1. Aw Jiova de fil we wan pan in ship dɛn kam bak to am?

INSAY di atikul we bin de bifo dis wan, wi lan se Jiova kɔmpia insɛf to gud shɛpad we de rili kia fɔ ɛni wan pan in ship dɛn. Ɛn i de luk fɔ ɛni wan we lɔs. Jiova bin tɛl di Izrɛlayt dɛn we dɔn lɛf am fɔ se: “Una kam bak to mi ɛn a go kam bak to una.” Wi no se Jiova stil de fil di sem we bikɔs i tɔk se, a “nɔ de chenj.” (Mal. 3:​6, 7, NWT) Jizɔs bin tɔk se Jiova ɛn in enjɛl dɛn kin rili gladi we wan pan In savant dɛn we dɔn lɔs, kam bak to Am.—Lyuk 15:​10, 32.

2. Wetin wi go tɔk bɔt insay dis atikul?

² Lɛ wi tɔk bɔt tri pan Jizɔs in ɛgzampul dɛn we go tich wi impɔtant lɛsin dɛn bɔt aw wi go ɛp di wan dɛn we dɔn lɛf fɔ sav Jiova. Wi go tɔk bɔt sɔm patikyula kwaliti dɛn we wi nid fɔ mek wi go ɛp ship dɛn we dɔn lɔs, fɔ kam bak to Jiova. Ɛn wi go lan aw wi go rili gladi we wi wok tranga wan fɔ ɛp inaktiv wan dɛn fɔ kam bak.

3-4. Wetin mek di uman we Lyuk 15:​8-10 tɔk bɔt, bin tek tɛm luk fɔ in drakma kɔyn we bin dɔn lɔs?

³ Wi nid fɔ tray tranga wan fɔ fɛn di wan dɛn we want fɔ kam to Jiova. Insay di Gɔspɛl we Lyuk bin rayt, Jizɔs bin tɔk bɔt aw wan uman bin de luk fɔ wan drakma kɔyn we i bin lɔs we rili gɛt valyu. Di impɔtant say na dis stori na di we aw di uman luk fɔ di kɔyn.—Rid Lyuk 15:​8-10.

⁴ Jizɔs bin sho aw di uman bin fil we i fɛn di drakma kɔyn we gɛt valyu we bin lɔs. Insay Jizɔs in tɛm, sɔm mama dɛn kin gi dɛn galpikin tɛn drakman kɔyn dɛn di de we dɛn de mared. I go bi se dis kɔyn na wan pan di kɔyn dɛn we in mama bin gi am. Di uman tink se di kɔyn dɔn fɔdɔm na grɔn. So i bin layt lamp ɛn luk luk fɔ am, bɔt i nɔ si natin. I go bi se in lamp nɔ bin brayt bɛtɛ fɔ mek i ebul fɔ si di smɔl silva kɔyn. So i bin tek tɛm swip  di wan ol os. Pan di dɔti we i gɛda na de i si di drakma kɔyn de shayn. I bin rili fil fayn we i si am! I kɔl in padi dɛn ɛn in neba dɛn fɔ tɛl dɛn di gud nyuz.

5. Wetin mek i nɔ kin izi fɔ fɛn di wan dɛn we dɔn lɛf di kɔngrigeshɔn?

⁵ Wi dɔn si frɔm Jizɔs in stori se wi nid fɔ wok tranga wan fɔ fɛn sɔntin we dɔn lɔs. Semweso, wi kin nid fɔ wok tranga wan fɔ fɛn di wan dɛn dɔn lɛf di kɔngrigeshɔn. Sɔntɛm i go dɔn tek lɔng tɛm we dɛn dɔn stɔp fɔ kam mitin ɛn prich wit wi. I go bi se dɛn go dɔn muf go difrɛn say usay di brɔda ɛn sista dɛn we de de nɔ sabi dɛn. Bɔt wi shɔ se rayt naw sɔm pan dɛn inaktiv wan dɛn de rili want fɔ kam bak to Jiova. Dɛn want fɔ sav Jiova wit dɛn brɔda ɛn sista dɛn, bɔt dɛn nɔ go ebul du dat if wi nɔ ɛp dɛn.

