1. Wetin Jiova dɔn du fɔ wi ɔl?

JIOVA dɔn briŋ wi ɔl kam nia am. (Jɔn 6:44) Tink bɔt wetin dat min. We Jiova bin de tek tɛm luk ɔl di bɔku bɔku pipul dɛn na di wɔl, i si sɔntin pan yu we gɛt valyu. I si se yu gɛt klinat ɛn yu go ebul lɛk am. (1 Kro. 28:9) Jiova no yu, i ɔndastand yu, ɛn i lɛk yu. Dis na sɔntin we de rili kɔrej wi.

2. Aw Jizɔs ɛp wi fɔ ɔndastand aw Jiova bisin bɔt wi ɔl?

² Jiova rili bisin bɔt yu, ɛn i bisin bɔt ɔl yu Kristian brɔda ɛn sista dɛn. Fɔ ɛp wi fɔ ɔndastand dis, Jizɔs bin kɔmpia Jiova to shɛpad. Wetin di shɛpad go du if wan ship pan in 100 ship dɛn lɔs? I go “lɛf di 99 na di mawntin ɛn go fɛn di wan we dɔn lɔs.” We di shɛpad fɛn di ship, i nɔ go vɛks pan am fɔ we i lɔs. Bifo dat, i go gladi. Wetin na di pɔynt? Ɔl di ship dɛn impɔtant to Jiova. Jizɔs bin se: “Mi Papa we de na ɛvin nɔ ivin want lɛ wan pan dɛn smɔl wan ya day.”—Mat. 18:12-14.

3. Wetin wi go tɔk bɔt insay dis atikul?

³ Wi nɔ go ɛva want fɔ bi di rizin fɔ mek wi brɔda ɔ sista dɛn fil bad. Aw wi go avɔyd fɔ du tin dɛn we go mek ɔda pipul dɛn fil bad? Ɛn wetin wi go du if pɔsin mek wi fil bad? Wi go ansa dɛn kwɛstyɔn dɛn ya insay dis atikul. Bɔt fɔs, lɛ wi lan mɔ bɔt “dɛn smɔl wan ya” we Matyu chapta 18 tɔk bɔt.

4. Udat na “dɛn smɔl wan ya”?

⁴ “Dɛn smɔl wan ya” na Jizɔs in disaypul dɛn, ilɛk dɛn yɔŋ ɔ ol. Ilɛk ɔmɔs ia dɛn ol, dɛn tan lɛk “smɔl pikin dɛn” bikɔs dɛn rɛdi fɔ mek Jizɔs tich dɛn. (Mat. 18:3)  Pan ɔl we dɛn kɔmɔt na difrɛn say dɛn wit difrɛn kɔlchɔ ɛn difrɛn we dɛn fɔ du tin, dɛn ɔl de sho se dɛn gɛt fet pan Krays. Ɛn Krays insɛf lɛk dɛn pasmak.—Mat. 18:6; Jɔn 1:12.

5. Aw Jiova de fil we pɔsin de du sɔntin we de mek wan pan In pipul dɛn fil bad?

⁵ Ɔl “dɛn smɔl wan ya” valyu to Jiova. Fɔ mek wi ɔndastand aw i de fil, tink bɔt aw wi kin fil bɔt pikin dɛn. Wi valyu dɛn. Wi want fɔ protɛkt dɛn bikɔs dɛn nɔ gɛt trɛnk, ɛkspiriɛns, ɛn sɛns lɛk big pipul dɛn. Wi nɔ kin lɛk fɔ si we ɛnibɔdi de mek ɔda pɔsin sɔfa, bɔt wi kin vɛks mɔ we pɔsin de mek pikin sɔfa. Na da sem we de Jiova want fɔ protɛkt wi. I nɔ kin gladi, ɛn i kin ivin vɛks, we pɔsin du sɔntin we de mek wan pan in pipul dɛn fil bad.—Ayz. 63:9; Mak 9:42.

6. Akɔdin to 1 Kɔrintians 1:26-29, aw di pipul dɛn na di wɔl de si Jizɔs in disaypul dɛn?

⁶ Us ɔda we Jizɔs in disaypul dɛn tan lɛk “smɔl wan” dɛn? Wɛl, udat pipul dɛn na di wɔl kin si se dɛn impɔtant? Na di wan dɛn we gɛt mɔni, di wan dɛn we bɔku pipul dɛn sabi, ɛn di wan dɛn we gɛt pawa. Bɔt bɔku pan Jizɔs in disaypul dɛn nɔ de so. So pipul dɛn na di wɔl kin tink se dɛn na “smɔl wan” dɛn we nɔ impɔtant. (Rid 1 Kɔrintians 1:26-29.) Bɔt Jiova nɔ de si dɛn da we de.

