STƆDI ATIKUL 23
SIŊ 28 Bi Jiova in Padi
Jiova De Invayt Wi fɔ De na In Tɛnt
“Mi tɛnt go de wit dɛn, ɛn a go bi dɛn Gɔd.”—IZI. 37:27.
MEN PƆYNT
Na fɔ ɛp wi fɔ gladi mɔ bikɔs Jiova invayt wi fɔ bi strenja dɛn na in tɛnt ɛn fɔ di we aw i de kia fɔ wi as pipul dɛn we I invayt.
1-2. Us inviteshɔn Jiova de gi ɔl in savant dɛn we nɔ de kɔmɔt biɛn am?
WETIN yu go se if pɔsin aks yu, ‘Udat na Jiova to yu?’ Sɔntɛm yu go se, ‘Jiova na mi Papa, mi Gɔd, ɛn mi Padi.’ Ɔda taytul dɛn de bak we yu kin yuz fɔ tɔk bɔt Jiova. Bɔt, yu de si am bak as Pɔsin we dɔn invayt yu?
2 Kiŋ Devid bin kɔmpia di padi biznɛs we de bitwin Jiova ɛn In savant dɛn we nɔ de kɔmɔt biɛn am to di rileshɔnship we kin de bitwin pɔsin we de invayt pipul dɛn ɛn di wan dɛn we i de invayt. I bin aks se: “E Jiova, udat go de as strenja na yu tɛnt? Udat go de na yu oli mawntin?” (Sam 15:1) Frɔm dɛn wɔd dɛn de we Jiova bin mek dɛn rayt, wi lan se wi kin bi In strenja dɛn, dat na in padi dɛn. Yu nɔ tink se na big big ɔnɔ wi gɛt?
JIOVA DE INVAYT WI FƆ DE NA IN TƐNT
3. Udat na di fɔs pɔsin we Jiova invayt na in tɛnt? Aw Jiova ɛn dis pɔsin bin de fil bɔt dɛnsɛf?
3 Bifo Jiova bigin fɔ mek tin dɛn, na in wangren bin de. Bɔt as tɛm de go, i mek in fɔs Bɔypikin ɛn invayt am na in tɛnt. Jiova bin rili gladi fɔ dis nyu wok we na fɔ invayt pipul dɛn. Di Baybul tɔk se Jiova bin “rili lɛk” in Bɔypikin. Ɛn Jizɔs bak “bin de gladi bifo [Jiova] ɛvride.”—Prɔv. 8:30.
4. Udat dɛn bak Jiova bin invayt leta na in tɛnt?
4 Afta dat, Jiova bin mek enjɛl dɛn ɛn i invayt dɛnsɛf fɔ de na in tɛnt. Di Baybul kɔl di enjɛl dɛn “Gɔd in bɔypikin dɛn” ɛn i tɔk se dɛn gladi fɔ de wit Jiova. (Job 38:7; Dan. 7:10) Fɔ sɔm tɛm, di wan dɛn nɔmɔ we na bin Gɔd in padi dɛn, na di wan dɛn we bin de wit am na ɛvin. Bɔt leta, i bin mek mɔtalman dɛn ɛn dɛnsɛf kam fɔ bi strenja dɛn na in tɛnt. Sɔm pan di wan dɛn we na bin in strenja dɛn na, Inɔk, Noa, Ebraam, ɛn Job. Di Baybul kɔl dɛn man dɛn de we bin de wɔship Gɔd fetful wan, Jiova in padi dɛn ɔ pipul dɛn we bin waka “wit di tru Gɔd.”—Jɛn. 5:24; 6:9; Job 29:4; Ayz. 41:8.
5. Wetin wi lan frɔm di prɔfɛsi we de na Izikɛl 37:26, 27?
5 Fɔ lɔng tɛm naw, Jiova dɔn de invayt in padi dɛn fɔ bi strenja dɛn na in tɛnt. (Rid Izikɛl 37:26, 27.) Fɔ ɛgzampul, Izikɛl in prɔfɛsi, mek wi no se Gɔd rili want di wan dɛn we de wɔship am ɛn we nɔ de kɔmɔt biɛn am fɔ gɛt tayt padi biznɛs wit am. I prɔmis se i go mek “pis agrimɛnt wit dɛn.” Da prɔfɛsi de, de tɔk bɔt di tɛm we di wan dɛn we gɛt di op fɔ de na ɛvin ɛn di wan dɛn we gɛt di op fɔ de na dis wɔl go bi “wan grup” na in tɛnt. (Jɔn 10:16) Na dat de apin naw!
