1. Us tru tin dɛn yu bin lan we yu bigin fɔ stɔdi di Baybul?

 YU MƐMBA we yu bin stat fɔ stɔdi di Baybul? Sɔntɛm yu bin sɔprayz fɔ no se Gɔd gɛt nem. I go bi se yu bin gladi fɔ no se Gɔd nɔ de pɔnish pipul dɛn na ɛlfaya. Ɛn i go mɔs bi se yu bin rili gladi fɔ no se yu go si di wan dɛn we yu lɛk we dɔn day, ɛn yu go de wit dɛn na dis wɔl we i go dɔn bi Paradays.

2. Apat frɔm we yu lan di trut na di Baybul, us ɔda tin dɛn yu bin du? (Ɛfishians 5:​1, 2)

² Di mɔ we yu stɔdi Gɔd in Wɔd, na di mɔ yu bin kam fɔ lɛk Jiova. Da lɔv de bin muv yu fɔ du wetin yu de lan. Yu bin disayd fɔ du di rayt tin dɛn we gri wit Baybul prinsipul dɛn. Yu lan fɔ tink bɔt di rayt tin dɛn ɛn fɔ du dɛn bikɔs yu want fɔ mek Gɔd gladi. Jɔs lɛk aw pikin de falamakata in mama ɔ papa we i lɛk, na so yu bin de falamakata yu Papa we de na ɛvin.—Rid Ɛfishians 5:​1, 2.

3. Us kwɛstyɔn dɛn go fayn fɔ mek wi aks wisɛf?

³ I go fayn fɔ mek wi aks wisɛf dɛn kwɛstyɔn dɛn ya: ‘Fɔ se a dɔn kam fɔ lɛk Jiova mɔ pas di tɛm we a bin jɔs bi Kristian? Fɔ se a de tink ɛn du tin Jiova in we frɔm we a baptayz, mɔ we i kam pan fɔ sho lɔv to mi brɔda ɛn sista dɛn?’ If yu nɔ gɛt di “sem lɔv we yu bin gɛt fɔs,” lɛ dat nɔ mek yu at pwɛl. Dis sem kayn tin bin apin to di fɔstɛm  Kristian dɛn. Jizɔs nɔ bin giv-ɔp pan dɛn, ɛn i nɔ go giv-ɔp pan wi bak. (Rɛv. 2:​4, 7) I no se wi go ebul fɔ gɛt di lɔv we wi bin gɛt di tɛm we wi jɔs lan di trut.

4. Wetin wi go tɔk bɔt insay dis atikul?

⁴ Insay dis atikul, wi go tɔk bɔt aw wi go kɔntinyu fɔ lɛk Jiova ɛn ɔda pipul dɛn. Dɔn wi go tɔk bɔt sɔm pan di blɛsin dɛn we wi ɛn ɔda pipul dɛn go gɛt we wi kɔntinyu fɔ lɛk Jiova ɛn wi brɔda ɛn sista dɛn.

5-6. Us prɔblɛm dɛn apɔsul Pɔl bin gɛt di tɛm we i bin de du in prichin wok? Wetin bin muv am fɔ kɔntinyu fɔ sav Jiova?

⁵ Apɔsul Pɔl bin gladi we i bin de sav Jiova, bɔt i bin de gɛt prɔblɛm dɛn. Bɔku tɛm, Pɔl bin de travul fɔ go fa fa say dɛn, ɛn dɛn tɛm dɛn de, fɔ travul nɔ bin rili izi. Sɔntɛnde, we Pɔl bin de travul, i bin de “pan denja na riva dɛn” ɛn “tifman dɛn mek [in] layf de pan denja.” Dɔn bak, tɛm dɛn bin de we in ɛnimi dɛn bin de ivin bit am. (2 Kɔr. 11:​23-27) Ɛn Pɔl in Kristian brɔda ɛn sista dɛn nɔ bin de sho tɛnki ɔltɛm fɔ di tin dɛn we i du fɔ ɛp dɛn.—2 Kɔr. 10:​10; Fil. 4:​15.

⁶ Wetin bin ɛp Pɔl fɔ kɔntinyu fɔ sav Jiova? Pɔl bin lan bɔku tin bɔt Jiova in kwaliti dɛn frɔm di Skripchɔ dɛn ɛn frɔm in yon ɛkspiriɛns dɛn. Pɔl bin kam fɔ biliv tranga wan se Jiova Gɔd lɛk am. (Rom. 8:​38, 39; Ɛfi. 2:​4, 5) I bin kam fɔ rili lɛk Jiova. Pɔl bin sho se i lɛk Jiova bay we i bin “de wok ɛn kɔntinyu fɔ wok fɔ di oli wan dɛn.”—Ibru. 6:​10.

