1. Wetin mek Jiova kɔmpia insɛf to kombra?

INSAY prɔfɛt Ayzaya in tɛm, Jiova bin aks wan kwɛstyɔn fɔ se: “Kombra go fɔgɛt in pikin we de sɔk bɔbi?” Gɔd bin tɛl in pipul dɛn se: “Dɛn sɛf kin fɔgɛt, bɔt mi, nɔ go fɔgɛt yu.” (Ayz. 49:​15) Nɔto ɔltɛm Jiova kin kɔmpia insɛf to mama. Bɔt dis tɛm, i bin du dat. Jiova bin kɔmpia di we aw i rili lɛk in savant dɛn to di we aw mama ɛn pikin kin lɛk dɛnsɛf. Bɔku mama dɛn go ɔndastand wetin wan sista we nem Jasmin bin tɔk we i se: “We yu de sɔkul yu pikin, una de gɛt wan kayn spɛshal padi biznɛs we go de te go.”

2. Aw Jiova de fil we wan pan in pikin dɛn lɛf fɔ sav am?

² Jiova kin notis we ivin wan pan in pikin dɛn lɛf fɔ kam mitin, ɛn lɛf fɔ prich wit di kɔngrigeshɔn. So i go mɔs de fil bad we bɔku bɔku pan in savant dɛn kin bi inaktiv * pɔblisha dɛn ɛni ia.

3. Wetin Jiova want?

³ Bɔku pan dɛn wi brɔda ɛn sista dɛn ya we bin inaktiv, kin kam bak na di kɔngrigeshɔn ɛn wi kin gladi fɔ wɛlkɔm dɛn! Jiova want mek dɛn kam bak ɛn wisɛf want dat. (1 Pit. 2:​25) Aw wi go ɛp dɛn fɔ kam bak? Bifo wi ansa da kwɛstyɔn de, i go fayn fɔ mek wi no wetin mek sɔm pan dɛn dɔn lɛf fɔ atɛnd mitin dɛn ɛn prich di gud nyuz.

4. Wetin kin apin to sɔm pan wi brɔda ɛn sista dɛn we de spɛn bɔku tɛm pan dɛn wok?

⁴ Sɔm pan wi brɔda ɛn sista dɛn dɔn alaw dɛn wok fɔ bi impɔtant pas ɔltin na dɛn layf. Wan brɔda we nem Ɔŋ * we de na Eshia tɔk se: “A bin de spɛn bɔku tɛm ɛn trɛnk pan mi wok. A bin ful misɛf ɛn tink se if a gɛt bɔku mɔni, a go ebul fɔ sav Jiova fayn. So a bin de spɛn mɔ tɛm fɔ wok. A bigin fɔ mis bɔku mitin dɛn te a stɔp fɔ atɛnd di mitin dɛn. I tan lɛk Setan de yuz di wɔl fɔ mek pipul dɛn lɛf fɔ sav Gɔd.”

5. Aw difrɛn difrɛn prɔblɛm dɛn bin afɛkt wan sista?

⁵ Sɔm brɔda ɛn sista dɛn kin gɛt bɔku prɔblɛm dɛn we kin mek dɛn at pwɛl. An we na wan mama na Briten we gɛt fayv pikin dɛn tɔk se: “We a bɔn mi sɛkɔn bɔbɔ, i bin gɛt bɔku prɔblɛm dɛn. Leta, wan pan mi galpikin bin disfɛloship, ɛn mi fɔs bɔbɔ bin gɛt ed prɔblɛm. Mi at bin rili pwɛl, so dat bin mek a stɔp fɔ atɛnd mitin ɛn fɔ go fil savis. Smɔl smɔl, a bi inaktiv pɔblisha.” Wi rili de fil am fɔ An ɛn in famili, ɛn ɔda brɔda ɛn sista dɛn we de gɛt da kayn prɔblɛm de.

