1. Aw yu de fil bɔt di trut?

 JIOVA in pipul dɛn lɛk di tru tin dɛn we de na Gɔd in Wɔd. Na dat dɔn ɛp wi fɔ gɛt fet. (Rom. 10:17) Wi biliv tranga wan se na Jiova dɔn mek di kɔngrigeshɔn fɔ bi “pila fɔ di trut ɛn we de sɔpɔt di trut.” (1 Tim. 3:15) Ɛn wi gladi fɔ put wisɛf ɔnda “di wan dɛn we de bifo” wi as dɛn de ɛksplen di tru tin dɛn we de insay di Baybul ɛn tɛl wi wetin fɔ du we gri wit wetin Gɔd want.​—Ibru. 13:17.

2. Akɔdin to Jems 5:19, wetin kin apin to wi afta wi lan di trut?

² Bɔt afta wi dɔn gri se dis na di trut ɛn biliv se wi nid Gɔd in ɔganayzeshɔn fɔ gayd wi, wi kin stil kɔmɔt na di trut. (Rid Jems 5:19.) Di tin we Setan want pas ɔl na fɔ mek wi lɛf fɔ biliv di Baybul ɔ stɔp fɔ fala di dayrɛkshɔn we Gɔd in ɔganayzeshɔn de gi wi.​—Ɛfi. 4:14.

3. Wetin mek wi fɔ kɔntinyu fɔ de na di trut? (Ɛfishians 6:13, 14)

³ Rid Ɛfishians 6:13, 14. I nɔ go te igen, Setan go yuz lay lay tɔk dɛn we pawaful fɔ ful ɔl di neshɔn dɛn fɔ mek dɛn go de agens Jiova. (Rɛv. 16:13, 14) Wi fɔ ɛkspɛkt bak se Setan go du ɔl wetin i ebul fɔ ful Jiova in pipul dɛn. (Rɛv. 12:9) So, i impɔtant fɔ mek wi tren wisɛf fɔ sabi di difrɛns bitwin di trut ɛn lay lay tin dɛn ɛn fɔ mek wi go kɔntinyu fɔ obe di trut. (Rom. 6:17; 1 Pit. 1:22) Na  dat go mek wi sev di tɛm fɔ da big big trɔbul!

4. Wetin wi go tɔk bɔt insay dis atikul?

⁴ Insay dis atikul, wi go tɔk bɔt tu kwaliti dɛn we wi nid fɔ gɛt fɔ mek wi go sabi di tru tin dɛn na di Baybul ɛn fɔ mek wi go fala di dayrɛkshɔn we Gɔd in ɔganayzeshɔn de gi wi. Dɔn wi go tɔk bɔt tri tin dɛn we wi go nid fɔ du fɔ mek wi kɔntinyu fɔ de na di trut.

KWALITI DƐN WE WI FƆ GƐT WE GO ƐP WI FƆ NO DI TRUT

5. We wi de fred Jiova, aw dat go ɛp wi fɔ no di trut?

⁵ Fɔ fred Jiova. We wi de fred Jiova di rayt we, dat go mek wi rili lɛk am ɛn wi nɔ go ɛva du ɛnitin we go mek in at pwɛl. Wi rili want fɔ no di difrɛns bitwin wetin rayt ɛn rɔng, bitwin di trut ɛn lay lay tin dɛn, so dat wi go du tin dɛn we go mek Jiova gladi fɔ wi. (Prɔv. 2:3-6; Ibru. 5:14) Wi nɔ fɔ ɛva alaw di fred we wi de fred mɔtalman fɔ pas di we aw wi lɛk Jiova, bikɔs bɔku tɛm di tin dɛn we kin mek mɔtalman gladi nɔ de mek Jiova gladi.

