1-2. Us we pɔsin we na Kristian tan lɛk tɔl bildin? (1 Kɔrintians 15:​58)

 INSAY 1978, dɛn bin bil wan bildin we rili tɔl na Tokyo, insay Jepan. Pipul dɛn bin de wɔnda if da bildin de go kɔntinyu fɔ tinap, bikɔs bɔku atkwek dɛn bin de apin na da siti de. Wetin na bin di sikrit? Di injinia dɛn bin dizayn di bildin fɔ mek i go rili strɔng, ɛn dɛn bin mek am di kayn we we go mek ilɛk atkwek apin, i nɔ go fɔdɔm. Kristian dɛn tan lɛk da tɔl bildin de. Aw?

² Pɔsin we na Kristian fɔ ebul tinap tranga wan ɛn ebul fɔ ajɔst bak. I nid fɔ tinap tranga wan ɛn mekɔp in maynd fɔ obe Jiova in lɔ dɛn ɔltɛm. (Rid 1 Kɔrintians 15:​58.) I “rɛdi fɔ obe” ɛn i nɔ de alaw ɛnitin fɔ ambɔg in padi biznɛs wit Jiova. Bɔt i nid fɔ bi pɔsin bak we “nɔ de pin,” ɔ we rɛdi fɔ ajɔst we nid de. (Jems 3:​17) Pɔsin we na Kristian we dɔn lan fɔ biev dis kayn we nɔ go bi pɔsin we tu strikt ɔ pɔsin we de alaw ɛnitin. Insay dis atikul, wi go tɔk bɔt aw wi go ebul bi pɔsin we natin nɔ de shek. Wi go tɔk bak bɔt fayv tin dɛn we Setan de du fɔ mek i nɔ izi fɔ lɛ wi kɔntinyu fɔ obe Jiova ɛn wi go lan bɔt wetin wi go du fɔ mek i nɔ ebul wi.

3. Us lɔ dɛn Jiova gi we de na Akt 15:​28, 29?

³ Jiova na di Wan we gɛt di rayt fɔ mek lɔ dɛn, ɛn ɔltɛm i de mek lɔ dɛn we izi we in pipul dɛn go ebul fɔ ɔndastand. (Ayz. 33:​22) Fɔ ɛgzampul, di gɔvnin bɔdi we bin de insay di fɔstɛm Kristian dɛn tɛm bin tɔk bɔt tri eria dɛn we Kristian dɛn fɔ kɔntinyu fɔ tinap tranga wan: (1) bay we dɛn de avɔyd aydɔl wɔship ɛn wɔship Jiova in wangren, (2) bay we dɛn de obe Jiova in lɔ fɔ se blɔd na tin we oli, ɛn (3) bay we dɛn de obe di Baybul in lɔ fɔ  avɔyd mami ɛn dadi biznɛs di we aw Gɔd nɔ want. (Rid Akt 15:​28, 29.) Aw Kristian dɛn tide go ebul fɔ tinap tranga wan na dɛn tri eria dɛn ya?

4. Aw wi de wɔship Jiova in wangren? (Rɛvɛleshɔn 4:​11)

⁴ Wi de avɔyd aydɔl wɔship ɛn wɔship Jiova in wangren. Jiova bin gi lɔ to di Izrɛlayt dɛn se na in wangren dɛn fɔ wɔship. (Dit. 5:​6-10) Ɛn we di Dɛbul bin tɛmt Jizɔs, Jizɔs bin tɔk klia wan se na Jiova in wangren wi fɔ wɔship. (Mat. 4:​8-10) So wi nɔ de wɔship aydɔl dɛn. Dɔn bak, wi nɔ de wɔship mɔtalman. Fɔ ɛgzampul, wi nɔ de trit pɔlitishian, pɔsin we de bifo pan Gɔd biznɛs, pɔsin we de du spɔt we bɔku pipul dɛn sabi, ɔ pɔsin we de akt fim ɔ siŋ myuzik, lɛk se in na gɔd. Wi tinap tranga wan na Jiova in say ɛn de wɔship di wangren pɔsin we “mek ɔltin.”—Rid Rɛvɛleshɔn 4:​11.

