1. Us we Kristian dɛn nid fɔ tan lɛk tik? (Luk bak di pikchɔ.)

 “BRIZ nɔ de brok tik we kin bɛn.” Dis parebul sho wan impɔtant kwaliti we kin mek sɔm tik dɛn kɔntinyu fɔ gro: dat na we dɛn de ajɔst. We tin dɛn nɔ izi fɔ wi, wisɛf nid fɔ ajɔst fɔ mek wi kɔntinyu fɔ sav Jiova wit gladi-at. Aw? Fɔ bi pɔsin we nɔ de pin pan sɔntin, wi fɔ rɛdi fɔ ajɔst we tin chenj na wi layf ɛn rɛspɛkt di we aw ɔda pipul dɛn de tink ɛn di tin dɛn we dɛn de disayd fɔ du.

2. Us kwaliti dɛn go ɛp wi fɔ ajɔst we tin chenj na wi layf? Wetin wi go tɔk bɔt insay dis atikul?

² As Jiova in savant dɛn, wi want fɔ bi pɔsin we nɔ de pin pan sɔntin. Wi fɔ bi pɔsin bak we ɔmbul ɛn we de du gud. Insay dis atikul, wi go si aw dɛn kwaliti dɛn ya bin ɛp sɔm Kristian dɛn we tin bin chenj na dɛn layf. Wi go si bak aw dɛn kwaliti dɛn ya go ɛp wi. Bɔt fɔs, lɛ wi lan frɔm Jiova ɛn Jizɔs dɛn ɛgzampul we na di bɛst ɛgzampul bɔt pipul dɛn we nɔ de pin pan sɔntin.

3. Aw wi no se Jiova na pɔsin we nɔ de pin pan sɔntin?

³ Di Baybul kɔl Jiova “di Rɔk” bikɔs i tinap tranga wan ɛn natin nɔ de shek am. (Dit. 32:​4, NWT) Bɔt in na pɔsin bak we nɔ de pin pan sɔntin. As tin dɛn de chenj na dis wɔl, Jiova de sho se in na pɔsin we nɔ de pin pan sɔntin bay we i de ajɔst ɛn mek shɔ se ɔl di tin dɛn we i dɔn tɔk bɔt am tru. Jiova mek mɔtalman lɛk aw insɛf tan ɛn i mek wi ebul fɔ ajɔst we tin dɛn chenj na wi layf. I dɔn gi wi Baybul prinsipul dɛn we go ɛp wi fɔ disayd fɔ du di rayt tin ilɛk uskayn prɔblɛm dɛn mit wi. Jiova in yon ɛgzampul ɛn di prinsipul dɛn we i dɔn gi wi sho klia wan se pan ɔl we Jiova na “di Rɔk,” in na pɔsin bak we nɔ de pin pan sɔntin.

4. Gi wan ɛgzampul we sho se Jiova nɔ de pin pan sɔntin. (Lɛvitikɔs 5:​7, 11)

 ⁴ Di we aw Jiova de du tin pafɛkt, ɛn i nɔ de pin pan sɔntin. I nɔ strikt pan mɔtalman. Lɛ wi tɔk bɔt aw Jiova bin sho se i nɔ de pin pan sɔntin we i kam to aw i bin de trit di Izrɛlayt dɛn. I nɔ bin de ɛkspɛkt di Izrɛlayt dɛn we po ɛn di wan dɛn we jɛntri fɔ gi di sem sakrifays. Fɔ ɛgzampul, i bin de alaw ɛnibɔdi fɔ gi sakrifays akɔdin to wetin i gɛt.—Rid Lɛvitikɔs 5:​7, 11.

