1. Frɔm di biginin we Gɔd bin de mek ɔltin, wetin wi dɔn si klia wan?

FRƆM di biginin we Jiova bin de mek ɔltin, in ɛn Jizɔs bin gɛt wanwɔd. Jiova bin mek Jizɔs bifo i mek ɛni ɔda tin. Dɔn Jizɔs bin wok wit am ɛn i “bin de nia am as man we sabi wok.” (Prɔvabs 8:​30, NW) Jiova in savant dɛn bak bin de jɔyn an fɔ wok togɛda. Fɔ ɛgzampul, Noa ɛn in famili bin bil di bot togɛda. Leta, di Izrɛlayt dɛn bin wok togɛda fɔ bil di tabanakul. Ɛn dɛn bin de wok togɛda bak fɔ pul in difrɛn pat dɛn ɛn kɛr am go na ɔda ples dɛn. Insay di tɛmpul, dɛn bin de siŋ ɛn yuz difrɛn tin dɛn fɔ ple myuzik togɛda fɔ prez Jiova. Jiova in pipul dɛn bin ebul fɔ du ɔl dɛn tin ya bikɔs dɛn bin jɔyn an fɔ wok togɛda.—Jɛnɛsis 6:​14-16, 22; Di Nɔmba Dɛm 4:​4-32; Fɔs Kronikul 25:​1-8.

2. (a) Us fayn tin, dɛn fɔstɛm Kristian dɛn bin de du? (b) Us kwɛstyɔn dɛn wi go tɔk bɔt?

² Di Kristian dɛn we bin de insay di apɔsul dɛn tɛm, dɛnsɛf bin jɔyn an fɔ wok togɛda. Di apɔsul Pɔl bin ɛksplen se pan ɔl we dɛn bin gɛt difrɛn tin dɛn we dɛn ebul fɔ du ɛn wok dɛn,  dɛn bin stil gɛt wanwɔd. Dɛn ɔl bin de fala dɛn Lida, we na Jizɔs Krays. Pɔl bin tɔk se dɛn tan lɛk di bɔdi we gɛt difrɛn pat dɛn we de wok togɛda. (Rid Fɔs Lɛta Fɔ Kɔrint 12:​4-6, 12.) Bɔt we wi tide? Aw wi go jɔyn an wit wi brɔda ɛn sista dɛn fɔ du di prichin wok? Aw wi go jɔyn an wit di wan dɛn we de bifo na di kɔngrigeshɔn? Ɛn aw wi go jɔyn an wit wi famili?

3. Us vishɔn di apɔsul Jɔn bin si?

³ Insay di tɛm we di apɔsul dɛn bin de, di apɔsul Jɔn bin si wan vishɔn. I bin si sɛvin enjɛl dɛn we bin de blo trɔmpɛt dɛn. We di nɔmba fayv enjɛl bin blo in yon trɔmpɛt, Jɔn bin si “wan sta we bin dɔn fɔdɔm kɔmɔt na ɛvin kam pan di wɔl.” Da “sta” de bin yuz wan ki fɔ opin di domɔt usay wan dip, dak ol de. Fɔs, na tik smok bin kɔmɔt insay di ol, dɔn bɔku bɔku lokɔs dɛn flay kɔmɔt na di smok. Dɛn lokɔs ya nɔ atak di tik dɛn ɔ di plant dɛn, bifo dat, dɛn go atak “dɛn pipul nɔmɔ we nɔ bin gɛt Gɔd in stamp pan dɛn fɔrɛd.” (Rɛvɛleshɔn 9:​1-4) Jɔn bin no se bɔku bɔku lokɔs dɛn kin pwɛl plɛnti tin dɛn; dɛn bin dɔn du so na Ijipt insay Mozis in tɛm. (Ɛksodɔs 10:​12-15) Di lokɔs dɛn we Jɔn bin si tinap fɔ di anɔyntɛd Kristian dɛn we dɔn de prich wan pawaful mɛsej agens lay lay rilijɔn. Ɛn bɔku bɔku ɔda pipul dɛn we de wet fɔ di tɛm we dɛn go gɛt layf na dis wɔl dɔn jɔyn dɛn fɔ prich. Dɛn gɛt wanwɔd we dɛn de du dis prichin wok togɛda. Dis wok dɔn ɛp bɔku pipul dɛn fɔ lɛf lay lay rilijɔn ɛn kɔmɔt ɔnda Setan.

