1. Akɔdin to wetin de na 3 Jɔn 3, 4, wetin kin mek wi gladi?

YU GO ebul fɔ imajin aw apɔsul Jɔn bin gladi we i yɛri se di wan dɛn we i bin dɔn ɛp fɔ lan di tru de kɔntinyu fɔ sav Jiova fetful wan? Dɛn bin gɛt bɔku prɔblɛm dɛn, ɛn Jɔn bin wok tranga wan fɔ ɛp dɛn fetful Kristian dɛn ya we i tek as in spirichwal pikin dɛn fɔ gɛt mɔ fet. Semweso, wisɛf kin gladi we wi pikin dɛn, ilɛksɛf na wi bɔn dɛn ɔ na wi spirichwal pikin dɛn, de gi dɛn layf to Jiova ɛn kɔntinyu fɔ sav am.—Rid 3 Jɔn 3, 4.

2. Us rizin we mek Jɔn bin rayt di lɛta dɛn?

² Insay di ia 98 afta Krays, i go mɔs bi se Jɔn bin de na Ɛfisɔs ɔ nia de. I go mɔs bi se i kɔmɔt de afta we dɛn fri am na prizin na Patmɔs ayland. Arawnd da tɛm de, Jiova in spirit bin ɛp am fɔ rayt tri lɛta dɛn. Di rizin we mek i rayt dɛn lɛta dɛn de na fɔ ɛp di fetful Kristian dɛn fɔ kɔntinyu fɔ gɛt fet pan Jizɔs ɛn fɔ kɔntinyu fɔ waka na di tru.

3. Us kwɛstyɔn dɛn we wi go tɔk bɔt?

³ Jɔn na bin di las apɔsul we bin de da tɛm de, ɛn i bin de wɔri bɔt di bad we aw lay lay ticha dɛn go afɛkt di kɔngrigeshɔn. * (1 Jɔn 2:​18, 19, 26) Dɛn lay lay Kristian dɛn de bin de tɔk se dɛn no Jiova bɔt dɛn nɔ bin de obe in lɔ dɛn. Lɛ wi tɔk bɔt di advays dɛn we Gɔd bin yuz Jɔn fɔ gi. Insay dis atikul, wi go tɔk bɔt dɛn advays dɛn de we Jɔn bin gi ɛn wi go ansa tri kwɛstyɔn dɛn: Wetin i min fɔ waka na di tru? Wetin go mek wi lɛf fɔ waka na di tru? Ɛn aw wi go ɛp wisɛf fɔ kɔntinyu fɔ de na di tru?

4. Akɔdin to 1 Jɔn 2:​3-6; 2 Jɔn 4, 6, wetin-ɛn-wetin wi fɔ du fɔ waka na di tru?

⁴ Fɔ mek wi waka na di tru, wi nid fɔ no di tru tin dɛn we de na Gɔd in Wɔd, di Baybul. Pantap dat, wi fɔ “du ɔl wetin Gɔd tɛl wi fɔ du,” dat min se wi nid fɔ obe am. (Rid 1 Jɔn 2:​3-6; 2 Jɔn 4, 6.) Jizɔs bin sɛt fayn ɛgzampul we i kam to fɔ obe Jiova. So wan impɔtant we we wi go obe Jiova, na bay we wi falamakata Jizɔs in ɛgzampul gud gud wan.—Jɔn 8:​29; 1 Pit. 2:​21.

5. Wetin wi fɔ mek shɔ bɔt?

⁵ Fɔ mek wi kɔntinyu fɔ waka na di tru, wi fɔ biliv se Jiova na di tru Gɔd, ɛn ɔl wetin i de tɛl wi na in Wɔd, di Baybul na tru. Ɛn wi fɔ biliv bak se Jizɔs na di Mɛsaya we dɛn bin dɔn tɔk se go kam. Tide, bɔku pipul dɛn de dawt if dɛn dɔn anɔynt Jizɔs as Kiŋ na Gɔd in Kiŋdɔm. Jɔn bin wɔn se “plɛnti pipul we de mek dɛn kɔmpin ful,” go de ɛn dɛn go ful di wan dɛn we nɔ rɛdi fɔ tɔk di tru bɔt Jiova ɛn Jizɔs. (2 Jɔn 7-11) Jɔn bin rayt se: “Udat de lay? Na di wan se Jizɔs nɔto di Mɛsaya” (1 Jɔn 2:​22) Di wangren we we wi go avɔyd fɔ mek dɛn nɔ ful wi na bay we wi stɔdi Gɔd in Wɔd. Na we wi du dat na in go ɛp wi fɔ no Jiova ɛn Jizɔs. (Jɔn 17:​3) Ɛn na da tɛm de nɔmɔ wi go biliv se wi gɛt di tru.

