1. Frɔm wetin de na Lɛta Fɔ Kɔlɔse 2:​4, 8, aw Setan de tray fɔ kɔntrol di we aw wi de tink?

SETAN want wi fɔ stɔp fɔ lɛk Jiova. Fɔ mek i go ebul fɔ du dat, i de tray fɔ chenj di we aw wi de tink, ɛn mek wi tink di we aw in want wi fɔ tink. Setan de tray fɔ ful wi fɔ lɛ wi fala am bay we i de yuz di tin dɛn we wi lɛk.—Rid Lɛta Fɔ Kɔlɔse 2:​4, 8.

2-3. (a) Wetin mek wi fɔ pe atɛnshɔn to di wɔnin we de na Lɛta Fɔ Kɔlɔse 2:​8? (b) Wetin wi go tɔk bɔt insay dis atikul?

² Yu tink se wi rili de pan siriɔs denja fɔ lɛ Setan nɔ ful wi? Yɛs, wi de pan denja! Mɛmba se Pɔl nɔ bin rayt di wɔnin we de na Lɛta Fɔ Kɔlɔse 2:​8 to di wan dɛn we nɔto Kristian dɛn. Bɔt i bin rayt am to di Kristian dɛn we dɛn bin dɔn anɔynt wit oli spirit. (Kɔl. 1:​2, 5) Da tɛm de, dɛn Kristian dɛn de bin de pan denja fɔ lɛ Setan nɔ ful dɛn, bɔt wi de pan mɔ denja pas dɛn. (1 Kɔr. 10:​12) Wetin mek wi se so? Na bikɔs dɛn dɔn trowe Setan kam dɔŋ na dis wɔl, ɛn i de tray tranga wan fɔ ful Gɔd in fetful savant dɛn. (Rɛv. 12:​9, 12, 17) Dɔn bak, wi de na di tɛm we wikɛd pipul dɛn ɛn dɛn wan we de ful pipul dɛn “de wɔs mɔ ɛn mɔ.”—2 Tim. 3:​1, 13.

³ Insay dis atikul, wi go tɔk bɔt aw Setan de yuz lay lay tin dɛn fɔ tray fɔ chenj di we aw wi de tink. Wi go tɔk bɔt tri pan Setan “in kɔni” kɔni we dɛn we i de yuz. (Ɛfi. 6:​11) Dɔn, insay di atikul afta dis, wi go tɔk bɔt aw wi go chenj ɛni bad we we Setan bin dɔn de mek wi de tink. Bɔt fɔs, lɛ wi tɔk bɔt aw Setan bin ful di Izrɛlayt dɛn afta we dɛn bin go na di land we Gɔd bin dɔn prɔmis dɛn, ɛn si wetin wi go lan frɔm dat.

4-6. Frɔm wetin de na Ditarɔnɔmi 11:​10-15, us nyu we di Izrɛlayt dɛn bin gɛt fɔ lan bɔt fam wok we dɛn bin de na di land we Gɔd bin dɔn prɔmis dɛn?

⁴ Setan bin yuz in kɔni kɔni we dɛn fɔ tɛmt di Izrɛlayt dɛn fɔ wɔship lay lay gɔd dɛn. Aw i bin du dat? Setan bin no se di Izrɛlayt dɛn nid tin fɔ it, so i bin tray fɔ yuz dat fɔ mek dɛn du wetin i want. We di Izrɛlayt dɛn bin go na di land we Gɔd bin dɔn prɔmis dɛn, dɛn bin gɛt fɔ lan nyu we dɛn fɔ plant di tin dɛn we dɛn go it. We dɛn bin de na Ijipt, di Izrɛlayt dɛn bin de yuz di wata we bin de kɔmɔt frɔm di Nayl Riva fɔ wata dɛn plant dɛn. Bɔt dɛn nɔ bin gɛt di Nayl Riva igen na di land we Gɔd bin dɔn prɔmis dɛn, so dɛn bin nid ren ɛn dyu fɔ mek dɛn plant dɛn gro. (Rid Ditarɔnɔmi 11:​10-15; Ayz. 18:​4, 5) Di Izrɛlayt dɛn bin gɛt fɔ lan nyu we dɛn fɔ du dɛn fam wok. Dat nɔ bin izi bikɔs bɔku pan di wan dɛn we bin no bɔt fam wok bin dɔn day na di ɛmti land we pɔsin nɔ go ebul fɔ liv.

