1. Aw wi de bɛnifit we wi atɛnd di Mɛmorial fɔ Krays in day we wi kin gɛt ɛni ia?

 WAN dawt nɔ de se wi gri se di prayz we Jizɔs pe fɔ fri wi na gift we rili valyu. (2 Kɔr. 9:15) Bikɔs Jizɔs sakrifays in layf as mɔtalman, dat dɔn mek i pɔsibul fɔ lɛ yu gɛt tayt padi biznɛs wit Jiova Gɔd. Yu gɛt chans bak fɔ gɛt layf we go de sote go. Dis fɔ mek wi rili sho se wi gladi fɔ di prayz we Jizɔs pe fɔ fri wi ɛn fɔ sho se wi gladi fɔ Jiova we mek Jizɔs day fɔ wi bikɔs i lɛk wi. (Rom. 5:8) Fɔ mek wi go kɔntinyu fɔ sho se wi gladi fɔ di prayz we Jizɔs pe fɔ fri wi ɛn nɔ ɛva fɔgɛt wetin Jiova ɛn Jizɔs du fɔ wi, Jizɔs bin mek di Mɛmorial fɔ mɛmba in day we wi kin gɛt ɛni ia.—Lyuk 22:​19, 20.

2. Wetin wi go tɔk bɔt insay dis atikul?

² Dis ia, wi go gɛt di Mɛmorial Satide, Epril 12, 2025. Wan dawt nɔ de se wi ɔl de plan fɔ atɛnd di program. Wi go rili bɛnifit insay di tɛm fɔ di Mɛmorial if wi tek sɔm tɛm fɔ tink gud gud wan bɔt wetin Jiova ɛn in Pikin dɔn du fɔ wi. Insay dis atikul, wi go tɔk bɔt wetin di prayz we Jizɔs pe fɔ fri wi tich wi bɔt Jiova ɛn in Pikin. Di atikul we de afta dis wan, go ɛp wi fɔ ɔndastand aw wi go bɛnifit  frɔm di prayz we Jizɔs pe fɔ fri wi ɛn aw wi go sho se wi gladi fɔ wetin i du.

WETIN DI PRAYZ WE JIZƆS PE FƆ FRI WI TICH WI BƆT JIOVA?

3. Aw wan man in day go sev bɔku bɔku pipul dɛn? (Luk bak di pikchɔ.)

³ Di prayz we Jizɔs pe fɔ fri wi tich wi se Jiova na Gɔd we de du tin tret. (Dyu. 32:4) Wetin mek we se so? Bikɔs Adam nɔ bin obe, dat mek wi gɛt sin ɛn wi de day. (Rom. 5:12) Jiova bin arenj fɔ mek Jizɔs pe di prayz fɔ fri wi frɔm sin ɛn day. Bɔt aw wan pafɛkt mɔtalman in sakrifays go sev bɔku bɔku pipul dɛn? Apɔsul Pɔl bin ɛksplen se: “Jɔs lɛk aw wan man [Adam] we nɔ obe dɔn mek bɔku pipul dɛn bi sina, na so bak di obe we wan man [Jizɔs] obe go mek bɔku pipul dɛn bi pipul dɛn we de du wetin rayt.” (Rom. 5:19; 1 Tim. 2:6) So Pɔl bin de tɔk se na bikɔs wan pafɛkt man nɔ bin obe na dat mek wi ɔl bi slev to sin ɛn day. So wi bin nid wan pafɛkt man fɔ obe fɔ fri wi.

4. Wetin mek Jiova nɔ bin jɔs alaw Adam in pikin dɛn we de obe am fɔ de sote go?

⁴ Jizɔs bin rili nid fɔ day fɔ sev wi? Jiova nɔ fɔ dɔn jɔs alaw Adam in pikin dɛn we de obe am fɔ de sote go? To mɔtalman dɛn we nɔ pafɛkt, dat fɔ dɔn bi di bɛst tin fɔ du ɛn we mek sɛns. Bɔt fɔ Jiova, dis nɔ fɔ dɔn bin di rayt tin fɔ du. Bikɔs i go mek i tan lɛk se Adam nɔ ɛva kɔmit da kayn siriɔs sin de ɛn in pikin dɛn nɔto sina dɛn. Bɔt dat nɔto tru.

