1. Akɔdin to 1 Pita 5:​2, us ɔnɔ ɛlda dɛn gɛt?

 KRISTIAN ɛlda dɛn nid fɔ kia fɔ Jiova in ship dɛn we i rili valyu. Dɛn fetful brɔda dɛn ya valyu di ɔnɔ we dɛn gɛt fɔ sav dɛn brɔda ɛn sista dɛn, ɛn dɛn de wok tranga wan fɔ bi“shɛpad dɛn . . . we [de] luk afta dɛm.” (Jɛr. 23:​4; Rid 1 Pita 5:​2.) Wi rili gladi fɔ gɛt dɛn kayn man dɛn ya na wi kɔngrigeshɔn dɛn!

2. Us tin dɛn go tɛst sɔm ɛlda dɛn?

² We ɛlda dɛn de du dɛn wok dɛn, dɛn kin gɛt bɔku prɔblɛm dɛn. Fɔ tru, ɛlda dɛn nid fɔ wok tranga wan fɔ kia fɔ di kɔngrigeshɔn. Wan ɛlda we de na Amɛrika we nem Toni, bin nid fɔ lan se nɔto ɔltin i go ebul fɔ du we i kam pan di wok dɛn we i de gri fɔ tek. I tɔk se: “We di COVID-19 pandɛmik bin bigin, a bin tek bɔku wok dɛn fɔ ɔganayz mitin dɛn ɛn fil savis. Bɔt, ilɛk wetin a du, bɔku wok kin stil de fɔ du. As tɛm de go, a nɔ bin gɛt tɛm fɔ du mi Baybul ridin, pasɔnal stɔdi, ɛn fɔ pre.” Wan ɛlda na Kosovo we nem Ila bin gɛt difrɛn prɔblɛm. We i bin de na say usay dɛn de fɛt wɔ, i nɔ bin izi fɔ am fɔ obe di tin dɛn we di ɔganayzeshɔn de tɛl am fɔ du. I tɔk se: “I nɔ bin izi fɔ mek a gɛt maynd we di branch ɔfis sɛn mi fɔ go ɛp mi brɔda ɛn sista dɛn na wan eria we nɔ bin sef. A bin de fred, ɛn di tin dɛn we dɛn tɛl mi fɔ du nɔ bin luk mek sɛns.” Tim, we na wan mishɔnari we de na Eshia, bin si se i nɔ izi fɔ mek i du ɔl di tin dɛn we i nid fɔ du ɛvride. I tɔk se: “Sɔntɛnde, a kin rili taya fɔ kia fɔ di brɔda ɛn sista dɛn.” Wetin go ɛp ɛlda dɛn we de gɛt dɛn sem kayn prɔblɛm dɛn ya?

3. Aw wi ɔl go bɛnifit we wi tink bɔt Jɔj Gidiɔn in ɛgzampul?

³ Ɛlda dɛn go ebul lan frɔm Jɔj Gidiɔn in ɛgzampul. (Ibru. 6:​12; 11:​32) I bin de protɛkt ɛn luk afta Gɔd in pipul  dɛn. (Jɔj 2:​16; 1 Kro. 17:​6) Jɔs lɛk Gidiɔn, dɛn dɔn pik ɛlda dɛn fɔ kia fɔ Gɔd in pipul dɛn insay tɛm we tin rili tranga. (Akt 20:​28; 2 Tim. 3:​1) Wi kin lan frɔm di we aw Gidiɔn bin sho se nɔto ɔltin i ebul fɔ du, aw i bin ɔmbul, ɛn aw i bin de obe. Sɔntin bin tɛst di bia we i de bia we i bin de du in wok. Ilɛk wi na ɛlda ɔ wi nɔto ɛlda, wi go ebul lan fɔ sho se wi gladi fɔ wi ɛlda dɛn. Wi go ebul fɔ sɔpɔt dɛn spirichwal man dɛn ya we de wok tranga wan fɔ kia fɔ wi na di kɔngrigeshɔn.—Ibru. 13:​17.

