STƆDI ATIKUL 5
SIŊ 108 Gɔd Gɛt Tru Lɔv!
Wi De Bɛnifit Frɔm di Lɔv we Jiova Gɛt
“Krays Jizɔs kam na di wɔl fɔ sev sina dɛn.”—1 TIM. 1:15.
MEN PƆYNT
Aw wi de bɛnifit frɔm di prayz we Jizɔs pe fɔ fri wi ɛn aw wi go sho Jiova se wi gladi fɔ wetin i du.
1. Wetin wi go du fɔ mek Jiova gladi?
IMAJIN se yu gi pɔsin we yu lɛk spɛshal gift we fayn ɛn we i go ebul fɔ yuz. Yu go fil bad if di pɔsin jɔs go kip am ɛn fɔgɛt bɔt am. Bɔt yu go rili gladi if di pɔsin we yu gi di gift yuz am fayn ɛn sho se i gladi fɔ am. Wetin na di pɔynt? Jiova dɔn gi in Pikin fɔ day fɔ wi. Jiova go rili gladi we wi sho se wi gladi fɔ dis valyu gift we i gi wi ɛn di lɔv we i sho wi bay we i mek Jizɔs pe di prayz fɔ fri wi!—Jɔn 3:16; Rom. 5:7, 8.
2. Wetin wi go tɔk bɔt insay dis atikul?
2 Bɔt as tɛm de go, sɔntɛm wi nɔ go valyu di prayz we Jizɔs pe fɔ fri wi lɛk aw wi bin valyu am trade. I go tan lɛk se wi tek di gift we Gɔd gi wi ɛn put am na stɔ. Wi gladi fɔ gɛt am, bɔt wi kip am na say we wi nɔ de si am. Fɔ mek dat nɔ apin, wi fɔ kɔntinyu fɔ de tink bɔt aw wi gladi fɔ wetin Gɔd ɛn Krays dɔn du fɔ wi. Dis atikul go ɛp wi fɔ du dat. Wi go tɔk bɔt aw wi de bɛnifit frɔm di prayz we Jizɔs pe fɔ fri wi naw ɛn aw wi go bɛnifit tumara bambay. Wi go tɔk bak bɔt aw wi go sho se wi gladi fɔ di lɛk we Jiova lɛk wi, mɔ insay di tɛm fɔ di Mɛmorial.
AW WI DE BƐNIFIT NAW
3. Wetin na wan bɛnifit we wi de gɛt naw bikɔs Jizɔs pe di prayz fɔ fri wi?
3 Wi de bɛnifit rayt naw frɔm di prayz we Krays pe fɔ fri wi. Fɔ ɛgzampul, Jiova de fɔgiv wi sin dɛn bikɔs Jizɔs day fɔ wi. Nɔto paopa se i fɔ fɔgiv wi. Bɔt i want fɔ fɔgiv wi. Wan pan di man dɛn we rayt di sam buk bin sho se i gladi bikɔs Jiova na Gɔd we de fɔgiv. I bin tɔk se: “E Jiova, yu gud ɛn yu rɛdi fɔ fɔgiv.”—Sam 86:5; 103:3, 10-13.
4. Na fɔ udat dɛn Jiova mek Jizɔs kam day? (Lyuk 5:32; 1 Timoti 1:15)
4 Sɔntɛm, sɔm pipul dɛn go fil se dɛn nɔ fit fɔ mek Jiova fɔgiv dɛn. Di tru na dat, wi nɔn nɔ fit fɔ mek Jiova fɔgiv wi. Apɔsul Pɔl bin tɔk se i “nɔ fit fɔ mek dɛn kɔl [am] apɔsul bikɔs [i] bin de mek Gɔd in kɔngrigeshɔn sɔfa.” Bɔt i kɔntinyu fɔ tɔk se: “Gɔd in spɛshal gudnɛs dɔn mek a bi udat a bi.” (1 Kɔr. 15:9, 10) We wi ripɛnt, Jiova de fɔgiv wi. Wetin mek? Na bikɔs i lɛk wi, nɔto bikɔs wi fit fɔ mek i fɔgiv wi. If yu at pwɛl bikɔs yu fil se yu nɔ fit fɔ mek Jiova fɔgiv yu, mɛmba se Jiova nɔ mek Jizɔs pe di prayz fɔ pipul dɛn we nɔ gɛt sin, bɔt na fɔ sina dɛn we ripɛnt.—Rid Lyuk 5:32; 1 Timoti 1:15.
5. Ɛni wan pan wi fɔ fil se na wi rayt fɔ mek Jiova fɔgiv wi? Ɛksplen.