5. Gi wan ɛgzampul we de sho se Jiova ɔmbul ɛn i gɛt sɔri-at.

⁵ Na bikɔs Jiova ɔmbul ɛn de sho sɔri-at na dat mek i nɔ de pin pan sɔntin. Fɔ ɛgzampul, Jiova bin sho se i ɔmbul we i bin want fɔ dɔnawe wit di wikɛd pipul dɛn na Sɔdɔm. I bin mek in enjɛl dɛn tɛl Lɔt we na man we bin de du wetin rayt fɔ rɔn go na di eria usay mawntin dɛn de. Lɔt bin de fred fɔ go de. So i bin beg fɔ mek in ɛn in famili go na Zoa, we na wan smɔl tɔŋ we Jiova bin dɔn disayd fɔ dɔnawe wit. Jiova bin fɔ dɔn pin se Lɔt fɔ du wetin I tɛl am. Bifo dat, i bin alaw Lɔt fɔ du wetin i want pan ɔl we dat min se i nɔ go dɔnawe wit Zoa. (Jɛn. 19:​18-22) Lɔng tɛm afta dat, Jiova bin sho di pipul dɛn na Ninivɛ se i gɛt sɔri-at. I bin tɛl in prɔfɛt we na Jona fɔ go tɛl di pipul dɛn se i go dɔnawe wit di siti ɛn di wikɛd pipul dɛn we de de, ɛn natin nɔ go pwɛl dat. Bɔt we di Ninivayt dɛn ripɛnt, Jiova bin fil sɔri fɔ dɛn ɛn nɔ dɔnawe wit di siti.—Jona 3:​1, 10; 4:​10, 11.

6. Tɔk bɔt sɔm ɛgzampul dɛn we sho se Jizɔs bin falamakata Jiova fɔ bi pɔsin we nɔ de pin pan sɔntin.

⁶ Jizɔs bin falamakata Jiova bay we i bin sho se in na pɔsin we nɔ de pin pan sɔntin. Jiova bin sɛn am na dis wɔl fɔ prich to “di Izrɛlayt dɛn nɔmɔ we tan lɛk ship dɛn we dɔn lɔs.” Bɔt i bin sho se i nɔ de pin pan sɔntin we i bin de du da wok de. Wan tɛm, wan uman we nɔto Izrɛlayt bin beg am fɔ mɛn in galpikin we bin de “sɔfa bad bad wan bikɔs i gɛt dimɔn.” Jizɔs bin sho sɔri-at ɛn du wetin di uman tɛl am fɔ du bay we i mɛn in galpikin. (Mat. 15:​21-28) Lɛ wi tɔk bɔt ɔda ɛgzampul. We Jizɔs bin stat in prichin wok, i bin tɔk se: “Ɛnibɔdi we dinay mi . . . , misɛf go dinay am.” (Mat. 10:​33) Bɔt fɔ se Jizɔs bin dinay Pita bikɔs Pita dinay am tri tɛm? Nɔ. Jizɔs bin no se Pita bin rili sɔri fɔ wetin i du ɛn in na man we bin gɛt fet. Afta we Jizɔs gɛt layf bak, i bin apia to Pita, ɛn i go bi se i bin mek Pita no se i dɔn fɔgiv am ɛn i stil lɛk am.—Lyuk 24:​33, 34.

7. Akɔdin to Filipians 4:​5, aw wi want ɔda pipul dɛn fɔ si wi?

⁷ Wi dɔn si se Jiova Gɔd ɛn Jizɔs Krays nɔ de pin pan sɔntin. Bɔt we wi? Jiova de ɛkspɛkt wi fɔ bi pipul dɛn we nɔ de pin pan sɔntin. (Rid Filipians 4:​5.) Wan transleshɔn tɔk bɔt dis vas se: “Sho bay wetin yu de du se yu na pɔsin we nɔ de pin pan sɔntin.” Lɛ wi aks wisɛf dɛn kwɛstyɔn dɛn ya: ‘Pipul dɛn de si mi as pɔsin we nɔ de pin, we de alaw pipul dɛn fɔ du tin dɛn yon we?  Ɔ dɛn de si mi lɛk pɔsin we tu strikt, ash, ɛn trangayes? Mi na pɔsin we kin pin fɔ mek pipul dɛn du tin di we aw a want ɔ di we aw a tink se dɛn fɔ du am? Ɔ mi na pɔsin we de lisin to ɔda pipul dɛn ɛn ajɔst we nid de? Di mɔ wi sho se wi na pɔsin we nɔ de pin pan sɔntin, na di mɔ wi de falamakata Jiova ɛn Jizɔs. Lɛ wi tɔk bɔt tu eria dɛn we wi go nid fɔ sho se wi na pɔsin we nɔ de pin pan sɔntin, dat na, we tin chenj na wi layf ɛn we di tin dɛn we ɔda pipul dɛn de tink ɛn disayd difrɛn frɔm wi yon.