6. Aw wi ɔl na di kɔngrigeshɔn kin luk fɔ inaktiv wan dɛn?

⁶ Udat dɛn fɔ luk fɔ dɛn inaktiv wan dɛn? Wi ɔl nid fɔ luk fɔ dɛn; di ɛlda dɛn, di payɔnia dɛn, dɛn fambul dɛn, ɛn di kɔngrigeshɔn pɔblisha dɛn kin ɛp fɔ du dat. Yu gɛt padi ɔ fambul we dɔn inaktiv? We yu de prich frɔm os-to-os ɔ we yu de du pɔblik prichin, yu dɔn ɛva mit pɔsin we inaktiv? If dis pɔsin gri fɔ gi yu in adrɛs, tɛl di pɔsin se if i go want mek dɛn kam fɛn am, yu go gladi fɔ gi in adrɛs ɔ fɔn nɔmba to di ɛlda dɛn na yu kɔngrigeshɔn.

7. Wetin yu lan frɔm wetin wan ɛlda we nem Tɔmɔs bin tɔk?

⁷ Us patikyula tin dɛn we di ɛlda dɛn nid fɔ du fɔ fɛn di wan dɛn we want fɔ kam bak to Jiova? Tɔmɔs * na wan ɛlda we de na Spen ɛn i dɔn ɛp pas 40 brɔda ɛn sista dɛn fɔ kam bak na di kɔngrigeshɔn. I bin tɔk se: “Fɔs, a aks difrɛn brɔda ɛn sista dɛn if dɛn no usay dɛn inaktiv wan dɛn ya de naw. Ɔ a kin aks di pɔblisha dɛn if dɛn mɛmba ɛnibɔdi we nɔ de atɛnd mitin igen. Bɔku pan di brɔda ɛn sista dɛn na di kɔngrigeshɔn kin rili gladi fɔ ɛp. Leta, we a go fɛn ɛni brɔda ɔ sista we inaktiv, a kin aks aw dɛn pikin dɛn ɛn ɔda fambul dɛn de du. Sɔm pan di inaktiv wan dɛn bin de kam wit dɛn pikin dɛn na mitin, ɛn dɛn pikin dɛn de bin dɔn bi pɔblisha dɛn trade. Wi nid fɔ ɛp dɛnsɛf fɔ kam bak to Jiova.”

8. Frɔm wetin de na Lyuk 15:​17-24 we tɔk bɔt di bɔbɔ we kɔmɔt na os, aw di papa bin trit in pikin we bin ripɛnt?

⁸ Us kwaliti dɛn wi fɔ gɛt if wi want fɔ ɛp di wan dɛn we want fɔ kam bak to Jiova? Notis sɔm lɛsin dɛn we wi kin lan frɔm Jizɔs in stori bɔt di bɔbɔ we lɛf in os. (Rid Lyuk 15:​17-24.) Jizɔs bin ɛksplen aw di bɔbɔ bin rigrɛt di bad tin dɛn we i bin dɔn du ɛn i disayd fɔ kam bak na os. Di papa bin rɔn go mit am ɛn ɔg am, ɛn mek i no se i lɛk am. Di bɔbɔ in kɔnshɛns bin de mɔna am ɛn i fil se i nɔ fit fɔ mek dɛn trit am lɛk pikin. Di papa bin sɔri fɔ in pikin we in pikin bin de tɛl am aw i de fil. Di papa bin du sɔm tin dɛn fɔ in pikin we sho se i wɛlkɔm bak na os. I nɔ wɛlkɔm am as savant, bɔt i wɛlkɔm am as in pikin we i lɛk. Fɔ sho se i lɛk in pikin we dɔn ripɛnt, di papa bin arenj fɔ mek big pati ɛn gi am fayn klos dɛn.

9. Us kwaliti dɛn wi nid fɔ gɛt fɔ mek wi go ebul fɔ ɛp inaktiv wan dɛn fɔ kam bak to Jiova? (Luk di bɔks we gɛt di taytul “ Aw fɔ Ɛp di Wan dɛn We Want fɔ Kam Bak?”)

 ⁹ Jiova tan lɛk di papa na da stori de. I lɛk wi brɔda ɛn sista dɛn we inaktiv, ɛn i want mek dɛn kam bak to am. Wi go ɛp dɛn fɔ kam bak, bay we wi falamakata Jiova. Dis min se wi go nid fɔ peshɛnt, gɛt sɔri-at, ɛn gɛt lɔv. Wetin mek wi nid fɔ sho dɛn patikyula kwaliti dɛn de? Aw wi go du dat?