5 Nɔn pan wi nɔ fɔ fil se na wi rayt fɔ mek Jiova fɔgiv wi ilɛk wi dɔn de sav am fɔ lɔng tɛm. Wan dawt nɔ de se Jiova gladi fɔ ɔl di tin dɛn we wi de du fɔ am. (Ibru. 6:10) I nɔ gi in Pikin as fri gift fɔ day fɔ fri wi bikɔs ɔf di gud tin dɛn we wi de du fɔ am. If wi de fil se wi dɔn wok tranga wan fɔ mek Jiova sɔri fɔ wi ɔ fil se na wi rayt fɔ mek i fɔgiv wi, i go tan lɛk se wi de tɔk se Krays day fɔ natin.—Luk bak Galeshians 2:21.
6. Wetin mek Pɔl bin de wok tranga wan fɔ Jiova?
6 Pɔl bin no se ilɛk i wok tranga wan, dat nɔ go mek Jiova fɔgiv am. So wetin mek i bin de wok tranga wan fɔ Jiova? I nɔ bin du am fɔ sho se i fit fɔ mek Jiova sɔri fɔ am, bɔt na fɔ sho se i gladi fɔ di spɛshal gudnɛs we Jiova sho am. (Ɛfi. 3:7) Jɔs lɛk Pɔl, wi de kɔntinyu fɔ wok tranga wan bikɔs wi want fɔ sho se wi gladi fɔ di sɔri-at we Jiova de sho wi, nɔto fɔ mek Jiova sɔri fɔ wi bikɔs ɔf di wok we wi de du.
7. Us ɔda we wi de bɛnifit frɔm di prayz we Jizɔs pe fɔ fri wi naw? (Romans 5:1; Jems 2:23)
7 Wan ɔda we we wi de bɛnifit naw frɔm di prayz we Jizɔs pe fɔ fri wi na we wi ebul fɔ gɛt tayt padi biznɛs wit Jiova. a Jɔs lɛk aw wi bin dɔn tɔk na di atikul bifo dis wan, we dɛn bɔn wi, wi nɔ bin gɛt padi biznɛs wit Gɔd. Bɔt bikɔs Jizɔs pe di prayz fɔ fri wi, wi ebul fɔ gɛt “pis . . . wit Gɔd,” so wi ebul fɔ kam nia am.—Rid Romans 5:1; Jems 2:23.
8. Wetin mek wi fɔ gladi fɔ di ɔnɔ we wi gɛt fɔ pre to Jiova?
8 Tink bɔt wan tin we wi ebul fɔ du bikɔs Jiova na wi padi, dat na di ɔnɔ we wi gɛt fɔ pre to am. Jiova nɔ jɔs de yɛri we in pipul dɛn de pre to am we dɛn de togɛda, bɔt i de yɛri bak we ɛni wan pan wi de pre to am. Prea kin mek wi at kol ɛn nɔ wɔri. Bɔt nɔto da bɛnifit de nɔmɔ wi kin gɛt. I de mek wi gɛt tayt padi biznɛs wit Gɔd. (Sam 65:2; Jems 4:8; 1 Jɔn 5:14) We Jizɔs bin de na di wɔl, i bin de pre ɔltɛm bikɔs i no se Jiova bin de lisin to in prea, ɛn prea go ɛp am fɔ gɛt tayt padi biznɛs wit in Papa. (Lyuk 5:16) Wi rili gladi fɔ no se bikɔs Jizɔs pe di prayz fɔ fri wi, dat dɔn mek wi ebul fɔ bi Jiova in padi dɛn ɛn pre to Am!
AW WI GO BƐNIFIT TUMARA BAMBAY
9. Aw di prayz we Jizɔs pe fɔ fri wi go bɛnifit Jiova in fetful savant dɛn tumara bambay?
9 Aw di prayz we Jizɔs pe fɔ fri wi go bɛnifit Jiova in fetful savant dɛn tumara bambay? Dɛn go gɛt layf we go de sote go. Bɔku pipul dɛn tink se dis nɔ pɔsibul bikɔs mɔtalman dɔn de day fɔ lɔng lɔng tɛm. Bɔt frɔm di tɛm we Jiova mek mɔtalman, i bin want dɛn fɔ de sote go. If Adam nɔ bin sin, nɔbɔdi nɔ bin fɔ fil se i nɔ pɔsibul fɔ de sote go. Ɛn pan ɔl we naw i at fɔ imajin se mɔtalman go ebul fɔ de sote go, wi fɔ biliv se dat go apin bikɔs wi no se Jiova bin pe di prayz we pas ɔl, we na in Pikin in layf fɔ mek wi gɛt chans fɔ de sote go.—Rom. 8:32.