6. Wetin mek pɔsin kin lɛf Jiova in pipul dɛn if i nɔ fala wetin de na Koloshians 3:​13, NWT?

⁶ Rid Koloshians 3:​13, NWT. Sɔm pan Jiova in savant dɛn kin vɛks bikɔs ɔda brɔda ɔ sista na di kɔngrigeshɔn du dɛn sɔntin. Di apɔsul Pɔl bin no se sɔntɛnde wi kin gɛt gud “rizin fɔ vɛks pan” wi brɔda ɔ sista. I go bi se sɔntɛm dɛn nɔ trit wi fia wan. If wi nɔ tek tɛm wi go vɛks ɛn kip tin na wi at. We pɔsin vɛks, dat kin mek smɔl smɔl i lɛf Jiova in pipul dɛn. Lɛ wi tɔk bɔt wan brɔda we nem Pablo, we de na Sawt Amɛrika. Pɔsin bin lay pan am se i du bad tin ɛn bikɔs ɔf dat, di ɛlda dɛn bin mek i lɛf fɔ du di wok dɛn we i bin de du na di kɔngrigeshɔn. Wetin Pablo bin du? I se: “A bin vɛks, ɛn smɔl smɔl a bin lɛf di kɔngrigeshɔn.”

7. Aw gilti kɔnshɛns kin afɛkt pɔsin?

⁷ Ɔ gilti kɔnshɛns kin mek pɔsin we bin dɔn kɔmit siriɔs sin fil se i nɔ fit fɔ mek Gɔd lɛk am igen. Ivin we di pɔsin kin dɔn ripɛnt ɛn Jiova dɔn fɔgiv am, sɔntɛm, i kin stil fil se i nɔ fit fɔ bi wan pan Gɔd in pipul dɛn. Na so wan brɔda we nem Fransiko bin fil. I se: “Dɛn bin ripruv mi bikɔs a du mami ɛn dadi biznɛs di we aw Gɔd nɔ want. Pan ɔl we fɔs a bin kɔntinyu fɔ atɛnd mitin, mi at bin pwɛl ɛn a fil lɛk a nɔ fit fɔ de wit Jiova in pipul dɛn. Mi kɔnshɛns bin de ambɔg mi ɛn a tɛl misɛf se Jiova nɔ fɔgiv mi yet. Smɔl smɔl, a bin stɔp fɔ prich ɛn go mitin.” Aw yu de fil bɔt brɔda ɛn sista dɛn we dɔn gɛt dɛn difrɛn prɔblɛm dɛn we wi dɔn tɔk bɔt? Yu de sɔri fɔ dɛn? Aw Jiova de fil bɔt dɛn?

8. Yu tink se Jiova de fɔgɛt di wan dɛn we bin dɔn de sav am? Ɛksplen.

⁸ Jiova nɔ de fɔgɛt di wan dɛn we bin dɔn de sav am bɔt we dɔn stɔp fɔ sɔm tɛm ɛn i nɔ de fɔgɛt di wok we dɛn bin dɔn du fɔ am. (Ibru 6:​10) Prɔfɛt Ayzaya bin rayt wan fayn ɛgzampul fɔ sho aw Jiova bisin bɔt in pipul dɛn. I bin rayt se: “I go fid in ship dɛm lɛk shɛpad, i go gɛda di ship pikin dɛn nain an, i go  bɔn dɛm nain buzɔm.” (Ayz. 40:​11) Aw Jiova we na di Shɛpad we pas ɔl kin fil we wan pan in ship dɛn lɔs? Jizɔs bin sho wi aw Jiova de fil we i aks in disaypul dɛn se: “Una tɛl mi, if wan man gɛt wan ɔndrɛd ship, ɛn wan pan di ship dɛn lɔs, di man nɔ go lɛf di naynti-nayn ship na di il, ɛn tɔn bak go luk fɔ di wan ship we lɔs? We di man fɛn di ship, a de tɛl una se, i go gladi fɔ am pas aw i gladi fɔ di naynti-nayn ship we nɔ lɔs wande.”—Mat. 18:​12, 13.

9. Aw gud shɛpad dɛn bin de trit dɛn ship dɛn insay di tɛm we dɛn bin de rayt di Baybul? (Luk di pikchɔ na di frɔnt pej.)

⁹ Wetin mek wi go kɔmpia Jiova to shɛpad? Na bikɔs gud shɛpad we bin de di tɛm we dɛn bin de rayt di Baybul, bin rili bisin bɔt in ship. Fɔ ɛgzampul, Devid bin fɛt wan layɔn ɛn wan bia fɔ protɛkt in ship dɛn. (1 Sam. 17:​34, 35) Pɔsin we na gud shɛpad go mɔs notis ilɛk na wan ship lɔs. (Jɔn 10:​3, 14) Da kayn shɛpad de go lɛf in 99 ship dɛn na di say we dɛn kin slip, ɔ i lɛf dɛn to in kɔmpin shɛpad dɛn, ɛn go fɛn di wan we lɔs. Jizɔs bin yuz da stori de fɔ tich wi wan impɔtant tin fɔ se: Mi “Papa we de na ɛvin nɔ want mek ɛni wan pan dɛn lili pikin, . . . lɔs.”—Mat. 18:​14.

