1. Wetin kin mek sɔntɛnde Jiova in savant dɛn de fil se na dɛn wangren de?

SƆNTƐNDE, plɛnti pan wi kin fil se na wi wangren de. Sɔm nɔ kin fil dis kayn we fɔ lɔng tɛm. Ɔda wan dɛn kin fil dis kayn we fɔ lɔng tɛm. Sɔntɛnde, wi kin fil se na wi wangren de pan ɔl we bɔku pipul dɛn de wit wi. Fɔ sɔm pan wi brɔda ɛn sista dɛn, i nɔ kin izi fɔ mek nyu padi dɛn na di nyu kɔngrigeshɔn usay dɛn go. Ɔda wan dɛn kɔmɔt na famili usay dɛn ɔl de du tin togɛda, bɔt dɛn de fil se na dɛn wangren de we dɛn go usay dɛn famili nɔ de. Stil, ɔda wan dɛn kin mis di tɛm we dɛn kin spɛn wit di wan dɛn we dɛn lɛk we dɔn day. Ɛn sɔm brɔda ɛn sista dɛn, mɔ so di wan dɛn we jɔs lan di trut, kin fil se na dɛn wangren de we dɛn fambul dɛn we nɔ de sav Jiova ɛn dɛn padi dɛn we dɛn bin gɛt trade drɛb dɛn ɔ mek dɛn sɔfa.

2. Us kwɛstyɔn dɛn we wi go gɛt ansa to?

² Jiova no ɛn ɔndastand ɔltin bɔt wi. We wi de fil se na wi wangren de, Jiova no se wi de fil da we de, ɛn i want fɔ ɛp wi. Aw Jiova kin ɛp wi? Wetin wi go du fɔ ɛp wisɛf? Ɛn aw wi go ɛp ɔda pipul dɛn na wi kɔngrigeshɔn we de fil se na dɛn wangren de? Lɛ wi tɔk bɔt di ansa dɛn to dɛn kwɛstyɔn dɛn ya.

3. Aw Jiova bin sho se i bisin bɔt Ilayja?

³ Jiova want ɔl di wan dɛn we de wɔship am fɔ gɛt gladi-at. I de nia ɛniwan pan wi, ɛn i kin no we wi at pwɛl. (Sam 145:18, 19) Tink bɔt di kayn we aw Jiova bin sho se i bisin bɔt di we aw di prɔfɛt Ilayja bin de fil ɛn aw i ɛp am. Da fetful man de bin liv insay di tɛm we tin nɔ bin izi  fɔ di Izrɛlayt dɛn. Pipul dɛn we pawaful na Izrɛl ɛn we nɔ lɛk Jiova bin de mek di wan dɛn we de wɔship Am sɔfa, ɛn dɛn bin rili want fɔ kil Ilayja. (1 Kiŋ 19:1, 2) Dɔn bak, Ilayja bin de fil se na in na di wangren prɔfɛt we bin dɔn lɛf we de sav Jiova, ɛn sɔntɛm dis go dɔn mek in at pwɛl mɔ ɛn mɔ. (1 Kiŋ 19:10) Wantɛm wantɛm, Gɔd bin du sɔntin fɔ ɛp Ilayja. Jiova sɛn wan enjɛl fɔ ɛnkɔrej In prɔfɛt ɛn mek i no se nɔto in wangren de. Di enjɛl mek Ilayja no se bɔku Izrɛlayt dɛn de we stil de fred Gɔd.—1 Kiŋ 19:5, 18.

4. Aw Mak 10:29, 30 de sho se Jiova bisin bɔt di wan dɛn we dɛn fambul ɛn padi dɛn nɔ de ɛp dɛn?

⁴ Jiova no se we wi disayd fɔ sav am, sɔm pan wi go gɛt fɔ mek bɔku sakrifays dɛn. Wan pan di tin dɛn we wi go lɔs na di ɛp we wi fambul ɛn padi dɛn we nɔ de sav Jiova fɔ ɛp wi. Sɔntɛm di apɔsul Pita bin de wɔri we i aks Jizɔs se: “Wi dɔn lɛf ɔltin ɛn fala yu; so, wetin wi go gɛt?” (Mat. 19:27) Jizɔs bin ɛnkɔrej in disaypul dɛn ɛn tɛl dɛn se di kɔngrigeshɔn go tan lɛk famili to dɛn. (Rid Mak 10:29, 30.) Ɛn Jiova, we na wi Papa we de na ɛvin, prɔmis se i go ɛp di wan dɛn we want fɔ sav am. (Sam 9:10) Lɛ wi tɔk bɔt sɔm tin dɛn we yu kin du we go mek Jiova ɛp yu we yu de fil se na yu wangren de.