10. Wetin mek wi nid fɔ peshɛnt we wi de ɛp pɔsin we want fɔ kam bak to Jiova?

¹⁰ Wi nid fɔ peshɛnt bikɔs i kin tek tɛm fɔ mek pɔsin kam bak to Jiova. Bɔku pan di wan dɛn we bin inaktiv trade, bin tɔk se na we di ɛlda dɛn ɛn ɔda brɔda ɛn sista dɛn na di kɔngrigeshɔn bin kɔntinyu fɔ go fɛn dɛn, nain mek dɛn kam bak to Jiova. Wan sista we nem Nansi we de na Eshia, bin tɔk se: “Wan mi tayt padi na di kɔngrigeshɔn bin rili ɛp mi. I lɛk mi lɛk fɔ se mi na in big sista. I bin de mɛmba mi bɔt di gud tɛm dɛn we wi bin de ɛnjɔy trade. I kin tek tɛm lisin we a de tɛl am aw a de fil, ɛn i nɔ de fred fɔ advays mi. I bin rili sho se in na gud padi we rɛdi fɔ ɛp ɛnitɛm.”

11. Wetin mek wi nid sɔri-at we wi de ɛp pɔsin we vɛks?

¹¹ Sɔri-at tan lɛk pawaful mɛrɛsin we kin ɛp pɔsin we vɛks, fɔ fil fayn. Sɔm inaktiv wan dɛn go dɔn de fil bad fɔ lɔng tɛm bikɔs sɔmbɔdi na di kɔngrigeshɔn du dɛn bad. Bikɔs ɔf dat,  dɛn nɔ want fɔ kam bak to Jiova. Sɔntɛm, sɔm go de tink se dɛn nɔ trit dɛn fayn. I go bi se dɛn nid sɔmbɔdi we go lisin to dɛn, ɛn ɔndastand aw dɛn de fil. (Jems 1:​19) Maria we bin inaktiv trade bin tɔk se: “A nid pɔsin fɔ lisin to mi, kɔrej mi, ɛn gi mi gud advays.”

12. Gi wan ɛgzampul fɔ sho aw Jiova in lɔv tan lɛk rop?

¹² Di Baybul se Jiova lɛk in pipul dɛn jɔs lɛk rop. Wetin mek wi go se Gɔd in lɔv tan lɛk rop? Lɛ wi tɔk bɔt dis ɛgzampul: Imajin se yu de lɛf na wata we rɔf ɛn sɔmbɔdi sɛn layf jakɛt fɔ yu. Fɔ tru, yu go gladi fɔ we da pɔsin de ɛp yu bikɔs i go izi fɔ yu fɔ flot. Bɔt nɔto layf jakɛt nɔmɔ go ɛp yu fɔ sev. Di wata kol, ɛn yu nɔ go ebul fɔ liv pas bot kam ɛp yu. Yu go nid pɔsin fɔ sɛn rop fɔ drɔ yu kam to di bot. We di Izrɛlayt dɛn bin kɔmɔt biɛn Jiova, i tɔk se: “A bin kɔntinyu fɔ drɔ dɛn . . . wit rop we na lɔv.” (Osia 11:​4, NWT) Na di sem we Gɔd de fil bɔt di wan dɛn we dɔn lɛf fɔ sav am, ɛn we gɛt bɔku prɔblɛm dɛn ɛn tin dɛn we de mek dɛn wɔri. I want mek dɛn no se i lɛk dɛn ɛn i want fɔ ɛp dɛn fɔ kam bak. Ɛn Jiova kin yuz yu fɔ mek dɛn no se i lɛk dɛn.

13. Gi wan ɛgzampul we de sho wetin mek i impɔtant fɔ sho se wi lɛk di wan dɛn we inaktiv.

¹³ I impɔtant fɔ mek di wan dɛn we inaktiv no se Jiova lɛk dɛn ɛn wisɛf lɛk dɛn. Pablo we wi bin dɔn tɔk bɔt na di atikul we de bifo dis wan, bin inaktiv fɔ lɛk 30 ia. I bin se: “Wan mɔnin as a de  kɔmɔt na mi os, wan nays ol sista bin mitɔp mi ɛn tɔk to mi fayn. A bigin fɔ kray lɛk pikin. A tɛl am se i tan lɛk na Jiova sɛn am fɔ kam tɔk to mi. Na da tɛm de a bin disayd fɔ kam bak to Jiova.”

