1. Wetin wi fɔ du fɔ sev di tɛm fɔ Jiova in de?

 WE DI Baybul de tɔk bɔt “Jiova in de,” i de tɔk bɔt di tɛm we Jiova go dɔnawe wit in ɛnimi dɛn ɛn sev in pipul dɛn. Trade, Jiova bin pɔnish sɔm neshɔn dɛn. (Ayz. 13:​1, 6; Izi. 13:​5; Zɛf. 1:​8) Insay wi yon tɛm, “Jiova in de” go bigin we di wan dɛn we de bifo pan pɔlitiks go dɔnawe wit Babilɔn di Gret, ɛn i go dɔn insay Amagɛdɔn. Wi nid fɔ rɛdi naw so dat wi go sev da “de” de. Jizɔs bin tich wi se wi fɔ “rɛdi” fɔ di “big big trɔbul.” Dis min se wi nid fɔ rɛdi ɔltɛm.—Mat. 24:​21; Lyuk 12:​40.

2. Wetin mek wi go ebul bɛnifit frɔm 1 Tɛsalonians?

² Insay di fɔs lɛta we apɔsul Pɔl bin rayt to di Kristian dɛn na Tɛsalonayka, i bin yuz difrɛn ɛgzampul dɛn fɔ ɛp Kristian dɛn fɔ kɔntinyu fɔ rɛdi fɔ Jiova in big big de we i go jɔj. Pɔl bin no se Jiova in de nɔ go kam da tɛm de. (2 Tɛs. 2:​1-3) Bɔt stil, i bin ɛnkɔrej in brɔda dɛn fɔ rɛdi fɔ da de de lɛk se i de kam tumara, ɛn wisɛf fɔ fala in advays. Lɛ wi tɔk bɔt aw Pɔl bin ɛksplen (1) aw Jiova in de go kam, (2) udat dɛn nɔ go sev da de de, ɛn (3) aw wi go rɛdi fɔ sev da de de.

3. Aw Jiova in de go kam lɛk tifman na nɛt? (Luk bak di pikchɔ.)

³ “Lɛk aw tifman kin kam na nɛt.” (1 Tɛs. 5:​2) Dis na di fɔs ɛgzampul pan di tri ɛgzampul dɛn we dɛn bin yuz fɔ tɔk bɔt aw Jiova in de go kam. Bɔku tɛm, tifman dɛn kin du tin kwik kwik wan, ɛn dɛn kin kam na nɛt di tɛm we pipul dɛn nɔ de ɛkspɛkt dɛn. Na so Jiova in de bak go kam kwik kwik wan ɛn bɔku pipul dɛn go sɔprayz. Sɔntɛm ivin tru Kristian dɛn go sɔprayz we dɛn go si di we aw tin dɛn go apin kwik  kwik wan. Bɔt wi nɔ tan lɛk di wikɛd wan dɛn we dɛn go dɔnawe wit.

4. Aw Jiova in de tan lɛk di pen we bɛlɛ-uman kin fil we i want fɔ bɔn?

⁴ “Lɛk di pen we bɛlɛ-uman kin fil we i want fɔ bɔn.” (1 Tɛs. 5:​3) Bɛlɛ-uman we want fɔ bɔn nɔ ebul fɔ no di patikyula tɛm we i go bɔn, bɔt i nɔ gɛt wan dawt se i go bɔn. We di tɛm rich, i go bi se i go apin kwik kwik wan, i go fil pen, ɛn natin nɔ de we i go ebul du fɔ stɔp am. Semweso, wi nɔ no di de ɛn awa we Jiova in de go bigin. Bɔt stil, wi biliv tranga wan se i go kam, ɛn di jɔj we Gɔd go jɔj di wikɛd wan dɛn go apin kwik kwik wan ɛn dɛn nɔ go ebul fɔ ɛskep.