GƆD DE KIA FƆ WI ILƐK USAY WI DE
6. Aw pɔsin kin bi strenja na Jiova in tɛnt? Usay In tɛnt de?
6 Insay di tɛm we dɛn bin de rayt di Baybul, tɛnt na bin ples usay pɔsin kin rɛst ɛn i bin de protɛkt pɔsin frɔm bad wɛda. We pɔsin kam as strenja na ɔda pɔsin in tɛnt, i de ɛkspɛkt se di wan we invayt am fɔ kia fɔ am. We wi gi wi layf to Jiova, wi de bi strenja na in tɛnt. (Sam 61:4) Wi de ɛnjɔy bɔku spirichwal it ɛn padi biznɛs wit ɔda pipul dɛn we dɛnsɛf dɔn bi Jiova in strenja dɛn. In tɛnt nɔ de na wan patikyula ples. Sɔntɛm yu bin dɔn travul go ɔda kɔntri fɔ atɛnd spɛshal kɔnvɛnshɔn ɛn mit ɔda pipul dɛn we gladi fɔ de na Gɔd in tɛnt. Jiova in tɛnt de ɛnisay we in fetful savant dɛn de.—Rɛv. 21:3.
7. Wetin mek wi go se Jiova in fetful savant dɛn we dɔn day stil na strenja dɛn na in tɛnt? (Luk bak di pikchɔ.)
7 Wetin wi go se bɔt Jiova in fetful savant dɛn we dɔn day? Wi go se dɛn na strenja dɛn stil na Jiova in tɛnt? Yɛs! Wetin mek wi tɔk dat? Na bikɔs Jiova stil de mɛmba ɔltin bɔt dɛn. To am, dɛn stil de alayv. Jizɔs bin se: “Insay di stori bɔt di chukchuk tik, Mozis insɛf tɔk bɔt di layf we pipul dɛn go gɛt bak we i kɔl Jiova ‘Ebraam in Gɔd, Ayzak in Gɔd, ɛn Jekɔp in Gɔd.’ In nɔto Gɔd fɔ dayman dɛn, bɔt in na Gɔd fɔ di wan dɛn we gɛt layf, bikɔs to am dɛn ɔl de alayv.”—Lyuk 20:37, 38.
Ivin fetful wan dɛn we dɔn day kin stil bi strenja dɛn na Gɔd in tɛnt (Luk na paregraf 7)
DI BƐNIFIT DƐN WE WI DE GƐT ƐN DI TIN DƐN WE WI NID FƆ DU
8. Us bɛnifit dɛn Jiova in strenja dɛn de gɛt bikɔs dɛn de na in tɛnt?
8 Jɔs lɛk aw rial tɛnt na ples fɔ rɛst ɛn i de protɛkt wi frɔm bad wɛda, na so Jiova in tɛnt de protɛkt in strenja dɛn frɔm tin dɛn we go pwɛl dɛn padi biznɛs wit am ɛn gi dɛn rial op fɔ tumara bambay. We wi kɔntinyu fɔ de nia Jiova, Setan nɔ go ebul fɔ du wi ɛnitin we go ambɔg wi sote go. (Sam 31:23; 1 Jɔn 3:8) Insay di nyu wɔl, Jiova nɔ go jɔs kɔntinyu fɔ protɛkt in padi dɛn frɔm tin dɛn we go ambɔg dɛn padi biznɛs wit am, bɔt i go protɛkt dɛn bak frɔm day.—Rɛv. 21:4.
9. Wetin Jiova de ɛkspɛkt in strenja dɛn fɔ du?
9 Na big big ɔnɔ wi gɛt fɔ bi strenja dɛn na Jiova in tɛnt ɛn fɔ gɛt tayt padi biznɛs wit am we go de sote go. Wetin wi fɔ du if wi want fɔ kɔntinyu fɔ bi strenja dɛn na in tɛnt? Lɛ wi se pɔsin invayt yu na in os, wan dawt nɔ de se yu go want fɔ no wetin i de ɛkspɛkt yu fɔ du. Sɔntɛm i go ɛkspɛkt yu fɔ pul yu sus bifo yu go insay di os, ɛn yu go rɛdi fɔ du dat. Semweso, wi rili want fɔ no wetin Jiova de ɛkspɛkt di wan dɛn we want fɔ kɔntinyu fɔ bi strenja dɛn na in tɛnt fɔ du. Di lɛk we wi lɛk Jiova go mek wi du ɔl wetin wi ebul fɔ “rili mek i gladi.” (Kol. 1:10) Ɛn pan ɔl we wi de si Jiova as wi Padi, wi fɔ si am bak as wi Gɔd ɛn Papa we wi fɔ rɛspɛkt. (Sam 25:14) We wi de tink bɔt dat, i go mek wi rɛspɛkt am ɔltɛm ɛn nɔ ɛva fɔgɛt udat i bi. Da kayn rɛspɛkt de go mek wi avɔyd fɔ du tin dɛn we go mek in at pwɛl. Wi rili want fɔ “ɔmbul” wisɛf bifo wi Gɔd.—Mayk. 6:8.
