1. Akɔdin to Filipians 2:​3, aw we wi put wisɛf dɔŋ, de mek wi gɛt tayt padi biznɛs wit ɔda pipul dɛn?

WI DE rili put wisɛf dɔŋ ɛn obe Jiova in lɔ dɛn bikɔs wi no se Jiova no wetin rayt fɔ wi ɔltɛm. (Ɛfi. 4:​22-24) We wi put wisɛf dɔŋ, dat de ɛp wi fɔ tink se wetin Jiova want impɔtant pas wetin wi want ɛn i de mek wi tink bak se ɔda pipul dɛn bɛtɛ pas wi. Dat kin mek wi ɛnjɔy tayt padi biznɛs wit Jiova ɛn wit wi brɔda ɛn sista dɛn.—Rid Filipians 2:​3.

2. Wetin di apɔsul Pɔl bin no? Wetin wi go tɔk bɔt insay dis atikul?

² If wi nɔ tek tɛm, di we aw pipul dɛn prawd ɛn jɔs bisin bɔt dɛnsɛf na Setan in wɔl, go afɛkt wi. * Fɔ tru, dis na bin prɔblɛm fɔ sɔm pipul dɛn we bin de insay di fɔstɛm Kristian dɛn tɛm. Na dat mek di apɔsul Pɔl bin rayt to di wan dɛn we bin de na Rom se: “A de tɛl una ɔl we de de se nɔbɔdi nɔ fɔ tink tumɔs bɔt insɛf pas aw i fɔ tink, bɔt i fɔ tink di kɔrɛkt we.” (Rom. 12:​3, NWT) Pɔl bin no se wi nid fɔ gɛt rɛspɛkt fɔ wisɛf. Bɔt we wi put wisɛf dɔŋ, dat go ɛp wi fɔ tink di rayt we bɔt wisɛf. Dis atikul go tɔk bɔt tri say dɛn we if wi put wisɛf dɔŋ, i go mek wi nɔ tink tumɔs bɔt wisɛf. Dɛn say dɛn ya na (1) wi mared-os, (2) wi wok dɛn we wi de du fɔ Jiova in ɔganayzeshɔn, ɛn (3) aw wi de yuz soshal midia.

3. Wetin mek prɔblɛm go mɔs de na mared-os? Aw sɔm pipul dɛn kin tray fɔ sɔlv dɛn prɔblɛm dɛn de?

³ Jiova want mek maredman ɛn in wɛf gɛt gladi-at na dɛn mared-os. Bɔt bikɔs dɛn nɔ pafɛkt, dɛn nɔ go de gri pan sɔm tin dɛn. Infakt, Pɔl bin se di wan dɛn we mared go gɛt sɔm prɔblɛm dɛn. (1 Kɔr. 7:​28) Sɔm mared pipul dɛn kin de gɛt prɔblɛm ɔltɛm ɛn dat kin mek dɛn tink se dɛn nɔ fɔ dɔn mared to dɛnsɛf. If dɛn alaw di we aw pipul dɛn de tink na di wɔl fɔ afɛkt dɛn, dat go mek dɛn tink kwik kwik wan se fɔ dayvɔs na di bɛst tin. Di man ɔ di uman go de tink bɔt insɛf se i go gɛt gladi-at if dɛn dayvɔs.

4. Wetin wi fɔ avɔyd?

⁴ Wi nɔ fɔ de tink se wi mared-os nɔ bɛtɛ. Wi no se di wangren tin we di Baybul se go mek wi dayvɔs, na we pɔsin du mami ɛn dadi biznɛs di we aw Gɔd nɔ want. (Mat. 5:​32) So we di prɔblɛm dɛn we Pɔl tɔk bɔt mit wi, wi nɔ fɔ alaw prawd fɔ mek wi bigin fɔ tink se: ‘Dis mared-os de rili gi mi di tin dɛn we a nid? A de gɛt di lɔv we a fit fɔ gɛt? A go gɛt mɔ gladi-at if a mared to ɔda pɔsin?’ If wi tink da we de, wi jɔs go de tink bɔt wisɛf nɔmɔ. Di sɛns we de na di wɔl go tɛl yu fɔ du wetin go mek yu gɛt gladi-at ilɛksɛf dat min se yu go dayvɔs yu man ɔ yu wɛf. Bɔt di sɛns we Gɔd de gi se, “una nɔ fɔ jɛs de mɛmba unasɛf nɔmɔ, una fɔ de mɛmba ɔda pipul.” (Fil. 2:​4) So Jiova want mek yu kɔntinyu fɔ de na yu mared-os, nɔto fɔ dayvɔs. (Mat. 19:​6) I want mek yu tink bɔt am fɔs, nɔto yusɛf.