5. Aw di de fɔ da big big trɔbul fiba we do dɔn klin?

⁵ Lɛk we do dɔn klin. Di tɔd ɛgzampul we Pɔl yuz tɔk bak bɔt tifman dɛn we de tif na nɛt. Bɔt dis tɛm, i tan lɛk se Pɔl bin de kɔmpia Jiova in de to we do dɔn klin. (1 Tɛs. 5:​4) Tifman dɛn we kin kam na nɛt kin so bizi dat dɛn nɔ kin notis se tɛm de go. Sɔntɛnde, do kin jɔs klin pan dɛn ɛn dɛn kin kech dɛn. Semweso, di de fɔ da big big trɔbul go kech di wan dɛn we tan lɛk tifman dɛn we de kɔntinyu fɔ du tin dɛn we de mek Gɔd nɔ gladi. Fɔ mek wi nɔ tan lɛk dɛn, wi fɔ rɛdi bay we wi de avɔyd tin dɛn we nɔ de mek Jiova gladi ɛn kɔntinyu fɔ du “ɔlkayn tin we gud, we rayt, ɛn we na tru.” (Ɛfi. 5:​8-12) Pɔl bin yuz bak tu ɛgzampul dɛn we fiba fɔ tɔk bɔt di wan dɛn we nɔ go sev.

6. Wetin di Baybul min we i se bɔku pipul dɛn de slip? (1 Tɛsalonians 5:​6, 7)

⁶ “Di wan dɛn we kin slip.” (Rid 1 Tɛsalonians 5:​6, 7.) Pɔl bin kɔmpia di wan  dɛn we nɔ go sev di tɛm fɔ Jiova in de to pipul dɛn we de slip. Dɛn nɔ no wetin de apin arawnd dɛn ɔ di go we tɛm de go. So dɛn nɔ kin no we impɔtant tin dɛn de apin ɛn dɛn nɔ ebul du natin bɔt dɛn. I tan lɛk se bɔku pipul dɛn tide de slip. (Rom. 11:​8) Dɛn nɔ biliv se di tin dɛn we de apin de sho se wi de insay “di las dez” ɛn da big big trɔbul go kam jisnɔ. We big big chenj dɛn apin na di wɔl, sɔm go want fɔ no bɔt wi Kiŋdɔm mɛsej. Bɔt bɔku pan dɛn go slip bak ɛn nɔ kɔntinyu fɔ wek. Ivin sɔm pan di wan dɛn we biliv se Jɔjmɛnt De gɛt fɔ kam, biliv se i de fa fɔs. (2 Pit. 3:​3, 4) Bɔt ɛvride, wi de si se i rili impɔtant fɔ mek wi nɔ slip.

7. Aw di wan dɛn we Gɔd go dɔnawe wit tan lɛk pipul dɛn we kin chak?

⁷ “Di wan dɛn we kin chak.” Apɔsul Pɔl bin kɔmpia di pipul dɛn we Gɔd go dɔnawe wit to pipul dɛn we kin chak. Pipul dɛn we kin chak kin slo fɔ ɔndastand wetin de apin arawnd dɛn ɛn dɛn kin disayd fɔ du di rɔng tin dɛn. Semweso, di wikɛd pipul dɛn nɔ kin lisin to di wɔnin dɛn we Gɔd de gi. Dɛn dɔn disayd fɔ liv dɛn layf di we we go mek leta dɛn dɔnawe wit dɛn. Bɔt di Baybul ɛnkɔrej Kristian dɛn fɔ kɔntinyu fɔ tink di rayt we. (1 Tɛs. 5:​6) Wan masta sabi bukman we bin rayt bɔt di Baybul tɔk se “pɔsin we de tink di rayt we nɔ de wɔri, i nɔ de panik, ɛn i ebul fɔ tink klia wan so dat i go ebul fɔ disayd fɔ du di rayt tin.” Wetin mek wi nɔ fɔ wɔri ɛn nɔ alaw ɛnitin fɔ shek wi? Na bikɔs dat go ɛp wi fɔ mek wi nɔ put an pan pɔlitiks ɛn di tin dɛn we de apin arawnd wi tide. Di mɔ Jiova in de de kam nia, na di mɔ wi go gɛt prɛzhɔ fɔ put an pan dɛn tin dɛn ya. Bɔt stil, wi nɔ nid fɔ wɔri bɔt wetin wi go du. God in spirit go ɛp wi fɔ mek wi nɔ wɔri, mek wi ebul fɔ tink di rayt we, ɛn disayd fɔ du di rayt tin dɛn.—Lyuk 12:​11, 12.

