FƆ LƆNG tɛm, di Izrɛlayt dɛn bin de pe mɔni fɔ sɔpɔt tru wɔship. Bɔt insay Jizɔs in tɛm, di Ju dɛn bin gɛt fɔ pe bɔku taks dɛn, we bin mek layf nɔ bin izi fɔ dɛn.

Fɔ mek dɛn go sɔpɔt di tabanakul ɛn di tɛmpul we dɛn bin bil leta, ɔl di Ju dɛn we dɔn big bin gɛt fɔ pe af shɛkɛl (tu drakmas). Insay Jizɔs in tɛm, dɛn bin de yuz da taks de fɔ gɛt tin dɛn we dɛn bin nid fɔ sakrifays ɛn fɔ tek kia ɔf di tɛmpul we Ɛrɔd bin bil. Sɔm Ju dɛn bin aks Pita if Jizɔs de pe da taks de, ɛn Jizɔs bin tɛl dɛn se i nɔ bad fɔ pe am. Infakt, Jizɔs bin sho Pita usay i go gɛt di kɔyn fɔ pe da taks de.—Mat. 17:24-27.

Gɔd in pipul dɛn we bin de trade bin gɛt fɔ pe ɔda taks we dɛn kɔl tayt, we min se dɛn fɔ sheb di tin dɛn we dɛn de avɛst ɔ dɛn salari to tɛn pat ɛn gi wan pat as tayt. (Lɛv. 27:30-32; Nɔm. 18:26-28) Di bigman dɛn pan Gɔd biznɛs bin de tawa se di pipul dɛn fɔ mek shɔ se dɛn pe dis taks fɔ ɛni vɛjitebul, ivin “di mint, dil, ɛn kumin.” Jizɔs nɔ bin se i bad fɔ pe tayt, bɔt i bin se di we we di Lɔ ticha dɛn ɛn di Faresi dɛn bin de yuz di lɔ bɔt tayt bin de sho se dɛn ipokrit.—Mat. 23:23.

Bɔt da tɛm de, di Ju dɛn bin gɛt fɔ pe bak bɔku taks dɛn to di Roman dɛn we bin de rul dɛn. Fɔ ɛgzampul, di wan dɛn we bin gɛt land bin gɛt fɔ pe taks wit mɔni ɔ di tin dɛn we dɛn de avɛst. If di tin dɛn we pɔsin avɛst rich 4 bag, i fɔ gi lɛk wan bag as taks to di Roman dɛn. Dɔn bak, ɛni wan pan di Ju dɛn bin gɛt fɔ pe di taks we ɔlman fɔ pe. Na dis taks di Faresi dɛn bin aks Jizɔs bɔt. I bin sho wi aw wi fɔ si di pe we wi de pe taks we i se: “So, una gi Siza wetin na Siza in yon, ɛn una gi Gɔd wetin na Gɔd in yon.”—Mat. 22:15-22.

Dɛn bin de pe taks bak fɔ di tin dɛn we dɛn bin de go sɛl na sɔm eria dɛn ɔ we dɛn bin de pul na dɛn eria dɛn de. Dɛn bin de kɔlɛkt dɛn taks dɛn de na pɔt dɛn, brij dɛn, jɔnkshɔn dɛn, ɔ we dɛn bin de go insay tɔŋ dɛn ɔ makit dɛn.

Di taks dɛn we di pipul dɛn bin de pe ɔnda di Roman dɛn we bin de rul bin rili bɔku. Wan Roman man we nem Tasitɔs bin se insay Jizɔs in tɛm we Taybiriɔs bin de rul, “di pipul dɛn na Siria ɛn Judia bin de beg fɔ mek dɛn ridyus di taks bikɔs i nɔ bin izi fɔ dɛn fɔ pe.”

Dɛn bin de gi di wok to di pɔsin we fɔ kɔlɛkt di taks if i pe pas ɔl di wan dɛn we want da wok de. Dɔn insɛf de gi wok to ɔda pipul dɛn fɔ kɔlɛkt di taks dɛn, ɛn dɛn ɔl sɛf de tray fɔ mek prɔfit. I tan lɛk se Zakiɔs bin gɛt dɛn kayn pipul dɛn de we bin de wok fɔ am. (Lyuk 19:1, 2) No wɔnda we di pipul dɛn bin et dis kayn we aw dɛn bin de kɔlɛkt taks, ɛn dɛn bin et di pipul dɛn we bin de kam kɔlɛkt di taks to dɛn.