4. Us wok Gɔd in pipul dɛn gɛt fɔ du? Wetin nɔmɔ go mek dɛn ebul fɔ du dis wok?

⁴ Wi gɛt wok fɔ prich di “Gud Nyuz” to pipul dɛn ɔlsay na di wɔl bifo di ɛnd kam. Dis na big big wok! (Matyu 24:​14; 28:​19, 20) Wi de kɔl ɔl di wan dɛn we “tɔsti” ɛn we want fɔ drink “wata we de gi layf,” dat min se wi gɛt fɔ tich di tru tin dɛn na di Baybul to ɔl di wan dɛn we want fɔ ɔndastand am. (Rɛvɛleshɔn 22:​17) Bɔt di tin nɔmɔ we go mek wi ebul fɔ du dis na we wi “jɔyn” an wit wi brɔda ɛn sista dɛn na di kɔngrigeshɔn.—Lɛta Fɔ Ɛfisɔs 4:​16.

5, 6. Aw wi de jɔyn an wit wi brɔda dɛn we wi de prich?

⁵ Fɔ lɛ wi go ebul fɔ prich to bɔku pipul dɛn, wi nid fɔ rili ɔganayz wi prichin wok. Di tin dɛn we dɛn kin tɛl wi na di kɔngrigeshɔn kin ɛp wi fɔ du dis. Afta we wi dɔn mit fɔ fil savis, wi kin go tɔk to pipul dɛn bɔt di gud nyus bɔt Gɔd in Kiŋdɔm. Wi de gi dɛn bak buk dɛn we de tɔk bɔt di Baybul. Infakt, i dɔn pas ɔmɔs milyɔn buk ɛn magazin dɛn we wi dɔn gi ɔlsay na di wɔl. Sɔm tɛm dɛn de, dɛn de tɛl wi fɔ du spɛshal prichin. We yu du dis wok, yu de jɔyn an wit bɔku bɔku pipul dɛn ɔlsay na di wɔl we de prich bɔt di sem tin! Yu de wok bak wit di enjɛl dɛn we de ɛp Gɔd in pipul dɛn fɔ prich di gud nyus.—Rɛvɛleshɔn 14:​6.

⁶ Wi kin gladi fɔ rid di Yearbook fɔ no aw di prichin wok de go bifo ɔlsay na di wɔl! Tink bak bɔt aw wi kin jɔyn an fɔ invayt pipul dɛn na wi kɔnvɛnshɔn dɛn ɔlsay na di wɔl. Na dɛn kɔnvɛnshɔn ya, wi ɔl de lisin to di sem tin. Wi kin gɛt tɔk dɛn, drama dɛn, ɛn shɔt ple dɛn we de sho wetin di program de tɔk bɔt. Ɔl dɛn tin ya de ɛp wi fɔ gi Jiova wi bɛst. Wi de gɛt wanwɔd wit wi brɔda ɛn sista dɛn ɔlsay na di wɔl we wi de atɛnd di Mɛmorial ɛvri ia. (Fɔs Lɛta Fɔ Kɔrint 11:​23-26) Wi de mit togɛda di sem de, Naysan 14, afta we di san dɔn go dɔŋ fɔ sho se wi gladi fɔ wetin  Jiova dɔn du fɔ wi ɛn fɔ obe di lɔ we Jizɔs bin gi wi. Sɔm wiks bifo di Mɛmorial, wi de wok togɛda fɔ invayt bɔku pipul dɛn fɔ kam jɔyn wi pan dis impɔtant program.

