1-2. Jɔs lɛk Lɔt, us prɔblɛm Kristian dɛn gɛt tide?

 WE WI si di bad we aw pipul dɛn de biev tide we i kam pan mami ɛn dadi biznɛs, wi kin fil di sem we aw Lɔt bin de fil. I “bin tɔmɛnt bad bad wan bikɔs di pipul dɛn . . . nɔ bin de obe lɔ,” ɛn i bin no se wi Papa we de na ɛvin et we pipul dɛn de biev bad we. (2 Pit. 2:​7, 8) Bikɔs Lɔt bin rili rɛspɛkt ɛn lɛk Gɔd, i bin et di bad we aw pipul dɛn we bin de arawnd am de biev we i kam pan mami ɛn dadi biznɛs. Wisɛf gɛt pipul dɛn arawnd wi we nɔ gɛt wan rɛspɛkt fɔ Jiova in lɔ bɔt mami ɛn dadi biznɛs. Pan ɔl dat, wi go stil ebul avɔyd mami ɛn dadi biznɛs di we aw Gɔd nɔ want ɛn bi klin pipul dɛn if wi kɔntinyu fɔ lɛk Gɔd ɛn lan fɔ gɛt dip rɛspɛkt fɔ am.—Prɔv. 14:​2.

² Jiova de ɛp wi fɔ du dat bay we i de yuz di Baybul buk we nem Prɔvabs fɔ ɛnkɔrej wi. Ɔl Kristian dɛn, man ɛn uman dɛn, yɔŋ wan ɛn ol wan dɛn, go rili bɛnifit frɔm di fayn advays we de de.

3. Akɔdin to Prɔvabs 17:​3 (NWT), wetin na wan rizin we mek wi nid fɔ protɛkt wi at? (Luk bak di pikchɔ.)

³ Wan men rizin we mek wi fɔ protɛkt wi at na bikɔs Jiova de chɛk wi at. Dis min se i de si pas wetin ɔda pipul dɛn ebul fɔ si ɛn i no uskayn pɔsin wi rili bi insay. (Rid Prɔvabs 17:​3, NWT.) I go lɛk wi if wi kɔntinyu fɔ tink bɔt in advays we go ɛp wi fɔ gɛt layf we go de sote go. (Jɔn 4:​14) Dɔn di bad we aw pipul dɛn de biev we i kam pan mami ɛn dadi biznɛs ɛn di lay lay tin dɛn we Setan ɛn di wikɛd pipul dɛn na in wɔl de tɔk nɔ go ambɔg wi. (1 Jɔn 5:​18, 19) As wi de kam nia Jiova mɔ ɛn mɔ, na so wi go lɛk ɛn rɛspɛkt am mɔ ɛn mɔ. Bikɔs wi nɔ want fɔ mek wi Papa in at pwɛl, wi go et ivin di tink we wi de tink fɔ sin. We sɔntin  tɛmt wi, wi go aks wisɛf dis kwɛstyɔn, ‘Aw a go mek Pɔsin we dɔn sho se i rili lɛk mi gɛt pwɛlat?’—1 Jɔn 4:​9, 10.

4. Aw di fred we wan sista de fred Jiova bin protɛkt am fɔ mek i nɔ du sɔntin we rɔng?

⁴ Wan sista we nem Mata we de na Kroeshia, we bin gɛt tɛmteshɔn fɔ du mami ɛn dadi biznɛs di we aw Gɔd nɔ want, rayt se: “I nɔ bin izi fɔ mek a tink klia wan ɛn fɔ fɛt di fil we a bin de fil fɔ du sɔntin we rɔng. Bɔt bikɔs a de fred Jiova, dat bin protɛkt mi.” b Aw di fred we Mata de fred Gɔd bin protɛkt am? Mata tɔk se i bin de tink gud gud wan bɔt di bad tin dɛn we go apin if i du mami ɛn dadi biznɛs di we aw Gɔd nɔ want. Wisɛf go ebul du di sem tin. Di tin we bad pas ɔl we go apin to wi na we wi go mek Jiova in at pwɛl ɛn nɔ de pat pan di pipul dɛn we go wɔship am sote go.—Jɛn. 6:​5, 6.

