1. Wetin bɔku pipul dɛn tide de pe atɛnshɔn pan?

 YU DƆN notis se tide bɔku pipul dɛn jɔs bisin bɔt dɛnsɛf? Fɔ ɛgzampul, bɔku pipul dɛn kin yuz soshal midia fɔ mek pipul dɛn pe atɛnshɔn to dɛn ɛn wetin dɛn de du. Bɔt di wan dɛn we de gi Jiova Gɔd glori tide nɔ bɔku. Insay dis atikul, wi go tɔk bɔt wetin i min fɔ gi Jiova glori ɛn wetin fɔ mek wi du dat. Wi go lan bak bɔt aw wi go gi Gɔd di glori we i fit fɔ gɛt ɛn aw insɛf go mek in nem gɛt glori jisnɔ.

WETIN I MIN FƆ GI JIOVA GƆD GLORI?

2. Wetin Jiova bin du fɔ sho in glori na Mawnt Saynay? (Luk bak di frɔnt pej.)

² Wetin na glori? Insay di Baybul, di wɔd “glori” kin min ɛnitin we go mek pɔsin gɛt rɛspɛkt ɔ ɔnɔ. Shɔt tɛm afta Jiova fri in pipul dɛn frɔm slev layf na Ijipt, i bin du wɔndaful tin fɔ sho dɛn in glori. Imajin dis: Bɔku bɔku Izrɛlayt dɛn gɛda dɔŋ Mawnt Saynay fɔ lisin to dɛn Gɔd. Tik tik klawd kɔba di mawntin. Wantɛm wantɛm big big atkwek apin, tɛnda bigin fɔ krak, laytin flash, ɛn dɛn yɛri lawd lawd nɔys. (Ɛks. 19:​16-18; 24:17; Sam 68:8) Imajin aw di Izrɛlayt dɛn go dɔn rili kɔle dis wɔndaful we aw Jiova sho in glori.

3. Aw wi go gi Jiova glori?

 ³ Bɔt wetin wi go se bɔt mɔtalman dɛn? Wi go rili ebul fɔ mek Jiova gɛt glori? Yɛs, wi go ebul. Wan we we wi go gi Jiova glori, na we wi de tɛl ɔda pipul dɛn bɔt di wɔndaful tin dɛn we i dɔn du, di kayn pawa we i gɛt, ɛn di fayn kwaliti dɛn we i gɛt. Wi kin gi Gɔd glori bak we wi prez am fɔ di tin dɛn we i dɔn ɛp wi fɔ du. (Ayz. 26:12) Wan fayn ɛgzampul we wi gɛt bɔt pɔsin we bin gi Jiova glori na Kiŋ Devid. Wantɛm, we Devid bin de pre bifo di pipul dɛn na Izrɛl, i bin tɛl Gɔd se: “E Jiova, yu gret ɛn pawaful, na yu gɛt ɔltin we fayn, yu gɛt glori ɛn yu wɔndaful bikɔs na yu gɛt ɔltin na ɛvin ɛn na dis wɔl.” We Devid dɔn fɔ pre, “ɔl di pipul dɛn prez Jiova.”—1 Kro. 29:​11, 20.

4. Aw Jizɔs bin gi Jiova glori?

⁴ We Jizɔs bin de na di wɔl, i bin mek in Papa gɛt glori bay we i tɛl pipul dɛn se na Jiova de gi am pawa fɔ pafɔm mirekul dɛn. (Mak 5:​18-20) Di we aw Jizɔs bin de du tin ɛn aw i bin de trit ɔda pipul dɛn bak bin mek in Papa gɛt glori. Wantɛm, Jizɔs bin de tich na wan sinagɔg. Wan pan di pipul dɛn we bin de lisin to am na wan uman we bin gɛt dimɔn we dɔn mek i sik fɔ 18 ia. Di dimɔn bin mek di uman bɛn bad bad wan ɛn dat bin mek i nɔ ebul fɔ tinap stret. Di uman in at bin rili pwɛl. Jizɔs sɔri fɔ di uman, so i go mit am ɛn tɔk fayn to am. I tɛl am se: “Di sik we de mek yu wik dɔn lɛf yu.” I le in an pan di uman, ɛn wantɛm wantɛm di uman tinap stret ɛn “bigin fɔ prez Gɔd.” Di uman bin rili gladi we Jiova mek i wɛl! (Lyuk 13:​10-13) Da uman de bin gɛt gud rizin fɔ gi Jiova glori, ɛn wisɛf gɛt gud rizin fɔ du dat.