5. Wetin mek wi de obe Jiova in lɔ fɔ se layf ɛn blɔd na tin we oli?

⁵ Wi de obe Jiova in lɔ we se layf ɛn blɔd na tin we oli. Wetin mek? Na bikɔs Jiova se blɔd tinap fɔ layf, we na gift we valyu we i gi wi. (Lɛv. 17:​14) Di fɔstɛm we Jiova bin alaw mɔtalman fɔ it animal in flɛsh, i bin tɛl dɛn se dɛn nɔ fɔ it di blɔd. (Jɛn. 9:​4) I bin gi bak dis lɔ insay di Lɔ we i bin gi Mozis fɔ di Izrɛlayt dɛn. (Lɛv. 17:​10) Ɛn i bin dayrɛkt di gɔvnin bɔdi we bin de insay di fɔstɛm Kristian dɛn tɛm fɔ tɛl ɔl Kristian dɛn fɔ “kɔntinyu fɔ avɔyd . . . blɔd.” (Akt 15:​28, 29) Wi de tinap tranga wan fɔ obe dis lɔ we wi de disayd uskayn tritmɛnt wi go gri fɔ tek. b

6. Wetin wi go du fɔ mek wi ebul obe Jiova in lɔ bɔt mami ɛn dadi biznɛs?

⁶ Wi de obe Jiova in lɔ bɔt mami ɛn dadi biznɛs wit ɔl wi at. (Ibru. 13:​4) Apɔsul Pɔl bin advays wi fɔ “dɛdin” wi bɔdi. Dis min se wi fɔ du ɔl wetin wi ebul fɔ avɔyd fɔ fil fɔ du ɛnitin we rɔng. Wi de avɔyd fɔ luk ɔ du ɛnitin we go mek wi du mami ɛn dadi biznɛs di we aw Gɔd nɔ want. (Kol. 3:​5; Job 31:​1) We sɔntin tɛmt wi, wantɛm wantɛm, wi de avɔyd fɔ tink bɔt ɔ du ɛnitin we go ambɔg wi padi biznɛs wit Gɔd.

7. Wetin wi fɔ mekɔp wi maynd fɔ du? Wetin mek?

⁷ Jiova de ɛkspɛkt wi fɔ obe am “wit ɔl [wi] at.” (Rom. 6:​17) Wetin i de tɛl wi fɔ du gud fɔ wi ɔltɛm, ɛn wi nɔ go ebul fɔ chenj in lɔ dɛn. (Ayz. 48:​17, 18; 1 Kɔr. 6:​9, 10) Wi de du wi bɛst fɔ mek Jiova gladi, ɛn wi de falamakata wan pan di man dɛn we rayt di sam buk, we se: “A dɔn mekɔp [mi maynd] se a go . . . obe yu lɔ dɛn te a day.” (Sam 119:​112) Bɔt Setan go tray fɔ mek i nɔ izi fɔ lɛ wi kɔntinyu fɔ tinap tranga wan. Wetin na di tin dɛn we i de yuz?

8. Aw Setan de yuz di sɔfa we pipul dɛn de mek wi sɔfa fɔ mek wi nɔ ebul fɔ tinap tranga wan?

⁸ We dɛn de mek wi sɔfa. Di Dɛbul de mek dɛn bit ɛn prɛzhɔ wi so dat wi nɔ go kɔntinyu fɔ tinap tranga wan. I want “fɔ swɛla” wi so dat i go ambɔg wi padi biznɛs wit Jiova. (1 Pit. 5:​8) Dɛn bin de trɛtin, bit, ɛn kil di fɔstɛm Kristian dɛn bikɔs dɛn bin dɔn mekɔp dɛn maynd fɔ tinap tranga wan. (Akt 5:​27, 28, 40; 7:​54-60) Setan de kɔntinyu fɔ yuz di sɔfa we pipul dɛn de mek wi sɔfa tide. Wi de  si we dis de apin na Rɔshia ɛn ɔda kɔntri dɛn usay pipul dɛn we de agens wi de du bad tin dɛn to Jiova Witnɛs dɛn, ɔ de atak wi brɔda ɛn sista dɛn ɔda we dɛn.