6. Aw di fred we di tɛn Izrɛlayt bigman dɛn bin de fred mɔtalman mek dɛn nɔ tɔk tru?

⁶ If wi de fred mɔtalman pas aw wi de fred Gɔd, dat go mek wi kɔmɔt na di trut. Lɛ wi tɔk bɔt di 12 bigman dɛn we dɛn sɛn fɔ spay di land we Jiova bin prɔmis fɔ gi di Izrɛlayt dɛn. Tɛn pan di spay dɛn bin de fred di Kenanayt dɛn pas di we aw dɛn bin lɛk Jiova. Dɛn bin tɛl dɛn kɔmpin Izrɛlayt dɛn se: “Wi nɔ go ebul fɛt dɛn pipul [dɛn] de, dɛn gɛt trɛnk pas wi.” (Nɔm. 13:27-31) Na tru se na mɔtalman yay, di Kenanayt dɛn bin gɛt trɛnk pas di Izrɛlayt dɛn. Bɔt we dɛn tɔk se di Izrɛlayt dɛn nɔ go ebul fɔ win dɛn ɛnimi dɛn pan fɛt, dat bin sho se dɛn nɔ bin de tink bɔt Jiova. Dɛn tɛn spay dɛn de fɔ dɔn pe atɛnshɔn to wetin Jiova bin want di  Izrɛlayt dɛn fɔ du. Dɛn bin fɔ dɔn tink gud gud wan bak bɔt wetin Jiova bin dɔn du fɔ dɛn jɔs bifo da tɛm de. Dat bin fɔ dɔn ɛp dɛn fɔ no se Jiova gɛt pawa pas di Kenanayt dɛn fa fawe. Jɔshwa ɛn Kelɛb nɔ bin tan lɛk di tɛn spay dɛn we nɔ gɛt fet, bikɔs dɛn bin want fɔ mek Jiova gladi. Dɛn bin tɛl di pipul dɛn se: “If PAPA GƆD [Jiova] gladi wit wetin wi de du, i go mɔs kɛr wi go na di land ɛn gi wi am.”​—Nɔm. 14:6-9.

7. Wetin go ɛp wi fɔ fred Jiova mɔ ɛn mɔ? (Luk bak di pikchɔ.)

⁷ Fɔ mek wi fred Jiova mɔ ɛn mɔ, wi nid fɔ tink bɔt wetin go mek i gladi we wi de disayd fɔ du tin dɛn. (Sam 16:8) As yu de rid di akawnt dɛn na di Baybul, aks yusɛf dis kwɛstyɔn, ‘If na mi dis bin apin to, wetin a bin fɔ disayd fɔ du?’ Fɔ ɛgzampul, imajin se yusɛf tinap de lisin we di tɛn Izrɛlayt bigman dɛn de gi dɛn bad ripɔt. Yu fɔ dɔn biliv di tin dɛn we dɛn tɔk ɛn fred mɔtalman, ɔ fɔ se di lɛk we yu lɛk Jiova ɛn we yu want fɔ mek i gladi fɔ yu bin fɔ pas di fred we yu de fred mɔtalman? Bɔku pan di Izrɛlayt dɛn nɔ bin biliv di tru tin dɛn we Jɔshwa ɛn Kelɛb tɔk. Dat bin mek dɛn lɔs di chans fɔ go na di Prɔmis Land.​—Nɔm. 14:10, 22, 23.

8. Us kwaliti wi fɔ tray tranga wan fɔ gɛt? Wetin mek?

⁸ Fɔ put wisɛf dɔŋ. Na di wan dɛn we de put dɛnsɛf dɔŋ Jiova de ɛp fɔ no di trut. (Mat. 11:25) Wi bin put wisɛf dɔŋ ɛn gri fɔ mek dɛn ɛp wi fɔ lan di trut. (Akt 8:30, 31) Bɔt, wi fɔ tek tɛm mek wi nɔ bi pɔsin we prawd. If wi na pɔsin we prawd, dat go mek wi fil se wetin wi tink impɔtant jɔs lɛk Baybul prinsipul dɛn ɛn di dayrɛkshɔn we Jiova in ɔganayzeshɔn de gi.