WETIN DE MEK WI GI JIOVA GLORI?

5. Us rizin dɛn wi gɛt fɔ rɛspɛkt Jiova?

⁵ Wi de gi Jiova glori bikɔs wi gɛt dip rɛspɛkt fɔ am. Wi gɛt bɔku rizin dɛn fɔ rɛspɛkt am. Jiova na di ɔlmayti; i gɛt pawa we nɔ de dɔn. (Sam 96:​4-7) Wi de si di kayn sɛns we i gɛt frɔm di tin dɛn we i dɔn mek. Na in gi wi layf ɛn na in de mek wi gɛt di tin dɛn we wi nid fɔ kɔntinyu fɔ liv. (Rɛv. 4:11) I nɔ de kɔmɔt biɛn pɔsin. (Rɛv. 15:4) Ɔl di tin dɛn we i de du kin kɔmɔt fayn, ɛn i de du di tin dɛn we i dɔn prɔmis ɔltɛm. (Jɔs. 23:14) Na dat mek prɔfɛt Jɛrimaya bin tɔk bɔt Jiova se: “Nɔbɔdi nɔ tan lɛk yu pan ɔl di wan dɛn we gɛt sɛns na di neshɔn dɛn ɛn na ɔl di kiŋdɔm dɛn”! (Jɛr. 10:​6, 7) Ɔl dɛn tin dɛn ya sho klia wan se wi gɛt bɔku rizin dɛn fɔ rɛspɛkt wi Papa we de na ɛvin. Bɔt Jiova nɔ jɔs de du tin dɛn we go mek wi rɛspɛkt am, i de du tin dɛn bak we de mek wi lɛk am.

6. Wetin mek wi lɛk Jiova?

⁶ Wi de gi Jiova glori bikɔs wi rili lɛk am. Lɛ wi tɔk bɔt sɔm kwaliti dɛn we Jiova gɛt we mek wi lɛk am. I gɛt sɔri-at. (Sam 103:13; Ayz. 49:15) I ɔndastand aw wi de fil; we sɔntin apin to wi we mek wi at pwɛl, i kin fil am fɔ wi. (Zɛk. 2:8) I de ɛp wi fɔ sabi am ɛn bi in padi dɛn. (Sam 25:14; Akt 17:27) Ɛn i de put insɛf dɔŋ; “i de butu fɔ luk di ɛvin ɛn di wɔl. I de es di wan we pipul dɛn nɔ tek mek natin kɔmɔt na dɔti.” (Sam 113:​6, 7) So wi gɛt bɔku rizin dɛn fɔ gi glori to wi gret Gɔd.—Sam 86:12.

7. Us spɛshal chans wi gɛt?

⁷ Wi de gi Jiova glori bikɔs wi want mek  ɔda pipul dɛn sabi am. Bɔku pipul dɛn nɔ no di tru bɔt udat Jiova bi. Wetin mek? Na bikɔs Setan dɔn blayn dɛn maynd wit di bad bad lay dɛn we i de prɛd bɔt Jiova. (2 Kɔr. 4:4) Setan dɔn mek pipul dɛn biliv se Jiova na Gɔd we gɛt wamat, i nɔ bisin bɔt wi, ɛn na in de mek bɔku pan di bad tin dɛn na di wɔl tide apin. Bɔt wi no di tru bɔt wi Gɔd! Wi gɛt chans fɔ ɛp pipul dɛn fɔ no di kayn pɔsin we i bi ɛn gi am glori. (Ayz. 43:10) Sam 96 tɔk mɔ bɔt aw fɔ gi Jiova glori. As wi de tɔk bɔt sɔm pan di wɔd dɛn we de na dis sam, tink bɔt aw yu go gi Jiova di glori we i fit fɔ gɛt.

