WI ƆL biliv se Jiova de lid in pipul dɛn ɛn i de gi dɛn wetin dɛn nid fɔ mek dɛn kɔntinyu fɔ de nia am insay dis “las dez.” (2 Tim. 3:​1, NWT) Bɔt wi ɔl nid fɔ du sɔntin fɔ sho se wi de obe Jiova. Wi kin kɔmpia wi tɛm to wetin bin de apin to di Izrɛlayt dɛn we dɛn bin de na di ɛmti land. Dɛn bin nid fɔ du sɔntin we dɛn yɛri di trɔmpɛt in sawnd.

Jiova bin tɛl Mozis fɔ mek tu trɔmpɛt dɛn we dɛn mek wit silva ɛn “yuz dɛn we [i] want di Izrɛlayt dɛn fɔ gɛda ɛn we dɛn fɔ waka.” (Nɔm. 10:​2) Di prist dɛn fɔ blo di trɔmpɛt dɛn difrɛn we dɛn fɔ sho wetin di pipul dɛn fɔ du. (Nɔm. 10:​3-8) Tide, Gɔd in pipul dɛn de gɛt dayrɛkshɔn difrɛn we dɛn. Lɛ wi tɔk bɔt tri we dɛn we wi kin gɛt dayrɛkshɔn ɛn kɔmpia am to di trɔmpɛt sawnd dɛn insay di Izrɛlayt dɛn tɛm. Tide, dɛn kin invayt Gɔd in pipul dɛn pan big program dɛn, dɛn kin invayt di ɛlda dɛn fɔ trenin, ɛn dɛn kin ajɔst di dayrɛkshɔn dɛn we dɛn kin gi fɔ di kɔngrigeshɔn dɛn.

We Jiova want “ɔlman” fɔ gɛda na di ist pat bifo di tabanakul, di prist dɛn de blo di trɔmpɛt dɛn tu tɛm. (Nɔm. 10:​3) Ɔl di trayb dɛn sheb to 4 pat arawnd di tabanakul, ɛn dɛn ɔl de yɛri di sawnd. Di wan dɛn we de nia di tabanakul kin rich kwik. Ɔda wan dɛn bin de fa ɛn i go bi se dɛn kin nid mɔ tɛm ɛn trɛnk fɔ rich de. Bɔt ilɛk dɛn de fa ɔ dɛn de nia, Jiova want ɔlman fɔ gɛda fɔ yɛri wetin i gɛt fɔ tɛl dɛn.

Tide, Gɔd in pipul dɛn nɔ de gɛda na tabanakul, bɔt dɛn kin invayt wi pan big program dɛn. Dɛn big program dɛn ya kin bi wi kɔnvɛnshɔn dɛn, ɛn ɔda spɛshal program dɛn usay wi kin gɛt dayrɛkshɔn ɛn lan impɔtant tin dɛn. Jiova in pipul dɛn kin ɛnjɔy di sem program dɛn ɔlsay na di wɔl. So ɔl di wan dɛn we de gri fɔ tek di inviteshɔn fɔ go dɛn big program dɛn de, kin gladi fɔ de pat pan di big grup. Sɔm dɛn kin kɔmɔt fa say pas ɔda wan dɛn. Bɔt ɔl di wan dɛn we atɛnd di program kin rili si se i fayn we dɛn atɛnd.

Yu tink se di wan dɛn we de na smɔl grup dɛn we de fa frɔm di say we dɛn de mek di program kin bɛnifit? Tɛknɔlɔji dɔn mek bɔku pan dɛn wan dɛn de dɔn ebul fɔ bɛnifit frɔm di sem program, ɛn dɛn kin ivin fil lɛk se dɛn de usay di program de apin. Fɔ ɛgzampul, di  tɛm fɔ ɛdkwata rɛprizɛntetiv visit, di branch na Bɛnin bin kɔnɛkt di program to wan smɔl tɔŋ we nem Alit, Nayja we de na di Saara Dɛzat. Twɛnti-wan pipul bin gɛda fɔ wach di program. Pan ɔl we dɛn bin de fa, dɛn fil lɛk se dɛn de wit di 44,131 pipul dɛn we bin de na di program. Wan brɔda bin rayt se: “A rili tɛl una tɛnki fɔ we una kɔnɛkt wi to di program. I sho se una lɛk wi ɛn una de mɛmba wi.”

We di prist blo wan trɔmpɛt, “di lida dɛn we na di big wan dɛn fɔ di difrɛn famili dɛn” fɔ gɛda na di tɛnt ɔf mitin. (Nɔm. 10:​4) Na de Mozis de tren dɛn ɛn tɛl dɛn wetin fɔ du. Dat go ɛp dɛn fɔ du dɛn wok fayn na dɛn difrɛn trayb dɛn. If yu na bin wan pan dɛn lida dɛn de, yu nɔ fɔ dɔn du ɔl wetin yu ebul fɔ mek yu go de ɛn bɛnifit?

