Fɔ tru, Jiova want man ɛn uman we dɔn mared fɔ gladi ɛn ɛnjɔy dɛn mared-os sote go. (Mat. 19:​4-6) If yu de tink bɔt fɔ mared, aw yu go fɛn di rayt pɔsin fɔ mared? Bikɔs na Jiova mek wi, i no wetin wi nid fɔ du fɔ mek wi go gɛt gladi-at na wi mared-os. So, if yu fala di prinsipul dɛn we i dɔn gi wi, yu go gɛt tru tru gladi-at. Lɛ wi tɔk bɔt sɔm pan dɛn prinsipul dɛn de.

Fɔs, wi fɔ ɔndastand dis bɔt wisɛf: “Mɔtalman at disitful pas ɔltin, ɛn i kɔrɔpt in kayn nɔ de.” (Jɛr. 17:​9) We tu pipul dɛn we want fɔ mared, mit fɔ di fɔs tɛm ɛn dɛn bigin fɔ wach dɛnsɛf, kwik kwik wan dɛn kin gɛt strɔng filin fɔ dɛnsɛf. We dat apin, i nɔ kin izi fɔ mek dɛn disayd fɔ du di rayt tin. We tu pipul dɛn disayd fɔ mared bikɔs dɛn pe atɛnshɔn mɔ to aw dɛn de fil fɔ dɛnsɛf, bɔku tɛm dɛn kin ɛnd-ɔp fɔ gɛt pwɛlat. (Prɔv. 28:​26) Na dat mek i nɔ mek sɛns fɔ lɛ tu pipul dɛn tɔk bɔt aw dɛn rili de fil fɔ dɛnsɛf ɔ fɔ mek prɔmis dɛn bifo dɛn rili no dɛnsɛf.

Prɔvabs 22:​3 se: “Udat gɛt sɛns, nain de si denja i ayd pan am; bɔt udat ful de waka go insay de ɛn sɔfa fɔ dat.” Wetin go bi di denja if pɔsin de yuz wɛbsayt dɛn we de fɔ fɛn pɔsin fɔ mared? I sɔri fɔ no se sɔm pipul dɛn dɔn mit strenja dɛn na di Intanɛt, dɛn bigin fɔ wach dɛnsɛf, dɔn leta, dɛn kam fɔ no se da pɔsin de bin de ful dɛn. Dɔn bak, pipul dɛn we nɔ ɔnɛs de mek fek akawnt dɛn fɔ ful inosɛnt pipul dɛn ɛn fɔ tif dɛn mɔni. Sɔntɛnde, dɛn pipul dɛn de we nɔ ɔnɛs kin se dɛn na Jiova Witnɛs dɛn.

Lɛ wi tɔk bɔt wan ɔda denja. Sɔm pan dɛn wɛbsayt dɛn ya kin yuz kɔmpyuta program dɛn fɔ no udat-ɛn-udat fit fɔ mared. Bɔt no pruf nɔ de fɔ sho se dɛn tin dɛn de de rili wok. I nɔ go mek sɛns fɔ abop pan kɔmpyuta program we mɔtalman mek fɔ disayd bɔt sɔntin we impɔtant, lɛk fɔ fɛn di rayt pɔsin fɔ mared. Yu nɔ go ivin kɔmpia dɛn kɔmpyuta program dɛn de wit Baybul prinsipul dɛn.—Prɔv. 1:​7; 3:​5-7.

Wan prinsipul we de na Prɔvabs 14:​15 se: “Na fulman nɔmɔ de biliv ɛnitin, udat gɛt sɛns de luk bifo i jomp.” Bifo yu disayd if di pɔsin we yu want fɔ mared go bi di rayt pɔsin, yu nid fɔ no am gud gud wan. Bɔt dat nɔ go izi fɔ du if na di Intanɛt una de yuz fɔ  wach unasɛf. Ilɛksɛf una de si di infɔmeshɔn dɛn we una put bɔt unasɛf na di Intanɛt, ɛn una de spɛn bɔku tɛm fɔ tɔk ɔnlayn, yu tink se yu go rili no di pɔsin? Sɔm pipul dɛn we bin tink se dɛn dɔn gɛt tru lɔv bin shɔk bɔt wetin dɛn kam fɔ no bɔt di pɔsin we dɛn mit am fes-to-fes.