AW WI GO GI JIOVA DI GLORI WE I FIT FƆ GƐT?

8. Tɔk bɔt wan we aw wi go gi Jiova glori. (Sam 96:​1-3)

⁸ Rid Sam 96:​1-3. Wi kin gi Jiova glori bay wetin wi de tɔk bɔt am. Dɛn vas dɛn ya de invayt Jiova in pipul dɛn fɔ “siŋ to Jiova,” fɔ “prez in nem,” fɔ “tɔk bɔt di gud nyuz bɔt aw i de sev,” ɛn fɔ “tɔk bɔt in glori na di neshɔn dɛn.” Ɔl dɛn tin dɛn ya na we dɛn we wi go gi glori to wi Papa we de na ɛvin. Di Ju dɛn we bin fetful ɛn di fɔstɛm Kristian dɛn bin rɛdi fɔ tɛl ɔda pipul dɛn bɔt ɔl di gud tin dɛn we Jiova dɔn du fɔ dɛn, ɛn fɔ tɔk bɔt in fayn fayn kwaliti dɛn. (Dan. 3:​16-18; Akt 4:29) Aw wisɛf go du di sem tin?

9-10. Wetin yu lan frɔm Anjɛlina in ɛkspiriɛns? (Luk bak di pikchɔ.)

⁹ Lɛ wi tɔk bɔt wan sista we nem Anjɛlina a we de na Amɛrika in ɛkspiriɛns. I bin gɛt maynd fɔ tɔk bɔt Jiova na in wokples. Bikɔs Anjɛlina bin jɔs bigin fɔ wok na di ɔfis, dɛn invayt in ɛn ɔda pipul dɛn we bin jɔs bigin fɔ wok de na wan mitin usay dɛn bin gɛt chans fɔ tɛl dɛn kɔmpin dɛn smɔl tin bɔt dɛnsɛf. Anjɛlina bin plan fɔ sho shɔt vidio we gɛt pikchɔ dɛn we de sho di gladi-at we i de gɛt we i de sav Jiova. Bɔt jɔs bifo in yon tɛm rich fɔ tɔk, wan pan in wokmet dɛn tɔk se dɛn mɛn am as Jiova Witnɛs. I bigin fɔ tɔk bad bɔt di tin dɛn we wi biliv. Anjɛlina tɔk se: “Mi at bin de bit fast fast. Bɔt a aks misɛf se: ‘Fɔ se a go alaw pɔsin fɔ tɔk lay lay tin dɛn bɔt Jiova? Ɔ a go tɛl dɛn udat Jiova rili bi?’”

 ¹⁰ We in wokmet dɔn fɔ tɔk. Anjɛlina bin pre na in at kwik wan. Dɔn i tek tɛm tɛl am se: “Na di sem we dɛn mɛn mi bak. Dɛn mɛn misɛf as Jiova Witnɛs, ɛn mi na Jiova Witnɛs te tide.” Pan ɔl we i nɔ bin izi, Anjɛlina bin kɔntrol insɛf. I sho in wokmet dɛn pikchɔ dɛn usay in ɛn in padi dɛn gladi we dɛn de sav Jiova, ɛn i tek tɛm tɛl dɛn bɔt wetin i biliv. (1 Pit. 3:15) Wetin bin apin afta dat? Bifo Anjɛlina de dɔn fɔ tɔk, di man in at bin dɔn kol. Di man bin ivin tɔk bɔt di fayn ɛkspiriɛns dɛn we i bin gɛt we dɛn bin de mɛn am as Jiova Witnɛs. Anjɛlina tɔk se: “A fɔ tɔk bɔt Jiova. Na big ɔnɔ a gɛt fɔ tɛl pipul dɛn di tru tin dɛn bɔt am.” Wisɛf gɛt di ɔnɔ fɔ prez Jiova we ɔda pipul dɛn de sho se dɛn nɔ gɛt rɛspɛkt fɔ am.