7. Wetin-ɛn-wetin wi ebul fɔ du we wi de wok togɛda?

⁷ Wan lokɔs nɔmɔ nɔ go ebul fɔ pwɛl bɔku tin. Semweso, wi wangren nɔ go ebul fɔ prich to ɔlman. Bɔt bikɔs wi de jɔyn an fɔ wok togɛda, wi go ebul fɔ tɔk to bɔku bɔku pipul dɛn bɔt Jiova ɛn ɛp sɔm fɔ kam prez ɛn ɔnɔ am.

8, 9. (a) Us ɛgzampul di apɔsul Pɔl bin yuz fɔ sho Kristian dɛn wetin mek i impɔtant fɔ gɛt wanwɔd? (b) Aw wi go jɔyn an wit di wan dɛn we de bifo na di kɔngrigeshɔn?

⁸ Pɔl bin ɛksplen to di brɔda dɛn na Ɛfisɔs bɔt aw di kɔngrigeshɔn ɔganayz ɛn i bin tɛl dɛn se dɛn ɔl na di kɔngrigeshɔn nid fɔ du “wetin Krays want.” (Rid Lɛta Fɔ Ɛfisɔs 4:​15, 16.) Pɔl bin yuz di bɔdi as ɛgzampul fɔ ɛksplen se ɛnibɔdi we na Kristian kin ɛp di kɔngrigeshɔn fɔ gɛt wanwɔd ɛn fala Jizɔs, we na di Lida na di kɔngrigeshɔn. I bin tɔk se “na dɛn difrɛn, difrɛn jɔynt na di bɔdi” de jɔyn an fɔ wok togɛda. So i nɔ mata if wi ol ɔ wi yɔŋ, wi gɛt wɛlbɔdi ɔ wi nɔ gɛt wɛlbɔdi, wetin wi ɔl fɔ du?

⁹ Jizɔs bin dɔn pik di ɛlda dɛn fɔ de bifo na di kɔngrigeshɔn, ɛn i want wi fɔ rɛspɛkt dɛn ɛn fala ɛni advays we dɛn gi wi. (Di Ibru Pipul Dɛn 13:​7, 17) Dis nɔ kin izi fɔ du ɔltɛm. Bɔt wi kin aks Jiova fɔ ɛp wi. In oli spirit kin ɛp wi fɔ fala ɛni advays we di ɛlda dɛn gi wi ɔ ɛnitin we dɛn tɛl wi fɔ du. Tink bak bɔt aw wi kin ɛp di kɔngrigeshɔn if wi put wisɛf dɔŋ ɛn jɔyn an wit di ɛlda dɛn. Wi kɔngrigeshɔn go gɛt wanwɔd, ɛn wi go lɛk wi brɔda ɛn sista dɛn mɔ ɛn mɔ.

10. Aw ministerial savant dɛn de ɛp fɔ lɛ wanwɔd de na di kɔngrigeshɔn? (Luk di pikchɔ nia dis atikul in taytul.)

¹⁰ Ministerial savant dɛn bak de ɛp fɔ lɛ wanwɔd de na di kɔngrigeshɔn. Dɛn de wok tranga wan fɔ ɛp di ɛlda dɛn, ɛn wi gladi fɔ wetin dɛn de du. Fɔ ɛgzampul, ministerial savant dɛn de mek shɔ se wi gɛt bɔku buk dɛn fɔ prich wit, ɛn dɛn de wɛlkɔm di nyu wan dɛn we de kam wi mitin dɛn. Dɛn de wok tranga wan bak fɔ mek di say dɛn we dɔn pwɛl na di Kiŋdɔm Ɔl ɛn mek shɔ se i klin ɔltɛm. We wi jɔyn an wit dɛn brɔda dɛn ya, wi go gɛt wanwɔd ɛn wi go ɔganayz we wi de sav Jiova.—Luk Di Apɔsul Dɛn Wok [Akt] 6:​3-6.