5. Wetin yu lan frɔm Lio in ɛkspiriɛns?

⁵ We wi de fred Jiova, wi de tek tɛm mek wi nɔ bi padi to di wan dɛn we de du bad tin dɛn. Wan brɔda we nem Lio we de na Kongo, bin lan da lɛsin de. Afta i bin dɔn baptayz fɔ 4 ia, i bin mek padi wit pipul dɛn we bin de du bad tin dɛn. I bin tink se dat nɔ bad as lɔng as i nɔ de du bad tin dɛn. Bɔt i nɔ te, in padi dɛn mek i bigin drink te i chak ɛn du mami ɛn dadi biznɛs di we aw Gɔd nɔ want. Dɔn i bigin fɔ tink bɔt wetin in mama ɛn papa we na Kristian bin dɔn tich am ɛn di gladi-at we i bin gɛt we i bin de sav Jiova. Wetin dat bin mek i du? I bin stat fɔ du di rayt tin bak. Di ɛlda dɛn bin ɛp am fɔ kam bak to Jiova. Naw in na ɛlda ɛn spɛshal payɔnia, ɛn i gladi.

6. Us ɛgzampul bɔt tu “uman dɛn” wi go kam tɔk bɔt?

⁶ Lɛ wi tɔk bɔt Prɔvabs chapta 9, usay wi rid bɔt tu uman dɛn. Wan pan dɛn  tinap fɔ sɛns ɛn di ɔda wan tinap fɔ di wɔd fulish. (Fɔ ɔda ɛgzampul dɛn usay di Baybul tɔk bɔt tin dɛn lɛk se na pipul dɛn, rid Romans 5:​14; Galeshians 4:​24.) As wi de du dat, mɛmba se Setan in wɔl ful-ɔp wit mami ɛn dadi biznɛs di we aw Gɔd nɔ want ɛn rud rud pikchɔ ɛn fim dɛn. (Ɛfi. 4:​19) So i impɔtant fɔ mek wi kɔntinyu fɔ lan aw fɔ fred Gɔd ɛn avɔyd fɔ du bad. (Prɔv. 16:​6) Dat go mek wi ɔl, ilɛk wi na man ɔ uman, bɛnifit frɔm wetin dis chapta de se. Prɔvabs tɔk bɔt di tu uman dɛn se dɛn de invayt pɔsin we nɔ gɛt ɛkspiriɛns, dat na di wan dɛn we “nɔ gɛt sɛns.” Dɛn ɔl tu de tɔk se, ‘Kam na mi os ɛn it.’ (Prɔv. 9:​1, 5, 6, 13, 16, 17, NWT) Bɔt wetin go apin to di wan dɛn we gri fɔ go usay dɛn invayt dɛn rili difrɛn.

7. Akɔdin to Prɔvabs 9:​13-18 (NWT), wetin go apin to di wan dɛn we gri fɔ go usay di uman we ful de kɔl dɛn? (Luk bak di pikchɔ.)

⁷ Rid di inviteshɔn we kɔmɔt frɔm di “uman we ful.” (Rid Prɔvabs 9:​13-18, NWT.) I nɔ de shem fɔ kɔl di wan dɛn we nɔ gɛt sɛns. I se, “Kam insay ya” ɛn it wit mi. Wetin go apin to dɛn? “Na dayman dɛn de na in os.” I go bi se yu mɛmba se wi dɔn rid sɔntin we fiba dis insay di fɔs chapta dɛn na Prɔvabs. I wɔn wi bɔt di “wewɔd” ɛn “bambot uman.” I tɛl wi se: “Fɔ go na in os tan lɛk we pɔsin de go fɛn day.” (Prɔv. 2:​11-19, NWT) Prɔvabs 5:​3-10 (NWT) wɔn wi bɔt wan ɔda “wewɔd uman” we in “fut de go usay day de.”

8. Wetin wi fɔ disayd?

⁸ Di wan dɛn we yɛri di “uman we ful” go nid fɔ disayd if dɛn go gri fɔ go ɔ dɛn nɔ go gri fɔ go. Sɔntɛm wisɛf go gɛt da kayn tin de fɔ disayd. Wetin wi go du if pɔsin want wi fɔ du mami ɛn dadi biznɛs di we aw Gɔd nɔ want, ɔ if wi si rud rud pikchɔ ɔ fim?