5. Wetin mek wi biliv tranga wan se Jiova go du wetin rayt ɔltɛm?

⁵ Bɔt wetin fɔ dɔn apin if Jiova nɔ bin mek Jizɔs pe di prayz fɔ fri wi ɛn disayd nɔ fɔ du tin tret bay we i alaw Adam in pikin dɛn fɔ de sote go? Sɔntɛm dat fɔ dɔn mek pipul dɛn wɔnda if Gɔd go du tin tret pan ɔda tin dɛn. Fɔ ɛgzampul, fɔ se i nɔ go du sɔm pan di tin dɛn we i dɔn prɔmis? Wi nɔ nid fɔ wɔri se da kayn tin de go apin. Bikɔs Jiova bin du tin tret bay we i sakrifays in Pikin we i lɛk pan ɔl we i nɔ bin izi fɔ am, dat mek wi biliv tranga wan se i go du wetin rayt ɔltɛm.

6. Us ɔda kwaliti bin mek Jiova sɛn in Pikin fɔ day fɔ wi? (1 Jɔn 4:​9, 10)

⁶ Pan ɔl we di prayz we Jizɔs pe fɔ fri wi de ɛp wi fɔ ɔndastand se Jiova de du tin tret, i de ɛp wi mɔ fɔ ɔndastand di we aw Jiova lɛk wi. (Jɔn 3:16; rid 1 Jɔn 4:​9, 10.) Di prayz we Jizɔs pe fɔ fri wi nɔ jɔs mek wi no se Jiova want lɛ wi gɛt layf we go de sote go, bɔt i ɛp wi bak fɔ no se  Jiova want lɛ wi de pat pan in famili. Tink bɔt dis: We Adam sin, Jiova bin pul am kɔmɔt na in famili. Bikɔs ɔf dat, wi nɔ bin de pat pan Jiova in famili we dɛn bɔn wi. Bɔt bikɔs ɔf di prayz we Jizɔs pe fɔ fri wi, Jiova de fɔgiv wi sin dɛn ɛn as tɛm de go i go mek ɔl mɔtalman we de sho se dɛn gɛt fet ɛn we de obe am de pat pan in famili. Ivin rayt naw, wi ebul fɔ gɛt tayt padi biznɛs wit Jiova ɛn wi kɔmpin Kristian dɛn. Fɔ tru Jiova rili lɛk wi!—Rom. 5:​10, 11.

7. Aw di sɔfa we Jizɔs sɔfa ɛp wi fɔ ɔndastand aw Jiova lɛk wi?

⁷ Wi go ebul ɔndastand fayn fayn wan aw Jiova lɛk wi we wi tink bɔt wetin i bin nid fɔ du fɔ mek Jizɔs pe di prayz fɔ fri wi. Setan bin tɔk se nɔn pan Gɔd in savant dɛn nɔ go kɔntinyu fɔ de biɛn am we tin tranga fɔ dɛn. Jiova bin alaw Jizɔs fɔ sɔfa bifo i day fɔ sho se wetin Setan tɔk na lay. (Job 2:​1-5; 1 Pit. 2:21) Jiova bin si we di wan dɛn we bin de agens Jizɔs de provok am, we sojaman dɛn bin de bit am, ɛn we dɛn nel am pan tik. Dɔn Jiova si we dɛn lɛf in Pikin we i lɛk fɔ sɔfa te i day penful wan. (Mat. 27:​28-31, 39) Jiova bin gɛt di pawa fɔ mek dis nɔ apin. Fɔ ɛgzampul, we sɔm pipul dɛn tɔk se “lɛ Gɔd sev am naw if i lɛk am,” Jiova bin fɔ dɔn sev am. (Mat. 27:​42, 43) Bɔt if Gɔd bin du dat, Jizɔs nɔ bin fɔ dɔn pe di prayz fɔ fri wi ɛn wi nɔ bin fɔ gɛt op. So Jiova bin alaw in Pikin fɔ sɔfa te i day.