4. Aw Gidiɔn bin sho se nɔto ɔltin i ebul fɔ du ɛn in na pɔsin we ɔmbul?

⁴ Gidiɔn na bin man we bin no se nɔto ɔltin i ebul fɔ du ɛn we bin ɔmbul. b We Jiova in enjɛl bin tɛl Gidiɔn se dɛn dɔn pik am fɔ go sev di Izrɛlayt dɛn frɔm di Midianayt dɛn we bin pawaful, da ɔmbul man de bin ansa am se: “Mi famili na in smɔl pas ɔl na Manasɛ in trayb, ɛn na mi na di wan we nɔ impɔtant pas ɔl na mi papa in famili.” (Jɔj. 6:​15, NWT) I bin de tink se i nɔ kwalifay fɔ du da wok de, bɔt Jiova bin no se i ebul fɔ du am. Jiova bin ɛp Gidiɔn fɔ du in wok fayn fayn wan.

5. Ustɛm i nɔ kin izi fɔ mek ɛlda ɔmbul insɛf ɛn sho se nɔto ɔltin i ebul fɔ du?

⁵ Ɛlda dɛn kin du dɛn bɛst fɔ sho se nɔto ɔltin dɛn ebul fɔ du ɛn dɛn na pipul dɛn we ɔmbul pan ɔltin. (Mayk. 6:​8; Akt 20:​18, 19) Dɛn nɔ kin bost bɔt di tin dɛn we dɛn ebul fɔ du ɛn di tin dɛn we dɛn dɔn du, ɛn dɛn nɔ kin tink se dɛn nɔ gɛt valyu bikɔs dɛn dɔn mek sɔm mistek dɛn. Bɔt sɔntɛnde, i nɔ kin izi fɔ mek pɔsin we na ɛlda ɔmbul insɛf ɛn sho se nɔto ɔltin i ebul fɔ du. Fɔ ɛgzampul, sɔntɛm i go gri fɔ tek bɔku wok dɛn ɛn leta kam fɔ si se i nɔ izi fɔ mek i du dɛn ɔl. Ɔ sɔntɛm i nɔ kin izi fɔ mek i ɔmbul insɛf ɛn sho se nɔto ɔltin i ebul fɔ du we sɔm pipul dɛn tɔk bad bɔt aw i du wan wok ɔ we dɛn prez am bikɔs i du wan ɔda wok fayn. We dɛn kayn tin ya apin, wetin ɛlda dɛn kin lan frɔm Gidiɔn in ɛgzampul we go ɛp dɛn?

6. Wetin ɛlda dɛn kin lan frɔm Gidiɔn in ɛgzampul fɔ bi pɔsin we de sho se nɔto ɔltin i ebul fɔ du? (Luk bak di pikchɔ.)

 ⁶ Mek lɛ ɔda pipul dɛn ɛp yu. Pɔsin we de sho se nɔto ɔltin i ebul fɔ du no se tin dɛn de we i nɔ ebul fɔ du. Gidiɔn bin sho se nɔto ɔltin i ebul fɔ du bay we i bin aks ɔda pipul dɛn fɔ ɛp am. (Jɔj 6:​27, 35; 7:​24) Na di sem tin ɛlda dɛn we gɛt sɛns kin du. Toni, we wi bin dɔn tɔk bɔt, tɔk se: “Bikɔs ɔf aw dɛn mɛn mi, a bin de gri fɔ tek mɔ wok pas wetin a ebul fɔ du. A bin disayd fɔ tɔk bɔt aw pɔsin go sho se nɔto ɔltin i ebul fɔ du na wi famili wɔship, ɛn a aks mi wɛf bɔt wetin i tink. A bin wach bak di vidio we de na jw.org we gɛt di taytul Tren, Biliv, ɛn Alaw Ɔda Pipul dɛn fɔ Du Sɔntin Jɔs Lɛk Aw Jizɔs Bin Du.” Toni bigin fɔ mek ɔda pipul dɛn ɛp am fɔ du sɔm pan in wok dɛn. Wetin bin apin afta dat? Toni tɔk se: “Pipul dɛn de na di kɔngrigeshɔn we ebul fɔ du di wok ɛn a stil gɛt bɔku tɛm fɔ mek mi padi biznɛs wit Jiova tayt mɔ ɛn mɔ.”