5. Us bɛnifit yu go gɛt we yu tink bɔt aw Jiova de ɛp yu?

⁵ Tink bɔt aw Jiova de ɛp yu. (Sam 55:22) Dis go ɛp yu fɔ si se nɔto yu wangren de. Wan sista we nɔ mared we nem Karɔl, * we in fambul dɛn nɔ de na di trut, bin se: “We a tink bɔt aw Jiova dɔn de ɛp mi fɔ bia we a gɛt prɔblɛm dɛn, i dɔn ɛp mi fɔ fil se nɔto mi wangren de. Ɛn i mek a kɔnvins se Jiova go ɛp mi ɔltɛm.”

6. Aw 1 Pita 5:9, 10 go ɛp di wan dɛn we de fil se na dɛn wangren de?

⁶ Tink bɔt aw Jiova de ɛp wi brɔda ɛn sista dɛn we de tink se na dɛn wangren  de. (Rid 1 Pita 5:9, 10.) Wan brɔda we nem Iroshi, we na in wangren na Jiova Witnɛs na in famili, bin se: “Na di kɔngrigeshɔn, i izi fɔ mek a si se ɔlman gɛt prɔblɛm dɛn. Wi no se wi ɔl de du wi bɛst fɔ sav Jiova, ɛn dat kin ɛnkɔrej wi we nɔ gɛt fambul dɛn na di trut.”

7. Aw prea kin ɛp yu?

⁷ Go de pre, rid di Baybul, ɛn go di mitin dɛn ɔltɛm. Yu fɔ tɛl Jiova bɔt aw yu rili de fil. (1 Pit. 5:7) Masiɛl se: “Wan impɔtant tin we bin rili ɛp mi fɔ mek a nɔ de fil lɛk se na mi wangren de na we a bin de pre to Jiova wit ɔl mi at.” We dis yɔŋ sista bin disayd fɔ sav Jiova, i bin fil lɛk se na in wangren de bikɔs in famili nɔ de sav Jiova. I tɔk bak se: “Jiova na bin rial Papa to mi, ɛn a bin de pre to am bɔku tɛm ɛvride ɛn tɛl am aw a de fil.”

8. We yu de rid di Baybul ɛn tink gud wan bɔt am, aw dat kin ɛp yu?

⁸ Na fɔ rid Gɔd in Wɔd ɛvride ɛn tink gud wan bɔt pat dɛn na di Baybul we sho se Jiova lɛk yu. Wan sista we nem Biyanka, we de bia we in fambul dɛn de tɔk tin dɛn we de mek in at pwɛl, bin tɔk se: “We a kin rid ɛn tink gud gud wan bɔt wetin de na di Baybul ɛn rial layf stori dɛn bɔt Jiova in savant dɛn we de bia prɔblɛm dɛn we fiba mi yon, dat de rili ɛp mi.” Sɔm Kristian dɛn kin kram skripchɔ dɛn we de rili ɛnkɔrej dɛn, lɛk Di Sam Dɛm 27:10 ɛn Ayzaya 41:10. Ɔda wan dɛn kin lisin to odio rɛkɔdin dɛn we dɛn de pripia fɔ di mitin dɛn ɔ we dɛn de du dɛn Baybul ridin. Dɛn se dis kin rili ɛp dɛn fɔ mek dɛn nɔ fil lɛk se na dɛn wangren de.

9. We yu de atɛnd di mitin dɛn, aw dat dɔn ɛp yu?

⁹ Du ɔl wetin yu ebul fɔ go di mitin dɛn ɔltɛm. Di mitin go ɛnkɔrej yu, ɛn yu go sabi di brɔda ɛn sista dɛn. (Ibru. 10:24, 25) Masiɛl, we wi bin tɔk bɔt, bin se: “Pan ɔl we a bin rili de shem, a mekɔp mi maynd fɔ go ɔl di mitin dɛn ɛn fɔ gi kɔmɛnt. Dis dɔn ɛp mi fɔ mek a kam nia mi brɔda ɛn sista dɛn we de na di kɔngrigeshɔn.”

