Mi mama ɛn papa bin kɔmɔt na Istonia insay Wɔl Wɔ II ɛn go na Jamani, usay dɛn bɔn mi. Afta dɛn bɔn mi, dɛn stat fɔ rɛdi fɔ go de na Kanada. Di fɔs os we wi bin de nia Otawa insay Kanada, na bin smɔl bildin usay dɛn bin de mɛn fɔl dɛn. Wi bin rili po, bɔt stil wi bin de gɛt eg fɔ it na mɔnin.

Wan de Jiova Witnɛs dɛn rid Rɛvɛleshɔn 21:​3, 4 to mi mama. Di tin we i lan bin rili tɔch am, so i bigin fɔ kray. Mi mama ɛn papa bin kɔntinyu fɔ stɔdi di Baybul, ɛn afta shɔt tɛm dɛn bin baptayz.

Pan ɔl we mi mama ɛn papa nɔ bin sabi tɔk bɛtɛ Inglish, dɛn bin rili gɛt zil fɔ sav Jiova. Pan ɔl we mi papa go dɔn wok tranga wan ol nɛt na wan faktri usay dɛn de mek stil na Sɔdburi, Ɔntario, i kin go wit mi ɛn mi smɔl sista, Silvia, na fil savis ɔlmost ɛvri Satide. Ɛn ɛvri wik, wi bin de stɔdi Di Wachtawa as famili. Mi mama ɛn papa bin rili mek a lɛk Gɔd. Dat bin mek a gi mi layf to Jiova insay 1956 we a bin ol tɛn ia. Ɛnitɛm a tink bɔt aw dɛn rili lɛk Jiova, dat de ɛnkɔrej mi fɔ kɔntinyu fɔ sav am.

Afta a dɔn sɛkɔndari skul, a nɔ bin de pe bɛtɛ atɛnshɔn igen fɔ sav Jiova. A bin tink se if a bi payɔnia, a nɔ go ɛva gɛt mɔni fɔ travul go na ɔda kɔntri. A bin gɛt wok na wan redio steshɔn as DJ, we na wok we a bin lɛk. Bɔt na ivintɛm a bin de wok; so, a bin de mis mitin dɛn ɛn a bin mek padi wit pipul dɛn we nɔ lɛk Gɔd. Faynali, mi kɔnshɛns we di Baybul dɔn tren bin muv mi fɔ mek chenj dɛn.

A bin muf go na Ɔshawa, insay Ɔntario. Na de a mit Re Nɔman, wit in sista Lɛsli, ɛn ɔda payɔnia dɛn. Dɛn ɔl bin sho se dɛn bisin bɔt mi. We a si aw dɛn gladi, dat bin mek a tink bɔt wetin a bin want fɔ du wit mi layf. Dɛn bin ɛnkɔrej mi fɔ bigin payɔnia, ɛn a bin du dat insay Sɛptɛmba 1966. A bin gladi, ɛn a bin de ɛnjɔy mi layf. Bɔt sɔm tin dɛn we bin gɛt fɔ chenj mi layf bin de wet fɔ mi.

We a bin stil de siniɔ sɛkɔndari skul, a bin fil fɔm fɔ wok na Bɛtɛl na Toronto, insay Kanada. Leta we a bin de payɔnia, dɛn bin kɔl mi fɔ go wok na Bɛtɛl fɔ 4 ia. Bɔt a bin rili lɛk  Lɛsli, ɛn a bin de fred se if a gri fɔ go wok na Bɛtɛl, a nɔ go si am igen. Afta we a dɔn pre tranga wan fɔ lɔng tɛm, a bin disayd fɔ go wok na Bɛtɛl, bɔt mi at bin pwɛl we a bin de tɛl Lɛsli baybay.

