Di Baybul nɔ tɛl wi. Bɔt i tɛl wi sɔm tin dɛn we apin we sɔntɛm go dɔn mek dɛn bin disayd nɔ fɔ go bak na Nazarɛt da tɛm de.

Wan enjɛl bin tɛl Meri se i go gɛt bɛlɛ ɛn bɔn pikin. We di enjɛl bin tɛl am dis mɛsej, Meri ɛn Josɛf bin de na Nazarɛt, we na Josɛf in om-tɔŋ na Galili. (Lyuk 1:​26-31; 2:​4) Leta, we dɛn kɔmɔt na Ijipt, dɛn bin go bak na Nazarɛt. Na de Jizɔs bin mɛn ɛn bi Nazarin. (Mat. 2:​19-23) Na dat mek wi kin tink bɔt Nazarɛt we wi de tɔk bɔt Jizɔs, Josɛf, ɛn Meri.

Meri bin gɛt fambul na Juda we nem Ilizabɛt. Ilizabɛt na bin di prist we nem Zakaraya in wɛf ɛn na in bin bi Jɔn we De Baptayz Pipul Dɛn in mama. (Lyuk 1:​5, 9, 13, 36) Meri bin go waka to Ilizabɛt ɛn i bin de wit am fɔ tri mɔnt na Juda. Dɔn Meri bin go bak na Nazarɛt. (Lyuk 1:​39, 40, 56) So Meri bin sabi di eria na Juda.

As tɛm de go, Josɛf bin obe di lɔ “fɔ rɛjista.” So Josɛf bin travul frɔm Nazarɛt to Bɛtliɛm we na bin “Devid in siti” ɛn na de dɛn bin tɔk se dɛn gɛt fɔ bɔn di Mɛsaya. (Lyuk 2:​3, 4; 1 Sam. 17:​15; 20:​6; Mayk. 5:​2) Afta we Meri bɔn Jizɔs na Bɛtliɛm, Josɛf nɔ bin mek i travul go bak na Nazarɛt wit di yɔŋbebi we i jɔs bɔn. Dɛn bin kɔntinyu fɔ de na Bɛtliɛm we na bin lɛk nayn kilomita (arawnd 6 mayl) frɔm Jerusɛlɛm. So i bin izi fɔ dɛn fɔ go wit dɛn yɔŋbebi na di tɛmpul ɛn mek di sakrifays we di lɔ se dɛn fɔ gi.—Lɛv. 12:​2, 6-8; Lyuk 2:​22-24.

Gɔd in enjɛl bin dɔn tɛl Meri se Gɔd go gi in bɔypikin “Devid in tron” ɛn i go “rul as Kiŋ.” Sɔntɛm Josɛf ɛn Meri bin ɔndastand se i impɔtant fɔ mek Jizɔs bɔn na Devid in siti. (Lyuk 1:​32, 33; 2:​11, 17) Sɔntɛm dɛn bin tink se i mek sɛns fɔ mek dɛn kɔntinyu fɔ wet de te Gɔd tɛl dɛn wetin dɛn fɔ du nɛks.

Wi nɔ no aw lɔng dɛn bin dɔn de na Bɛtliɛm we sɔm pipul dɛn we de stɔdi di sta dɛn bin go fɛn dɛn. Bɔt da tɛm de, di famili bin de na wan os, ɛn dɛn bɔypikin nɔto bin yɔŋbebi igen, bɔt na bin “smɔl pikin.” (Mat. 2:​11) I tan lɛk se bifo dɛn go bak na Nazarɛt, dɛn bin kɔntinyu fɔ de na Bɛtliɛm ɛn sɛtul de.

Ɛrɔd bin pas lɔ se dɛn fɔ kil “ɔl di bɔypikin dɛn na Bɛtliɛm . . . frɔm tu ia kam dɔŋ.” (Mat. 2:​16) Wan enjɛl bin dɔn wɔn Josɛf bɔt dat, so in ɛn Meri bin rɔnawe go na Ijipt wit Jizɔs ɛn de de te Ɛrɔd day. Leta, Josɛf bin go wit in famili na Nazarɛt. Wetin mek dɛn nɔ go bak na Bɛtliɛm? Na bikɔs da tɛm de, Ɛrɔd in bɔypikin we nem Akileɔs bin de rul na Judia ɛn in na bin man we rili bad. Dɔn bak, wan enjɛl bin dɔn wɔn Josɛf se i nɔ sef fɔ go de. Nazarɛt na sef ples usay Josɛf go ebul mɛn Jizɔs fɔ mek i wɔship Jiova.—Mat. 2:​19-22; 13:​55; Lyuk 2:​39, 52.

I go mɔs bi se Josɛf bin dɔn day bifo Jizɔs day ɛn mek am pɔsibul fɔ mek ɔda pipul dɛn go na ɛvin. So Josɛf go gɛt layf bak na dis wɔl. Bɔku pipul dɛn go ebul si am ɛn lan mɔ frɔm am bɔt wetin mek in ɛn Meri bin kɔntinyu fɔ de na Bɛtliɛm afta dɛn bɔn Jizɔs.