8. Wetin go ɛp wi fɔ bi pɔsin we nɔ de pin we tin chenj na wi layf? (Luk bak di futnot.)

⁸ Fɔ bi pɔsin we nɔ de pin pan sɔntin, wi fɔ rɛdi fɔ ajɔst we tin chenj na wi layf. Dɛn chenj dɛn de kin mek wi gɛt prɔblɛm dɛn we wi nɔ ɛva tink se wi go gɛt. Sɔntɛm, wantɛm wantɛm wi go gɛt siriɔs wɛlbɔdi prɔblɛm. Ɔ sɔntɛm, wantɛm wantɛm wi go gɛt mɔni prɔblɛm ɔ di gɔvmɛnt go chenj, ɛn dat kin mek tin rili tranga fɔ wi. (Ɛkli. 9:​11, NWT; 1 Kɔr. 7:​31) I kin ivin tranga mɔ fɔ wi if di ɔganayzeshɔn aks wi fɔ sav Jiova na difrɛn ples. Ilɛk us prɔblɛm mit wi, wi go ebul fɔ ajɔst to nyu tin dɛn if wi du dɛn 4 tin dɛn ya: (1) gri se tin dɛn dɔn chenj, (2) tink bɔt tumara bambay, (3) pe atɛnshɔn pan di gud tin dɛn we de apin na yu layf, ɛn (4) du tin fɔ ɔda pipul dɛn. b Lɛ wi si aw sɔm pan wi brɔda ɛn sista dɛn bin bɛnifit we dɛn du dɛn tin dɛn ya.

9. Aw wan maredman ɛn in wɛf we na mishɔnari bin bia wit prɔblɛm dɛn we bin mit dɛn kwik kwik wan?

⁹ Gri se tin dɛn dɔn chenj. Dɛn bin sɛn Imanwɛl ɛn Franchɛska fɔ go sav as mishɔnari dɛn na ɔda kɔntri. Jɔs afta dɛn bigin fɔ lan di langwej ɛn tray fɔ no di brɔda ɛn sista dɛn na dɛn nyu kɔngrigeshɔn, di COVID-19 pandɛmik bin bigin, ɛn dat bin mek dɛn nɔ bin ebul fɔ miks wit ɔda pipul dɛn. Dɔn wantɛm wantɛm, Franchɛska in mama bin day. Franchɛska bin rili want fɔ de wit in famili, bɔt di pandɛmik bin mek i nɔ ebul travul fɔ go de. Aw i bin ebul fɔ bia dis tɛm we tin nɔ bin izi? Fɔs, Imanwɛl ɛn Franchɛska bin de pre togɛda fɔ sɛns so dat dɛn go ebul fɔ bia ɛvride ɛn nɔ wɔri pasmak. Jiova bin yuz in ɔganayzeshɔn fɔ ansa dɛn prea dɛn di rayt tɛm. Fɔ ɛgzampul, wan intavyu we wan brɔda bin du bin rili ɛnkɔrej dɛn. Insay di vidio, di brɔda tɔk se: “We wi gri wit di tin dɛn we de apin to wi kwik kwik wan, dat de mek wi gɛt wi gladi-at bak kwik kwik wan, ɛn dat go gi wi di chans fɔ sav Jiova ɛn ɛp ɔda pipul dɛn pan ɔl we tin dɔn chenj fɔ wi.” c Sɛkɔn, dɛn bin disayd fɔ sabi du tɛlifon witnɛsin gud gud wan, ɛn dɛn bin ivin stat wan Baybul stɔdi. Tɔd, dɛn bin alaw di brɔda ɛn sista dɛn fɔ ɛp dɛn, ɛn dɛn bin rili gladi fɔ di lɛk we dɛn lɛk dɛn. Wan gud sista bin de sɛn shɔt mɛsej to dɛn wit wan Baybul vas ɛvride fɔ wan ia. We wisɛf gri se tin dɛn dɔn chenj, i go ɛp wi fɔ gɛt gladi-at we wi de du di tin dɛn we wi ebul fɔ du.