9. Gi ɛgzampul we de sho se wi nid fɔ tek tɛm wit di kɔni kɔni we aw Setan de prɛzhɔ wi.

⁹ Kɔni kɔni we dɛn fɔ prɛzhɔ wi. Apat frɔm di sɔfa we pipul dɛn de mek wi sɔfa, Setan de yuz “kɔni kɔni trik dɛn” bak. (Ɛfi. 6:​11) Tink bɔt wan brɔda we nem Bɔb in ɛgzampul, we dɛn bin gɛt fɔ du siriɔs ɔpreshɔn pan na ɔspitul. I bin tɛl di dɔktɔ dɛn se i nɔ go ɛva gri fɔ tek blɔd. Di dɔktɔ we fɔ du in ɔpreshɔn bin gri fɔ rɛspɛkt wetin i dɔn disayd. Bɔt di nɛt bifo dɛn du di ɔpreshɔn, wan ɔda dɔktɔ bin kam fɛn Bɔb afta we in famili dɔn go na os. I tɛl Bɔb se i go mɔs bi se dɛn nɔ go gi am blɔd, bɔt dɛn go gɛt am na kɔna if nid go de fɔ lɛ dɛn gi am. Sɔntɛm di dɔktɔ bin tink se Bɔb go chenj in maynd we in fambul dɛn nɔ de arawnd. Bɔt Bɔb bin kɔntinyu fɔ tinap tranga wan. I tɔk se i nɔ go gri fɔ tek blɔd ilɛk wetin apin.

10. Wetin mek di we aw mɔtalman de tink na trap? (1 Kɔrintians 3:​19, 20)

¹⁰ Di we aw pipul dɛn we nɔ de obe Jiova in lɔ de tink. If wi de tink lɛk pipul dɛn we nɔ de obe Jiova in lɔ, sɔntɛm wisɛf go bigin fɔ lɛf fɔ fala Jiova ɛn in lɔ dɛn. (Rid 1 Kɔrintians 3:​19, 20.) Bɔku tɛm, “di sɛns na dis wɔl” de mek pipul dɛn nɔ obe Gɔd. Sɔm Kristian dɛn bin de na Pagamɔm ɛn Tayatayra we bin de falamakata pipul dɛn we bin de arawnd dɛn we bin de du mami ɛn dadi biznɛs di we aw Gɔd nɔ want ɛn we bin de wɔship aydɔl dɛn. Jizɔs bin gi strɔng advays to dɛn tu kɔngrigeshɔn dɛn de bikɔs dɛn bin de alaw mami ɛn dadi biznɛs di we aw Gɔd nɔ want. (Rɛv. 2:​14, 20) Tide, pipul dɛn we de arawnd wi de tray fɔ mek wi gri wit di rɔng we aw dɛn de tink. Sɔntɛm wi fambul dɛn ɛn ɔda pipul dɛn we wi sabi go tray fɔ mek wi biliv se wi strikt tumɔs ɛn dɛn go ɛnkɔrej wi fɔ pwɛl Jiova in lɔ. Fɔ ɛgzampul, dɛn go se i nɔ impɔtant fɔ lɛ wi kɔntinyu fɔ bi pipul dɛn we klin na Jiova in yay, ɛn di Baybul in lɔ dɛn bɔt mami ɛn dadi biznɛs dɔn kɔmɔt na stayl.