10. Wetin mek i impɔtant fɔ mek padi wit fetful Kristian dɛn?

¹⁰ Mek padi dɛn wit fetful Kristian dɛn. Mek padi dɛn na di kɔngrigeshɔn we yu go lan frɔm. Dɛn go bi di wan dɛn we dɔn ɔl ɔ di wan dɛn we yɔŋ, ɔ we kɔmɔt difrɛn say dɛn. Di Baybul mɛmba wi se “ol pipul” dɛn gɛt sɛns. (Job 12:12) Di wan dɛn we dɔn ol dɛn bak kin lan bɔku tin frɔm fetful yɔŋ wan dɛn. Devid bin yɔŋ pas Jonɛthan fa fawe,  bɔt dat nɔ bin mek dɛn nɔ ɛnjɔy dɛn tayt padi biznɛs. (1 Sam. 18:1) Devid ɛn Jonɛthan bin de ɛp dɛnsɛf fɔ sav Jiova pan ɔl we dɛn bin de gɛt siriɔs prɔblɛm dɛn. (1 Sam. 23:16-18) Wan sista we nem Irina, we na in wangren de sav Jiova na in famili, bin tɔk se: “Wi Kristian brɔda ɛn sista dɛn tan lɛk wi tru tru mama ɛn papa dɛn ɔ brɔda ɛn sista dɛn. Jiova kin yuz dɛn as wi famili we wi nid.”

11. Wetin wi fɔ du fɔ gɛt tayt padi dɛn?

¹¹ Fɔ mek nyu padi dɛn nɔ kin izi, mɔ if yu na pɔsin we de shem. Wan sista we nem Ratna, we bin de shem ɛn we lan di trut pan ɔl we dɛn bin de agens am, bin tɔk se: “A bin gɛt fɔ gri se a nid ɛp ɛn sɔpɔt frɔm mi brɔda ɛn sista dɛn na di kɔngrigeshɔn.” I nɔ kin izi fɔ tɛl ɔda pipul dɛn aw wi de fil. Bɔt we yu du dat, da pɔsin de kin bi yu tayt padi. Yu padi dɛn want fɔ ɛnkɔrej ɛn sɔpɔt yu, bɔt na yu go mek dɛn no aw dɛn fɔ ɛp yu.

12. Aw di prichin wok go ɛp yu fɔ mek gud padi dɛn?

¹² Wan pan di bɛst we dɛn fɔ mek padi dɛn na we wi prich wit wi kɔmpin Kristian dɛn. Karɔl, we wi bin dɔn tɔk bɔt, se: “A dɔn gɛt bɔku gud padi dɛn bay we a de spɛn tɛm wit sista dɛn fɔ du di prichin wok ɛn we wi de du ɔda tin dɛn we wi de sav Jiova. Insay dɛn ia dɛn ya we dɔn pas, Jiova dɔn yuz mi padi dɛn fɔ ɛp mi.” I gud fɔ wi ɔltɛm we wi de mek padi dɛn we na fetful Kristian dɛn. Jiova de yuz dɛn kayn padi ya fɔ ɛp wi we wi at pwɛl, fɔ ɛgzampul, we wi kin fil se na wi wangren de.—Prɔv. 17:17.

13. Us wok we ɔlman na di kɔngrigeshɔn gɛt?

¹³ Ɔlman na di kɔngrigeshɔn gɛt di wok fɔ mek wanwɔd de ɛn sho lɔv to ɔlman mek nɔbɔdi nɔ fil lɛk se na in wangren de. (Jɔn 13:35) Wetin wi kin se ɛn du kin rili ɛnkɔrej ɔda pipul dɛn. Wan sista bin tɔk se: “We a lan di trut, di kɔngrigeshɔn kam fɔ bi mi famili. A nɔ bin fɔ dɔn bi Jiova Witnɛs if di brɔda ɛn sista dɛn nɔ bin ɛp mi.” Wetin wi go du fɔ ɛp di wan dɛn we dɛn famili nɔ de na di trut fɔ mek dɛn no se di brɔda ɛn sista dɛn na di kɔngrigeshɔn lɛk dɛn?