10. Wetin di anɔyntɛd dɛn ɛn di ɔda ship dɛn de op fɔ gɛt?
10 Pan ɔl we layf we go de sote go na bɛnifit we wi go gɛt tumara bambay, Jiova want mek wi de tink bɔt am rayt naw. Di anɔyntɛd dɛn de op fɔ liv wɔndaful layf na ɛvin we dɛn de rul wit Krays oba di wɔl. (Rɛv. 20:6) Di ɔda ship dɛn de op fɔ de na paradays na dis wɔl usay pen ɛn pwɛlat nɔ go de igen. (Rɛv. 21:3, 4) Yu na wan pan di ɔda ship dɛn we de op fɔ gɛt layf sote go na dis wɔl? Dat nɔ min se di wan dɛn we go go ɛvin bɛtɛ pas di wan dɛn we go de na di wɔl. Na dis wɔl Jiova bin mek fɔ lɛ mɔtalman de. So fɔ de na dis wɔl sote go go mek wi rili gladi.
11-12. Wetin na sɔm pan di blɛsin dɛn we go de na Paradays we wi fɔ gladi fɔ? (Luk bak di pikchɔ dɛn.)
11 Imajin aw layf go tan lɛk fɔ yu na Paradays na dis wɔl. Yu nɔ go de wɔri bɔt sik ɛn day. (Ayz. 25:8; 33:24) Jiova go gi yu ɔl di gud tin dɛn we yu want. Wetin yu go want fɔ lan? Yu go lɛk fɔ lan bɔt animal dɛn? Yu go lɛk fɔ lan fɔ ple myuzik instrumɛnt? Yu go lɛk fɔ lan aw fɔ drɔ? Insay Paradays wi go nid pipul dɛn we sabi aw fɔ dizayn ɛn bil os dɛn. Ɛn wi go nid pipul dɛn bak fɔ plant tin fɔ it ɛn fɔ kuk, fɔ mek tin dɛn we dɛn de yuz fɔ wok, ɛn mek gadin dɛn ɛn kia fɔ dɛn. (Ayz. 35:1; 65:21) Bikɔs yu go de sote go, yu go gɛt chans fɔ lan ɔl dɛn tin dɛn ya ɛn bɔku ɔda wan dɛn.
12 Wi go rili gladi fɔ wɛlkɔm di wan dɛn we go gɛt layf bak! (Akt 24:15) Imajin bak aw yu go ɛnjɔy fɔ lan mɔ bɔt Jiova we yu de lan bɔt di bɔku bɔku tin dɛn we i dɔn mek. (Sam 104:24; Ayz. 11:9) Ɛn di tin we pas ɔl dɛn tin dɛn ya we wi dɔn tɔk bɔt, na we yu de wɔship Jiova ɛn nɔ de wɔri se yu go du ɛnitin we bad! Yu go want fɔ lɔs di chans fɔ de na Paradays bikɔs yu want “fɔ ɛnjɔy sin fɔ shɔt tɛm”? (Ibru. 11:25) Wan dawt nɔ de se yu nɔ go want fɔ du dat! Dɛn blɛsin dɛn ya pas ɛnitin we wi go sakrifays rayt naw. Mɛmba se Paradays na dis wɔl nɔ go bi sɔntin we wi go jɔs kɔntinyu fɔ op fɔ tumara bambay. As tɛm de go, i go bi di ples we wi go de ɛvride. Nɔn pan dɛn tin dɛn ya nɔ fɔ dɔn pɔsibul if Jiova nɔ bin lɛk wi pasmak ɛn mek in Pikin day fɔ wi!
Us blɛsin dɛn yu go rili want fɔ ɛnjɔy na Paradays? (Luk na paregraf 11 ɛn 12)
SHO SE YU GLADI FƆ DI LƐK WE JIOVA LƐK YU
13. Aw wi go sho se wi rili gladi fɔ di lɛk we Jiova lɛk wi? (2 Kɔrintians 6:1)
13 Aw wi go sho se wi rili gladi bikɔs Jiova mek in Pikin pe di prayz fɔ fri wi? Na we wi mek shɔ se di tin we impɔtant pas ɔl na wi layf na fɔ wɔship am. (Mat. 6:33) Afta ɔl, Jizɔs bin day “so dat di wan dɛn we de liv nɔ fɔ liv fɔ dɛnsɛf igen, bɔt dɛn fɔ liv fɔ in we day fɔ dɛn ɛn we gɛt layf bak.” (2 Kɔr. 5:15) Wan dawt nɔ de se wi nɔ want fɔ tek Jiova in spɛshal gudnɛs as sɔntin we nɔ min natin.—Rid 2 Kɔrintians 6:1.