7. Aw ɛlda dɛn go falamakata Gidiɔn we ɔda pipul dɛn tɔk bad bɔt dɛn? (Jems 3:​13)

⁷ Nɔ vɛks if pɔsin tɔk bad bɔt yu. Wan ɔda tin we kin tɛst ɛlda dɛn na we pɔsin tɔk bad bɔt dɛn. We dis kayn tin ya apin, Gidiɔn in ɛgzampul kin ɛp ɛlda dɛn bak. Wan dawt nɔ de se bikɔs Gidiɔn bin no se i nɔ pafɛkt, i nɔ bin vɛks we di Ifremayt dɛn tɔk bad bɔt am. (Jɔj 8:​1-3) Gidiɔn nɔ bin vɛks we i bin de ansa dɛn. I bin sho se in na man we ɔmbul bay we i bin lisin to di tin dɛn we bin de mɔna dɛn, ɛn i bin tɔk fayn to dɛn, ɛn dat bin mek dɛn at kol. Ɛlda dɛn we gɛt sɛns de falamakata Gidiɔn bay we dɛn de tek tɛm lisin ɛn tɔk fayn we ɔda pipul dɛn tɔk bad bɔt dɛn. (Rid Jems 3:​13.) So dɛn de ɛp fɔ mek pis de na di kɔngrigeshɔn.

8. Wetin ɛlda dɛn fɔ du we dɛn prez dɛn? Gi wan ɛgzampul.

⁸ Gi Jiova ɔl di prez. We pipul dɛn bin prez Gidiɔn fɔ di win we i win di Midianayt dɛn pan fɛt, na Jiova i bin gi di prez. (Jɔj 8:​22, 23) Aw ɛlda dɛn go falamakata Gidiɔn? Dɛn fɔ gi Jiova di prez fɔ di tin dɛn we dɛn ebul fɔ du. (1 Kɔr. 4:​6, 7) Fɔ ɛgzampul, if dɛn prez wan ɛlda fɔ we i sabi tich fayn fayn wan, i fɔ mek dɛn no se di tin dɛn we i de tich na frɔm Gɔd in Wɔd ɛn wi ɔl de lan frɔm Jiova in ɔganayzeshɔn. Ɛlda dɛn go ebul fɔ tink if di we aw dɛn de tich de ɔnɔ Jiova ɔ dɛn want mek pipul dɛn kɔle dɛn. Lɛ wi tɔk bɔt wan ɛlda we nem Timoti in ɛkspiriɛns. We dɛn jɔs pik Timoti fɔ bi ɛlda, i bin lɛk fɔ gi pɔblik tɔk dɛn. I tɔk se: “A kin bigin mi tɔk dɛn bay we a de tɔk fɔ lɔng tɛm ɛn yuz ɛgzampul dɛn we at fɔ ɔndastand. Bɔku tɛm, dis kin mek pipul dɛn prez mi. Bɔt dat bin de mek pipul dɛn pe atɛnshɔn pan mi ɛn dɛn nɔ bin de pe atɛnshɔn pan di Baybul ɔ Jiova.” As tɛm de go, Timoti bin si se i nid fɔ chenj di we aw i de tich so dat pipul dɛn nɔ go pe atɛnshɔn pan am tumɔs. (Prɔv. 27:​21) Wetin bin apin afta dat? I tɔk se: “Naw difrɛn brɔda ɛn sista dɛn de tɛl mi bɔt aw mi tɔk dɔn ɛp dɛn fɔ bia wit dɛn prɔblɛm, we sɔntin tɛst dɛn, ɔ fɔ kam nia Jiova mɔ. A kin gladi mɔ we dɛn kin tɔk dɛn kayn tin dɛn de pas aw a bin de gladi di tɛm we dɛn bin de prez mi.”