8. Fɔ se Jiova fil am we i bin de si in Pikin de sɔfa? Ɛksplen. (Luk bak di pikchɔ.)

⁸ Lɛ wi nɔ tink se jɔs bikɔs Gɔd na di ɔlmayti dat min se i nɔ de fil. I mek wi lɛk aw insɛf tan, ɛn i mek wi di kayn we we wi de ebul fɔ fil, so i mek sɛns fɔ biliv se Jiova sɛf gɛt filin. Di Baybul se i kin “fil bad” ɛn “in at [kin] pwɛl.” (Sam 78:​40, 41) Lɛ wi tɔk bak bɔt di akawnt bɔt Ebraam ɛn Ayzak. Mɛmba se, Jiova bin tɛl Ebraam fɔ sakrifays in wangren pikin. (Jɛn. 22:​9-12; Ibru. 11:​17-19) Na imajin nɔmɔ wi go ebul fɔ imajin di kayn pwɛlat we Ebraam bin gɛt we i bin de rɛdi fɔ kil Ayzak. So imajin di kayn pwɛlat we Jiova bin gɛt we i si we pipul dɛn bin de mek in Pikin sɔfa bad bad wan ɛn kil am!—Wach di vidio we gɛt di taytul, Falamakata Dɛn Fet​—Ebraam, Pat 2 na jw.org.

9. Aw Romans 8:​32, 38, 39 ɛp yu fɔ ɔndastand aw Jiova rili lɛk yu ɛn yu kɔmpin Kristian dɛn?

⁹ Di prayz we Jizɔs pe fɔ fri wi mek wi no se nɔbɔdi nɔ lɛk wi lɛk aw Jiova lɛk wi, ivin wi fambul we rili lɛk wi ɔ wi bɛst padi. (Rid Romans 8:​32, 38, 39.) Wan  dawt nɔ de se Jiova lɛk wi pas aw wi lɛk wisɛf. Yu want fɔ de sote go? Jiova want yu fɔ de sote go pas aw yu want fɔ de sote go. Yu want lɛ Jiova fɔgiv yu sin dɛn? Jiova want fɔ fɔgiv yu sin dɛn pas aw yu want lɛ i fɔgiv yu sin dɛn. Ɔl wetin i want wi fɔ du na fɔ sho se wi gladi fɔ di gift we i dɔn gi wi bay we wi sho se wi gɛt fet ɛn obe am. Di prayz we Jizɔs pe fɔ fri wi sho se Gɔd rili lɛk wi. Ɛn insay di nyu wɔl, wi go lan mɔ bɔt aw Jiova lɛk wi.—Ɛkli. 3:11.

WETIN DI PRAYZ WE JIZƆS PE FƆ FRI WI DE TICH WI BƆT AM?

10. (a) Wetin bin mek Jizɔs in at pwɛl mɔ di tɛm we i bin de day? (b) Us we dɛn Jizɔs sho se wetin Jiova tɔk na tru? (Luk bak di bɔks we gɛt di taytul,  Jizɔs in Sakrifays Bin Pruv se Setan Na Layman)

¹⁰ Jizɔs rili bisin bɔt wetin pipul dɛn tink bɔt in Papa. (Jɔn 14:31) Jizɔs in at bin pwɛl bikɔs di lay we dɛn lay pan am se i tɔk bad tin bɔt Gɔd ɛn mek pipul dɛn tɔn agens di gɔvmɛnt, go mek in Papa gɛt badnem. Na dat mek i bin pre se: “Mi Papa, if i pɔsibul, mek dis kɔp pas mi.” (Mat. 26:39) Bikɔs Jizɔs bin kɔntinyu fɔ sav Jiova fetful wan te i day, dat sho klia wan se wetin Setan tɔk bɔt in Papa nɔto tru.