9-10. Wetin na sɔm rizin dɛn we mek wi fɔ avɔyd mami ɛn dadi biznɛs di we aw Gɔd nɔ want?

⁹ Gud rizin dɛn de we mek wi fɔ avɔyd mami ɛn dadi biznɛs di we aw Gɔd nɔ want. Di “uman we ful” de tɔk se: “Wata we dɛn tif swit.” Wetin na “wata we dɛn tif”? Di Baybul kɔmpia mami ɛn dadi biznɛs bitwin maredman ɛn in wɛf to wata we de mek pɔsin fil fayn. (Prɔv. 5:​15-18) Man ɛn uman we mared ligal wan go ɛnjɔy fɔ du mami ɛn dadi biznɛs. Bɔt dat difrɛn frɔm “wata we dɛn tif.” I min mami ɛn dadi biznɛs di we aw Gɔd nɔ want. Bɔku tɛm, pipul dɛn we de du mami ɛn dadi biznɛs di we aw Gɔd nɔ want kin du  am sikrit wan, jɔs lɛk tifman we de tray fɔ tif sɔntin. Sɔntɛm i go tan lɛk se di “wata we dɛn tif” swit mɔ if dɛn tink se nɔbɔdi nɔ go no wetin dɛn dɔn du. Dɛn de ful dɛnsɛf, bikɔs Jiova de si ɔltin. If Jiova vɛks pan wi, dat go bi di wɔs tin we go apin to wi, ɛn fɔ tru dat nɔ go fayn. (1 Kɔr. 6:​9, 10) Bɔt ɔda bad tin dɛn go apin to wi.

¹⁰ Mami ɛn dadi biznɛs di we aw Gɔd nɔ want go mek yu shem ɛn fil se yu nɔ gɛt valyu, i go mek yu gi ɔ gɛt bɛlɛ we yu nɔ want, ɛn i kin skata famili. Dis sho klia wan se i mek sɛns fɔ mek wi nɔ gri fɔ go to di uman we ful in “os” ɛn it de. Dɔn bak, apat frɔm we wi go stɔp fɔ bi Jiova in padi, bɔku pipul dɛn we de du mami ɛn dadi biznɛs di we aw Gɔd nɔ want de gɛt sik dɛn we kin kil dɛn. (Prɔv. 7:​23, 26) Vas 18 insay chapta 9 ɛnd wit dɛn wɔd dɛn ya: “Di wan dɛn we de go fɛn am de dɔŋ di Grev.” Bɔt wetin mek bɔku pipul dɛn de gri fɔ tek in inviteshɔn we go mek dɛn gɛt prɔblɛm?—Prɔv. 9:​13-18, NWT.

11. Wetin mek i rili bad fɔ wach rud rud pikchɔ ɔ fim dɛn?

¹¹ Wan kɔmɔn trap we wi nid fɔ avɔyd na rud rud pikchɔ ɔ fim dɛn. Sɔm pipul dɛn kin tink se i nɔ bad fɔ wach rud rud pikchɔ ɔ fim dɛn. Bɔt rud rud pikchɔ ɔ fim dɛn kin ambɔg pipul dɛn, i de mek dɛn nɔ gɛt rɛspɛkt fɔ dɛnsɛf ɛn ɔda pipul dɛn, ɛn i nɔ kin izi fɔ mek dɛn stɔp di abit fɔ de luk am. If pɔsin wach rud rud pikchɔ dɛn, i nɔ go izi fɔ mek i fɔgɛt dɛn pikchɔ dɛn de. Dɔn bak, rud rud pikchɔ ɔ fim dɛn nɔ de ɛp pɔsin fɔ avɔyd fɔ fil fɔ du di rɔng tin dɛn; i de mek dɛn filin dɛn de strɔng mɔ ɛn mɔ. (Kol. 3:​5; Jems 1:​14, 15) Fɔ tru, bɔku pan di wan dɛn we de wach rud rud pikchɔ ɔ fim dɛn kin du mami ɛn dadi biznɛs di we aw Gɔd nɔ want.