A bin de wok na di say usay dɛn de bruk klos na Bɛtɛl ɛn leta a bin de wok as sɛktri. Insay da tɛm de, Lɛsli na bin spɛshal payɔnia na Gatinaw, insay Kyubɛk. Bɔku tɛm, a bin de wɔnda wetin i de du ɛn if wetin a disayd fɔ du na di rayt tin. Dɔn wan pan di tin dɛn we bin rili mek a gladi ɛn sɔprayz bin apin. Re, we na Lɛsli in brɔda, bin stat fɔ wok na Bɛtɛl. I kam fɔ bi mi rummet! Dat bin mek mi ɛn Lɛsli bigin fɔ tɔk ɛn bi padi bak. Wi bin mared di las de fɔ mi 4 ia asaynmɛnt, insay Fɛbwari 27, 1971.

Dɛn bin sɛn mi ɛn Lɛsli fɔ go sav na wan kɔngrigeshɔn usay dɛn de tɔk Frɛnch na Kyubɛk. Afta sɔm ia, a bin sɔprayz we dɛn asayn mi fɔ bi sakit ovasia we a bin ol 28 ia. A bin fil se a rili yɔŋ ɛn a nɔ go ebul fɔ du dis wok, bɔt di wɔd dɛn na Jɛrimaya 1:​7, 8 bin ɛnkɔrej mi. Bɔt Lɛsli bin dɔn gɛt motoka aksidɛnt dɛn, ɛn i nɔ bin izi fɔ am fɔ slip. So aw wi go ebul du di sakit wok? Pan ɔl dat, Lɛsli tɔk se, “If Jiova invayt wi fɔ du sɔntin, wi nɔ go tray fɔ du am?” Wi bin gri fɔ tek di asaynmɛnt ɛn ɛnjɔy fɔ du di sakit wok fɔ 17 ia.

A bin rili bizi we mi na bin sakit ovasia, ɛn a nɔ bin de gɛt bɛtɛ tɛm fɔ Lɛsli. A bin gɛt fɔ lan ɔda lɛsin. Wan Mɔnde ali mɔnin, di bɛl na di domɔt riŋ. Nɔbɔdi nɔ bin de na do, na jɔs wan piknik baskɛt we gɛt tebul klos, frut, chiz, bred, wan bɔtul wayn, glas kɔp dɛn, ɛn wan not we rayt se, “Go piknik wit yu wɛf” bin de de. Na bin fayn de. Bɔt a bin ɛksplen to Lɛsli se a gɛt tɔk dɛn fɔ pripia ɛn a nɔ go ebul go. I bin ɔndastand, bɔt i nɔ bin gladi. As a sidɔm na mi tebul, mi kɔnshɛns bigin fɔ mɔna mi. A bin tink bɔt Ɛfishians 5:​25, 28. A tink se Jiova bin yuz da vas de fɔ mɛmba mi se a fɔ kia bɔt di we aw mi wɛf de fil. Afta a pre, a tɛl Lɛsli se, “Lɛ wi go,” ɛn dat bin mek i rili gladi. Wi bin drayv go na wan fayn ples nia wan riva, prɛd wi tebul klos, ɛn wi bin ɛnjɔy wan pan wi bɛst de dɛn togɛda. Ɛn a bin stil ebul fɔ pripia mi tɔk dɛn.

Wi bin ɛnjɔy wi sakit asaynmɛnt dɛn ɛn dɛn bin bɔku, frɔm British Kolombia to Nyufawndland. So naw a bin de travul jɔs lɛk aw a bin wish fɔ du we a bin smɔl. A bin de tink bɔt fɔ aplay fɔ Giliad Skul, bɔt a nɔ bin want fɔ go na ɔda kɔntri. A bin tink se a nɔ fit fɔ bi mishɔnari. Dɔn bak, a bin de fred se sɔntɛm dɛn go sɛn wi na wan kɔntri na Afrika usay sik ɛn wɔ de. A bin gladi fɔ de na Kanada.