11. As wi de tinap tranga wan, wetin wi fɔ avɔyd?

¹¹ Sɔntɛm, tɛm dɛn kin de we wi go tink se di dayrɛkshɔn we Jiova de gi wi nɔ rili klia. Sɔntɛm dat go ivin tɛmt wi fɔ lɛ wi du pas “di tin dɛn we dɛn dɔn rayt.” (1 Kɔr. 4:​6) Di bigman dɛn pan Gɔd biznɛs we bin de insay Jizɔs in tɛm bin de sin dis kayn we. Dɛn bin de ad dɛn yon lɔ to di Lɔ we Gɔd bin gi Mozis ɛn mek i nɔ izi fɔ lɛ di kɔmɔn pipul dɛn obe am. (Mat. 23:​4) Jiova de yuz in Wɔd ɛn in ɔganayzeshɔn fɔ tɛl wi klia wan wetin wi fɔ du. Wi nɔ gɛt ɛni rizin fɔ ad to wetin i de tɛl wi. (Prɔv. 3:​5-7) So wi nɔ de du pas wetin de na di Baybul ɔ mek lɔ dɛn fɔ wi kɔmpin Kristian dɛn bɔt tin dɛn we di Baybul nɔ tɛl wi.

12. Aw Setan de yuz “di lay lay we aw pipul dɛn de tink” fɔ ful ɔda pipul dɛn?

¹² Lay lay tɔk dɛn fɔ ful pipul dɛn. Setan de yuz “di lay lay we aw pipul dɛn de tink” ɛn “dɛn pikin pikin tin dɛn na di wɔl” fɔ ful pipul dɛn ɛn mek dɛn nɔ gɛt wanwɔd. (Kol. 2:​8) Insay di fɔstɛm Kristian dɛn tɛm, dɛn tin dɛn ya na bin mɔtalman sɛns, tin dɛn we di Ju dɛn bin de tich we nɔ de na di Skripchɔ, ɛn di tichin fɔ se Kristian dɛn fɔ fala di Lɔ we Gɔd bin gi Mozis. Dɛn tichin dɛn ya bin de ful pipul dɛn bikɔs i bin de mek dɛn nɔ pe atɛnshɔn to di Wan we de gi tru tru sɛns, we na Jiova. Tide, Setan de yuz  tɛlvishɔn, redio, ɛn soshal nɛtwɔk fɔ skata tɔk dɛn we nɔ gɛt wan pruf, ɛn lay lay nyuz ripɔt dɛn we pɔlitishian dɛn kin gi. Bɔku pan dɛn lay lay stori dɛn de bin de di tɛm we di COVID-19 pandɛmik bin de. c Jiova Witnɛs dɛn we bin de lisin to di dayrɛkshɔn we di ɔganayzeshɔn bin de gi nɔ bin de wɔri lɛk aw di wan dɛn we bin de lisin to dɛn lay lay infɔmeshɔn dɛn de bin de wɔri.—Mat. 24:​45.

13. Wetin mek wi fɔ tek tɛm lɛ wi nɔ alaw tin dɛn fɔ tek wi atɛnshɔn?

¹³ Tin dɛn we de tek pɔsin in atɛnshɔn. Wi fɔ kɔntinyu fɔ pe atɛnshɔn pan “di tin dɛn we rili impɔtant.” (Fil. 1:​9, 10) We sɔntin tek wi atɛnshɔn, wi kin west bɔku pan wi tɛm ɛn trɛnk. Di tin dɛn we wi dɔn yus fɔ du, lɛk fɔ it, drink, ɛnjɔy wisɛf, ɛn fɔ wok, go tek wi atɛnshɔn if wi mek dɛn bi di tin we impɔtant na wi layf pas ɔl ɔda tin. (Lyuk 21:​34, 35) Dɔn bak, ɛvride, wi de yɛri ɛn rid bɔt we pipul dɛn de rayɔt, ɛn we pɔlitishian dɛn de agyu. Wi fɔ mek shɔ se wi nɔ alaw dɛn agyumɛnt dɛn de fɔ tek wi atɛnshɔn. If wi nɔ tek tɛm, sɔntɛm wi go bigin sɔpɔt wan pati na wi maynd ɛn at. Setan de yuz ɔl dɛn tin dɛn ya we wi dɔn tɔk bɔt fɔ mek wi nɔ go kɔntinyu fɔ du wetin rayt. Lɛ wi tɔk bɔt wetin wi go du fɔ mek i nɔ ebul wi ɛn fɔ mek wi kɔntinyu fɔ tinap tranga wan.