6. Wetin go mek yɔŋ Kristian dɛn lɛf fɔ waka na di tru?

⁶ Ɔl Kristian dɛn fɔ tek tɛm mek dɛn nɔ alaw di tin dɛn we mɔtalman de tich fɔ ful dɛn. (1 Jɔn 2:​26) Na yɔŋ Kristian dɛn mɔ nid fɔ tek tɛm mek dis trap nɔ kech dɛn. Wan Frɛnch sista we nem Alɛkshia, * we ol 25 ia bin se: “We a bin yɔŋ pas so, di tin dɛn we dɛn de tich na di wɔl bin de mek a dawt, tichin dɛn lɛk, ɔltin kam bay chans ɛn ɔda tin dɛn we mɔtalman de tich. Sɔntɛnde, a kin gri wit dɛn tichin dɛn de. Bɔt a bin fil se i nɔ go fayn fɔ mek a jɔs lisin to wetin mi ticha dɛn bin de tich ɛn nɔ lisin to wetin di Baybul se.” Alɛkshia bin stɔdi  di buk we gɛt di taytul Life—How Did It Get Here? By Evolution or by Creation? Afta sɔm wiks, i nɔ bin de dawt igen. Alɛkshia se: “A bin tray fɔ pruv to misɛf se di Baybul gɛt di tru. Ɛn a bin kam fɔ no se we a liv bay wetin de na di Baybul, dat go mek a gladi ɛn gɛt pis.”

7. Wetin wi fɔ tek tɛm nɔ fɔ du? Wetin mek?

⁷ Ɔl Kristian dɛn we yɔŋ ɛn ol, fɔ tek tɛm nɔ fɔ mek lɛk se dɛn de sav Jiova ɛn de du bad tin dɛn di sem tɛm. Jɔn bin tɔk se wi nɔ go de waka na di tru ɛn wi de liv layf we nɔ klin di sem tɛm. (1 Jɔn 1:​6) If wi want fɔ mek Gɔd gladi naw ɛn tumara bambay, wi nid fɔ mɛmba se Jiova de si ɛnitin we wi de du. Dat min se sikrit sin nɔ de bikɔs Jiova de si ɛnitin we wi du.—Ibru. 4:​13.

8. Wetin wi fɔ avɔyd?

⁸ Wi nid fɔ avɔyd di we aw di wɔl de si sin. Apɔsul Jɔn bin rayt se: “If wi se ‘sin nɔ de na wi layf,’ wi de mek wisɛf ful.” (1 Jɔn 1:​8) Insay Jɔn in tɛm, lay lay Kristian dɛn bin tɔk se pɔsin kin du tin dɛn we Gɔd se i bad ɛn stil gɛt tayt padi biznɛs wit Gɔd. Tide, wisɛf de liv na di wɔl usay pipul dɛn de tink di sem we. Bɔku pipul dɛn se dɛn biliv Gɔd, bɔt dɛn nɔ gri wit wetin Jiova tɔk bɔt sin, mɔ we i gɛt fɔ du wit mami ɛn dadi biznɛs. Pipul dɛn nɔ gri wit wetin Jiova si as sin, bifo dat dɛn de si am as sɔntin we nɔ bad ɛn i lɛf to pɔsin fɔ disayd wetin i want fɔ du.

9. Aw yɔŋ wan dɛn go bɛnifit we dɛn biliv ɛn fala wetin de na di Baybul?

⁹ I nɔ kin izi fɔ yɔŋ Kristian dɛn fɔ tink di rayt we bɔt mami ɛn dadi biznɛs mɔ we dɛn klasmet, ɔ wokmet dɛn nɔ gri wit wetin di Baybul tɔk bɔt dat. Na dat bin apin to Alɛksanda. I bin tɔk se:  “Sɔm titi dɛn na skul kin de mɔna mi fɔ du mami ɛn dadi biznɛs wit dɛn. Dɛn tɔk se bikɔs a nɔ gɛt galfrɛn, mi na omo.” If dis sem tin dɔn apin to yu, mɛmba se we yu biliv tranga wan ɛn fala wetin yu dɔn lan na di Baybul, yu de gɛt rɛspɛkt, wɛlbɔdi, avɔyd pwɛl at, ɛn gɛt tayt padi biznɛs wit Jiova. Fɔ ɛnitɛm we yu nɔ gri fɔ du bad we sɔntin tɛmt yu, i go izi fɔ mek yu de du wetin rayt. Mɛmba se, di rɔŋ we aw pipul dɛn na di wɔl de si mami ɛn dadi biznɛs kɔmɔt frɔm Setan. So we yu nɔ gri fɔ tink lɛk pipul dɛn na di wɔl, yu ‘dɔn win Setan.’—1 Jɔn 2:​14.