11. Aw pipul dɛn we de sav Jiova frɔm trade te naw de sho se dɛn de fala di prinsipul we de na Sam 96:8?

¹¹ Rid Sam 96:8. Wi kin gi Jiova glori we wi gi am di valyu tin dɛn we wi gɛt. Di wan dɛn we de wɔship Jiova di rayt we dɔn de yuz di valyu tin dɛn we dɛn gɛt fɔ prez am. (Prɔv. 3:9) Fɔ ɛgzampul, di Izrɛlayt dɛn bin gi kɔntribyushɔn dɛn fɔ bil di tɛmpul ɛn fɔ kia fɔ am. (2 Kiŋ 12:​4, 5; 1 Kro. 29:​3-9) Sɔm pan Krays in disaypul dɛn bin de “yuz wetin dɛn gɛt” fɔ ɛp in ɛn in apɔsul dɛn. (Lyuk 8:​1-3) Di fɔstɛm Kristian dɛnsɛf bin gi rilif tin dɛn fɔ ɛp dɛn brɔda ɛn sista dɛn. (Akt 11:​27-29) Tide, wisɛf kin yuz wi kɔntribyushɔn dɛn fɔ gi Jiova glori.

12. Aw wi kɔntribyushɔn dɛn go mek Jiova gɛt glori? (Luk bak di pikchɔ.)

¹² Lɛ wi tɔk bɔt wan ɛkspiriɛns we de sho aw wi kɔntribyushɔn dɛn de mek Jiova gɛt glori. Insay 2020, ren nɔ bin kam na Zimbabwe fɔ lɔng tɛm ɛn dat bin mek di grɔn dray. I lɛf smɔl fɔ lɛ bɔku bɔku pipul dɛn day bikɔs ɔf angri, ɛn wan sista we nem Priska na bin wan pan dɛn pipul dɛn de. Pan ɔl we tin bin tranga, Priska bin kɔntinyu fɔ prich ɛvri Wɛnsde ɛn Frayde, ivin di tɛm we pipul dɛn kin wok na dɛn fam. In neba dɛn bin de provok am bikɔs bifo i go wok na in fam, na prich i bin de go prich, ɛn dɛn bin de tɛl am se, “Angri go kil yu.” Priska kin tɔk wit kɔnfidɛns se, “Jiova de gi in savant dɛn wetin dɛn nid ɔltɛm.” Shɔt tɛm afta dat, wi ɔganayzeshɔn bin gi am  rilif tin dɛn. I bin ebul fɔ gɛt di tin dɛn we i nid bikɔs ɔf di kɔntribyushɔn dɛn we wi de gi. Priska in neba dɛn bin rili kɔle, ɛn dɛn bin tɛl am se, “Gɔd nɔ ɛva lɛf yu, so wi want fɔ lan mɔ bɔt am.” Sɛvin pan in neba dɛn bin bigin fɔ atɛnd mitin.

13. We wi biev fayn, aw dat de mek Jiova gɛt glori? (Sam 96:9)

¹³ Rid Sam 96:9. Di we aw wi de biev go mek Jiova gɛt glori. Di prist dɛn bin nid fɔ was ɛn klin dɛnsɛf we dɛn de go wok na Jiova in tɛmpul. (Ɛks. 40:​30-32) Bɔt, di tin we impɔtant pas fɔ was ɛn klin dɛnsɛf na we dɛn avɔyd fɔ du tin dɛn we Jiova et. (Sam 24:​3, 4; 1 Pit. 1:​15, 16) Wi fɔ tray tranga wan fɔ lɛf “di ol abit dɛn,” ɛn gɛt “di nyu abit dɛn,” we min se wi fɔ du ɔl wetin wi ebul fɔ avɔyd fɔ tink bɔt bad tin dɛn, ɛn avɔyd fɔ du tin dɛn we go mek Jiova nɔ gladi. Bɔt wi fɔ lan fɔ tink ɛn du tin dɛn di kayn we we de sho se wi de falamakata Jiova ɛn in fayn kwaliti dɛn. (Kol. 3:​9, 10) Jiova kin ɛp ivin pipul dɛn we de liv fri layf ɛn we lɛk fɛt-fɛt fɔ chenj ɛn gɛt di nyu abit dɛn.