7. Wetin na wan tin we wi go du we go ɛp wi fɔ lɛk Jiova mɔ ɛn mɔ?

⁷ Wi go ebul fɔ lɛk Gɔd mɔ ɛn mɔ bay we wi de tek tɛm stɔdi in Wɔd. As yu de rid di Baybul, tray fɔ ɔndastand wetin ɛni pasej de tɛl yu bɔt Jiova. Aks yusɛf: ‘Aw dis akawnt de sho mi se Jiova lɛk mi? Us rizin dɛn i de gi mi fɔ lɛk Jiova?’

8. Aw prea go ɛp wi fɔ lɛk Jiova mɔ ɛn mɔ?

⁸ Wan ɔda tin we wi go du we go ɛp wi fɔ lɛk Jiova mɔ ɛn mɔ na we wi de pre to am ɛvride ɛn tɛl am aw wi de rili fil. (Sam 25:​4, 5) Dɔn, Jiova go ansa wi prea dɛn. (1 Jɔn 3:​21, 22) Kan, we na wan sista na Eshia, tɔk se: “Fɔs a bin lɛk Jiova bikɔs ɔf wetin a bin no bɔt am, bɔt a kam fɔ lɛk am mɔ ɛn mɔ we a si aw i de ansa mi prea dɛn. Dis bin mek a want fɔ du tin dɛn we go mek i gladi.” b

9. Aw Timoti bin sho se i de go bifo fɔ sho lɔv?

⁹ Sɔm ia afta we Pɔl bi Kristian, i bin mit wan yɔŋman we nem Timoti. Timoti bin lɛk Jiova, ɛn i bin lɛk pipul dɛn. Pɔl bin tɛl di brɔda dɛn na Filipay se: “A nɔ gɛt ɛnibɔdi we tan lɛk [Timoti] we go rili kia fɔ una.” (Fil. 2:​20) Na dis vas, Pɔl nɔ bin de tɔk bɔt aw Timoti ebul fɔ ɔganayz ɔ fɔ gi pɔblik tɔk, bɔt Pɔl bin ebul fɔ si se Timoti bin rili lɛk di brɔda ɛn sista dɛn. Wan dawt nɔ de se di kɔngrigeshɔn dɛn we Timoti bin de sav bin de rili wet fɔ mek i kam fɛn dɛn.—1 Kɔr. 4:​17.

10. Aw Ana ɛn in man bin sho se dɛn lɛk dɛn brɔda ɛn sista dɛn?

¹⁰ Wisɛf de luk fɔ we dɛn fɔ ɛp wi brɔda ɛn sista dɛn. (Ibru. 13:​16) Tink bɔt Ana, we wi bin dɔn tɔk bɔt na di atikul bifo dis wan. Afta big big briz bin blo, in  ɛn in man bin go fɛn wan Jiova Witnɛs famili, ɛn dɛn bin kam fɔ si se di briz bin pwɛl di famili dɛn ruf. So dis bin mek di famili nɔ bin gɛt klin klos fɔ wɛr. Ana se: “Wi bin go bruk dɛn klos dɛn, dɔn wi ayɛn ɛn fol dɛn bifo wi kam wit dɛn bak. Wi bin tek am se na smɔl tin wi du. Bɔt dis tin we wi du bin mek wi kam fɔ bi tayt padi wit dɛn te naw.” Bikɔs Ana ɛn in man lɛk di brɔda ɛn sista dɛn, dat mek dɛn gi dɛn di ɛp we dɛn bin nid.—1 Jɔn 3:​17, 18.

11. (a) We wi sho se wi lɛk ɔda pipul dɛn, aw dat kin afɛkt dɛn? (b) Akɔdin to Prɔvabs 19:​17, wetin Jiova kin du we wi de sho lɔv?