10. Akɔdin to Izikɛl 34:​11-16, wetin Jiova bin prɔmis se i go du fɔ in ship we lɔs?

¹⁰ Jiova lɛk wi ɔl, ivin di “lili” wan dɛn we dɔn kɔmɔt usay dɛn kɔmpin dɛn de. Gɔd bin yuz prɔfɛt Izikɛl fɔ prɔmis se i go fɛn in ship we dɔn lɔs, ɛn ɛp am fɔ gɛt tayt padi biznɛs wit am bak. Ɛn i sho difrɛn difrɛn tin dɛn we i go du fɔ sev in ship dɛn. Di tin dɛn we i go du fiba wetin ɛni Izrɛlayt shɛpad go du if in ship lɔs. (Rid Izikɛl 34:​11-16.) Fɔs, di shɛpad go fɛn di ship, ɛn i go nid bɔku tɛm ɛn trɛnk fɔ du dat. Dɔn, we i fɛn di ship we lɔs, i de kam wit am bak usay di ɔda wan dɛn  de. If di ship wund ɔ i nɔ it yet, di shɛpad go ɛp am; i go bandej in wund dɛn, i go tot am, ɛn i go fid am. Ɛlda dɛn we na shɛpad fɔ ‘Gɔd in ship dɛn’ nid fɔ du di sem tin dɛn fɔ ɛp ɛnibɔdi we dɔn lɛf di kɔngrigeshɔn. (1 Pit. 5:​2, 3) Di Ɛlda dɛn fɔ fɛn dɛn, ɛp dɛn fɔ kam bak na di kɔngrigeshɔn, ɛn sho se dɛn lɛk dɛn bay we dɛn ɛp dɛn fɔ bi Jiova in padi. *

11. Wetin gud shɛpad kin ɔndastand?

¹¹ Gud shɛpad ɔndastand se ship kin lɔs. Ɛn if di ship kɔmɔt usay in kɔmpin dɛn de, di shɛpad nɔ de trit am bad. Lɛ wi tɔk bɔt aw Gɔd bin ɛp sɔm pan in savant dɛn we nɔ bin du wetin i tɛl dɛn bikɔs dɛn bin de fred ɔ dɛn at pwɛl.

12. Aw Jiova bin trit Jona?

¹² Di prɔfɛt Jona bin rɔnawe frɔm di wok we Jiova bin gi am. Bɔt pan ɔl dat, Jiova nɔ bin giv-ɔp pan Jona. Lɛk gud shɛpad, Jiova bin sev am ɛn ɛp am fɔ gɛt di trɛnk we i nid fɔ du in wok. (Jona 2:​7; 3:​1, 2) Leta, Gɔd bin yuz wan plant fɔ ɛp Jona fɔ ɔndastand se i valyu ɛni mɔtalman in layf. (Jona 4:​10, 11) Wetin na di lɛsin? Ɛlda dɛn nɔ fɔ kwik fɔ giv-ɔp pan di wan dɛn we dɔn inaktiv. Bifo dat, di ɛlda dɛn fɔ tray fɔ ɔndastand wetin mek di pɔsin lɛf di kɔngrigeshɔn. Ɛn we di ship kam bak to Jiova, di ɛlda dɛn fɔ kɔntinyu fɔ sho se dɛn lɛk am ɛn bisin bɔt am.

13. Wetin Jiova bin du bɔt wetin di wan we rayt Sam 73 bin tɔk?

¹³ Di wan we rayt Sam 73 in at bin pwɛl we i si aw di wikɛd wan dɛn de go bifo. I bin de dawt if ɛni bɛnifit de fɔ du wetin Gɔd want. (Sam 73:​12, 13, 16) Wetin Jiova bin du? I nɔ bin kɔndɛm am. Infakt, Gɔd mek dɛn rayt in wɔd dɛn insay di Baybul. Smɔl smɔl, i bin kam fɔ ɔndastand se natin nɔ de we bɛtɛ pas fɔ gɛt tayt padi biznɛs wit  Jiova. (Sam 73:​23, 24, 26, 28) Wetin na di lɛsin? Ɛlda dɛn nɔ fɔ kwik fɔ jɔj di wan dɛn we de dawt if bɛnifit de fɔ sav Jiova. Di ɛlda dɛn nɔ fɔ kɔndɛm dɛn bifo dat, dɛn fɔ tray fɔ ɔndastand wetin mek dɛn de tɔk ɛn du tin di we aw dɛn de du am. Na we di ɛlda dɛn du dat, nain go mek dɛn no us patikyula skripchɔ dɛn go yuz fɔ ɛnkɔrej dɛn.