11. Wetin yɔŋ wan dɛn go du fɔ ɛp fɔ mek wanwɔd de na di kɔngrigeshɔn?

¹¹ Sɔm ɛlda dɛn dɔn wok tranga wan na di kɔngrigeshɔn fɔ lɔng lɔng tɛm. Bɔt sɔntɛm dɛn nɔ ebul fɔ du bɛtɛ igen lɛk trade bikɔs dɛn dɔn de ol. Di yɔŋ brɔda dɛn kin ɛp. If dɛn tren dɛn, dɛn go ebul fɔ du mɔ wok na di kɔngrigeshɔn. Ɛn we ministerial savant dɛn wok tranga wan, dɛn go ebul fɔ bi ɛlda dɛn as tɛm de go. (Fɔs Lɛta To Timoti 3:​1, 10) Sɔm yɔŋ ɛlda dɛn dɔn rili go bifo pan Gɔd biznɛs. Tide, dɛn na sakit ovasia dɛn ɛn dɛn de ɛp brɔda ɛn sista dɛn na bɔku kɔngrigeshɔn dɛn. Wi gladi we yɔŋ wan dɛn rɛdi fɔ wok fɔ di brɔda ɛn sista dɛn.—Rid Sam 110:​3; Ɛkliziastis 12:​1.

12, 13. Wetin go ɛp ɔlman na di famili fɔ jɔyn an togɛda?

¹² Aw wi go ɛp ɔlman na di famili fɔ jɔyn an togɛda? Di famili wɔship we wi de du ɛni wik go ɛp wi. We mama, papa, ɛn  pikin dɛn de spɛn tɛm togɛda fɔ lan bɔt Jiova, dɛn de lɛk dɛnsɛf mɔ ɛn mɔ. Na da tɛm de dɛn kin praktis ɔ lan wetin-ɛn-wetin dɛn go tɔk we dɛn de prich, we go ɛp dɛn ɔl fɔ pripia. Ɛn we dɛn de yɛri ɛni wan pan dɛn de tɔk bɔt di trut ɛn si aw dɛn ɔl na di famili lɛk Jiova ɛn rɛdi fɔ du wetin i want, dis de ɛp dɛn fɔ lɛ dɛn kam nia dɛnsɛf mɔ ɛn mɔ.

¹³ Aw maredman ɛn mareduman go jɔyn an togɛda? (Matyu 19:​6) We dɛn ɔl tu lɛk Jiova ɛn dɛn de sav am togɛda, dɛn go gladi ɛn gɛt wanwɔd na dɛn mared-os. Dɛn fɔ de sho se dɛn lɛk dɛnsɛf jɔs lɛk aw Ebraam ɛn Sera, Ayzak ɛn Ribɛka, ɛn Ɛlkena ɛn Ana bin de du. (Jɛnɛsis 26:​8; Fɔs Samiɛl 1:​5, 8; Pita In Fɔs Lɛta 3:​5, 6) We maredman ɛn mareduman de du dis, dɛn go gɛt wanwɔd ɛn kam nia Jiova mɔ ɛn mɔ.—Rid Ɛkliziastis 4:​12.

14. If yu man ɔ wɛf nɔ de sav Jiova, wetin yu go du fɔ mek yu mared nɔ skata?

¹⁴ Di Baybul tɔk klia wan se wi nɔ fɔ mared to pɔsin we nɔ de sav Jiova. (Sɛkɛn Lɛta Fɔ Kɔrint 6:​14) Bɔt wi gɛt brɔda ɛn sista dɛn we mared to pɔsin we nɔto Jiova Witnɛs. Sɔm dɛn lan di trut afta we dɛn dɔn mared, ɛn dɛn man ɔ wɛf nɔ bi Jiova Witnɛs. Ɔda wan dɛn mared pipul dɛn we de sav Jiova, bɔt dɛn man ɔ wɛf bin lɛf fɔ sav Jiova leta. Dɛn kayn tin ya fɔ mek Kristian dɛn du ɔl wetin dɛn ebul fɔ mek dɛn mared nɔ skata ɛn fala di advays dɛn we de insay di Baybul. Dis nɔ kin izi fɔ du ɔltɛm. Fɔ ɛgzampul, Meri ɛn in man, we na Devid, bin de wɔship Jiova togɛda. Bɔt as tɛm de go, Devid bin lɛf fɔ go di mitin dɛn. Pan ɔl dat, Meri bin kɔntinyu fɔ bi gud wɛf ɛn sho di fayn fayn kwaliti dɛn we Kristian uman dɛn fɔ gɛt. Dɔn i bin de tich in siks pikin dɛn bɔt Jiova ɛn kɔntinyu fɔ go di mitin ɛn kɔnvɛnshɔn dɛn. Afta we di pikin dɛn dɔn big ɛn go de fɔ dɛnsɛf, Meri bin stil de sav Jiova pan ɔl we tin nɔ bin rili izi fɔ am naw. As tɛm de go, Devid bin bigin fɔ rid di magazin dɛn we Meri bin de lɛf fɔ am. Afta sɔm tɛm, i bigin fɔ go sɔm mitin dɛn bak. In siks ia ol granpikin bin de kip sit fɔ am ɔltɛm, ɛn if in granpa nɔ kam di mitin, i kin se, “Granpa, a mis yu na di mitin tide.” Afta  25 ia, Devid bin kam bak to Jiova ɛn naw in ɛn in wɛf gladi we dɛn de sav Jiova togɛda.