9. Wetin mek i nɔ bin izi fɔ mek Gidiɔn obe Jiova ɛn sho se i gɛt maynd? (Luk di pikchɔ na di frɔnt pej.)

⁹ Afta Jiova bin pik Gidiɔn fɔ bi jɔj na Izrɛl, i bin nid fɔ obe ɛn sho se i gɛt  maynd. Jiova bin gi am wok we nɔ bin izi fɔ du, dat na fɔ dɔnawe wit in papa in ɔlta usay in papa bin de wɔship Beal. (Jɔj 6:​25, 26) Leta, afta we Gidiɔn dɔn gɛda in sojaman dɛn, Jiova bin tɛl am tu tɛm se i fɔ ridyus in sojaman dɛn. (Jɔj 7:​2-7) Faynali, Jiova bin tɛl am fɔ atak di ɛnimi kamp midul nɛt.—Jɔj 7:​9-11.

10. Wetin go apin we go mek i nɔ izi fɔ mek ɛlda obe?

¹⁰ Ɛlda dɛn fɔ “rɛdi fɔ obe.” (Jems 3:​17) Ɛlda we de obe rɛdi fɔ du wetin di Baybul se ɛn fɔ fala di dayrɛkshɔn we Gɔd in ɔganayzeshɔn de gi. So i de sɛt fayn ɛgzampul fɔ ɔda pipul dɛn, bɔt sɔntɛnde i nɔ go izi fɔ am fɔ obe. Fɔ ɛgzampul, sɔntɛm i go gɛt bɔku dayrɛkshɔn dɛn ɔ dɛn kin chenj sɔm dayrɛkshɔn dɛn kwik wan, ɛn i nɔ izi fɔ am fɔ aplay dɛn. Sɔntɛm, tɛm dɛn kin de we i go de wɔnda if wan patikyula dayrɛkshɔn we dɛn gi rili mek sɛns ɔ sɔntɛm dɛn go gi am wok we go mek dɛn arɛst am. Aw ɛlda dɛn go ebul fɔ falamakata Gidiɔn in ɛgzampul fɔ obe we dɛn kayn tin dɛn ya apin?

11. Wetin go ɛp ɛlda dɛn fɔ obe?

¹¹ Tek tɛm lisin to dayrɛkshɔn ɛn aplay am. Gɔd bin tɛl Gidiɔn aw i fɔ dɔnawe wit in papa in ɔlta, usay i fɔ bil di nyu ɔlta fɔ Jiova, ɛn us animal fɔ sakrifays. Gidiɔn nɔ bin kwɛstyɔn Jiova, i jɔs du wetin Jiova bin tɛl am fɔ du. Tide, ɛlda dɛn de gɛt dayrɛkshɔn dɛn frɔm Jiova in ɔganayzeshɔn tru lɛta dɛn, anawnsmɛnt dɛn, ɛn ɔda gaydlayn dɛn we de ɛp wi fɔ de sef wan ɛn kɔntinyu fɔ de nia Jiova. Wi lɛk di ɛlda dɛn bikɔs dɛn de fala di dayrɛkshɔn frɔm Jiova in ɔganayzeshɔn fetful wan. Ɔlman na di kɔngrigeshɔn de bɛnifit.—Sam 119:​112.