5. Akɔdin to Ɛfishians 5:​33, aw maredman ɛn in wɛf fɔ trit dɛnsɛf?

⁵ Maredman ɛn in wɛf fɔ trit dɛnsɛf wit lɔv ɛn rɛspɛkt. (Rid Ɛfishians 5:​33.) Di  Baybul de tich wi fɔ de gi, nɔto fɔ jɔs de tek nɔmɔ. (Akt 20:​35) Us kwaliti go ɛp maredman ɛn in wɛf fɔ sho lɔv ɛn rɛspɛkt to dɛnsɛf? Di kwaliti na fɔ put yusɛf dɔŋ. Maredman ɛn mareduman dɛn we de put dɛnsɛf dɔŋ, nɔ jɔs de tink bɔt wetin go bɛnifit dɛn, bɔt dɛn go de tink bɔt dɛn “kɔmpin.”—1 Kɔr. 10:​24.

6. Wetin yu lan frɔm wetin Stivin ɛn Stɛfani tɔk?

⁶ Bɔku Kristian dɛn we mared dɔn gɛt mɔ gladi-at na dɛn mared-os bikɔs dɛn put dɛnsɛf dɔŋ. Fɔ ɛgzampul, wan maredman we nem Stivin se: “If una de wok as tim, una go wok togɛda mɔ we prɔblɛm dɛn de. Bifo yu jɔs de tink bɔt ‘wetin fayn fɔ mi?’ yu go tink bɔt ‘wetin fayn fɔ wi?’” In wɛf Stɛfani bin fil di sem we. I bin se: “Nɔbɔdi nɔ go want fɔ de wit pɔsin we de agyu wit dɛn ɔltɛm. We prɔblɛm apin, wi de tray fɔ no wetin kɔz am. Dɔn wi kin pre, du risach, ɛn tɔk bɔt aw wi go sɔlv di prɔblɛm. Wi de atak di prɔblɛm, nɔto wisɛf.” Maredman ɛn mareduman dɛn go rili bɛnifit we dɛn nɔ tink tumɔs bɔt dɛnsɛf pas aw dɛn fɔ tink.

7. Aw brɔda fɔ biev we i gɛt wok na Jiova in ɔganayzeshɔn?

⁷ Wi de si am as ɔnɔ we wi de sav Jiova di we aw wi ebul. (Sams 27:​4; 84:​10) If brɔda gri fɔ du mɔ na Jiova in ɔganayzeshɔn, dat na gud tin. Infakt di Baybul se: “If man want [fɔ] bi ovasia na gud wok i want du so.” (1 Tim. 3:​1) Bɔt we i gɛt wok, i nɔ fɔ tink tumɔs bɔt insɛf pas aw i fɔ tink. (Lyuk 17:​7-10) Di men tin we i fɔ de tink bɔt na fɔ put insɛf dɔŋ fɔ wok fɔ ɔda pipul dɛn.—2 Kɔr. 12:​15.