Wan pan di man dɛn we rayt di sam buk bin se: “A nɔ de kip kɔmpin wit udat de pan rikishi ɛn a nɔ de jɔyn gɛŋ wit udat ipokrit.” (Sam 26:​4) Bɔku pipul dɛn si am se na kɔmɔn tin fɔ mek dɛn lay bɔt dɛnsɛf na di Intanɛt so dat ɔda pipul dɛn go si dɛn as gud pɔsin. Dɛn kin ayd dɛn bad abit, ɔ i kin bi se ɔda pipul dɛn nɔ kin si dɛn bad abit we dɛn de sɛn mɛsej to dɛn. I impɔtant fɔ tink bɔt di ansa to dɛn kwɛstyɔn dɛn ya: Pan ɔl we sɔm pipul dɛn go se dɛn na Jiova Witnɛs, yu rili tink se dɛn na baptayz Kristian dɛn? Dɛn na machɔ Kristian dɛn? Dɛn gɛt tayt padi biznɛs wit Jiova? Dɛn rɛspɛkt dɛn na dɛn kɔngrigeshɔn? Ɔ fɔ se dɛn na bad ɛgzampul ɔ ivin “bad padi dɛn”? (1 Kɔr. 15:​33; 2 Tim. 2:​20, 21) Dɛn fri fɔ mared akɔdin to Baybul prinsipul dɛn? Yu nid fɔ no di ansa to dɛn kwɛstyɔn dɛn de. Bɔt i nɔ go izi fɔ mek yu no di ansa dɛn if yu nɔ tɔk to ɔda brɔda ɛn sista dɛn we sabi di pɔsin gud gud wan. (Prɔv. 15:​22) Ɛn fɔ tru, Jiova in fetful savant nɔ go ivin tink fɔ mared sɔmbɔdi we nɔ biliv di Masta ɛn “jɔyn” insɛf wit am.—2 Kɔr. 6:​14; 1 Kɔr. 7:​39.

Bikɔs denja dɛn de fɔ yuz wɛbsayt we de fɔ fɛn pɔsin fɔ mared, ɔda gud we dɛn de fɔ luk fɔ pɔsin fɔ mared, ɛn fɔ no di wan we go bi di rayt pɔsin fɔ yu. Usay yu go fɛn di rayt pɔsin fɔ mared? We wi ebul fɔ mit togɛda, wi kin gɛt chans fɔ no ɔda pipul dɛn fes-to-fes we wi de atɛnd kɔngrigeshɔn mitin dɛn, asɛmbli dɛn, kɔnvɛnshɔn dɛn, ɛn ɔda program dɛn.

We i nɔ pɔsibul fɔ mek wi mit togɛda fes-to-fes pan dɛn program dɛn ya, lɛk di tɛm we di COVID-19 pandɛmik de, wi kin yuz ilɛktronik tin dɛn fɔ atɛnd mitin dɛn usay wi kin gɛt chans fɔ no ɔda Witnɛs dɛn we nɔ mared yet. Yu go yɛri we dɛn de gi tɔk na di mitin dɛn ɛn sho dɛn fet we dɛn de mek kɔmɛnt. (1 Tim. 6:​11, 12) Una kin ebul bak fɔ tɔk to unasɛf na di breakout room afta di mitin. We wi kin gɛt gɛt-to-gɛda wit wi kɔmpin Jiova Witnɛs dɛn tru kɔmpyuta program dɛn lɛk zoom, yu kin ebul fɔ no udat na di pɔsin we yu want bay di we aw i de trit ɔda pipul dɛn, ɛn dat go mek yu no udat i rili bi. (1 Pit. 3:​4) As tɛm de go, we una de no unasɛf mɔ ɛn mɔ, yu go ebul no if una gɛt di sem gol dɛn, biliv di sem tin, ɛn if una ɔl tu go fit fɔ mared.

We pipul dɛn we nɔ mared yuz Baybul prinsipul dɛn fɔ ɛp dɛn fɔ luk fɔ di rayt pɔsin fɔ mared, bɔku tɛm dɛn kin gɛt gladi-at na dɛn mared-os. I jɔs tan lɛk wetin di Baybul buk we nem Prɔvabs se: “Udat gɛt gud wɛf [ɔ maredman dɔn gɛt gud tin] ɛn na blɛsin frɔm PAPA GƆD [“Jiova,” NWT].”—Prɔv. 18:​22.