12. Aw ɛlda dɛn go aplay wetin de na Ibruz 13:​17 if Jiova in ɔganayzeshɔn tɛl dɛn fɔ chenj di we aw dɛn de du tin dɛn?

¹² Rɛdi fɔ ajɔst. Mɛmba se bikɔs Gidiɔn bin want fɔ du wetin Jiova tɛl am, i bin ridyus in sojaman dɛn pas 99 pasɛnt. (Jɔj 7:​8) Sɔntɛm i go dɔn tink se, ‘Fɔ se wi rili nid fɔ mek dis chenj? Fɔ se dis go wok?’ Bɔt Gidiɔn bin obe. Tide, ɛlda dɛn go falamakata Gidiɔn bay we dɛn de obe we di ɔganayzeshɔn tɛl dɛn fɔ du sɔntin difrɛn we. (Rid Ibruz 13:​17.) Fɔ ɛgzampul, insay 2014, di Gɔvnin Bɔdi bin chenj di we aw dɛn go yuz mɔni fɔ bil Kiŋdɔm Ɔl ɛn Asɛmbli Ɔl dɛn. (2 Kɔr. 8:​12-14) Trade, di ɔganayzeshɔn bin de lɛnt mɔni to kɔngrigeshɔn dɛn fɔ bil ɛn di kɔngrigeshɔn dɛn bin de pe di mɔni bak. Bɔt naw di ɔganayzeshɔn de yuz di kɔntribyushɔn dɛn frɔm ɔl di kɔngrigeshɔn dɛn na di wɔl fɔ bil Kiŋdɔm Ɔl ɛn Asɛmbli Ɔl dɛn ɛnisay we dɛn nid dɛn, ilɛk na smɔl kɔntribyushɔn di kɔngrigeshɔn de gi. We  Oze bin kam fɔ no bɔt dis, i bin dawt if i go wok. I bin tink se: ‘Dɛn nɔ go ebul fɔ bil ivin wan Kiŋdɔm Ɔl. Nɔto so dɛn de du tin dɛn na dis pat na di wɔl.’ Wetin bin ɛp Oze fɔ sɔpɔt dis dayrɛkshɔn? I tɔk se: “Di wɔd dɛn na Prɔvabs 3:​5, 6 bin mɛmba mi fɔ abop pan Jiova. Ɛn di rizɔlt dɛn wɔndaful! Wi nɔ jɔs ebul fɔ bil mɔ Kiŋdɔm Ɔl dɛn, bɔt wi dɔn lan fɔ gi kɔntribyushɔn dɛn difrɛn we dɛn so dat ɔltin go ikwal.”

13. (a) Wetin Gidiɔn bin biliv tranga wan? (b) Aw ɛlda dɛn go falamakata Gidiɔn? (Luk bak di pikchɔ.)

¹³ Gɛt maynd fɔ du wetin Jiova want. Gidiɔn bin obe Jiova pan ɔl we i bin de fred ɛn di wok we dɛn gi am bin put in layf pan denja. (Jɔj 9:​17) Afta Jiova bin dɔn prɔmis am, Gidiɔn bin biliv tranga wan se Gɔd go sɔpɔt am we i de protɛkt Gɔd in pipul dɛn. Ɛlda dɛn we de na eria dɛn usay dɛn dɔn ban wi wok de falamakata Gidiɔn. Dɛn gɛt maynd fɔ de bifo na di mitin dɛn ɛn na di prichin wok pan ɔl we dɛn de trɛtin dɛn fɔ arɛst dɛn, kwɛstyɔn dɛn, mek dɛn lɔs dɛn wok, ɔ bit dɛn. c Insay di tɛm fɔ da big big trɔbul, ɛlda dɛn go nid fɔ gɛt maynd fɔ obe ɛni dayrɛkshɔn we dɛn gɛt, ivin if dat go put dɛn layf pan denja. Fɔ ɛgzampul, sɔntɛm dɛn go gi wi dayrɛkshɔn fɔ prich jɔjmɛnt mɛsej ɛn wetin wi fɔ du fɔ sev di tɛm we Gɔg we de na Megɔg go atak wi.—Izi. 38:​18; Rɛv. 16:​21.

14. Wetin mek i nɔ bin izi fɔ lɛ Gidiɔn bia?

¹⁴ Gidiɔn bin nid fɔ wok tranga wan fɔ bi jɔj. We di Midianayt dɛn bin rɔnawe di nɛt we dɛn bin de fɛt, Gidiɔn bin rɔnata dɛn frɔm di Vali we de na Jezriɛl te to di Jɔdan Riva, ɛn i go bi se na ples we bin gɛt bush bush. (Jɔj 7:​22) Fɔ se Gidiɔn bin stɔp na di Jɔdan Riva? Nɔ! Pan ɔl we i bin taya, in ɛn in 300 man dɛn bin  krɔs di riva ɛn kɔntinyu fɔ rɔnata di Midianayt dɛn. Faynali, dɛn bin kech di Midianayt dɛn ɛn kil dɛn.—Jɔj 8:​4-12.

