Fɔ mek Jiova gladi fɔ wi, wi fɔ gɛt fet. Bɔt di Baybul tɔk se “nɔto ɔlman gɛt fet.” (2 Tɛs. 3:2) We apɔsul Pɔl bin de tɔk dɛn wɔd dɛn ya, i bin de tɔk bɔt “bad ɛn wikɛd pipul dɛn,” we bin de mek i sɔfa. Bɔt wetin i tɔk bɔt fet aplay bak to ɔda pipul dɛn. Sɔm pipul dɛn nɔ want fɔ biliv se Gɔd de we Mek Ɔltin. (Rom. 1:20) Ɔda pipul dɛn de tɔk se dɛn biliv Gɔd. Bɔt nɔto dat nɔmɔ go mek Jiova gladi.

Wi nid fɔ biliv tranga wan se Jiova de ɛn na in de pe di wan dɛn we gɛt strɔng fet pan am. (Ibru. 11:6) Fet na wan pan di kwaliti dɛn we in oli spirit de mek pɔsin gɛt. Fɔ mek wi gɛt oli spirit, wi nid fɔ pre to Jiova fɔ mek i gi wi am. (Lyuk 11:​9, 10, 13) Wan men tin we go ɛp wi fɔ gɛt da spirit de na we wi rid Gɔd in Wɔd. Dɔn, wi kin tink bɔt wetin wi de rid ɛn tray fɔ aplay am. We wi du dat, wi de alaw Jiova in spirit fɔ ɛp wi fɔ liv wi layf di kayn we we de sho se wi gɛt fet we de mek i gladi.