10. Aw 1 Jɔn 1:​9, go ɛp wi fɔ sav Jiova wit klin kɔnshɛns?

¹⁰ Wi no se na Jiova gɛt di rayt fɔ tɛl wi wetin na sin. Ɛn wi fɔ du wi bɛst nɔ fɔ sin. Bɔt we wi sin, wi nid fɔ pre to Jiova ɛn tɛl am ɔl di bad tin dɛn we wi dɔn du. (Rid 1 Jɔn 1:​9.) Ɛn if wi dɔn kɔmit siriɔs sin, wi nid fɔ go to di ɛlda dɛn we Jiova dɔn pik fɔ kia fɔ wi. (Jems 5:​14-16, NWT) Bɔt wi nɔ fɔ kɔntinyu fɔ fil bad bɔt di bad tin we wi bin dɔn du trade. Wetin mek? Na bikɔs wi Papa we lɛk wi dɔn mek in Pikin dɔn sakrifays in layf fɔ wi so dat Gɔd go fɔgiv wi sin dɛn. We Jiova se i go fɔgiv wi if wi rili sɔri fɔ wetin wi dɔn du, i min wetin i se. So natin nɔ de we fɔ stɔp wi fɔ mek wi nɔ sav Jiova wit klin kɔnshɛns.—1 Jɔn 2:​1, 2, 12; 3:​19, 20.

11. Aw wi go ebul protɛkt wisɛf frɔm tichin dɛn we go ambɔg wi fet?

¹¹ Wi nid fɔ avɔyd lay lay tichin dɛn. Frɔm di tɛm we di Kristian kɔngrigeshɔn bigin, Setan dɔn de yuz pipul dɛn we de tray fɔ ful Gɔd in savant dɛn ɛn mek dɛn dawt so dat dɛn fet go wik. Bikɔs ɔf dat, wi nid fɔ  no wetin na tru ɛn wetin na lay. * Wi ɛnimi dɛn go yuz di Intanɛt ɔ soshal midia fɔ mek wi nɔ gɛt bɛtɛ fet pan Jiova ɛn fɔ mek wi nɔ lɛk wi brɔda ɛn sista dɛn. Nɔ biliv dɛn lay lay tin dɛn de, bikɔs dɛn kɔmɔt frɔm Setan!—1 Jɔn 4:​1, 6; Rɛv. 12:​9.

12. Wetin mek wi fɔ gɛt strɔng fet fɔ di tru we wi dɔn lan?

¹² Fɔ avɔyd Setan in atak dɛn, wi nid fɔ gɛt mɔ fet pan Jizɔs ɛn aw Jiova de yuz am fɔ du wetin I want. Wi nid fɔ abop bak pan di wangren we we Jiova de yuz tide fɔ dayrɛkt in wok. (Mat. 24:​45-47) Wi go ebul gɛt mɔ fet we wi stɔdi Gɔd in Wɔd ɔltɛm. Dɔn wi fet go tan lɛk tik we gɛt rut dɛn we de gro dip na grɔn. Pɔl bin tɔk di sem tin we i bin de rayt to di Kristian dɛn na Kɔlɔse. I bin se: “We una dɔn gri mek Jizɔs Krays bi una Masta, una fɔ gɛt wanwɔd wit am ɔltɛm. We una liv, una fɔ fasin pan am lɛkɛ aw rut de fasin na grɔn, nain fɔ bi di fawndeshɔn na una layf, una fɔ de abop pan am mɔ ɛn mɔ.” (Kɔl. 2:​6, 7) If wi tray tranga wan fɔ gɛt mɔ fet, natin nɔ de we Setan ɔ di wan dɛn we de sɔpɔt am go du fɔ stɔp wi fɔ mek wi nɔ waka na di tru.—2 Jɔn 8, 9.

13. Wetin wi fɔ ɛkspɛkt? Wetin mek?

¹³ Wi nɔ fɔ sɔprayz we pipul dɛn na di wɔl et wi. (1 Jɔn 3:​13) Jɔn bin mɛmba wi se “wi no se wi na Gɔd yon pipul, pan ɔl we Setan de rul di wɔl.” (1 Jɔn 5:​19) As di tɛm de nia fɔ mek di wɔl dɔn, Setan de vɛks mɔ ɛn mɔ. (Rɛv. 12:​12) Nɔto kɔni kɔni we dɛn nɔmɔ i de yuz fɔ atak, bɔt i de yuz fri layf ɔ lay lay Kristian dɛn. I de yuz bak dayrɛkt atak. Setan no se i gɛt smɔl tɛm we dɔn lɛf fɔ mek i go stɔp wi prichin wok ɔ fɔ ambɔg wi fet. Wi nɔ sɔprayz fɔ si we dɛn stɔp ɔ ban wi wok na difrɛn kɔntri dɛn. Pan ɔl dat, wi brɔda ɛn sista dɛn we de na dɛn kɔntri dɛn ya stil de bia. Dɛn dɔn sho se ilɛk wetin Setan du wi, wi go ebul fɔ kɔntinyu fɔ de fetful wan!