9. Wetin go ɛp wi fɔ kɔntinyu fɔ put wisɛf dɔŋ?

⁹ Fɔ mek wi go kɔntinyu fɔ put wisɛf dɔŋ, wi fɔ mɛmba se Jiova pas wi fa fawe. (Sam 8:3, 4) Wi kin pre bak fɔ bi pɔsin we de put insɛf dɔŋ, ɛn we rɛdi fɔ lan. Jiova go ɛp wi fɔ si se di tin dɛn we i de yuz in Wɔd ɛn in ɔganayzeshɔn fɔ tich wi impɔtant pas wetin wi tink. We yu de du yu Baybul ridin, luk fɔ tin dɛn we de sho se Jiova lɛk pipul dɛn we de put dɛnsɛf dɔŋ, ɛn i et di wan dɛn we prawd, ɛn we de tink se dɛn bɛtɛ pas ɔda pipul dɛn. Tray tranga wan bak fɔ kɔntinyu fɔ put yusɛf dɔŋ we yu gɛt asaynmɛnt we go mek yu de oba ɔda pipul dɛn ɔ we go mek ɔda pipul dɛn notis yu.

WETIN GO ƐP WI FƆ KƆNTINYU FƆ DE NA DI TRUT?

10. Udat Jiova bin yuz fɔ dayrɛkt in pipul dɛn ɛn tɛl dɛn wetin fɔ du?

¹⁰ Kɔntinyu fɔ gɛt kɔnfidɛns pan di dayrɛkshɔn we Jiova in ɔganayzeshɔn de gi. Insay di Izrɛlayt dɛn tɛm, Jiova bin yuz Mozis ɛn leta i bin yuz Jɔshwa fɔ tɛl In pipul dɛn wetin fɔ du. (Jɔs. 1:16, 17) Jiova bin de blɛs di Izrɛlayt dɛn we dɛn bin si dɛn man dɛn ya as pipul dɛn we i de yuz. Lɔng tɛm afta dat, we dɛn bin mek di Kristian kɔngrigeshɔn, na di 12 apɔsul dɛn bin de gi dɛn dayrɛkshɔn. (Akt 8:14, 15) Leta, di ɛlda dɛn na Jerusɛlɛm bin ad pan da grup de. We dɛn bin de du di tin dɛn we dɛn fetful man dɛn ya bin de tɛl dɛn, “di kɔngrigeshɔn dɛn kɔntinyu fɔ gɛt fet mɔ ɛn mɔ ɛn bɔku pipul dɛn bin de jɔyn dɛn ɛvride.” (Akt 16:4, 5) Insay wi yon tɛm, Jiova de blɛs wi bak we wi fala di dayrɛkshɔn we in ɔganayzeshɔn de gi. Bɔt aw Jiova go fil if wi nɔ gri fɔ lisin to di wan dɛn we i dɔn pik fɔ de  oba wi? Fɔ ansa da kwɛstyɔn de wi go tɔk bɔt wetin bin apin we di Izrɛlayt dɛn bin de go na di Prɔmis Land.