14. Akɔdin to di stori we de na Lyuk 15:​4, 5, wetin di shɛpad du we i fɛn di ship we lɔs?

¹⁴ Wi nid fɔ kɔntinyu fɔ ɛnkɔrej di wan dɛn we inaktiv. Lɛk di bɔbɔ we bin kɔmɔt na os insay Jizɔs in stori, di wan dɛn we inaktiv dɛn at kin pwɛl ɛn i kin tek lɔng tɛm fɔ mek dɛn fil fayn. Ɛn bikɔs ɔf wetin dɔn apin to dɛn na Setan in wɔl, dɛn nɔ kin gɛt bɛtɛ padi biznɛs wit Jiova. Wi nid fɔ ɛp dɛn fɔ gɛt fet pan Jiova. Insay di stori bɔt di ship we lɔs, Jizɔs bin se di shɛpad bin put di ship na in sholda ɛn kɛr am go bak usay in kɔmpin dɛn de. Di shɛpad dɔn ɔlrɛdi spɛn bɔku tɛm ɛn trɛnk fɔ fɛn di ship we lɔs. Bɔt i no se i go nid fɔ tot di ship fɔ kɛr am go bak usay in kɔmpin dɛn de bikɔs di ship nɔ go gɛt trɛnk fɔ go bak fɔ insɛf.—Rid Lyuk 15:​4, 5.

15. Aw wi go sɔpɔt di wan dɛn we wik we want fɔ kam bak to Jiova? (Luk di bɔks we gɛt di taytul “ Wan Fayn Buk we Go Ɛp.”)

¹⁵ Wi go nid fɔ spɛn bɔku tɛm ɛn trɛnk fɔ ɛp di wan dɛn we inaktiv fɔ fɛt agens wetin de mek i nɔ izi fɔ mek dɛn kam bak to Jiova. Bɔt wit Jiova in spirit, in Wɔd, ɛn di buk ɛn magazin dɛn we wi de gɛt na di kɔngrigeshɔn, wi go ebul fɔ ɛp dɛn fɔ gɛt tayt padi biznɛs wit Jiova bak. (Rom. 15:​1) Aw wi go du dat? Wan ɛkspiriɛns ɛlda bin tɔk se: “Bɔku pan  di wan dɛn we inaktiv kin nid fɔ stɔdi we dɛn disayd fɔ kam bak to Jiova.” * So if dɛn tɛl yu fɔ stɔdi wit pɔsin we inaktiv, yu nɔ tink se yu fɔ gladi fɔ du dat? Di ɛlda tɔk bak se: “If na yu de kɔndɔkt di stɔdi wit di pɔsin, i go fayn fɔ mek yu bi gud padi ɛn bi pɔsin we i go ebul fɔ tɛl in bɛlɛ wɔd.”

16. Aw wi no se di enjɛl dɛn kin ɛp wi?

¹⁶ Wi gɛt bɔku ɛkpiriɛns dɛn we dɔn sho se di enjɛl dɛn de ɛp wi fɔ fɛn inaktiv wan dɛn we want fɔ kam bak to Jiova. (Rɛv. 14:​6) Fɔ ɛgzampul, wan inaktiv brɔda we nem Silvio, we kɔmɔt na Ɛkwedo, bin beg Jiova fɔ sɛn pɔsin fɔ ɛp am so dat i go kam bak na di kɔngrigeshɔn. As i bin de pre, i yɛri nak na in domɔt. Da tɛm de we dɛn kam fɛn am, dɛn bin gladi fɔ bigin fɔ ɛp am.

17. Aw wi kin fil we wi ɛp inaktiv wan dɛn fɔ kam bak to Jiova?

¹⁷ Wi go rili gladi we wi ɛp di wan dɛn we inaktiv fɔ kam bak to Jiova. Wan payɔnia brɔda we nem Salvedɔ, kin lɛk fɔ ɛp inaktiv wan dɛn. I bin tɔk se: “Sɔntɛnde, we a kin tink bɔt di inaktiv wan dɛn we dɔn kam bak to Jiova, a nɔ kin ebul fɔ stɔp misɛf mek a nɔ kray bikɔs a rili gladi. A kin rili gladi fɔ si se Jiova dɔn sev wan pan in ship dɛn frɔm Setan in wɔl ɛn a tek pat fɔ ɛp Am fɔ du dat.”—Akt 20:​35.

18. If yu na pɔsin we inaktiv, wetin yu fɔ mɛmba?

¹⁸ If yu na pɔsin we inaktiv, na fɔ mɛmba se Jiova stil lɛk yu. I want mek yu kam bak to am. Yu go nid fɔ wok tranga wan fɔ kam bak to am. Bɔt lɛk di papa na Jizɔs in stori, Jiova de wet fɔ mek yu kam bak ɛn i go gladi fɔ wɛlkɔm yu.