14. Wetin yu go du fɔ mek nyu wan dɛn bi yu padi?

¹⁴ Tray fɔ mek padi dɛn wit nyu wan dɛn. If wi notis Baybul studɛnt dɛn we jɔs stat fɔ kam mitin, ɔ brɔda ɛn sista dɛn we jɔs muf na wi kɔngrigeshɔn ɔ we jɔs baptayz, wi want fɔ wɛlkɔm dɛn fayn fayn wan. (Rom. 15:7) Bɔt wi nɔ fɔ jɔs grit dɛn fayn wan. As tɛm de go, wi want fɔ gɛt tayt padi biznɛs wit dɛn. So na fɔ du gud to nyu wan dɛn ɛn sho dɛn se yu rili bisin bɔt dɛn. Tray fɔ ɔndastand di prɔblɛm we dɛn gɛt. Bɔt as yu de du dat, tek tɛm mek yu nɔ aks dɛn kwɛstyɔn dɛn we go mek dɛn shem. I nɔ kin izi fɔ mek sɔm pan dɛn tɛl yu aw dɛn de fil, so nɔ fos dɛn fɔ tɔk. Bifo dat, na fɔ tek tɛm aks dɛn kwɛstyɔn dɛn we go mek dɛn want fɔ tɔk, ɛn nɔ taya fɔ lisin to dɛn as dɛn de ansa yu. Fɔ ɛgzampul, yu kin aks dɛn aw dɛn kam na di trut.

15. Aw Kristian dɛn we gɛt strɔng fet go ɛp ɔda brɔda ɛn sista dɛn na di kɔngrigeshɔn?

¹⁵ Ɔlman go gɛt strɔng fet na di kɔngrigeshɔn we wi sho se wi bisin bɔt wi kɔmpin dɛn. Dis kin apin mɔ we di  ɛlda dɛn ɛn brɔda ɛn sista dɛn we gɛt strɔng fet kin du dis. Mɛlisa, we in mama bin mɛn am na di trut, bin se: “A rili gladi fɔ di brɔda dɛn we bin tan lɛk papa to mi, we bin spɛn tɛm wit mi, ɛn we bin sho se dɛn bisin bɔt mi insay di ia dɛn we dɔn pas. Ɛnitɛm we a nid fɔ tɔk, a gɛt pɔsin we de lisin to mi.” Wan yɔŋ brɔda we nem Mɔrisio, in at bin pwɛl ɛn i bin fil se na in wangren de we in Baybul ticha bin lɛf di trut. Mɔrisio bin se: “Di ɛlda dɛn sho mi se dɛn bisin bɔt mi, ɛn dat bin rili ɛp mi. Dɛn bin de tɔk to mi ɔltɛm. Dɛn bin de wok wit mi na fil savis. Dɛn bin de sho mi sɔm pan di valyu tin dɛn we dɛn fɛn na dɛn pasɔnal Baybul stɔdi, ɛn wi bin de ivin du tin dɛn fɔ ɛnjɔy wisɛf.” Mɛlisa ɛn Mɔrisio dɔn de sav Jiova na di fultaym savis.

16-17. Us ɔda tin dɛn we wi go du fɔ ɛp wi brɔda ɛn sista dɛn?

¹⁶ Ɛp yu brɔda ɛn sista dɛn wit di tin dɛn we dɛn nid. (Gal. 6:10) Lio, we de sav as mishɔnari na wan kɔntri we de fa frɔm in famili, bin se: “Bɔku tɛm, ɔl wetin wi nid na we wi brɔda ɛn sista dɛn de du simpul tin dɛn fɔ ɛp wi di rayt tɛm. A mɛmba wan de we a bin gɛt motoka aksidɛnt. Bay di tɛm we a rich na os, a bin rili strɛs. Bɔt wan brɔda ɛn in wɛf bin invayt mi fɔ go it wit dɛn. A nɔ mɛmba wetin wi bin it, bɔt a mɛmba se dɛn bin tek tɛm lisin to mi. Ɛn afta dat, a bin fil bɛtɛ pas aw a bin de fil fɔs.”