8. Wetin wi lan frɔm Dayɔtrifis, Uzaya, ɛn Absalɔm dɛn ɛgzampul?

⁸ Di Baybul gɛt ɛgzampul dɛn bɔt pipul dɛn we bin tink tumɔs bɔt dɛnsɛf. Dayɔtrifis nɔ bin put insɛf dɔŋ, i bin de tray fɔ put insɛf “bifo” na di kɔngrigeshɔn. (3 Jɔn 9, NWT) Uzaya bin prawd ɛn i bin tray fɔ du wok we Jiova nɔ bin tɛl am fɔ du. (2 Kro. 26:​16-21) Absalɔm bin tray fɔ yuz kɔni kɔni we fɔ mek di pipul dɛn sɔpɔt am bikɔs i bin want fɔ bi kiŋ. (2 Sam. 15:​2-6) Dɛn ɛgzampul dɛn de na di Baybul sho klia wan se, Jiova nɔ de gladi fɔ pipul dɛn we de fɛn prez fɔ dɛnsɛf. (Prɔv. 25:​27) As tɛm de go, pipul dɛn we prawd ɛn we want ɔda pipul dɛn fɔ kɔle dɛn go kapsay.—Prɔv. 16:​18.

9. Us ɛgzampul Jizɔs sɛt?

⁹ Jizɔs nɔ bin tan lɛk dɛn prawd pipul dɛn de we wi jɔs dɔn tɔk bɔt. Di Baybul se: “Pan ɔl we Jizɔs Krays tan lɛkɛ aw Gɔd tan, i nɔ se paopa in ɛn Gɔd fɔ bi wan.” (Fil. 2:​6) Na Jiova nɔmɔ gɛt pawa pas Jizɔs, bɔt pan ɔl dat, Jizɔs nɔ de tink bɔt insɛf pas aw i fɔ tink. I bin tɛl in disaypul dɛn se: “Di wan we put insɛf dɔŋ pan una ɔl na in na di wan we impɔtant pas una ɔl.” (Lyuk 9:​48, NWT) Wi kin gladi fɔ wok wit payɔnia, ministerial savant, ɛlda, ɛn sakit ovasia dɛn, we de falamakata Jizɔs fɔ put dɛnsɛf dɔŋ. If wi de put wisɛf dɔŋ, wi go sho mɔ lɔv to ɔda pipul dɛn ɛn dat go mek dɛn no se wi de na Gɔd in ɔganayzeshɔn.—Jɔn 13:​35.

10. Wetin yu fɔ du if yu fil se prɔblɛm dɛn de na di kɔngrigeshɔn we dɛn nɔ sɔlv fayn wan?

¹⁰ Wetin yu fɔ du if yu tink se prɔblɛm dɛn de na di kɔngrigeshɔn ɛn di ɛlda dɛn nɔ de tray fɔ sɔlv dɛn? Bifo yu bigin fɔ  grɔmbul bɔt wetin de apin, i go fayn mek yu put yusɛf dɔŋ ɛn sɔpɔt di wan dɛn we de bifo na di kɔngrigeshɔn. (Ibru. 13:​17) Fɔ mek yu ebul du dat, aks yusɛf dɛn kwɛstyɔn dɛn ya: ‘Fɔ se di prɔblɛm dɛn we a de si rili siriɔs ɛn dɛn fɔ sɔlv dɛn? Na di rayt tɛm dis fɔ sɔlv dɛn? Na mi gɛt di rayt fɔ sɔlv dɛn? Fɔ tru, a rili de tray fɔ mek wanwɔd de na di kɔngrigeshɔn, ɔ a de tray fɔ mek ɔlman sabi mi?’

11. Akɔdin to Ɛfishians 4:​2, 3, wetin kin apin we wi put wisɛf dɔŋ we wi de sav Jiova?

¹¹ Jiova valyu di wan dɛn we de put dɛnsɛf dɔŋ pas di wan dɛn we ebul fɔ du sɔntin, ɛn i valyu di wan dɛn we de mek wanwɔd de na di kɔngrigeshɔn pas di wan dɛn we sabi aw fɔ du sɔntin. So wi fɔ tray tranga wan fɔ put wisɛf dɔŋ as wi de sav Jiova. We wi du dat, wi go mek wanwɔd de na di kɔngrigeshɔn. (Rid Ɛfishians 4:​2, 3.) Go de du ɔl wetin yu ebul fɔ de prich mɔ. Luk fɔ difrɛn we dɛn fɔ wok fɔ ɔda pipul dɛn bay we yu de du gud tin dɛn fɔ dɛn. Du gud to ɔlman ivin di wan dɛn we nɔ gɛt wok na di kɔngrigeshɔn. (Mat. 6:​1-4; Lyuk 14:​12-14) As yu de put yusɛf dɔŋ ɛn wok wit di kɔngrigeshɔn, ɔda pipul dɛn nɔ jɔs go si wetin yu ebul fɔ du, bɔt dɛn go si se yu de put yusɛf dɔŋ.