11. Wetin bin apin to di Izrɛlayt dɛn we bin chalenj Mozis we Gɔd bin pik fɔ lid dɛn? (Luk bak di pikchɔ.)

¹¹ Wan tɛm, we di Izrɛlayt dɛn bin de go na di Prɔmis Land, sɔm bigman dɛn bin chalenj Mozis ɛn dɛn nɔ bin gri fɔ si am as di wan we Gɔd pik fɔ lid dɛn. Dɛn bin tɔk se: “Ɔlman na Izrɛl oli [nɔto jɔs Mozis] ɛn PAPA GƆD [Jiova] de wit dɛnsɛf.” (Nɔm. 16:1-3) Pan ɔl we na tru se “ɔlman na Izrɛl” bin oli na Gɔd in yay, na Mozis Jiova bin dɔn pik fɔ lid in pipul dɛn. (Nɔm. 16:28) So we dɛn bin de tɔk bad bɔt Mozis, na Jiova dɛn bin de tɔk bad bɔt. Dɛn nɔ bin de pe atɛnshɔn pan wetin Jiova want; dɛn bin jɔs pe atɛnshɔn to wetin dɛn want, we na fɔ gɛt mɔ pawa ɛn fɔ mek pipul dɛn sabi dɛn. Gɔd bin kil di wan dɛn we bin de bifo fɔ chalenj Mozis ɛn di bɔku bɔku pipul dɛn we bin jɔyn dɛn. (Nɔm. 16:30-35, 41, 49) Tide sɛf, wi nɔ gɛt wan dawt se Jiova nɔ de gladi fɔ di wan dɛn we nɔ de rɛspɛkt di dayrɛkshɔn we in ɔganayzeshɔn de gi.

12. Wetin mek wi fɔ kɔntinyu fɔ gɛt kɔnfidɛns pan Jiova in ɔganayzeshɔn?

¹² Wi go ebul fɔ kɔntinyu fɔ gɛt kɔnfidɛns pan Jiova in ɔganayzeshɔn. We di wan dɛn we de bifo na Jiova in ɔganayzeshɔn si se dɛn nid fɔ ajɔst di we aw wi ɔndastand wan patikyula tru tin na di Baybul ɔ di we aw wi de wɔship Jiova, dɛn nɔ de westɛm fɔ mek di chenj dɛn we dɛn nid fɔ mek. (Prɔv. 4:18) Dɛn de du dat bikɔs di tin we impɔtant to dɛn pas ɔl na fɔ mek Jiova gladi. Dɔn bak, dɛn de du dɛn bɛst fɔ mek shɔ se di tin dɛn we dɛn de disayd fɔ du gri wit wetin Gɔd in Wɔd se, we na tin we Jiova in pipul dɛn ɔl nid fɔ fala.

13. Wetin na “di gud wɔd dɛn”? Wetin wi fɔ du wit dɛn?

 ¹³ “Di gud wɔd dɛn . . . we [wi] fɔ kɔntinyu fɔ fala.” (2 Tim. 1:13) “Di gud wɔd dɛn” min di tin dɛn we de na di Baybul we Kristian dɛn de lan. (Jɔn 17:17) Dɛn tin dɛn de we wi de lan gɛt fɔ du wit ɔl wetin wi biliv. Jiova in ɔganayzeshɔn dɔn tich wi fɔ kɔntinyu fɔ fala dɛn tru tin dɛn de. Jiova go blɛs wi if wi kɔntinyu fɔ du dat.

14. Aw sɔm Kristian dɛn bin stɔp fɔ fala “di gud wɔd dɛn”?

¹⁴ Wetin go apin if wi nɔ kɔntinyu fɔ fala “di gud wɔd dɛn”? Lɛ wi tɔk bɔt wan ɛgzampul. Insay di fɔstɛm Kristian dɛn tɛm, sɔm Kristian dɛn bin de prɛd lay lay stori se Jiova in de dɔn kam. Sɔntɛm dɛn bin gɛt lɛta we pipul dɛn bin tink se na apɔsul Pɔl rayt, we tɔk dat. Bikɔs sɔm Kristian dɛn na Tɛsalonayka nɔ bin tray fɔ no di tru, dɛn bin biliv di lay lay stori ɛn ivin tɛl ɔda pipul dɛn. Dɛn nɔ bin fɔ ful dɛn if dɛn bin mɛmba di tin dɛn we Pɔl tich dɛn we i bin de wit dɛn. (2 Tɛs. 2:1-5) Pɔl bin advays in brɔda ɛn sista dɛn nɔ fɔ biliv ɔltin we dɛn yɛri. Ɛn fɔ ɛp dɛn fɔ lɛ dɛn nɔ go mek di sem mistek igen, Pɔl bin dɔn in sɛkɔn lɛta to di Kristian dɛn na Tɛsalonayka wit di wɔd dɛn we se: “Mi, Pɔl, de rayt mi gritin wit mi yon an, na sayn na ɛni lɛta; na so a kin rayt.”​—2 Tɛs. 3:17.