14. Wetin mek Ilayja bin nid ɛp? Aw Jiova bin ɛp am?

¹⁴ Di prɔfɛt Ilayja bin rɔnawe pan Kwin Jezibɛl. (1 Kiŋ 19:​1-3) I bin tink se nain wan bin de sav as Jiova in prɔfɛt, ɛn ɔl in wok na fɔ natin. Ilayja in at bin rili pwɛl ɛn dat mek i bin want fɔ day. (1 Kiŋ 19:​4, 10) Jiova nɔ bin kɔndɛm IIayja, bifo dat i bin mek IIayja no se nɔto in wan de, i ɛnkɔrej am fɔ abop pan Gɔd in pawa, ɛn mek i no se i stil gɛt mɔ wok fɔ du. Jiova tek tɛm lisin we IIayja bin de tɔk to am bɔt aw i de fil, ɛn i gi am nyu wok dɛn. (1 Kiŋ 19:​11-16, 18) Wetin na di lɛsin? Wi ɔl fɔ trit Jiova in ship dɛn fayn, bɔt na di ɛlda dɛn mɔ fɔ du dat. Dɛn fɔ tray fɔ ɛnkɔrej di ship we dɔn lɔs ɛn mek i no se Jiova lɛk am.

15. Akɔdin to Jɔn 6:​39, aw Jizɔs bin si in papa in ship dɛn?

¹⁵ Aw Jiova want mek wi fil bɔt in ship dɛn we dɔn lɔs? Wi kin lan frɔm Jizɔs in ɛgzampul. Jizɔs bin no se Jiova valyu ɔl  in ship dɛn, so i bin du ɔl wetin i ebul fɔ ɛp “dɛn pipul na Izrɛl we tan lɛkɛ dɛn ship we lɔs” fɔ kam bak to Jiova. (Mat. 15:​24; Lyuk 19:​9, 10) Jizɔs bin du in bɛst as di gud shɛpad, fɔ mek nɔn pan Jiova in ship dɛn nɔ lɔs.—Rid Jɔn 6:​39.

16-17. Aw ɛlda dɛn fɔ fil we i kam to fɔ ɛp di wan dɛn we bin dɔn lɛf fɔ sav Jiova? (Luk di bɔks we gɛt di taytul, “ Aw Ship we Dɔn Lɔs Kin Fil?”)

¹⁶ Di apɔsul Pɔl bin ɛnkɔrej di ɛlda dɛn we bin de na di kɔngrigeshɔn na Ɛfisɔs, fɔ falamakata Jizɔs in ɛgzampul. I bin se: “A dɔn sho una se ilɛk aw tin tan una fɔ wok traŋa lɛkɛ mi fɔ ɛp dɛn pipul we nɔ gɛt. Una mɛmba wetin Masta Jizɔs insɛf tɔk wɛn i se, ‘Di pɔsin we de gi gɛt blɛsin pas di pɔsin we de gɛt.’” (Akt 20:​17, NWT, 35) Dis sho klia wan se ɛlda dɛn gɛt impɔtant wok fɔ kia fɔ Jiova in pipul dɛn. Wan ɛlda we nem Salvedɔ we de na Spen, tɔk se: “We a tink bɔt di kayn we aw Jiova bisin bɔt in ship dɛn we lɔs, i kin mek a du ɔl wetin a ebul fɔ ɛp dɛn. As ɛlda, a no se Jiova want mek a kia fɔ dɛn.”

¹⁷ Dɛn bin ɛp ɔl di wan dɛn we wi tɔk bɔt insay dis atikul we bin dɔn lɛf Jiova, fɔ kam bak to am. Rayt naw, bɔku ɔda wan dɛn de we dɔn lɛf Jiova we want fɔ kam bak. Insay di nɛks atikul, wi go tɔk mɔ bɔt aw wi go ɛp dɛn fɔ kam bak to Jiova.