12. Di Baybul ɛnkɔrej wi fɔ gɛt padi dɛn? Ɛksplen.

¹² Jiova mek wi fɔ ɛnjɔy fɔ de kip kɔmpin wit wi fambul ɛn padi dɛn. (Sam 133:​1) Jizɔs bin gɛt gud padi dɛn. (Jɔn 15:​15) Di Baybul tɔk bɔt di bɛnifit dɛn we wi kin gɛt we wi gɛt tru tru padi dɛn. (Prɔv. 17:​17; 18:​24) I tɛl wi se i nɔ fayn fɔ  de kip to wisɛf. (Prɔv. 18:​1) Bɔku pipul dɛn fil se soshal midia go ɛp dɛn fɔ gɛt bɔku padi dɛn ɛn i go mek dɛn nɔ fil se dɛn de bay dɛnsɛf. Bɔt wi nid fɔ tek tɛm we wi de yuz soshal midia fɔ tɔk to ɔda pipul dɛn.

13. Wetin mek sɔm pan di wan dɛn we kin yuz soshal midia kin gɛt pwɛlat ɛn fil lɛk na dɛn nɔmɔ de?

¹³ Risach dɛn dɔn sho se pipul dɛn we de spɛn bɔku tɛm fɔ de luk pikchɔ ɛn rid kɔmɛnt dɛn na soshal midia, kin ɛnd-ɔp fɔ gɛt pwɛlat ɛn fil lɛk na dɛn nɔmɔ de. Wetin mek? Wan rizin kin bi se pipul dɛn kin post na soshal midia impɔtant tin dɛn bɔt dɛn layf. Dɛn kin post di bɛst pikchɔ dɛn bɔt dɛnsɛf, dɛn padi dɛn, ɛn di fayn fayn ples dɛn we dɛn dɔn go. Pɔsin we de wach dɛn pikchɔ dɛn de, go kɔmpia insɛf to ɔda pipul dɛn ɛn fil se i nɔ spɛshal ɔ i nɔ de ivin ɛnjɔy. Wan sista we ol 19 ia bin tɔk se: “A bin bigin fɔ jɛlɔs we a bin de si ɔda pipul dɛn de ɛnjɔy dɛnsɛf wikɛnd dɛn ɛn a bin de na os mi wan.”

14. Aw di advays we de na 1 Pita 3:​8 de ɛp wi we i kam to di we aw wi de yuz soshal midia?

¹⁴ Fɔ tru, wi kin yuz soshal midia fɔ du gud tin dɛn. Fɔ ɛgzampul, wi kin yuz am fɔ de tɔk wit wi fambul ɛn padi dɛn. Bɔt yu dɔn notis se sɔm pan di tin dɛn we pipul dɛn kin post na soshal midia na fɔ mek ɔda pipul dɛn kɔle dɛn? I tan lɛk dɛn de tɛl pipul dɛn se “luk mi.” Sɔm pipul dɛn kin ivin post rud rud kɔmɛnt dɛn na dɛn yon pikchɔ dɛn ɔ bɔt ɔda pipul dɛn pikchɔ dɛn. Dɛn de ɛnkɔrej Kristian dɛn fɔ put dɛnsɛf dɔŋ ɛn tink bɔt ɔda pipul dɛn, so dat fɔ mek dɛn nɔ yuz soshal midia dɛn we dɛn de.—Rid 1 Pita 3:​8.