15. Aw wi go protɛkt wisɛf frɔm lay lay tɔk dɛn we tan lɛk tru? Gi wan ɛgzampul. (Luk bak di pikchɔ dɛn.)

¹⁵ Wetin wi lan frɔm di tin dɛn we Pɔl bin tɛl di Kristian dɛn na Tɛsalonayka? We wi yɛri sɔntin we nɔ gri wit wetin wi dɔn lan na di Baybul ɔ sɔntin we mek wi shɔk, wi nid fɔ du tin wit sɛns. We di Sɔviɛt Yuniɔn bin de na pawa, wi ɛnimi dɛn bin gi wan lɛta to di brɔda dɛn ɛn tɔk se na wɔl ɛdkwata i kɔmɔt. Insay di lɛta, dɛn bin tɛl sɔm brɔda dɛn fɔ mek dɛn yon ɔganayzeshɔn. I bin tan lɛk se di lɛta na wɔl ɛdkwata i kɔmɔt. Bɔt dɛn nɔ bin ebul fɔ ful di brɔda dɛn we fetful. Dɛn bin si  se di mɛsej we de insay di lɛta nɔ gri wit wetin dɛn bin dɔn lan. Tide, di wan dɛn we de agens di trut kin yuz tin dɛn lɛk di intanɛt ɛn soshal midia fɔ tray fɔ kɔnfyuz wi ɛn mek wi nɔ gɛt wanwɔd. Bifo wi “alaw ɛnibɔdi fɔ kɔnfyuz di we aw [wi] de tink kwik kwik wan,” wi kin protɛkt wisɛf bay we wi tink if wetin wi rid ɔ yɛri gri wit di tru tin dɛn we wi dɔn ɔlrɛdi lan.​—2 Tɛs. 2:2; 1 Jɔn 4:1.

16. Akɔdin to Romans 16:17, 18, wetin wi fɔ du if sɔm Kristian dɛn de tɔk tin dɛn we de agens di trut?

¹⁶ Kɔntinyu fɔ gɛt wanwɔd wit di wan dɛn we nɔ de kɔmɔt biɛn Jiova. Gɔd want wi fɔ gɛt wanwɔd we wi de wɔship am. Wi go kɔntinyu fɔ gɛt wanwɔd wans wi kɔntinyu fɔ de na di trut. Ɛnibɔdi we de tɔk tin dɛn we de agens di trut de mek wanwɔd nɔ de na di kɔngrigeshɔn, so Gɔd de wɔn wi fɔ “avɔyd dɛn pipul dɛn de.” If wi nɔ du dat, wisɛf go bigin biliv tin dɛn we nɔto tru ɛn wi go kɔmɔt biɛn Jiova.​—Rid Romans 16:​17, 18.

17. Us bɛnifit dɛn wi de gɛt we wi no di trut ɛn kɔntinyu fɔ de de?

¹⁷ We wi no di trut ɛn kɔntinyu fɔ de de, wi go gɛt tayt padi biznɛs wit Jiova ɛn wi fet go strɔng. (Ɛfi. 4:15, 16) Setan nɔ go ebul ful wi wit di lay lay tin dɛn we i de tich ɛn di lay lay tɔk dɛn we i de prɛd, ɛn Jiova go protɛkt wi di tɛm fɔ da big big trɔbul. Kɔntinyu fɔ biliv di tin dɛn we na tru, “ɛn di Gɔd we gɛt pis go de wit [yu].”—Fil. 4:8, 9.