8. Us ɛgzampul 1 Tɛsalonians 5:​8 yuz fɔ tɔk bɔt di kwaliti dɛn we go ɛp wi fɔ mek wi nɔ slip ɛn kɔntinyu fɔ tink di rayt we? (Luk bak di pikchɔ.)

⁸ “Wɛr di tin we de protɛkt pɔsin in chɛst . . . ɛn . . . di ɛlmɛt.” Pɔl kɔmpia wi to sojaman dɛn we rɛdi ɛn drɛs fɔ go fɛt wɔ. (Rid 1 Tɛsalonians 5:​8.) Pipul dɛn de ɛkspɛkt sojaman fɔ rɛdi fɔ fɛt ɛnitɛm we wɔ de. Na di sem tin wit wi. Wi go kɔntinyu fɔ rɛdi fɔ Jiova in de bay we wi wɛr di tin we de protɛkt pɔsin in chɛst we na fet ɛn lɔv ɛn di ɛlmɛt we na op. Dɛn kwaliti dɛn ya go rili ɛp wi.

9. Aw wi fet de protɛkt wi?

⁹ Di tin we pɔsin de wɛr fɔ protɛkt in chɛst bin de protɛkt sojaman in at. Fet ɛn lɔv de protɛkt wi at ɔ di pɔsin we wi bi insay. Dɛn kwaliti dɛn ya go ɛp wi fɔ kɔntinyu fɔ sav Gɔd ɛn fala Jizɔs. Fet de mek wi gɛt kɔnfidɛns se Jiova go blɛs wi fɔ we wi de luk fɔ am wit ɔl wi at. (Ibru. 11:​6) I go muv wi fɔ mek wi kɔntinyu fɔ de biɛn wi Lida, we na Jizɔs, ivin if wi gɛt fɔ bia prɔblɛm dɛn. Wi go ebul fɔ gɛt strɔng fet we go mek wi ebul fɔ bia prɔblɛm dɛn bay we wi lan frɔm pipul dɛn insay wi yon tɛm we kɔntinyu fɔ de biɛn Jiova pan ɔl we dɛn de mek dɛn sɔfa ɔ dɛn gɛt mɔni prɔblɛm. Ɛn wi go ebul fɔ avɔyd di denja fɔ lɛk mɔni ɛn prɔpati if wi falamakata di wan dɛn we de liv simpul layf fɔ mek dɛn go ebul put di Kiŋdɔm fɔs na dɛn layf. b

10. Aw di lɛk we wi lɛk Gɔd ɛn wi neba dɛn de ɛp wi fɔ bia?

 ¹⁰ Lɔv na ɔda impɔtant kwaliti we go ɛp wi fɔ mek wi nɔ slip ɛn kɔntinyu fɔ tink di rayt we. (Mat. 22:​37-39) We wi lɛk Gɔd, dat de ɛp wi fɔ bia we wi de du di prichin wok ilɛk dat go mek wi gɛt prɔblɛm. (2 Tim. 1:​7, 8) Bikɔs wi lɛk bak di wan dɛn we nɔ de sav Jiova, wi de kɔntinyu fɔ prich ɛn kɔntinyu fɔ wok na wi tɛritri; wi de ivin yuz tɛlifon ɛn lɛta fɔ prich. Wi nɔ de giv-ɔp. Wi de op se wande wi neba dɛn go chenj ɛn bigin du wetin rayt.—Izi. 18:​27, 28.