7. Aw Jiova want mek wi fil bɔt wi brɔda ɛn sista dɛn?

⁷ Jiova lɛk ɔl in savant dɛn, ilɛksɛf i dɔn te we dɛn de sav am ɔ i nɔ te yet. Ɔl wi brɔda ɛn sista dɛn impɔtant to Jiova, so dɛn fɔ impɔtant bak to wi. Wi want fɔ “lɛk ɔl [wi] brɔda dɛn,” nɔto jɔs sɔm pan dɛn. (1 Pit. 2:17) Wi fɔ rɛdi fɔ du ɛnitin fɔ protɛkt ɛn kia fɔ dɛn. If wi si se wetin wi du ɔ se dɔn mek pɔsin fil bad, wi nɔ fɔ jɔs mek lɛk se natin nɔ apin, ɛn jɔs tink se di pɔsin fɔ fɔgiv wi ɛn fɔgɛt bɔt wetin apin. Wetin kin mek sɔm pan dɛn fil bad? Sɔntɛm, bikɔs ɔf di we aw sɔm brɔda ɛn sista dɛn mɛn, dɛn kin tink se ɔda pipul dɛn bɛtɛ pas dɛn. Ɔda wan dɛn nyu na di trut; dɛn nɔ lan yet aw dɛn fɔ fɔgiv ɔda pipul dɛn we mek mistek. Ilɛk wetin na di rizin we mek wi ɔ ɔda pipul dɛn fil bad, wi fɔ tray fɔ mek pis de bak. Dɔn, if yu na pɔsin we kin vɛks bɔku tɛm bikɔs ɔf wetin ɔda pipul dɛn de du, yu fɔ tray nɔ fɔ de vɛks kwik. Yu nid fɔ du dat so dat yu go gɛt gladi-at ɛn gud padi biznɛs wit yu brɔda ɛn sista dɛn.

8. Us we aw di pipul dɛn we bin de na Jizɔs in tɛm bin de biev we bin afɛkt in disaypul dɛn?

⁸ Wetin mek Jizɔs bin tɔk bɔt “dɛn smɔl wan ya”? In disaypul dɛn bin aks am se: “Udat rili impɔtant pas ɔlman na di Kiŋdɔm we de na ɛvin?” (Mat. 18:1) Bɔku Ju dɛn da tɛm de bin want pipul dɛn fɔ tink se dɛn impɔtant. Wan masta sabi bukman bin se: “Di tin we bin impɔtant to dɛn pas ɔl na we bɔku pipul dɛn sabi dɛn ɛn we bɔku pipul dɛn rɛspɛkt dɛn.”

9. Wetin Jizɔs in disaypul dɛn bin gɛt fɔ du?

⁹ Jizɔs no se bɔku Ju dɛn bin tink se i impɔtant fɔ bɛtɛ pas ɔda pipul dɛn. So in disaypul dɛn gɛt fɔ wok tranga wan fɔ chenj da kayn we de aw dɛn de tink. I tɛl dɛn se: “Mek di wan pan una we impɔtant pas una ɔl, bi lɛk di wan we  yɔŋ pas ɔl, ɛn mek di wan we de bifo, bi lɛk savant.” (Lyuk 22:26) Wi go biev lɛk se wi na “di wan we yɔŋ pas ɔl” we wi “tink se ɔda pipul dɛn bɛtɛ pas” wi. (Fil. 2:3) Di mɔ we wi de kɔntinyu fɔ biev da we de, na di mɔ wi nɔ go mek ɔda pipul dɛn fil bad.

10. Us advays we Pɔl bin gi wi we wi fɔ mɛmba?

¹⁰ Ɔl wi brɔda ɛn sista dɛn gɛt say we dɛn bɛtɛ pas wi. I go izi fɔ mek wi ɔndastand dis we wi pe atɛnshɔn pan dɛn gud kwaliti dɛn. Wi fɔ mɛmba di advays we apɔsul Pɔl bin gi di Kristian dɛn na Kɔrint we i se: “Udat mek yu difrɛn frɔm yu kɔmpin? Wetin rili yu gɛt we nɔto gi dɛn gi yu? So if na gi dɛn gi yu, wetin mek yu de bost lɛk se nɔto gi dɛn gi yu?” (1 Kɔr. 4:7) Wi fɔ tek tɛm mek wi nɔ ɛva mek ɔda pipul dɛn kɔle wi ɔ tink se wi bɛtɛ pas ɔda pipul dɛn. Fɔ ɛgzampul, brɔda we sabi gi fayn tɔk ɔ sista we sabi stat Baybul stɔdi dɛn fɔ gi Jiova di prez ɔltɛm fɔ wetin dɛn de du.

