɔ “put di Kiŋdɔm . . . fɔs.” Pan ɔl we wi de ɔnɔ wi mama ɛn papa ɛn rɛspɛkt di pipul dɛn na di say we wi de, wetin impɔtant to wi mɔ na fɔ mek Jiova gladi.
TEK TƐM TINK BƆT DI DIFRƐN TIN DƐN WE YU GO DU
11. Us kwaliti Filipians 1:9, 10 tɔk bɔt we go ɛp yu fɔ tek tɛm tink bɔt di difrɛn tin dɛn we yu go du?
11 Afta yu dɔn tink bɔt di Baybul prinsipul dɛn we gɛt sɔntin fɔ du wit wetin yu want fɔ disayd, yu nid fɔ tek tɛm tink bɔt di difrɛn tin dɛn we yu go du. (Rid Filipians 1:9, 10; luk di stɔdi not fɔ “full discernment.”) Di kwaliti fɔ ebul tink fɔ rili ɔndastand go ɛp yu fɔ imajin wetin go apin we yu disayd fɔ du ɛniwan pan dɛn tin dɛn de. Sɔntɛnde, i kin izi fɔ disayd wetin fɔ du. Bɔt nɔto ɔl di tin dɛn we yu kin disayd simpul. We yu ebul tink fɔ rili ɔndastand, dat go ɛp yu fɔ disayd fɔ du di rayt tin dɛn ivin we yu de disayd fɔ du tin dɛn we nɔ izi.
12-13. We yu ebul tink fɔ rili ɔndastand, aw dat go ɛp yu fɔ disayd fɔ du di rayt tin bɔt wok biznɛs?
12 Tink bɔt dis ɛgzampul. Lɛ wi se yu de luk fɔ wok fɔ sɔpɔt yu famili. Dɔn dɛn tɛl yu bɔt tu wok dɛn. Yu tink bɔt ɔltin bɔt di wok dɛn, lɛk di kayn wok, di shɛdul, di tɛm we yu go tek fɔ go na di wokples, ɛn ɔda tin dɛn. Ɔl tu di wok dɛn nɔ bad fɔ Kristian. Sɔntɛm yu disayd fɔ tek wan pan dɛn bikɔs ɔf di kayn wok we yu go de du ɔ bikɔs di salari bɔku. Bɔt ɔda tin dɛn de bak we yu go nid fɔ tink bɔt bifo yu disayd.
13 Fɔ ɛgzampul, ɛniwan pan di wok dɛn go mek yu nɔ ebul fɔ de atɛnd di mitin dɛn? Ɛniwan pan dɛn go mek yu nɔ ebul fɔ spɛn tɛm wit yu famili ɛn ɛp dɛn fɔ gɛt tayt padi biznɛs wit Jiova? We yu aks yusɛf dɛn kayn kwɛstyɔn dɛn ya, i go ɛp yu fɔ du “di tin dɛn we rili impɔtant” we na fɔ put yu wɔship to Jiova ɛn wetin yu famili nid fɔs bifo mɔni ɔ prɔpati. Da tɛm de, yu go disayd fɔ du sɔntin we Jiova go blɛs.