10. Aw wan sista bin ajɔst we tin bin chenj na in layf?

¹⁰ Tink bɔt tumara bambay, ɛn pe atɛnshɔn pan di gud tin dɛn we de apin na yu layf. Wan sista we kɔmɔt Romenia we nem  Kristina, we de na Jepan, in at bin pwɛl bikɔs di kɔngrigeshɔn we i bin de atɛnd usay dɛn de tɔk Inglish nɔ bin de igen. Bɔt i nɔ bin kɔntinyu fɔ tink bɔt wetin dɔn apin. Bifo dat, i bin disayd fɔ go na di Jepaniz kɔngrigeshɔn ɛn du in bɛst fɔ prich insay Jepaniz. I bin aks wan uman we dɛn ɔltu bin de wok fɔ ɛp am fɔ sabi tɔk Jepaniz fayn wan. Di uman bin gri fɔ yuz di Baybul ɛn di Ɛnjɔy Layf Sote Go! brosho fɔ tich Kristina Jepaniz. So Kristina bin lan aw fɔ tɔk Jepaniz fayn fayn wan, bɔt wetin impɔtant mɔ na dat di uman bin want fɔ no mɔ bɔt di Baybul. We wi nɔ kɔntinyu fɔ tink bɔt di tin dɛn we dɔn apin ɛn kɔntinyu fɔ biev fayn, di chenj dɛn we kin apin kwik kwik wan kin mek gud tin dɛn apin we wi nɔ bin de ɛkspɛkt.

11. Wetin bin ɛp wan maredman ɛn in wɛf fɔ bia we dɛn bin gɛt mɔni prɔblɛm?

¹¹ Du tin fɔ ɔda pipul dɛn. Wan maredman ɛn in wɛf we bin de na wan kɔntri usay dɛn dɔn ban wi wok bin lɔs dɛn wok, ɛn dɛn bigin fɔ gɛt mɔni prɔblɛm dɛn we di kɔntri nɔ bin gɛt mɔni igen. Aw dɛn bin ajɔst? Fɔs, dɛn bin du tin dɛn we go mek dɛn liv simpul layf. Dɔn, bifo dɛn pe atɛnshɔn pan dɛn yon prɔblɛm dɛn, dɛn bin disayd fɔ pe atɛnshɔn fɔ ɛp ɔda pipul dɛn bay we dɛn bin de yuz bɔku tɛm fɔ du di prichin wok. (Akt 20:​35) Di maredman bin tɔk se, “Bikɔs wi bin de spɛn bɔku tɛm pan di prichin wok, wi nɔ bin gɛt bɛtɛ tɛm fɔ tink bɔt wi prɔblɛm dɛn, bɔt wi bin gɛt bɔku tɛm fɔ du wetin Gɔd want wi fɔ du.” We tin dɛn chenj na wi layf, wi nid fɔ mɛmba se i rili impɔtant fɔ kɔntinyu fɔ ɛp ɔda pipul dɛn, mɔ bay we wi de du di prichin wok.

12. Aw apɔsul Pɔl in ɛgzampul go ɛp wi fɔ ajɔst we tin dɛn chenj na wi prichin wok?

¹² We wi de du wi prichin wok, wi nid fɔ rɛdi fɔ ajɔst. Di pipul dɛn we wi kin prich to gɛt difrɛn tin dɛn we dɛn biliv bɔt Gɔd, ɛn dɛn kɔmɔt na difrɛn ples dɛn ɛn gɛt difrɛn kɔlchɔ dɛn. Apɔsul Pɔl bin rɛdi fɔ ajɔst, ɛn wi kin lan frɔm in ɛgzampul. Jizɔs bin mek Pɔl bi “apɔsul we dɛn sɛn to ɔda neshɔn dɛn.” (Rom. 11:​13) Dis bin mek Pɔl ebul fɔ prich to Ju dɛn, Grik dɛn, pipul dɛn we lan buk, vileja dɛn, pipul dɛn we de wok na gɔvmɛnt, ɛn kiŋ dɛn. Fɔ mek Pɔl ebul fɔ tɔch dɛn pipul ya dɛn at wit in mɛsej, i bin nid fɔ bi “ɔltin to ɔlkayn pipul dɛn.” (1 Kɔr. 9:​19-23) I bin pe atɛnshɔn pan di kɔlchɔ, di say we dɛn kɔmɔt, ɛn wetin dɛn biliv, ɛn i bin ajɔst di we aw i bin de prich. Wisɛf go prich gud gud wan if wi de ajɔst ɛn tray fɔ tink bɔt di bɛst we aw wi go ebul fɔ ɛp pipul dɛn.