⁵ Jiova bin ɛksplen to in pipul dɛn se di we aw dɛn bin de du tin trade dɔn chenj. Dɔn i bin gi dɛn dis wɔnin, we sɔntɛm as yu si am yu go fil se i nɔ gɛt natin fɔ du wit fam wok. I bin wɔn dɛn se: “Lɛ dɛn tek tɛm lɛ dɛn at nɔ lay gi dɛn fɔ lɛ dɛn kɔmɔt biɛn PAPA GƆD go wok fɔ ɛn wɔship ɔda gɔd dɛn.” (Dit. 11:​16, 17) Wetin mek Jiova bin wɔn dɛn se lɛ dɛn nɔ wɔship lay lay gɔd dɛn we i bin de tɔk to dɛn bɔt aw dɛn go lan nyu we dɛn fɔ du dɛn fam wok?

⁶ Jiova bin no se di Izrɛlayt dɛn go want fɔ go to di pegan pipul dɛn we bin de arawnd dɛn fɔ lan sɔm nyu we dɛn fɔ du fam wok. Fɔ tru, dɛn pegan pipul dɛn de bin no bɔku tin bɔt fam wok, ɛn Gɔd in  pipul dɛn go lan sɔm fayn we dɛn fɔ du fam wok frɔm dɛn, bɔt denja bin de. Di Kenanayt fama dɛn bin de wɔship wan lay lay gɔd we nem Beal, ɛn di tin dɛn we dɛn biliv bin de afɛkt di we aw dɛn bin de du tin. Dɛn bin biliv se Beal na in gɛt di skay ɛn na in de gi ren. Jiova nɔ bin want in pipul dɛn fɔ biliv dɛn kayn lay lay tin dɛn de. Bɔt bɔku tɛm, di Izrɛlayt dɛn bin de disayd fɔ wɔship Beal. (Nɔm. 25:​3, 5; Jɔj 2:​13; 1 Kiŋ 18:​18) Naw lɛ wi si aw Setan bin ebul fɔ kɔntrol di Izrɛlayt dɛn.

7. Aw Setan bin tɛst di Izrɛlayt dɛn fet di tɛm we dɛn bin jɔs go na di land we Gɔd bin dɔn prɔmis dɛn?

⁷ Di fɔs tin we Setan bin yuz na wetin di Izrɛlayt dɛn bin want, dat na fɔ lɛ ren kam ɛn sok di grɔn. Ɛni ia, bɛtɛ ren nɔ kin kam na di land we Gɔd bin dɔn prɔmis dɛn frɔm let Epril te Sɛptɛmba. Fɔ lɛ di Izrɛlayt dɛn go ebul fɔ liv ɛn fɔ lɛ dɛn plant dɛn du wɛl, dɛn nid di ren we kin stat fɔ kam insay Ɔktoba. Setan bin ful di Izrɛlayt dɛn bay we i mek dɛn biliv se dɛn plant dɛn go du wɛl if dɛn fala di kɔstɔm dɛn we di pegan pipul dɛn we bin de arawnd dɛn bin gɛt. Dɛn pipul dɛn de bin biliv se dɛn gɔd dɛn go gi dɛn di ren we dɛn want if dɛn wɔship dɛn wan patikyula we. Di wan dɛn we nɔ bin gɛt fet pan Jiova bin biliv se dis na di wangren we we go mek dɛn nɔ gɛt da bad bad dray sizin. So dɛn bin de wɔship di lay lay gɔd we nem Beal.