14. We wi ebul fɔ tink fɔ rili ɔndastand ɛn fɔ sho lɔv, aw dat go ɛp wi nɔ fɔ ɔfɛn ɔda pipul dɛn?
14 We wi ebul fɔ tink fɔ rili ɔndastand, dat go mek wi tink bɔt aw di tin dɛn we wi de disayd fɔ du go afɛkt ɔda pipul dɛn ɛn nɔ “ɔfɛn” dɛn. (Fil. 1:10) Dis impɔtant we wi de disayd bɔt tin dɛn lɛk wetin fɔ wɛr ɛn aw fɔ kia fɔ wisɛf. Fɔ ɛgzampul, sɔntɛm wan patikyula we de we wi lɛk fɔ drɛs ɔ kia fɔ wisɛf. Bɔt wetin wi go du if dat de ambɔg pipul dɛn na di kɔngrigeshɔn ɔ pipul dɛn we de na do? We wi ebul tink fɔ rili ɔndastand, dat go ɛp wi fɔ rɛspɛkt aw dɛn de fil. Lɔv go mek wi du tin dɛn we go bɛnifit “ɔda pɔsin” ɛn nɔ du tin pasmak. (1 Kɔr. 10:23, 24, 32; 1 Tim. 2:9, 10) Dɔn, wi go ebul fɔ disayd fɔ du tin dɛn we de sho se wi lɛk ɛn rɛspɛkt ɔda pipul dɛn.
15. Wetin yu fɔ tink bɔt bifo yu du impɔtant tin we yu dɔn disayd?
15 If yu de disayd fɔ du impɔtant tin, tink bɔt wetin yu nid fɔ mek yu go ebul du wetin yu dɔn disayd. Jizɔs bin tich wi fɔ “chɛk ɔmɔs [wi] gɛt fɔ spɛn.” (Lyuk 14:28) So tink bɔt di tɛm, tin dɛn, ɛn trɛnk we yu go nid fɔ yuz fɔ mek wetin yu disayd kɔmɔt fayn. Sɔntɛnde, yu kin tɔk wit yu famili fɔ no wetin ɛni wan pan dɛn go nid fɔ du fɔ sɔpɔt wetin yu dɔn disayd. Wetin mek i impɔtant fɔ plan dis kayn we? I go ɛp yu fɔ no if yu nid fɔ ajɔst sɔm tin dɛn ɔ if i go bɛtɛ fɔ du am difrɛn we. Ɛn we yu tɔk wit yu famili bɔt wetin yu want fɔ disayd ɛn lisin to dɛn advays, dɛn go rɛdi fɔ sɔpɔt yu fɔ mek wetin yu disayd kɔmɔt fayn.—Prɔv. 15:22.
DISAYD FƆ DU SƆNTIN WE GO KƆMƆT FAYN
16. Wetin na sɔm tin dɛn we yu go du fɔ mek di tin we yu dɔn disayd fɔ du kɔmɔt fayn? (Luk bak di bɔks we gɛt di taytul “ Aw Wi Go Disayd fɔ Du di Rayt Tin Dɛn.”)
16 If yu du di tin dɛn we wi dɔn tɔk bɔt, i min se yu dɔn rɛdi fɔ disayd fɔ du di rayt tin. Yu dɔn no ɔl wetin yu nid fɔ no bɔt wetin yu want fɔ disayd, ɛn yu dɔn stɔdi Baybul prinsipul dɛn we go ɛp yu fɔ disayd fɔ du tin dɛn we go mek Jiova gladi. Naw yu kin pre to Jiova fɔ ɛp yu fɔ mek wetin yu dɔn disayd fɔ du kɔmɔt fayn.
17. Wetin na di men tin we go ɛp yu fɔ disayd fɔ du di rayt tin?
17 Ilɛksɛf yu bin dɔn disayd fɔ du tin dɛn we kɔmɔt fayn trade, mɛmba se di men tin we go ɛp yu fɔ disayd fɔ du di rayt tin na we yu abop pan di sɛns we Jiova de gi, nɔto yu sɛns ɔ di ɛkspiriɛns we yu bin dɔn gɛt. Na in nɔmɔ go ebul fɔ gi yu di tin dɛn we impɔtant we na tru tru sɛns, fɔ ɔndastand, ɛn fɔ ebul tink di rayt we, we na tin dɛn we go ɛp yu fɔ disayd fɔ du di rayt tin. (Prɔv. 2:1-5) Jiova go ɛp yu fɔ disayd fɔ du tin dɛn we go mek i gladi.—Sam 23:2, 3.
SIŊ 28 Bi Jiova in Padi