¹⁷ Wi ɔl kin ɛnjɔy fɔ de wit wi kɔmpin Jiova Witnɛs dɛn ɛn fɔ tɔk bɔt di tɔk dɛn we wi dɔn lisin to na wi program dɛn lɛk wi asɛmbli ɛn kɔnvɛnshɔn dɛn. Bɔt Karɔl, we wi bin dɔn tɔk bɔt, bin se: “We a kin atɛnd wi asɛmbli ɛn kɔnvɛnshɔn dɛn, a kin rili fil lɛk se na mi wangren de.” Wetin mek? I bin se: “Pan ɔl we a kin de arawnd bɔku bɔku brɔda ɛn sista dɛn, bɔku tɛm dɛn ɔl kin de togɛda wit dɛn famili dɛn. We a kin si dat, na da tɛm de mɔ a kin fil lɛk se na mi wangren de.” I nɔ kin izi fɔ lɛ ɔda brɔda ɛn sista dɛn atɛnd kɔnvɛnshɔn ɔ asɛmbli fɔ di fɔs tɛm afta we dɛn man ɔ wɛf day. Yu sabi pɔsin we gɛt dɛn kayn prɔblɛm dɛn ya?  Yu nɔ tink se i go fayn fɔ lɛ yu invayt am fɔ de wit yu ɛn yu famili na di nɛks asɛmbli ɔ kɔnvɛnshɔn we wi go gɛt?

18. Aw wi go fala 2 Kɔrintians 6:11-13 we wi de du gud to wi brɔda ɛn sista dɛn?

¹⁸ Spɛn tɛm togɛda. Tray fɔ spɛn tɛm wit difrɛn brɔda ɛn sista dɛn, mɔ di wan dɛn we kin fil lɛk se na dɛn wangren de. Na dɛn brɔda ɛn sista dɛn de mɔ wi want fɔ “rili opin wi at” to. (Rid 2 Kɔrintians 6:11-13.) Mɛlisa, we wi bin dɔn tɔk bɔt, bin se: “Wi bin de gladi ɔltɛm we brɔda ɛn sista dɛn bin de invayt wi na dɛn os fɔ spɛn tɛm wit dɛn ɛn dɛn famili ɔ fɔ travul wit dɛn.” Ɛni brɔda ɔ sista de na yu kɔngrigeshɔn we yu go ebul fɔ du gud to?

19. Ustɛm i go rili fayn fɔ lɛ wi spɛn tɛm wit wi brɔda ɛn sista dɛn?

¹⁹ I go bi se tɛm dɛn kin de we wi brɔda ɛn sista dɛn go rili gladi if wi spɛn tɛm wit dɛn. I nɔ kin izi fɔ lɛ sɔm pan wi brɔda ɛn sista dɛn de wit dɛn fambul dɛn we nɔto Jiova Witnɛs di tɛm we dɛn de sɛlibret dɛn ɔlide dɛn. Patikyula det dɛn de we sɔm ɔda brɔda ɛn sista dɛn at kin rili pwɛl, lɛk di de we pɔsin we dɛn lɛk bin day. We wi de spɛn tɛm wit brɔda ɛn sista dɛn we gɛt dɛn kayn prɔblɛm dɛn ya, wi de sho dɛn se wi “rili kia” fɔ dɛn.—Fil. 2:20.

20. Aw di wɔd dɛn we Jizɔs tɔk na Matyu 12:48-50 go ɛp wi we wi de fil lɛk se na wi wangren de?

²⁰ Bɔku rizin dɛn de we kin mek Kristian dɛn fil lɛk se na dɛn wangren de. Bɔt wi nɔ fɔ ɛva fɔgɛt se Jiova no aw dɛn de rili fil. Bɔku tɛm, i kin yuz wi brɔda ɛn sista dɛn fɔ gi wi di tin dɛn we wi nid. (Rid Matyu 12:48-50.) Wi go sho se wi gladi fɔ dis we aw Jiova de ɛp wi bay we wi de du wi bɛst fɔ ɛp wi brɔda ɛn sista dɛn. Ilɛk aw wi kin fil sɔntɛnde, wi fɔ mɛmba se nɔto wi wangren de bikɔs Jiova de wit wi ɔltɛm.