11. We wi lɛk wi kɔmpin Kristian dɛn, aw dat de ɛp wi? (1 Tɛsalonians 5:​11)

¹¹ Wi lɛk bak wi kɔmpin Kristian dɛn. Wi de sho da kayn lɔv de bay we wi de “ɛnkɔrej [wi] kɔmpin dɛn ɛn ɛp [wi] kɔmpin dɛn fɔ tinap tranga wan.” (Rid 1 Tɛsalonians 5:​11.) Jɔs lɛk aw sojaman dɛn kin de nia dɛnsɛf na wɔ frɔnt, na so wi de ɛnkɔrej wisɛf. Na tru se sɔntɛm sojaman go mistek wund in kɔmpin we dɛn de fɛt wɔ, bɔt i nɔ go ɛva du am bay wilful. Semweso, wi nɔ go ɛva du bad tin to wi brɔda dɛn bay wilful wan ɔ tɔn-am-gi dɛn we dɛn du wi bad. (1 Tɛs. 5:​13, 15) Wi de sho lɔv bak bay we wi de rɛspɛkt di brɔda dɛn we de bifo na di kɔngrigeshɔn. (1 Tɛs. 5:​12) We Pɔl bin rayt dis lɛta, di kɔngrigeshɔn na Tɛsalonayka nɔ bin dɔn wan ia yet. I go bi se di man dɛn we i bin pik fɔ bi ɛlda dɛn nɔ bin gɛt bɛtɛ ɛkspiriɛns ɛn sɔntɛm dɛn bin de mek mistek dɛn. Bɔt stil, dɛn bin fit fɔ gɛt rɛspɛkt. As di tɛm fɔ da big big trɔbul de kam nia, sɔntɛm wi go nid fɔ abop mɔ ɛn mɔ pan di ɛlda dɛn we de na di kɔngrigeshɔn pas aw wi abop pan dɛn naw. Sɔntɛm wi nɔ go ebul fɔ gɛt dayrɛkshɔn frɔm di brɔda dɛn na wɔl ɛdkwata ɛn di branch ɔfis, so i impɔtant fɔ mek wi lan fɔ lɛk ɛn rɛspɛkt wi ɛlda dɛn naw. Ilɛk wetin apin, lɛ wi kɔntinyu fɔ tink di rayt we, lɛ wi nɔ pe atɛnshɔn pan di mistek dɛn we dɛn de mek, bɔt lɛ wi pe atɛnshɔn pan aw Jiova  de yuz Jizɔs Krays fɔ gayd dɛn fetful man dɛn ya.

12. Aw wi op de protɛkt di we aw wi de tink?

¹² Jɔs lɛk aw ɛlmɛt bin de protɛkt sojaman in ed, na so wi op we go mek wi sev de protɛkt wi maynd ɛn ɛp wi fɔ tink di rayt we. Bikɔs wi gɛt strɔng op, wi biliv se di tin dɛn we di wɔl de gi nɔ gɛt wan valyu. (Fil. 3:​8) Wi op de ɛp wi fɔ mek wi nɔ wɔri ɛn fɔ mek natin nɔ shek wi. Wɔles ɛn Lɔrinda we de sav as Bɛtɛlayt dɛn na Afrika bin kam fɔ si se dis na tru. Insay tri wiks, Lɔrinda in mama day ɛn Wɔles in papa day. Bikɔs of di COVID-19 pandɛmik, dɛn nɔ bin ebul fɔ go bak fɔ go de wit dɛn famili dɛn. Wɔles rayt se: “Di op fɔ se di wan dɛn we dɔn day go gɛt layf bak de ɛp mi fɔ tink bɔt dɛn. A nɔ de tink bɔt aw dɛn bin de na dis wɔl jɔs bifo dɛn day, bɔt a de tink bɔt aw dɛn go de we dɛn gɛt layf bak na di nyu wɔl. Dis op de mek a nɔ wɔri ɛnitɛm we mi at pwɛl bikɔs mi fambul day.”

13. Wetin wi go du fɔ gɛt oli spirit?

¹³ “Una nɔ stɔp Gɔd in spirit we i de wok insay una.” (1 Tɛs. 5:​19) Pɔl tɔk se di oli spirit de wok insay wi. We wi gɛt Gɔd in spirit, wi de gɛt zil fɔ wetin rayt ɛn wi de gɛt pawa fɔ wok fɔ Jiova. (Rom. 12:​11) Wetin wi go du fɔ gɛt oli spirit? Wi fɔ pre fɔ am, stɔdi Gɔd in Wɔd, ɛn de na in ɔganayzeshɔn we i de yuz in spirit fɔ dayrɛkt. We wi du dat, i go ɛp wi fɔ gɛt “di kwaliti dɛn we di spirit de mek pɔsin gɛt.”—Gal. 5:​22, 23.