8. Wetin na di sɛkɔn tin we Setan bin yuz fɔ kɔntrol di Izrɛlayt dɛn? Ɛksplen.

⁸ Di sɛkɔn tin we Setan bin du fɔ ful di Izrɛlayt dɛn, na we i tɛmt dɛn fɔ du mami ɛn dadi biznɛs di we aw Gɔd nɔ want. Di pegan pipul dɛn bin de wɔship dɛn gɔd dɛn bay we dɛn bin de du dɔti dɔti tin dɛn we gɛt fɔ du wit mami ɛn dadi biznɛs di we aw Gɔd nɔ want. Dis dɔti we aw dɛn bin de wɔship na lɛk we di man ɛn di uman dɛn bin de du rare wok na di tɛmpul. Di pegan pipul dɛn bin de si am se na nɔmal tin fɔ lɛ man ɛn man ɔ uman ɛn uman du mami ɛn dadi biznɛs, ɛn dɛn bin de alaw ɔlkayn dɔti we aw pipul dɛn de du mami ɛn dadi biznɛs di we aw Gɔd nɔ want. (Dit. 23:​17, 18; 1 Kiŋ 14:​24) Di pegan pipul dɛn bin biliv se dɛn tin dɛn de we dɛn bin de du bin de mek dɛn gɔd dɛn gladi, ɛn dat go mek dɛn plant dɛn du wɛl. Bɔku pan di Izrɛlayt dɛn bin bigin fɔ kɔle di pegan pipul dɛn kɔstɔm dɛn we gɛt fɔ du wit mami ɛn dadi biznɛs di we aw Gɔd nɔ want, ɛn dat bin mek dɛn disayd fɔ wɔship dɛn lay lay gɔd dɛn. Bɔt fɔ tru, na Setan bin de kɔntrol dɛn.

9. Frɔm wetin de na Ozie 2:​16, 17, aw Setan bin mek di Izrɛlayt dɛn nɔ ebul fɔ si udat Jiova rili bi?

⁹ Di tɔd tin we Setan bin yuz na we i mek di Izrɛlayt dɛn nɔ ebul fɔ si klia wan udat Jiova rili bi. Insay prɔfɛt Jɛrimaya in tɛm, Jiova bin tɔk se lay lay prɔfɛt dɛn bin mek In pipul dɛn fɔgɛt In nem “fɔseka Beal.” (Jɛr. 23:​27) Gɔd in pipul dɛn bin stɔp fɔ yuz Jiova in nem, ɛn dɛn bin de yuz Beal in nem we min “Ona” ɔ “Masta.” Dis tin we dɛn bin du bin mek i nɔ izi fɔ di Izrɛlayt dɛn fɔ no di difrɛns bitwin Jiova ɛn Beal.—Rid Ozie 2:​16, 17.

10. Wetin na di tin dɛn we Setan de yuz tide?

¹⁰ Setan de yuz di sem tin dɛn bak tide. I de kɔntrol pipul dɛn bay we i de yuz di tin dɛn we dɛn want, i de mek dɛn si  mami ɛn dadi biznɛs di we aw Gɔd nɔ want as nɔmal tin, ɛn i de mek pipul dɛn nɔ ebul fɔ si udat Jiova rili bi. Fɔs, wi go tɔk bɔt aw Setan de mek pipul dɛn nɔ ebul fɔ si udat Jiova rili bi.

11. Aw Setan dɔn mek pipul dɛn nɔ ebul fɔ si udat Jiova rili bi?

¹¹ Setan de mek pipul dɛn nɔ ebul fɔ si udat Jiova rili bi. Afta we Jizɔs in apɔsul dɛn day, sɔm pipul dɛn we se dɛn na Kristian dɛn bin stat fɔ tich lay lay tin dɛn. (Akt 20:​29, 30, NW; 2 Tɛs. 2:​3, NW) Dɛn pipul dɛn ya we dɔn lɛf fɔ wɔship Jiova bin stat fɔ mek di pipul dɛn fɔgɛt udat na di wangren tru Gɔd. Fɔ ɛgzampul, dɛn bin stɔp fɔ yuz Gɔd in nem insay dɛn Baybul dɛn ɛn dɛn stat fɔ yuz “Lɔd” ɔ ɔda taytul dɛn fɔ Gɔd in nɛm. We dɛn pul Gɔd in nem ɛn put “Lɔd,” dis dɔn mek i nɔ izi fɔ di wan dɛn we de rid Baybul fɔ si aw Jiova difrɛn frɔm di ɔda “lɔd dɛn” we de na di Skripchɔ dɛn. (1 Kɔr. 8:​5) Dɛn de yuz di sem taytul “Lɔd” fɔ Jiova ɛn fɔ Jizɔs. Dis dɔn mek i nɔ izi fɔ di pipul dɛn fɔ ɔndastand se Jiova ɛn Jizɔs nɔto di sem. (Jɔn 17:​3) Dis kayn we aw pipul dɛn bin kɔnfyus bitwin Jiova ɛn Jizɔs bin mek di lay lay tichin bɔt Triniti stat, we na tichin we nɔ de insay Gɔd in Wɔd. Dis dɔn mek bɔku pipul dɛn biliv se i nɔ pɔsibul fɔ no bɔt Gɔd. Bɔt dat na big big lay!—Akt 17:​27.