14. Wetin na wan tin we go ɛp wi fɔ kɔntinyu fɔ tinap tranga wan fɔ sɔpɔt Jiova?

¹⁴ Tink bɔt wetin mek yu gi yu layf to Jiova ɛn baptayz. Yu du dɛn tin dɛn de bikɔs yu want fɔ sɔpɔt Jiova. Mɛmba wetin bin ɛp yu fɔ biliv tranga wan se yu dɔn fɛn di trut. Yu bin lan di tru bɔt Jiova ɛn yu bigin fɔ rɛspɛkt ɛn lɛk am as yu Papa we de na ɛvin. Yu gɛt fet pan am, ɛn dat bin muv yu fɔ ripɛnt. Yu stɔp fɔ du tin dɛn we Jiova et ɛn stat fɔ du tin dɛn we de mek i gladi. Yu fil fayn we yu no se Jiova dɔn fɔgiv yu. (Sam 32:​1, 2) Yu  bin atɛnd Kristian mitin dɛn ɛn bigin fɔ prich to ɔda pipul dɛn bɔt di wɔndaful tin dɛn we yu dɔn lan. As Kristian we dɔn gi in layf to Jiova ɛn baptayz, naw yu de waka na di rod we go mek yu gɛt layf, ɛn yu dɔn mekɔp yu maynd nɔ fɔ kɔmɔt na da rod de.—Mat. 7:​13, 14.

15. Wetin mek fɔ stɔdi ɛn tink gud wan de bɛnifit wi?

¹⁵ Stɔdi Gɔd in Wɔd ɛn tink gud wan bɔt am. Tik go ebul fɔ tinap tranga wan if in rut dɛn de dɔŋ dɔŋ di grɔn. So if wi gɛt strɔng fet pan Jiova, wisɛf go ebul fɔ tinap tranga wan. We tik de gro, in rut dɛn de go dɔŋ mɔ ɛn mɔ ɛn i de prɛd mɔ ɛn mɔ. We wi de stɔdi ɛn tink gud wan, i de mek wi fet strɔng mɔ ɛn mɔ, ɛn i de mek wi biliv mɔ ɛn mɔ se di tin dɛn we Gɔd de tich wi na di bɛst. (Kol. 2:​6, 7) Tink bɔt aw Jiova bin ɛp in savant dɛn trade bay di tin dɛn we i tɛl dɛn, di advays we i advays dɛn, ɛn di protɛkt we i bin de protɛkt dɛn. Fɔ ɛgzampul, Izikɛl bin de rili pe atɛnshɔn we wan enjɛl bin de tek tɛm fɔ mɛzhɔ di tɛmpul we Izikɛl bin si na wan vishɔn. Dis vishɔn bin ɛp Izikɛl fɔ gɛt mɔ fet, ɛn i de ɛp wi fɔ lan impɔtant lɛsin dɛn bɔt aw wi go ebul fɔ fala Jiova in lɔ dɛn fɔ wɔship am di rayt we. d (Izi. 40:​1-4; 43:​10-12) Wisɛf go bɛnifit we wi tek tɛm fɔ stɔdi ɛn tink gud wan bɔt di tin dɛn we de na Gɔd in Wɔd.

16. We Bɔb bin dɔn mekɔp in maynd, aw dat bin ɛp am? (Sam 112:​7)

¹⁶ Mekɔp yu maynd. Kiŋ Devid bin tɔk se i nɔ go ɛva stɔp fɔ lɛk Jiova we i bin siŋ se: “PAPA GƆD, a dɔn mekɔp mi maynd.” (Sam 57:​7) Wisɛf go ebul fɔ mekɔp wi maynd ɛn biliv Jiova tranga wan. (Rid Sam 112:​7.) Tink bɔt aw dis bin ɛp Bɔb, we wi bin dɔn tɔk bɔt. We dɛn bin tɛl am se dɛn go kip blɔd na kɔna if nid go de fɔ lɛ dɛn gi am, i nɔ bin westɛm fɔ tɛl dɛn se if ɛni chans de fɔ lɛ dɛn gi am blɔd, i go kɔmɔt na di ɔspitul wantɛm wantɛm. Leta, Bɔb bin tɔk se, “A nɔ bin  ɛva gɛt dawt bɔt wetin a go du ɛn a nɔ bin wɔri bɔt wetin go apin.”