15. Aw di Baybul go ɛp wi fɔ mek wi avɔyd fɔ fil se wi impɔtant?

¹⁵ If yu de yuz soshal midia, na fɔ aks yusɛf dɛn kwɛstyɔn dɛn ya: ‘Fɔ se di kɔmɛnt dɛn, pikchɔ dɛn, ɔ fim dɛn we a de post, go mek ɔda pipul dɛn fil se a de sho-ɔf? A go mek ɔda pipul dɛn jɛlɔs?’ Di Baybul se: “Ɔltin we de na di wɔl di bad we de na pɔsin in at we de mek i put at  pan sɔm tin dɛn, dɛn tin we pɔsin kin want bad bad wɛn i si dɛn, ɛn ɔl dɛn tin na di wɔl we de mek pɔsin prawd dɛn nɔn nɔ kɔmɔt to di Papa, na di wɔl dɛn kɔmɔt.” (1 Jɔn 2:​16) Wan Baybul translet dɛn wɔd dɛn ya we se “ɔl dɛn tin na di wɔl we de mek pɔsin prawd” as “yu want fɔ bi impɔtant pɔsin.” Kristian dɛn nɔ fɔ fil se dɛn nid fɔ bi impɔtant pɔsin ɔ dɛn want mek ɔda pipul dɛn kɔle dɛn. Dɛn de fala di advays we de na di Baybul we se: “Lɛ wi nɔ mek prawd, lɛ wi nɔ mek kɔmpitishɔn wit wi kɔmpin dɛn, ɛn mek wi nɔ milɛ wi kɔmpin dɛn.” (Gal. 5:​26, NWT) If wi put wisɛf dɔŋ, wi nɔ go tan lɛk pipul dɛn we de na di wɔl we de mek prawd ɛn we want ɔda pipul dɛn fɔ tink se dɛn impɔtant.

16. Wetin mek wi nɔ fɔ prawd?

¹⁶ Wi nid fɔ tray fɔ put wisɛf dɔŋ bikɔs di wan dɛn we prawd, nɔ de “tink di kɔrɛkt we.” (Rom. 12:​3) Pipul dɛn we prawd lɛk fɔ de agyu ɛn tink bɔt dɛnsɛf. Di we aw dɛn de tink ɛn di tin dɛn we dɛn de du, kin mek dɛn ambɔg dɛnsɛf ɛn ɔda pipul dɛn. If dɛn nɔ chenj di we aw dɛn de tink, Setan go kɔrɔpt ɛn blayn dɛn maynd. (2 Kɔr. 4:​4; 11:​3) Bɔt pɔsin we ɔmbul de tink di kɔrɛkt we. I de tink di rayt we bɔt insɛf ɛn i no se ɔda pipul dɛn bɛtɛ pas am bɔku we dɛn. (Fil. 2:​3) Ɛn i no bak se “Gɔd go tɔn in bak pan dɛn pipul we prawd ɛn i go sho dɛn wan we nɔ prawd aw i gud.” (1 Pit. 5:​5) Di wan dɛn we de tink di kɔrɛkt we nɔ want Jiova fɔ bi dɛn ɛnimi.

17. Wetin wi fɔ du fɔ kɔntinyu fɔ put wisɛf dɔŋ?

¹⁷ Fɔ mek wi kɔntinyu fɔ put wisɛf dɔŋ, wi fɔ fala di Baybul in advays we se: “una [fɔ] lɛf una ol layf ɛn dɛn bad trik we una bin gɛt, una dɔn bi nyu pipul.” Dat nɔ izi fɔ du. Wi nid fɔ lan bɔt Jizɔs in ɛgzampul ɛn tray fɔ falamakata am gud gud wan. (Kol. 3:​9, 10; 1 Pit. 2:​21) Bɔt if wi du dat, wi go gɛt bɔku bɛnifit. As wi de tray fɔ put wisɛf dɔŋ, wi go gɛt gladi-at na wi famili, wi go mek wanwɔd de na di kɔngrigeshɔn, ɛn wi go no aw fɔ avɔyd fɔ yuz soshal midia we dɛn we nɔ fayn. Wetin pas ɔl na dat, Jiova go blɛs wi ɛn i go gladi fɔ wi.