12. Wetin na di tin dɛn we lay lay rilijɔn dɛn de alaw? Frɔm wetin de na Lɛta Fɔ Rom 1:​28-31, wetin dɔn apin we dɛn du dat?

¹² Setan de mek pipul dɛn want fɔ du mami ɛn dadi biznɛs di we aw Gɔd nɔ want. Insay di Izrɛlayt dɛn tɛm, Setan bin yuz lay lay rilijɔn fɔ lɛ pipul dɛn du mami ɛn dadi biznɛs di we aw Gɔd nɔ want. Na di sem tin i de du bak tide. Lay lay rilijɔn dɛn de alaw fɔ lɛ pipul dɛn du mami ɛn dadi biznɛs di we aw Gɔd nɔ want ɛn dɛn de si am se na nɔmal tin. Dis dɔn mek bɔku pipul dɛn we se dɛn de wɔship Gɔd dɔn stɔp fɔ obe in lɔ dɛn bɔt mami ɛn dadi biznɛs. Insay di lɛta we di apɔsul Pɔl bin rayt to di Kristian dɛn na Rom, i bin tɔk bɔt wetin kin apin we lay lay rilijɔn de sɔpɔt pipul dɛn we de du mami ɛn dadi biznɛs di we aw Gɔd nɔ want. (Rid Lɛta Fɔ Rom 1:​28-31.) Di “tin we dɛn nɔ fɔ du” na ɔl dɛn tin dɛn we gɛt fɔ du wit mami ɛn dadi biznɛs di  we aw Gɔd nɔ want, ɛn ivin we man ɔ uman de ledɔm wit in kɔmpin. (Rom 1:​24-27, 32; Rɛv. 2:​20) I rili impɔtant fɔ lɛ wi obe di tin dɛn we di Baybul de tich.

13. Wetin na di ɔda tin we Setan de yuz?

¹³ Setan de yuz di tin dɛn we wi want. Na nɔmal tin fɔ lɛ wi want fɔ lan sɔm kayn wok so dat wi go ebul fɔ kia fɔ wisɛf ɛn wi famili. (1 Tim. 5:​8, NW) Bɔku tɛm wi kin ebul fɔ lan dɛn wok dɛn ya bay we wi de go skul ɛn stɔdi gud gud wan. Bɔt wi fɔ tek tɛm. Na bɔku kɔntri dɛn, studɛnt dɛn kin lan fayn fayn tin dɛn na skul we kin ɛp dɛn fɔ gɛt wok, bɔt dɛn kin lan bak di wɔl in sɛns. Fɔ ɛgzampul, di skul de mek studɛnt dɛn de dawt if Gɔd de, ɛn nɔ gɛt wan rɛspɛkt fɔ di Baybul. Dɛn kin tich studɛnt dɛn na skul se ɔl di wan dɛn we gɛt sɛns biliv se ɔltin jɔs kam bay chans. (Rom 1:​21-23) Dɛn kayn tichin dɛn de, de agens Gɔd in yon sɛns.—1 Kɔr. 1:​19-21, NW; 3:​18-20, NW.