¹¹ We wi de sho lɔv to ɔda pipul dɛn ɛn du gud to dɛn, bɔku tɛm dɛn kin notis se wi de tray fɔ falamakata di we aw Jiova de tink ɛn du tin. Ɛn sɔntɛm dɛn go sho se dɛn gladi fɔ di gud tin we wi dɔn du fɔ dɛn pas di we aw wi go ivin imajin. Kan, we wi bin dɔn tɔk bɔt kin mɛmba di wan dɛn we bin ɛp am. I se: “A rili gladi fɔ ɔl di sista dɛn we bin de go wit mi na fil savis. Dɛn bin de kam tek mi na os, dɛn bin invayt mi fɔ it wit dɛn, ɛn dɛn bin de go lɛf mi na os sef wan. Na naw a no se i nɔ bin izi fɔ mek dɛn du ɔl dɛn tin dɛn de. Bɔt dɛn bin gladi fɔ du am.” As wi no, nɔto ɔlman go tɛl wi tɛnki fɔ di tin dɛn we wi de du fɔ dɛn. We Kan bin de tɔk bɔt di wan dɛn we bin ɛp am, i se: “A wish a go ebul fɔ pe dɛn fɔ di bɔku gud tin dɛn we dɛn du fɔ mi, bɔt a nɔ no usay dɛn ɔl de. Bɔt Jiova no, ɛn a de pre se i go pe dɛn fɔ mi.” Di tin we Kan tɔk na tru. Jiova de notis ivin di smɔl tin dɛn we wi de du fɔ ɔda pipul dɛn. I de si am  as sakrifays we rili valyu ɛn as dɛt we i go pe.—Rid Prɔvabs 19:​17.

12. Aw brɔda dɛn go sho se dɛn lɛk di kɔngrigeshɔn? (Luk bak di pikchɔ dɛn.)

¹² If yu na brɔda, aw yu go sho se yu lɛk ɔda pipul dɛn ɛn tray fɔ ɛp dɛn? Wan yɔŋ brɔda we nem Jɔdan bin aks wan ɛlda aw i go ebul fɔ du mɔ fɔ ɛp na di kɔngrigeshɔn. Di ɛlda bin tɛl am tɛnki fɔ di tin dɛn we i bin ɔlrɛdi de du, ɛn i gi am sɔm advays bɔt aw i go ebul fɔ du mɔ. Fɔ ɛgzampul, i bin ɛnkɔrej Jɔdan fɔ de kam kwik na Kiŋdɔm Ɔl ɛn grit ɔda pipul dɛn, fɔ de gi kɔmɛnt na mitin, prich ɔltɛm wit in fil savis grup, ɛn luk fɔ we dɛn fɔ ɛp ɔda pipul dɛn. We Jɔdan bin fala dis advays, i nɔ bin jɔs de lan fɔ du nyu tin dɛn, bɔt i bin kam fɔ lɛk in brɔda ɛn sista dɛn mɔ ɛn mɔ. Jɔdan bin lan se we brɔda bi ministerial savant, nɔto da tɛm de i de bigin fɔ ɛp ɔda pipul dɛn. Bifo dat, i de kɔntinyu fɔ ɛp dɛn.—1 Tim. 3:​8-10, 13.

13. Aw lɔv bin muv wan brɔda we nem Kristian fɔ kwalifay bak fɔ bi ɛlda?

¹³ Wetin yu go du if yu na bin ministerial savant ɔ ɛlda trade? Jiova de mɛmba di wok we yu bin du trade ɛn di lɔv we bin mek yu du da wok de. (1 Kɔr. 15:​58) I de si bak di lɔv we yu de kɔntinyu fɔ sho. Wan brɔda we nem Kristian in at bin pwɛl we dɛn bin mek i stɔp fɔ bi ɛlda. Bɔt i tɔk se: “A bin disayd se ilɛk mi na ɛlda ɔ mi nɔto ɛlda, a go du ɔl wetin a ebul fɔ sav Jiova bikɔs a lɛk am.” Leta, dɛn bin mek am ɛlda bak. Kristian se: “A bin fred smɔl fɔ bi ɛlda bak. Bɔt a bin disayd se if Jiova dɔn sɔri fɔ mi ɛn alaw  mi fɔ bi ɛlda bak, a go ebul fɔ du da wok de bikɔs a lɛk in ɛn mi brɔda ɛn sista dɛn.”