15. Aw di wan dɛn we dɔn te we dɛn dɔn mared kin ɛp di wan dɛn we jɔs mared?

¹⁵ Setan de atak famili dɛn tide. Dat na wan rizin we mek maredman ɛn mareduman we de sav Jiova nid fɔ jɔyn an ɛn du tin togɛda. I nɔ mata ɔmɔs ia una dɔn tek we una dɔn mared, una fɔ tink bɔt wetin una go se ɔ du fɔ mek una mared nɔ go skata. If yu ɛn yu man dɔn te we una mared, una kin bi gud ɛgzampul fɔ di wan dɛn we jɔs mared. Sɔntɛnde una kin invayt di wan dɛn we jɔs mared fɔ kam jɔyn una pan una famili wɔship. Dɛn go si se i nɔ mata ɔmɔs ia pɔsin dɔn mared fɔ, dɛn fɔ stil sho se dɛn lɛk dɛnsɛf ɛn gɛt wanwɔd.—Taytɔs 2:​3-7.

16, 17. Wetin Gɔd in pipul dɛn we gɛt wanwɔd de wet fɔ?

¹⁶ We di Izrɛlayt dɛn bin de go dɛn fɛstival dɛn na Jɛrusɛlɛm, dɛn bin de jɔyn an togɛda wit dɛn kɔmpin Izrɛlayt dɛn. Dɛn bin de pripia ɔl wetin dɛn nid fɔ go wit. Dɔn, dɛn bin de ɛp dɛnsɛf we dɛn de travul. Na di tɛmpul, dɛn ɔl bin de prez ɛn wɔship Jiova togɛda. (Lyuk 2:​41-44) Tide, as wi de rɛdi fɔ gɛt layf na di nyu wɔl, wi nid fɔ gɛt wanwɔd ɛn du ɔl wetin wi ebul fɔ jɔyn an ɛn du tin togɛda. Yu kin tink bɔt we dɛn we yu go ebul fɔ du dis mɔ ɛn mɔ?

¹⁷ Pipul dɛn na di wɔl nɔ kin gri pan bɔku tin ɛn dɛn kin ivin fɛt dɛnsɛf. Bɔt wi tɛl Jiova tɛnki bikɔs i de ɛp wi fɔ gɛt pis ɛn mek wi ɔndastand di trut! Jiova in pipul dɛn ɔlsay na di wɔl de wɔship am di we aw i want dɛn fɔ wɔship am. Na insay dis las dez mɔ, Jiova in pipul dɛn dɔn gɛt wanwɔd. Jɔs lɛk aw di prɔfɛt Ayzaya ɛn Mayka bin tɔk, wi de go ɔp “PAPA GƆD in mawnten” togɛda. (Ayzaya 2:​2-4; rid Mayka 4:​2-4.) Wi go gladi fɔ si we ɔl di pipul dɛn na dis wɔl go jɔyn an tumara bambay fɔ se “na Krays mek ɔl dɛn difrɛn pat pan di bɔdi jɔyn wan ples.”