JIOVA BIN SHO SE I NƆ DE TEK WAN PƆSIN BƐTƐ PAS ƆDA PƆSIN NA DI WILDANƐS
10-11. Aw Jiova bin sho se i nɔ de tek wan pɔsin bɛtɛ pas ɔda pɔsin na di wildanɛs na Saynay?
10 Di we aw Jiova de trit in strenja dɛn de sho se i nɔ de tek wan pɔsin bɛtɛ pas ɔda pɔsin. (Rom. 2:11) Wi go no mɔ bɔt aw Jiova nɔ de tek wan pɔsin bɛtɛ pas ɔda pɔsin frɔm di we aw i bin trit di Izrɛlayt dɛn na di wildanɛs na Saynay.
11 Afta Jiova fri in pipul dɛn frɔm slev layf na Ijipt, i bin pik prist dɛn fɔ wok na di tabanakul. I bin pik di Livayt dɛn fɔ du ɔda wok dɛn na di tabanakul. Fɔ se Jiova bin bisin mɔ bɔt di pipul dɛn we bin de wok na di tabanakul ɔ di wan dɛn we bin de nia di tabanakul pas di ɔda pipul dɛn? Nɔ! Jiova nɔ de tek wan pɔsin bɛtɛ pas ɔda pɔsin.
12. Us patikyula we Jiova bin trit di Izrɛlayt dɛn we sho se i nɔ de tek wan pɔsin bɛtɛ pas ɔda pɔsin? (Ɛksodɔs 40:38) (Luk bak di pikchɔ.)
12 Ɔlman na di kamp bin gɛt di sem chans fɔ gɛt tayt padi biznɛs wit Jiova ilɛk dɛn bin de wok na di tabanakul ɔ dɛn nɔ bin de wok de, ɛn ilɛk dɛn tɛnt bin de nia di tabanakul ɔ i nɔ bin de nia am. Fɔ ɛgzampul, Jiova bin mek shɔ se di wan ol neshɔn ebul fɔ si di klawd ɛn faya we tan lɛk pila we bin de oba di tabanakul. (Rid Ɛksodɔs 40:38.) We di klawd stat fɔ muv go ɔdasay, ivin di wan dɛn we bin de fa frɔm di tabanakul bin ebul fɔ si am, pak dɛn tin dɛn, put dɛn tɛnt dɛn dɔŋ, ɛn go togɛda wit di ɔda pipul dɛn. (Nɔm. 9:15-23) Ɔlman bin ebul fɔ yɛri di lawd sawnd we di tu silva trɔmpɛt dɛn bin de mek fɔ lɛ ɔlman no se dɛn fɔ stat fɔ muv. (Nɔm. 10:2) Dis sho klia wan se jɔs bikɔs pɔsin de nia di tabanakul nɔ min se i go gɛt tayt padi biznɛs wit Jiova pas di wan dɛn we bin de fa frɔm di tabanakul. Ɔlman bin gɛt chans fɔ bi Jiova in strenja ɛn gɛt kɔnfidɛns se I go gayd ɛn protɛkt am. Semweso, Jiova lɛk wi, i de kia fɔ wi, ɛn i de protɛkt wi ilɛk usay wi de na di wɔl.
Di tabanakul we bin de midul di kamp na bin pruf fɔ sho se Gɔd nɔ de tek wan pɔsin bɛtɛ pas ɔda pɔsin (Luk na paregraf 12)