17. Wetin wi lan frɔm Bɔb in ɛkspiriɛns? (Luk bak di pikchɔ)

¹⁷ Bɔb bin ebul fɔ tinap tranga wan bikɔs i bin dɔn mekɔp in maynd fɔ tinap tranga wan lɔng tɛm bifo dɛn kɛr am go na ɔspitul. Fɔs, i bin want fɔ mek Jiova gladi. Sɛkɔn, i bin tek tɛm stɔdi wetin di Baybul ɛn wi pɔblikeshɔn dɛn se bɔt aw layf ɛn blɔd oli. Tɔd, i bin biliv tranga wan se fɔ fala wetin Jiova de tɛl wi go mek i gɛt bɛnifit we go de sote go. Wisɛf go ebul fɔ mekɔp wi maynd ilɛk us prɔblɛm dɛn mit wi.

18. Aw Berak in ɛgzampul tich wi fɔ biliv Jiova? (Luk di pikchɔ na di frɔnt pej.)

¹⁸ Biliv Jiova. Tink bɔt aw Berak bin ebul fɔ go bifo bikɔs i bin biliv di tin dɛn we Jiova se. Di Izrɛlayt dɛn nɔ bin rɛdi fɔ fɛt wɔ; dɛn nɔ bin ivin gɛt wɛpɔn dɛn. Bɔt Jiova bin tɛl Berak fɔ go ɛn fɛt agens di Kenanayt chif we na Sisera ɛn in sojaman dɛn, we bin gɛt bɔku wɛpɔn dɛn. (Jɔj 5:​8) Di uman prɔfɛt we na Dɛbora bin tɛl Berak fɔ go dɔŋ na di lɛvul grɔn fɔ go mit Sisera ɛn in 900 chariɔt dɛn. Pan ɔl we i nɔ go izi fɔ lɛ di Izrɛlayt dɛn fɛt agens di chariɔt dɛn we fast na di lɛvul grɔn, Berak bin obe. As di sojaman dɛn de rɔndɔŋ Mawnt Tebɔ, Jiova bin mek ebi ebi ren fɔdɔm. Sisera in chariɔt dɛn bin fasin na di pɔtɔ pɔtɔ, ɛn Jiova bin mek Berak win di fɛt. (Jɔj 4:​1-7, 10, 13-16) Semweso, Jiova go mek wi win if wi biliv am ɛn biliv di tin dɛn we i de yuz in ɔganayzeshɔn fɔ tɛl wi.—Dit. 31:​6.

19. Wetin mek yu want fɔ kɔntinyu fɔ tinap tranga wan?

¹⁹ Wi go nid fɔ kɔntinyu fɔ fɛt fɔ mek wi go ebul fɔ tinap tranga wan as lɔng as wi de na dis wɔl we Setan de kɔntrol. (1 Tim. 6:​11, 12; 2 Pit. 3:​17) Lɛ wi mekɔp wi maynd so dat di sɔfa we pipul dɛn de mek wi sɔfa, di kɔni kɔni we dɛn we Setan de yuz fɔ prɛzhɔ wi, di we aw mɔtalman de tink, di lay lay tin dɛn we pipul dɛn de tɔk fɔ ful wi, ɛn di tin dɛn we Setan de yuz fɔ tek wi atɛnshɔn nɔ go shek wi. (Ɛfi. 4:​14) Bifo dat, lɛ wi tinap tranga wan ɛn kɔntinyu fɔ lɛk ɛn obe Jiova ɔltɛm. Dɔn bak, wi nid fɔ bi pipul dɛn we nɔ de pin. Insay di nɛks atikul, wi go tɔk bɔt aw Jiova ɛn Jizɔs na fayn ɛgzampul dɛn we i kam to fɔ bi pɔsin we nɔ de pin.