14. Wetin yu lan frɔm wetin wan sista na Jɔjia tɔk?

¹⁴ Jiova in savant dɛn de sho bak se dɛn lɛk dɛn neba dɛn. (Mat. 22:​37-39) Fɔ ɛgzampul, wan sista we nem Ɛlena we de na Jɔjia tɔk se: “Fɔs, di wangren rizin we mek a bin de go prich na bikɔs a lɛk Jiova. Bɔt di mɔ we a kam fɔ lɛk mi Papa we de na ɛvin, na di mɔ a bin de lɛk pipul dɛn bak. A tray fɔ imajin di prɔblɛm dɛn we dɛn gɛt ɛn wetin a go tɔk bɔt we go tɔch dɛn at. Di mɔ a bin de tink bɔt dɛn dis kayn we, na di mɔ a bin want fɔ ɛp dɛn.”—Rom. 10:​13-15.

15-16. Akɔdin to wetin de na di pikchɔ dɛn, us blɛsin dɛn wi kin gɛt we wi sho se wi lɛk ɔda pipul dɛn?

¹⁵ We wi sho se wi lɛk wi brɔda dɛn, nɔto dɛn nɔmɔ de bɛnifit. Afta di COVID-19 pandɛmik bin stat, wan brɔda we nem Pawlo ɛn in wɛf bin ɛp bɔku sista dɛn we dɔn ol fɔ lan aw fɔ yuz dɛn fon, tablɛt, ɔ kɔmpyuta fɔ prich. Wan sista bin ebul fɔ yuz in tablɛt pan ɔl we i nɔ bin izi fɔ du dat. I bin ebul fɔ yuz am fɔ invayt in fambul dɛn fɔ di Mɛmorial. 60 pan dɛn bin atɛnd di program tru vidiokɔnfrɛns. Di sista in fambul dɛn ɔl bin bɛnifit frɔm di ɛp we Pawlo ɛn in wɛf bin ɛp am. Leta di sista rayt to Pawlo se:  “Tɛnki fɔ we yu de tich wi di ol wan dɛn. A nɔ go ɛva fɔgɛt di we aw Jiova bisin bɔt wi ɛn aw yu de wok tranga wan fɔ ɛp wi.”

¹⁶ Ɛkspiriɛns dɛn lɛk dis bin tich Pawlo wan impɔtant lɛsin. I bin kam fɔ mɛmba se fɔ sho lɔv impɔtant pas fɔ sabi aw fɔ du tin dɛn. I se: “Mi na bin sakit ovasia trade. Bɔt rayt naw, a dɔn kam fɔ no se pan ɔl we di pɔblisha dɛn go dɔn fɔgɛt mi tɔk dɛn, dɛn stil de mɛmba wetin a bin du fɔ ɛp dɛn.”

17. Udat bak go bɛnifit we wi sho lɔv?

¹⁷ We wi sho se wi lɛk ɔda pipul dɛn, wisɛf kin gɛt bɛnifit dɛn we wi nɔ go ɛkspɛkt se wi go gɛt. Wan brɔda we nem Jonɛtan, we de na Nyu Ziland ɛp wi fɔ no dis. Wan Satide aftanun we ples bin wam, i bin si wan payɔnia brɔda in wan de prich. Afta da de de, Jonɛtan bin disayd fɔ wok wit di payɔnia ɛvri Satide aftanun. Fɔs, i nɔ bin no se insɛf go rili bɛnifit frɔm dis gud tin we i du. Jonɛtan se, “Bay da tɛm de na mi layf, a nɔ bin lɛk fɔ go fil savis. Bɔt we a bin de lisin to di we aw di payɔnia de tich ɛn we a bin si aw di prichin wok we i de du de kɔmɔt fayn, dat bin mek a rili kam fɔ lɛk dis wok. Dɔn bak, a kam fɔ gɛt gud padi we bin ɛp mi fɔ go bifo pan Gɔd biznɛs, fɔ ɛnjɔy fil savis, ɛn fɔ kam nia Jiova.”

18. Wetin Jiova want wi fɔ du?

¹⁸ Jiova want wi ɔl fɔ kɔntinyu fɔ lɛk in ɛn ɔda pipul dɛn. Lɛk aw wi dɔn lan, wi go ebul fɔ lɛk Jiova mɔ bay we wi de rid in Wɔd ɛn tink gud wan bɔt am, ɛn bay we wi de pre to am ɔltɛm. Wi go ebul fɔ lɛk wi brɔda ɛn sista dɛn mɔ bay we wi de ɛp dɛn wit tin dɛn we dɛn nid. Di mɔ we wi lɔv de gro, na di mɔ wi go kam nia Jiova ɛn wi brɔda ɛn sista dɛn. Ɛn wi go ɛnjɔy fɔ bi dɛn padi sote go!