11. Wetin Jizɔs bin tich wi wit di ɛgzampul bɔt wan kiŋ ɛn in slev?

¹¹ Jɔs afta Jizɔs wɔn in disaypul dɛn nɔ fɔ du sɔntin we go mek ɔda pipul dɛn fil bad, i gi wan ɛgzampul we de tɔk bɔt wan kiŋ ɛn in slev. Di slev bin gɛt big dɛt we i fɔ pe di kiŋ we i nɔ go ɛva ebul pe. So di kiŋ bin tɛl am mek i nɔ pe igen. Leta, da sem slev de nɔ bin gri fɔ lɛf in kɔmpin we bin gɛt fɔ pe am smɔl mɔni. So di kiŋ bin mek dɛn put dis slev we nɔ sɔri fɔ in kɔmpin na prizin. Wetin na di lɛsin? Jizɔs se: “Mi Papa we de na ɛvin go trit una di sem we if una nɔ fɔgiv una brɔda wit ɔl una at.”—Mat. 18:21-35.

12. Aw wi go mek ɔda pipul dɛn fil bad if wi nɔ gri fɔ fɔgiv?

¹² Di tin we di slev bin du bin mek i sɔfa. Dɔn bak, i bin mek ɔda pipul dɛn fil bad. Fɔs, i bin trit in kɔmpin slev bad, ɛn i nɔ bin sho am sɔri-at bay we i mek dɛn put am “na prizin te i ebul pe am bak wetin i fɔ pe am.” Sɛkɔn, i mek di ɔda slev dɛn we si am fil bad fɔ wetin i du. We in “kɔmpin slev dɛn si wetin apin, dɛn at pwɛl bad bad wan.” Semweso, di tin dɛn we wi kin du kin afɛkt ɔda pipul dɛn. Wetin kin apin if pɔsin nɔ trit wi fayn, ɛn wi nɔ gri fɔ fɔgiv am? Fɔs, wi go mek di pɔsin fil bad bikɔs wi nɔ gri fɔ fɔgiv am, ɛn sɔntɛm wi nɔ go gɛt in tɛm, ɛn wi nɔ go sho am se wi lɛk am. Sɛkɔn, wi go mek ɔda pipul dɛn na di kɔngrigeshɔn nɔ fil fayn we dɛn si se wi nɔ gɛt pis wit da pɔsin de.

13. Wetin yu lan frɔm wan payɔnia in ɛkspiriɛns?

¹³ We wi de fɔgiv wi brɔda ɛn sista dɛn, wi de fil fayn ɛn wi de mek ɔda pipul dɛn fil fayn. Na dat bin apin to wan payɔnia sista we wi go kɔl Kristal. Wan sista na di kɔngrigeshɔn bin mek i fil bad. Kristal bin se: “Sɔntɛnde, i bin de tɔk ash wɔd dɛn to mi we bin tan lɛk i de chuk mi wit nɛf. A nɔ bin ivin want fɔ prich wit am na fil savis. A nɔ bin gɛt bɛtɛ zil igen fɔ du di prichin wok, ɛn a nɔ bin gɛt gladi-at.” Kristal bin fil se i gɛt gud rizin fɔ vɛks. Bɔt i nɔ bin kɔntinyu fɔ vɛks pan di sista, ɛn i nɔ bin pe atɛnshɔn to aw di sista bin de mek i fil. I ɔmbul insɛf ɛn gri fɔ fala di advays frɔm di Baybul we de na di atikul we gɛt di taytul, “Forgive From Your Heart,” na di Ɔktoba 15, 1999 Wachtawa. I bin fɔgiv in sista. Kristal se: “A dɔn si se wi  ɔl de tray tranga wan fɔ mek chenj dɛn na wi layf, ɛn Jiova rɛdi fɔ fɔgiv wi ɛvride. A bin rili fil fayn. A dɔn gɛt mi gladi-at bak.”