14. Wetin yu lan frɔm Jak in ɛkspiriɛns? (Luk bak di pikchɔ.)

¹⁴ Lɛ wi tɔk bɔt Jak in ɛkspiriɛns, we na pɔsin we bin lɛk fɛt-fɛt ɛn we dɛn bin de kɔl Di Dimɔn. Bikɔs Jak na bin bad bad kriminal, di kɔt bin se dɛn fɔ kil am. Bɔt we Jak bin de wet fɔ di tɛm we dɛn go kil am, i bin gri fɔ stɔdi di Baybul wit wan brɔda we bin de go na di prizin usay i bin de. Pan ɔl we Jak bin dɔn du bad bad tin dɛn, i bin lɛf in ol abit dɛn ɛn leta i bin kwalifay fɔ baptayz. Bikɔs Jak bin dɔn rili chenj, sɔm pan di prizin ɔfisa dɛn bin de kray di de we dɛn fɔ kil am. Wan pan di ɔfisa dɛn we bin de wok na di prizin tɔk se: “Trade Jak na bin wan pan di bad bad prizina dɛn na ya. Bɔt naw in na wan pan di bɛst prizina dɛn.” Di wik afta dɛn kil Jak, wan prizina bin atɛnd mitin fɔ di fɔs tɛm we di brɔda dɛn kam bak fɔ kɔndɔkt mitin. Wetin bin mek i disayd fɔ atɛnd di mitin? Na bikɔs i kɔle di we aw Jak bin chenj ɛn i bin want fɔ no wetin i fɔ du fɔ wɔship Jiova. Dis sho klia wan se, di we aw wi de biev go mek wi Papa we de na ɛvin gɛt glori!—1 Pit. 2:12.

 AW JIOVA GO MEK IN NEM GƐT GLORI JISNƆ?

15. Aw Jiova go mek ɔlman no se i fit fɔ gɛt glori jisnɔ? (Sam 96:​10-13)

¹⁵ Rid Sam 96:​10-13. Di las vas dɛn na Sam 96 tɔk bɔt Jiova se, in na Jɔj ɛn Kiŋ we de du tin fia wan. Aw Jiova go mek in nem gɛt glori jisnɔ? Na we i go jɔj fia wan. I nɔ go te igen, i go dɔnawe wit Babilɔn di Gret bikɔs dɛn de mek i gɛt badnem. (Rɛv. 17:​5, 16; 19:​1, 2) We sɔm pipul dɛn si we dɛn de dɔnawe wit Babilɔn di Gret, sɔntɛm dɛn go disayd fɔ jɔyn wi fɔ wɔship Jiova di rayt we. Dɔn, we di tɛm fɔ Amagɛdɔn rich, Jiova go dɔnawe wit Setan in wikɛd wɔl, ɛn kil ɔl di wan dɛn we de agens am ɛn we de tɔk bad bɔt in nem, bɔt i go sev ɔl di wan dɛn we lɛk am, we de obe am, ɛn we gladi fɔ gi am glori. (Mak 8:38; 2 Tɛs. 1:​6-10) Jiova go dɔn mek ɔlman no se i fit fɔ gɛt prez afta di faynal tɛst. Di faynal tɛst go bi afta di Wan Tawzin Ia we Krays Go De Rul dɔn. (Rɛv. 20:​7-10) Da tɛm de, “ɔl di pipul dɛn na di wɔl go no bɔt Jiova in glori jɔs lɛk aw wata ful-ɔp di si.”—Aba. 2:14.

16. Wetin yu dɔn mek-ɔp yu maynd fɔ du? (Luk bak di pikchɔ.)

¹⁶ I go rili wɔndaful fɔ si di tɛm we ɔlman we de alayv de gi Jiova di glori we i fit fɔ gɛt! Bɔt te da tɛm de rich, wi go du ɔl wetin wi ebul ɛn yuz ɛni chans we wi gɛt fɔ gi Jiova glori. Fɔ ɛp wi fɔ no se dis na tin we rili impɔtant, di gɔvnin bɔdi dɔn pik Sam 96:8 fɔ bi wi iatɛks fɔ 2025 we se: “Una gi Jiova di glori we in nem fit fɔ gɛt.”