14. Wetin wi nid fɔ avɔyd if wi want fɔ kɔntinyu fɔ gɛt Gɔd in oli spirit? (Luk bak di pikchɔ.)

¹⁴ Afta Gɔd gi wi in oli spirit, wi nid fɔ tek tɛm mek wi “nɔ stɔp Gɔd in spirit we i de wok insay [wi].” Gɔd de gi in oli spirit to di wan dɛn nɔmɔ we de tink bɔt wetin klin ɛn we de du tin dɛn we klin. I nɔ go kɔntinyu fɔ gi wi in spirit if wi kɔntinyu fɔ tink bɔt tin dɛn we nɔ klin ɛn du dɛn. (1 Tɛs. 4:​7, 8) Wan ɔda tin bak we go mek wi kɔntinyu fɔ gɛt oli spirit na we  wi “nɔ tek prɔfɛsi dɛn lɛk se na natin.” (1 Tɛs. 5:​20) Insay dis vas, “prɔfɛsi dɛn” min mɛsej dɛn we Gɔd de yuz in oli spirit fɔ gi wi, dat na mɛsej dɛn we de tɔk bɔt Jiova in de ɛn aw di tɛm we wi de so naw ɔjɛnt. Wi nɔ de tink se Jiova in de, ɔ Amagɛdɔn, nɔ go apin di tɛm we wi de alayv. Bɔt wi de sho se wi de ɛkspɛkt am fɔ kam jisnɔ ɔ kɔntinyu fɔ tink bɔt am bay we wi kɔntinyu fɔ biev di rayt we ɛn bizi de “du tin dɛn we de sho se [wi] fetful to Gɔd” ɛvride.—2 Pit. 3:​11, 12.

15. Aw wi go avɔyd fɔ mek dɛn nɔ ful wi wit infɔmeshɔn dɛn we kɔmɔt frɔm dimɔn dɛn? (1 Tɛsalonians 5:​21)

¹⁵ I nɔ go te igen, di wan dɛn we de agens Gɔd go tɔk se: “Wi dɔn gɛt pis ɛn natin nɔ de fɔ fred!” (1 Tɛs. 5:​3) Infɔmeshɔn dɛn we kɔmɔt frɔm dimɔn dɛn go de ɔlsay na di wɔl, ɛn bɔku pipul dɛn go biliv dɛn infɔmeshɔn dɛn de. (Rɛv. 16:​13, 14) Aw dat go afɛkt wi? Wi nɔ go biliv dɛn infɔmeshɔn dɛn de if wi “mek shɔ ɔf [ɔ, “tɛst”] ɔltin.” (Rid 1 Tɛsalonians 5:​21.) Dɛn bin yuz di Grik wɔd we dɛn translet as “mek shɔ ɔf” fɔ tɔk bɔt aw pipul dɛn bin de tɛst mɛtal dɛn lɛk gold ɛn silva fɔ mek shɔ se nɔto fek tin dɛn. So, wi nid fɔ tɛst wetin wi de yɛri ɔ wetin wi de rid fɔ no if na tru. Dat bin impɔtant fɔ di Kristian dɛn na Tɛsalonayka ɛn i go ivin impɔtant mɔ fɔ wi as di de fɔ da big big trɔbul de kam nia. Bifo wi jɔs biliv ɛnitin we ɔda pipul dɛn de se, wi de tek tɛm kɔmpia wetin wi rid ɔ wetin wi yɛri wit wetin di Baybul ɛn Jiova in ɔganayzeshɔn se. We wi du dat, dɛn nɔ go ebul ful wi wit ɛni infɔmeshɔn we kɔmɔt frɔm dimɔn dɛn.—Prɔv. 14:​15; 1 Tim. 4:​1.

16. Us op wi gɛt we wi shɔ bɔt? Wetin wi dɔn mekɔp wi maynd fɔ du?

¹⁶ Wi no se Jiova in pipul dɛn go sev di tɛm fɔ da big big trɔbul. Bɔt nɔn pan wi nɔ no wetin go apin tumara. (Jems 4:​14) Stil, ilɛk wi de te di tɛm fɔ da big big trɔbul ɔ wi day bifo da tɛm de, wi go gɛt layf we go de sote go if wi kɔntinyu fɔ fetful. Di anɔyntɛd dɛn go de wit Krays na ɛvin. Di ɔda ship dɛn go de na Paradays na dis wɔl. Lɛ wi ɔl pe atɛnshɔn pan wi wɔndaful op ɛn kɔntinyu fɔ rɛdi fɔ Jiova in de!