13. Us denja 1 Kɔrintians 8:​9 tɔk bɔt we wi fɔ avɔyd if wi de rɛspɛkt di we aw ɔda pipul dɛn de si tin?

¹³ We wi nɔ de pin pan sɔntin, dat go ɛp wi bak fɔ rɛspɛkt di we aw ɔda pipul dɛn de si tin. Fɔ ɛgzampul, sɔm pan wi sista dɛn lɛk fɔ yuz mek-ɔp, ɔda wan dɛn nɔ lɛk fɔ yuz am. Sɔm Kristian dɛn lɛk fɔ drink rɔm, pan ɔl we nɔto bɔku wan. Bɔt ɔda Kristian dɛn dɔn disayd nɔ fɔ drink rɔm atɔl. Ɔl Kristian dɛn want fɔ gɛt wɛlbɔdi, bɔt dɛn ɔl kin chuz difrɛn we dɛn fɔ kia fɔ dɛn wɛlbɔdi. If wi tink se di we aw wi de si tin rayt ɔltɛm, dat go mek wi tray fɔ mek wi brɔda ɛn sista dɛn du tin dɛn di we aw wi de du am. Ɛn we wi du dat, wi go mek di wan dɛn we wik fɔdɔm ɛn wi go ivin mek wanwɔd nɔ de na di kɔngrigeshɔn. Wan dawt nɔ de se wi nɔ go want fɔ mek dat apin. (Rid 1 Kɔrintians 8:​9; 10:​23, 24) Lɛ wi tɔk bɔt tu ɛgzampul dɛn we de sho se we wi aplay Baybul  prinsipul dɛn dat go ɛp wi fɔ du tin dɛn di rayt we ɛn mek pis kɔntinyu fɔ de.

14. Us Baybul prinsipul dɛn wi fɔ mɛmba we wi de disayd wetin wi fɔ wɛr ɛn di kayn iastayl we wi fɔ mek?

¹⁴ Di we aw wi de drɛs ɛn di iastayl dɛn we wi de mek. Jiova Gɔd nɔ tɛl wi wetin wi fɔ wɛr. Bifo dat, i gi wi prinsipul dɛn we wi nid fɔ fala. Wi nid fɔ drɛs di kayn we we de sho se wi de ɔnɔ Gɔd, wi nɔ de pin, nɔto ɔltin wi gɛt rayt fɔ du, ɛn wi de “du tin wit sɛns.” (1 Tim. 2:​9, 10; 1 Pit. 3:​3) So wi nɔ want fɔ drɛs di kayn we we go mek pipul dɛn jɔs de tink bɔt aw wi drɛs. Baybul prinsipul dɛn go ɛp ɛlda dɛn bak fɔ avɔyd fɔ mek dɛn yon lɔ dɛn bɔt wetin pipul dɛn fɔ wɛr ɛn di kayn iastayl we dɛn fɔ mek. Fɔ ɛgzampul, sɔm ɛlda dɛn na wan kɔngrigeshɔn bin want fɔ ɛp sɔm yɔŋ brɔda dɛn we bin de falamakata di iastayl we sɔm yɔŋ pipul dɛn arawnd dɛn bin de mek, ɛn dɛn yɔŋ pipul dɛn de dɛn iastayl nɔ bin fayn. Aw ɛlda dɛn go ɛp dɛn yɔŋ brɔda dɛn ya ɛn nɔ mek lɔ fɔ dɛn? Di sakit ovasia bin advays di ɛlda dɛn fɔ tɛl di brɔda dɛn se, “If una de na stej ɛn di brɔda ɛn sista dɛn jɔs de pe atɛnshɔn pan di we aw una drɛs ɛn nɔ de pe atɛnshɔn pan wetin una de se, dat min se sɔntin rɔng wit di we aw una drɛs ɛn una iastayl.” Dis simpul tin we di sakit ovasia bin tɛl dɛn bin ɛp di yɔŋ brɔda dɛn fɔ ɔndastand wetin dɛn nid fɔ du, ɛn di ɛlda dɛn nɔ bin nid fɔ mek dɛn yon lɔ. d