Tide, di kɔngrigeshɔn ɛlda dɛn nɔto “lida dɛn” ɛn dɛn nɔ de trit Gɔd in pipul dɛn lɛk slev. (1 Pit. 5:​1-3) Bɔt dɛn de du dɛn bɛst fɔ kia fɔ Gɔd in pipul dɛn. So dɛn nɔ kin westɛm we dɛn invayt dɛn na di Kiŋdɔm Ministri Skul fɔ go gɛt mɔ trenin. We di ɛlda dɛn kin go dis skul, dɛn kin lan aw fɔ kia fɔ tin dɛn na di kɔngrigeshɔn fayn fayn wan. Di trenin de mek di ɛlda dɛn ɛn ɔl di wan dɛn we dɛn de kia fɔ na di kɔngrigeshɔn go nia Jiova. Ilɛksɛf yu nɔ wande atɛnd dis skul yet, yu go stil de bɛnifit frɔm di wan dɛn we dɔn atɛnd.

Sɔntɛnde, di prist dɛn bin de blo di trɔmpɛt difrɛn we dɛn. Dis anawnsmɛnt na fɔ mek di wan ol kamp muf. (Nɔm. 10:​5, 6) We di pipul dɛn bin de muf na di kamp, dɛn kin rili ɔganayz bɔt i kin min bak se dɛn nid fɔ wok tranga wan. Sɔntɛnde, sɔm Izrɛlayt dɛn nɔ kin want fɔ muf go ɔdasay. Wetin mek?

Sɔntɛm, sɔm dɛn bin de fil se dɛn bin de blo di trɔmpɛt fast-fast fɔ lɛ dɛn muf ɛn dɛn bin de blo am tɛm we dɛn nɔ bin de ɛkspɛkt. ‘Sɔntɛnde na wan de nɔmɔ di klawd go tek.’ Sɔm ɔda tɛm dɛn, ‘i kin kɔba di tɛnt fɔ tu dez, ɔ wan mɔnt, ɔ ivin lɔng pas dat’ bifo dɛn muf. (Nɔm. 9:​21, 22) Bɔt ɔmɔs tɛm di kamp bin muf? Nɔmbaz chapta 33 tɔk bɔt 40 ples dɛn usay di Izrɛlayt dɛn bin kamp.

Sɔntɛnde, sɔm Izrɛlayt dɛn go dɔn fɛn say we gɛt shed. Ɛn i go rili fayn fɔ de ɔnda shed we yu de na “bad bad ɛmti ples we pipul nɔ go ebul tap.” (Dit. 1:​19) So sɔm dɛn go dɔn de tink se if dɛn muf, dɛn go go na say we nɔ fayn.

We sɔm trayb dɛn go dɔn bigin muf, sɔm ɔda wan dɛn nɔ go want fɔ peshɛnt fɔ wet fɔ dɛn tɔn fɔ mek dɛn muf. Dɛn ɔl bin yɛri di trɔmpɛt sawnd fɔ mek dɛn muf, bɔt nɔto dɛn ɔl de muf di sem tɛm. We dɛn yɛri di fɔs trɔmpɛt sawnd, na bin fɔ sho se Juda, Isaka, ɛn Zɛbyulɔn dɛn trayb we de na ist, fɔ muf. (Nɔm. 2:​3-7; 10:​5, 6) We dɛn dɔn go, di prist dɛn kin blo di trɔmpɛt di sɛkɔn tɛm, fɔ sho se na di tri trayb dɛn we de na di sawt, fɔ muf. Di prist dɛn de kɔntinyu fɔ du dat te ɔlman na di kamp muf.

Sɔntɛm, i nɔ kin izi fɔ yu fɔ gri we dɛn mek ajɔstmɛnt dɛn na di ɔganayzeshɔn. Wetin mek? I go bi se yu go de tink se di ajɔstmɛnt dɛn na di ɔganayzeshɔn rili bɔku. Ɔ sɔntɛm yu lɛk di we aw wi bin de du tin fɔs ɛn yu nɔ want mek natin chenj. Ilɛk wetin na di rizin, i go dɔn at fɔ mek yu peshɛnt ɛn yus to ɔl dɛn chenj dɛn de. Bɔt if wi tray fɔ fala dɛn chenj dɛn de lɛk aw wi fɔ du, wi go si se Jiova go gladi fɔ wi.

Insay Mozis in tɛm, Jiova bin gayd bɔku bɔku man dɛn, uman dɛn, ɛn pikin dɛn na di ɛmti land. If Jiova nɔ bin kia fɔ dɛn ɛn dayrɛkt dɛn, dɛn nɔ fɔ dɔn sev. Tide, wi de gɛt tayt padi biznɛs wit Jiova bikɔs i de gayd wi. Infakt, i de ɛp wi fɔ gɛt strɔng fet. So mek wi ɔl mekɔp wi maynd fɔ falamakata di fetful Izrɛlayt dɛn we bin obe ɛni tɛm we dɛn blo di trɔmpɛt difrɛn we dɛn!