14. Akɔdin to Matyu 18:21, 22, us prɔblɛm we apɔsul Pita go dɔn gɛt ɛn wetin yu lan frɔm wetin Jizɔs bin tɛl am?

¹⁴ Wi no se wi fɔ fɔgiv ɔda pipul dɛn, ɛn na di rayt tin dat fɔ du. Bɔt i nɔ kin izi fɔ du dat. Sɔntɛnde, apɔsul Pita sɛf go dɔn fil da we de. (Rid Matyu 18:21, 22.) Wetin go ɛp wi? Fɔs, tink gud gud wan bɔt ɔl di tɛm dɛn we Jiova dɔn fɔgiv yu. (Mat. 18:32, 33) Wi nɔ fit fɔ mek i fɔgiv wi, bɔt i stil de fɔgiv wi fɔ fri. (Sam 103:8-10) Dɔn, wi “nid fɔ lɛk wi kɔmpin dɛn.” So wi nɔ go pik di tɛm we wi go fɔgiv ɔ di tɛm we wi nɔ go fɔgiv. Fɔ fɔgiv wi brɔda ɛn sista dɛn na tin we wi sɔpɔz fɔ du. (1 Jɔn 4:11) Sɛkɔn, tink gud gud wan bɔt wetin kin apin we wi de fɔgiv. Wi go ɛp di pɔsin we dɔn du wi bad, wi go mek wanwɔd de na di kɔngrigeshɔn, wi go protɛkt wi padi biznɛs wit Jiova, dɔn wi go fil fayn. (2 Kɔr. 2:7; Kol. 3:14) Ɛn di las tin we wi go du na fɔ pre to di Wan we se mek wi fɔgiv. Nɔ gri mek Setan pwɛl di gud padi biznɛs we yu gɛt wit yu brɔda ɛn sista dɛn. (Ɛfi. 4:26, 27) Wi nid Jiova fɔ ɛp wi fɔ mek wi nɔ fɔdɔm na Setan in trap.

15. Akɔdin to wetin de na Koloshians 3:13, wetin wi go du if wi brɔda ɔ sista du sɔntin we mek wi fil bad?

¹⁵ Wetin yu fɔ du if wan pan yu brɔda ɔ sista du sɔntin we mek yu rili fil bad? Kɔntinyu fɔ du ɔl wetin yu ebul fɔ mek pis de. Tɛl Jiova aw yu de fil. Aks am fɔ ɛp di pɔsin we ɔfɛn yu ɛn ɛp yu fɔ si di  gud kwaliti dɛn we da pɔsin de gɛt, dat na di gud kwaliti dɛn we mek Jiova lɛk am. (Lyuk 6:28) If yu nɔ ebul fɔgɛt bɔt wetin yu brɔda dɔn du yu, na fɔ tink bɔt di bɛst we aw yu go tɔk to am. I fayn fɔ mek yu tink ɔltɛm se di brɔda nɔ du tin to yu bay wilful fɔ mek yu fil bad. (Mat. 5:23, 24; 1 Kɔr. 13:7) We yu de tɔk to am, na fɔ tek am se i nɔ min fɔ du yu bad. Bɔt wetin yu fɔ du if di pɔsin nɔ want fɔ mek pis? “Kɔntinyu fɔ bia” am. Nɔ giv-ɔp pan yu brɔda. (Rid Koloshians 3:13.) Wetin rili impɔtant na dat yu nɔ kɔntinyu fɔ vɛks pan yu brɔda, bikɔs dande go ambɔg yu padi biznɛs wit Jiova. Nɔ ɛva gri mek ɛnitin mek yu fil bad. If yu du dat, yu go pruv se yu lɛk Jiova pas ɛni ɔda tin.—Sam 119:165.

16. Us wok wi ɔl gɛt?

¹⁶ Wi gladi we wi de sav Jiova wit wi brɔda ɛn sista dɛn as “wan grup” ɔnda “wan shɛpad”. (Jɔn 10:16) Di buk we nem Organized to Do Jehovah’s Will, tɔk na pej 165 se: “Bikɔs yu de ɛnjɔy da kayn wanwɔd de, yusɛf gɛt di wok fɔ du sɔntin fɔ mek di wanwɔd nɔ pwɛl.” So wi nid fɔ lan “fɔ si wi brɔda ɛn sista dɛn lɛk aw Jiova de si dɛn.” To Jiova, wi ɔl na di “smɔl wan” dɛn we i valyu. Na so yu fɔ si yu brɔda ɛn sista dɛn. Jiova de si ɛn valyu ɔl wetin yu de du fɔ ɛp ɛn kia fɔ dɛn.—Mat. 10:42.

17. Wetin wi dɔn mekɔp wi maynd fɔ du?

¹⁷ Wi lɛk wi brɔda ɛn sista dɛn. So wi dɔn “mekɔp wi maynd nɔ fɔ put ɛnitin bifo wi brɔda we go blɔk am ɔ mek i fɔdɔm.” (Rom. 14:13) Wi de si wi brɔda ɛn sista dɛn as pipul dɛn we bɛtɛ pas wi, ɛn wi want fɔ fɔgiv dɛn wit ɔl wi at. Lɛ wi nɔ ɛva gri fɔ mek wetin pipul dɛn du mek wi fil bad. Bifo dat, lɛ wi tray tranga wan fɔ “du di tin dɛn we go mek pis de ɛn di tin dɛn we go ɛp wi kɔmpin fɔ tinap tranga wan.”​—Rom. 14:19.