15. Us lɔ ɛn prinsipul dɛn na di Baybul go ɛp wi we wi de disayd wetin wi fɔ du bɔt wi wɛlbɔdi biznɛs? (Romans 14:​5)

¹⁵ Wɛlbɔdi biznɛs. Ɔl Kristian nid fɔ disayd aw i go kia fɔ in wɛlbɔdi. (Gal. 6:​5) We Kristian dɛn de disayd us mɛdikal tritmɛnt dɛn fɔ pik, dɛn nid fɔ obe di Baybul in lɔ dɛn we se wi nɔ fɔ tek blɔd ɔ put an  pan juju biznɛs. (Akt 15:​20; Gal. 5:​19, 20) Bɔt we i kam to ɔda tritmɛnt dɛn wi kin disayd fɔ wisɛf us wan wi go tek. Sɔm pipul dɛn kin abop pan dɔktɔ dɛn nɔmɔ fɔ ɛp dɛn fɔ no uskayn tritmɛnt dɛn fɔ tek. Bɔt ɔda wan dɛn kin disayd fɔ tek ɔda kayn tritmɛnt dɛn. Sɔntɛm wi go tink se wan patikyula tritmɛnt rili gud ɔ i nɔ gud, bɔt wi nid fɔ rɛspɛkt di rayt we wi brɔda ɛn sista dɛn gɛt fɔ disayd fɔ dɛnsɛf wetin dɛn go du bɔt dɛn wɛlbɔdi biznɛs. Bikɔs ɔf dis, wi nid fɔ mɛmba dɛn 4 pɔynt dɛn ya: (1) Na Gɔd in Kiŋdɔm nɔmɔ go pul siknɛs kpatakpata. (Ayz. 33:​24) (2) Ɔl Kristian fɔ “rili sho se wetin i biliv na di rayt tin” ɛn disayd wetin gud fɔ am we i kam pan wɛlbɔdi biznɛs. (Rid Romans 14:​5.) (3) Wi nɔ fɔ jɔj ɔda pipul dɛn fɔ wetin dɛn disayd ɔ wi nɔ fɔ du ɛnitin we go mek dɛn fɔdɔm. (Rom. 14:​13) (4) Kristian dɛn nid fɔ sho se dɛn lɛk dɛn kɔmpin dɛn, ɛn dɛn fɔ ɔndastand se di wanwɔd we de na di kɔngrigeshɔn impɔtant pas wetin dɛn tink. (Rom. 14:​15, 19, 20) If wi kɔntinyu fɔ mɛmba dɛn pɔynt dɛn ya, wi go kɔntinyu fɔ gɛt tayt padi biznɛs wit wi brɔda ɛn sista dɛn ɛn wi go kɔntinyu fɔ mek pis ɛn wanwɔd de na di kɔngrigeshɔn.

16. Aw ɛlda go sho se i nɔ de pin we i de wok wit in kɔmpin ɛlda dɛn? (Luk bak di pikchɔ dɛn.)

¹⁶ Ɛlda dɛn nid fɔ sɛt fayn ɛgzampul fɔ bi pɔsin we nɔ de pin pan sɔntin. (1 Tim. 3:​2, 3) Fɔ ɛgzampul, ɛlda we ol nɔ fɔ ɛkspɛkt se in kɔmpin ɛlda dɛn fɔ gri wit ɔltin we i de tɔk bikɔs i ol pas dɛn. I fɔ mɛmba se Jiova in spirit kin yuz ɛniwan pan dɛn fɔ tɔk sɔntin we go ɛp dɛn fɔ disayd fɔ du di rayt tin. Ɛn if bɔku pan di ɛlda dɛn gri wit sɔntin we dɛn disayd ɛn i nɔ go agens Baybul prinsipul dɛn, ɛlda we nɔ de pin go sɔpɔt wetin dɛn disayd, ilɛk nɔto dat in want.

17. Us blɛsin dɛn Kristian dɛn we nɔ de pin de ɛnjɔy?

¹⁷ Wi de gɛt bɔku bɛnifit dɛn if wi nɔ de pin pan sɔntin. Wi de gɛt tayt padi biznɛs wit wi brɔda ɛn sista dɛn, ɛn di kɔngrigeshɔn de gɛt pis. Wi gladi bikɔs Jiova in pipul dɛn difrɛn, ɛn dɛn gɛt difrɛn kɔlchɔ dɛn. Ɛn i rili wɔndaful fɔ no se pan ɔl we wi difrɛn, wi de wɔship am as wan famili we gɛt wanwɔd. Ɛn di tin we impɔtant pas ɔl na dat wi gladi fɔ no se wi de falamakata wi Gɔd, Jiova we nɔ de pin.