Insay 1992, Jiova Witnɛs dɛn bin ebul fɔ prich bak na pɔblik na sɔm kɔntri dɛn we bin de ɔnda di Soviɛt Yuniɔn. So di brɔda dɛn bin aks if wi go want fɔ go na Istonia ɛn bi mishɔnari dɛn. Wi bin rili sɔprayz, bɔt wi bin pre bɔt dat. Wi tink bak se, ‘If Jiova invayt wi fɔ du sɔntin, wi nɔ fɔ tray fɔ du am?’ Wi bin gri fɔ tek di asaynmɛnt, ɛn a bin gladi bikɔs nɔto Afrika wi de go.

Wantɛm wantɛm, wi bigin fɔ lan di Istonia langwej. Afta wi de na di kɔntri fɔ tu mɔnt, dɛn aks wi fɔ du di sakit wok. Wi bin gɛt fɔ go waka na lɛk 46 kɔngrigeshɔn ɛn grup dɛn na Istonia, Latvia, ɛn Lituenia, dɔn bak na Kaliningrad, insay Rɔshia. Dat bin min se wi gɛt fɔ lan fɔ tɔk Latvian, Lituenian, ɛn Rɔshian. Dat nɔ bin rili izi. Bɔt di brɔda ɛn sista dɛn bin gladi we wi bin de tray fɔ lan dɛn langwej, ɛn dɛn bin ɛp wi. Insay 1999, dɛn bin opin wan branch ɔfis na Istonia, ɛn dɛn bin asayn mi fɔ bi Branch Kɔmiti mɛmba wit Tɔmɔs, Ɛdɔ, Lɛmbit, Rayli, ɛn Tɔmi Kauko.

Wi bin kam fɔ no bɔku Witnɛs dɛn we dɛn bin dipɔt na Sayberia bifo da tɛm de. Pan ɔl we dɛn nɔ de trit dɛn fayn ɛn dɛn nɔ bin de wit dɛn famili, dɛn nɔ bin de vɛks ɛn kip grɔj. Dɛn bin kɔntinyu fɔ gladi ɛn du di prichin wok wit zil. Dɛn ɛgzampul tich wi se wi go ebul fɔ bia ɛn gɛt gladi-at di tɛm dɛn we tin nɔ izi.

Wi bin wok tranga wan fɔ lɔng tɛm ɛn wi nɔ bin de gɛt bɛtɛ tɛm fɔ rɛst, so dat mek Lɛsli bin de rili taya. Wi nɔ bin no wantɛm wantɛm se na bikɔs i bin gɛt wan sik we de mek pɔsin rili taya we dɛn kɔl faybrɔmayalja. Wi bin tink fɔ go bak na Kanada. We dɛn invayt wi fɔ go di branch skul na Patasin insay Nyu Yɔk, na Amɛrika, a bin dawt if wi go ebul fɔ atɛnd. Bɔt afta wi pre tranga wan, wi bin gri fɔ go. Jiova bin blɛs wetin wi disayd. Na we wi bin de na di skul na in Lɛsli bin ebul fɔ gɛt tritmɛnt we i bin nid. So wi bin ebul fɔ du wi nɔmal wok bak.

Insay 2008 wan ivintɛm, we wi bin de na Istonia, a gɛt fon kɔl frɔm wɔl ɛdkwata. Dɛn aks if wi go gri fɔ go sav na Kongo. A bin rili sɔprayz, mɔ bikɔs a bin nid fɔ riplay to di mɛsej di nɛks de. Fɔs, a nɔ bin tɛl Lɛsli bɔt dat bikɔs a bin no se i nɔ go slip da nɛt de. Bɔt na mi nɔ bin slip, bikɔs a bin de pre to Jiova bɔt di wɔri we a bin de wɔri fɔ go na Afrika.