12. Aw wi go sho se wi de tray fɔ avɔyd pikchɔ dɛn we go mek wi tink bɔt mami ɛn dadi biznɛs di we aw Gɔd nɔ want?

¹² Wetin wi fɔ du as Kristian dɛn if rud rud pikchɔ jɔs apia na wi ilɛktronik divays? Wi fɔ stɔp fɔ luk am wantɛm wantɛm. I go izi fɔ mek wi du dat if wi mɛmba se di tin we wi gɛt we valyu pas ɔl na wi padi biznɛs wit Jiova. Ivin sɔm pikchɔ dɛn we pipul dɛn kin tink se nɔto rud rud pikchɔ dɛn kin mek wi tink bɔt mami ɛn dadi biznɛs di we aw Gɔd nɔ want. Wetin mek wi fɔ avɔyd dɛn? Na bikɔs wi nɔ ivin want fɔ tink bɔt fɔ du mami ɛn dadi biznɛs di we aw Gɔd nɔ want. (Mat. 5:​28, 29) Wan ɛlda we de na Tayland we nem Devid tɔk se: “A kin aks misɛf: ‘Pan ɔl we sɔntɛm di pikchɔ dɛn nɔto rud rud pikchɔ dɛn, fɔ se Jiova go gladi if a kɔntinyu fɔ wach dɛn?’ Dis kayn we aw a de tink kin ɛp mi fɔ du di rayt tin.”

13. Wetin go ɛp wi fɔ du di rayt tin?

¹³ We wi de fred fɔ du ɛnitin we go mek Jiova nɔ gladi, dat go ɛp wi fɔ du di rayt tin. Fɔ fred Gɔd na di “fɔs tin we pɔsin fɔ du fɔ gɛt sɛns.” (Prɔv. 9:​10, NWT) Wi si dis na di biginin na Prɔvabs chapta 9, usay di Baybul kɔmpia tru tru “sɛns” to ɔda uman.

14. Us difrɛn inviteshɔn wi rid bɔt na Prɔvabs 9:​1-6 (NWT)?

¹⁴ Rid Prɔvabs 9:​1-6, NWT. Insay dɛn vas dɛn ya, wi rid bɔt di invayt we Jiova de invayt wi, we na di Wan we mek wi ɛn we na frɔm am sɛns kɔmɔt. (Prɔv. 2:​6; Rom. 16:​27) Di vas dɛn tɔk bɔt big os we gɛt sɛvin pila dɛn. Dis ɛgzampul sho se  Jiova gɛt fri-an ɛn i de wɛlkɔm ɔl di wan dɛn we want fɔ lan frɔm am so dat dɛn go gɛt sɛns.

15. Wetin Gɔd de invayt wi fɔ du?

¹⁵ Jiova na Gɔd we gɛt fri-an, ɛn i de gi wi bɔku tin dɛn. Frɔm di ɛgzampul bɔt di uman na Prɔvabs chapta 9 we tinap fɔ tru tru “sɛns,” wi lan se Jiova na Gɔd we gɛt fri-an ɛn i de gi wi bɔku gud tin dɛn. Dɛn vas dɛn ya se dis uman de invayt pipul dɛn fɔ go na in os ɛn it swit fud we gɛt bif ɛn wayn we i dɔn pripia. (Prɔv. 9:​2, futnot.) Dɔn, akɔdin to vas 4 ɛn 5: “I [we na tru tru sɛns] tɛl di wan we nɔ gɛt gud sɛns se: ‘Kam, it mi bred.’” Wetin mek wi fɔ go na tru tru sɛns in os ɛn it di fud we i de gi wi? Na bikɔs Jiova want in pikin dɛn fɔ gɛt sɛns ɛn de sef wan. I nɔ want wi fɔ mek mistek dɛn we go ambɔg wi. Na dat mek “na in de mek di wan we de du wetin rayt du tin wit sɛns.” (Prɔv. 2:​7, NWT) We wi de fred Jiova di rayt we, wi go want fɔ mek i gladi. Wi de lisin to in fayn advays, ɛn wi gladi fɔ fala am.—Jems 1:​25.