14. Wetin mɔtalman sɛns de mek pipul dɛn du?

¹⁴ Mɔtalman sɛns de mek pipul dɛn nɔ de obe Jiova in lɔ dɛn, ɛn dɛn kin ivin de agens in lɔ dɛn. Mɔtalman sɛns de mek pipul dɛn nɔ de gɛt di kwaliti dɛn we di spirit de ɛp wi fɔ gɛt, bifo dat, na “wetin mɔtalman lɛk fɔ du” na in dɛn de du. (Gal. 5:​19-23) I de mek pipul dɛn prawd, ɛn dat de mek pipul dɛn “de [lɛk] dɛnsɛf nɔmɔ.” (2 Tim. 3:​2-4) Dis abit difrɛn frɔm di fayn abit we Gɔd want in savant dɛn fɔ gɛt, dat na fɔ lɛ dɛn ɔmbul. (2 Sam. 22:​28) Sɔm Kristian dɛn we dɔn go na yunivasiti dɔn stɔp fɔ tink lɛk aw Gɔd want dɛn fɔ tink, ɛn dɛn dɔn bigin fɔ tink lɛk aw di pipul dɛn na di wɔl want  dɛn fɔ tink. Lɛ wi si wetin kin apin if wi nɔ avɔyd dis denja.

15-16. Wetin yu lan frɔm wan sista in ɛkspiriɛns?

¹⁵ Wan sista we dɔn de yuz bɔku pan in tɛm fɔ sav Jiova fɔ lɛk 15 ia bin tɔk se: “As baptayz Witnɛs, a bin dɔn de rid ɛn yɛri bɔt di denja dɛn we de na yunivasiti, bɔt stil a nɔ bin lisin to dɛn wɔnin dɛn de. A bin fil se dɛn advays dɛn de nɔto fɔ mi.” Us prɔblɛm dɛn dis sista bin gɛt? I bin tɔk se: “A bin de spɛn bɔku tɛm fɔ stɔdi ɛn a nɔ bin de ivin gɛt tɛm fɔ pre to Jiova lɛk aw a bin dɔn de du bikɔs a bin de si se dat go tek pan mi tɛm, a bin de taya pasmak fɔ ivin sidɔm ɛn tɔk wit ɔda pipul dɛn bɔt di Baybul, ɛn a bin de taya pasmak fɔ pripia gud gud wan fɔ di mitin dɛn. We a kam fɔ no se di bɔku buk we a bin de lan bin de ambɔg mi padi biznɛs wit Jiova, a bin no se a nid fɔ stɔp, ɛn a gladi we a bin du dat.”

¹⁶ Aw bɔku buk lanin bin afɛkt di we aw dis sista bin de tink? I bin tɔk se: “A de shem fɔ tɔk se di buk lanin we a bin disayd fɔ du bin tich mi fɔ pe atɛnshɔn mɔ pan ɔda pipul dɛn fɔlt, mɔ mi brɔda ɛn sista dɛn, a bin de fil se dɛn fɔ du mɔ pas wetin dɛn ebul fɔ du, ɛn a nɔ bin de go nia dɛn. I bin tek lɔng tɛm fɔ lɛ a stɔp fɔ tink dis kayn we. Dis tin we bin apin to mi bin mek a no se i rili bad fɔ lɛ wi nɔ lisin to di wɔnin we wi Papa we de na ɛvin de yuz in ɔganayzeshɔn fɔ gi wi. Jiova no mi gud gud wan pas aw a no misɛf. A fɔ dɔn lisin to am!”

17. (a) Wetin wi fɔ mekɔp wi maynd fɔ du? (b) Wetin wi go tɔk bɔt insay di nɛks atikul?

¹⁷ Yu fɔ mekɔp yu maynd se yu nɔ go ɛva alaw ɛnibɔdi na Setan in wɔl fɔ kɔntrol yu ɛn fɔ ‘mek yu ful ɛn tɔn yu lɛkɛ slev wit in yon mɔtalman sɛns we nɔ min natin.’ Nɔ ɛva alaw Setan fɔ ful yu. (1 Kɔr. 3:​18; 2 Kɔr. 2:​11) Nɔ ɛva alaw Setan fɔ mek yu fɔgɛt udat Jiova bi ɛn aw i want yu fɔ wɔship am. Fala Jiova in lɔ dɛn. Ɛn nɔ alaw Setan fɔ ful yu fɔ lɛ yu nɔ lisin to Jiova in advays. Bɔt wetin yu go du if yu notis se di we aw pipul dɛn de tink na dis wɔl dɔn bigin fɔ afɛkt yu? Di nɛks atikul go sho wi aw Gɔd in Wɔd go ɛp wi fɔ stɔp fɔ tink sɔm kayn we ɛn lɛf abit dɛn we nɔ rili izi fɔ lɛf.—2 Kɔr. 10:​4, 5.