Di nɛks de we a tɛl Lɛsli, wi tɔk se, “Jiova de invayt wi fɔ go na Afrika. Aw wi go no se wi nɔ go ebul fɔ du am ɛn ɛnjɔy am if wi nɔ go de?” So afta wi dɔn de na Istonia fɔ 16 ia, wi bin go na Kinshasa, insay Kongo. Di branch ɔfis bin gɛt fayn gadin ɛn de bin rili kwayɛt. Wan pan di fɔs tin dɛn we Lɛsli bin put na wi rum na wan kad we i bin kip  frɔm we wi kɔmɔt na Kanada. Di wɔd dɛn we rayt de na, “Gladi usay yu de.” Afta wi mit di brɔda ɛn sista dɛn, kɔndɔkt Baybul stɔdi dɛn, ɛn ɛkspiriɛns di gladi-at we pɔsin kin gɛt we i de du di mishɔnari wok, wi kɔntinyu fɔ gladi mɔ fɔ sav Jiova. As tɛm de go, wi bin gɛt di ɔnɔ fɔ go waka na 13 branch dɛn na ɔda Afrika kɔntri dɛn. Wi bin ebul fɔ lan bɔt difrɛn ɛn intrɛstin pipul dɛn. A nɔ bin de fred igen fɔ de na Afrika lɛk trade, ɛn wi tɛl Jiova tɛnki fɔ we i sɛn wi fɔ kam sav na Afrika.

Insay Kongo, dɛn bin de gi wi difrɛn it dɛn, lɛk insɛkt dɛn, we a bin tink se wi nɔ go ebul fɔ it. Bɔt we wi si wi brɔda dɛn de ɛnjɔy fɔ it dɛn, wisɛf bin tray fɔ it dɛn ɛn wi bin lɛk am.

Wi bin travul go na di ist pat na di kɔntri fɔ go ɛnkɔrej wi brɔda ɛn sista dɛn ɛn gi dɛn di tin dɛn we dɛn nid. Na dɛn ples dɛn ya, rebɛl dɛn bin de go atak di vilej dɛn ɛn dɛn bin de du bad to uman dɛn ɛn pikin dɛn. Bɔku pan di brɔda ɛn sista dɛn bin rili po. Bɔt stil, di op we dɛn bin gɛt fɔ se di wan dɛn we dɔn day go gɛt layf bak, di lɛk we dɛn bin lɛk Jiova, ɛn we dɛn kɔntinyu fɔ de biɛn in ɔganayzeshɔn bin rili tɔch wi at. Dɛn ɛgzampul bin mek wi tink bɔt wetin mek wi de sav Jiova ɛn ɛp wi fɔ gɛt mɔ fet pan am. Sɔm pan di brɔda ɛn sista dɛn bin dɔn lɔs dɛn os ɛn di tin dɛn we dɛn bin plant fɔ it. Dis bin mek a mɛmba se wi kin lɔs wi prɔpati dɛn kwik kwik wan ɛn na wi padi biznɛs wit Jiova impɔtant pas ɔl ɔda tin. Pan ɔl we tin nɔ bin rili izi, di brɔda ɛn sista dɛn nɔ bin de kɔmplen. Di we aw dɛn bin de biev bin ɛnkɔrej wi fɔ gɛt maynd fɔ bia wi prɔblɛm dɛn ɛn wi wɛlbɔdi biznɛs.

Dɔn wi gɛt wan ɔda sɔprayz. Dɛn bin tɛl wi fɔ go na Ɔŋ Kɔŋ branch. Wi nɔ bin ɛva imajin se wi go go de na Eshia! Bɔt afta wi dɔn si aw Jiova sho se i lɛk wi we wi bin de na ɔl wi ɔda asaynmɛnt dɛn, wi bin gri fɔ go. Insay 2013, wit kray wata na wi yay, wi bin lɛf wi padi dɛn we wi lɛk ɛn fayn Afrika, ɛn wi nɔ bin no wetin de bifo.