14. Aw wi go sho se wi abop pan di dayrɛkshɔn we Jiova de gi?
14 Wi go sho bak se wi gladi fɔ di lɛk we Jiova lɛk wi bay we wi abop pan am ɛn fala in dayrɛkshɔn. Aw? Wi fɔ tink bɔt wetin Jiova want mek wi du we wi nid fɔ disayd ɔmɔs buk wi fɔ lan ɔ uskayn wok fɔ du. (1 Kɔr. 10:31; 2 Kɔr. 5:7) We wi de du tin dɛn we de sho se wi gɛt fet, wi fet ɛn padi biznɛs wit Jiova go strɔng mɔ ɛn mɔ, ɛn dat na wɔndaful tin. Wi op go strɔng mɔ ɛn mɔ.—Rom. 5:3-5; Jems 2:21, 22.
15. Insay di tɛm fɔ di Mɛmorial, aw wi go sho se wi gladi fɔ wetin Jiova ɛn Jizɔs du fɔ wi?
15 Ɔda tin de bak we wi go ebul fɔ du fɔ sho se wi gladi fɔ di lɛk we Jiova lɛk wi. Dat na we wi yuz dis Mɛmorial tɛm fɔ sho Jiova se wi gladi bikɔs i mek Jizɔs pe di prayz fɔ fri wi. Apat frɔm di plan we wi de mek fɔ atɛnd di Mɛmorial, wi want fɔ invayt ɔda pipul dɛn sɛf fɔ atɛnd. (1 Tim. 2:4) Ɛksplen to di wan dɛn we yu de invayt wetin go apin na di Mɛmorial. I go fayn if yu sho dɛn di vidio dɛn na jw.org we gɛt di taytul, Wetin Mek Jizɔs bin Day? ɛn Mɛmba Jizɔs in Day. Ɛlda dɛn fɔ mek shɔ se dɛn invayt inaktiv wan dɛn. Imajin di kayn gladi-at we go de na ɛvin ɛn na di wɔl if sɔm pan Jiova in ship dɛn we bin dɔn lɔs kam bak! (Lyuk 15:4-7) Di de fɔ di Mɛmorial, wi fɔ mek shɔ se wi nɔ jɔs grit wisɛf, bɔt wi fɔ grit di nyu wan dɛn we atɛnd ɔ di wan dɛn we i dɔn te dɛn nɔ atɛnd mitin. Wi want fɔ mek dɛn fil fayn!—Rom. 12:13.
16. Wetin mek wi fɔ du mɔ insay di tɛm fɔ di Mɛmorial?
16 Yu go ebul fɔ du mɔ fɔ Jiova insay di tɛm fɔ di Mɛmorial? We wi du dat, i go sho se wi gladi fɔ ɔl di tin dɛn we Gɔd ɛn Krays dɔn du fɔ wi. Di mɔ we wi de wok fɔ Jiova, na di mɔ wi de si aw i de sɔpɔt wi, ɛn dat go mek wi abop pan am mɔ ɛn mɔ. (1 Kɔr. 3:9) Dɔn bak, mek shɔ se yu du di Mɛmorial Baybul ridin we de na di brosho we nem, Stɔdi di Skripchɔ dɛn Ɛvride ɔ na di chat we de na di Mitin Buk. Yu kin ivin yuz dɛn vas dɛn de as stɔdi projɛkt.
17. Wetin de mek Jiova gladi? (Luk bak di bɔks we gɛt taytul, “ Tin dɛn we Wi Go Du fɔ Sho se Wi Gladi fɔ di Lɛk we Jiova Lɛk Wi.”)
17 As wi ɔl no, sɔntɛm di tin dɛn we de apin to yu nɔ go alaw yu fɔ du ɔl di tin dɛn we wi dɔn tɔk bɔt insay dis atikul. Bɔt mɛmba se, Jiova nɔ de kɔmpia wetin yu de du wit wetin ɔda pipul dɛn ebul fɔ du; i de si wetin de na yu at. I kin gladi we i si se yu rili gladi fɔ di day we in Pikin day fɔ wi we na gift we rili valyu.—1 Sam. 16:7; Mak 12:41-44.
18. Wetin mek wi gladi fɔ wetin Jiova Gɔd ɛn Jizɔs Krays dɔn du fɔ wi?
18 Di wangren rizin we mek Jiova de fɔgiv wi sin dɛn ɛn we mek wi gɛt op fɔ de sote go, na bikɔs Jizɔs pe di prayz fɔ fri wi. Lɛ wi kɔntinyu fɔ sho ɔltɛm se wi gladi fɔ di lɛk we Jiova lɛk wi we mek wi gɛt ɔl dɛn blɛsin dɛn ya. (1 Jɔn 4:19) Lɛ wi kɔntinyu bak fɔ sho se wi gladi fɔ di lɛk we Jizɔs lɛk wi pasmak we mek i gi in layf fɔ wi!—Jɔn 15:13.
SIŊ 154 Lɔv Nɔ De Fel
