DI Baybul gɛt wɔd dɛn we de tɔch wi at we sɔm man dɛn “we gɛt filin lɛk wi,” bin tɔk. (Jems 5:​17, NW) Fɔ ɛgzampul, i izi fɔ mek wi ɔndastand wetin Pɔl bin tɔk na Lɛta fɔ Rom 7:​21-24 (NW) we se: “We a want fɔ du wetin rayt, na bad tin a kin fil fɔ du. . . Mi na man we sɔri!” We wi de fɛt wit wi bad abit dɛn bikɔs wi nɔ pafɛkt, wi de rili gladi fɔ no se ivin fetful man lɛk Pɔl bin de fil dis kayn we bɔt insɛf.

Pɔl bin tɔk bɔt ɔda we dɛn we i bin de fil. Na Lɛta Fɔ Galeshya 2:​20, i bin tɔk se i biliv tranga wan se Jizɔs “so lɛk [am] dat i sakrifays in layf fɔseka [am].” Yusɛf de fil di sem we? Sɔntɛm nɔto ɔltɛm.

If yu stil de fil bad bikɔs yu bin dɔn mek mistek, sɔntɛnde, yu go de tink se Jiova nɔ lɛk yu ɛn i nɔ fɔgiv yu, ɛn i nɔ go izi fɔ yu fɔ biliv se Jizɔs day fɔ yu sin. Fɔ se Jizɔs rili want wi fɔ ɔndastand se di day we i day fɔ wi na gift? If na so i bi, wetin go ɛp wi fɔ du dat? Lɛ wi tɔk bɔt tu kwɛstyɔn dɛn.

Jizɔs want wi fɔ si in sakrifays as gift. Aw wi go shɔ bɔt dat? Imajin wetin apin na Lyuk 23:​39-43, (NW). Wan man ɛŋ na tik nia Jizɔs. I bin gri se i dɔn du bad tin. Di kraym we dis man kɔmit rili siriɔs bikɔs di kayn pɔnishmɛnt we dɛn gi am kin de fɔ dɛn bad bad kriminal dɛn. Dis man in at rili pwɛl, so i beg Jizɔs se: “Mɛmba mi we yu go na yu Kiŋdɔm.”

Wetin Jizɔs bin du? Imajin di kayn pen we Jizɔs de fil we i de tɔn in ed fɔ wach di man na in yay. Pan ɔl dat, i smayl ɛn ɛnkɔrej di man. I tɔk se: “A de tɛl yu tide se yu go de wit mi na Paradays.” Jizɔs fɔ dɔn jɔs mɛmba di man se “Mɔtalman Pikin kam” fɔ “gi in layf fɔ sev plɛnti plɛnti pipul.” (Mat. 20:​28) Bɔt yu notis di we aw Jizɔs bin tek tɛm ɛp di man fɔ si se i sakrifays in layf fɔ am? I bin tɔk to am lɛk in padi ɛn in yuz wɔd dɛn lɛk “yu” ɛn “mi.” Ɛn i tɛl di man se i go de na Paradays na dis wɔl.

Jizɔs bin want dis man fɔ ɔndastand se di day we i de kam day na fɔ lɛ insɛf bɛnifit. If Jizɔs bin fil dis kayn we bɔt di kriminal we nɔ bin ivin gɛt di chans fɔ sav Gɔd, yu nɔ tink se i go fil da sem we de mɔ fɔ Kristian we dɔn baptayz ɛn we de sav Gɔd? So wetin go ɛp wi fɔ rili biliv se Krays in day wan go bɛnifit wi ilɛk us sin wi bin dɔn kɔmit?

Di prichin wok we Pɔl bin de du bin mek i ɔndastand klia wan se Jizɔs day fɔ am. Wetin mek wi se so? I ɛksplen se: “A tɛl  wi Masta Krays Jizɔs tɛnki, we gi mi pawa, bikɔs i tek mi as pɔsin we fetful bay we i gi mi wok, pan ɔl we trade a bin de tɔk bad bɔt Gɔd, a bin de mek pipul dɛn sɔfa, ɛn a bin de mek lɛk se a bɛtɛ pas ɔda pipul dɛn.” (1 Tim. 1:​12-14, NW) Di wok we Jizɔs bin gi Pɔl bin mek i biliv tranga wan se Jizɔs lɛk am, i de sɔri fɔ am, ɛn i bin trɔst am. Jizɔs dɔn gi wi bak di wok fɔ prich di gud nyuz bɔt di Kiŋdɔm. (Mat. 28:​19, 20, NW) Fɔ se dis wok we Jizɔs dɔn gi wi go mek wi ɔndastand se i day fɔ wi?

Albat we jɔs kam bak to Jiova afta we i bin dɔn disfɛloship fɔ lɛk 34 ia bin ɛksplen se: “Ɔltɛm mi sin dɛn de fala mi. Bɔt we a de du di prichin wok, a kin fil lɛk aw di apɔsul Pɔl bin de fil fɔ se Jizɔs dɔn gi misɛf di prichin wok fɔ du. Dat kin mek a gladi ɛn tink di rayt we bɔt misɛf, mi layf, ɛn wetin gɛt fɔ apin to mi tumara bambay.”—Sam 51:​3.

Bifo Alan lan di trut, i bin kɔmit bɔku kraym dɛn ɛn i bin lɛk fɛt fɛt. Bɔt i bin tɔk se: “A kin stil de tink bɔt ɔl di bad tin we a bin de du to pipul dɛn. Sɔntɛnde, dat kin mek mi at pwɛl. Bɔt a tɛl Jiova tɛnki fɔ we i alaw sina lɛk mi fɔ prich di gud nyuz to pipul dɛn. We a kin si we pipul dɛn de lisin to di gud nyuz, i kin mek a mɛmba aw Jiova gud ɛn aw i lɛk mɔtalman. A kin fil lɛk se Jiova de yuz mi fɔ ɛp di wan dɛn we dɔn du bad tin dɛn lɛk mi.”

We wi de na fil savis, wi de du ɛn tink bɔt gud tin dɛn. I kin mek wi biliv tranga wan se Jizɔs de sɔri fɔ wi, i lɛk wi, ɛn i trɔst wi.

Te di tɛm we dɛn go dɔnawe wit Setan in wikɛd wɔl, wi go de stil fil bad bɔt di sin dɛn we wi bin dɔn kɔmit. Wetin go ɛp wi fɔ stɔp fɔ fil da kayn we de?

Jen we bin de fil bad bɔt di dɔbul layf we i bin de liv we i yɔŋ bin tɔk se: “A gladi fɔ no se ‘Gɔd pas wi at.’” (1 Jɔn 3:​19, 20) Jɔs lɛk Jen, wisɛf go gladi fɔ no se Jiova ɛn Jizɔs de ɔndastand se wi na sina. Mɛmba se Jiova mek Jizɔs kam day fɔ fri sina dɛn we dɔn ripɛnt, nɔto fɔ pafɛkt mɔtalman dɛn.—1 Tim. 1:​15.

Wi go biliv tranga wan se Jizɔs day fɔ fri wi frɔm sin we wi de pre ɛn tink gud gud wan bɔt di we aw Jizɔs bin trit mɔtalman dɛn we nɔ pafɛkt, ɛn we wi du ɔl wetin wi ebul fɔ du di prichin wok we i dɔn tɛl wi fɔ du. We wi de du dis, wi go tɔk lɛk aw Pɔl bin tɔk we i se: Jizɔs “lɛk mi ɛn and-ova insɛf fɔ mi.”