ƐGZAMPUL DƐN INSAY WI YON TƐM WE DE SHO SE JIOVA NƆ DE TEK WAN PƆSIN BƐTƐ PAS ƆDA PƆSIN
13. Wetin mek wi go se Jiova nɔ de tek wan pɔsin bɛtɛ pas ɔda pɔsin insay wi yon tɛm?
13 Sɔm pan Gɔd in pipul dɛn tide de nia di wɔl ɛdkwata ɔ Jiova Witnɛs dɛn branch ɔfis. Ɔda wan dɛn de wok na dɛn ples dɛn de. Ɛn bikɔs ɔf dis, dɛn de ɛp fɔ du bɔku pan di tin dɛn we dɛn de du de ɛn ivin wok wit di wan dɛn we de bifo. Sɔm de wok as sakit ovasia dɛn ɛn ɔda pipul dɛn de yuz ɔl dɛn tɛm fɔ sav Jiova ɔda we dɛn. If yu de pat pan di bɔku pipul dɛn we nɔ gɛt dɛn chans dɛn de, mɛmba se di pɔsin we invayt wi we na Jiova lɛk ɔl in strenja dɛn. I sabi yu gud gud wan ɛn i de gi yu di tin dɛn we yu nid. (1 Pit. 5:7) Gɔd de gi spirichwal it to ɔl in savant dɛn ɛn i de gayd ɛn protɛkt dɛn.
14. Us ɔda ɛgzampul sho se Jiova nɔ de tek wan pɔsin bɛtɛ pas ɔda pɔsin?
14 Wan ɔda ɛgzampul we sho se Jiova nɔ de tek wan pɔsin bɛtɛ pas ɔda pɔsin na we i mek shɔ se ɔlman na di wɔl ebul fɔ rid di Baybul. Di orijinal langwej dɛn we dɛn rayt di Baybul pan na Ibru, Arameik, ɛn Grik. Fɔ se di wan dɛn we ebul rid di orijinal langwej dɛn we dɛn bin rayt di Baybul pan gɛt tayt padi biznɛs wit Jiova pas di wan dɛn we nɔ ebul rid di Baybul insay dɛn langwej dɛn de? Nɔ, nɔto so i bi.—Mat. 11:25.
15. Wetin-ɛn-wetin de sho se Jiova nɔ de tek wan pɔsin bɛtɛ pas ɔda pɔsin? (Luk bak di pikchɔ.)
15 Jiova nɔ de invayt wi fɔ bi in padi bikɔs wi lan bɔku buk ɔ bikɔs wi sabi tɔk di orijinal langwej dɛn we dɛn bin rayt di Baybul pan. Jiova nɔ jɔs de gi in sɛns to di wan dɛn we lan bɔku buk, bɔt i de mek ɔlman na di wɔl gɛt in sɛns ilɛksɛf dɛn lan bɔku buk ɔ dɛn nɔ lan bɔku buk. Dɛn dɔn translet in Wɔd di Baybul insay bɔku bɔku langwej dɛn so dat pipul dɛn ɔlsay na di wɔl go ebul fɔ bɛnifit frɔm di tin dɛn we i de tich, ɛn lan bɔt aw dɛn go bi in padi.—2 Tim. 3:16, 17.
Bikɔs di Baybul de insay bɔku langwej dɛn tide, aw dat de sho se Gɔd nɔ de tek wan pɔsin bɛtɛ pas ɔda pɔsin? (Luk na paregraf 15)
KƆNTINYU FƆ BI PƆSIN WE JIOVA “TEK AS IN YON”
16. Akɔdin to Akt 10:34, 35, aw wi go kɔntinyu fɔ bi pipul dɛn we Jiova de tek as in yon?
16 Na big big ɔnɔ wi gɛt fɔ lɛ Jiova wɛlkɔm wi as strenja dɛn na in tɛnt. I de du gud, sho lɔv, ɛn i lɛk strenja dɛn pas ɛnibɔdi na di wɔl. Dɔn bak, bikɔs i nɔ de tek wan pɔsin bɛtɛ pas ɔda pɔsin, i de wɛlkɔm wi ɔl ilɛk usay wi de, usay wi kɔmɔt, ɔmɔs buk wi lan, wi kɔlɔ, trayb, ej, ɔ if wi na man ɔ uman. Bɔt na di wan dɛn nɔmɔ we de obe am go bi in strenja dɛn.—Rid Akt 10:34, 35.
17. Usay wi go fɛn ɔda infɔmeshɔn bɔt aw fɔ bi strenja na Jiova in tɛnt?
17 Akɔdin to Sam 15:1, Devid bin aks dɛn kwɛstyɔn dɛn ya: “E Jiova, udat go de as strenja na yu tɛnt? Udat go de na yu oli mawntin?” Jiova bin yuz Devid fɔ ansa dɛn kwɛstyɔn dɛn ya na Sam 15. Di atikul we de afta dis wan go tɔk bɔt sɔm pan di patikyula tin dɛn we wi nid fɔ du fɔ kɔntinyu fɔ bi pɔsin we Jiova de tek as in yon.
SIŊ 32 Kɔntinyu fɔ De Nia Jiova!