15. Wetin mek sɔntɛnde i nɔ kin izi fɔ lɛ ɛlda bia?

¹⁵ Sɔntɛnde, ɛlda go rili taya bikɔs i de kia fɔ di kɔngrigeshɔn ɛn in famili. We dat apin, aw ɛlda dɛn go falamakata Gidiɔn?

16-17. Wetin bin ɛp Gidiɔn fɔ bia? Wetin ɛlda dɛn fɔ biliv? (Ayzaya 40:​28-31) (Luk bak di pikchɔ.)

¹⁶ Biliv se Jiova go gi yu di trɛnk we yu nid. Gidiɔn bin biliv se Jiova go gi am trɛnk, ɛn Jiova bin du dat. (Jɔj 6:​14, 34) Wantɛm, Gidiɔn ɛn in man dɛn bin de rɔnata tu Midianayt kiŋ dɛn, ɛn i go bi se di kiŋ dɛn bin de rayd kamɛl dɛn. (Jɔj 8:​12, 21) Bɔt Jiova bin ɛp di Izrɛlayt dɛn fɔ kech dɛn ɛn win di fɛt. Ɛlda dɛnsɛf kin abop pan Jiova bikɔs “i nɔ de wik [ɛn] i nɔ de taya.” I go gi dɛn trɛnk we dɛn nid am.—Rid Ayzaya 40:​28-31.

¹⁷ Tink bɔt wan brɔda we nem Matyu in ɛkspiriɛns, we na mɛmba na di Hospital Liaison Committee. Wetin de ɛp am fɔ bia? Matyu tɔk se: “A kin gɛt di trɛnk we de kɔmɔt frɔm Jiova we Filipians 4:​13 tɔk bɔt. Bɔku tɛm, we a bin rili taya ɛn fil se a nɔ go ebul fɔ kɔntinyu, a bin rili pre to Jiova ɛn beg am fɔ mek i gi mi di trɛnk we a nid fɔ sɔpɔt mi brɔda dɛn. Dɛn tɛm dɛn de, Jiova in spirit bin gi mi trɛnk we bin ɛp mi fɔ bia.” Jɔs lɛk Gidiɔn, wi ɛlda dɛn de wok tranga wan fɔ kia fɔ Jiova in pipul dɛn pan ɔl we i nɔ kin izi ɔltɛm. Na tru se dɛn fɔ bi pɔsin we no se nɔto ɔltin dɛn ebul fɔ du ɛn no se nɔto ɔltin we dɛn want fɔ du dɛn go ebul du ɔltɛm. Bɔt dɛn fɔ biliv se Jiova go yɛri we dɛn pre to am fɔ ɛp ɛn i go gi dɛn trɛnk fɔ bia.—Sam 116:​1; Fil. 2:​13.

18. Fɔ rivyu, aw ɛlda dɛn go falamakata Gidiɔn?

¹⁸ Ɛlda dɛn go ebul lan bɔku tin frɔm Gidiɔn in ɛgzampul. Ɛlda dɛn fɔ bi pɔsin we no se nɔto ɔltin i ebul fɔ du ɛn we ɔmbul we i kam pan di wok dɛn we dɛn de gri fɔ du ɛn we ɔda pipul dɛn tɔk bad bɔt dɛn ɔ prez dɛn. Dɛn nid fɔ sho se dɛn na pipul dɛn we de obe ɛn we gɛt maynd mɔ we di tɛm fɔ mek dis wɔl dɔn de kam nia. Dɛn nid fɔ biliv se ilɛk us prɔblɛm go mit dɛn, Gɔd go gi dɛn trɛnk. Fɔ tru, wi rili gladi fɔ dɛn shɛpad dɛn ya we de wok tranga wan, ɛn wi go “kɔntinyu fɔ rili valyu dɛn kayn man dɛn” ya.—Fil. 2:​29.