14. Wetin na wan we aw wi go ebul ɛp wi brɔda ɛn sista dɛn fɔ mek dɛn kɔntinyu fɔ de na di tru?

¹⁴ Fɔ ɛp wi brɔda ɛn sista dɛn fɔ kɔntinyu fɔ de na di tru, wi nid fɔ sho sɔri-at. (1 Jɔn 3:​10, 11, 16-18) Wi nid fɔ lɛk wisɛf nɔto pas tin fayn fɔ wi bɔt wi fɔ lɛk wisɛf bak ivin we prɔblɛm dɛn kam. Fɔ ɛgzampul, yu no ɛnibɔdi we dɔn lɔs pɔsin we i lɛk we dɔn day, ɛn nid kɔrej ɔ nid ɛp difrɛn we dɛn? Ɔ yu dɔn yɛri se sɔm pan wi brɔda ɔ sista dɛn dɔn lɔs bɔku pan dɛn prɔpati dɛn bikɔs ɔf nachɔral dizasta ɛn nid ɛp fɔ bil bak dɛn Kiŋdɔm Ɔl dɛn ɔ dɛn os dɛn? Wi go sho aw wi rili lɛk ɛn de sɔri fɔ dɛn nɔtɔ bay wetin wi de se, bɔt wetin impɔtant na bay wetin wi du.

15. Frɔm wetin de na 1 Jɔn 4:​7, 8, wetin wi nid fɔ du?

¹⁵ Wi de falamakata wi Papa we lɛk wi we wi sho se wi lɛk wisɛf. (Rid 1 Jɔn 4:​7, 8.) Wan impɔtant we fɔ sho lɔv na bay we wi fɔgiv wisɛf. Fɔ ɛgzampul, sɔmbɔdi go mek wi fil bad bɔt i tɛl wi sɔri fɔ wetin i du. Wi de sho se wi lɛk am bay we wi fɔgiv am ɛn fɔgɛt bɔt wetin i dɔn du wi. (Kol. 3:​13) Di sem tin bin  apin to wan brɔda we nem Aldo, we i bin yɛri wan brɔda we i gɛt rɛspɛkt fɔ bin tɔk bad bɔt in kɔlchɔ. Aldo bin tɔk se: “A kin pre ɔltɛm to Jiova fɔ mek i ɛp mi nɔ fɔ de tink bad bɔt dis brɔda.” Bɔt Aldo bin du sɔntin bak. I disayd fɔ aks di brɔda fɔ mek dɛn wok togɛda na fil savis. As dɛn de wok togɛda, Aldo ɛksplen aw i bin fil bad bɔt wetin di brɔda bin tɔk. We di brɔda yɛri bɔt aw Aldo bin fil bɔt wetin i se, Aldo bin se, “di brɔda beg mi. Frɔm in vɔys, a bin ebul no se di brɔda rili sɔri fɔ wetin i bin tɔk. Afta ɔl dat, wi bi tayt padi bak.”

16-17. Wetin wi fɔ mekɔp wi maynd fɔ du?

¹⁶ Di apɔsul Jɔn bin rili lɛk in brɔda ɛn sista dɛn ɛn i bin sho da lɔv de bay di advays we i bin gi dɛn na di tri lɛta dɛn we i bin rayt to dɛn. Wi rili gladi fɔ no se na man ɛn uman dɛn we tan lɛk Jɔn, go rul wit Jizɔs na ɛvin!—1 Jɔn 2:​27.

¹⁷ I go fayn fɔ mek wi fala di advays dɛn we wi dɔn tɔk bɔt na dis atikul. Lɛ wi mekɔp wi maynd fɔ waka na di tru bay we wi de obe Jiova pan ɔl wetin wi de du. Stɔdi in Wɔd, ɛn abop pan am. Gɛt strɔng fet pan Jizɔs. Nɔ gri fɔ fala di tin dɛn we mɔtalman ɛn lay lay Kristian dɛn de tich. Nɔ ɛva mek lɛk se yu de sav Jiova ɛn de du bad tin dɛn di sem tɛm, ɛn nɔ lisin to di wan dɛn we go want fɔ mek yu du wetin bad. Liv yu layf di we aw Jiova want. Ɛn lɛ wi ɛp wi brɔda ɛn sista dɛn fɔ kɔntinyu fɔ gɛt strɔng fet bay we wi de fɔgiv di wan dɛn we du wi bad ɛn ɛp di wan dɛn we nid ɛp. If wi du ɔl dat, ilɛk uskayn prɔblɛm wi gɛt wi go stil kɔntinyu fɔ waka na di tru.