11. Aw Jizɔs bin sho se i rili lɛk pipul dɛn? (Jɔn 13:1)

¹¹ Di prayz we Jizɔs pe fɔ fri wi sho se i rili bisin bɔt pipul dɛn, mɔ in disaypul dɛn. (Prɔv. 8:31; rid Jɔn 13:1.) Fɔ ɛgzampul, Jizɔs bin no se sɔm pan di tin dɛn we i go du na dis wɔl nɔ go izi, mɔ di day we i go gɛt fɔ day. Bɔt we i bin de du ɔl dɛn tin dɛn de, i nɔ bin jɔs du dɛn bikɔs i nid fɔ du dɛn. Bifo dat, Jizɔs bin prich, tich, ɛn ɛp ɔda pipul dɛn wit ɔl in at. Ivin  di nɛt bifo Jizɔs day, i bin tek tɛm was in apɔsul dɛn fut ɛn tɔk fayn wɔd dɛn fɔ tich ɛn ɛnkɔrej dɛn. (Jɔn 13:​12-15) Dɔn we Jizɔs bin ɛng pan di tik, i bin gi op to wan kriminal ɛn arenj fɔ mek pɔsin kia fɔ in yon mama. (Lyuk 23:​42, 43; Jɔn 19:​26, 27) So Jizɔs nɔ bin jɔs sho se i bisin bɔt pipul dɛn bay we i day, bɔt i bin du dat ɔl di tɛm we i bin de na di wɔl.

12. Wetin Jizɔs de du fɔ wi naw?

¹² Pan ɔl we na “wan tɛm nɔmɔ” Krays day, i stil de du bɔku tin dɛn fɔ wi. (Rom. 6:10) Aw i de du dat? I de kɔntinyu fɔ wok tranga wan fɔ mek wi bɛnifit frɔm di prayz we i pe fɔ fri wi. Lɛ wi tɔk bɔt wetin i bizi de du naw. I de wok as Kiŋ, Ay Prist, ɛn na in de oba di kɔngrigeshɔn. (1 Kɔr. 15:25; Ɛfi. 5:23; Ibru. 2:17) Na in de bifo fɔ gɛda di anɔyntɛd dɛn ɛn di bɔku bɔku pipul dɛn, ɛn dis na wok we go dɔn bifo di big big trɔbul ɛnd. a (Mat. 25:32; Mak 13:27) Dɔn bak, i de mek shɔ se in fetful savant dɛn de gɛt di tin dɛn we dɛn nid fɔ kɔntinyu fɔ sav Jiova fetful wan insay dis las dez. (Mat. 24:45) Ɛn te di Wan Tawzin Ia We I De Rul dɔn, i go kɔntinyu fɔ wok fɔ wi. We Jiova gi wi in Pikin, I nɔ jɔs mek i day fɔ wi, bɔt i gi wi am so dat i go du bɔku ɔda tin dɛn fɔ wi!

NƆ ƐVA STƆP FƆ LAN BƆT GƆD

13. We yu de tink gud gud wan, aw dat go ɛp yu fɔ kɔntinyu fɔ lan bɔt di lɛk we Gɔd ɛn Krays lɛk wi?

¹³ Yu go kɔntinyu fɔ lan bɔt di lɛk we Jiova Gɔd ɛn Krays Jizɔs lɛk wi we yu kɔntinyu fɔ tink gud gud wan bɔt wetin dɛn dɔn du fɔ yu. Sɔntɛm insay di tɛm fɔ di Mɛmorial dis ia, yu go tek tɛm rid wan ɔ mɔ pan di Gɔspɛl dɛn. Nɔ tray fɔ rid bɔku chapta dɛn wantɛm wantɛm. Bifo dat, tek tɛm ɛn tray fɔ luk fɔ mɔ rizin dɛn we mek wi fɔ lɛk Jiova ɛn Jizɔs. Ɛn nɔ fɔgɛt fɔ tɛl ɔda pipul dɛn wetin yu dɔn lan.

14. Akɔdin to Sam 119:97 ɛn di futnot, we wi de du risach, aw dat go ɛp wi fɔ kɔntinyu fɔ lan bɔt di prayz we Jizɔs pe fɔ fri wi ɛn ɔda tin dɛn we di Baybul de tich? (Luk bak di pikchɔ.)