 Na bin big chenj fɔ liv na Ɔŋ Kɔŋ bikɔs na siti usay bɔku pipul dɛn we kɔmɔt difrɛn say dɛn na di wɔl bin de. I nɔ bin izi fɔ lan di Chayniz langwej. Bɔt di brɔda ɛn sista dɛn bin gladi fɔ si wi, ɛn wi bin rili ɛnjɔy dɛn it dɛn. Dɛn bin de du mɔ wok dɛn na di branch ɔfis. Bɔt da sem tɛm de, tin dɛn bin jɔs de dia. So di Gɔvnin Bɔdi bin disayd fɔ sɛl bɔku pan di prɔpati dɛn na di branch ɔfis, ɛn dat na bin fayn tin we dɛn disayd. Shɔt tɛm afta dat, insay 2015, wi bin go na Sawt Koria, usay wi bin kɔntinyu fɔ sav. Wi bin gɛt fɔ lan langwej we nɔ izi, ɛn pan ɔl we wi nɔ bin sabi tɔk di langwej fayn wan yet, di brɔda ɛn sista dɛn bin ɛnkɔrej wi bay we dɛn bin de se wi de du wɛl fɔ tɔk Korian.

Fɔ mek nyu padi dɛn nɔ kin izi ɔltɛm, bɔt wi bin kam fɔ no se we wi invayt ɔda pipul dɛn fɔ kam waka to wi, i bin izi fɔ mek wi no dɛn. Wi dɔn si se bɔku tin dɛn de we wi brɔda ɛn sista dɛn fiba pan pas di tin dɛn we dɛn nɔ fiba pan, ɛn Jiova mek wi fɔ lɛ wi ebul fɔ opin wi at ɛn lɛk bɔku padi dɛn.—2 Kɔr. 6:​11.

Wi dɔn si se i impɔtant fɔ lɛk pipul dɛn jɔs lɛk Jiova ɛn fɔ luk fɔ pruf we de sho se Jiova lɛk wi ɛn na in de gayd wi. Ɛnitɛm we wi at pwɛl ɔ wi de wɔnda if wi brɔda ɛn sista dɛn lɛk wi, wi kin rid bak kad ɛn lɛta dɛn frɔm wi padi dɛn we de ɛnkɔrej wi. Jiova dɔn ansa wi prea dɛn, i dɔn sho se i lɛk wi ɛn i de gi wi di trɛnk we wi nid.

Ɔl di tɛm dɛn we dɔn pas, mi ɛn Lɛsli dɔn lan aw i impɔtant fɔ mek tɛm fɔ wisɛf, ilɛk aw wi bizi. Wi bin ɔndastand bak aw i impɔtant fɔ mek wi ebul fɔ laf we wi mek mistek, mɔ we wi de tray fɔ lan nyu langwej. Ɛn ɛni nɛt, wi de tray fɔ tink bɔt sɔntin we wi ɛnjɔy we wi go tɛl Jiova tɛnki fɔ.

Fɔ tru, a bin tink se a nɔ go ɛva bi mishɔnari ɔ go de na ɔda kɔntri dɛn. Bɔt a dɔn ɛnjɔy di gladi-at we pɔsin kin gɛt fɔ lan bɔt aw ɔltin pɔsibul wit Jiova in sɔpɔt. A kin mɛmba di wɔd dɛn we prɔfɛt Jɛrimaya bin tɔk, we se: “E PAPA GƆD [“Jiova,” NWT], yu dɔn ful mi.” (Jɛr. 20:​7) Fɔ tru, i dɔn sɔprayz mi bɔku we dɛn ɛn i dɔn blɛs mi di kayn we dɛn we a nɔ bin de imajin, i ivin mek a ebul fɔ travul wit plen, we na sɔntin we a bin rili want fɔ du. Di kɔntri dɛn we wi dɔn flay go bɔku pas di say dɛn we a bin want travul we mi na bin smɔl bɔbɔ, ɛn a dɔn go waka na branch ɔfis dɛn na bɔku kɔntri dɛn. A rili gladi bak fɔ di sɔpɔt we Lɛsli bin rɛdi fɔ sɔpɔt mi pan ɔl dɛn asaynmɛnt dɛn ya.

Wi kin tray ɔltɛm fɔ mɛmba se wi ebul du ɔltin bikɔs wi lɛk Jiova. Di gud tin dɛn we wi de ɛnjɔy tide de sho aw i go wɔndaful fɔ de sote go we Jiova go “opin [in] an ɛn satisfay ɔltin we gɛt layf.”—Sam 145:16, NWT.