16. Aw di fred we Alan de fred Gɔd ɛp am fɔ du di rayt tin? Wetin bin apin afta dat?

¹⁶ Tink bɔt aw Alan bin ebul fɔ disayd fɔ du di rayt tin bikɔs i bin de fred Gɔd. Alan na ɛlda na wan kɔngrigeshɔn ɛn na skul ticha. I tɔk se: “Bɔku pan mi kɔmpin ticha dɛn de si rud rud fim dɛn as we fɔ lan bɔt mami ɛn dadi biznɛs.” Bɔt Alan bin no se dat nɔto tru. I tɔk se: “Bikɔs a lɛk ɛn rɛspɛkt Jiova, a nɔ bin gri fɔ wach dɛn fim dɛn de. A bin ɛksplen bak di rizin we mek a nɔ de wach dɛn fim dɛn de to mi kɔmpin ticha dɛn.” I bin de fala di advays frɔm tru tru “sɛns” fɔ “waka na di rod we go mek pɔsin ɔndastand.” (Prɔv. 9:​6, NWT) Sɔm pan di ɔda ticha dɛn bin rili kɔle Alan, ɛn naw dɛn de stɔdi di Baybul ɛn atɛnd di mitin dɛn.

17-18. Us gud tin dɛn pipul dɛn de ɛnjɔy we dɛn gri fɔ go to tru tru “sɛns”? Wetin dɛn de wet fɔ? (Luk bak di pikchɔ.)

¹⁷ Jiova de yuz dɛn tu uman dɛn de dɛn ɛgzampul fɔ sho wi wetin wi fɔ du fɔ mek wi go gladi tumara bambay. Di wan dɛn we gri fɔ go to di “uman we ful” de du mami ɛn dadi biznɛs di we aw Gɔd nɔ want fɔ ɛnjɔy dɛnsɛf. Bɔt dɛn nɔ no se wetin dɛn de du go afɛkt wetin go apin to dɛn tumara bambay. I go mek dɛn go “dɔŋ di Grev.”—Prɔv. 9:​13, 17, 18, NWT.

¹⁸ Wetin go apin to di wan dɛn we gri fɔ go to di uman we tinap fɔ tru tru “sɛns” rili difrɛn. Dɛn gladi bikɔs dɛn gɛt ɔl di tin dɛn we dɛn nid fɔ kɔntinyu fɔ de nia Jiova. (Ayz. 65:​13) Jiova bin yuz prɔfɛt  Ayzaya fɔ tɔk se: “Una lisin gud wan to mi, ɛn it wetin gud, ɛn una go rili gladi fɔ wetin fayn.” (Ayz. 55:​1, 2, NWT) Wi de lan fɔ lɛk wetin Jiova lɛk ɛn et wetin i et. (Sam 97:​10) Ɛn wi gladi bikɔs wi de invayt ɔda pipul dɛn fɔ lan frɔm tru tru “sɛns.” Wi tan lɛk di savant dɛn we de “ala frɔm di say dɛn we ay na di siti se: ‘Ɛnibɔdi we nɔ gɛt ɛkspiriɛns, lɛ i kam insay ya.’” Di bɛnifit dɛn fɔ wi ɛn di wan dɛn we go lisin nɔto fɔ jɔs ya ɛn naw. Dɛn nɔ de dɔn, dɛn go mek wi “[de]” sote go as wi de “waka na di rod we go mek pɔsin ɔndastand.”—Prɔv. 9:​3, 4, 6, NWT.

19. Akɔdin to Ɛkliziastis 12:​13, 14, wetin wi fɔ mekɔp wi maynd fɔ du? (Luk bak di bɔks we gɛt di taytul “ Wi De Bɛnifit we Wi De Fred Gɔd.”)

¹⁹ Rid Ɛkliziastis 12:​13, 14. We wi gɛt dip rɛspɛkt fɔ Jiova, dat go protɛkt wi ɛn ɛp wi fɔ liv klin layf ɛn gɛt tayt padi biznɛs wit am insay dis las dez. Wi go kɔntinyu fɔ invayt bɔku pipul dɛn we wi ebul fɔ invayt fɔ luk fɔ tru tru “sɛns” ɛn lan frɔm am bikɔs wi lɛk ɛn rɛspɛkt Jiova wit ɔl wi at.