¹⁴ If yu dɔn de na di trut fɔ lɔng tɛm, sɔntɛm yu go de wɔnda if i pɔsibul fɔ fɛn nyu tin dɛn bɔt tɔpik dɛn lɛk, aw Gɔd de du tin tret, in lɔv, ɛn di prayz we Jizɔs pe fɔ fri wi. Di tru na dat, wi go kɔntinyu fɔ lan nyu tin dɛn bɔt dɛn tɔpik dɛn ya ɛn  ɔda wan dɛn. So, wetin yu fɔ du? Rid ɛn stɔdi di bɔku bɔku infɔmeshɔn we de na wi pɔblikeshɔn dɛn. We yu rid sɔntin we yu nɔ ɔndastand bɛtɛ, na fɔ du risach. Dɔn insay di de, go de tink gud gud wan bɔt wetin yu dɔn lan ɛn wetin i tich yu bɔt Jiova, in Pikin, ɛn di lɛk we dɛn lɛk yu.—Rid Sam 119:97 ɛn di futnot.

15. Wetin mek wi fɔ kɔntinyu fɔ fɛn valyu tin dɛn na di Baybul?

¹⁵ Lɛ yu at nɔ pwɛl if yu nɔ fɛn nyu tin ɔ intrɛstin tin ɛnitɛm yu rid di Baybul ɔ du risach. Na fɔ si yusɛf lɛk pɔsin we de luk fɔ gold. Bɔku tɛm, pɔsin we de luk fɔ gold kin spɛn lɔng tɛm ɔ sɔm dez bifo i fɛn smɔl gold. Bɔt i nɔ de giv-ɔp ɛn i de peshɛnt ɛn kɔntinyu fɔ wach bikɔs i no se ɛni gold we i fɛn ilɛk na smɔl wan, rili valyu to am. Bɔt di nyu tin dɛn we wi de lan na di Baybul valyu pas gold! (Sam 119:127; Prɔv. 8:10) So na fɔ peshɛnt ɛn kɔntinyu fɔ du yu Baybul ridin.—Sam 1:2.

16. Aw wi go falamakata Jiova ɛn Jizɔs?

¹⁶ As yu de stɔdi, luk fɔ we dɛn fɔ aplay wetin yu de lan. Fɔ ɛgzampul, yu kin falamakata di we aw Jiova de du tin tret bay we yu de trit ɔda pipul dɛn di kayn we we de sho se yu nɔ de tek wan pɔsin bɛtɛ pas ɔda pɔsin. Falamakata di we aw Jizɔs lɛk in Papa ɛn ɔda pipul dɛn bay we yu rɛdi fɔ sɔfa fɔ Jiova in nem ɛn bay we yu de ɛp yu kɔmpin Kristian dɛn, ivin if sɔntɛnde i nɔ izi fɔ mek yu du dat. Dɔn bak, yu kin falamakata Jizɔs bay we yu de prich to ɔda pipul dɛn fɔ mek dɛnsɛf gɛt chans fɔ bɛnifit frɔm di gift we Jiova dɔn gi wi we rili valyu.

17. Wetin wi go tɔk bɔt insay di nɛks atikul?

¹⁷ Di mɔ we wi ɔndastand ɛn gladi fɔ di prayz we Jizɔs pe fɔ fri wi, na di mɔ wi go lɛk Jiova ɛn in Pikin, ɛn bikɔs wi rili lɛk dɛn, dɛnsɛf go lɛk wi mɔ ɛn mɔ. (Jɔn 14:21; Jems 4:8) So lɛ wi yuz di tin dɛn we Jiova dɔn gi wi fɔ kɔntinyu fɔ lan bɔt di prayz we Jizɔs pe fɔ fri wi. Di nɛks atikul go tɔk bɔt sɔm we dɛn we wi de bɛnifit frɔm di prayz we Jizɔs pe fɔ fri wi ɛn wetin wi go du fɔ sho se wi gladi fɔ di lɛk we Jiova lɛk wi.